UBUSHINJACYAHA v. BANZUBAZE

# UBUSHINJACYAHA v. BANZUBAZE

- Source: Amategeko - Section: Decisions (Judgements) - Date: 2025-10-30 - Case/document no.: RPAA01335/2024/CA - Collection: Court of Appeal

## Text

## Page 1

UBUSHINJACYAHA v. BANZUBAZE [Rwanda URUKIKO RW’UBUJURIRE – RPAA01335/2024/CA (Umugwaneza, P.J.) 30 Ukwakira 2025] Amategeko agenga imanza nshinjabyaha – Icyaha cyo kunywa ibiyobyagwenge – Iyo uwafatanwe ingano nto y’ibiyobyabwenge nta bindi bimenyetso byemeza ko yari agamije kubikwirakwiza, afatwa nk’uwari agamije kubyikoreshereza (kubinywa) ku giti cye. Amategeko agenga imanza nshinjabyaha – Icyaha cyo gucuruza ibiyobyabwenge – Igikorwa cyo gucuruza ibiyobyabwenge ntikireberwa ku kuba hari umuguzi wasanzwe aho uregwa acururiza ibiyobyabwenge, ahubwo ko bihagije kuba afite ibiyobyabwenge kandi yiteguye kubiha umuntu wese uje umugana abishaka. Incamake y’ikibazo: Banzubaze yarezwe n’Ubushinjacyaha mu Rukiko Rwisumbuye rwa Muhanga, bumukurikiranyeho icyaha cyo gucuruza ibiyobyabwenge, kuko yafatanywe udupfunyika 8 tw’urumogi, ariko we yaburanye ahakana icyo cyaha. Urukiko Rwisumbuye rwemeje ko Uregwa ahamwa n’icyo cyaha ashinjwa n’ubwo yaburanye agihakana ariko hari ibimenyetso bikimuhamya, maze ahanishwa igifungo cya burundu n’ihazabu ya 20.000.000Frw. Uregwa yajurirye mu Rukiko Rukuru, urugereko rwa Nyanza, avuga ko asaba kurenganurwa no guhindurirwa inyito y’icyaha ashinjwa kikaba icyaha cyo gufatanwa ibiyobyabwenge aho kuba kubicuruza. Ubushinjacyaha buvuga ko, Uregwa atarenganyijwe nk’uko abivuga, ahubwo ntiyabashije kugaragaza ibimenyetso bimushinjura, bivuguruza ibyatanzwe. Mbere yo gufata icyemezo, Urukiko Rukuru rwasanze kuba Uregwa aburana ahakana icyaha aregwa ari uburyo bwo kugihunga, kuko hashingiwe ku buhamya bwatanzwe n’abamufashe bari bahawe amakuru ko arucuruza, hemejwe ko ahamwa ic’icyaha cyo gucuruza ibiyobyabwenge, bityo inyito y’icyaha ikaba idakwiriye guhinduka. Urukiko Rukuru rwamuhanishije igihano cy’igifungo cy’imyaka 15 n’ihazabu ya 5.000.000Frw, kuko bwari ubwa mbere yakurikiranwa mu butabera mu buryo buzwi, kandi akaba yarafatanywe ingano ntoya y’ibiyobyabwenge. Uregwa ntiyishimiye icyo cyemezo kuko yakijuririye muri uru Rukiko rw’Ubujurire asaba ko inyito y’icyaha yahamijwe yahinduka agahamywa icyaha cyo kunywa ibiyobyabwenge aho kuba icyo kubicuruza, kuko urumogi yafatanwe rwari urwo kunywa, maze agahabwa ibihano bijyanye n’icyo cyaha yemera. Asobanura ko urwo yafatanywe rwari urwo kunywa, ko nta muntu bamusanganye arimo kurumugurisha ahubwo ko yafashwe avuye kurugura ngo ajye arunywaho, kandi ko urumogi yafatanywe ari rukeya ku buryo rufatwa nk’aho ari urwo gukwirakwiza. Ubushinjacyaha bwasubije ubujurire bw’Uregwa buvuga ko urumogi yafatanwe rwari urwo kwinywera, ari uburyo bwo guhunga icyaha cyo gucuruza ibiyobyabwenge kuko gufatwa kwe byaturutse ku makuru yatanzwe ko arimo kurucuruza, ari nacyo cyatumye polisi n’Ubuyobozi bw’Umurenge bamushakisha, bararumufatana, bityo inyito y’icyaha idakwiye guhinduka. Incamake y’icyemezo: 1. Iyo uwafatanwe ingano nto y’ibiyobyabwenge nta bindi bimenyetso byemeza ko yari agamije kubikwirakwiza, afatwa nk’uwari agamije kubyikoreshereza (kubinywa) ku giti cye. 2. Igikorwa cyo gucuruza ibiyobyabwenge ntikireberwa ku kuba hari umuguzi wasanzwe aho uregwa acururiza ibiyobyabwenge, ahubwo ko bihagije kuba afite ibiyobyabwenge kandi yiteguye kubiha umuntu wese uje umugana abishaka. Ubujurire nta shingiro bufite.

## Page 2

Amategeko yashingiweho: Itegeko N° 062/2024 ryo ku wa 20/06/2024 rigenga ibimenyetso, ingingo ya 53 n’iya 87. Imanza zifashishijwe: RPAA0148/11/CS, Ubushinjacyaha, Murinzi Olivier na Niyodusenga Philippe rwaciwe n’Urukiko rw’Ikirenga ku wa 27/11/2015. RPAA00173/2024/CA, Ubushinjacyaha na Mponzeze Eric rwaciwe n’Urukiko rw’Ubujurire ku wa 29/04/2025. RPAA00947/2024/CA, Ubushinjacyaha na Shema Serge rwaciwe n’Urukiko rw’Ubujurire ku wa 28/03/2025. RPAA00337/2022/CA, Ubushinjacyaha na Gashakabuhake François rwaciwe n’Urukiko rw’Ubujurire ku wa 24/12/2024. RPAA00124/2023/CA, Ubushinjacyaha na Barampama Joseph rwaciwe n’Urukiko rw’Ubujurire ku wa 19/12/2024. RPAA00436/2020/CA, Ubushinjacyaha na Ahimpereye Ndeze François rwaciwe n’Urukiko rw’Ubujurire ku wa 28/06/2022. RPAA0019/2021/CA, Ubushinjacyaha na Murekatete Immaculée na Munyakabera Jean de Dieu rwaciwe n’Urukiko rw’Ubujurire ku wa 26/06/2021. Urubanza I. IMITERERE Y’URUBANZA [1] Ku itariki ya 20/03/2020 saa cyenda n’igice z’amanywa (15h:30), mu Mudugudu wa Gasharu, Akagari ka Mubuga, Umurenge wa Shyogwe, Banzubaze Emmanuel yafashwe n’Ubuyobzi bw’Umurenge wa Shyogwe bufatanyije na police afite udupfunyika 8 tw’urumogi, ahita ashyikirizwa Ubugenzacyaha atangira gukurikiranwa. [2] Ubushinjacyaha bwamureze mu Rukiko Rwisumbuye rwa Muhanga, icyaha cyo gucuruza ibiyobyabwenge, aburana agihakana akavuga ko nta rumogi yafatanwe, ko bamusatse bagasanga nta rumogi afite, aba Dasso baba aribo baruta hasi bahita baza baramufata bavuga ko ari urwe. [3] Mu rubanza RP00396/2020/TGI/MHG rwaciwe ku wa 17/12/2020, Urukiko Rwisumbuye rwa Muhanga rwasanze n’ubwo Banzubaze Emmanuel ahakana icyaha aregwa ariko hari ibimenyetso bikimuhamya, birimo: kuba abazwa mu Bushinjacyaha yaremeye ko yafatanwe urumogi yahawe n’uwitwa Claude bakorana mu kirombe ariko ko atigeze arucuruza, imvugo z’abatangabuhamya barimo uwitwa Ntawizihirwa Jean Bosco na AIP Nkaka Célestin bemeza ko bahawe amakuru ko arimo gucuruza urumogi bagiye kumufata bamusangana udupfunyika 8 tw’urumogi, n’inyandikomvugo y’ifatira ry’urumogi rungana n’udupfunyika umuni yafatanwe akaba yarayishyizeho umukono. Urukiko rushingiye kuri ibyo bimetso rwahamije Banzubaze Emmanuel icyaha cyo gucuruza ibiyobyabwenge by’urumogi, ahanishwa igifungo cya burundu n’ihazabu ya 20.000.000Frw. [4] Banzubaze Emmanuel ntiyanyuzwe n’urwo rubanza arujuririra mu Rukiko Rukuru, Urugereko rwa Nyanza, avuga ko asaba kurenganurwa kuko Urukiko Rwisumbuye rwa Muhanga rwamugeretseho icyaha cyo gucuruza urumogi nta kimenyetso na kimwe gifatika rushingiyeho, ko udupfunyika 8 tw’urumogi bamufatanye rwari urwo kwinywera kuko iyo aba arucuruza bari kumwereka uwari uje kurugura, bityo ko inyito y’icyaha yahinduka kikaba gufatanwa ibiyobyabwenge aho kuba kubicuruza. [5] Ubushinjacyaha bwavuze ko Banzubaze Emmanuel atarenganyijwe nk’uko abivuga, ahubwo ko atabashije kugaragaza ibimenyetso bimushinjura, bivuguruza ibyatanzwe n’Ubushinjacyaha.

## Page 3

[6] Mu rubanza RPA00027/2021/HC/NYZ rwaciwe ku wa 21/11/2024, Urukiko Rukuru, Urugereko rwa Nyanza rwasanze kuba Banzubaze Emmanuel ahakana icyaha cyo gucuruza urumogi, akavuga ko urwo yafatanwe rwari urwo kwinywera, ari uburyo bwo guhunga icyaha cyo gucuruza ibiyobyabwenge, kuko abatangabuhamya AIP Nkaka Célestin na Ntawizihirwa Jean Bosco bahamya ko bari bahawe amakuru n’abaturage ko ariho acuruza urumogi, bajya kumufata bamusangana udupfunyika 8 tw’urumogi, ibyo bikaba bihagije kwemeza ko urwo rumogi Banzubaze Emmanuel yafatanwe rwari urwo gucuruza, inyito y’icyaha ikaba idakwiriye guhinduka. Urukiko rwasanze ariko Banzubaze Emmanuel yagabanyirizwa igihano kigahuzwa n’uburemere bw’icyaha yakoze, kuko ari ubwa mbere yakurikiranwa mu butabera mu buryo buzwi kandi akaba yarafatanwe ingano ntoya y’ibiyobyabwenge, ahanishwa igifungo cy’imyaka 15 n’ihazabu ya 5.000.000Frw. [7] Banzubaze Emmanuel yajuririye Urukiko rw’Ubujurire, urubanza ruhabwa RPAA01335/2024/CA, ruburanishwa mu ruhame ku wa 14/10/2025, yunganiwe na Me Musasangohe Illuminée, Ubushinjacyaha buhagarariwe na Bideri Diogène, Umushinjacyaha ku rwego rw’Igihugu. [8] Mu myanzuro y’ubujurire no mu miburanire yabo, Banzubaze Emmanuel n’umwunganira asaba ko inyito y’icyaha Banzubaze Emmanuel yahamijwe yahinduka agahamywa icyaha cyo kunywa ibiyobyabwenge aho kuba icyo kubicuruza kuko urumogi yafatanwe rwari urwo kunywa, maze agahabwa ibihano bijyanye n’icyo cyaha yemera. [9] Ubushinjacyaha buvuga ko ibivugwa na Banzubaze Emmanuel ko urumogi yafatanwe rwari urwo kwinywera, ari uburyo bwo guhunga icyaha cyo gucuruza ibiyobyabwenge kuko gufatwa kwe byaturutse ku makuru yatanzwe ko arimo gucuruza urumogi, ari nacyo cyatumye abapolisi n’Ubuyobozi bw’Umurenge bamushakisha, bararumufatana, bityo ko inyito y’icyaha idakwiriye guhinduka. [10] Hakurikijwe iyo miburanire, muri uru rubanza harasuzumwa ikibazo cyo kumenya niba hashingiwe ku bikorwa Banzubaze Emmanuel yakoze n’ibimenyetso bibihamya, akwiririye guhamwa n’icyaha cyo kunywa ibiyobyabwenge aho kuba icyo kubicuruza. II. ISESENGURA RY’IKIBAZO KIGIZE URUBANZA Kumenya niba hashingiwe ku bikorwa Banzubaze Emmanuel yakoze n’ibimenyetso bibihamya, akwiriye guhamwa n’icyaha cyo kunywa ibiyobyabwenge aho kuba icyo kubicuruza [11] Banzubaze Emmanuel n’umwunganira bavuga ko urumogi rungana n’udupfunyika 8 Banzubaze Emmanuel yafatanwe rwari urwo kunywa, ko nta muntu bamusanganye arimo kumugurisha urumogi ahubwo ko yafashwe avuye kurugura ngo ajye arunywaho, kandi ko urumogi yafatanwe ari rukeya kuburyo rufatwa nk’aho ari urwo gukwirakwiza, bagasaba ko inyito y’icyaha yahinduka agahanirwa icyaha cyo kunywa ibiyobyabwenge agahabwa ibihano bijyanye n’icyo cyaha yemera. [12] Banzubaze Emmanuel n’umwunganira basaba ko hashingirwa ku mirongo yatanzwe mu manza zitandukanye, harimo urubanza RPAA00124/2023/CA rwaciwe n’Urukiko rw’Ubujurire ku wa 19/12/2024, haburana Ubushinjacyaha na Barampama Joseph n’urubanza RPAA00337/2022/CA rwaciwe n’Urukiko rw’Ubujurire ku wa 24/12/2024 haburana Ubushinjacyaha na Gashakabuhake François, zemeje ko iyo nta bindi bimenyetso byemeza ko uregwa wafatanwe ingano ntoya y’ibiyobyabwenge yari agamije kubikwirakwiza no kubigurisha, afatwa nk’uwari ugamije kubyikoreshereza (simple drug possession) aho kubicuruza no kubikwirakwiza (drug trafficking /drug distribution), agahabwa ibihano bito; maze Urukiko rukabona ko udupfunyika 8 tw’urumogi Banzubaze Emmanuel yafatanwe ari ingano ntoya, bityo ko akwiye guhanirwa gufatanwa urumogi rwo kwikoreshereza ku giti cye, agahanishwa igifungo cy’imyaka 2.

## Page 4

[13] Ubushinjacyaha buvuga ko ibivugwa na Banzubaze Emmanuel ko urumogi yafatanwe rwari urwo kwinywera, ari uburyo bwo guhunga icyaha cyo gucuruza ibiyobyabwenge kuko gufatwa kwe byaturutse ku makuru yatanzwe ko arimo gucuruza urumogi, ari nacyo cyatumye polisi n’Ubuyobozi bw’Umurenge bamushakisha, bararumufatana, bityo ko inyito y’icyaha idakwiye guhinduka. [14] Ubushinjacyaha bukomeza buvuga ko kugira ngo umuntu yitwe umucuruzi w’ibiyobyabwenge, bitagombera ko haba hari umuguzi bamusanganye, ahubwo ko igihe icyo aricyo cyose umuntu afite ibiyobyabwenge yiteguye kubiha umuntu wese uje abishaka, aba ari umucuruzi w’ibiyobyabwenge nk’uko byemejwe mu rubanza RPAA0019/2021/CA rwaciwe n’Urukiko rw’Ubujurire ku wa 26/06/2021 haburana Ubushinjacyaha na Murekatete Immaculée na Munyakabera Jean de Dieu. Ko rero kuba polisi n’Ubuyobozi bw’umurenge barahawe amakuru ko Banzubaze Emmanuel arimo gucuruza urumogi, bakajya kumufata bakamusangana udupfunyika 8 tw’urumogi, ibyo bigaragaza ko yarimo kurucuruza. UKO URUKIKO RUBIBONA [15] Ingingo ya 87 y’Itegeko N° 062/2024 ryo ku wa 20/06/2024 rigenga ibimenyetso ivuga ko mu rubanza nshinjabyaha, ikimenyetso gishingira ku mpamvu zose z’ibyabaye n’ibyemejwe n’amategeko, ababuranyi bapfa kuba barahawe umwanya wo kubijyaho impaka. Naho ingingo ya 53 y’iryo Tegeko ikavuga ko urwego rufite ububasha rusuzuma ukwemerwa cyangwa ukutemerwa n’agaciro by’ikimenyetso gishingiye ku buhamya. Ntirwita ku mubare w’abatangabuhamya, ahubwo rwita cyane ku bumenyi bw’ibyabaye no ku budakemwa bw’ubuhamya batanga. [16] Nk’uko imikirize y’urubanza rujuririrwa ibigaragaza, Urukiko Rukuru, Urugereko rwa Nyanza rwasuzumye ikibazo cyo kumenya niba ibikorwa byakozwe na Banzubaze Emmanuel bigize icyaha cyo gufatanwa cyangwa icyo gucuruza ibiyobyabwenge byo mu bwoko bw’urumogi, rusanga kuba Banzubaze Emmanuel ahakana icyaha cyo gucuruza urumogi, ari uburyo bwo guhunga icyaha cyo gucuruza ibiyobyabwenge, kuko abatangabuhamya AIP Nkaka Célestin na Ntawizihirwa Jean Bosco bemeza ko kugira ngo bajye kumufata byaturutse ku makuru bahawe ko arimo gucuruza urumogi mu murenge wa Shyogwe, bagezeyo bamusangana udupfunyika 8 tw’urumogi, ibyo bikaba bihagije kwemeza ko urwo rumogi yafatanwe rwari urwo gucuruza, bityo inyito y’icyaha ikaba idakwiye guhinduka. [17] Dosiye y’uru rubanza igaragaza ko Banzubaze Emmanuel abazwa mu Bugenzacyaha ku wa 20/03/2020, yahakanye icyaha, avuga ko nta rumogi yafatanwe ko nta n’urwo anywa, ko urumogi bamushinja rwatowe ahantu mu mateke banyuze biruka ari benshi ubwo bari babonye abapolisi baje kubafata, ko atazi uwaruhataye. Ageze imbere y’Ubushinjacyaha ku wa 25/03/2020, Banzubaze Emmanuel yahakanye icyaha cyo gucuruza ibiyobyabwenge, ariko yemera ko yafatanwe urumogi yari yahawe n’uwitwa Claude basanzwe bakorana mu kirombe warumuhaye ngo arumufashe agiye gupakira imodoka yemera atazi ko ari urumogi abimenya ari uko abapolisi barumufatanye. [18] Aburana ku ifunga n’ifungurwa ry’agateganyo, Banzubaze Emmanuel yavuze ko urumogi bamushinja ari urwa Claude kuko icyo gihe ariwe wari urufite mu mufuka bari kumwe babonye imodoka ya polisi bariruka, ko we yari yagiye ku kabari aho bafatiwe agiye gushyira telefone ku muriro1. Aburana mu Rukiko Rwisumbuye rwa Muhanga, Banzubaze Emmanuel yavuze ko urumogi bamurega rwatawe hasi na Dasso baba ariwe bafata bavuga ko ariwe urutaye2. Ageze mu Rukiko Rukuru, Urugereko rwa

1 Reba igika cya 5 cy’icyemezo ku ifunga n’ifungurwa ry’agateganyo RDP00112/2020/TB/NYM cyafashwe n’Urukiko rw’ibanze rwa Nyamabuye ku wa 12/05/2020. 2Reba inyandikomvugo y’iburanisha ry’urubanza RP00396/2020/TGI/MHG yo ku wa 11/12/2020 n’igika cya 6 cy’urubanza RP00396/2020/TGI/MHG rwaciwe n’Urukiko Rwisumbuye rwa Muhanga ku wa 17/12/2020.

## Page 5

Nyanza ndetse no muri uru Rukiko, Banzubaze Emmanuel noneho yemeye ko yafatanwe udupfunyika 8 tw’urumogi, ariko akavuga ko atarucuruza, ko rwari urwo kunywa3. [19] Dosiye igaragaza kandi ubuhamya bwa AIP Nkaka Célestin, wemeza ko ku wa 20/03/2020, yahamagawe n’Umunyamabanga Nshimgwabikorwa w’Umurenge wa Shyogwe amubwira ko hari umuntu umuhaye amakuru ko mu Mudugudu wa Gasharu, Akagari ka Mubuga, hari umugabo uri kuhacururiza urumogi kandi ko atari ubwa mbere ahaje ko yari asanzwe ahaza aturutse mu Karere ka Ruhango, bagiyeyo bahageze bahasanga abasore 3 barimo na Banzubaze Emmanuel bababonye bariruka, babirukaho ariko bakurikirana Banzubaze Emmanuel kuko bari bahawe amakuru ko ariwe urimo gucuruza urumogi, abonye ko bamukurikiye ajugunya urumogi hasi ruri mu gashashe, bararutora basanga ari udupfunyika 8, bakomeza kumwirukankana baramufata, babajije abaturage niba bamuzi, bavuga ko bamuziho gucuruza urumogi4. [20] Muri dosiye hari kandi ubuhamya bwa Ntawizihirwa Jean Bosco, uhamya ko ku itariki ya 20/03/2020 bahame amakuru ko hari umugabo wambaye ipantalo y’igitenge na bote urimo gucuruza urumogi wo mu Karere ka Karuhango, bagiyeyo arikumwe na polisi n’Umunyamabanga Nshingwabikorwa w’Umurenge wa Shyogwe, bahageze abantu bababonye bariruka, kuko bari bababwiye urimo gucuruza urumogi baramwirukankana urumogi arujugunya mu murima w’amateke, ariko umupolisi arabibona ko arujugunye, baramufata n’urumogi bajya kuruzana basanga ari udupfunyika 8, Umunyamabanga Nshingwabikorwa w’Umurenge wa Shyorwe abaza abaturage icyo baba bamuziho bavuga ko asanzwe acuruza urumogi avuye mu Karere ka Ruhango5. [21] Urukiko rw’Ubujurire rushingiye ku ngingo ya 53 n’iya 87 z’Itegeko N° 062/2024 ryo ku wa 20/06/2024 rigenga ibimenyetso ryavuzwe haruguru, rurasanga imvugo z’abatagabuhamya AIP Nkaka Célestin na Ntawizihirwa Jean Bosco bose bahuriza ku kuba barahawe amakuru ko Banzubaze Emmanuel arimo gucuruza urumogi mu Murenge wa Shyorwe, bajyayo bakamufatana udupfunyika 8 tw’urubogi, abaturage baho bakababwira ko asanzwe aza kuhacururiza urumogi aturutse mu Karere ka Ruhango, ari ibimenyetso bihagije byemeza nta shiti ko Banzubaze Emmanuel acuruza urumogi, bityo imiburanire ye y’uko urumogi yafatanwe rwari urwo kwinywera ikaba nta shingiro ifite. [22] Urukiko rw’Ubujurire rurasanga ikindi kigaragaza ko Banzubaze Emmanuel acuruza urumogi, ari uko ashaka kuyobya uburari agenda yivuguruza ku bijyanye n’udupfunyika 8 tw’urumogi yafatanwe aho mu Bugenzacyaha, mu Rukiko rw’Ibanze rwa Nyamabuye aburana ku ifunga n’ifungurwa ry’agateganyo no Rukiko Rwisumbuye rwa Muhanga aburana ku rwego rwa mbere yahakanye yivuye inyuma ko nta rumogi yafatanwe, mu Bushinjacyaha akemera ko yarufatanwe ariko atazi ko arufite, yagera mu Rukiko Rukuru ndetse no mu Rukiko rw’Ubujurire akemera ko urumogi ari urwe, ariko ko rwari urwo kunywa; iyo mvugo irimo ibinyoma, kwivuguruza no kuyobya uburari ikaba ishimangira ko imyiregurire ye igamije guhunga icyaha cyo gucuruza ibiyobyabwenge kandi nyamara yaragikoze. Ibi bihura n’ibyejwe n’Urukiko rw’Ikirenga mu rubanza RPAA0148/11/CS, rwaciwe ku wa 27/11/2015 haburana Ubushinjacyaha, Murinzi Olivier na Niyodusenga Philippe, aho mu gika cya 25 -25 cy’urwo rubanza Urukiko Rw’ikirenga rwemeje ko imvugo ya Niyonsaba Philippe irimo ibinyoma, kwivuguruza no kuyobya uburari, ishimangira ko imyiregurire ye igamije guhunga icyaha yakoze. Uru rubanza rwanashingiweho n’uru Rukiko mu manza rwaciye, harimo n’urubanza RPAA00947/2024/CA rwaciwe ku wa 28/03/2025, haburana Ubushinjacyaha na Shema Serge, igika cya 27. [23] Ku bijyanye n’urubanza RPAA00124/2023/CA na RPAA00337/2022/CA, Banzubaze Emmanuel n’umwunganira basaba ko zashingirwaho hakemezwa ko ahamwa n’icyaha cyo gufatanwa

3Reba igika cya 4 n’icya 8 by’urubanza rujuririrwa, imyanzuro y’ubujurire muri uru Rukiko ya Banzubaze Emmanuel n’iy’umwunganira ndetse n’inyandikomvugo y’iburanisha ry’uru rubanza yo ku wa 14/10/2024. 4Reba inyandikomvugo y’ibazwa rya AIP Nkaka Célestin mu Bugenzacyaha ku wa 20/03/2020. 5 Reba inyandikomvugo y’ibazwa rya Ntawizihirwa Jean Bosco mu Bugenzacyaha ku wa 20/03/2020.

## Page 6

ibiyobyabwenge byo kwikoreshereza ku giti cye, kuko urumogi yafatanwe ari rukeya ku buryo rutafatwa nk’urwo gukwirakwiza arugurisha, Urukiko rurasanga izo manza zitashingirwaho kuko icyo zemeza ari uko iyo uwafatanwe ingano nto y’ibiyobyabwenge nta bindi bimenyetso byemeza ko yari agamije kubikwirakwiza, afatwa nk’uwari agamije kubyikoreshereza ku giti cye, nyamara kuri Banzubaze Emmanuel nk’uko byagaragajwe mu bika bibanziriza iki hakaba hari ibimenyeto byemeza ko udupfunyika 8 tw’urumogi yafatanwe rwari urwo kugurisha. [24] Ku bijyanye n’imiburanire ya Banzubaze Emmanuel n’umwunganira y’uko nta muntu wagaragaye yagurishije urumogi, bityo ko adakwiye guhamywa icyaha cyo gucuruza ibiyobyabwenge, Urukiko rw’Ubujurire rurasanga nta shingiro ifite kuko nk’uko byasobanuwe mu zindi manza, harimo urubanza RPAA00436/2020/CA6 n’urubanza RPAA00173/2024/CA7, igikorwa cyo gucuruza ibiyobyabwenge kitareberwa ku kuba hari umuguzi wasanzwe aho uregwa acururiza ibiyobyabwe, ahubwo ko bihagije kuba afite ibiyobyabwenge kandi yiteguye kubiha umuntu wese uje umugana abishaka. [25] Kubera impamvu zose zimaze gusobanurwa haruguru, Urukiko rw’Ubujurire rurasanga nk’uko n’inkiko zibanza zabibonye, ibimenyetso biri muri dosiye nk’uko byasobanuwe mu bika bibanziriza iki, bigaragaza ko ibikorwa Banzubaze Emmanuel yakoze bigize icyaha yahamijwe n’inkiko zibanza cyo gucuruza ibiyobyabwenge by’urumogi aho kuba icyo kunywa ibiyobyabwenge nk’uko abivuga, bityo ubujurire bwe bugamije gusaba ko yahanirwa icyaha cyo kunywa ibiyobyabwenge bukaba nta shingiro bufite. III. ICYEMEZO CY’URUKIKO [26] Rwemeje ko ubujurire bwatanzwe na Banzubaze Emmanuel nta shingiro bufite. [27] Rwemeje ko imikirize y’urubanza RPA00027/2021/HC/NYZ rwaciwe n’Urukiko Rukuru, Urugereko rwa Nyanza ku wa 21/11/2024, idahindutse. [28] Rwemeje ko igihano cy’igifungo cy’imyaka 15 n’ihazabu ya 5.000.000Frw Banzubaze Emmanuel yahanishijwe muri urwo rubanza kigumyeho.

6 Reba igika cya 19 cy’urubanza RPAA00436/2020/CA rwaciwe n’Urukiko rw’Ubujurire ku wa 28/06/2022 rw’Ubushinjacyaha na Ahimpereye Ndeze François. 7 Reba igika cya 27 cy’urubanza RPAA00173/2024/CA rwaciwe n’Urukiko rw’Ubujurire ku wa 29/04/2025 Ubushinjacyaha buburana na Mponzeze Eric.