UBUSHINJACYAHA v. BIZIMANA N’UNDI

# UBUSHINJACYAHA v. BIZIMANA N’UNDI

- Source: Amategeko - Section: Decisions (Judgements) - Date: 2025-09-17 - Case/document no.: RPAA 00870/2024/CA - Collection: Court of Appeal

## Text

## Page 1

UBUSHINJACYAHA v. BIZIMANA N’UNDI [Rwanda URUKIKO RW’UBUJURIRE – RPAA 00870/2024/CA (Rutazana, P.J.) 17 Nzeri 2025] Amategeko agenga imanza z’inshinjabyaha – Gucuruza ibiyobyabwenge – Mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge. Incamake y’ikibazo: Bizimana Richard na Mugabonake Jean Pierre bakurikiranyweho n’Ubushinjacyaha icyaha cyo gucuruza ibiyobyabwenge byo mu bwoko bw’urumogi, nyuma yuko bafashwe bari gufunga udupfunyika 76 n’urundi rungana n’irobo batari bagafunga, bubaregera Urukiko Rwisumbuye rwa Ngoma burusaba ko bahamwa n’icyaha, bagahanishwa igifungo cya burundu n’ihazabu ingana na 30.000.0000 Frw buri wese. Urwo Rukiko rwaciye urubanza rwemeza ko abaregwa bombi bahamwa n’icyaha, rubahanisha igufungo cy’ cy’imyaka 25 n’ihazabu ingana na 23 500 000 Frw kuri buri wese. Bizimana na Mugabonake bajuririye mu Rukiko Rukuru, Urugereko rwa Rwamagana bavugako ku rwego rwa mbere baburanye batemera icyaha nk’uko bakiregwa ariko bakaba bajuriye bacyemera; ariko bageze mu iburanisha ku wa 14/06/2024 ntibakomeza kwemera icyaha nk’uko, ahubwo basaba Urukiko guhindura inyito yacyo rukemeza ko bahamwa n’icyaha cyo kunywa urumogi. Urukiko Rukuru, Urugereko rwa Rwamagana rwaciye urubanza rwemeza ko ubujurire bwabo nta shingiro bufite, rubahanisha igifungo cy’imyaka 17 n’ihazabu ingana na 10.000.000 Frw kuri buri wese, rushingiye ku mpamvu nyoroshyacyaha zuko abo bombi ari ubwa mbere bakurikiranyweho icyaha mu buryo buzwi. Bizimana na Mugabonake bajuririye mu Rukiko rw’Ubujurire basaba Urukiko guhindura inyito y’icyaha rukemeza ko bahamwa n’icyaha cyo kunywa ibiyobyabwenge kuko mu rubanza rwajuririwe babisabye ntibabihambwe kandi nta muntu wagaragajwe bagurishijeho urumogi. Bavuga kandi ko kuba rwari rufunze mu dupfunyika atari ikimenyetso cyemeza ko rwari urwo gucuruza, kuko n’ubundi runyobwa rufunze hakaba nta bundi buryo bumenyerewe bwo kurunywa. Ubushinjacyaha buvuga ko ubujurire nta shingiro bufite, agasaba ko bakomeza guhamwa n’icyaha cyo gucuruza urumogi hashingiwe ku kuba baracyemeye bagifatwa no ku ngano y’urumogi bafatanywe. Ko kuba abaregwa barafashwe barimo kurufunga (urumogi) mu dupfunyika twabugenewe kuko ariko barugurisha rumeze, ibyo akaba ari ibimenyetso bihagije bibahamya icyaha cyo gucuruza ibiyobyabwenge byo mu bwoko bw’urumogi kandi bakaba batabasha kubivuguruza.

## Page 2

Incamake y’icyemezo: Mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge. Ubujurire nta shingiro bufite. Amategeko yashingiweho: Itegeko N° 69/2019 ryo ku wa 08/11/2019 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, Ingingo ya 11. Imanza zifashishijwe: RPAA 00408/2020/CA; Ubushinjacyaha vs Niyitegeka Augustin rwaciwe n’Urukiko rw’Ubujurire ku wa 27/06/2022; RPAA 00738/2024/CA; Ubushinjacyaha vs Uwayezu Félicien rwaciwe n’Urukiko rw’Ubujurire ku wa 29/04/2025. Urubanza I. IMITERERE Y’URUBANZA [1] Ku makuru yatanzwe n’abaturage, ku wa 20/01/2021 Bizimana Richard na Mugabonake Jean Pierre bafatiwe mu nzu ya Bizimana Richard iherereye mu Mudugudu wa Kabarondo, Akagari ka Cyabajwa, Umurenge wa Kabarondo, Akarere ka Kayonza mu Ntara y’Iburasirazuba, barimo gufunga urumogi mu dupfunyika, bafatwa bamaze gufunga urungana n’udupfunyika 76 n'urundi rungana n'irobo bari batarafunga, barafatwa barakurikiranwa. [2] Iperereza rirangiye Ubushinjacyaha bwabareze mu Rukiko Rwisumbuye rwa Ngoma bubakurikiranyeho icyaha cyo gucuruza ibiyobyabwenge byo mu bwoko bw’urumogi, rusaba Urukiko kukibahamya bagahanishwa igifungo cya burundu n’ihazabu ingana na 30.000.0000 Frw buri wese. [3] Abaregwa baburanye bemera ko bafashwe bafunga urwo rumogi, ariko bakavuga ko rutari urwo gucuruza, ahubwo ko ari urwo Bizimana Richard yari yatoraguye aho yari aragiye inka hanyuma akabwira Mugabonake Jean Pierre ngo barugabane. [4] Mu rubanza RP 00122/2021/TGI/NGOMA rwaciwe n’Urukiko Rwisumbuye rwa Ngoma ku wa 19/02/2021, rwemeje ko Bizimana Richard na Mugabonake Jean Pierre bahamwa n’icyaha cyo gucuruza ibiyobyabwege byo mu bwoko bw’urumogi, rubahanisha igifungo cy’imyaka 25 n’ihazabu ingana na 23 500 000 Frw kuri buri wese. [5] Ibyo Urukiko rwabyemeje rushingiye ku bimenyetso bikurikira:

## Page 3

- Imvugo z’abaregwa mu Bugenzacyaha, mu Bushinjacyaha n’imbere y’Urukiko, bemera ko bafatiwe mu cyuho mu nzu ya Bizimana Richard, bagafatanwa urumogi barimo kurufunga mu dupfunyika kandi ko bari bagejeje ku dupfunyika 76; - Imvugo y’umutangabuhamya witwa Harindintwari Claude uvuga ko bahawe amakuru ko Bizimana Richard ari kumwe n'undi muntu iwe barimo gufunga urumogi, bakajyayo bakabafatana udupfunyika 76 tw’urumogi n'urundi rudafunze rungana n'irobo; - Inyandiko y'ifatira y’urwo rumogi (udupfunyika 76 n'urundi rungana n'irobo rudafunze) abaregwa bombi basinyeho; - Raporo y'inzego z'ibanze nayo yemeza ko Bizimana Richard na Mugabonake Jean Pierre bafashwe barimo gufunga urumogi mu dupfunyika. [6] Urukiko kandi rwasanze kuba abaregwa bavuga ko urwo rumogi bafatanywe rwari urwo kunywa atari ukuri ko ahubwo kuba barafashwe barimo kurufunga byari intangiriro yo gutegura kurugurisha. [7] Bizimana Richard na Mugabonake Jean Pierre bajuririye Urukiko Rukuru, Urugereko rwa Rwamagana, bavuga ko ku rwego rwa mbere baburanye batemera icyaha nk’uko bakiregwa ariko bakaba bajuriye bacyemera; ariko bageze mu iburanisha ku wa 14/06/2024 ntibakomeza kwemera icyaha nk’uko, ahubwo basaba Urukiko guhindura inyito yacyo rukemeza ko bahamwa n’icyaha cyo kunywa urumogi. [8] Uhagarariye Ubushinjacyaha yaburanye avuga ko Bizimana Richard na Mugabonake Jean Pierre bafashwe nyuma y’uko abaturage batanze amakuru y’uko bacuruza urumogi, bafatwa barimo kurufunga mu dupfunyika kugira ngo bajye kurucuruza, ibyo bikaba bigaragaza ko bari abacuruzi barwo hanashingiwe ku murongo watanzwe mu rubanza RPAA 00436/2020/CA rwaciwe n’Urukiko rw’Ubujurire ku wa 28/06/2022 haburana Ubushinjacyaha na Ahimpereye Ndeze François (igika cya 24), aho Urukiko rwasobanuye ufatwa nk’umucuruzi w’ibiyobyabwenge; ko rero abaregwa basaba ko inyito y’icyaha yahinduka nta shigiro bifite kuko nta gushidikanya ko harebwe ingano y’urumogi bafashwe barimo gufunga mu dupfunyika, icyo bagendereye ari ukurucuruza. [9] Urukiko Rukuru, Urugereko rwa Rwamagana rwaciye urubanza RPA 00350/2021/HC/RWG ku wa 26/07/2024, rwemeza ko ubujurire bwabo nta shingiro bufite, n’ubwo ubujurire bwabo nta shingiro bufite, rwemeza ko bakomeza guhamwa n’icyaha cyo gucuruza urumogi; ariko rusanga nta kibuza ko hasuzumwa ibijyanye no kugabanya igihano kugira ngo ngo gihuzwe n’uburemere bw’icyaha, maze rushingiye ku mpamvu nyoroshyacyaha z’uko kuba ari ubwa mbere abaregwa bombi bakurikiranyweho icyaha mu buryo buzwi, rwemeza ko bagabanyirizwa igihano bagahanishwa igifungo cy’imyaka 17 n’ihazabu ingana na 10.000.000 Frw kuri buri wese.

## Page 4

[10] Urukiko Rukuru rwasobanuye ko ku bireba Bizimana Richard, imvugo ye mu nzego z’iperereza igaragaza nta gushidikanya ko icyaha yakoze ari ugucuruza urumogi kuko we ubwe yiyemereye ko urwo rumogi bafungaga rwari urwo gucuruza, bityo kuba yarageze mu Rukiko agahindura imvugo bikaba ari uburyo bwo guhunga icyaha kugira ngo yoroherezwe ibihano; rwashingiye kandi ngano y’urumogi bafatanywe rungana n’udupfunyika 76 bari bamaze gufunga, n’urundi rungana n’irobo batari bagafunze; Urukiko rusanga urwo rumogi rwose rutari urwo kunywa kuko iyo baba bashaka kurugabana nk’uko babivuga bitari ngombwa ko babanza kurufunga, ahubwo bari kurugabana uko ruri; ko kuba barafashe umwanya wo kwicara bakarufunga, bwari uburyo bwo kugira ngo babone uko bajya baruha abaje kurugura ku buryo bworoshye; naho ku bireba Mugabonake Jean Pierre rusanga n’ubwo atigeze yemera icyaha mu nzego z’iperereza bitakimukuraho, hashingiwe ku ngano y’urumogi bafatanywe no ku mvugo ya Bizimana Richard wasobanuye ko urwo rumogi rwari urwo kugurisha. [11] Bizimana Richard na Mugabonake Jean Pierre bongeye kujurira mu Rukiko rw’Ubujurire urubanza ruhabwa RPAA 00870/2024/CA, ruburanisha mu ruhame ku wa 04/09/2025, Bizimana Richard yunganiwe na Me Ndayisenga Jean Claude, Mugabonake Jean Pierre yunganiwe na Me Nkundimana Vincent naho Ubushinjacyaha buhagarariwe na Sibomana Stanislas, umushinjacyaha ku rwego rw’igihugu. [12] Mu myanzuro no mu miburanire yabo, abajuriye basaba Urukiko guhindura inyito y’icyaha rukemeza ko bahamwa n’icyaha cyo kunywa ibiyobyabwenge kuko mu rubanza rwajuririwe babisabye ntibabihambwe kandi nta muntu wagaragajwe bagurishijeho urumogi. [13] Uhagarariye Ubushinjacyaha avuga ko ubujurire bwabo nta shingiro bufite, agasaba ko bakomeza guhamwa n’icyaha cyo gucuruza urumogi hashingiwe ku kuba baracyemeye bagifatwa no ku ngano y’urumogi bafatanywe. [14] Ikibazo kigomba gusuzumwa muri uru rubanza ni ukumenya niba inyito y’icyaha Bizimana Richard na Mugabonake Jean Pierre bahamijwe mu rubanza rwajuririwe ikwiye guhinduka ikaba icyaha cyo kunywa ibiyobyabwenge byo mu bwoko bw’urumogi.

II. ISESENGURA RY’IBIBAZO BIGIZE URUBANZA Kumenya niba inyito y’icyaha Bizimana Richard na Mugabonake Jean Pierre bahamijwe mu rubanza rwajuririwe ikwiye guhinduka ikaba icyaha cyo kunywa ibiyobyabwenge byo mu bwoko bw’urumogi. [15] Bizimana Richard na Me Ndayisenga Jean Claude umwunganira bavuga ko Urukiko Rukuru, Urugereko rwa Rwamagana rutasesenguye neza igisobanuro cyo gucuruza mbere y’uko rufata icyemezo, kuko ingano y’urumogi atari yo rwari gushingiraho rwemeza ko ahamwa n’icyaha cyo gucuruza urumogi, hashingiwe ku byemejwe mu rubanza RPAA 00749/2021/CA Ubushinjacyaha bwaburanye na Uwemeye Issa (igika cya 23), aho Urukiko rw’Ubujurire rwasanze “uretse kuba Uwemeye Issa yarafatanwe urumogi rungana n’udupfunyika 21 aruvanye muri DRC aruzanye mu Rwanda nk’uko nawe abyiyemerera bikanashyigikirwa n’ubuhamya bwa Kambari Vincent wamufashe, nta kimenyetso gihari na kimwe kigaragaza ko urwo rumogi yari agamije kurukwirakwiza aruha cyangwa arugurisha abandi bantu”.

## Page 5

[16] Bavuga ko Bizimana Richard yafatiwe iwe bakanamusaka ntibagire ifaranga na rimwe bamusangana ngo byitwe ko yarucuruje cyangwa ngo afatwe arimo kurugurisha ku bandi, bityo rero ibyashingiweho ahamwa no gucuruza urumogi bikaba nta shingiro bifite, kuko kuba rwari rufunze mu dupfunyika atari ikimenyetso cyemeza ko rwari urwo gucuruza, kuko n’ubundi runyobwa rufunze hakaba nta bundi buryo bumenyerewe bwo kurunywa. [17] Mugabonake Jean Pierre na Me Nkundimana Vincent umwunganira nabo bavuga ko atigeze acuruza urumogi, ko icyaha yakoze ari ukunywa ibiyobyabwenge bityo kumuhamya icyaha cyo gucuruza ibiyobyabwenge hashingiwe ku ngano y’ibyo yafatanywe bikaba ari ukugenekereza kandi bikaba bitemewe mu miburanishirize y’imanza nshinjacyaha. [18] Uhagarariye Ubushinjacyaha avuga ubujurire bwa Bizimana Richard n’ubwa Mugabonake Jean Pierre nta shingiro ifite, kuko mu rubanza rwajuririwe Urukiko rwasobanuye impamvu rwashingiyeho rwanga guhindura inyito y’icyaha nk’uko bigaragara mu gika cya 11 kugeza mu gika cya 17; asobanura ko kuba ubwo Bizimana Richard yafatwaga yaremeye ko urumogi bafatanywe rwari urwo gucuruza kandi abagiye kubafata bakaba bari bahawe amakuru y’uko bacuruza urumogi, hanarebwe ingano y’urwo bafatanywe kandi bakaba bari barimo kurufunga mu dupfunyika twabugenewe kuko ariko barugurisha rumeze, ari ibimenyetso bihagije bibahamya icyaha cyo gucuruza ibiyobyabwenge kbyo mu bwoko bw’urumogi kandi bakaba batabasha kubivuguruza. UKO URUKIKO RUBIBONA [19] Impaka ziri muri uru rubanza zishingiye ku kumenya niba inyito y’icyaha Bizimana Richard na Mugabonake Jean Pierre bahamijwe mu rubanza rujuririrwa ikwiriye guhinduka. [20] Ingingo ya 11 y’Itegeko N° 69/2019 ryo ku wa 08/11/2019 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, yahinduye ingingo ya 263 iteganya ko « (...) Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha. Iyo abihamijwe n’urukiko ahanishwa: 1 º igifungo cya burundu n’ihazabu y’amafaranga y’u Rwanda atari munsi ya miliyoni makumyabiri (20.000.000 Frw) ariko atarenze miliyoni mirongo itatu (30.000.000 Frw), ku byerekeye ibiyobyabwenge bihambaye. (…). [21] Ibijyanye no kumenya ibishingirwaho kugira ngo hemezwe ko ibikorwa uregwa yakoze bigize icyaha cyo kugurisha ibiyobyabwenge byasobanuwe mu rubanza RPAA 00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin, muri urwo rubanza Urukiko rw’Ubujurire rwasobanuye ko mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge, (…), ibi bisobanuro byongeye kugarukwaho mu manza zitandukanye zaciwe n’uru Rukiko, mu ziheruka gucibwa

## Page 6

harimo nk’urubanza RPAA 00738/2024/CA, rwaciwe ku wa 29/04/2025 Ubushinjacyaha buburana na Uwayezu Félicien (igika cya 18). [22] Nk’uko bigaragara mu rubanza rujuririrwa, Bizimana Richard na Mugabonake Jean Pierre bahamijwe icyaha cyo gucuruza ibiyobyabwenge hashingiwe ku mvugo ya Bizimana Richard ubwo yafatwaga wemeye icyaha agasobanura ko urumogi bafatanywe rwari urwo kugurisha urundi bakazajya barunywa, no ku ngano y’urumogi bafatanywe ingana n’udupfunyika 76 bari bamaze gufunga, n’urundi rungana n’irobo bari batarafunga. [23] Urukiko rw’Ubujurire rurasanga kuba abaregwa bose bemera ko bafashwe barimo gufunga urumogi mu dupfunyika, bakanemera ko bari bamaze gufunga urungana n’udupfunyika 76 hari n’urundi rungana n’irobo bari batarafunga, by’umwihariko mu Bugenzacyaha Bizimana Richard akaba yaremeye ko urwo rumogi rwari urwo gucuruza, ari ibimenyetso bihagije byemeza ko rwari urwo gucuruza, akanemera ko kuko hashingiwe ku murongo wagaragajwe haruguru (mu gika cya 21) watanzwe mu rubanza RPAA 00408/2020/CA, kugira ngo hemezwe ko uregwa ahamwa n’icyaha cyo gucuruza ibiyobyabwenge atari ngombwa ko byanze bikunze haba habonetse abo yarugurishijeho cyangwa amafaranga yarukuyemo, ahubwo kimwe mu bishingirwaho hemezwa ko ibiyobyabwnge uregwa yafatanywe byari ibyo gucuruza harimo n’ingano yabyo; uru Rukiko rukaba rusanga urumogi rungana n’udupfunyika 76 n’urundi rungana n’irobo rudafunze abaregwa bafatanywe ari rwinshi ku buryo rutaba ari urwo kunywa gusa, no kuba barafashwe barimo kurufunga bikaba bishimangira ko bari biteguye kuruha ubagana. [24] Hashingiwe kuri ibyo bisobanuro byose, inyito y’icyaha Bizimana Richard na Mugabonake Jean Pierre bahamijwe ikaba idakwiye guhinduka, bityo ubujurire bwabo bukaba nta shingiro bufite. [25] Urukiko rurasanga ariko n’ubwo ubujurire bwabo nta shingiro buhawe, nta kibuza ko hasuzumwa ibijyanye no kuba bagabanyirizwa igihano kigahuzwa n’uburemere bw’icyaha, hashingiwe ku murongo watanzwe mu rubanza RPAA 00039/2021/CA rwaciwe n’Urukiko rw’Ubujurire ku wa 02/07/2021 haburana Ubushinjacyaha na Shakabatenda Jean de Dieu, aho rwasobanuye ko “Ntacyabuza Urukiko kugabanyiriza igihano uregwa, hagamije gutanga igihano gihwanye n’uburemere bw’icyaha kabone n’ubwo impamvu z’ubujurire zaba zitahawe ishingiro.” Uwo murongo kandi ukaba warakomeje gushingirwaho mu zindi manza zaciwe n’uru Rukiko, mu ziheruka gucibwa harimo nk’urubanza RPAA 00898/2024/CA rwaciwe ku wa 20/05/2025 haburana Ubushinjacyaha na Uwihoreye Silas (igika cya 27 n’icya 28). [26] Urukiko rw’Ubujurire rurasanga hashingiwe kuri uwo murongo, igifungo cy’imyaka 17 n’ihazabu ingana na 10.000.000 Frw Bizimana Richard na Mugabonake Jean Pierre bahanishijwe gikwiriye kongera kugabanywa kuko ari ubwa mbere bakurikiranyweho icyaha mu buryo buzwi kandi n’ingano y’urumogi bafatanywe n’ubwo atari ruke ku buryo rwafatwa nk’aho ari urwo kwinywera nk’uko byasobanuwe, nanone atari rwinshi cyane bikabije, ku bireba Bizimana Richard hakaniyongeraho ko yakoze icyaha afite imyaka 23, ni ukuvuga ko ari bwo yari akiva mu bwana; mu rwego rwo guhuza imitangire y’ibihano ku bakoze ibyaha bifitanye isano mu mikorere yabyo, Bizimana Richard na Mugabonake Jean Pierre bakaba bagomba guhanishwa igifungo cy’imyaka 15 n’ihazabu ingana na 5.000.000 Frw kuri buri wese. Ibi bihano bisa n’ibyategetswe muri zimwe

## Page 7

mu manza ziherutse gucibwa, harimo nk’urubanza RPAA 00898/2024/CA rwaciwe ku wa 20/05/2025.1

III. ICYEMEZO CY’URUKIKO [27] Rwemeje ko ubujurire bwa Bizimana Richard n’ubwa Mugabonake Jean Pierre nta shingiro bufite. [28] Rwemeje ko imikirize y’urubanza RPA 00350/2021/HC/RWG, rwaciwe n’Urukiko Rukuru, Urugereko rwa Rwamagana, ku wa 26/07/2024 ihindutse gusa ku birebana n’ibihano Bizimana Richard na Mugabonake Jean Pierre bahanishijwe. [29] Rutegetse ko Bizimana Richard na Mugabonake Jean Pierre bahanishijwe igifungo cy’imyaka cumi n’itanu (15) n’ihazabu ingana n’amafaranga y’u Rwanda miliyoni eshanu (5.000.000 Frw) kuri buri wese. [30] Rutegetse ko Bizimana Richard na Mugabonake Jean Pierre basonewe amagarama kuko baburana bafunze.

1 Muri urwo rubanza uregwa wahamijwe icyaha cyo gucuruza ibiyobyabwenge byo mu bwoko bw’urumogi yari yafatanywe udupfunyika 70 n’urundi rungana na garama 200.