BEN BENZINGE v. NRD Ltd

BEN BENZINGE v. NRD Ltd

- Source: Amategeko - Section: Decisions (Judgements) - Date: 2014-01-10 - Case/document no.: RCOM 0011/13/CS - Collection: Supreme Court

Text

Page 1

BEN BENZINGE v. NRD Ltd [Rwanda URUKIKO RW’IKIRENGA – RCOM 0011/13/CS (Mukanyundo, P.J., Hatangimbabazi na Gakwaya, J.) 10 Mutarama 2014] Amategeko agenga imiburanishirize y’imanza z’ubucuruzi – Ibirego byihutirwa – Ububasha bw’Urukiko rw’Ikirenga bwo kuburanisha ibirego byihutirwa – Mu gihe ikirego cyangwa ubujurire bw’iremezo biri mu bubasha bw’Urukiko rw’ikirenga ntakirubuza gusuzuma ikirego kihutirwa kibishamikiyeho – Itegeko no 21/2012 ryo kuwa 12/06/2012 ryerekeye imiburanishirize y’imanza z’imbonezamubano, iz’ubucuruzi, izumurimo n’uz’ubutegetsi, ingingo ya 316 ifatiwe hamwe n’iya 317 – Itegeko ngenga no 03/2012 ryo kuwa 13/06/2012 rigena imiterere, imikorere n’ububasha by’urukiko rw’Ikirenga, ingingo ya 28 igika cya mbere . Amategeko agenga imiburanishirize y’imanza z’ubucuruzi – Gutanga ikirego kihutirwa – Ikirego cyihutirwa gitanzwe n’uregwa gishamikiye ku kirego cy’uwareze – Iyakirwa ryacyo – Iyo uregwa atanze ikirego kihutirwa gishamikiye ku kirego cy’uwareze, nticyakirwa kuko ikirego cyihutirwa kiba kigamije kurengera mu buryo bwihuse inyungu z’uwareze – Itegeko no 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 316. Incamake y’ikibazo: BEN BENZINGE yaburanye ba natural Resources Development Rwanda Ltd mu Rukiko nkemurampaka asaba ko RODERICK MARSHAL yavanwa ku mwanya w’ubuyobozi

mukuru w’agateganyo hagashyirwaho undi muyobozi w’agateganyo, inama y’ubutegetsi ya Natural Resources Development Rwanda Ltd igahagarikwa by’agateganyo, hakabaho kandi iraniza rubanza ry’agateganyo. Inteko nkemurampaka yemeje ko RODERICK MARSHAL na Madame Zuzana MRUSKOVICOVA bavanywe ku mwanya w’abagize inama y’ubutegetsi, yemeza ko Natural Resources Development holding GmbH na HC starck GmbH babaye abanyamigabane muri Natural Resources Development Rwanda Ltd mu buryo bunyuranije n’amategeko , ko na Bwana VAN KAYS yagizwe umugenzuzi w’imari mu buryo bunyuranyije n’amategeko itegeka Natural Resources Development Rwanda LTD kwishyura BEN BENZINGE 10.000.000 frw. Natural Resources Development Rwanda ltd yajuririye mu Rukiko Rukuru rw’Ubucuruzi isaba gutesha agaciro umwanzuro wafashwe, Urukiko Rukuru rw’Ubucuruzi rwemeza ikirego cyayo kidafite ishingiro. Yarongeye ijuririra mu Rukiko rw’Ikirenga, BEN BENZINGE nawe yuririra ku bujurire bwayo atanga ikirego cyihutirwa asaba gushyiraho ubuyobozi bw’agateganyo bwa Natural Resources Development Rwanda ltd mu gihe hagitegerejwe ko ikirego cy’iremezo cyaburanishwa. Natural Resources Development Rwanda ltd yatanze inzitizi ivuga ko Urukiko rw’Ikirenga rudafite ububasha bwo kuburanisha ibirego byihutirwa. Urukiko kandi rwabajije ababuranyi niba ikirego cyihutirwa cyakwakirwa kandi uwagitanze nta kirego cy’iremezo yatanze. Incamake y’icyemezo : 1. Ingingo ya 316 y’itegeko no 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ntaho ivana Urukiko rw’Ikirenga mu nkiko zigomba kuregerwa ibirego byihutirwa. Kuba ingingo ya

Page 2

317 y’itegeko ryavuzwe itavugwamo Urukiko rw’Ikirenga ari uko ububasha n’imikorere yarwo bigengwa n’itegeko ngenga yarwo kandi rufite ububasha bwo kurengerwa mu rwego rw’ubujurire. Mu gihe rero ikirego cyangwa ubujirire bw’iremezo rwashyikiriijwe biri mu bubasha bw’Urukiko rw’Ikirenga ntakirubuza gusuzuma ikirego cyihutirwa kibishamikiyeho.

2. Ikirego cyihutirwa ni umuhango w’iburanisha utuma uwatanze ikirego cy’iremezo mu rukiko agira ibyo asaba urwo rukiko kugirango hafatwe icyemezo cyihuse kigamije kurengera inyungu ze. Ntabwo uwo muhango uba ugenewe utaratanze icyo kirego cy’iremezo. Bityo umuburanyi uba warezwe mu kirego cy’iremezo akaba atari we uvugwa muri iyo ngingo ko atanga ikirego cyihutirwa kiyivugwamo. Inzitizi y’iburabubasha nta shingiro ifite. Ikirego cyihutirwa cy’uwagitanze nticyakiriwe. Amagarama aherereye ku uwatanze ikirego. Amategeko yashingiweho: Itegeko ngenga no 03/2012 ryo kuwa 13/06/2012 rigena imiterere, imikorere n’ububasha by’urukiko rw’Ikirenga, ingingo ya 28 igika cya mbere. Itegeko no 21/2012 ryo kuwa 12/06/2012 ryerekeye imiburanishirize y’imanza z’imbonezamubano, iz’ubucuruzi, izumurimo n’uz’ubutegetsi, ingingo ya 316 n’iya 317. Nta manza zifashishijwe. Urubanza I. IMITERERE Y’URUBANZA [1] Kuwa 17/5/2013 urukiko nkemurampaka rwafashe icyemezo mu rubanza BEN BENZINGE yaburanaga na Natural Resources Development Rwanda Ltd, asaba ko Bwana RODERICK MARSHAL yavanwa ku mwanya w’ubuyobozi nk’umuyobozi mukuru w’agateganyo, hagashyirwaho undi muyobozi w’agateganyo, inama y’ubutegetsi ya Natural Resources Development Rwanda Ltd igahagarikwa by’agateganyo. Yanasabaga ko habaho irangizarubanza ry’agateganyo. [2] Mu gufata umwanzuro, Inteko Nkemurampaka yavuze ko ikirego cya BEN

BENZINGE gifite ishingiro kuri bimwe, yemeza gutesha agaciro ibyemezo bitandukanye byafashwe n’inama zo kuwa 11.10.2011, kuwa 28.10.2010 no kuwa 10.12.2008 kuko byafashwe mu buryo budakurikije amategeko, yemeza ko irangiza rubanza ry’agateganyo ridatanzwe, yemeza ko Madamu Zuzana MRUSKOVICOVA na Bwana RODERICK MARSHAL bavanywe ku mwanya w’abagize inama y’ubutegetsi; yemeza ko Natural Resources Development Holding GmbH na HC Starck GmbH babaye abanyamigabane muri Natural Resources Development Rwanda Ltd mu buryo butemewe n’amategeko; yemeza ko Bwana VAN KAYS yagizwe umugenzuzi w’imari mu buryo butemewe n’amategeko akaba agomba kuvanwa kuri uwo

Page 3

mwanya, itegeka Natural Resources Development Rwanda Ltd kwishyura BEN BENZINGE 10 000 000 FRW. [3] Natural Resources Development Rwanda Ltd yajuririye mu Rukiko Rukuru rw’Ubucuruzi isaba gutesha agaciro umwanzuro umaze kuvugwa wafashwe n’Inteko Nkemurampaka, urwo Rukiko rwemeza ko ikirego cyayo kidafite ishingiro, ijuririra mu Rukiko rw’ Ikirenga kuri no RCOMA 0017/13/CJ, BEN BENZINGE nawe yuririra ku bujurire bwayo atanga ikirego cyihutirwa muri urwo Rukiko asaba gushyiraho ubuyobozi bw’agateganyo bwa Natural Resources Development Rwanda Ltd mu gihe hagitegerejwe ko ikirego cy’iremezo cyaburanishwa. [4] Mu iburanisha ry’uru rubanza ku kirego cyihutirwa cya BEN BENZINGE, uhagarariye Natural Resources Development Rwanda Ltd yatanze inzitizi avuga ko Urukiko rw’Ikirenga rudafite ububasha bwo kuburanisha ibirego byihutirwa, kandi ko n’ibyo BEN BENZINGE asaba byamaze gufatwaho icyemezo n’Inteko Nkemurampaka. Urukiko rwabihereyeho rubaza ababuranyi niba ikirego cyihutirwa cyakwakirwa kandi uwagitanze nta kirego cy’iremezo yatanze. [5] Iburanisha kuri ibyo bibazo ryabaye kuwa 07/01/2014, Natural Resources Development Rwanda Ltd ihagarariwe na Me BOKANGA, naho BEN BENZINGE ahagarariwe na Me NSHIMYUMUREMYI, Urukiko rumenyesha ababuranyi ko ruzabanza gufata umwanzuro kuri ibyo bibazo. II. ISESENGURA RY’IBIBAZO BIGIZE URUBANZA A. Ku bijyanye no kumenya niba Urukiko rw’Ikirenga rudafite

ububasha bwo kuburanisha ibirego byihutirwa [6] Uhagarariye Natural Resources Development Rwanda Ltd avuga ko Urukiko rw’ Ikirenga rudafite ububasha bwo kuburanisha ibirego byihutirwa hashingiwe ku ngingo ya 317 y’Itegeko n°21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi aho iteganya inkiko ziburanisha ibirego byihutirwa, muri izo nkiko akaba asanga Urukiko rw’Ikirenga rutavugwamo. [7] Uhagarariye BEN BENZINGE avuga ko Urukiko rw’ Ikirenga rufite ububasha hashingiwe ku ngingo ya 316 y’Itegeko n° 21/2012 ryo kuwa 14/06/2012 rimaze kuvugwa, aho ivuga ko Urukiko ruburanisha ikirego cyihutirwa ari Urukiko rwaregewe ikirego cy’iremezo.

UKO URUKIKO RUBIBONA [8] Ingingo ya 316 y’Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Iyo hari ikirego cy’ iremezo, ariko hagomba kugira icyemezwa by’agateganyo mu buryo bwihuta ku rubanza rwaregewe urukiko rutaraburanishwa, ikirego cyihutirwa gishyikirizwa umucamanza

Page 4

ushinzwe kurangiza impaka zihutirwa w`aho zigomba gukemurirwa hakurikijwe uburyo busanzwe bw`ihamagara”, naho iya 317 y’iryo tegeko ikavuga uburyo inkiko cyangwa abacamanza bumva ibirego byihutirwa biboneka mu manza ziri mu bubasha bw’Urukiko barimo, igira iti: ▪Perezida w’Urukiko rw’Ibanze cyangwa undi mucamanza wabiherewe ububasha bumva ibirego byihutirwa biboneka mu manza ziri mu bubasha bw’urwo Rukiko bakanabifatira umwanzuro. ▪Perezida w’Urukiko Rwisumbuye cyangwa undi mucamanza wabiherewe ububasha bumva ibirego byihutirwa biboneka mu manza ziri mu bubasha bw’urwo Rukiko bakanabifatira umwanzuro. ▪Perezida w’Urukiko Rukuru na Perezida w’urukiko rukuru rw’ubucuruzi cyangwa undi mucamanza wabiherewe ububasha yumva ibirego byihutirwa biboneka mu manza ziri mu bubasha bw’urwo Rukiko bakanabifatira umwanzuro. [9] Hasesenguwe ibivugwa mu ngingo za 316 na 317 zimaze kuvugwa haruguru kandi zirebewe hamwe ku bijyanye n’ububasha bwo kuburanisha ibirego byihutirwa, Urukiko rurasanga ingingo ya 316 y’Itegeko n° 21/2012 ryo kuwa 14/06/2012 yavuzwe haruguru ntaho ivana Urukiko rw’Ikirenga mu nkiko zigomba kuregerwa ibirego byihutirwa, kuko icyo iyo ngingo ivuga gusa ari uburyo Urukiko ruregerwa, ikanerekana ko ikirego cyihutirwa gishyikirizwa umucamanza ushinzwe kugisuzuma. [10] Urukiko rurasanga rero kuba mu ngingo ya 317 yavuzwe haruguru hatavugwamo Urukiko rw’Ikirenga, ari uko

ububasha n’imikorere yarwo bigengwa n’Itegeko Ngenga ryarwo ryihariye, bikaba byumvikana ko ibijyanye n’ububasha buvugwa muri iyo ngingo bireba inkiko zo hasi yarwo (Urukiko rw’Ibanze, Urukiko Rwisumbuye n’Urukiko Rukuru). Byongeye kandi, iyo ngingo ikaba yerekeye ibirego bisuzusumwa ku rwego rwa mbere n’izo nkiko, naho mu rwego rw’ubujurire, hakaba hari amategeko akurikizwa ajyanye n’ubujurire, ariko ku bijyanye n’Urukiko rw’Ikirenga ibijyanye n’ububasha bwarwo bikaba bikubiye mu Itegeko Ngenga ryarwo ryihariye nk’uko byari bimaze kuvugwa. [11] Urukiko rurasanga nk’uko bivugwa mu gika cya mbere cy’ingingo ya 28 y’Itegeko Ngenga n°03/2012 ryo kuwa 13/06/2012 rigena imiterere, imikorere n’ububasha by’Urukiko rw’Ikirenga, ubujurire ku rubanza rwaciwe mu rwego rwa mbere n’Urukiko Rukuru, Urukiko Rukuru rw’Ubucuruzi cyangwa Urukiko Rukuru rwa Gisirikare, rujuririrwa mu Rukiko rw’Ikirenga. Kuba uru Rukiko rufite ububasha bwo kuregerwa mu bujurire hakurikijwe ingingo imaze kuvugwa, byumvikanisha ko, nk’Urukiko rwaregewe urubanza rw’iremezo rutaraburanishwa, runafite ububasha bwo gusuzuma ibirego byihutirwa bishamikiye ku bujurire bw’iremezo ruba rwagejejweho, ibiteganijwe n’ingingo ya 316 y’Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ku bijyanye n’ibirego byihutirwa ku rwego rwa mbere bikaba binagomba gukurikizwa imbere y’inkiko z’ubujurire zirimo n’Urukiko rw’Ikirenga. [12] Urukiko rurasanga rero mu gihe bigaragara ko ikirego cy’iremezo cyangwa ubujurire bw’iremezo rwashyikirijwe biri mu bubasha bw’Urukiko rw’Ikirenga, nta kibuza uru Rukiko

Page 5

gusuzuma ikirego cyihutirwa kibishamikiyeho, bityo inzitizi ya Natural Resources Development Rwanda Ltd kuri iyi ngingo ikaba nta shingiro ifite. B. Ku bijyanye no kumenya niba ikirego cyihutirwa cyatanzwe na BEN BENZINGE cyakwakirwa mu gihe atari we watanze ikirego cy’iremezo [13] Kuri iki kibazo, ari uhagarariye BEN BENZINGE, ari uhagarariye Natural Resources Development Rwanda Ltd bose bavuga ko uregwa yemerewe kuba yatanga ikirego cyihutirwa hashingiwe ku ngingo ya 316 y’Itegeko n° 21/2012 ryo kuwa 14/06/2012 ryavuzwe haruguru, n’ubwo yaba atari we watanze ikirego cy’iremezo. [14] Nk’uko byavuzwe haruguru, ingingo ya 316 y’Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ivuga ko iyo hari ikirego cy’iremezo ariko hagomba kugira icyemezwa by’agateganyo mu buryo bwihuta ku rubanza rwaregewe urukiko rutaraburanishwa, ikirego cyihutirwa gishyikirizwa umucamanza ushinzwe kurangiza impaka zihutirwa…. [15] Hasesenguwe ibivugwa n’iyi ngingo ya 316, Urukiko rurasanga ikirego cyihutirwa ari umuhango w’iburanisha utuma uwatanze ikirego cy’iremezo mu Rukiko agira ibyo asaba urwo Rukiko kugira ngo hafatwe icyemezo cyihuse kigamije kurengera inyungu ze. Ntabwo uwo muhango rero uba ugenewe utaratanze icyo kirego cy’iremezo, bityo umuburanyi uba warezwe mu kirego cy’iremezo akaba atari we uvugwa muri iyo

ngingo ko atanga ikirego cyihutirwa kiyivugwamo. [16] Hashingiwe ku bimaze gusobanurwa, Urukiko rurasanga mu gihe BEN BENZINGE nta kirego cy’iremezo afite mu Rukiko rw’Ikirenga, ikirego cyihutirwa yatanze kitagomba kwakirwa kuko cyatanzwe mu buryo bunyuranye n’ibiteganywa n’ingingo ya 316 y’Itegeko n°21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi . III. ICYEMEZO CY’URUKIKO [17] Rwemeye kwakira inzitizi yatanzwe na Natural Resources Development Rwanda Ltd (NRD ), kuko yatanzwe mu buryo bukurikije amategeko; [18] Rwemeje ko inzitizi y’iburabubasha bw’Urukiko rw’Ikirenga yatanzwe na Natural Resources Development Rwanda Ltd (NRD ) nta shingiro ifite; [19] Rwemeje kutakira ikirego cyihutirwa cyatanzwe na BEN BENZINGE kuko cyatanzwe mu buryo bunyuranye n’ibiteganywa n’ingingo ya 316 y’Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. [20] Rutegetse BEN BENZINGE gutanga amafaranga y’ibyakozwe mu rubanza, angana na 12.100 Frw, atayatanga, agakurwa mu bye ku ngufu za Leta.