UBUSHINJACYAHA v BIZIMANA

# UBUSHINJACYAHA v BIZIMANA

- Source: Amategeko - Section: Decisions (Judgements) - Date: 2025-10-17 - Case/document no.: RPAA 00226/2025/CA - Collection: Court of Appeal

## Text

## Page 1

UBUSHINJACYAHA v BIZIMANA [Rwanda URUKIKO RW’UBUJURIRE - RPAA 00226/2025/CA (Kanyange, P.J.) 17 Ukwakira 2025] Amategeko agenga imanza z’inshinjabyaha – Inyito y’icyaha – Guhindura inyito y’icyaha - Umuntu ntagirwa umucuruzi w’ibiyobyabwenge no kuba hari abaguzi babonetse aho acuririza, ahubwo igihe cyose afite ibicuruzwa kandi yiteguye kubiha umuntu wese umugana ashaka ibyo agurisha, aba ari umucuruzi w’ibiyobyabwenge. Incamake y’ikibazo: Bizimana yaketsweho gucuruza ibiyobyabwenge, inzego z’umutekano zijya iwe gusaka zimusangana udupfunyika 10, Ubushinjacyaha bumurega mu Rukik Rwisumbuye rwa Muhanga icyaha cyo gucuruza ibiyobyabwenge. Uregwa yaburanye yemera icyaha avuga ko yatangiye kunywa urumogi akiri muto nyuma akaza no kurucuruza. Urukiko rwasanze uregwa ahamwa n’icyaha, rumuhanisha igifungo cy’imyaka 25. Uregwa yajuririye icyo cyemezo mu Rukiko Rukuru avuga ko yaburanye yemera icyaha ariko ntiyagabanyirizwa igihano mu buryo buhagije, urukiko rusanga yagabanyirizwa igihano kubera ko ari ubwa mbere akoze icyaha, rumuhanisha igifungo cy’imyaka 15. Uregwa yongeye kujurira icyo cyemezo mu Rukiko rw’Ubujurire, asaba ko inyito y’icyaha yahinduka. Urukiko rwasuzumye ikibazo cyo kumenya niba inyito y’icyaha Bizimana Sosthène yahamijwe yahinduka, agahanirwa icyaha cyo gufatanwa ibiyobyabwenge byo mu bwoko bw’urumogi mu mwanya w’icyaha cyo kubicuruza no kumenya niba uregwa yakongera kugabanyirizwa igihano. Uregwa avuga avuga ko yahindurirwa inyito y’icyaha agahanirwa gufatanywa ibiyobyabwenge kuko uretse kuba baramufatanye udupfunyika 10 tw’urumogi, nta muntu basanze abigurisha bityo akaba adakwiye gukurikiranwaho kubigurisha, akanasaba ko yakongera kugabanyirizwa igihano. Ubushinjacyaha buvuga ko uregwa we ubwe yiyemerera ko yacuruzaga urumogi kandi koko yararucuruzaga bityo inyito y’icyaha ikaba itagomba guhinduka ndetse n’igihano kikaba kitagomba kugabanywa kuko yahanishijwe igihano gito giteganywa n’itegeko. Incamake: Umuntu ntagirwa umucuruzi w’ibiyobyabwenge no kuba hari abaguzi babonetse aho acuririza, ahubwo igihe cyose afite ibicuruzwa kandi yiteguye kubiha umuntu wese umugana ashaka ibyo agurisha, aba ari umucuruzi w’ibiyobyabwenge. Ubujurire nta shingiro bufite. Amategeko yashingiweho: Itegeko N° 69/2019 ryo ku wa 08/11/2019 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange, ingingo ya 11; Imanza zifashishijwe: RPAA 00436/2020/CA, Ubushinjacyaha na AHIMPEREYE NDEZE François, rwaciwe n’Urukiko rw’Ubujurire ku wa 28/06/2022; RPAA 00214/2024/CA, Ubushinjacyaha na MUSHYITSI Félix, rwaciwe n’Urukiko rw’Ubujurire ku wa 25/04/2025.

## Page 2

RPAA 00538/2024/CA, Ubushinjacyaha na CYUZUZO Jean Claude, rwaciwe n’Urukiko rw’Ubujurire ku wa 21/01/2025. Urubanza IMITERERE Y’URUBANZA

[1] Inzego zishinzwe umutekano zahaweamakuru n’abaturage ko Bizimana Sosthène acuruza urumogi akanarunywa, maze ku wa 07/09/2021 zijya iwabo mu rugo zimusangana udupfunyika 10 tw’urumogi ruhishe munsi y’uburiri. Amaze gufatwa yashyikirijwe Ubugenzacyaha atangira gukurikiranwa. [2] Nyuma y’iperereza, Ubushinjacyaha bwareze Bizimana Sosthène mu Rukiko Rwisumbuye rwa Muhanga bumukurikiranyeho icyaha cyo gucuruza ibiyobyabwenge byo mu bwoko bw’urumogi, bushingiye ku kuba yemera icyaha, ku nyandikomvugo y’ifatira ry’urumogi n’imvugo z’abatangabuhamya, bumusabira guhanishwa igifungo cya burundu n'ihazabu ya 21.000.000 Frw. [3] Bizimana Sosthène yaburanye yemera icyaha, avuga ko urumogi yafatanwe ari urwe, ko yari amaze igihe gito atangiye kurucuruza ubundi yarunywaga gusa, kandi ko yatangiye kurunywa kera yiga mu mwaka wa gatatu w’amashuri abanza ahita ava mu ishuri. [4] Mu rubanza N° RP 01109/2021/TGI/MHG rwaciwe ku wa 23/09/2021, Urukiko rwasanze Bizimana Sosthène ahamwa n’icyaha cyo gucuruza ibiyobyabwenge byo mu bwoko bw’urumogi, rushingiye ku bimenyetso bigizwe no kuba yemera icyaha hanwe n’imvugo z’abatangabuhamya, ariko rumugabanyiriza igihano kuko ari ubwa mbere akurikiranwe mu nkiko kandi akaba yaremeye icyaha, rumuhanisha igifungo cy’imyaka makumyabiri n’itanu (25) n’ihazabu ya 21.000.000 Frw. [5] Bizimana Sosthène yajuririye urwo rubanza mu Rukiko Rukuru/Urugereko rwa Nyanza avuga ko yemera gusa ko yafatanwe urumogi, asaba kugabanyirizwa ibihano no guhindurirwa inyito y’icyaha. [6] Ubushinjacyaha bwasubije ko ibyo avuga nta shingiro bifite kuko yiyemereye ko hari urumogi yacuruzaga urundi akarunywa. [7] Mu rubanza N° RPA 00925/2021/HC/NYZ rwaciwe ku wa 12/02/2025, Urukiko rwasanze ibisabwa na Bizimana Sosthène ko inyito y’icyaha yahinduka nta shingiro bifite, kuko ibyo yiyemereye mu iperereza no mu Rukiko Rwisumbuye rwa Muhanga aho yivugiye ko atarenzaga udupfunyika icumi (10) ku mafaranga ibihumbi bitatu na magana atanu (3500 Frw), yamara kutugurisha akarangura utundi, bigaragaza ko yagize umugambi wo kugurisha urumogi, bityo ko hatabayeho kurufatanwa gusa, narwo rwemeza ko ahamwa n’icyaha cyo gucuruza ibiyobyabwenge byo mu bwoko bw’urumogi nk’uko byemejwe ku rwego rwa mbere.

## Page 3

[8] Rwasanze ariko yagabanyirizwa igihano kuko ari ubwa mbere akurikiranwe bizwi kandi akiri urubyiruko, rushingira ku murongo watanzwe n’Urukiko rw’Ubujurire y’uko uregwa ashobora kugabanyirizwa igihano n’iyo impamvu z’ubujurire nta shingiro zifite1, no ku biteganywa n’ingingo ya 2 y’Itegeko Nº 059/2023 ryo ku wa 04/12/2023 ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange2, rumuhanisha igifungo cy’imyaka cumi n’itanu (15) n’ihazabu ya 5.000.000 Frw. [9] Bizimana Sosthène yajuriye bwa kabiri mu Rukiko rw’Ubujurire, urubanza ruhabwa N° RPAA 00226/2025/CA, iburanisha ribera mu ruhame ku wa 09/10/2025 yunganiwe na Me UWIMABERA Beata, Ubushinjacyaha buhagarariwe na Uwanziga Lydia, Umushinjacyaha ku rwego rw’Igihugu. [10] Mu myanzuro y’ubujurire no mu miburanire, Bizimana Sosthène avuga ko ubujurire bwe bugamije guhindurirwa inyito y’icyaha no kugabanyirizwa igihano, agahanirwa icyaha cyo kunywa no gufatanwa urumogi aho kuba icyo kurucuruza. [11] Uhagarariye Ubushinjacyaha avuga ko inyito y’icyaha itahinduka kuko ibimenyetso byashingiweho n’Urukiko bigaragaza ko Bizimana Sosthène yakoze icyaha cyo gucuruza urumogi, kandi ko igihano yahawe kitakongera kugabanywa kuko yakigabanyirijwe ahabwa igihano gito amategeko ateganya kuri icyo cyaha iyo hari impamvu nyoroshyacyaha. [12] Urukiko rurasuzuma ibibazo bikurikira: ✓ Kumenya niba inyito y’icyaha yahinduka Bizimana Sosthène agahanirwa icyaha cyo gufatanwa ibiyobyabwenge byo mu bwoko bw’urumogi mu mwanya w’icyaha cyo kubicuruza. ✓ Kumenya niba igihano Bizimana Sosthène yawe cyakongera kugabanywa.

II. ISESENGURA RY’IBIBAZO BIGIZE URUBANZA 1)

Kumenya niba inyito y’icyaha Bizimana Sosthène yahamijwe yahinduka, agahanirwa icyaha cyo gufatanwa ibiyobyabwenge byo mu bwoko bw’urumogi mu mwanya w’icyaha cyo kubicuruza. [13] Bizimana Sosthène avuga ko yahanishijwe igihano atagombaga guhabwa ku bijyanye n’ibikorwa yafatiwemo, kuko nta bimenyetso bifatika bihamya ko yacuruzaga urumogi, kandi ko uretse udupfunyika 10 tw’urumogi yemera ko yafatanwe, ntawe basanze arugurisha, nta

1 Rwavuze ko byemejwe mu rubanza Nº RPAA 00194/2021/CA rwaciwe ku wa 22/07/2022 rw’Ubushinjacyaha na NDAYISHIMIYE Emmanuel alias Shema 2 Iyo ngingo iteganya ko: “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15, (d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe”.

## Page 4

n’ugaragaza ko yaba yararumugurishije, ko rero inyito y’icyaha yahinduka agahanirwa icyaha cyo gufatanwa ibiyobyabwenge mu mwanya wo guhanirwa icyo kubicuruza, naho kuba mu Bugenzacyaha yaremeye ko abicuruza bikaba byaratewe n’uko bari bamubeshye ko nabyemera bamurekura, banamubwira ko natemera na se bamufunga. [14] Me UWIMABERA Beata umwunganira, avuga ko ashingiye ku miterere ya dosiye, ku byo Bizimana Sosthène yivugiye imbere y’Ubugenzacyaha no mu iburanisha, guhindura inyito y’icyaha bitashoboka, kandi ko yamusobanuriye ko ibyo yiyemereye ari byo byahujwe n’ibyo amategeko ateganya. [15] Uhagarariye Ubushinjacyaha avuga impamvu irebana no guhindura inyito y’icyaha nta shingiro ifite, kuko hari ibimenyetso byashingiweho n’Urukiko bigaragaza ko Bizimana Sosthène yakoze icyaha cyo gucuruza urumogi, birimo imvugo ze mu Bugenzacyaha no mu Bushinjacyaha aho yemeye ko anywa akanacuruza urumogi, inyandiko mvugo y’ifatira yashyizeho umukono ndetse n’imvugo z’abatangabuhamya zimushinja, ko ibyo ari ibimenyetso byerekana ko yacuruzaga ibiyobyabwenge byo mu bwoko bw’urumogi, bityo inyito y’icyaha ikaba itahinduka. Avuga kandi ko ibyo avuga ko mu Bugenzacyaha bamubeshye ko niyemera icyaha bamurekura bitahabwa agaciro kuko nta kibihamya, kandi ko kuba no mu Bushinjacyaha yaremeye ko agurisha urumogi, ari ikimenyetso cy’uko ibyo yireguza ko mu Bugenzacyaha bamubeshye ngo yemere icyaha atari ukuri. UKO URUKIKO RUBIBONA [16] Impaka kuri iki kibazo zishingiye ku kumenya niba inyito y’icyaha Bizimana Sosthène yahamijwe yahinduka, agahamwa n’icyaha cyo gufatanwa no kunywa ibiyobyabwenge byo mu bwoko bw’urumogi, hashingiwe ko nta muntu basanze arugurisha nta n’ugaragaza ko yaba yararumugurishije. [17] Ibijyanye n’igishingirwaho kugira ngo hemezwe ko uwafatanwe ibiyobyabyenge ari umucuruzi wabyo, Urukiko rw’Ubujurire rwabitanzeho umurongo mu rubanza Nº RPAA 00436/2020/CA rwaciwe ku wa 28/06/2022 haburana Ubushinjacyaha na Ahimpereye Ndeze François. Muri urwo rubanza Urukiko rwasanze umuntu atagirwa umucuruzi w’ibiyobyabwenge no kuba hari abaguzi babonetse aho acuririza, ahubwo igihe cyose afite ibicuruzwa kandi yiteguye kubiha umuntu wese umugana ashaka ibyo agurisha, aba ari umucuruzi w’ibiyobyabwenge. Uwo murongo wagiye ukurikizwa no mu zindi manza zaciwe n’uru Rukiko harimo urubanza Nº RPAA 00214/2024/CA, rwaciwe n’Urukiko rw’Ubujurire ku wa 25/04/2025 haburana Ubushinjacyaha na Mushyitsi Félix. [18] Imikirize y’urubanza rwajuririwe igaragaza ko Bizimana Sosthène yahamijwe icyaha cyo gucuruza ibiyobyabwenge byo mu bwoko bw’urumogi hashingiwe ku kuba mu Bugenzacyaha, mu Bushinjacyaha no mu Rukiko Rwisumbuye yariyemereye ko urumogi yafatanwe yarunywaga akanarucuruza. [19] Nk’uko dosiye ibigaragaza, Bizimana Sosthène abazwa mu Bugenzacyaha yemeye ko yafatanwe udupfunyika icumi (10) tw’urumogi, avuga ko yagurishagaho urundi akarunywa, arukuye ku mugabo witwa Jean Paul utuye mu Birembo warumuzaniraga cyangwa agatuma umugore we, bakavugana kuri telefone aho bahurira akarumuhereza, akamwishyura, kandi ko

## Page 5

atarenzaga udupfunyika 10 ku mafaranga ibihumbi bitatu na magana atanu (3500 Frw), asobanura ko yatangiye kurunywa cyera yiga mu mwaka wa gatatu w’amashuri abanza, nyuma abona ibyiza ari ukugura rwinshi akarwibikira n’urushaka akamuhaho, ariko ko ibyo kurucuruza yari amaze nk’ukwezi abitangiye. Na none abazwa mu Bushinjacyaha, yavuze ko urumogi yafatanwe yari yararuguze n’umugabo witwa Jean Paul wo mu Ruvumera n’undi witwa Valens utuye mu bice bya Mushubati, ari nawe woherezaga umuntu akarubagezaho, anavuga ko yarunywaga urundi akarugurisha ku bo baziranye, kandi ko hari hashize ukwezi arucuruza. [20] Hari kandi umwe mu bashinzwe umutekano wabajijwe witwa Ndagijimana Jonathan, wasobanuye ko bari basanzwe bafite amakuru ko Bizimana Sosthène acuruza urumogi akanarunywa, amakuru bayabwira Polisi ijyayo, basatse basanga udupfunyika 10 tw’urumogi munsi y’igitanda araraho rufungiye mu rukweto, kandi ko yajyaga abona arimo gutanga urumogi arucuruza ariko ntamenye ibyo ari byo kuko babivugaga mu ndimi zabo ku buryo utapfa kumenya ibyo bavuga. [21] Bigaragara na none ko Bizimana Sosthène aburana mu Rukiko Rwisumbuye rwa Muhanga, yakomeje kwemera ko urumogi yafatanwe ari urwe ndetse anasobanura ko yari asanzwe arunywa ariko ko yari amaze igihe gito atangiye kurucuruza. Naho mu Rukiko Rukuru/Urugereko rwa Rusizi, yajuriye asaba kugabanyirizwa ibihano n’inyito y’icyaha igahinduka, kuko urumogi yafatanwe rwari urwo kunywa, ko ibyo gucuruza urumogi yabimenyeye mu Bugenzacyaha, ariko ko arunywa atarucuruza, kandi ko icyatumye yemera ari uko yabwirwaga ko azarekurwa, nyamara ntiyagaragaje ko hari impamvu yihariye yamuteye kwemera ko yacuruzaga urumogi, aho yagiye abyemera hose. [22] Urukiko rw’Ubujurire rurasanga ibivugwa na Bizimana Sosthène ko inyito y’icyaha yahinduka agahanirwa icyaha cyo kunywa no gufatanwa ibiyobyabwenge byo mu bwoko bw’urumogi, akanavuga ko ari cyo yemeye ko yakoze, nta shingiro bifite, kuko nk’uko byagaragajwe haruguru yemereye mu Bugenzacyaha, mu Bushinjacyaha no mu Rukiko Rwisumbuye rwa Muhanga ko yacuruzaga urumogi, asobanura adategwa aho yarukuraga, ingano y’urwo yaranguraga, uko yaruranguraga n’igiciro yaruranguragaho, hakaba kandi n’umutangabuhamya wemeje ko bari basanzwe bafite amakuru ko yacuruzaga urumogi, bityo hashingiwe kuri ibyo bimenyetso no ku murongo watanzwe mu rubanza rwagaragajwe haruguru, ibikorwa Bizimana Sosthène yakoze nk’uko n’inkiko zibanza zabibonye, ari ibyo gucuruza ibiyobyabwenge byo mu bwoko bw’urumogi aho kuba kurunywa no kurufatanwa nk’uko abivuga, inyito y’icyaha rero ikaba itagomba guhinduka. [23] Ku bivugwa na Bizimana Sosthène ko mu Bugenzacyaha yemeye ko acuruza urumogi bitewe n’uko bamubeshye ko nabyemera bamurekura, ndetse ko natemera bafunga se, Urukiko rw’Ubujurire rurasanga nabyo nta shingiro bifite, kuko ibyo yemeye akanasobanura mu Bugenzacyaha ari nako yakomeje kubyemera mu Bushinjacyaha no mu Rukiko Rwisumbuye rwa Muhanga kandi ntacyo agaragaza cyaba cyaramwemeje ibyo atakoze, bityo nta nenge ukwiyemerera icyaha kwe gufite yatuma kudashingirwaho. 2) Kumenya niba igihano Bizimana Sosthène yahawe cyakongera kugabanywa [24] Bizimana Sosthène asaba kugabanyirizwa igihano, kuko kuva yafatwa atigeze ahakana ko yanywaga akanafatanwa urumogi, kandi ko n’ubwo Urukiko rwasanga inyito y’icyaha itahinduka, rwamugabanyiriza igihano.

## Page 6

[25] Me Uwimabera Beata umwunganira we avuga ko igifungo cy’imyaka cumi n’itanu (15) n’ihazabu ya 5.000.000 Frw Bizimana Sosthène yahanishijwe, ari cyo gito giteganywa n’amategeko kuko yagabanyirijwe igihano kubera ko ari ubwa mbere akurikiranwe mu butabera, hashingiwe ku biteganywa n’ingingo ya 2 agace ka (a) n’aka (d) y’Itegeko Nº 059/2023 ryo ku wa 04/12/2023 riteganya ibyaha n’ibihano muri rusange ihindura ingingo ya 60 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange. [26] Uhagarariye Ubushinjacyaha avuga ko impamvu ijyanye no kugabanyirizwa igihano itahabwa ishingiro, kuko Bizimana Sosthène yagabanyirijwe ahabwa igihano gito amategeko ateganya ku cyaha yahamijwe, iyo Umucamanza yahaye agaciro impamvu nyoroshyacyaha, nk’uko n’umwunganira abivuga. UKO URUKIKO RUBIBONA [27] Impaka kuri iki kibazo zishingiye ku kumenya niba igihano Bizimana Sosthène yahanishijwe cyakongera kugabanywa. [28] Ku birebana n’icyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nka byo (urumogi) mu buryo bunyuranyije n’amategeko, ingingo ya 11 y’Itegeko N° 69/2019 ryo ku wa 08/11/2019 rihindura Itegeko N° 68/2018 ryo ku wa 30/08/2018 riteganya ibyaha n’ibihano muri rusange iteganya ko: “Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranyije n’amategeko, aba akoze icyaha. Iyo abihamijwe n’Urukiko ahanishwa: 1º igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 Frw) ariko atarenze miliyoni mirongo itatu (30.000.000 Frw) ku byerekeye ibiyobyabwenge bihambaye”. [29] Ku bijyanye no kumenya igihano gito gishobora guhabwa umuburanyi wahamijwe icyaha gihanishwa igifungo cya burundu n’ihazabu mu gihe hari impamvu nyoroshyacyaha, Urukiko rw’Ubujurire rwabitanzeho umurongo mu rubanza Nº RPAA 00538/2024/CA, rwaciwe ku wa 21/01/2025 haburana Ubushinjacyaha na Cyuzuzo Jean Claude, rusobanura ko iyo hari impamvu nyoroshyacyaha zemejwe n’Umucamanza icyaha gihanishwa igifungo cya burundu n’ihazabu, icyo gihano gishobora kugabanywa ariko ntikijye munsi y’igifungo cy’imyaka cumi n’itanu (15) n’ihazabu ikaba yagabanywa ariko ntige munsi ya kimwe cya kane cy’ihazabu nto iteganyirijwe icyaha cyakozwe. Uyu murongo wagiye ukurikizwa mu manza zitandukanye zaciwe n’uru Rukiko, harimo urubanza Nº RPAA 00885/2024/CA, rwaciwe n’Urukiko rw’Ubujurire ku wa 16/05/2025 haburana Ubushinjacyaha na Nshimiyimana Eric. [30] Nk’uko imikirize y’urubanza rujurirwa ibigaragaza, Urukiko Rukuru/Urugereko rwa Nyanza, rwagabanyirije igihano Bizimana Sosthène, ku cyaha yahamijwe cyo gucuruza ibiyobyabwenge byo mu bwoko bw’urumogi, kiva ku gifungo cy’imyaka makumyabiri n’itanu (25) n’ihazabu ya 21.000.000 Frw, ahanishwa igifungo cy’imyaka cumi n’itanu (15) n’ihazabu ya 5.000.000 Frw, [31] Urukiko rw’Ubujurire rurasanga, nk’uko byasobanuwe mu zindi manza zaciwe n’uru Rukiko zavuzwe haruguru, igifungo cy’imyaka cumi n’itanu (15) n’ihazabu ya 5.000.000 Frw, Bizimana Sosthène yahanishijwe n’Urukiko Rukuru/Urugereko Nyanza, kitakongera kugabanywa

## Page 7

kuko cyagabanyijwe bihagije kandi kikaba aricyo gihano gito giteganyijwe ku cyaha yahamijwe cyo gucuruza ibiyobyabwenge byo mu bwoko bw’urumogi, mu gihe hari impamvu nyoroshyacyaha zemejwe n’Umucamanza. [32] Hashingiwe rero ku bimaze gusobanurwa, Urukiko rw’Ubujurire rurasanga igihano cy’igifungo cy’imyaka cumi n’itanu (15) n’ihazabu ya 5.000.000 Frw, Bizimana Sosthène yahanishijwe kitakongera kugabanywa, bityo hakaba hagumyeho imikirize y’urubanza rwajuririwe. III. ICYEMEZO CY’URUKIKO

[33] Rwemeje ko ubujurire bwatanzwe na Bizimana Sosthène nta shingiro bufite; [34] Rwemeje ko urubanza N° RPA 00925/2021/HC/NYZ rwaciwe n’Urukiko Rukuru/Urugereko rwa Nyanza ku wa 12/02/2025, rugumanye agaciro mu ngingo zarwo zose; [35] Rwemeje ko inyito y’icyaha Bizimana Sosthène yahamijwe cyo gucuruza ibiyobyabwenge byo mu bwoko bw’urumogi, idahindutse; [36] Rutegetse ko hagumyeho igifungo cy’imyaka cumi n’itanu (15) n’ihazabu ya 5.000.000 Frw, Bizimana Sosthène yahanishijwe.