UBUSHINJACYAHA v. BARAKAMFITIYE N’UNDI

# UBUSHINJACYAHA v. BARAKAMFITIYE N’UNDI

- Source: Amategeko - Section: Decisions (Judgements) - Date: 2025-05-22 - Case/document no.: RPAA 00001/2023/CA - Collection: Court of Appeal

## Text

## Page 1

UBUSHINJACYAHA v. BARAKAMFITIYE N’UNDI [Rwanda URUKIKO RW’UBUJURIRE – RPAA 00001/2023/CA (Mukamurenzi, P.J.) 22 Gicurasi 2025] Amategeko agenga imiburanishirize y’imanza z’inshinjabyaha – Kugabanya igihano mu bujurire – Mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano. Incamake y’ikibazo: Barakamfitiye Emmanuel na Ngabonziza Jean de Dieu bakurikiranyweho n’Ubushinjacyaha icyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nka byo (gucuruza urumogi), nyuma yo gufatanwa urumogi rubisi rwuzuye umufuka rungana n’ibiro mirongo itatu (30 kg) bari bavanye i Burundi baruzanye kurucuruza mu Rwanda bubaregera Urukiko Rwisumbuye rwa Ngoma bubasabira igifungo cya burundu no gutanga ihazabu ya 30.000.000 Frw. Urwo Rukiko rwaciye urubanza rwemeza ko abaregwa bahamwa n’icyaha, rubahanisha igifungo cy’imyaka makumyabiri n‘itanu (25) n’ihazabu y’amafaranga y’u Rwanda ya miliyoni makumyabiri n‘imwe (21.000.000) kuri buri wese, kandi rutegeka ko urwo rumogi runyagwa, rugatwikwa. Abaregwa bajuririye mu Rukiko Rukuru, Urugereko rwa Rwamagana basaba kugabanyirizwa iguhano bahanishijwe n’Urukiko Rwisumbuye rwa Ngoma, bakavuga ko baburanye bemera icyaha, bityo basaba kongera kugabanyirizwa. Urukiko Rukuru, Urugereko rwa Rwamagana rwaciye urubanza rwemeza ko ubujurire nta shingiro bufite, nta gihindutse ku mikirize y’urubanza rujuririrwa. Abaregwa bajuririye mu Rukiko rw’Ubujurire basaba kongera kugabanyirizwa igihano ngo kuko kuva bafatwa bemeye icyaha baregwa banagaragaza uko bagikoze, kandi icyaha bakoze nta ngaruka mbi cyateje. Basaba ko Urukiko rwagendera ku murongo watanzwe n’Urukiko rw’Ikirenga, aho rwavuze ko igihano ntayegayezwa ntacyo kimarira uwagihawe maze rukabagabanyiriza igihano bahawe ndetse n’ihazabu baciwe igakurwaho kuko ntaho bayikura. Ku ruhande rw’Ubushinjacyaha buvuga ko hashingiwe ku biteganywa mu ngingo ya 2 agace ka 1 y’Itegeko Nº 59/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, asanga abaregwa bakongera kugabanyirizwa ibihano bahawe kuko batagabanyirije igihano ku buryo buhagije. Incamake y’icyemezo: Iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange, ariko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano.

## Page 2

Ubujurire bufite ishingiro. Amategeko yashingiweho: Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano, Ingingo ya 2. Imanza zifashishijwe: RPA 00060/2021/CA; Ubushinjacyaha vs Nsabimana Callixte alias Sankara na bagenzi be rwaciwe n’Urukiko rw’Ubujurire ku wa 04/04/2022, RPAA 00823/2024/CA; Ubushinjacyaha vs Niyobuhungiro Fidѐle rwaciwe n’Urukiko rw’Ubujurire ku wa 28/03/2025, RPAA 00573/2022/CA; Ubushinjacyaha vs Byiringiro Jean Baptiste rwaciwe ku wa 28/02/2024. Urubanza I. IMITERERE Y’URUBANZA [1] Tariki ya 30/10/2018, Barakamfitiye Emmanuel na Ngabonziza Jean de Dieu bari mu Mudugudu w’Iramiro, Akagari ka Kigoma, Umurenge wa Jarama, Akarere ka Ngoma, Intara y’Iburasirazuba, bafatiwe mu bwato bafite urumogi rubisi rwuzuye umufuka rungana n’ibiro mirongo itatu (30 kg) bari bavanye i Burundi baruzanye kurucuruza mu Rwanda, bashyikirizwa Ubugenzacyaha batangira gukurikiranwa. Barakamfitiye Emmanuel na Ngabonziza Jean de Dieu babazwa bavuze ko urumogi bafatanwe bari baruzaniwe n’umurundi witwa Niyonteze Bigaduka, kandi ko bagombaga kumwishyura nyuma yo kurucuruza. [2] Iperereza rirangiye, Ubushinjacyaha bwabareze mu Rukiko Rwisumbuye rwa Ngoma, bubakurikiranyeho icyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nka byo (gucuruza urumogi), bubasabira igifungo cya burundu no gutanga ihazabu ya 30.000.000 Frw. [3] Barakamfitiye Emmanuel yaburanye yemera icyaha akagisabira imbabazi, asaba kugabanyirizwa igihano naho Ngabonziza Jean de Dieu avuga ko atemera icyaha, asaba kurenganurwa no kugirwa umwere.

[4] Mu rubanza RP 00656/2018/TGI/NGOMA rwaciwe ku wa 22/10/2019, Urukiko Rwisumbuye rwa Ngoma rwasanze hari ibimenyetso bigaragaza ko Barakamfitiye Emmanuel na Ngabonziza Jean de Dieu bakoze icyaha bakurikiranyweho bikurikira: a) Imvugo za Ngabonziza Jean de Dieu na Barakamfitiye Emmanuel mu Bugenzacyaha, mu Bushinjacyaha no mu Rukiko ubwo baburanaga ku ifungwa n’ifungurwa ry’agateganyo, aho bemeye ko urumogi bafatanwe bari baruguze n’umurundi witwa Niyonteze Bigaduka, ko yarubagurishije ku mafaranga ibihumbi mirongo itatu na bitanu (35.000) y’u Rwanda, ko bagombaga kumuha ayo mafaranga bamaze kurucuruza;

## Page 3

b) Kuba abaregwa barashyize umukono ku nyandiko mvugo y’ifatira.

Urukiko rushingiye kuri ibyo bimenyetso, rwemeje ko Barakamfitiye Emmanuel na Ngabonziza Jean de Dieu bahamwa n’icyaha cyo gutunda ibiyobyabwenge bihambaye byo mu bwoko bw’urumogi, rubahanisha igifungo cy’imyaka makumyabiri n‘itanu (25) n’ihazabu y’amafaranga y’u Rwanda ya miliyoni makumyabiri n‘imwe (21.000.000) kuri buri wese. Urukiko rwanategetse ko urumogi rwafatiriwe rungana n‘ibiro mirongo itatu (30) runyagwa rugatwikwa. Abaregwa bagabanyirijwe igihano hashingiwe ku kuba ari ubwa mbere bari bakurikiranyweho icyaha gihanwa n’amategeko. [5] Barakamfitiye Emmanuel na Ngabonziza Jean de Dieu bajuririye imikirize y’urubanza mu Rukiko Rukuru, Urugereko rwa Rwamagana bavuga ko Urukiko Rwisumbuye rwabahanishije igihano kiremereye kandi baraburanye bemera icyaha banasaba imbabazi, akaba ari n’ubwa mbere bari bakoze icyaha, ko basaba kongera kugabanyirizwa igihano hashingiwe kuri izo mpamvu nyoroshyacyaha. Uhagarariye Ubushinjacyaha yavuze ko ubujurire bwabo nta shingiro bufite, kuko n’ubwo bavuga ko bahawe igihano kiremereye atari byo kuko bagabanyirijwe igihano, bahabwa igihano gito giteganywa n’itegeko nk’uko ingingo ya 263 y'ltegeko No 68/2018 ryo ku wa 30/08/2018 riteganya ibyaha n'ibihano muri rusange ibiteganya, bityo ko hakurikijwe uburemere bw’icyaha bakoze Urukiko rutakongera kubagabanyiriza igihano. [6] Mu rubanza RPA 00980/2019/HC/RWG rwaciwe ku wa 26/07/2022, Urukiko Rukuru, Urugereko rwa Rwamagana rwemeje ko ubujurire bwa Barakamfitiye Emmanuel na Ngabonziza Jean de Dieu nta shingiro bufite, rwemeza ko urubanza RP 00656/2018/TGI/NGOMA rwaciwe n’Urukiko Rwisumbuye rwa Ngoma ku wa 06/09/2019 rudahindutse mu ngingo zarwo zose. Urukiko rwasanze icyifuzo cy’abaregwa cyo kongera kugabanyirizwa igihano ku mpamvu na none zo kwemera icyaha, kitahabwa ishingiro kuko nk’uko Ubushinjacyaha bubivuga bakigabanyirijwe mu buryo buhagije hakurikijwe igihano bagombye guhanishwa ku cyaha bahamijwe. [7] Barakamfitiye Emmanuel na Ngabonziza Jean de Dieu bajuririye imikirize y’urwo rubanza mu Rukiko rw’Ubujurire, urubanza ruhabwa RPAA 00001/2023/CA, iburanisha mu ruhame rishyirwa ku itariki ya 09/05/2025, uwo munsi ugeze iburanisha riba Barakamfitiye Emmanuel yunganiwe na Me Kananga Protogѐne, Ngabonziza Jean de Dieu yunganiwe na Me Catherine A. Sebazungu naho Ubushinjacyaha buhagarariwe na Uwanziga Lydia, Umushinjacyaha ku rwego rw’Igihugu. [8] Mu mwanzuro w’ubujurire no mu miburanire, Barakamfitiye Emmanuel na Ngabonziza Jean de Dieu n’ababunganira bavuga ko bajuriye bagamije gusaba ko igihano bahanishijwe cyakongera kugabanywa, kuko kuva bafatwa bemeye icyaha baregwa banagaragaza uko bagikoze, kuba icyaha bakoze nta ngaruka mbi cyateje. Banasaba ko Urukiko rwagendera ku murongo watanzwe n’Urukiko rw’Ikirenga, aho rwavuze ko igihano ntayegayezwa ntacyo kimarira uwagihawe maze rukabagabanyiriza igihano bahawe ndetse n’ihazabu baciwe igakurwaho kuko ntaho bayikura. [9] Uhagarariye Ubushinjacyaha avuga ko hashingiwe ku biteganywa mu ngingo ya 2 agace ka 1 y’Itegeko Nº 59/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, asanga abaregwa bakongera kugabanyirizwa ibihano bahawe kuko batagabanyirije igihano ku buryo buhagije.

## Page 4

[10] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari icyo kumenya niba igihano Barakamfitiye Emmanuel na Ngabonziza Jean de Dieu bahanishijwe cyakongera kugabanwa. II. ISESENGURA RY’IKIBAZO KIGIZE URUBANZA

Kumenya niba igihano Barakamfitiye Emmanuel na Ngabonziza Jean de Dieu bahanishijwe cyakongera kugabanywa [11] Barakamfitiye Emmanuel n’umwunganira bavuga ko yajuriye agamije gusaba ko igihano yahawe cyakongera kugabanywa, agakurirwaho n’ihazabu kuko ntaho yayikura, kuko ari ubwa mbere akurikiranyweho icyaha, kandi akaba yemera icyaha kuva afatwa, ko hashingirwa kuri izo mpamvu nyoroshyacyaha no ku biteganywa n’ingingo ya 49 n’iya 59 z’Itegeko Nº22/2018 ryo ku wa 30/8/2018 riteganya ibyaha n’ibihano muri rusange maze igihano kikagabanywa kuko icyaha yakoze nta ngaruka zikomeye cyateje mu muryango nyarwanda, kandi ko yagororotse. [12] Ngabonziza Jean de Dieu n’umwunganira nabo bavuga ko yajuriye agamije gusaba kongera kugabanyirizwa igihano yahawe hashingiwe ku biteganywa n’ingingo ya 49 n’iya 59 z’Itegeko Nº22/2018 ryo ku wa 30/8/2018 riteganya ibyaha n’ibihano muri rusange kuko kuva yafatwa yemeye icyaha anagaragaza uko bagikoze, n’icyaha bakoze kikaba nta ngaruka mbi cyateje. Basaba ko mu kumugabanyiriza igihano hashingiwe ku murongo watanzwe mu rubanza RPAA 00352/2023/CA rwaciwe n’Urukiko rw’Ubujurire ku italiki ya 20/12/2024, aho Ubushinjacyaha bwaburanaga n’uwitwa Harerimana Emmanuel, kuko Urukiko rutabujijwe kongera kugabanya igihano mu gihe rusanze icyatanzwe n’Urukiko rubanza kitagabanyijwe mu buryo buhagije, ubirebeye hamwe n’uburemere bw’icyaha cyakozwe, bityo Ngabonziza Jean de Dieu nawe agahanishwa igihano cy’imyaka 10. [13] Uhagarariye Ubushinjacyaha avuga ko hashingiwe ku biteganywa mu ngingo ya 2 agace ka 1 y’Itegeko Nº 59/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, asanga abaregwa bakongera kugabanyirizwa ibihano bahawe kuko batagabanyirije igihano ku buryo buhagije ariko ntibijye munsi y’ibyo amategeko ateganya. UKO URUKIKO RUBIBONA [14] Ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange iteganya ko iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: “(a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15; (…), (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe." [15] Ikibazo cyo kongera kugabanyirizwa igihano mu gihe ariyo mpamvu y’ubujurire yonyine, cyatanzweho umurongo mu rubanza RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, Nsabimana Callixte alias Sankara na bagenzi be. Muri

## Page 5

urwo rubanza Urukiko rw’Ubujurire rwagaragaje ko mu rwego rw’ibirego nshinjabyaha iyo abaregwa nta kindi banenga urubanza rwajuririwe, uretse kuvuga gusa ko batagabanyirijwe bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha ndetse n’ingaruka zacyo hakurikijwe ibiteganywa n’ingingo ya 49 y’Itegeko N˚ 68/2018 ryo ku wa 30/8/2018 riteganya ibyaha n’ibihano muri rusange 1 , ariko ko mu bujurire, Umucamanza agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza, ari uko amaze kugaragaza ko Urukiko rubanza rwaba rwarakoresheje nabi itegeko cyangwa ubushishozi bwarwo mu gutanga icyo gihano2. Uyu murongo ukaba waragendeweho mu manza zaciwe n’uru Rukiko, mu ziheruka harimo nk’urubanza RPAA 00823/2024/CA, rwaciwe n’Urukiko rw’Ubujurire ku wa 28/03/2025 haburana Ubushinjacyaha na Niyobuhungiro Fidѐle. [16] Mu bika bikurikira harasuzumwa niba hari impamvu nyoroshyacyaha zititaweho cyangwa amategeko yishwe n’Urukiko Rukuru, Urugereko rwa Rwamagana bigatuma Barakamfitiye Emmanuel na Ngabonziza Jean de Dieu batagabanyirizwa ibihano mu buryo bukwiye. [17] Urubanza rujuririrwa rugaragaza ko Barakamfitiye Emmanuel na Ngabonziza Jean de Dieu bari bajuriye basaba kugabanyirizwa ibihano kuko bemera icyaha; Urukiko Rukuru, urugereko rwa Rwamagana rushingiye ku ngingo ya 60 y’Itegeko Nº68/2018 ryo ku wa 30/08/2018 riteganya ibyaha n’ibihano muri rusange mu gace kayo ka mbere3, rwasanze igihano cy’igifungo cy’imyaka 25 n’ihazabu y’amafaranga y’u Rwanda miliyoni makumyabiri (21.000.000 Frw) bahawe n’Urukiko Rwisumbuye ari igihano kigabanyijwe, kandi ko ingingo ya 59 agace 1o,3o,4o y'iryo tegeko baburanisha yashingiweho. Urukiko rwanasanze batakongera kugabanyirizwa igihano ku mpamvu nanone zo kwemera icyaha, kandi ko bagabanyirijwe igihano mu buryo buhagije harebwe uburemere bw’icyaha cyo gucuruza ibiyobyabwenge by’urumogi babivana mu kindi gihugu, ko nta n’iyindi mpamvu bungukiye mu rwego rw’ubujurire yatuma icyo gihano cyongera kugabanywa. [18] N’ubwo Barakamfitiye Emmanuel na Ngabonziza Jean de Dieu bahanishijwe igihano kigabanyije hashingiwe ku kuba ari ubwa mbere bahamwe n’icyaha no kuba bemera icyaha, bakaba batarongeye kukigabanyirizwa mu bujurire kubera uburemere bw’icyaha bakoze cyo gufatwa bavanye ibiro mirongo itatu (30 Kg) by’urumogi mu gihugu cy’u Burundi, Urukiko rw’Ubujurire rurasanga mu gusesengura ibijyanye n’igihano, Urukiko Rukuru ntacyo rwavuze ku kigero cy’imyaka abaregwa bari bafite ubwo bakoraga icyaha, kuko dosiye igaragaza ko Barakamfitiye Emmanuel akora icyaha yari afite imyaka 27 y’amavuko naho Ngabonziza Jean de Dieu afite imyaka 20, bigaragaza ko n’ubwo bari bakuru, bari bakiri mu kigero cy’abasore batita ku ngaruka z’ibyo bakora. [19] Mu manza ziheruka gucibwa n’uru Rukiko, abaregwa bahamijwe icyaha nk’icyo Barakamfitiye Emmanuel na Ngabonziza Jean de Dieu bakurikiranyweho, bari no mu kigero

1 Ingingo ya 49 y’Itegeko nº 68/2018 ryo ku wa 30/8/2018 ibyaha n’ibihano muri rusange iteganya ko “Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye uregwa agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo’’. 2 Urubanza n° RPA 00060/2021/CA rwaciwe n’Urukiko rw’Ubujurire ku wa 04/04/2022 haburana Ubushinjacyaha, NSABIMANA Callixte alias Sankara na bagenzi be, igika cya 252-254. 3 Iyi ngingo yateganyaga ko iyo hari impamvu zigabanya ububi bw’icyaha, ibihano bishobora kugabanywa ku buryo bukurikira: 1º haseguriwe ibiteganywa mu ngingo ya 107 igihano cyo gufungwa burundu gishobora kugabanywa ariko ntikijye munsi y’imyaka makumyabiri n’itanu (25), (...).

## Page 6

kimwe cy’imyaka, hari nk’urubanza RPAA 00573/2022/CA, rwaciwe ku wa 28/02/2024, haburana Ubushinjacyaha na Byiringiro Jean Baptiste, wari ufite imyaka 30, afatanwa udupfunyika 5000 tw’urumogi, yahanishijwe igihano cy’igifungo cy’imyaka makumyabiri (20) n’ihazabu ya miliyoni eshanu (5.000.000 Frw). Hari kandi n’urubanza RPAA 00286/2023/CA rwaciwe ku wa 29/01/2025, haburana Ubushinjacyaha na Niyomugabo Félicien wari ufite imyaka 23 afatanwa urumogi mu gafuka kuzuye gapima nk'ibiro 10, yahanishijwe igifungo cy’imyaka cumi n’umunani (18) n’ihazabu ya miliyoni icumi (10.000.000Frw). [20] Harebwe rero uko ibihano byatanzwe muri izo manza, uru Rukiko rurasanga rwabiheraho, rukongera kugabanyiriza igihano Barakamfitiye Emmanuel na Ngabonziza Jean de Dieu cy’igifungo cy’imyaka 25 n’ihazabu ya 21.000.000 bari bahanishijwe mu rubanza rujuririrwa, hakitabwa ku myaka bari bafite no ku ngano nini y’urumogi bafatanwe. [21] Ku bw’ibyo, Urukiko rw’Ubujurire rurasanga kuba Barakamfitiye Emmanuel yarakoze icyaha afite imyaka 27, we na mugenzi we bakaba barafatanwe ingano nini y’urumogi (30 Kg) bari bagiye gucuruza, agomba guhanwa mu buryo bumwe n’ubwa Byiringiro Jean Baptiste, agahanishwa igifungo cy’imyaka 20 n’ihazabu ya 10.000.000 Frw. Naho kuba Ngabonziza Jean de Dieu yarakoze icyaha afite imyaka 20, we agomba guhanishwa igifungo cy’imyaka 18 n’ihazabu 10.000.000 Frw, nk’icyahawe Niyomugabo Félicien kuko n’ubwo yafatanwe ingano nini y’urumogi, we yari afite imyaka 20, ugereranyije n’imyaka 23 Niyomugabo Félicien yari afite. Ngabonziza Jean de Dieu akaba ahawe igihano kiri munsi y’icyahawe Barakamfitiye Emmanuel kuko n’ubwo bafatanyije mu gukora icyaha bakurikiranyweho cyo gutunda urumogi, uyu yamurushaga imyaka y’ubukure. [22] Hashingiwe ku bimaze gusobanurwa, Urukiko rurasanga ubujurire bwa Barakamfitiye Emmanuel na Ngabonziza Jean de Dieu bufite ishingiro ku bijyanye no kugabanyirizwa igihano, bityo urubanza rwajuririrwe rukaba ruhindutse gusa ku bijyanye n’ibihano bari barahanishijwe. III. ICYEMEZO CY’URUKIKO [23] Rwemeje ko ubujurire bwa Barakamfitiye Emmanuel na Ngabonziza Jean de Dieu bufite ishingiro; [24] Rwemeje ko urubanza RPA 00980/2019/HC/RWG, rwaciwe n’Urukiko Rukuru, Urugereko rwa Rwamagana ku wa 26/07/2022 ruhindutse ku byerekeye igihano; [25] Ruhanishije Barakamfitiye Emmanuel igifungo cy’imyaka makumyabiri (20) n’ihazabu ya miliyoni icumi (10.000.000 Frw); [26] Ruhanishije Ngabonziza Jean de Dieu igifungo cy’imyaka cumi n’umunani (18) n’ihazabu ya miliyoni icumi (10.000.000 Frw); [27] Rutegetse ko basonerwa amafaranga y’amagarama y’urubanza kuko bafunzwe.