UBUSHINJACYAHA vs BIMENYIMANA Alias KOFFI

# UBUSHINJACYAHA vs BIMENYIMANA Alias KOFFI

- Source: Amategeko - Section: Decisions (Judgements) - Date: 2024-12-19 - Case/document no.: RPAA 00214/2023/CA - Collection: Court of Appeal

## Text

## Page 1

UBUSHINJACYAHA vs BIMENYIMANA Alias KOFFI [Rwanda URUKIKO RW’UBUJURIRE – RPAA 00214/2023/CA (Tugireyezu P.J.) 19 Ukuboza 2024] Amategeko yerekeye imanza nshinjabyaha – Kugabanya igihano – Kugabanya igihano kabone nubwo impamvu z’ubujurire zitahabwa ishingiro – Mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye no gutanga ibihano bihwanye n’uburemere bw’icyaha uregwa yakoze kabone n’ubwo impamvu z’ubujurire uregwa yashingiragaho zaba zitahawe ishingiro. Incamake y’ikibazo: Uru rubanza rwatangiriye mu Rukiko Rwisumbuye rwa Nyarugenge, Ubushinjacyaha bukurikiranye Bimenyimana alias Koffi ku cyaha cyo gutunda no gucuruza urumogi, nyuma yuko Polisi y'igihugu ishinzwe kurwanya ibiyobyabwenge imenye amakuru ko Bimenyimana acuruza ibiyobyabwenge, nibwo yafatiwe aho yerekeranaga film, afatanwa udupfunyika 19 tw’urumogi bavuye aho bamujyana iwe mu rugo binjira mu cyumba cye bahasanga utundi dupfunyika 82 tw’urumogi. Urwo Rukiko rwaciye urubanza rusanga uregwa ahamwa n’icyaha cyo kubika ibiyobyabwenge by’urumogi, ariko kuko bwari ubwa mbere akurikiranywe n’amategeko kandi akaba yarakoze icyaha ari mu myaka y’ubuto rwamugabanyirije igihano, rumuhanisha igifungo cy’imyaka 25 n’ihazabu ya 20.000.000 Frw. Uregwa ntiyishimiye imikirize y’urubanza, ajuririra mu Rukiko Rukuru avuga ko nta cyaha yakoze kuko urumogi bamusanganye atari urwe, ko rwari urw’umukozi wamukoreraga aho yerekeranaga film, asaba kurenganurwa. Urwo Rukiko narwo rwaciye urubanza nuko rwemeza ko ubujurire bwa Bimenyimana bita Koffi nta shingiro bufite, ko urubanza yajuririye rudahindutse. Uregwa yarongeye arajurira noneho mu Rukiko Rw’Ubujurire, avuga ko yahamijwe icyaha atakoze hashingiwe ku bimenyetso birimo gushidikanya, ko yafashwe ajyanwa i Gikondo muri transit nyuma y’iminsi ibiri baramugarura bamujyana aho yakoreraga muri salle ya film bamubwira ko bahakuye agakapu karimo urumogi kandi iyo salle atari we wayicungaga ndetse ko anajyanwa I Gikondo iyo sale yakomeje gukora, ko atari akwiye gukurikiranwaho urwo rumogi kuko ntarwo yahasize bamujyana. Naho ku bijyanye n’urumogi rwafatiwe iwe mu rugo, asobanura ko yinjiranye mu cyumba n’abapolisi bari baje kumusaka basanga urumogi mu gikapu cy’umuhungu wamukoreraga kuko yasigaga imyenda iwe ubundi akajya kuryama kuri salle, ko icyumba kitafungwaga kuko yabaga mu nzu y’icyumba na salon, hakaba nta kimenyetso cyemeza ko urumogi rwafashwe ari urwe. Ubushinjacyaha bwo buburana buvuga ko urumogi rwasanzwe iwe mu rugo mu cyumba cye kandi ko nta wundi muntu yagaragaje bakibanagamo kuko umugore we bari baratandukaye kandi ariwe wari ufite urufunguzo rwaho, ibyo kandi akaba ari nako byemejwe n’umukozi we wamukoreraga. Incamake y’icyemezo: Mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye no gutanga ibihano bihwanye n’uburemere bw’icyaha uregwa yakoze kabone n’ubwo impamvu z’ubujurire uregwa yashingiragaho zaba zitahawe ishingiro. Amategeko yakoreshejwe: Itegeko N⁰ 027/2019 ryo ku wa 19/09/2019 ryerekeye imiburanishirize y’imana z’inshinjabyaha, Ingingo ya 107 n’iya 108. Imanza zifashishijwe:

## Page 2

Ubushinjacyaha vs. Musanganyimpuhwe Félicien, RPAA 00392/2023/CA rwaciwe n’Urukiko Rw’Ubujurire ku wa 28/06/2024. Ubushinjacyaha vs. Shakabatenda, RPAA 00039/2021/CA rwaciwe n’Urukiko Rw’Ubujurire ku wa 02/07/2021.

Ubujurire nta shingiro bufite; Urubanza ruhindutse gusa ku birebana n’igihano. Urubanza I. IMITERERE Y’URUBANZA [1] Ku wa 26/06/201, Polisi y'igihugu ishinzwe kurwanya ibiyobyabwenge yari ifite amakuru ko Bimenyimana Jean Pierre bita Koffi acuruza ibiyobyabwenge, ari bwo yafatiwe aho yerekeranaga film, afatanwa udupfunyika 19 tw’urumogi bavuye aho bamujyana iwe mu rugo binjira mu cyumba cye bahasanga utundi dupfunyika 82 tw’urumogi, atangira gukurikiranwa. [2] Iperereza rirangiye, Ubushinjacyaha bwatanze ikirego mu Rukiko Rwisumbuye rwa Nyarugenge bukurikiranyeho Bimenyimana Jean Pierre bita Koffi icyaha cyo gucuruza ibiyobyabwenge, busaba ko kimuhama agahanishwa igifungo cya burundu n’ihazabu ya 20.000.000 Frw. [3] Bimenyimana Jean Pierre yaburanye ahakana icyaha aregwa akavuga ko yafashwe ari ku wa 26/06/2019 ajyanwa i Gikondo ahamara iminsi 2 nyuma ni bwo ibyo byose bamurega babibonye nyamara bamufata nta kintu yari afite. [4] Mu rubanza No RP 01029/2019/TGI/NYGE rwaciwe ku wa 08/11/2019, Urukiko Rwisumbuye rwa Nyarugenge rwasanze hari ibimenyetso byemeza ko uregwa yakoze icyaha birimo: - Imvugo z’abatangabuhamya barimo Mwamikazi (umukozi wo mu rugo kwa Bimenyimana) na Hirwa wajyaga amuguraho urumogi ari nawe watanze amakuru mbere y’uko afatwa, Nsaguye na Ndindiriyimana; - Raporo y'inzego z’ibanze igaragaza ko Bimenyimana acuruza urumogi; - Inyandiko y’uko byagenze bamufata (Pv de constant) n’ubwo yanze kuyisinyaho. Urukiko rushingiye kuri ibyo bimenyetso, rwemeje ko Bimenyimana Jean Pierre alias Koffi ahamwa n’icyaha cyo kubika ibiyobyabwenge by’urumogi, ariko kuko bwari ubwa mbere akurikiranywe n’amategeko kandi akaba yarakoze icyaha ari mu myaka y’ubuto (ataragira kuri 40) rwamugabanyirije igihano, rumuhanisha igifungo cy’imyaka 25 n’ihazabu ya 20.000.000 Frw. [5] Bimenyimana Jean Pierre bita Koffi ntiyishimiye imikirize y’urubanza, ajuririra mu Rukiko Rukuru avuga ko nta cyaha yakoze kuko urumogi bamusanganye atari urwe, ko rwari urw’umukozi wamukoreraga aho yerekeranaga film, asaba kurenganurwa. [6] Uhagarariye Ubushinjacyaha yavuze ko bafashe uwitwa Hirwa atanga amakuru y’aho agura urumogi maze avugamo Bimenyimana kandi iwe hagiye gusakwa afatanwa udupfunyika 101 tw’urumogi, kandi ubuyobozi bwemeje ko asanzwe arucuruza kandi n’umukozi we wo mu rugo yemeje ko ari urwa Bimenyimana, bityo ko hagumaho urubanza yaciriwe. [7] Mu rubanza No RPA 02019/2019/HC/KIG, rwaciwe n’Urukiko Rukuru, ku wa 18/11/2022, rushingiye ku kuba Hirwa wari ufunzwe yaratanze amakuru yaho agura urumogi, mubo yavuze hakabamo Bimenyimana, bajya kumufata koko bakamusangana urumogi ndetse bikaba byemezwa n’umukozi we wo

## Page 3

mu rugo n’abamufashe, rusanga bimuhamya icyaha, ruvuga ko ibyo yireguza ko yagambaniwe n’umukozi we, ko ariwe wari nyirarwo ibyo ntakimenyetso abitangira, bityo rwemeza ko ubujurire bwa Bimenyimana Jean Pierre bita Koffi nta shingiro bufite, ko urubanza yajuririye rudahindutse. [8] Bimenyimana Jean Pierre bita Koffi yajuririye imikirize y’urwo rubanza mu Rukiko rw’Ubujurire, urubanza ruhabwa nº RPAA 00214/2023/CA, iburanisha ryarwo rishyirwa ku wa 05/12/2024 ariko kuri uwo munsi ntirwaburanishwa rwimurirwa ku wa 09/12/2024, Bimenyimana Jean Pierre bita Koffi yunganiwe na Me Nshimiyimana Mubaraka na Me Mulinga Kadage Labani naho Ubushinjacyaha buhagarariwe na Ntawangundi Beatrice, Umushinjacyaha ku rwego rw’Igihugu. [9] Mu mwanzuro w’ubujurire no mu miburanire yabo, Bimenyimana Jean Pierre bita Koffi n’abunganizi be, bavuga ko yahamijwe icyaha atakoze hashingiwe ku bimenyetso birimo gushidikanya, ko yafashwe ajyanwa i Gikondo muri transit nyuma y’iminsi ibiri baramugarura bamujyana aho yakoreraga muri salle ya film bamubwira ko bahakuye agakapu karimo urumogi kandi iyo salle atari we wayicungaga ndetse ko anajyanwa I Gikondo iyo sale yakomeje gukora. Bavuga ko yagaragaje ko yabanje gufungirwa I Gikondo maze Urukiko rutumiza umutangabuhamya witwa Mwamikazi ndetse rutegeka n’Ubushinjacyaha gukora iperereza ryo kumenya niba yarafungiwe I Gikondo koko, arikobirangira afashe umwanzuro ko nta gihindutse kuko ubushinjacyaha bwasubije ko atigeze afugirwa Gikondo, ko bigaragara ko yaciye urubanza agenekereza kuko yagombaga kwigirayo. [10] Ku birebana n’urumogi basanze muri sale, Bimenyimana Jean Pierre bita Koffi n’abunganizi be basobanura ko yajyanwe i Gikondo, salle ikomeza gukora kandi aho barusanze atariho yakoreraga byumvikana ko atari akwiye gukurikiranwaho urwo rumogi kuko ntarwo yahasize bamujyana. Naho ku rwo ashinjwa rwafatiwe mu rugo, basobanura ko yinjiranye mu cyumba n’abapolisi bari baje kumusaka basanga urumogi mu gikapu cy’umuhungu wamukoreraga kuko yasigaga imyenda iwe ubundi akajya kuryama kuri salle, ko icyumba kitafungwaga kuko yabaga mu nzu y’icyumba na salon ku buryo abana bavaga kwiga akaba ariho baryama, ko nta kimenyetso cyemeza ko urumogi rwafashwe ari urwa Bimenyimana Jean Pierre bita Koffi. [11] Uhagarariye Ubushinjacyaha avuga ko ibivugwa n’uregwa n’abunganizi be nta shingiro bikwiye guhabwa, ko batabasha kuvuguruza ibimenyetso byashingiweho n’urukiko kuva mu gika cya 19 kugeza ku cya 22. Mbere y’uko afatwa hatanzwe amakuru ko Koffi aranguza urumogi, bajya kumusaka aho akorera bararuhasanga ndetse bagiye niwe bararuhasanga, twose hamwe tuba 102. Uhagarariye Ubushinjacyaha asobanura ko urumogi rwasanzwe iwe mu rugo mu cyumba cye kandi ko nta wundi muntu yagaragaje bakibanagamo kuko umugore we bari baratandukaye kandi ariwe wari ufite urufunguzo rwaho, ibyo kandi akaba ari nako byemejwe n’umukozi we wamukoreraga witwa Mwamikazi Vestine. [12] Urukiko ruhereye kuri izo mpaka, rurasanga ibibazo bikwiye gusuzumwa muri uru rubanza ari icyo kumenya niba Bimenyimana Jean Pierre bita Koffi yarahamijwe icyaha atakoze kandi nta bimenyetso bidashidikanywaho bishingiweho II. ISESENGURA RY’IBIBAZO BIGIZE URUBANZA  Kumenya niba Bimenyimana Jean Pierre bita Koffi yarahamijwe icyaha atakoze kandi nta bimenyetso bidashidikanywaho bishingiweho. [13] Mu mwanzuro w’ubujurire no mu miburanire yabo, Bimenyimana Jean Pierre bita Koffi n’abunganizi be bavuga ko yahamijwe icyaha atakoze hashingiwe ku bimenyetso birimo gushidikanya ko yafashwe ajyanwa i Gikondo muri transit nyuma y’iminsi ibiri baramugarura bamujyana aho yakoreraga muri salle ya film bamubwira ko bahakuye agakapu karimo urumogi kandi iyo salle atari we wayicungaga ndetse ko anajyanwa I Gikondo iyo salle yakomeje gukora. Bavuga ko yagaragaje ko yabanje gufungirwa

## Page 4

I Gikondo maze Urukiko rutumiza umutangabuhamya witwa Mwamikazi ndetse rutegeka n’Ubushinjacyaha gukora iperereza ryo kumenya niba narafungiwe i Gikondo koko, ariko birangira afashe umwanzuro ko nta gihindutse kuko Ubushinjacyaha bwasubije ko atigeze afugirwa Gikondo, ko bigaragara ko yaciye urubanza agenekereza kuko yagombaga kwigirayo kuko kuba yarafungiwe muri transit bigaragazwa na procuration yanditse ageze muri gereza asaba ko bamuha telephone ye bari basigaranye. [14] Ku birebana n’urumogi basanze muri salle, Bimenyimana Jean Pierre bita Koffi n’abunganizi be basobanura ko yajyanwe i Gikondo, salle ikomeza gukora kandi aho barusanze atariho yakoreraga, byumvikana ko atari akwiye gukurikiranwaho urwo rumogi kuko ntarwo yahasize bamujyana. Naho ku rwo ashinjwa rwafatiwe mu rugo, basobanura ko yinjiranye mu cyumba n’abapolisi bari baje kumusaka basanga urumogi mu gikapu cy’umuhungu wamukoreraga kuko yasigaga imyenda iwe ubundi akajya kuryama kuri sale, ko icyumba kitafungwaga kuko yabaga mu nzu y’icyumba na salon ku buryo abana bavaga kwiga akaba ariho baryama, ko nta kimenyetso cyemeza ko urumogi rwafashwe ari urwa Bimenyimana. [15] Uhagarariye Ubushinjacyaha avuga ko ibivugwa n’uregwa n’abunganizi be nta shingiro bikwiye guhabwa, kuko batasha kuvuguruza ibimenyetso byashingiweho n’urukiko kuva mu gika cya 19 kugeza ku cya 22. Mbere y’uko afatwa hatanzwe amakuru ko Koffi aranguza urumogi, bajya ku musaka aho akorera bararuhasanga ndetse bagiye niwe bararuhasanga, utubule twose hamwe bamusanganye tuba 101. Uhagarariye Ubushinjacyaha asobanura ko urumogi rwasanzwe iwe mu rugo mu cyumba cye kandi ko nta wundi muntu yagaragaje bakibanagamo kuko umugore we bari baratandukaye kandi ariwe wari ufite urufunguzo rwaho, ibyo kandi akaba ari nako byemejwe n’umukozi we wamukoreraga witwa Mwamikazi Vestine. UKO URUKIKO RUBIBONA [16] Hashingiwe ku bivugwa n’impande zombi, impaka kuri iyi ngingo zishingiye ku kumenya niba ibimenyetso byashingiweho n’Urukiko Rukuru ruhamya icyaha Bimenyimana Jean Pierre bita Koffi bishidikanywaho. [17] Ingingo ya 108 y’Itegeko n⁰ 027/2019 ryo ku wa 19/09/2019 ryerekeye imiburanishirize y’imana z’inshinjabyaha iteganya ko: “Ibimenyetso bishobora gushingira ku mpamvu zose z’ibyabaye n’ibyemejwe n’amategeko, ababuranyi bapfa kuba barabigiyeho impaka. Urukiko ruhamya ku buryo butavuguruzwa ko ibimenyetso byose bishinja cyangwa bishinjura ari byo kandi bishobora kwemerwa.” [18] Ingingo ya 107, agace ka 3 y’itegeko ryavuzwe haruguru, iteganya ko: “Iyo icyaha cyabonewe ibimenyetso bikigaragaza, ugikurikiranyweho cyangwa umwunganira ashobora kwerekana impamvu zose yireguza, zerekana ko ikirego kitakwemerwa, zihamya ko icyo aregwa atari icyaha cyangwa se ko ari umwere n’izindi mpamvu zose zivuguruza izimuhamya icyo cyaha”. [19] Dosiye igaragaza ko ibimenyetso byemeza ko Bimenyimana Jean Pierre bita Koffi yafatanywe urumogi ari:  Ubuhamya bwa Nsaguye Jean Bosco umwe mu bapolisi bafashe Bimenyimana yatanze ubwo yabazwaga mu Bugenzacyaha ku wa 28/06/2019. Mu nyandiko yabarijweho, Nsaguye Jean Bosco yasobanuye ko uwitwa Hirwa wari ufungiye kuri transit azira kunywa urumogi yabahaye amakuru ko Bimenyimana Jean Pierre bita Koffi acuruza urumogi, maze ku wa 26/06/2019 bajya kumusaka aho akorera akazi k’ubu DG, maze bahasanga udupfunyika 19 tw’urumogi rwari ruhishe muri plafond, barangije bajya kumusaka n’aho yabaga bahasanga utundi dupfunyika 82 zari zihishe mu cyumba araramo. Yavuze kandi ko mu rugo bahasanze umukozi wo mu rugo wemeje ko urwo rumogi ari urwa Bimenyimana Jean Pierre bita Koffi.  Inyandikomvugo y’ibazwa rya Mwamikazi Vestine wari umukozi wo mu rugo kwa Bimenyimana Jean Pierre bita Koffi mu Bugenzacyaha ku wa 26/06/2019. Muri iyo nyandikomvugo, Mwamikazi Vestine asobanura ko abapolisi baje bamusanga mu rugo aho yakoraga kwa Bimenyimana

## Page 5

Jean Pierre bita Koffi, bamubaza niba ari iwe nawe arabibemerera, binjirana mu nzu na nyirurugo bajya mu cyumba cye basohokana urumogi udupfunyika 82 bari bakuye mu cyumba maze baravuga ngo baruhuze n’urwo basanze aho akora baruteranyije ruba udupfunyika 101.  Inyandikomvugo y’ifatira igaragaza ko Bimenyimana Jean Pierre bita Koffi ndetse anashyiraho umukono yemeza ko yabifatanwe koko;  Raporo y’inzego z’ibanze yo ku wa 26/06/2019 yakozwe n’Umuyobozi w’Umudugudu w’ubusabane/Akagari ka Kabiguru II bemeje ko bari basanzwe bafite amakuru ko Bimenyimana Jean Pierre bita Koffi acuruza urumogi ndetse ko hari n’umuhungu witwa Murwanashyaka wafashwe ku wa 05/06/2019 avuga ko yari avuye kurugura kwa Bimenyimana Jean Pierre bita Koffi; [20] Nk’uko bigaragara kuva mu gika cya 19 kugeza mu cya 12 by’urubanza rujuririrwa, Urukiko Rukuru rwagaragaje ko ku kuba Hirwa wari ufunzwe yaratanze amakuru y’aho agura urumogi, mubo yavuze hakabamo Bimenyimana Jean Pierre bita Koffi, bajya kumufata koko bakamusangana urumogi ndetse bikaba byemezwa n’umukozi we wo mu rugo n’abamufashe, rusanga bimuhamya icyaha, ruvuga ko ibyo yireguza ko yagambaniwe n’umukozi we, ko ariwe wari nyirarwo ibyo ntakimenyetso abitangira, bityo rwemeza ko ubujurire bwa Bimenyimana Jean Pierre bita Koffi nta shingiro bufite, ko urubanza yajuririye rudahindutse. [21] Urukiko rw’Ubujurire rurasanga Bimenyimana Jean Pierre bita Koffi avuga ko urumogi rwafatiwe ku kazi iwe no mu cyumba cye atari urwe ashingiye ku kuba yarafashwe agafungirwa kuri transit bita kwa Kabuga ku wa 24/06/2019 nyuma y’iminsi 2 ku wa 26/06/2019 agaruwe yerekwa urumogi nyamara agenda ntarwo yahasize haba iwe cyangwa aho akorera, rurasanga ariko muri dosiye hagaragaramo ikimenyetso kigizwe na email Ubushinjacyaha bwandikiye ubuyobozi bwa Transit ya Kigali buyisaba amakuru yerekeranye no kumenya niba Bimenyimana Jean Pierre bita Koffi yari afungiye muri iyo transit ya Kigali ku wa 24/06/2019 maze ubuyobozi bw’iyo transit busubizaUbushinjaycha bubugaragariza ko Bimenyimana Jean Pierre bita Koffi bamubuze haba mu bitabo byandikwamo abinjira n'abasohoka ndetse no muri mudasobwa za Kigali Transit Center, ko ibyo yavuze ko kuri ayo matariki yahabaye ntaho bigaragara1 . Ibyo byumvikanisha rero ko Bimenyimana Jean Pierre bita Koffi atigeze ajyanwa muri transit ngo afungirweyo ahubwo ko abikoresha ashaka guhunga icyaha yerekana ko urumogi rwahashyizwe adahari nyamara yari ahari. Urukiko rurasanga kandi kuba avuga ko ikigaragaza ko yafungiwe kuri iyo transit ari ukuba yaranditse asaba ko bamuha telephone ubwo yari ageze muri gereza nabyo atari ikimenyetso cyashingirwaho hemezwa ko yafungiwe kuri iyo transit koko, kuko atagaragaza ikimenyetso cyerekana ko iyo telephone baba barayisigaranye ubwo yari ahafungiwe na cyane ko atagaragaza ko hashingiwe kuri iyo baruwa yari yanditse iyo telephone abayobozi ba transit bayihaye uwo yari yandikiye iyo nyandiko amutuma iyo telephone. [22] Urukiko rw’Ubujurire rurasanga ikigaragaza ko urumogi rungana n’udupfunyika 101 (udupfunyika 19 twafatiwe aho akorera n’utundi 89 twafatiwe mu rugo) ari utwa Bimenyimana Jean Pierre bita Koffi ni uko uwitwa Hirwa yatanze amakuru ko Bimenyimana Jean Pierre bita Koffi acuruza urumogi, abo ayahaye bakajya kumusaka kandi koko bagasanga urumogi yaba aho akorera ndetse no mu cyumba araramo. Ibyo bishimangira kandi no kuba hari raporo y’ubuyobozi bw’inzego z’ibanze yaragaragaje ko abaturage ndetse n’abayobozi ubwabo bari basanzwe bazi ko Bimenyimana Jean Pierre bita Koffi acuruza urumogi. [23] Urukiko rw’Ubujurire rurasanga, nk’uko Urukiko Rukuru rwabibonye, kuba Hirwa wari ufunzwe yaratanze amakuru y’aho agura urumogi, mu bo yavuze, akavugamo Bimenyimana Jean Pierre bita Koffi, abo abibwiye bajya kumufata aho akorera koko bakamusangana urumogi, bajya no mu rugo bakahasanga urundi, umukozi we wo mu rugo akemeza ko rwari ruri mu cyumba cya Bimenyimana Jean Pierre bita Koffi ndetse n’abamufashe bakemeza ko aho hose baruhasanze bashingiye ku makuru bahawe na Hirwa wari ufungiye kuri transit azira kunywa urumogi ndetse n’inzego z’ubuyobozi zikemeza koko ko, Bimenyimana Jean Pierre bita Koffi yari asanzwe acuruza urumogi, ari ibimenyetso byemeza nta gushidikanya ko urumogi rwafashwe ari urwa Bimenyimana Jean Pierre bita Koffi, kuba rero

1 Reba muri dosiye y’urukiko rukuru ikimenyetso kiri kuri nomero ya 011 na 012

## Page 6

byarashingiweho mu nkiko zibanza ahamywa icyaha cyo kubika urumogi akaba nta kosa urukiko rwakoze na cyane ko Bimenyimana Jean Pierre bita Koffi atabasha kubivuguruza nk’uko biteganywa n’ingingo ya 107, agace ka 3, y’Itegeko n⁰ 027/2019 ryo ku wa 19/09/2019 ryerekeye imiburanishirize y’imana z’inshinjabyaha yavuzwe haruguru. [24] Ku birebana n’imvugo za Bimenyimana Jean Pierre bita Koffi n’abamwunganira bavuga ko urumogi atari urwe ahubwo ari urw’umukozi wamukoreraga kuri salle aho yerekanaga film ari nawe wari warusize mu rugo, Urukiko rw’ubujurire rurasanga nta shingiro byahabwa kuko atabigaragariza ibimenyetso na cyane ko amakuru yashingiwehoatangira gukorwaho iperereza yagaragaza ko nyiri urumogi ari Bimenyimana Jean Pierre bita Koffi nk’uko abaje kumufata babyemeza. [25] Hashingiwe kuri ibyo bisobanuro, Urukiko rw’Ubujurire rurasanga ingingo y’ubujurire ya Bimenyimana Jean Pierre bita Koffi y’uko yahamijwe icyaha atakoze nta n’ibimenyetso bidashidikanywaho bishingiweho nta shingiro ifite. [26] Urukiko rw’ubujurire rurasanga n’ubwo impamvu y’ubujurire ya Bimenyimana Jean Pierre bita Koffi idahawe ishingiro, ariko harebwe uburemere bw’icyaha yakoze cyo kubika ibiyobyabwenge byo mu bwoko bw’urumogi aho yafatanywe udupfunyika 101 tw’urumogi ndetse ukabigeranya n’igihano kingana n’igifungo cy’imyaka makumyabiri n’itanu (25) n’ihazabu ingana na 20.000.000 Frw ukanabihuza no kuba uregwa ari ubwa mbere yari akoze icyaha mu buryo buzwi no kuba yarafatanwe ingano nto y’urumogi, bigaragara ko igihano Bimenyimana Jean Pierre bita Koffi yahawe kiremereye ugereranyije n’ibihano uru Rukiko rwatanze ku bandi bakoze icyaha nk’icye, bityo kikaba gikwiye kongera kugabanywa kugira uregwa ahanwe koko mu nyungu zo kurengera sosiyete no gukumira ibyaha bishya ariko binahuzwe n’inyungu yo gusubiza mu buzima busanzwe uwakatiwe. [27] Urukiko rw’Ubujurire rurasanga mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye no gutanga ibihano bihwanye n’uburemere bw’icyaha uregwa yakoze kabone n’ubwo impamvu z’ubujurire uregwa yashingiragaho zaba zitahawe ishingiro. Uyu murongo kandi ni nawo wagiye ufatwa mu zindi manza zaciwe n’uru Rukiko harimo urubanza Nº RPAA 00039/2021/CA rwaciwe ku wa 02/07/2021 rw’Ubushinjacyaha na Shakabatenda Jean de Dieu, muri urwo rubanza impamvu ze z’ubujurire zijyanye no kwemeza ko urumogi yafatanywe rwari urwo kunywa aho kuba urwo gucuruza (…) ntizahawe ishingiro ariko hashingiwe ku kuba yarafatanywe udupfunyika 4 gusa tw’urumogi no kuba ari ubwa mbere akoze icyaha bizwi, rwemeza ko agabanyirizwa igihano. [28] Mu kumenya igihano Bimenyimana Jean Pierre bita Koffi yahanishwa, Urukiko rw’Ubujurire rurasanga mu manza ruherutse guca harimo urubanza No RPAA 00392/2023/CA rwaciwe ku wa 28/06/2024 haburana Ubushinjacyaha na Musanganyimpuhwe Félicien. Muri urwo rubanza, uregwa yahamwe n’icyaha cyo gucuruza ibiyobyabwenge bihambaye byo mu bwoko bw’urumogi ariko rushingiye ku mpamvu nyoroshyacyaha yo kuba bwari ubwa mbere yari akurikiranyweho icyaha mu buryo buzwi no kuba yarafatanwe ingano nto y’urumogi (udupfunyika 100), rumugabanyiriza igihano, rumuhanisha igifungo cy’imyaka cumi n’itandatu (16) n’ihazabu y’amafaranga y’u Rwanda miliyoni eshanu (5.000.000 Frw) aho kuba igifungo cy’imyaka 25 n’ihazabu ya 20.000.000 Frw yari yahanishijwe n’inkiko zibanza. [29] Mu rwego rwo gutanga ubutabera busa ku bibazo bisa, Urukiko rw’Ubujurire rurasanga Bimenyimana Jean Pierre bita Koffi nawe akwiye kongera kugabanyirizwa igihano hashingiwe ku kuba ari ubwa mbere yari akoze icyaha mu buryo buzwi kandi akaba yafatanwe ingano nto y’urumogi (udupfunyika 101) maze nawe agahanishwa igifungo cy’imyaka cumi n’itandatu (16) n’ihazabu ya miliyoni eshanu z’amafaranga y’u Rwanda (5.000.000 Frw).

## Page 7

[30] Hashingiwe kuri ibyo bisobanuro, Urukiko rw’Ubujurire rurasanga ubujurire bwa Bimenyimana Jean Pierre bita Koffi nta shingiro bufite, ariko kubera ibyavuzwe haruguru urubanza yajuririye rukaba rugomba guhinduka gusa ku bijyanye n’ibihano III. ICYEMEZO CY’URUKIKO [31] Rwemeje ko ubujurire bwa Bimenyimana Jean Pierre bita Koffi nta shingiro bufite; [32] Rwemeje ko urubanza n˚ No RPA 02019/2019/HC/KIG, rwaciwe n’Urukiko Rukuru, ku wa 18/11/2022 ruhindutse gusa ku birebana n’igihano Bimenyimana Jean Pierre bita Koffi yari yahanishijwe mbere; [33] Ruhanishije Bimenyimana Jean Pierre bita Koffi igihano cy’igifungo cy’imyaka cumi n’itandatu (16) n’ihazabu ingana na miliyoni eshanu (5.000.000 Frw); [34] Ruvuze ko Bimenyimana Jean Pierre bita Koffi asonewe amagarama y'urubanza kuko aburana afunze.