ABAZUNGURA BA REBERAHO v ABAZUNGURA BA KABURAME

# ABAZUNGURA BA REBERAHO v ABAZUNGURA BA KABURAME

- Source: Amategeko - Section: Decisions (Judgements) - Date: 2021-05-14 - Case/document no.: RS/INJUST/ RC/00003/2019/CA - Collection: Court of Appeal

## Text

## Page 1

ABAZUNGURA BA REBERAHO v ABAZUNGURA BA KABURAME [Rwanda URUKIKO RW’UBUJURIRE – RS/INJUST/ RC/00003/2019/CA (Nyirandabaruta, P.J., Umugwaneza, Mukanyundo J.) 14 Gicurasi 2021] Itegeko rigenga itangwa ry’ibimenyetso mu manza – kubura kw’amasezerano y’ubugure – kuba amasezerano y’ubugure adashobora kuboneka kubera impamvu zikomeye nk’ibibazo u Rwanda rwanyuzemo mu mwaka wa 1994 ntacyabuza Urukiko gushingira ku bindi bimenyetso nk’ubuhamya cyangwa ibicukumbuye kugiramgo ukuri kugaragare Indishyi – indishyi z’akababaro – Indishyi zo kwimura imva y’umubyeyi cyangwa umuvandimwe w’urega mu isambu yashyinguwemo ku buryo adashobora kumenya aho ashyinguye ziratangwa. Incamake y’ikibazo: Urubanza rwatangiye Reberaho uhagarariye umuryango wa Reberaho na Kayitesi arega abazungura ba Kaburame mu Rukiko Rwisumbuye rwa Ngoma ko bamutwariye isambu, agasaba ko bayimusubiza kuko se Reberaho yayiguze na Mukagatare, ariko ko inyandiko y’ubugure atayibona kuko yarahiriye mu nzu igihe cya Jenoside yakorewe Abatutsi mu mwaka wa 1994. Abazungurz ba Kaburame bo bavuga ko isambu ariyabo. Urukko rwemeje ko isambu ari iy’Abazungura ba Kaburame rushingiye ku nyandiko z’abayobozi zemeza ko ari iyabo. Abazungura ba Reberaho bajuririye Urukiko Rukuru bavuga ko Urukiko Rwisumbuye rwa Ngoma ko amasezerano y’ubugure bw’isambu iburanwa yahiriye mu nzu mu mwaka wa 1994, ngo rwirengagije kandi imvugo z’abatangabuhamya. aaAbazungura ba Kaburame bo bavuga ko ubujurire bwabo nta shingiro bufite. Urukiko Rukuru, Urugereko rwa Rwamagana, rwemeje ko ubujurire bwatanzwe n’umuryango wa Reberaho nta shingiro bufite. Abazungura ba Reberaho bahagarariwe na Reberaho Prince ntibishimiye icyo cyemezo, bandikira urwego rw’Umuvunyi basaba ko urubanza rwaciwe n’Urukiko Rukuru Urugereko rwa Rwamagana rusubirwamo ku mpamvu z’akarengane, hanyuma Umuvunyi Mukuru amaze kubisuzuma yandikiye Perezida w’Urukiko rw’Ikirenga amusaba ko urwo rubanza rusubirwamo ku mpamvu z’akarengane. Perezida w’Urukiko rw’Ikirenga amaze nawe kurusuzuma, yategetse ko rwongera kuburanishwa, arwohereza mu Rukiko rw’Ubujurire kugira ngo ruruburanishe. Reberaho Prince avuga ko akarengane umuryango we wagiriwe ari uko Urukiko Rukuru, rwavuze ko ubujurire bwa Reberaho Prince nta shingiro bufite, kubera ko atagaragaza amasezerano y’ubugure cyangwa icyemezo cy’Ubushinjacyaha kigaragaza ko ayo masezerano yatakaye kandi hari imvugo z’abatangabuhamya zemeza ko iriya sambu ari iyabo. Abazungura ba Kaburame n’ubunganira basobanuye ko nta karengane kari muri urwo rubanza kuko ntacyo Urukiko rwirengagije. Bavuga ko isambu iburanwa bayitunze kuva mu mwaka 1950 k’ubw’Umuco. Urukiko rwemeje ko Urubanza rwaciwe n’Urukiko Rukuru Urugereko rwa Rwamagana rugaragaramo akarengane gashingiye ku kuba Urukiko rutarahaye agaciro imvugo z’abatangabuhamya kandi aribo bari gutuma hamenyekana ukuri, rutegeka ko isambu iburanwa ari iy’abazungura ba Reberaho.

## Page 2

Incamake y’icyemezo:1. kuba amasezerano y’ubugure adashobora kuboneka kubera impamvu zikomeye nk’ibibazo u Rwanda rwanyuzemo mu mwaka wa 1994 ntacyabuza Urukiko gushingira ku bindi bimenyetso nk’ubuhamya cyangwa ibicukumbuye kugiramgo ukuri kugaragare. 2.Indishyi zo kwimura imva y’umubyeyi cyangwa umuvandimwe w’urega mu isambu yashyinguwemo ku buryo adashobora kumenya aho ashyinguye ziratangwa. Izi ndishyi zitangwa hashingiye ko icyo gikorwa gishobora kumutera agahinda gahoraho gashobora no kumukururira ibibazo bikomeye mu mitekerereze ye. 3. Indishyi mbonezamusaruro ku isambu umuntu yavukijwe zitangwa mu bushishozi bw’Urukiko. Urukiko rutanga indishyi ku muntu wavukijwe isambu ye mu buryo bw’uburiganya hitawe ko ibiyivamo byamutunga ndetse agasagurira isoko. Gusubirishamo urubnza mpamvu z'akarengane bifite ishingiro; Amategeko yashingiweho Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 4, 62,67, 65, 100 Iteka rya Minisitiri nº 002/2008 ryo ku wa 01/04/2008 rigena uburyo iyandikishwa ry’ubutaka rikorwa ingingo ya 5 Nta manza zifashishijwe I. IMITERERE Y’URUBANZA [1] Uru rubanza rwatangiriye mu Rukiko Rwisumbuye rwa Ngoma, Reberaho Prince uhagarariye umuryango wa Reberaho Janvier na Kayitesi Marie Odette, arega abazungura ba Kaburame Samson ko bamutwariye isambu, agasaba ko bayimusubiza kuko se Reberaho Janvier yayiguze na Mukagatare Marlène mu mwaka wa 1985, ariko ko inyandiko y’ubugure yahiriye mu nzu igihe cya Jenoside yakorewe Abatutsi mu mwaka wa 1994. [2] Reberaho Prince yasobanuraga ko se Reberaho Janvier amaze kugura iyo sambu, yayitunganyije, ayikoreramo kandi ko ariyo yari atuyemo n’umuryango we, ari naho umugore we n’abana be batandatu biciwe, ko yahimutse nyuma ya Jenoside yakorewe abatutsi mu mwaka wa 1994 akajya gutura mu Mudugudu ariko ko yakomeje kuyigiramo ibikorwa kugeza apfuye mu mwaka wa 1996. Avuga ko nyuma ariko umuryango wa Kaburame Samson wari uhagarariwe n’umugore we Kaburame Florence waje kwigabiza isambu yabo ubifashijwemo n’uwari Konseye w’Umurenge wa Gahini witwa Mugenzi John mubyara wa Kaburame, ubu bakaba barayubatsemo inzu ndetse banayishyinguramo ababyeyi babo bombi. Reberaho Prince avuga ko n’umubyeyi wabo Reberaho Janvier ariho ashyinguye usibye ko imva ye ubu batazi aho iherereye kubera ibikorwa abazungura ba Kaburame Samson bahakoze bikazimanganya aho yariri. [3] Urukiko Rwisumbuye rwa Ngoma rwaciye urubanza RC0059/09/TGI/NGOMA ku wa 26/05/2011, rwemeza ko isambu iburanwa ari iy’Abazungura ba Kaburame Samson rushingiye ku nyandiko z’abayobozi zo ku wa 23/01/1996 no ku wa 22/10/2002 zigaragaza ko

## Page 3

iyo sambu ari iyabo, naho imvugo z’abatangabuhamya babajijwe mu Rukiko rw’Ibanze rwa Rukara zikaba nta shingiro zifite kuko urubanza zigaragaramo rwavanyweho n’Urukiko Rwisumbuye rwa Ngoma1. [4] Abazungura ba Reberaho Janvier bajuririye Urukiko Rukuru, Urugereko rwa Rwamagana, bavuga ko Urukiko Rwisumbuye rwa Ngoma rwirengagije amahano yabaye mu Rwanda ari nabwo amasezerano y’ubugure bw’isambu iburanwa yahiriye mu nzu, maze ntirwaha agaciro imvugo z’abatangabuhamya, kandi ko impamvu rwatanze y’uko izi mvugo zitahawe agaciro kubera ko ziri mu rubanza rwavuyeho igaragaza kunyuranya n’itegeko, ko mu bujurire bwabo, bavugaga kandi ko Urukiko Rwisumbuye rwirengagije abazi ukuri, mu iperereza rwakoze rwibariza abantu babiri gusa kandi bo mu muryango wa Kaburame Samson, ntirwaha agaciro kamwe ibimenyetso by’impande zombi. [5] Urukiko Rukuru, Urugereko rwa Rwamagana rwaciye urubanza RCA0033/11/HC/RWG ku wa 16/11/2012, rwemeza ko ubujurire bwatanzwe n’umuryango wa Reberaho Janvier nta shingiro bufite kuri byose, ko imikirize y’urubanza RC0059/O9/TGI/NGOMA idahindutse mu ngingo zayo zose. [6] Abazungura ba REBERAHO Janvier bahagarariwe na Reberaho Prince ntibishimiye icyo cyemezo, bagana Urwego rw’Umuvunyi basaba ko urubanza RCA0033/11/HC/RWG rusubirwamo ku mpamvu z’akarengane, maze ku wa 22/06/2017, Umuvunyi Mukuru yandikira Perezida w’Urukiko rw’Ikirenga amusaba ko urwo rubanza rusubirwamo ku mpamvu z’akarengane. Perezida w’Urukiko rw’Ikirenga amaze kurusuzuma, yategetse ko uru rubanza rwongera gusubirwamo arwohereza mu Rukiko rw’Ubujurire kugira ngo ruruburanishe. [7] Iburanisha ry’urubanza mu ruhame ryatangiye ku wa 02/12/2019, Abazungura ba Reberaho Janvier bahagarariwe na Reberaho Prince yunganiwe na Me Kanamugire Eric, naho Abazungura ba Kaburame Samson bahagarariwe na Me Rwenga Etienne, iburanisha ryimuriwe ku wa 27/01/2020, kugira ngo hagire ibitunganywa muri dosiye. Uwo munsi ugeze, iburanisha ryabaye Reberaho Prince yunganiwe na Me Kanamugire Eric, naho Abazungura ba Kaburame Samson bahagarariwe na Me Rwihandagaza Richard, Urukiko rusaba buri ruhande kugenda rukicarana n’abagize buri muryango bakemeza abazungura abo aribo n’ugomba kubahagararira, ibyo bigakorwa mu nyandiko bose bashyizeho umukono. Uwo munsi kandi, Urukiko rwagiriye ababuranyi inama yo kureba uburyo bakemura ikibazo mu bwumvikane nk’uko bari barabyiyemeje, iburanisha ryimurirwa ku wa 01/04/2020. [8] Iburanisha ryari ryashyizwe ku wa 01/04/2020, ntiryashoboye kuba kubera gahunda ya gumamuRugo yashyizweho na Leta y’u Rwanda hagamijwe kwirinda ikwirakwiza ry’icyorezo cya COVID 19. Iburanisha ry’urubanza ryongeye gusubukurwa ku wa 20/7/2020, Abazungura ba Reberaho Janvier bahagarariwe na Reberaho Prince yunganiwe na Me Tuyishime Jean Paul, naho Abazungura ba Kaburame Samson bahagarariwe na Me Rwihandagaza Richard, buri muburanyi ahabwa ijambo kugira ngo asobanure ingingo ze ku kibazo kiri muri uru rubanza cyo kumenya nyiir’isambu iburanwa, Urukiko rumemyesha ababuranyi ko urubanza ruzasomwa ku wa 31/07/2020. 1 Ni urubanza RC 0069/05/TD/RU rwari rwaciwe ku wa 27/06/2006 rwari rwemeje ko isambu iburanwa ari iya REBERAHO Prince, rukaba rwarakuweho n’urubanza RCA 0606/06/TGI/NGOMA rwaciwe n’Urukiko Rwisumbuye rwa Ngoma ku wa 13/10/2006 rwemej ko REBERAHO Prince nta bubasha afite kuko yaburanye mu izina rye kandi afite undi bavukjana witwa NYIRAKAMANZI Hélène.

## Page 4

[9] Igihe Urukiko rwasuzumaga urubanza mu mwiherero, rwemeje ko mbere yo gufata icyemezo cya burundu muri uru rubanza, Urukiko ruzabanza kugera aho ikiburanwa giherereye mu Mudugudu w’Umwiga, Akagari k’Urugarama, Umurenge wa Gahini, Akarere ka Kayonza, kugira ngo rwibonere imiterere y’isambu iburanwa ruyihuze n’imiburanire y’ababuranyi, rubaze n’abatangabuhamya bazi neza iby’iyo sambu, cyane cyane uwitwa Mukagatare Marlène. [10] Urukiko rwakoze iperereza rwashakaga ku wa 26/10/2021, iburanisha ryongera gufungurwa ku wa 07/12/2020 kugira ngo ababuranyi bagire icyo bavuga ku byavuye mu iperereza, Abazungura ba Reberaho Janvier bahagarariwe na Reberaho Prince yunganiwe na Me Kanamugire Eric, naho Abazungura ba Kaburame Samson bahagarariwe na Reverend Canon Butera Patrick bunganiwe na Me Rwenga Etienne. Mu mpaka zabaye, abahagarariye ababuranyi b’impande zombi basabye Urukiko kuzashishoza rukareba aho ukuri guherereye kuko mu batangabuhamya bumviswe, harimo abatavugisha ukuri, harimo abatabaga mu Rwanda igihe Kaburame Samson na Budenderi Sira bahabwaga amasambu, hari n’abatari batuye hafi yayo igihe Reberaho Janvier yaguraga. Ku ruhande rwa Kaburame Samson, bakomeje gusaba ko uwo baburana yakwerekana ikimenyetso cy’amasezerano y’ubugure bw’isambu iburanwa. [11] Ababuranyi bamenyeshejwe ko urubanza ruzasomwa ku wa 15/01/2021, ariko uwo munsi ugeze urubanza ntirwasomwa kubera ko umwe mu bacamanza yagize ikibazo cy’uburwayi bituma ataboneka, nyuma isomwa rigenda ryimurwa bitewe n’amabwiriza yari yafashwe na Leta harimo na gumamuRugo hagamijwe kwirinda gukwirakwiza icyorezo cya Covid 19. [12] Na none igihe Urukiko rwasuzumaga urubanza mu mwiherero, rwasanze kugira ngo rutange ubutabera buboneye ari ngombwa ko hamenyekana agaciro k’igice cy’isambu iburanwa ndetse n’inzu umuryango wa Kaburame Samson wubatsemo, nuko mu rubanza rubanziriza urundi rwasomwe ku wa 12/02/2021, rwemeza ko ari ngombwa ko hamenyekana agaciro k’igice cy’isambu inzu ya nyakwigendera Kaburame Samson yubatseho, imbago zayo, imiharuro, ibikari n’ahandi hose hakikije iyo inzu. [13] Nyuma y’uko umuhanga agejeje raporo ku Rukiko rw’Ubujurire, iburanisha ry’urubanza ryongere gupfundurwa, ribera mu ruhame ku wa 29/3/2021, Abazungura ba Reberaho Janvier bahagarariwe na Reberaho Prince yunganiwe na Me Kanamugire Eric, naho Abazungura ba Kaburame Samson bahagarariwe na Me Rwihandagaza Richard, hitabye kandi na Ir. Bazina Jean Yves wakoze raporo y’igenagaciro. IBIBAZO BIGIZE URUBANZA N ‘ISESENGURA RYABYO A. Kumenya niba isambu iburanwa ari iy’abazungura ba REBERAHO Janvier bahagarariwe na REBERAHO Prince. [14] Reberaho Prince na Me Tuyishimire Jean Paul, umwunganira, bavuga ko Urukiko rwabagiriye inama yo kumvikana n’abo baburana, barabigerageza ariko birananirana, ko isambu iburanwa se Reberaho Janvier yayiguze mu mwaka wa 1985 na Mukagatare Marlène, ko bayituyemo kugeza mu mwaka wa 1994, ndetse ko ariho nawe yavukiye. Avuga ko bari baturanye na Karenzi, Bizimana, Makambira (hepfo) uyu yari yarasigaye mu isambu ya Kaburame, ko yari umushumba wabo, haruguru y’umuhanda hari hatuye Bigirinka n’undi witwa Gakwandi.

## Page 5

[15] Akomeza avuga ko bigeze mu mwaka wa 1994, nyina n’abavandimwe be biciwe muri iyo sambu, ko babavanye muri WC imibiri yabo ikaba yarimuwe mu mwaka wa 2008, bayijyana mu mva rusange. [16] Reberaho Prince avuga ko hasigaye se n’abavandimwe be babiri bakajya gutura mu Mudugudu ariko ko bazaga guhinga isambu yabo. Mu mwaka wa 1996, se nawe arapfa ashyingurwa mu isambu iburanwa, ko abo kwa Kaburame Samson ubu basibanganyije aho imva ye yari iri, bakaba badashobora kuhamenya. [17] Nyuma y’urupfu rwa se, uwari Konseye wa Segiteri Gahini witwa Mugenzi John akaba na mubyara wa Kaburame Samson, yigabije isambu yabo asizamo ikibanza yubakishirizamo inzu umugore wa Kaburame Samson witwaga Kaburame Florence, ko Mukagatare Marlène yamubwiye ko yahageze akamubuza kubaka mu isambu y’abana ba Reberaho Janvier ariko aranga. Amaze kuzuza inzu ye, Kaburame Florence, yarahatuye, aho apfiriye aba ariho bamushyingura, ndetse na Kaburame Samson wari warapfiriye muri Uganda nawe bimura umurambo we barawuzana barahawushyingura. [18] Reberaho Prince avuga ko aho amariye kugimbuka yaje gukurikirana umutungo w’umuryango we, abanza kwegera Meya wa Rukara ariko ntibyagira icyo bitanga kuko yamubwiraga ngo nareke iyo sambu bazabaha ahandi aribwo imanza zatangiraga ku rwego rw’Abunzi, aratsinda barayimusubiza ariko ntibamwishyura ibikorwa byarimo, atanga ikirego mu nkiko uhereye ku Rukiko rw’Akarere rwa Rukara mu rubanza RC0069/05/TD/RU, hemejwe ko isambu ari iyabo nyuma yo kubaza abatangabuhamya: Kanyarukore Alphonse, Bigirinka William, Habakurama Wenceslas, Gakwandi Joseph, Kantengwa Evanis ( niwe wacungaga isambu ahingira n’Urutoki). Imanza zimwe zarakomeje mu nkiko zitandukanye, zimwe zivanwaho kubera ibibazo by’amategeko yabaga atubahirije mu gutanga ikirego, Reberaho Prince akongera agatangira bundi bushya, urukomokaho uru akaba ari urufite RC0059/09/TGI/NGOMA rwatangiriye mu Rukiko Rwisumbuye rwa Ngoma. [19] Muri izo manza, Mugenzi John akaba ari we waburaniraga umuryango wa Kaburame Florence, ajuririra mu Rukiko Rwisumbuye rwa Ngoma, rubaza amasezerano y’ubugure bw’iyo sambu, barubwira ko yahiriye mu nzu ariko ko hari abatangabuhamya babizi. [20] Umucamanza yagiye kwikorera iperereza i Gahini nuko abaza Kaburame William abaza n’umukozi wabo Hategekimana Pierre maze imvugo zabo azishingiraho aca urubanza RC0059/09/TGI/NGOMA. Umucamanza kandi yashingiye no ku cyemezo cyatanzwe na Mugenzi John kivuga ko isambu ari iy’umuryango wa Kaburame Samson, nyamara icyo cyemezo Mugenzi John yakizanye abonye urubanza rukomeye kuko mbere ntacyo yari yarigeze yerekana. [21] Me Tuyishime Jean Paul avuga ko kuba nta masezerano y’ubugure yagaragajwe muri uru rubanza byatewe nuko yahiye, asaba urukiko kuzashingira ku bindi bimenyetso birimo imvugo z’abatangabuhamya bagaragara mu rubanza RC0069/05/TD/RU rwaciwe n’Urukiko rw’Akarere ka Rukara ndetse rugaha agaciro imvugo z’abatangabuhamya babajijwe n’Urwego rw’Umuvunyi harimo imvugo za Mukagatare Marlène wagurishije isambu ndetse na Harerimana James. [22] Reberaho Prince yajuririye Urukiko Rukuru, Urugereko rwa Rwamagana ruvuga ko ibyo abatangabuhamya bavuze bifite ishingiro, ariko rwemeza ko atsinzwe. Nyuma yagiye ku rwego rw’Umuvunyi, igihe cyo gusuzuma ikirego cye, umukozi warwo abaza Mukagatare Marlène

## Page 6

ndetse ajya n’Insinda muri Gereza abaza ufite icyo yaba azi ku isambu iburanwa witwa Harerimana James, wavuze ko iyo sambu ari iya Reberaho Janvier, ko yayigurishijwe na Mukagatare Marlène nawe yarayisigiwe na se Budenderi. [23] Avuga ko Umuvunyi amaze gukora isesengura rihagije mu byo yakuye mu iperereza, yemeje ko urubanza rwaciwe n’Urukiko Rukuru, Urugereko rwa Rwamagana rurimo akarengane, arwoherereza Urukiko rw’Ikirenga maze narwo rwemeza ko karimo, aribwo rurwohereza mu Rukiko rw’Ubujurire kugira ngo ruruburanishe. [24] Reberaho Prince n’umwunganira bavuga ko akarengane umuryango we wagiriwe ari uko Urukiko Rukuru, Urugereko rwa Rwamagana rwavuze ko ubujurire bwa Reberaho Prince nta shingiro bufite, kubera ko atagaragaza amasezerano y’ubugure cyangwa icyemezo cy’Ubushinjacyaha kigaragaza ko ayo masezerano yatakaye kandi hari imvugo z’abatangabuhamya zemeza ko iriya sambu ari iyabo. Bavuga kandi ko Urukiko rutahaye agaciro kamwe ibimenyetso byatanzwe n’ababuranyi kuko rwemeye ubuhamya bwatanzwe n’umuhungu wa Kaburame Samson witwa Kaburame Willian n’umukozi we Hategekimana Pierre, ariko rukanga imvugo z’abatangabuhamya babajijwe n’Urukiko rw’Akarere ka Rukara zirenganura Abazungura ba Reberaho Janvier ngo ni uko urwo rubanza rwateshejwe agaciro, nyamara icyabiteye atari uko ubwo buhamya bufite inenge, ahubwo ari uko Urukiko rwavuze ko Reberaho Prince nta bubasha yari afite bwo gutanga ikirego mu izina ry’umuryango nta butumwa abifitiye. [25] Bongeraho ko akandi karengane Abazungura ba Reberaho Janvier bagiriwe ari ukuba Urukiko rwaranze guha agaciro ubuhamya bwa Mukagatare Marlène wabagurishije iyo sambu kimwe n’iz’abandi batangabuhamya bahana imbibi, bazi neza iby’iyo sambu, nabyo yasanze ari akarengane mu gihe yemeye ubw’abo baburana kandi bafite inyungu mu rubanza. Avuga ko Urukiko rwashingiye ku mvugo z’abantu bari bavuye i Bugande batazi neza iby’iyo sambu kandi ari nabo mu muryango wa Kaburame Samson. Icyo asaba uru Rukiko akaba ari uko rwashyira mu gaciro, rugashishoza maze rukabaha ubutabera kuko kuba nta masezerano y’ubugure ahari, hakwiye kurebwa ibindi bimenyetso birimo imvugo z’abatangabuhamya basanga mu rubanza Nº RC0069/05/TD/RU, abumviswe n’Urwego rw’Umuvunyi aribo Mukagatare Marlène, Harerimana James wavuze ko ahaburanwa ari aho kwa Reberaho Janvier, ndetse n’iz’abatangabuhamya rwiyumviye igihe rwageraga aho ikiburanwa kiri. [26] Basoza bavuga ko nyuma yo kwiyambaza Urwego rw’Umuvunyi, uru rwego rwakoze iperereza rukabaza Mukagatare Marlène agasobanura ko isambu yayigurishije Reberaho Janvier ndetse rukaba rwarabajije abantu bari baturanye harimo n’uwitwa Harerimana James, ubu ufungiye muri Gereza ya Nsinda, wemeje ko azi ko iyo sambu Mukagatare Marlène yari yarayisigiwe na se Budenderi Sira nawe akayigurisha Reberaho Janvier, rukaba ariho rwashingiye rwemeza akarengane kabo kuko rwasanze Urukiko rwarirengagije imvugo z’abatangabuhamya bari baturanye nabo batanze ubuhamya mu rubanza ariko rukavuga ko imvugo zabo ntacyo zimaze mu gihe urubanza bazitanzemo rwavanweho. Ikindi ngo ni uko rwahaye ishingiro inyandiko yatanzwe na Mugenzi John wari Konseye kandi byagaragajwe ko muri urwo rubanza ariwe baburanaga ahagarariye umuryango wa Kaburame. [27] Me Rwihandagaza Richard uhagarariye Abazungura ba Kaburame Samson, avuga ko uru rubanza rukomoka ku bibazo bibiri: iyi sambu iburanwa, Abazungura ba Kaburame Samson bayikomora ku muco, bayifite kuva mu mwaka wa 1950. Avuga ko Kaburame na Budenderi bakoraga ku bitaro nuko barahagabana.

## Page 7

[28] Me Rwihandagaza Richard nawe yasobanuye mu magambo macye amateka y’isambu iburanwa, avuga ko ari iya Kaburame Samson kandi ko yayibonye ku buryo bw’umuco mu mwaka wa 1954 kuko yagabanye hariya hantu n’abo bari baturanye, we akaba yari aturanye na Budenderi, ariko ko bigeze mu mwaka wa 1959, Kaburame Samson yahunze isambu ayisigira Makambira wari umukozi we, mu gihe Leta yashakaga kugurisha iby’abantu bahunze, Budenderi afata aha Kaburame ahita ahe kugira ngo batahagurisha. Byageze aho Budenderi nawe arahunga nuko isambu yose (iye n’iya Kaburame) ayisigamo umukobwa we witwa Mukagatare, uyu akaba yaraje kuhashakira umugabo ariko nk’uko bivugwa mu mwaka wa 1985 aza kuhagurisha na Reberaho Janvier ariko niyo byaba byarabayeho atari kugurisha ahantu hatari ahe. [29] Me Rwihandagaza Richard avuga ko batemera ubugure bwabaye kuko kugira ngo ubugure bwemerwe, hagomba kuba hari amasezerano yerekana ko aho hantu hagurishijwe, iyo yatakaye hagomba ikindi cyemezo kiyasimbura, bityo kuva muri 1995, nta kindi cyangombwa umuryango wa Reberaho Janvier washatse cyerekana ko hariya hantu hari ahabo. [30] Avuga ko mu mwaka wa 1959, Kaburame Samson yahungiye mu gihugu cya Uganda, asiga Budenderi mu Rwanda, ko ariko nawe waje kugenda nyuma. Kaburame yayisigiye isambu ye Makambira. Nawe yasomye muri dosiye ko Kaburame Samson amaze kugenda, byageze aho Leta itangira kugurisha ibintu by’abahunze, Budenderi ahita agura isambu ye kugira ngo batahatwara. Budenderi ahunze isambu ye yayisizemo umukobwa we Mukagatare nyuma aza gushakira muri iyo sambu ari ko nyuma ngo aza kuyigurisha Reberaho Janvier mu mwaka wa 1985. [31] Avuga ko Mukagatare Marlène yagurishije isambu ya Kaburame Samson, ikibazo bafite muri uru rubanza kikaba ari uko nta n’amasezerano y’ubugure berekana, niba kandi yaratakaye, bumva haragombaga gukorwa ibyo amategeko ateganya, ko ariko ntacyo Reberaho Prince n’abamwunganiye bakoze muri urwo rwego. Yibaza impamvu nyuma ya Jenoside yakorewe Abatutsi mu mwaka wa 1994, umuryango wa Reberaho Janvier utigeze ushaka icyangombwa cy’umutungo niba amasezeranoy’ubugure yari yarahiriye mu nzu, ko n’aho imanza zitangiriye, wakomeje kwicecekera. [32] Me Rwihandagaza Richard akomeza avuga ko kwa Kaburame Samson batahuka, nta muntu n’umwe basanze atuye aho hantu, ko ahubwo bahasanze abaturage barahigabije bakahahinga, hakaba nta muntu wo mu muryango wa Reberaho Janvier wigize aza kuhabasaba. [33] Ikindi avuga ni uko Mukakagatare Marlène adafite qualité yo kuba umutangabuhamya kuko ariwe wagurishije, ko ahubwo yatanga amakuru gusa. Asobanura ko Urukiko Rwisumbuye rwa Ngoma rutirengagije imvugo z’abatangabuhamya nk’uko Reberaho Prince abivuga, kuko rwakoze iperereza mu rubanza RC0059/09/TGI/NGOMA, kandi ko ashingiye kubiteganywa n’ingingo ya 64 y’Itgeko ryerekeye ibimenyetso mu manza n’itangwa ryabyo, asanga muri uru rubanza ubuhamya butasimbura amasezerano bitewe nuko ikimenyetso cy’intangabuhamya kidashobora kwemerwa ku masezerano y’amafaranga y’amanyarwanda arenze 50.000 cyangwa ku kintu gifite agaciro kayarengeje, kabone n’iyo yaba ari amasezerano yo kubitsa ku bushake, keretse ubuhamya bwunganiwe n’ibindi bimenyetso. [34] Me Rwihandagaza akomeza gushimangira ko mu gushakisha ukuri, hagomba kurebwa na circonsatances ibintu byabayemo, kuko hibazwa ikintu cyabuze kugira ngo Reberaho Prince ashake mu nzego bireba inyandiko isimbura amasezerano y’ubugure avuga ko yatakaye muri Jenoside.

## Page 8

[35] Naho ku birebana n’imvugo ya Reberaho Prince ko Urukiko rwirengagije kubaza abatangabuhamya, avuga ko nyuma y’iperereza ryakozwe n’Urukiko Rwisumbuye rwa Ngoma, rwasubukuye iburanisha, ababuranyi bahabwa umwanya wo kugira icyo bavuga ku iperereza ariko ko ntacyo bavuze ku bantu Urukiko rw’Ibanze rwa Rukara rwabajije, ko babivuze mu bujurire, akaba asaba ko bishobotse, ahubwo uru Rukiko rwagera aho ikiburanwa kiri rukirebera ibintu uko bimeze. [36] Rumaze kumva imiburanire y’ababuranyi b’impande zombi, rushingiye ku ngingo ya 100 y’Itegeko N° 15/2004 ryerekeye ibmenyetso mu manza n’itangwa ryabyo, iteganya ko Urukiko rushobora kwemeza kujya aho ikiburanwa kiri, inteko iburanisha ifashijwe n’umwanditsi w’Urukiko, yageze mu Mudugudu w’Umwiga, Akagari k’ Urugarama, Umurenge wa Gahini, Akarere ka Kayonza, Intara y’Iburasirazuba, nuko ibaza abatangabuhamya bavuga ko hari icyo bazi ku kiburanwa, ndetse inatambagira ikiburanwa igira ngo yirebere uko giteye. Nyuma yo kubahiriza ibiteganywa n’ingingo ya 67 y’Itegeko Nº 15/2004 ryo ku wa 12/06/2004 ryavuzwe haruguru2, Urukiko rwumvise abatangabuhamya Mukagatare Marlène, Mukazuzi Editha, Mucoko, Reverend Canon Butera Patrick, Mungarurire Wellars, Gakwandi Joseph na Uwabyaye Flavia. [37] Uwitwa Mukagatare Marlène wabajijwe n’Urukiko Rukuru, Urugereko rwa Rwamagana mu gihe cy’iperereza, avuga ko Budenderi ari se umubyara, ko yari atuye ahari ubu imbuga y’urugo rw’umuryango wa Kaburame Samson, naho Kaburame Samson atuye hepfo, iburyo hari Senkobwa, ibumoso hari Mivumbi. [38] Avuga ko se Budenderi yakoraga kuri Misiyoni ya Gahini we na Kaburame bombi ari abaforomo, nuko baza guhabwa ubutaka n’umutware wayoboraga ako gace, Kaburame akaba yari hepfo y’ahahawe Budenderi. Budenderi yubakiye inzu nyina, naho Kaburame yabanje kubaka ikiraro cy’inka ze, kuri icyo kiraro hakaba umugaragu we witwa Makambira, nyuma aho ashakiye kubaka inzu ye yo guturamo, asanga ubutaka bwe ari ku rutare maze Budenderi amuha ikibanza ahagana hepfo mu butaka bwe ahubaka inzu ariko ayibamo igihe gito kuko bahise bahunga mu mwaka wa 1959. [39] Avuga kandi ko ubuyobozi bwa Komini butangiye gahunda yo kugurisha amasambu y’abantu bahunze, se Budenderi yanze ko kwa Kaburame hagurwa n’undi, aba ariwe uhagura na Komine, ariko akaba yarahavuguruye kuko amabati bari barayangije. [40] Mukagatare Marlène avuga ko se agiye guhunga yahamuraze kuko yari asigaye mu Rwanda kandi agiye gushyingirwa, nyuma y’igihe abonye ntacyo ubutaka bumumariye ajya kubaza se icyo yabukoresha, nawe amubwira ko ari igiseke yari yaramuhaye, ko ashatse yahagurisha, ko ubwo yahise ahagurisha Reberaho Janvier mu mwaka wa 1980 akaba yarabanaga n’umugore we Kayitesi. [41] Avuga ko kwa Kaburame bagiye kubaka yabwiye Konseye wahayoboraga witwaga Mugenzi ko aho hantu atari ahabo, amubwira ko ari aha Reberaho kandi ko afite umwana warokotse, ko batagomba kuhubaka kuko uwo mwana azakura akaza gukurikirana umutungo w’ababyeyi be ariko baranga barahubaka. 2Ingingo ya 67: Mbere yo kuvuga ibyerekeye urubanza , buri mutangabuhamya abanza kuvuga ibintu bikurikira kandi umwanditsi w’urukiko akabyandika yitonze :umwirondoro n’aho abarizwa akabivuga ntacyo asize,isano cyangwa ubushyingirane yaba afitanye n’umwe mu baburanyi bya hafi cyangwa bya kure,ihuriro rye n’ubutegekane yaba afitanye n’umwe mu baburanyi , n’indi mpamvu yose ishobora gutuma yekekwaho kugira aho abogamira mu mvugo ye.

## Page 9

[42] Umutangabuhamya witwa Mukazuzi Editha, avuga ko yavukiye muri ako gace mu mwaka wa 1957, ko yari azi neza umuryango wa Budenderi, yerekana aho wari utuye mbere n’uko waje kwimukira hepfo kandi ko yahungutse agasanga kwa Kaburame barimo bahubaka ariko ko atari mu kwabo kuko hari aha Reberaho Janvier wahabanaga n’umugore we Kayitesi. Asobanura ko yari abazi neza, ko Kayitesi yazize Jenoside yakorewe Abatutsi ariko ko umugabo we yaje gupfa nyuma azize urw’ikirago. Asobanura ko azi neza ko ahantu bari batuye hari ahabo, yongeraho ko Reberaho Janvier agura na Mukagatare atari ahari, ariko ko bamaze kwandikiranwa Mukagatare akaza kumubereka nk’umuturanyi abasigiye. Avuga ko Canon Butera Patrick yamumenye ahungutse, naho mu bandi bari aho azi kuva mbere ya Jenoside ari Mucoko wari utuye haruguru yo kwa Rwabuhungu, hakaba na Mungarurire Wellars. [43] Umutangabuhamya witwa Mungarurire Wellars nawe avuga ko yari resiponsabule w’ako Kagali, ko umuryango wa Reberaho Janvier waje kugura iyo sambu azanwe n’umugore we Kayitesi wahavukaga. Asobanura ko umuryango wa Kaburame baje bakamubwira ko bagarutse mu byabo kandi ko ababimubwiye ari umukobwa we n’undi muntu atibuka neza. [44] Avuga ko Reberaho Janvier amuzi, kuko umugore we bashakanye witwaga Kayitesi ari mubyara we bakaba bari batuye i Kigali mu Kazarusenya, ko bamaze kugura isambu ya Budenderi bahise banahatura. Asoza avuga ko kwa Kaburame Samson bahunga yari akiri umwana, ko ibyo yamenye yabimenye nyuma ariko ko azi neza ko ahaburanwa hari mu kwa Budenderi, ko mu gice cyo hepfo agabana na Makambira. [45] Umutangabuhamya witwa Mucoko avuga ko Kaburame Samson yari atuye ahagana hepfo, ko yajyaga azana ibiti bikuze uko avuye kuri Misiyoni nuko akabitera, yerekana ko ahari hatuye nyina wa Budenderi (aho ubu kwa Kaburame batuye), nyuma yaho kwa Kaburame bahungiye, ahobari batuye haguzwe na Budenderi. Ikindi yavuze ni uko Reberaho Janvier babanye bari aho hepfo baguze, amaze komekaho aho yari afite mbere. Nawe avuga ko ibyo kugurisha atabimenye igihe byaberye, yerekana ko aho kwa Kaburame bubatse ubu hari hatuye umukecuru, nyirakuru wa Mukagataremarlène. [46] Reverend Canon Butera Patrick avuga ko isambu iburanwa, Kaburame yayihawe na Rudahigwa ahagana mu mwaka wa 1950, ko icyo gihe Kaburame yakoraga mu bitaro bya Gahini ari umuforomo, ko muri za 1950 ariho yaje kubaka muri iyi sambu inzu y’amatafari ahiye na sima. Avuga ko aho iyo nzu yari yubatse haragaragara, ko n’aho yacukuye umusarani (toilet) haragaragara. Avuga ko iwabo babaga i Rukara ariko ko yajyaga aza i Gahini mu mikino y’abanyeshuli ndetse no kureba inshuti n’abavandimwe. [47] Avuga kandi ko Kaburame yasigiye Budenderi ibintu bye abimurindishije kuko bari inshuti magara, Budenderi arimuka ajya mu nzu ya Kaburame Samson kuko ariyo yari nziza usibye ko nawe ngo yaje guhunga kuko nta mutekano yari afite, nuko inzu ayisigamo umukobwa we Mukagatare, uyu aza kuyishakiramo umugabo ariko yumvise ko abantu bavuga ko yinjiwe nibwo yaje kuhagurisha. [48] Umutangabuhamya Gakwandi Joseph avuga ko abari batuye mu isambu y’ikigarama ari nyina wa Budenderi, ko Kaburame amaze kubaka inzu yahise ahunga atayimazemo igihe kinini, isambu ye ayisigira uwitwa Makambira n’umugore we na baramu be. [49] Umutangabuhamya Uwabyaye Flavia amaze kurahira, yavuze ko uwitwa Kaburame yari umuforomo kandi akaba yari afite umugore witwa Nyirabusera Flora, bakaba barabanaga mu mazu y’abaganga kandi na Bundenderi akaba ariho yabaga. Asobanura ko aho ba Flora

## Page 10

bimukiye i nta wundi wari uhatuye kandi ko Budenderi yari afite isambu ahandi. Abajijwe niba azi aho imva ya Reberaho Janvier iherereye, asubiza ko aho ashyinguye atahazi. [50] Umugenagaciro washyizwe n’Urukiko witwa Bazina Jean Yves yagaragaje ko agaciro k’ikibanza inzu yubatswe n’ahayikikije kangana na 1,201,800Frw, naho agaciro k’inzu hangana na 28,800,200 Frw, byose hamwe bikangana na 30.002.000Frw. UKO URUKIKO RUBIBONA [51] Urukiko rurasanga ikibazo kigomba gusuzumwa muri uru rubanza kandi ababuranyi basabye ko gikemurwa ari icyo kumenya nyir’isambu iburanwa (property’s owner) hagati y’Abazungura ba Reberaho Janvier n’Abazungura ba Kaburame Samson. [52] Ingingo ya 65 y’Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo iteganya ko Urukiko arirwo rwonyine rupima ko imikirize y’abatangabuhamya ihuye n’ikiburanwa, ifite ingingo zikiranuye kandi ikaba ikwiye kwemerwa cyangwa guhakanwa. Ntirwitsitsa ku mubare w’abatangabuhamya. Rwita cyane cyane ku bumenyi bwabo bw’ibyabaye, no ku buryo babivuga uko byagenze nta cyo bihimbira. [53] Urukiko rurasanga mu gihe Abazungura ba Reberaho Janvier bandikiraga Urwego rw’Umuvunyi barugezaho akarengane bagiye bagirirwa mu byemezo byafashwe n’inkiko zinyuranye, baragaragaje ko isambu ari iy’ababyeyi babo baguze, ariko ko umuryango wa Kaburame Samson, wari uhagarariwe na Mugenzi John wahungutse uturutse mu gihugu cya Uganda mu mwaka wa 1996, ukayigabiza uvuga ko ugarutse mu byabo kandi bari barayiguze na Mukagatare Marlène, umukobwa wa Budenderi Sira, uyu akaba yari yarayimusigiye ahunze mu mwaka wa 1969. [54] Mu gusobanura akarengane ke, Reberaho Prince uhagarariye Abazungura ba Reberaho Janvier avuga ko Urukiko Rukuru, Urugereko rwa Rwamagana, rwashimangiye ibyavuzwe n’Urukiko Rwisumbuye rwa Ngoma mu rubanza RC0059/09/TGI/NGOMA rwaciwe ku wa 26/05/2011, aho rwavuze ko atsinzwe no kubura inyandiko y’amasezerano y’ubugure bw’isambu iburanwa akaba kandi atarashoboye kugaragaza icyemezo cy’Ubushinjacyaha cy’uko iyo nyandiko yatakaye. [55] Hashingiwe ku biteganywa n’ingingo ya 65 yavuzwe haruguru, Urukiko rurasanga hakurikijwe kamere y’ikiburanwa hibazwa niba mu gihe inyandiko y’ubugure bw’isambu Reberaho Prince avuga ko yaguzwe na Se Reberaho Janvier yatakaye muri Jenoside yakorewe abatutsi mu mwaka wa 1994, kuko Interahamwe zashenye inzu umuryango we wari utuyemo, ibikoresho byabo byose bikangizwa ibindi bigasahurwa, nta kindi kimenyetso cyakwitabazwa kugira ngo ukuri kujye ahagaragara. [56] Ingingo ya 62 y’Itegeko Nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo iteganya ko ubuhamya ari ibivugwa mu Rukiko bivuzwe n’umuntu wabibonye cyangwa wabyumvise ubwe kubyerekeye ikiburanwa. Ingingo ya 9 y’Itegeko rimaze kuvugwa yo iteganya ko ibimenyetso bihamya amasezerano bishobora gutangwa hakoreshejwe inyandiko, ubuhamya, uburyo bwo gucukumbura, ukwiyemerera k’umuburanyi, naho ingingo ya 4 ikavuga ko Urukiko ruca urubanza rwaregewe hakurikijwe ibimenyetso bihuje na kamere y’ikiburanwa.

## Page 11

[57] Ku birebana n’uru rubanza, Urukiko rurasanga ikiburanwa ari isambu yatangiwe umwirondoro y’aho iherereye, ko rero hashingiwe ku biteganywa n’ingingo ya 4 y’Itegeko Nº 15/2004 ryo ku wa 12/06/2004 ryavuzwe haruguru nta cyari kubuza ko ubuhamya bw’abantu bazi neza nyirayo guhabwa agaciro kuko bazi uwari uyituyemo, bazi uburyo yayibonye n’uburyo yamuvuye mu maboko nk’uko biteganywa n’ingingo ya 62 y’Itegeko rimaze kuvugwa haruguru3. [58] Byongeye kandi, Urukiko rurasanga kuba amasezerano y’ubugure yaratakaye muri Jenoside yakorewe Abatutsi mu mwaka wa 1994, icyo gihe bikaba bizwi na buri wese ko usibye no gutakaza inyandiko zirebana n’imitungo, Igihugu cyagiye mu kaga gakomeye ko gutakaza abantu basaga miliyoni, inkiko rero zikaba zaragombaga gushyira mu gaciro maze zikifashisha ibindi bimenyetso Reberaho Prince yari yatanze bigizwe ahanini n’ubuhamya bw’abantu bari basanzwe batuye aho hantu bavuga ibyo bazi ku kiburanywa kuko nk’uko byakomeje kuvugwa, amategeko ateganya ko byakorwa. [59] Mu rwego rwo gukemura ikibazo kiri muri uru rubanza cyo kumenya nyir’isambu iburanwa, nk’uko zimwe mu nkiko uru rubanza rwanyuzemo zabikoze nubwo byarangiye hafashwe undi murongo, Urukiko rw’Ubujurire rushingiye ku ngingo ya 100 y’Itegeko Nº 15/2004 ryo ku wa 12/06/2004 ryavuzwe haruguru, rwasanze ari ngombwa kujya aho ikiburanwa giherereye kugira ngo nk’uko byakozwe n’Urwego rw’Umuvunyi rukemure ikibazo cy’akarengane Reberaho Prince yari yarugejejeho rwumva abantu bafite icyo bazi ku isambu iburanwa nk’abatangabuhamya, abandi rubumve nk’abatangamakuru kubera impamvu zinyuranye nko kuba bafite aho bahurira n’ababuranyi. [60] Urukiko rurasanga Mukagatare Marlène avuga ko se Budenderi Sira na Kaburame Samson, bombi bahanaga imbibi mu isambu iherereye ahantu havuzwe haruguru, ko Budenderi Sira yari aherereye haruguru naho Kaburame aherereye hepfo. Ibyo avuga kandi ko se yari yarubakiye nyina mu isambu ye naho Kaburame Samson we akaba yari yarubatse mu gice cyo hepfo, zishimangirwa n’iz’abatangabuhamya bumviswe n’uru Rukiko aribo: Mukazuzi Editha wavukiye aho muri uwo Mudugudu akaba anahatuye, Mucoko nawe wari umuturanyi wabo kuva icyo gihe kugeza ubu, Mungarurire Wellars na Gakwandi Joseph nabo batuye mu mihana ya hafi, akaba rero nta gushidikanya ko Budenderi Sira yari afite isambu hariya hantu ari nayo abatangabuhamya bavuze, ndetse na Me Rwihandagaza Richard uburanira abazungura ba Kaburame Samson akaba mu miburanire ye yo ku wa 20/07/2020, imbere y’uru Rukiko yaravuze ko Kaburame na Budenderi bahawe isambu maze bakayigabana. [61] Abatangabuhamya Mukazuzi Editha, Mucoko na Gakwandi Joseph bahuriza na none ku mvugo bemeza ko ubwo yahungiraga i Bugande, Budenderi yasigiye umukobwa we Mukagatare Marlène isambu ye, naho Kaburame we iye yari yarayisizemo Makambira wari umukozi we n’umugore we, kandi ko uyu Makambira yari atuye mu gice cyo hepfo. Mukazuzi Editha, Mucoko, Mungarurire na Gakwandi Joseph nabo bemeza na none ko Budenderi yatuye mu nzu ya Kaburame, ariko amaze kuyigura na Komini igihe Leta yagurishaga imitungo y’abahunze. Bose bemeza ko yayisizemo umukobwa we Mukagatare ariko ko nawe yaje kuyivamo amaze kugurisha Reberaho Janvier isambu se yari yaramuhaye, Mukazuzi Editha, Mungarurire Wellars na Gakwandi Joseph bose bakaba bemeza ko Reberaho Janvier yaje gutura muri iyo sambu amaze kuyigura na Mukagatare, ko nubwo batajyanye kuri Komini igihe cy’iyandikwa ry’amasezerano y’ubugure, ko ariko ubwo bari bavuye yo bamaze kwandikiranwa, Mukagatare 3 Ingingo ya 62: Ubuhamya ni ibivungwa mu rukiko bivunzwe n’Umuntu wabibonye cyangwa wabyumvise ubwe ku byerekeye ikiburanwa.

## Page 12

Marlène yaje kumubereka akababwira ko ariwe muturanyi mushya abasigiye kuko we agiye. Abatangabuhamya bose babajijwe bari batuye aho hantu mbere ya Jenoside yakorewe Abatutsi mu mwaka wa 1994, bemeranywa ko Reberaho Janvier yahatuye, we n’umugore we Kayitesi Odette kuva mu mwaka wa 1985. Bose bemeje kandi ko umuryango wa Reberaho Janvier wimutse muri iriya sambu igihe cya Jenoside, interahamwe zimaze kumwicira umugore n‘abana be batandatu, kandi ko Makambira yaturanye na Mukagatare kugeza igihe yagurishaga iyo sambu yasigiwe n’ababyeyi be. [62] Urukiko kandi rurasanga imvugo ya Mukagatare y’uko amaze kumenya ko Mugenzi John arimo kubakishiriza umuryango wa Kaburame Samson inzu ubu Abazungura be babamo, yamubabujije gukomeza amubwira ko atari ahabo, ko ari ah’abana ba Rekeraho Janvier kuko hari abana barokotse bashobora kuzaza kuhakurikirana, ariko akanga kubyumva, abatangabuhamya barimo Mukazuzi Editha akaba yarabwiye Urukiko igihe cy’iperereza ko babonye kwa Kaburame Samson bubaka inzu batuyemo ubu bikabatangaza kuko bari bazi ko iyo sambu ari iya Budenderi bagurishije Rekeraho Janvier, abo bari basanze bubaka bakajya bavuga ko baje mu byabo nyamara bari bazi ko kwa Kaburame hahoze ari hepfo y’igiti cy’umuguruka4; Mungaruruire Wellars we avuga ko nka Résiponsable w’iyo Cellule icyo gihe, yabajije impamvu barimo kubaka mu isambu ya Reberaho Janvier kuko yari azi neza ko yahaguze, nuko umukobwa wa Kaburame Samson nawe amubwira ko baje mu byabo. [63] Urukiko rurasanga imvugo z’abatangabuhamya bamaze kuvugwa haruguru, zerekana ko bazi neza kandi ko batandukanya aho amasambu ya Budenderi na Kaburame Samson aherereye, ko Bundenderi yari aherereye haruguru, naho Kaburame aherereye mu gice cyo hepfo, bikaba rero bigaragara ko umuryango wa Kaburame Samson wubatse mu isambu itari iyawo. [64] Byongeye kandi, Urukiko rurasanga ukurikije uburyo iyo sambu iburanwa iteye, ntawakwiyumvisha ukuntu niba yose yari iya Kaburame nk’uko ababuranira uwo muryango babivuga ndetse na Reverand Canon Butera Patrick n’umutangabuhamya Uwabyaye Flavia babivuga, uburyo Kaburame Samson yari kujya gutura hepfo cyane kure y’umuhanda, asize igice cya ruguru ubu Abazungura be bubatsemo ubu. Ikindi kitumvikana ni uburyo aho hubatswe inzu y’umuryango wa Kaburame, uyu nyakwigendera yaba yarahahaye Budenderi ngo ahubakire umubyeyi we (nyina wa Budenderi), maze we akajya kubaka inzu ikomeye y’amatafari ahiye ahagana ku gishanga. [65] Hashingiwe ku byasobanuwe haruguru no ku mategeko, nk’uko biteganywa n’ingingo ya 65 y’Itegeko ry’ibimenyetso ryavuzwe haruguru, Urukiko rurasanga, ubuhamya bwatanzwe n’abatangabuhamya batandukanye bugaragaza nta shiti ko ahaburanwa ari ah’abazungura ba Reberaho Janvier bahagarariwe na Reberaho Prince. [66] Urukiko rurasanga imvugo z’ababuranira Abazungura ba Kaburame Samson ko kuba umuryango wa Reberaho Janvier watangiye kuvuga ko isambu ari iyabo ukererewe byerekana nabyo ko ibyo bavuga atari ukuri, ari ukwirengagiza ibyabaye kuko Reberaho Janvier wari umaze kwicirwa umugore n’abana batandatu babatsinze muri iyo sambu, n’inzu ye igatwikwa, nyuma ya Jenoside yimukiye mu Mudugudu, ariyo mpamvu yazaga gusa kuhahinga, ndetse nawe akaba yarapfuye nyuma gato ya jenoside mu mwaka wa 1996, abana yasize bakiri bato, ko 4 Ni igiti kinini kiri mu butaqka bwo hepfo, bamwe mu baturage bakaba bavuga ko ari ibiti KABURAME yakuraga ku misiyoni i Gahini akiaza kubitera mu isambu ye no mu rugo (reba imvugo za MUCOKO).

## Page 13

rero aho apfiriye umuryango wa Kaburame ukigabiza ibye, nta wundi wari kuza kubiburana kuko Reberaho Prince na mushiki we bari bakiri abana bato. [67] Urukiko rurasanga kuba inkiko zabanje zaranze gushingira ku buhamya bw’abatangabuhamya bazi neza amateka y’isambu iburanwa zitwaje ko Reberaho Prince aterekanye amasezerano se Reberaho Janvier yaguriyeho iyo sambu, nyamara hari imvugo z’abatangabuhamya bemeza ko ari iy’umuryango wa Reberaho Janvier, zaranyuranyije n’ibiteganywa n’ingingo zagaragajwe zo mu Itegeko Nº 15/2004 ryo ku wa 12/06/2004, ibyo akaba ari akarengane kamugiriwe, bityo urubanza RCA0033/11/HC/RWG rwaciwe n'Urukiko Rukuru, Urugereko rwa Rwamagana ku wa 16/11/2012, rukaba rugomba guhinduka, isambu iburanwa igasubizwa umuryango wa Reberaho Janvier, ikanawandikwaho kugira ngo bayigireho uburenganzira busesuye nk’uko biteganywa n’ingingo ya 5, agace ka 2, y’Iteka rya Minisitiri nº 002/2008 ryo ku wa 01/04/2008 rigena uburyo iyandikishwa ry’ubutaka rikorwa5. [68] Urukiko rurasanga nk’uko rwabibonye igihe rwari mu iperereza, isambu igomba gusubizwa Abazungura ba Reberaho Janvier ihera ku ruzitiro rw’inzu y’umuryango wa Kaburame Samson, ikagarukira ku gakingo kari hepfo y’igiti cy’umuguruka giteyemo. Igice cyo hepfo y’ako gakingo hagakomeza kuba aho kwa Kaburame Samson. B. Ku birebana n’indishyi zitandukanye REBERAHO Prince asaba 1.Kumenya agaciro kakwishyurwa ikibanza, imbuga, umuharuro n’ubundi butaka bwose bukikije inzu na annexes Abazungura ba KABURAME Samson batuyemo [69] Mu maburanisha atandukanye, Reberaho Prince yagiye abwira Urukiko ko nubwo kwa Kaburame batwaye isambu yabo bigatuma babaho nabi, ko ariko batifuza ko basenyerwa inzu batuyemo, ko Urukiko ruramutse rusanze isambu ari iyabo, rwabategeka kumwishyura agaciro k’ubutaka bubatseho gusa, maze bagakomeza kuhatura cyane ko harimo n’imva z’ababyeyi babo. Avuga ko agaciro umuhanga washyizweho n’Urukiko yagaragaje akemera. [70] Me Kanamugire Eric wunganira Reberaho Prince, avuga ko agaciro umugenagaciro yageneye icyo kibanza nk’umuhanga mu kugena agaciro acyemera, ariko ko ikibanza kingana gutya kigiye ku isoko hari ushaka kukigura na nyiracyo ashaka kukigurisha agaciro kacyo kaba hejuru cyane y’agaciro kagenwe kuko ugurisha niwe ugena agaciro k’ikintu agurisha. Ariko nk’uko uhagarariye abazungura ba Reberaho Janvier yabibwiye urukiko atifuza gusenyera Abazungura ba Kaburame Samson mu gihe urukiko rwasanga ubutaka baburana ari ubw’abazungura ba Reberaho Janvier, kuko yifuza ko bakomeza kubana nk’abavandimwe nubwo bwose ubwo butaka babwihaye, akavuga ko agaciro ka 1,201,800Frw kaguma gutyo. [71] Me Rwihandaga Richard uburanira Abazungura ba Kaburame Samson, avuga ko ku gaciro k’ikibanza kagenwe n’umugenagaciro ntacyo yakavugaho kuko nta bumenyi bwo kuvuguruza umugenagaciro ubifiiye ubumenyi afite, bityo nawe akaba nawe akemera. Uko Urukiko rubibona 5 Iyi ngingo iteganya ko "uretse ibikorerwa ku butaka kandi haseguriwe uburenganzira ku butaka bwa ba gakondo, nta burenganzira bushobora kugirwa ku mutungo utimukanwa iyo butanditse ku cyemezo cy’iyandikisha".

## Page 14

[72] Urukiko rurasanga nk’uko byasobanuwe haruguru, ubutaka buburanwa ari ubw’ Abazungura ba Reberaho Janvier bahagarariwe na Reberaho Prince. [73] Umugenagaciro witwa Bazina Jean Yves washyizweho n’Urukiko, muri raporo yarugejejeho yagaragaje ko agaciro kakwishyurwa ikibanza, imbuga ndetse n’ahakikije inzu na annexes ari 1,201,800Frw. [74] Urukiko rurasanga mu iburanisha ryo ku wa 29/03/2021, ababuranyi b’impande zombi bavuga ko bemera agaciro kagenwe n’umugenagaciro kuko abifitiye ubuhanga n’ubumenyi, bakaba batabasha kumuvuguruza, bityo aka gaciro Abazungura ba KABURAME Samson bagomba kwishyura Abazungura ba Reberaho Janvier ari 1.201.800Frw. B.1 Ku birebana n’indishyi zijyanye no kwimura imva ya REBERAHO Janvier [75] Reberaho Janvier na Me Kanamugire Eric umwunganira, bavuga ko na kiriya kibanza bahariye Abazungura ba Kaburame Samson harimo imva y’umubyeyi wabo, nyakwigendera Reberaho Janvier, ariko ko kwa Kaburame bubaka inzu batuyemo, bashenye iyo mva, barangije barasiza barubaka ku buryo batamenya aho iherereye. Bavuga ko icyo gikorwa cyabereye muri icyo kibanza bakwiye kukiryozwa kuko cyababaje cyane Abazungura ba Reberaho Janvier bakaba bagisabira indishyi z’akababaro (impozamarira) zingana na 2,000,000Frw. [76] Me Rwihandagaza Richard avuga ko abahagarariye umuryango wa Reberaho Janvier bavuga ko hari imva ya nyakwigendera Reberaho Janvier yashenywe bityo bagasaba indishyi zayo ataribyo, kuko nta mva yasenywe bitewe nuko iyo mva umuryango wa Kaburame uzi mu kibanza cyubatsemo inzu yawo, ibyo kandi byanagaragariye mu mvugo zivuguruzanya z’abatangabuhamya, bityo akaba asanga nta gisobanuro cyumvikana cyangwa ikimenyetso icyo aricyo cyose gifatika cyasobanura indishyi zisabwa ku isenwa ry’imva ivugwa. Uko urukiko rubibona [77] Mu iperereza urukiko rwakoze, abatangabuhamya babajijwe bavuzwe haruguru, bemeje ko Reberaho Janvier yari atuye hariya, kandi ko yaje kwitaba Imana mu mwaka 1996, ndetse akaba ariho ashyingurwa bakerekana n’aho imva ye yari yubatse ahagana ku marembo y’urugo rw’abazungura ba Kaburame Samson. [78] Mu muco nyarwanda umurambo urubahwa kandi ugahabwa icyubahiro kiwugomba, bityo kuba umuryangao wa Reberaho Janvier utazi aho umubyeyi wabo ashyinguye, kandi n’abatangabuhamya babajijwe baremeje ko yari ahashyinguye, ibyakozwe n’umuryango wa Kaburame Samson ari igikorwa kigayitse kandi cyakomerekeje bikomeye abana ba Reberaho Janvier, ako gahinda gahoraho kakaba gashobora no kubakururira ibibazo bikomeye mu mitekerereze yabo cyane iyo bashaka kumwibuka, gushyira indabo ku mva ye ariko bakaba bazitirwa batagishobora kuhamenya kubera ibikorwa bibi by’umuryango wa Kaburame Somson. [79] Urukiko rurasanga rero indishyi zasabwe n’umuryango wa Reberaho Janvier zingana na 2.000.000Frw, bazihabwa kuko ziri mu rugero rukwiye. B.2 Ku birebana n’indishyi mbonezamusaruro zasabwe n’abazungura ba REBERAHO Janvier.

## Page 15

[80] Reberaho Prince avuga ko aho bubatse hari hateye ibishyimbo n’urutoki naho. Ku birebana n’imyaka yabaga ihinzemo, avuga ko ku isarura yashoboraga kubona 300.000Frw. [81] Me Kanamugire Eric avuga ko ikibanza kingana na 2,003 sqm (isambu yose iburanwa) umuryango wa Kaburame Samson wakigize icyawo guhera mu mwaka wa 1996 bisobanuye ko bakimaranye imyaka makumyabiri n’itanu. Ko hari umusaruro wagakwiye kuba waravuyemo muri iyo myaka yose bityo ko bagomba kuryozwa indishyi nsimburamusaruro. [82] Avuga ko nyuma yo kubaza abahanga mu buhinzi bw’insina kuko muri icyo kibanza harimo urutoki ; izo ndishyi zabarwa mu buryo bukurikira : Mu gutera insina neza insina imwe igenerwa ubuso bwa 25 sqm. Muri 2,003 sqm hajyamo insina 80 (2003/25=80,12). Urutoki rwera rimwe mu mwaka kandi igitoki cyeze neza gipima kuva kuri 50 kg kuzamura, ibitoki 80 byavamo 4,000 kg mu mwaka (80*50=4,000). Igitoki kiguzwe mu murima ikiro kibarirwa 180Frw, Mu mwaka 4,000 kg byavamo 720,000Frw (4,000*180=720,000), bityo mu myaka 25, umusaruro wari kuvamo ungana na 18,000,000 Frws (720,000*25). [83] Me Kanamugire Eric avuga ko n’ubwo umusaruro ubazwe ariwo wagombaga kuvamo ariko umuryango wa Kaburame utigeze uhakura uwo musaruro. Akaba ari nayo mpamvu abazungura ba Reberaho Janvier mu rwego rwo kutifuza no gukomeza umubano n’umuryango wa Kaburame bazakomeza kuba abanyembibi, basaba ko indishyi nsimburamusaruro zatangwa ari 20% z’uriya musaruro wose zikaba zingana na 3,600,000Frw. Muri rusange indishyi zikaba 1,201,800 Frw+ 2,000,000 Frw+ 3,600,000 Frw= 6,801,800Frw. [84] Me Rwihandagaza Richard avuga ko Umuryango wa Kaburame Samson watunze ikibanza wubatsemo inzu yawo nta buryarya (de bonne foi) ndetse ubifitiye n’ibyangombwa bitangwa n’ubuyobozi bubifitiye ububasha ku buryo mu kuri no gushyira mu gaciro (équité) bidakwiye ko yasabwa indishyi mbonezamusaruro mu gihe yatunze ikibanza nta buryarya kandi mu buryo bukurikije amategeko. [85] Ku birebana n’indishyi zisabwa, avuga ko abahagarariye umuryango wa Reberaho Janvier bagaragaza mu nyandiko yabo ko bazibaze bashingiye ko bahahingaga urutoki bityo bakabara indishyi zishingiye ku musaruro w’ibitoki bashoboraga kuhasarura nta shingiro bifite kubera ko nta rutoki umuryango wa Reberaho Janvier wigeze ugira muri kiriya kibanza. Asoza avuga ko mu iburanisha ryo ku wa 29/03/2021, ku kibazo kibanziriza icya nyuma ku rupapuro rwa 3, uhagarariye Reberaho abajijwe icyahingwaga mu kibanza, yasubije ko hahingwaga ‘’Ibishyimbo, ikawa n’imyumbati’’, ko bitumvikana ukuntu habarirwa indishyi zikomoka ku rutoki rutahigeze. Uko urukiko rubibona [86] Mu miburanire ya Reberaho Prince kuva uru rubanza rwagera mu nkiko yavugaga ko mu isambu yabo hahingwagamo urutoki, ibishyimbo n’ikawa, ibi bikaba byaranemejwe n’abatangabuhamya babajijwe igihe cy’iperereza, bavuze ko aho umuryango wa Kaburame Samson wubatse ho hari urutoki rwinshi rw’ingaga. [87] Urukiko rurasanga nk’uko Abazungura ba Reberaho Janvier babivuga ndetse bigashimangirwa n’abatangabuhamya, koko iyi sambu yarahingwagamo imyaka itandukanye kandi Abazungura ba Kaburame Samson ntibabihakana, kuba rero bayimaranye imyaka 25

## Page 16

kandi bari bazi neza ko atari iyabo bagomba kwishyura Abazungura ba Reberaho Janvier ibyo bahombye muri iki gihe cyose. [88] N’ubwo bitakoroha kumenya ingano y’umusaruro uba waravuyemo mu gihe cy’imyaka yavuzwe haruguru, ariko na none Urukiko ntirwakwirengagiza ko iriya sambu ari nini, ko umusaruro umuryango wa Reberaho Janvier wari gukuramo wari kubatunga nk’uko byari bisanzwe ndetse bagasagurira isoko nk’uko abandi baturage bose babayeho, kuba rero baravukijwe uwo musaruro mu buryo bw’amaherere, Abazungura ba Kaburame Samson bigabije isambu mu buryo bw’uburyarya kuko bari bazi aho iyabo iherereye bagomba kubitangira indishyi mbonezamusaruro y’ibyo bari gukuramo (manque à gagner). [89] Urukiko rurasanga mu mwaka habamo ibihembwe bitatu by’ihinga, ariko nk’uko Abazungura ba Reberaho Janvier babiburanisha, bavuga ko badashaka kubara akantu ku kandi, gusa kuba baravukijwe amahirwe yo kubyaza umusaruro isambu yabo, kandi bakaba bifuza gukomeza kubana neza n’umuryango wa Kaburame Samson, Urukiko rusanga hakurikijwe iyo myumvire yabo n’ibyo basabye, umusaruro w’umuhinzi wo mu rwego ruringaniye rwabagenera ari 140.000Frw nk’agaciro k’umusaruro mbumbe wavaga mu rutoki, mu bishyimbo no mu ikawa ku mwaka, bityo indishyi mbonezamusaruro bahabwa zikaba zihwanye na 140.000Frw x 25 ans = 3.500.000Frw. [90] Urukiko rusanga indishyi Abazungura ba Kaburame Samson bagomba kwishyura abazungura ba Reberaho Janvier bahagarariwe na Reberaho Prince zingana na 1,201,800Frw +2.000.000 Frw+ 3.500.000Frw yose hamwe akaba 6.701.800Frw. III. ICYEMEZO CY’URUKIKO [91] Rwemeje ko ikirego cy’abazungura ba Reberaho Janvier bahagarariwe na Reberaho Prince cyo gusubirisha urubanza RCA0033/11/HC/RWG rwaciwe n’Urukiko Rukuru Urugereko rwa Rwamagana ku wa 16/11/06/2012 ku mpamvu z'akarengane gifite ishingiro; [92] Rwemeje ko isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, yanditswe kuri Kaburame ari iy’Abazungra ba Reberaho Janvier bahagarariwe na Reberaho Prince; [93] Rutegetse ko Umubitsi w’impapurompamo z’ubutaka kwandika isambu iburanwa ibaruye kuri UPI: 5/04/01/04/1205, iherereye mu Mudugudu w’Umwiga, Akagari ka Urugarama, Umurenge wa Gahini, Akarere ka Kayonza, Intara y’Iburasirazuba, ivanwa kuri Kaburame yanditseho, maze ikandikwa ku Bazungura ba Reberaho Janvier bahagarariwe na Reberaho Prince; [94] Rwemeje ko igice cy’isambu iburanwa cyubatsemo inzu kwa Kaburame Samson batuyemo, imbuga, ibikari ahubatswe annexes, imiharuro, n’ahandi hakikije inzu, bishyura ingurane ya 1,201,800Frw, Abazungura ba Reberaho Janvier hagakomeza kubandikwaho; [95] Rutegetse Abazungura ba Kaburame Samson kwishyura Abazungura ba Reberaho Janvier bahagarariwe na Reberaho Prince indishyi zose hamwe zingana na 6.701.800Frw nk’uko zasobanuwe haruguru;

## Page 17

[96] Ruvuze ko urubanza RCA0033/11/HC/RWG rwaciwe n’Urukiko Rukuru Urugereko rwa Rwamagana ku wa 16/11/06/2012 ruhindutse mu ngingo zarwo zose.