AFRICA NEW LIFE MINISTRIES v MUKAKALISA N’UNDI

# AFRICA NEW LIFE MINISTRIES v MUKAKALISA N’UNDI

- Source: Amategeko - Section: Decisions (Judgements) - Date: 2023-03-14 - Case/document no.: RS/INJUST/RC 00002/2022/CA - Collection: Court of Appeal

## Text

## Page 1

AFRICA NEW LIFE MINISTRIES v MUKAKALISA N’UNDI [Rwanda URUKIKO RW’UBUJURIRE – RS/INJUST/RC 00002/2022/CA (Munyangeri P.J, KAMERE na NGAGi J.) 14 Werurwe 2023] Itegeko rigenga amasezerano – Amasezerano atanditse – Kuba amasezerano atanditse cyangwa atarengeje agaciro k’ibihumbi mirongo itanu (50,000Frw) ntabwo ubwabyo byatesha agaciro ayo masezerano kandi hari ibindi bimenyetso biyashimangira Incamake y’ikibazo: Uru rubanza rwatangiriye Mukakalisa arega Dr Kagali na Africa New Life Ministries mu Rukiko Rwisumbuye rwa Nyarugenge, asaba kwishyurwa igihembo cyo ku kazi ka “Consultance”; ubwo yabigiraga umushinga w’ubwishingizi bw’ubuvuzi bw’abakozi babo n’imiryango yabo, ukaba warugamije kugabanya amafaranga yakoreshwaga mu bwishingizi bw’abakozi akava ku mafaranga 108,910,372Frw yatangwaga buri mwaka mu ma sosiyeti y’ubwishingizi akagera kuri 67,307,376Frw. Avuga ko ako kazi kagaragazwa na email yandikiranye Dr Kagali, Asaba ko yahabwa igihembo cya 30% ya 108,910,372Frw hakiyongeraho indishyi zitandukanye. Dr Kagali yiregura avuga ko nta masezerano y’akazi ka consultance yagiranye na Mukakalisa avuga kandi ko nta n’ikimenyetso yagaragarije Urukiko cyerekana ko Kagali ahagarariye Afira Life Ministries. Afira new Life Ministries ivuga ko nta mpamvu yo gukurikiranwa mu Rukiko ngo inishyuzwe amafaranga itazi aho aturuka kuko nta masezerano yagiranye na Mukakalisa. Soras Ag Ltd yagobokeshejwe ku gahato kugira ngo isobanure impamvu yatanze amakuru yari ibikiye umukiriya wayo Africa Life iyaha Mukakalisa wari umukozi wayo ubu akaba abasiragiza mu manza nta mpamvu. Urukiko Rwisumbuye mu rubanza RC01094/2018/TGI/NYGE rwemeye kwakira ikirego cyatanzwe na Mukakalisa, rwemeza ko gifite ishingiro; rwemeje ko ikirego kiregera kwiregura cyatanzwe na Africa New Life nta shingiro gifite; rwemeje kandi rutegeka ko Africa New Life igomba gufatanya na Dr Kagali kwishyura Mukakalisa igihembo cy’akazi yakoze n’indishyi zitandukanye. Africa New Life ministries ntiyishimiye imikirize y’urubanza, irujuririra mu Rukiko Rukuru ivuga ko urukiko rutasuzumye ibibazo rwashyikirizwe na Africa New Life Ministries kugira ngo rubifateho umwanzuro; avuga kandi Umucamanza wabanje yitiranyije ibintu uko bitari, avuga na none ko Umucamanza yakoresheje itegeko n’ingingo bitakiriho ategeka Africa New Life Ministries kwishyura bidafite aho bikomoka; isaba kandi no gusuzuma ishingiro ry’indishyi yaciwe. Dr Kagali we asaba gusuzuma inzitizi y’iburabubasha n’inzitizi yo kutakira ikirego kubera kubura inyungu zo kurega, gusuzuma niba yaba yaragiranye amasezerano y’akazi ka Consultancy na Mukakarisa; gusuzuma niba Urukiko rukwiye gutegeka Mukakarisa gutanga indishyi zo gushora Dr Kagali mu manza. Mukakalisa yatanze ubujurire bwuririye ku bundi asaba indishyi z’ubukererwe.

## Page 2

Urukiko Rukuru mu rubanza RCA00086/2020/HC/KIG rwemeje ko Mukakalisa afite inyungu zo kurega, kuko yaregeye amasezerano atanditse yakoranye na Dr Kagali, ku nyungu za Africa New Life Ministries. Ku bijyanye no kumenya niba Urukiko Rwisumbuye rutarasuzumye ibibazo rwashyikirijwe na Africa New Life ministries, Urukiko Rukuru rwemeje ko nta shingiro byahabwa kuko rwasanze Urukiko rubanza rwarasubije ibibazo bya Africa New Life, nubwo itemeranya n’urukiko ku isesengura rwakoze. Ku bijyanye no kumenya niba Dr. Kagali yaragiranye amasezerano y’akazi ka Consultancy na Mukakarisa no kumenya niba email zakoreshejwe hagati ya Dr Kagali na Mukakalisa byatuma Africa New Life igira inshingano ku byakozwe hagati yabo, Urukiko rwemeje ko ibyakozwe na Mukakalisa na Dr Kagali byagiriye inyungu Africa New Life Ministries, bityo ko Urukiko Rwisumbuye nta kosa urukiko Rwisumbuye rwa Nyarugenge rwakoze mu kwemeza ko Africa New Life Ministries ifatanya na Dr Kagali wari ufitanye amasezerano atanditse na Mukakalisa gufatanya kumwishyura ku kazi yabakoreye. Ku kibazo cyo kumenya niba Urukiko rwaritiranije ibintu uko bitari, Urukiko rwemeje ko nta kwitiranya ibintu kwabayeho kuko urukiko rwashingiye ku bimenyetso bitandukanye rugaragaza ko koko Mukakalisa yakoreye inyigo Africa New Life Ministries ijyanye no kuvuza abakozi bayo, kandi ikaba ariyo ikoresha. Urukiko rukuru rwemeje na none ko Urukiko Rwisumbuye rutagombaga gukoresha ngingo ya 258 y’igitabo cya gatatu cy’urwunge rw’amategeko mbonezamubano mu gutanga indishyi kuko iryo tegeko ryavanweho ariko zagombaga gutangwa hashingiye ku yandi Mategeko. Ku bijyanye n’ubujurire bwuririye ku bundi bwa Mukakalisa, Urukiko rwemeje ko nta shingiro bufite. Africa New Life Ministries yandikiye Perezida w’Urukiko rw’Ubujurire isaba ko urubanza RCA00086/2020/HC/KIG rwaciwe rusubirishwamo ku mpamvu z’akarengane, Perezida w’Urukiko rw’Ubujurire yakoze raporo yohererezwa Perezida w’Urukiko rw’Ikirenga kugira ngo na we asuzume niba urwo rubanza rwasubirwamo ku mpamvu z’akarengane. Perezida w’Urukiko rw’Ikirenga yemeje mu cyemezo n° 065/CJ/2022 ko urwo rubanza rusubirwamo ku mpamvu z’akarengane, kandi ko rwoherezwa mu Rukiko rw’Ubujurire kugira ngo abe ari rwo ruruburanisha. Abahagarariye Africa New Life Ministries basobanura ko akarengane kagaragarira mu kuba inkiko zaremeje igiciro cyatanzwe n’umuburanyi nyamara kitagaragara mu biganiro byabaye hagati ya Mukakalisa na Dr Kagali, kandi ko kuba Urukiko Rukuru rwaravuze ko Sanlam AG Plc yirukanye Mukakalisa bitewe no kuba yaratumye itakaza umukiliya wayo w’imena ari we Africa New Life Ministries, atari ikimenyetso rwagombaga gushingiraho rufata umwanzuro. uhagarariye Mukakalisa avuga ko Umukiriya we yagiranye na Africa New Life Ministries amasezerano atanditse, bityo ko gusubirishamo urubanza rwaciwe n’Urukiko Rukuru nta shingiro bifite.

## Page 3

Urukiko rw’Ubujurire mu rubanza RS/INJUST/RC 00002/2022/CA, rwemeje ko habaye amasezerano atanditse hagati ya Dr Kagali na Mukakalisa yo gukora inyigo y’umushinga w’ubwishingizi bwo kuvuza abakozi ba Africa New Life Ministries n’imiryango yabo, kandi ibyakozwe byose byakozwe mu nyungu za Africa New Life Ministries. Incamake y’icyemezo: 1. Kuba amasezerano atanditse cyangwa atarengeje agaciro k’ibihumbi mirongo itanu (50,000Frw) ntabwo ubwabyo byatesha agaciro ayo masezerano kandi hari ibindi bimenyetso biyashimangira. 2. Akazi kakozwe n’umukozi mu nshingano ze kakagirira inyungu umukoresha, ntabwo umukoresha yahindukira ngo avuge atamutumye gukora ako kazi. Bityo, kuba umukozi yakoresha undi muntu mu rwego rw’akazi ashinzwe kandi mu nyungu z’umukoresha, uyu agomba kumuhembera akazi yakoze. Gusubirishamo urubanza ku mpamvu z’akarengane nta shingiro bifite. Amategeko yashingiweho. Itegeko N˚15/2004 ryo ku wa 12/06/2004 ryerekeye ibimenyetso mu manza n’itangwa ryabyo, Ingingo ya 9,108 Itegeko Nº 45/2011 ryo ku wa 25/11/2011 rigenga amasezerano, Ingingo ya 43 Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 111 Nta manza zifashishijwe. Urubanza I. IMITERERE Y’URUBANZA [1] Africa New Life Ministries yari yarafashe ubwishingizi bwo kwivuza bw’abakozi bayo muri SORAS AG Ltd yaje guhinduka SANLAM AG Plc. Mukakalisa Béatrice wari umukozi wa SORAS AG Ltd avuga ko uwitwa Karamage Léonard yamuhuje na Dr Kagali Samuel wari ushinzwe ubuvuzi muri Africa New Life Ministries, bavugana ku bijyanye no gukorera icyo kigo inyigo y’umushinga wo kugira ngo yishyirireho ikigega cy’ubwishingizi mu kwivuza ku bakozi ba Dream Medical Center (DMC), ikigo cya Africa New Life Ministries babyemeranyaho, uwo mushinga ukaba wari ugamije kugabanya amafaranga y’ubwishingizi bw’abakozi Africa New Life Ministries yatangaga muri SORAS AG Ltd agera kuri 108.910.372Frw. [2] Mukakalisa Béatrice akomeza asobanura ko yakoze iyo nyigo ikiguzi cy’ubwishingizi bwo kwivuza ku bakozi ba Africa New Life Ministries kiva kuri 108.910.372Frw kigera kuri 67.307.376Frw, iyo nyigo ayishyikiriza Dr Kagali Samuel akoresheje ikoranabuhanga (emails), ari na bwo buryo bwakoreshejwe mu kungurana ibitekerezo kuri iyo nyigo, hanyuma Dr Kagali Samuel ageza uwo mushinga ku Nama y’Ubutegetsi ya Africa New Life Ministries irawemera, ndetse itangira

## Page 4

kuwushyira mu bikorwa, ayishyuje igihembo cy’imirimo yayikoreye yanga kumwishyura, ahubwo imusaba ko yaza kuyikorera nk’umuforomokazi. [3] Mukakalisa Béatrice yareze Africa New Life Ministries na Dr Kagali Samuel mu Rukiko Rwisumbuye rwa Nyarugenge, asaba ko yahabwa igihembo cya 30% ya 108.910.372Frw ahwanye na 36.303.460Frw n’indishyi zitandukanye. SORAS AG Ltd yahatiwe kugoboka mu rubanza kugira ngo isobanure impamvu yahaye Mukakalisa Béatrice wari umukozi wayo amakuru yari ibikiye umukiliya wayo ari we Africa New Life Ministries. [4] Dr Kagali Samuel na Africa New Life Ministries batanze inzitizi harimo iyo kutakira ikirego cya Mukakalisa Béatrice, iy’iburabusha bw’Urukiko Rwisumbuye rwa Nyarugenge ishingiye ku kuba amasezerano ya “Consultance” Mukakalisa Béatrice avuga ko yagiranye na Dr Kagali Samuel mu nyungu za Africa New Life Ministries, ari amasezerano yo mu rwego rw’ubucuruzi, bityo ko Urukiko rw’Ubucuruzi ari rwo rufite ububasha bwo kuburanisha ikirego cye, n’iyo kuba Mukakalisa Béatrice nta bubasha n’inyungu yari afite byo kurega Dr Kagali Samuel, kuko atagaragaza amasezerano avuga ko bagiranye. [5] Ku wa 26/07/2019, Urukiko Rwisumbuye rwa Nyarugenge rwafashe icyemezo mu rubanza rubanziriza urundi RC01094/2018/TGI/NYGE, rwemeza ko inzitizi zatanzwe na Dr Kagali Samuel na Africa New Life Ministries nta shingiro zifite, ko rufite ububasha bwo kuburanisha urwo rubanza kandi ko Mukakalisa Béatrice afite ububasha n’inyungu byo kurega. [6] Ku wa 21/01/2020, Urukiko Rwisumbuye rwa Nyarugenge rwaciye urubanza mu mizi, rwemeza ko ikirego cya Mukakalisa Béatrice gifite ishingiro, rutegeka Africa New Life Ministries gufatanya na Dr Kagali Samuel kumwishyura 38.303.460Frw y’igihembo cy’imirimo y’inyigo y’umushinga yabakoreye, na 670.000Frw akubiyemo igihembo cya Avoka, ikurikiranarubanza n’ingwate y’amagarama, no gufatanya kwishyura SORAS AG Ltd 500.000Frw y’igihembo cya Avoka wayiburaniye. [7] Mu gufata icyo cyemezo, Urukiko rwashingiye ku kuba hari e-amils Mukakalisa Béatrice yagiye yandikirana na Dr Kagali Samuel, zigaragaza ko yakoreye Africa New Life Ministries inyigo y’umushinga wo kuvuza abakozi bayo n’imiryango yabo abisabwe na Dr Kagali Samuel, ndetse ko n’iyo nyigo yemejwe n’Inama y’Ubutegetsi ya Africa New Life Ministries ikanayishyira mu bikorwa. [8] Africa New Life Ministries yajuririye urubanza mu Rukiko Rukuru, ivuga ko Urukiko Rwisumbuye rwa Nyarugenge rutasuzumye ibibazo yarushyikirije, kuba rwaritiranyije ibintu rukabifata uko bitari no kuba rwarashingiye ku itegeko ritakibaho, ruyemeza inshingano yo kwishyura idafite aho ikomoka. Mukakalisa Béatrice yatanze ubujurire bwuririye ku bwayo, asaba kwishyurwa 36.000.000Frw yikubye inshuro eshatu (3) zingana n’imyaka itatu (3) Africa New Life Ministries imaze ikoresha umushinga yayikoreye n’indishyi zinyuranye. Dr Kagali Samuel na we yatanze ubujurire bwuririye ku bundi, avuga ko Urukiko Rwisumbuye rwa Nyarugenge rwaciye urubanza rutabifitiye ububasha, kandi ko Mukakalisa Béatrice nta bubasha n’inyungu afite byo kurega. Urukiko Rukuru rwemeje ko izo nzitizi nta shingiro zifite. [9] Mu rubanza RCA00086/2020/HC/KIG rwaciwe ku wa 18/03/2021, Urukiko Rukuru rwemeje ko ubujurire bwa Africa New Life Ministries nta shingiro bufite, ko ubujurire bwuririye ku bundi bwa

## Page 5

Mukakalisa Béatrice bufite ishingiro kuri bimwe, rutegeka Africa New Life Ministries guha Mukakalisa Béatrice 350.000Frw y’ikurikiranarubanza n’igihembo cya Avoka kuri urwo rwego. [10] Ku wa 16/04/2021, Africa New Life Ministries yandikiye Perezida w’Urukiko rw’Ubujurire isaba ko urubanza RCA00086/2020/HC/KIG rwaciwe n’Urukiko Rukuru ku wa 18/03/2021 rusubirishwamo ku mpamvu z’akarengane, Perezida w’Urukiko rw’bujurire yakoze raporo yohererezwa Perezida w’Urukiko rw’Ikirenga kugira ngo na we asuzume niba urwo rubanza rwasubirwamo ku mpamvu z’akarengane. [11] Mu cyemezo n° 065/CJ/2022 cyo ku wa 12/05/2022, Perezida w’Urukiko rw’Ikirenga yemeje ko urwo rubanza rusubirwamo ku mpamvu z’akarengane, kandi ko rwoherezwa mu Rukiko rw’Ubujurire kugira ngo abe ari rwo ruruburanisha, ikirego cyandikwa kuri RS/INJUST/RC 00002/2022/CA. [12] Urubanza rwaburanishijwe mu ruhame ku wa 16/01/2023, Africa New Life Ministries ihagarariwe na Me Gumisiriza Hilary hamwe na Me Mugabonabandi Jean Maurice, Mukakalisa Béatrice ahagarariwe na Me Nkeza Sempundu Clément afatanyije na Me Niyondora Nsengiyumva, Dr Kagali Samuel ahagarariwe na Me Ndihokubwayo Innocent, SANLAM AG Plc ihagarariwe na Me Mukanzigiye Donatille. Uwo munsi hasuzumwa ibibazo by’inzitizi Africa New Life Ministries yavugaga ko mu kubifataho icyemezo yagiriwe akarengane n’ikibazo cyo kumenya niba ibihe byo gusaba ko urubanza rusubirishwamo ku mpamvu z’akarengane byarubahirijwe, ababuranyi bamenyeshwa ko icyemezo kuri zo nzitizi kizasomwa ku wa 30/01/2023. [13] Ku wa 30/01/2023, Urukiko rw’Ubujurire rwafashe icyemezo mu rubanza rubanziriza urundi, rwemeza ko ubusabe bwatanzwe na Africa New Life Ministries bwo gusubirishamo ku mpamvu z’akarengane urubanza RCA00086/2020/HC/KIG rwaciwe n’Urukiko Rukuru ku wa 18/03/2021 bwatangiwe ku gihe, rwemeza ko impamvu y’akarengane irebana no kumenya niba ikirego cyatanzwe na Mukakalisa Béatrice kiri mu bubasha bw’inkiko mbonezamubano cyangwa bw’inkiko z’ubucuruzi yatanzwe na Africa New Life Ministries itakiriwe, iburanisha ry’urubanza mu mizi rishyirwa ku wa 14/02/2023, uwo munsi ntiryaba kubera ko umwe mu bacamanza bagize inteko iburanisha yari yagize ibyago, ryimurirwa ku wa 21/02/2023. Kuri iyo tariki, iburanisha ryabaye mu ruhame, ababuiranyi bahagarariwe nka mbere. II. IBIBAZO BIGIZE URUBANZA N’ISESENGURA RYABYO 1.Kumenya niba hari amasezerano yabaye hagati ya Dr Kagali Samuel na Mukakalisa Béatrice kandi niba yagira ingaruka kuri Africa New Life Ministries [14] Me Mugabonabandi Jean Maurice avuga ko inkiko zemeje ko ikigaragaza ko amasezerano yabayeho ari ibiganiro (correspondances) byabaye hakoreshejwe e- mails hagati ya Mukakalisa Béatrice na Dr Kagali Samuel, nyamara ko nta na hamwe hagaragara Africa New Life Ministries, ndetse ko e-mail ya nyuma, Dr Kagali Samuel abwira Mukakalisa Béatrice amagambo ngo “Nzakorana nawe.” Avuga kandi ko muri ibyo biganiro hagati ya Dr Kagali Samuel na Mukakalisa Béatrice, nta kopi n’imwe bigeze bagenera Africa New Life Ministries, ko nta n’igiciro kigaragaramo baba barumvikanyeho, nyamara Mukakalisa Béatrice yaragiye abwira inkiko ko bumvikanye igiciro kingana na 30% kitagira ibindi bisobanuro, inkiko na zo zikayamwemerera.

## Page 6

[15] Akomeza asobanura ko akarengane kagaragarira mu kuba inkiko zaremeje igiciro cyatanzwe n’umuburanyi nyamara kitagaragara mu biganiro byabaye hagati ya Mukakalisa Béatrice na Dr Kagali Samuel, kandi ko kuba Urukiko Rukuru rwaravuze ko SANLAM AG Plc yirukanye Mukakalisa Béatrice bitewe no kuba yaratumye itakaza umukiliya wayo w’imena ari we Africa New Life Ministries, asanga ibyabaye atari ikimenyetso rwagombaga gushingiraho rufata umwanzuro. [16] Avuga kandi ko ikigaragara cyane muri uru rubanza, ari uko nta masezerano yigeze abaho, ko ahubwo bishoboka ko hari uburyo Dr Kagali Samuel na Mukakalisa Béatrice bari babanyemo, ariko ko nta bwumvikane bw’amasezerano bwabaye hagati ya Africa New Life Ministries na Mukakalisa Béatrice, kuko ikigo nk’icyo ahagarariye, kitakenera impuguke ngo kibinyuze mu nzira zimeze nk’izisobanurwa muri uru rubanza kandi amafaranga asohorwa aba ari ay’ikigo. [17] Akomeza na none avuga ko kuba inkiko zaremeje uruhare rungana hagati ya Africa New Life Ministries na Dr Kagali Samuel, asanga mu rwego rw’amategeko bitari bikwiye kwemezwa bityo, kuko nta nshingano zigomba kureba umukozi n’umukoresha icyarimwe, akaba asanga niba hari ibyo Dr Kagali Samuel yaba yarumvikanye na Mukakalisa Béatrice kandi atatumwe na Africa New Life Ministries, Dr Kagali Samuel ari we wakwirengera ingaruka, ko kugabana inshingano byabaho igihe hagaragajwe ko ari Africa New Life Ministries yamutumye gukora ibyo yaba yarakoze. [18] Me Gumisiriza Hilary na we uhagarariye Africa New Life Ministries, avuga ko umucamanza yashingiye ku ngingo ya 2581 y’Igitabo cya gatatu cy’urwunge rw’amategeko mbonezamubano kandi itakibaho, yirengagije ingingo ya 642 y’Itegeko rigenga amasezerano ryo mu mwaka wa 2011, ko ibyo Dr Kagali Samuel yaba yarakoze atabiherewe uburenganzira na Africa New Life Ministries bwo kubikora mu izina ryayo, bitayibazwa. Asobanura kandi ko Dr Kagali Samuel atari mu bayobozi bafata ibyemezo muri Africa New Life Ministries, ko ahubwo hari abapasitoro bayobora kandi bafata ibyemezo mu izina ry’icyo kigo. [19] Me Niyondora Nsengiyumva, uhagarariye Mukakalisa Béatrice avuga ko uwo ahagarariye yagiranye na Africa New Life Ministries amasezerano atanditse. Asobanura ko Dr Kagali Samuel yari umuyobozi ushinzwe ubuzima muri Africa New Life Ministries, ko mu ntangiriro z’urubanza iki kigo cyaje kivuga ko kitazi Dr Kagali Samuel, Mukakalisa Béatrice agaragaza imbonerahamwe y’imirimo ya Africa New Life Ministries, ibona kwemera ko ari umukozi wayo, isigara ivuga ko itamutumye. [20] Avuga kandi ko umushinga w’ubuzima Dr Kagali Samuel yawukoranye na Mukakalisa Béatrice kuva mu ntangiriro kugera ugeze ku musozo wawo, bituma Africa New Life Ministries yunguka 108.910.372Frw yatangaga muri Sanlam AG Plc, kandi ko mu biganiro uwo ahagarariye yagiranye na Dr Kagali Samuel, hari aho Dr Kagali Samuel yamusabye kumushyirira inyandiko ikubiyemo iyo nyigo muri “power point” kugira ngo bizamworohere kuyimurikira abagize Inama y’Ubutegetsi y’ikigo yakoreraga. Asanga impamvu Africa New Life Ministries itongeye kuvugurura amasezerano y’ubwishingizi yari ifitanye na SANLAM AG Plc, ari uko yashinze ubwishingizi bwayo ishingiye ku nyingo yakozwe na Mukakalisa Béatrice. 1 Ingingo ya 258 y’itegeko ryo ku wa 30/07/1888 ryagengaga amasezerano cyangwa imirimo nshinganwa iteganya ko” Igikorwa cyose cy’umuntu cyangirije undi gitegeka nyir’ugukora ikosa rigikomokaho kuriha ibyangiritse.” 2 2 Ingingo ya 64 y’itegeko n˚45/2011 ryo ku wa 25/11/2011 rigenga amasezerano iteganya ko” Amasezerano akozwe ku buryo bukurikije amategeko aba itegeko ku bayagiranye. Ashobora guseswa ari uko babyumvikanyeho cyangwa ku mpamvu zemewe n’amategeko. Agomba kubahirizwa nta buryarya.”

## Page 7

[21] Akomeza asobanura Mukakalisa Béatrice yandikiye Africa New Life Ministries inshuro ebyiri yishyuza igihembo cye, ibibonye ityo itangira kumuhutaza, ari bwo yandikiraga SANLAM AG Plc iyibaza impamvu umukozi wayo atanga amakuru y’ikigo (Africa New Life Ministries) mu nyungu z’abantu ku giti cyabo, kandi ko SANLAM AG Plc imaze kubona ko ari Mukakalisa Béatrice watanze ayo makuru, yahise isesa amasezerano y’umurimo bari bafitanye. [22] Avuga na none ko atumva ukuntu Africa New Life Ministries yaba yibaza niba ubwoko bw’amasezerano yabaye ari ubucuruzi cyangwa mbonezamubano, ikongera igahindukira ikavuga ko amasezerano atabayeho, ko kuba ifite ikibazo cy’ubwoko bw’amasezerano, byumvikana ko yemera ko ayo masezerano yabayeho, ikaba isigaranye ikibazo cyo kumenya ubwoko bwayo. Ku birebana no kuba abahagarariye Africa New Life Ministries bavuga ko nta burenganzira icyo kigo cyahaye Dr Kagali Samuel bwo kugihagararira mu byo yakoranye na Mukakalisa Béatrice, Me Niyondora Nsengiyumva avuga ko ibyo Dr Kagali Samuel yakoze byose yabikoze mu izina no mu nyungu bya Africa New Life Ministries kandi ko amasezerano y’ubutumwa (contrat de mandat) atari ngombwa ko atangirwa uburenganzira (procuration). [23] Akomeza avuga ko n’ubwo bwose Dr Kagali Samuel atari ari mu bayobozi bafata ibyemezo muri Africa New Life Ministries, ibyo yakoze ikigo yakoreraga cyabigize ibyacyo, kivana abakozi bacyo muri SANLAM AG Plc, gitangira kubavuza mu bwishingizi bwacyo ndetse ko byageze n’aho Dr Kagali Samuel asaba Mukakalisa Béatrice kumukorera urutonde rw’abakozi bose no kumushakira aho yakoreshereza amakarita. [24] Avuga kandi ko mu manza zabanje, nta ho Africa New Life Ministries yigeze ivuga ku kibazo cy’amafaranga Mukakalisa Béatrice yishyuza, ko ikizanye urubanza rugeze ku rwego rwo gusubirwamo ku mpamvu z’akarengane, ko inyigo y’umushinga Mukakalisa Béatrice yateguriye Africa New Life Ministries, yatumye icyo kigo kireka kujya gitanga amafaranga y’ubwishingizi agera kuri miliyoni zirenga ijana, ahubwo noneho gitangira kujya gisohora miliyoni zigera kuri mirongo itandatu zonyine. [25] Ku birebana no kugabana inshingano, Me Niyondora Nsengiyumva avuga ko inkiko zategetse ko Africa New Life Ministries na Dr Kagali Samuel bafatanya gutanga ubwishyu, kubera ko hagati yabo, umwe yabisunikiraga ku wundi, Africa New Life Ministries ivuga ko Dr Kagali Samuel ari we ugomba kwishyura, Dr Kagali Samuel na we akavuga ko Africa New Life Ministries ari yo igomba kwishyura. [26] Asobanura kandi ko Africa New Life Ministries yamaze umwaka wose ikoresha umushinga w’ubwishingizi wateguwe na Mukakalisa Béatrice, ibona gufungura ibitaro byayo no guhagarika amasezerano y’ubwishingizi yari ifitanye na SANLAM AG Plc, ndetse ko muri uwo mushinga, Mukakalisa Béatrice yari yateganyije ko uruhare rw’umukozi mu kwivuza ari 5%, kandi ko ari byo bigenderwaho ubu na Africa New Life Ministries ikaba idahakana ko umushinga ikoresha yawuhawe na Dr Kagali Samuel. [27] Me Nkeza Sempundu Clément na we uhagarariye Mukakalisa Béatrice, avuga ko nta wakwibaza niba amasezerano yarabayeho ngo yongere yibaze niba ayo masezerano yarakurikije amategeko, ko mu gika cya 14 n’icya 19 by’urubanza rusubirwamo ku mpamvu z’akarengane, Urukiko rwasobanuye ko ibyo Dr Kagali Samuel yakoranye na Mukakalisa Béatrice byari mu nyungu

## Page 8

za Africa New Life Ministries, kandi ko Africa New Life Ministries yagobokesheje SANLAM AG Plc, ivuga ko hari amakuru yari abitswe n’iyi sosiyete y’ubwishingizi, yashyizwe hanze na Mukakalisa Béatrice. [28] Akomeza avuga ko mu mwanzuro wo gusubirshamo urubanza ku mpamvu z’akarengane, Africa New Life Ministries yemera ko Dr Kagali Samuel yari umukozi wayo ushinzwe ubuzima, ko yemera ko yayigiriye inama yo kuva muri SANLAM AG Plc kugira ngo ijye itanga amafaranga make ku bwishingizi bw’abakozi bayo, ko icyo Africa New Life Ministries itemera ari ugutanga ubwishyu, ko rero kuba Dr Kagali Samuel yari ashinzwe ubuzima muri Africa New Life Ministries, byumvikanisha ko ubwishingizi bw’indwara bw’abakozi bayo bwari mu nshingano ze, bikumvikanisha ko umushinga Dr Kagali Samuel yakoranye na Mukakalisa Béatrice, yabikoze ari mu nshingano ze. [29] Me Ndihokubwayo Innocent, uhagarariye Dr Kagali Samuel avuga ko uwo ahagarariye yari umuyobozi ushinzwe ubuzima muri Africa New Life Ministries koko, ko ariko ubwo Mukakalisa Béatrice yazaga kwishyuza, Africa New Life Ministries yafashe umwanzuro wo kumwirukana, kubera ko yabonaga ayijyanye mu bintu bitateganyijwe, ndetse na Mukakalisa Béatrice yirukanwa muri SANLAM AG Plc. [30] Akomeza avuga ko basabye ko Urukiko rwahatira Mukakalisa Béatrice kugaragaza amasezerano yaba yaragiranye na Dr Kagali Samuel ndetse n’agaciro kayo, ko ariko kugeza ubu ntayo yagaragaje, akaba ataramenya ibyo Dr Kagali Samuel yavugaga ko azakoranamo na Mukakalisa Béatrice kandi ko amakuru Mukakalisa Béatrice yatanze, n’ubundi yari asanzwe muri “portfolio” ya Africa New Life Ministries. [31] Ku birebana no kuba Africa New Life Ministries itaravuguruye amasezerano y’ubwishingizi yari ifitanye na SANLAM AG Plc mbere, Me Ndihokubwayo Innocent avuga ko byatewe n’uko yari yaramaze gushinga ibitaro byayo byitwa DMC, ko rero itari gukomeza kuvuza abakozi bayo hanze kandi yifitiye ibitaro, ndetse ko umushinga Dr Kagali Samuel yakoranye na Mukakalisa Béatrice byari uburyo bwo guhererekanya ubumenyi nk’uko buri wese mu bumenyi bwe yakwifashisha mugenzi we ufite ubumenyi mu bintu runaka, bakungurana ibitekerezo (atanga urugero rwa Avoka ushobora gusaba ibitekerezo undi Avoka cyangwa umucamanza ushobora kugisha inama undi mucamanza ku kibazo runaka). Asoza avuga ko nta bwishyu Dr Kagali Samuel agomba guha Mukakalisa Béatrice, kubera ko nta masezerano bagiranye. Uko Urukiko rubibona [32] Ingingo ya 9 y’itegeko N˚15/2004 ryo ku wa 12/06/2004 ryerekeye ibimenyetso mu manza n’itangwa ryabyo iteganya ko” Ibimenyetso bihamya amasezerano cyangwa ibindi bikorwa bishobora gutangwa hakoreshejwe inyandiko, ubuhamya, uburyo bwo gucukumbura, ukwiyemerera k’umuburanyi cyangwa herekanywe ibindi bintu bifatika”, ingingo ya 108 y’iryo tegeko iteganya ko” Ibimenyetso bicukumbuwe no gusesengura urubanza ari ibimenyetso bitacukumbuwe n’amategeko, bicukumburwa n’ubwenge n’ubushishozi bw’abacamanza. Abacamanza bagomba kwemera gusa ibyo bimenyetso iyo bikomeye, bisobanuye kandi bihuje. Naho ingingo ya 43 y’Itegeko Nº 45/2011 ryo ku

## Page 9

wa 25/11/2011 rigenga amasezerano igateganya ko inyandiko iriho umukono igaragaza icyakozwe ikozwe atari mu rwego rw’amasezerano iba ihagije nk’ikimenyetso cy’amasezerano”. [33] Muri dosiye y’urubanza harimo inyandiko yo ku wa 21/05/2017, igaragaza igihe Mukakalisa Béatrice yashyikirije Dr Kagali Samuel inyigo y’umushinga yateguye hakoreshejwe ikoranabuhanga rya e-mails na power point nk’uburyo bwari kumworohera mu kumurika uwo mushinga mu nzego za Africa New Life Ministries byarebaga. Harimo kandi inyandiko yo ku wa 09/06/2017, aho Mukakalisa Béatrice yohererezaga Dr Kagali Samuel urutonde rw’abanyamuryango bafite amasezerano hagati ya Africa New Life Ministries na Dream Medical Center Fund, amugaragariza ibiciro bisanzwe bikoreshwa, amumenyesha ko ibiciro bishya bitaramenyekana ndetse anamumenyesha ibiciro by’amakarita yo kwivurizaho. [34] Mu gafata umwanzuro ku kibazo cyo kumenya niba hari amasezerano y’akazi ka “consultance” yabaye hagati ya Dr Kagali Samuel na Mukakalisa Béatrice kandi niba e-mails zakoreshejwe hagati yabo zatuma Africa New Life Ministries igira inshingano, Urukiko Rukuru rwasanze e-mails zinyuranye z’ibiganiro hagati ya Dr Kagali Samuel na Mukakalisa Béatrice ndetse n’ibaruwa Sanlam AG Plc yandikiye Mukakalisa Béatrice imusaba ibisobanuro, bigaragaza ko habaye amasezerano atanditse hagati ya Dr Kagali Samuel na Mukakalisa Béatrice kandi ko kuba ibyakozwe byose byarakozwe mu nyungu za Africa New Life Ministries, mu gutegeka ko Dr Kagali Samuel Na Africa New Life Ministries bafatanya guha Mukakalisa Béatrice ubwishyu yagenewe, nta kosa Urukiko rubanza rwakoze. [35] Nk’uko byagaragajwe mu rubanza rusubirishwamo ku mpamvu z’akarengane, Urukiko rw’Ubujurire na rwo rurasanga harabaye amasezerano atanditse hagati ya Dr Kagali Samuel na Mukakalisa Béatrice yo gukora inyigo y’umushinga w’ubwishingizi bwo kuvuza abakozi ba Africa New Life Ministries n’imiryango yabo, bikaba byumvikanisha ko ibyakozwe byose byakozwe mu nyungu za Africa New Life Ministries, kuba bigaragara ko atanditswe kandi arengeje 50.000Frw, bikaba bitaba impamvu yo kuvuga ko atabayeho cyangwa kuyatesha agaciro mu gihe hagaragajwe ibindi bimenyetso bigomba gushingirwaho hemezwa ko amasezerano yabayeho, birimo inyandiko yo ku wa 21/05/2017, igaragaza igihe Mukakalisa Béatrice yashyikirije Dr Kagali Samuel inyigo y’umushinga yateguye hakoreshejwe ikoranabuhanga rya e-mails na power point nk’uburyo bwari kumworohera mu kumurika uwo mushinga mu nzego za Africa New Life Ministries byarebaga, kimwe n’inyandiko yo ku wa 09/06/2017, Mukakalisa Béatrice yoherereza Dr Kagali Samuel urutonde rw’abanyamuryango bafite amasezerano hagati ya Africa New Life Ministries na Dream Medical Center Fund, amugaragariza ibiciro bisanzwe bikoreshwa, amumenyesha ko ibiciro bishya bitaramenyekana ndetse anamumenyesha ibiciro by’amakarita yo kwivurizaho. [36] Ku birebana no kuba abahagarariye Africa New Life Ministries bavuga ko ibyo Dr Kagali Samuel yakoranye na Mukakalisa Béatrice bibareba ku giti cyabo, ko nta nshingano zikwiye kuvuka zireba Africa New Life Ministries kuko atari mu bayobozi bayo kandi ko itari yamusabye gushaka umukozi wo gutegura iyo nyigo y’umushinga, Urukiko rw’Ubujurire rurasanga nta shingiro bigomba guhabwa, kubera ko Africa New Life Ministries yemera ko Dr Kagali Samuel yari umukozi wayo ushinzwe ubuzima, ikindi kandi inyigo y’umushinga w’ubwishingizi yakozwe, bigaragara ko yari mu nshingano za Dr Kagali Samuel nk’ushinzwe ubuzima, kuba rero Dr Kagali Samuel yari umukozi wa Africa New Life Ministries, akaba hari inshingano yakoze mu nyungu z’umukoresha we, kuko

## Page 10

umushinga w’ubwishingizi wakozwe Africa New Life Ministries iwukoresha mu bwishingizi bw’abakozi bayo bivuza mu bitaro byayo bya DMC, byumvikanisha ko Africa New Life Ministries irebwa n’inshingano zikomoka ku itegurwa ry’iyo nyigo, mu gihe umukozi wayo yifashishije undi muntu akayikora, naho kuba Dr Kagali Samuel atari mu bayobozi bafata ibyemezo muri Africa New Life Ministries, ibyo bikaba bitatesha agaciro ibyo yakoze byari mu nshingano ze mu nyungu z’umukoresha we nk’uko byasobanuwe haruguru. [37] Urukiko rw’Ubujurire rurasanga kandi ibivugwa n’uhagarariye Dr Kagali Samuel, ko ibyo yakoranye na Mukakalisa Béatrice bwari uburyo bwo guhererekanya ubumenyi gusa nta shingiro bifite, cyane ko yanasobanuye ko Africa New Life Ministries yashatse kumuha akazi k’ubuforomo aho kumwishyura amafaranga yasabaga akabyanga kandi Africa New Life Ministries ntiyigeze ihakana iyo mvugo ye, bivuze ko ibyo Mukakalisa Béatrice yakoze, yarebye ubwishyu ategerejemo yemera kuba yahara akazi yakoraga muri SANLAM AG Plc mu gihe byaba ngombwa. [38] Urukiko rw’Ubujurire rurasanga kandi Africa New Life Ministries yemera ko ikoresha inyigo y’umushinga w’ubwishingizi yakozwe na Dr Kagali Samuel nk’umokozi wayo, na Dr KAGALI Samuel akaba yemera ko yakoranye na Mukakalisa Béatrice mu itegurwa ryawo icyo atemera akaba ari ukuba hari igihembo icyo ari cyo cyose yari ategereje, kuba rero yaba Dr Kagali Samuel, yaba Africa New Life Ministries, buri wese yarafashe inyigo y’umushinga wateguwe ku ikubitiro na Mukakalisa Béatrice akayigira iye, bigaragaza ko bafite uruhare rungana mu kuzuza inshingano zo gutanga igihembo Mukakalisa Béatrice yakoreye. [39] Ku birebana no kuba Dr Kagali Samuel na Africa New Life Ministries bavuga ko nta mubare w’amafaranga yumvikanyweho nk’igihembo cya Mukakalisa Béatrice, nyamara inkiko zikagenera Mukakalisa Béatrice umubare w’amafaranga yivugiye atagaragarije ibimenyetso, bigaragara ko mu manza zabanje, Mukakalisa Béatrice yasobanuye ko yishyuza 30% ya 108.901.372Frw kandi ko yayabaze ashingiye ku buryo abandi bantu bakora umurimo wa “consultance” bakoresha babara ibihembo byabo, Dr Kagali Samuel na Africa New Life Ministries ntihagira icyo babivugaho uretse gusaba ikimenyetso cyanditse kigaragaza ko habaye amasezerano y’imikoranire. Urukiko rw’Ubujurire rurasanga rero, kuba Africa New Life Ministries na Dr Kagali Samuel baratsimbaraye ku kimenyetso cy’amasezerano ntihagire umubare w’amafaranga y’igihembo batangaho igitekerezo mu gihe urukiko rwaba rubibonye ukundi, urukiko rutari kubatekerereza icyo babivugaho mu gihe ubwabo batashatse kugira icyo bavuga mu buryo busobanutse ku byerekeye umubare w’amafaranga yakwishyurwa mu gihe bibaye ngombwa, bityo akaba nta kosa urukiko rwakoze mu kugenera Mukakalisa Béatrice umubare w’amafaranga yaregeraga kuko rwasanze agomba igihembo. [40] Ku birebana n’aho uhagarariye Dr Kagali Samuel avuga ko uyu muganga yandikiye Mukakalisa Béatrice amubwira ko bazakorana, ariko ko batarasobanukirwa bari kuzakorana mu biki, Urukiko rurasanga nta bindi bigaragara ko bagombaga gukoranamo, kuko uretse itegurwa ry’uwo mushinga w’ubwishingizi bwo kwivuza warebaga abakozi ba Africa New Life Ministiries n’imiryango yabo, n’izindi nshingano yazahabwa zakenera ko amwiyambaza, kuko nk’uko byagaragajwe, Africa New Life Ministries yivugiye ko yarangije kwirukana Dr Kagali Samuel, ikaba itavuga ko hari iyindi mirimo yafunguye yaba yarashoyemo umushinga wayo yateguranye na Mukakalisa Béatrice cyangwa ngo abe yarahaye Mukakalisa Béatrice akandi kazi, cyane ko impande zose zemeranya ko na we yasezerewe muri Sanlam AG Plc.

## Page 11

[41] Hashingiwe ku biteganywa n’amategeko ndetse n’ibisobanuro byatanzwe, Urukiko rw’Ubujurire rurasanga nta karengane kabaye mu kwemeza ko Africa New Life Ministries ifite inshingano zo gufatanya (in solidum) na Dr Kagali Samuel kwishyura igihembo Mukakalisa Béatrice yakoreye, ikirego cyayo cyo gusubirishamo urubanza ku mpamvu z’akarengane kikaba nta shingiro gifite. 2.Kumenya ishingiro ry’indishyi zisabwa n’ababuranyi [42] Me Nkeza Sempundu Clément uhagarariye Mukakalisa Béatrice asaba Urukiko rw’Ubujurire gutegeka Africa New Life Ministries guha uwo ahagarariye 2.000.000Frw y’ikurikiranarubanza n’igihembo cy’Abavoka babiri bamuburanira. [43] Me Mukanzigiye Donatille uhagarariye SANLAM AG Plc asaba Urukiko rw’Ubujurire gutegeka Africa New Life Ministries guha SANLAM AG Plc indishyi z’akababaro zingana na 1.500.000Frw, 500.000Frw y’igihembo cya Avoka yasabye ku rwego rwa mbere ntayahabwe, na 700.000Frw y’igihembo cya Avoka yo kuri uru rwego, kubera gushorwa mu manza z’amaherere. [44] Me Safari Jean Bosco wari uhagarariye Africa New Life Ministries mu nama ntegurarubanza yabaye ku wa 30/09/2022, avuga ko indishyi Mukakalisa Béatrice asaba nta shingiro zifite, kuko Africa New Life Ministries ari yo yarenganyijwe, akaba ari yo ikwiye guhabwa izingana na 10.000.000Frw harimo amafaranga y’ikurikiranarubanza n’igihembo cy’Abavoka bayiburanira. Avuga kandi ko indishyi zisabwa na SANLAM AG Plc na zo nta shingiro zikwiye guhabwa, kubera ko ari yo yagize uburangare, umukozi wayo akiba amabanga y’abakiliya bayo ashaka kuyakoresha mu nyungu ze bwite, ikaba rero itakuririra ku makosa yayo ngo isabe indishyi. Me SSALI Robert wari uhagarariye Dr Kagali Samuel mu nama ntegurarubanza yabaye ku wa 30/09/2022, avuga ko Urukiko ari rwo rwazabisuzuma. Uko Urukiko rubibona [45] Ku birebana n’amafaranga y’ikurikiranarubanza n’igihembo cya Avoka, ingingo ya 111 y’itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Ikirego cy’amafaranga y’ikurikiranarubanza ari ikirego gishamikiye ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishwa rimwe n’ikirego cy’iremezo. Gishobora kandi kwakirwa kikaburanishwa n’iyo ikirego cy’iremezo cyaba kitakiriwe.” [46] Urukiko rurasanga amafaranga asabwa na Africa New Life Ministries itagomba kuyahabwa, kubera ko ikirego cyayo nta shingiro cyahawe, rurasanga kandi amafaranga y ’igihembo cya Avoka angana na 500.000Frw SANLAM AG Plc ivuga ko yari yasabye ku rwego rwa mbere ntiyahabwe, itagomba kuyahabwa kubera ko itigeze iyaregera mu karengane. [47] Naho 1.500.000Frw y’indishyi z’akababro isaba, Urukiko rurasanga itagomba kuyahabwa kubera ko, Africa New Life Ministries yari ifite uburenganzira bwo kuyigobokesha mu rubanza, cyane ko bigaragara ko ibisobanuro yarutanzemo, urukiko rwabyifashishije mu gukemura ikibazo rwari rwashyikirijwe.

## Page 12

[48] Urukiko rurasnganga, Africa New Life Ministries igomba guha SANLAM AG Plc na Mukakalisa Béatrice 700.000Frw y’ikurikiranarubanza n’igihembo cya Avoka kuri buri wese, kuri uru rwego agenwe mu bushishozi bw’Urukiko kuko ayo basaba ari ikirenga. III. ICYEMEZO CY’URUKIKO [49] Rwemeje ko ikirego cya Africa New Life Ministries cyo gusubirishamo ku mpamvu z’akarengane urubanza RCA00086/2020/HC/KIG, rwaciwe n’Urukiko Rukuru ku wa 18/03/2021, nta shingiro gifite. [50] Rwemeje ko nta karengane kabaye mu rubanza RCA00086/2020/HC/KIG rwaciwe n’Urukiko Rukuru ku wa 18/03/2021. [51] Rwemeje ko imikirize y’urubanza RCA00086/2020/HC/KIG rwaciwe n’Urukiko Rukuru ku wa 18/03/2021, idahindutse. [52] Rutegetse Africa New Life Ministries guha SANLAM AG Plc 700.000Frw akubiyemo amafaranga y’ikurikiranarubanza n’igihembo cya Avoka kuri uru rwego. [53] Rutegetse Africa New Life Ministries guha Mukakalisa Béatrice 700.000Frw akubiyemo amafaranga y’ikurikiranarubanza n’igihembo cya Avoka kuri uru rwego. [54] Ruvuze ko amafaranga y’amagarama y’urubanza aherera ku Isanduku ya Leta.