ABAZUNGURA BA KABURAME Samson Re

# ABAZUNGURA BA KABURAME Samson Re

- Source: Amategeko - Section: Decisions (Judgements) - Date: 2021-09-30 - Case/document no.: RS/INTERT/ RC 00001/2021/CA - Collection: Court of Appeal

## Text

## Page 1

ABAZUNGURA BA KABURAME Samson Re [Rwanda URUKIKO RW’UBUJURIRE – RS/INTERT/ RC 00001/2021/CA (Nyirandabaruta P.J., Mukanyundo na Umugwaneza J.) 30 Nzeri 2021] Imiburanishirize y’imanza mbonezamubano – gukosoza urubanza – Iyo havuzwe isambu iburanwa mu rubanza, n’ igice cy’isambu ibaruwe kuri UPI (Amasezerano y’ubukode burambye y’ubutaka) runaka cyaregewe nubwo UPI yaba iriho igice cyaregewe n’ikitararegewe. Incamake y’ikibazo: Uru rubanza rwatangiye , Reberaho Prince uhagarariye umuryango wa Reberaho arega abazungura ba Kaburame mu Rukiko Rwisumbuye rwa Ngoma ko bamutwariye isambu, asaba ko bayimusubiza kuko se Reberaho yayiguze na Mukagatare mu mwaka, ariko ko inyandiko y’ubugure yahiriye mu nzu igihe cya Jenoside yakorewe Abatutsi mu mwaka wa 1994. Kaburame we akavuga ko isambu ari iyabo kubwa gakondo ko umuryango we wayisize muri 1960 ugahunga bakahasiga umuntu, bakaza kuyisubirana aho bahungukiye mu mwaka wa 1994. Urukiko rwemeje ko isambu iburanwa ari iy’Abazungura ba Kaburame rushingiye ku nyandiko z’abayobozi. Abazungura ba Reberaho bajuriye mu Rukiko Rukuru, Urugereko rwa Rwamagana, bavuga ko Urukiko Rwisumbuye rwa Ngoma rwirengagije amahano yabaye mu Rwanda ari nabwo amasezerano y’ubugure bw’isambu iburanwa yahiriye mu nzu, maze ntirwaha agaciro imvugo z’abatangabuhamya. Abazungura ba Kaburame bo bavuga ko ubujurire bwabo nta shingiro bufite. Urukiko Rukuru, rwemeje ko ubujurire bwa Reberaho nta shingiro bufite kuri byose, ko imikirize y’urubanza rwaciwe n’Urukiko Rwisumbuye idahindutse mu ngingo zayo zose. Abazungura ba Reberaho bahagarariwe na Reberaho Prince ntibishimiye icyemezo cy’Urukiko Rukuru, bagana Urwego rw’Umuvunyi basaba ko urubanza rwaciwe n’Urukiko Rukuru rusubirwamo ku mpamvu z’akarengane, maze Umuvunyi Mukuru yandikira Perezida w’Urukiko rw’Ikirenga amusaba ko urwo rubanza rusubirwamo ku mpamvu z’akarengane. Perezida w’Urukiko rw’Ikirenga amaze kurusuzuma, yategetse ko urwo rubanza rwongera kuburanishwa, hanyuma arwohereza mu Rukiko rw’Ubujurire kugira ngo ruruburanishe. Urukiko rw’ubujurire rwemeje ko ikirego cy’Abazungura ba Reberaho bahagarariwe na Reberaho Prince cyo gusubirishamo urubanza rwaciwe n’Urukiko Rukuru, Urugereko rwa Rwamagana ku mpamvu z'akarengane gifite ishingiro, rwemeza ko isambu iburanwa ibaruye kuri UPI: 5/04/01/04/1205, yanditswe kuri Kaburame ari iy’Abazungura ba Reberaho bahagarariwe na Reberaho Prince. Abazungura ba Kaburame bahagarariwe na Sharita batanze ikirego basaba gusobanura uru rubanza rwaciwe n’Urukiko rw’Ubujurire. Iburanisha ry’urubanza ryabaye mu nama y’Abacamanza. Abazungura ba Kaburame bavuga ko mu rubanza rwaciwe n’Urukiko rw’Ubujurire, igice cy’isambu cyaregewe n’ikitararegewe kandi kitanaburanywe, biri ku cyangombwa kimwe byose urukiko rwabihaye abazungura ba Reberaho, bakaba barahawe isambu bataregeye kandi itaraburanwe. Urukiko rwemeje ko, nta kidasobanutse mu cyemezo rwafashe mu rubanza RS/INJUST/RC 00003/2019/CA rwaciwe n’Urukiko rw’Ubujurire. Incamake y’icyemezo: Iyo havuzwe isambu iburanwa mu rubanza, ni igice cy’isambu ibaruwe kuri UPI (Amasezerano y’ubukode burambye y’ubutaka) runaka cyaregewe. Bityo kuba isambu iburanwa

## Page 2

n’itaburanwa ibaruye kuri UPI imwe, Urukiko rugateka ko igice kiburanwa gitsindiwe n’uwareze ntabwo bigomba kumvikana ko isambu yose yayitsidiye. Ikirego gisobanuza Urubanza nta shingiro gifite. Amategeko yashingiweho: Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 138. Nta manza zifashishijwe. Urubanza I. IMITERERE Y’URUBANZA [1] Uru rubanza rwatangiriye mu Rukiko Rwisumbuye rwa Ngoma, Reberaho Prince uhagarariye umuryango wa Reberaho Janvier na Kayitesi Marie Odette, arega abazungura ba Kaburame Samson ko bamutwariye isambu, agasaba ko bayimusubiza kuko se Reberaho Janvier yayiguze na Mukagatare Marlène mu mwaka wa 1985, ariko ko inyandiko y’ubugure yahiriye mu nzu igihe cya Jenoside yakorewe Abatutsi mu mwaka wa 1994. [2] Reberaho Prince yasobanuraga ko se Reberaho Janvier amaze kugura iyo sambu, yayitunganyije, ayikoreramo kandi ko ariyo yari atuyemo n’umuryango we, ari naho umugore we n’abana be batandatu biciwe, ko yahimutse nyuma ya Jenoside yakorewe abatutsi mu mwaka wa 1994 akajya gutura mu Mudugudu ariko ko yakomeje kuyigiramo ibikorwa kugeza apfuye mu mwaka wa 1996. Avuga ko nyuma ariko umuryango wa Kaburame Samson wari uhagarariwe n’umugore we Kaburame Florence waje kwigabiza isambu yabo ubifashijwemo n’uwari Konseye w’Umurenge wa Gahini witwa Mugenzi John, mubyara wa Kaburame, ubu bakaba barayubatsemo inzu ndetse banayishyinguramo ababyeyi babo bombi. Reberaho Prince avuga ko n’umubyeyi wabo Reberaho Janvier ariho ashyinguye usibye ko imva ye ubu batazi aho iherereye kubera ibikorwa abazungura ba Kaburame Samson bahakoze bikazimanganya aho yari iri. [3] Urukiko Rwisumbuye rwa Ngoma rwaciye urubanza RC0059/09/TGI/NGOMA ku wa 26/05/2011, rwemeza ko isambu iburanwa ari iy’Abazungura ba Kaburame Samson rushingiye ku nyandiko z’abayobozi zo ku wa 23/01/1996 no ku wa 22/10/2002 zigaragaza ko iyo sambu ari iyabo, naho imvugo z’abatangabuhamya babajijwe mu Rukiko rw’Ibanze rwa Rukara zikaba nta shingiro zifite kuko urubanza zigaragaramo rwavanyweho n’Urukiko Rwisumbuye rwa Ngoma. [4] Abazungura ba Reberaho Janvier bajuririye Urukiko Rukuru, Urugereko rwa Rwamagana, bavuga ko Urukiko Rwisumbuye rwa Ngoma rwirengagije amahano yabaye mu Rwanda ari nabwo amasezerano y’ubugure bw’isambu iburanwa yahiriye mu nzu, maze ntirwaha agaciro imvugo z’abatangabuhamya, kandi ko impamvu rwatanze y’uko izi mvugo zitahawe agaciro kubera ko ziri mu rubanza rwavuyeho igaragaza kunyuranya n’itegeko, ko mu bujurire bwabo, bavugaga kandi ko Urukiko Rwisumbuye rwirengagije abazi ukuri, mu iperereza rwakoze rwibariza abantu babiri gusa kandi bo mu muryango wa Kaburame Samson, ntirwaha agaciro kamwe ibimenyetso by’impande zombi.

## Page 3

[5] Urukiko Rukuru, Urugereko rwa Rwamagana rwaciye urubanza RCA0033/11/HC/RWG ku wa 16/11/2012, rwemeza ko ubujurire bwatanzwe n’umuryango wa Reberaho Janvier nta shingiro bufite kuri byose, ko imikirize y’urubanza RC 0059/O9/TGI/NGOMA idahindutse mu ngingo zayo zose. [6] Abazungura ba Reberaho Janvier bahagarariwe na Reberaho Prince ntibishimiye icyo cyemezo, bagana Urwego rw’Umuvunyi basaba ko urubanza RCA 0033/11/HC/RWG rusubirwamo ku mpamvu z’akarengane, maze ku wa 22/06/2017, Umuvunyi Mukuru yandikira Perezida w’Urukiko rw’Ikirenga amusaba ko urwo rubanza rusubirwamo ku mpamvu z’akarengane. Perezida w’Urukiko rw’Ikirenga amaze kurusuzuma, yategetse ko uru rubanza rwongera gusubirwamo arwohereza mu Rukiko rw’Ubujurire kugira ngo ruruburanishe. [7] Urukiko rw’ubujurire rwaciye urubanza RS/INJUST/RC 00003/2019/CA, ku wa 14/5/2021, rwemeza ko ikirego cy’Abazungura ba Reberaho Janvier bahagarariwe na Reberaho Prince cyo gusubirishamo urubanza RCA0033/11/HC/RWG rwaciwe n’Urukiko Rukuru, Urugereko rwa Rwamagana ku wa 16/11/06/2012, ku mpamvu z'akarengane gifite ishingiro, rwemeza ko isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, yanditswe kuri Kaburame ari iy’Abazungura ba Reberaho Janvier bahagarariwe na Reberaho Prince. [8] Uru Rukiko kandi rwategetse ko Umubitsi w’impapurompamo z’ubutaka kwandika isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, ivanwa kuri Kaburame yanditseho, maze ikandikwa ku Bazungura ba Reberaho Janvier bahagarariwe na Reberaho Prince, rwemeza ko igice cy’isambu iburanwa cyubatsemo inzu kwa Kaburame Samson batuyemo, imbuga, ibikari ahubatswe annexes, imiharuro, n’ahandi hakikije inzu, bishyura ingurane ya 1,201,800Frw, Abazungura ba Reberaho Janvier hagakomeza kubandikwaho; [9] Rwategetse Abazungura ba Kaburame Samson kwishyura Abazungura ba Reberaho Janvier bahagarariwe na Reberaho Prince indishyi zose hamwe zingana na 6.701.800Frw rutegeka ko urubanza RCA0033/11/HC/RWG rwaciwe n’Urukiko Rukuru Urugereko rwa Rwamagana ku wa 16/11/06/2012 ruhindutse mu ngingo zarwo zose. [10] Abazungura ba Kaburame Samson bahagarariwe na Sharita Frieda batanze ikirego basaba gusobanura uru rubanza rwaciwe n’Urukiko rw’Ubujurire. Iburanisha ry’urubanza ryabaye mu nama y’Abacamanza ku wa 23/19/2021. II.IKIBAZO KIGIZE URUBANZA N’ISESENGURA RYACYO Kumenya niba urukiko rwarahaye isambu yose ya Kaburame Samson Abazungura ba Reberaho Janvier bahagarariwe na Reberaho Prince. [11] Abazungura ba Kaburame Samson bahagarariwe na Sharita Frieda bavuga ko mu rubanza rwaciwe n’Urukiko rw’Ubujurire, igice cy’isambu cyaregewe n’ikitararegewe kandi kitanaburanywe, biri ku cyangombwa kimwe byose urukiko rwarabihaye abazungura ba Reberaho Janvier bahagarariwe na Reberaho Prince bakaba barahawe n’isambu bataregeye kandi itaraburanwe, bityo Urukiko rukaba rugomba gusobanura uru rubanza hakagaragazwa ingano y’igice cyaburanywe n’ingano y’igice kitaburanywe kuko byose bisanzwe byanditse kuri Kaburame kuri numero urukiko rwavuze ko yose yandikwa ku bazungura ba Reberaho Janvier.

## Page 4

Uko Urukiko rubibona [12] Ingingo ya 138 y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko Ibirego bisaba ʺ gusobanura cyangwa gukosora amakosa ari mu rubanza biregerwa urukiko rwaciye urwo rubanza, bigasuzumwa n’umucamanza waruciye.Iyo bidashobotse bishyikirizwa undi mucamanza”. [13] Nk’uko byagiye bisobanurwa n’Urukiko rw’Ikirenga ndetse n’izindi nkiko, ikirego gisaba gusobanura urubanza kiba kigamije gusobanura urubanza rwaciwe mu buryo butumvikana cyangwa mu buryo bushobora kumvikana mu buryo bunyuranye. [14] Ku birebana n’uru rubanza, kopi y’urubanza igaragaza ko Urukiko rw’Ubujurire rwemeje ko urubanza RCA0033/11/HC/RWG rwaciwe n’Urukiko Rukuru, Urugereko rwa Rwamagana ku wa 16/11/06/2012 rurimo akarengane kakorewe Abazungura ba Reberaho Janvier. [15] Urukiko rw’Ubujurire rwemeje kandi ko isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, yanditswe kuri Kaburame ari iy’Abazungura ba Reberaho Janvier bahagarariwe na Reberaho Prince. [16] Uru Rukiko kandi rwategetse ko Umubitsi w’impapurompamo z’ubutaka kwandika isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, ivanwa kuri Kaburame yanditseho, maze ikandikwa ku Bazungura ba Reberaho Janvier bahagarariwe na Reberaho Prince, rwemeza ko igice cy’isambu iburanwa cyubatsemo inzu kwa Kaburame Samson batuyemo, imbuga, ibikari ahubatswe annexes, imiharuro, n’ahandi hakikije inzu, bishyura ingurane ya 1,201,800Frw, Abazungura ba Reberaho Janvier hagakomeza kubandikwaho; [17] Muri uru rubanza Abazungura ba Kaburame Samson bavuga ko urukiko rwahaye isambu yose iburanwa ibaruye kuri UPI: 5/04/01/04/1205 Abazungura ba Reberaho Janvier, rwirengagije ko itaburanwaga yose kuko hari igice kiri munsi y’umuhanda kitaburanwa ariko cyanditse kuri kiriya cyangombwa bagasaba ko urukiko rwabisobanura neza. [18] Urukiko rurasanga mu gika cya 68 cy’urubanza rusabirwa gusobanurwa, rwaravuze ngo :Urukiko rurasanga nk’uko rwabibonye igihe rwari mu iperereza, isambu igomba gusubizwa Abazungura ba Reberaho Janvier ihera ku ruzitiro rw’inzu y’umuryango wa Kaburame Samson, ikagarukira ku gakingo kari hepfo y’igiti cy’umuguruka giteye muri iyo sambu. Igice cyo hepfo y’ako gakingo hagakomeza kuba aho kwa Kaburame Samson. Mu myumvire y’Urukiko isambu igomba kwegukanwa n’Abazungura ba Reberaho Janvier, ari iyo uyu nyakwigendera yagurishijwe na Mukagatare Marlène gusa, hakuwemo igice umuryango wa Kaburame Samson wubatsemo baherewe ingurane. [19] Urukiko rurasanga uburyo rwasobanuye isambu igomba kuba iy’Abazungura ba Reberaho Janvier ndetse n’iy’abazungura ba Kaburame Samson mu gika kivuzwe haruguru byumvikana neza ko atari isambu yose ibaruye kuri UPI: 5/04/01/04/1205, nk’uko uwatanze ikirego abivuga, ahubwo ari igice nk’uko cyasobanuwe muri kiriya gika, kandi munsi y’agakingo kavuzwe ni naho hari agahanda kavugwa n’abatanze ikirego gisobanuza, kagabanya ayo masambu yombi, bikaba rero byumvikana ko isambu yose ibaruye kuri UPI: 5/04/01/04/1205 itahawe Abazungura ba Reberaho Janvier kuko batayiregeraga yose.

## Page 5

[20] Iyo havuzwe isambu iburanwa muri uru rubanza, ni igice cy’isambu ibaruwe kuri UPI: 5/04/01/04/1205, Reberaho Prince yaregeye ko yasubizwa kuko kwa Kaburame Samson bibarujeho isambu yari iya Reberaho Janvier n’isambu yari iya Kaburame Samson yarasigaye icungwa n’umukozi we Makambira igihe yari yarahunze nk’uko Reberaho Prince n’abatangabuhamya babisobanuye igihe cy’iperereza. Reberaho Prince ntiyigeze aregera isambu yose ibaruye kuri UPI: 5/04/01/04/1205. [21] Urukiko rurasanga hashingiwe ku bisobanuro bitanzwe haruguru, nta kidasobanutse icyemezo rwafashe mu rubanza RS/INJUST/RC00003/2019/CA, bityo ikirego cyatanzwe n’Abazungura ba Kaburame Samson bahagarariwe na Sharita Frieda kikaba nta shingiro gihawe. III. ICYEMEZO CY’URUKIKO [22] Rwemeje ko ikirego cy’ abazungura ba Kaburame Samson bahagarariwe na Sharita Frieda gisaba gusobanuza urubanza RS/INJUST/RC 00003/2019/CA, rwaciwe n’Urukiko rw’Ubujurire ku wa 14/5/2021, nta shingiro gifite. [23] Rwemeje ko nta kidasobanutse muri urwo rubanza.