UBUSHINJACYAHA v BIZIMUNGU

# UBUSHINJACYAHA v BIZIMUNGU

- Source: Amategeko - Section: Decisions (Judgements) - Date: 2025-10-20 - Case/document no.: RPAA 00872/2024/CA - Collection: Court of Appeal

## Text

## Page 1

UBUSHINJACYAHA v BIZIMUNGU [Rwanda URUKIKO RW’UBUJURIRE - RPAA 00872/2024/CA (Rugabirwa, P.J.) 20 Ukwakira 2025] Amategeo agenga imanza z’inshinjabyaha - Igabanyagihano - Urukiko ntirutegetswe kugabanya igihano niyo hari impamvu nyoroshyacyaha, ahubwo rugena igihano mu bushishozi bwarwo rurebye imikorere y’icyaha uregwa akurikiranyweho cyangwa uburyo cyakozwemo Incamake y’ikibazo: Bizimungu yahenze umugore we agiye gucuruza agataro amugenda inyuma ageze ahatari abantu, amukata ijosi, agwa aho. Yaje gufatwa, Ubushinjacyaha bumurega mu Rukiko Rwisumbuye rwa Nyarugenge icyaha cy’ubwicanyi, aburana yemera icyaha, urukiko rusanga icyaha aregwa cyimuhama, rumukatira igihano cy’igifungo cya burundu. Uregwa yajuririye icyo cyemezo mu Rukiko Rukuru asaba kugabanyirizwa ibihano kuko yemera icyaha, Urukiko Rukuru rushingiye ku bugome icyaha cyakoranwe, rusanga atagabanyirizwa igihano. Uyu yajuririye icyo cyemezo mu Rukiko rw’Ubujurire asaba kugabanyrizwa igihano ashingiye ko yemera icyaha. Uru rukiko rwasuzumye ikibazo cyo kumenya Kumenya niba uregwa yagabanyirizwa ibihano kubera ko yemera icyaha akanagisabira imbabazi. Uregwa asobanura ko asaba imbabazi z’icyaha yakoze kandi ko yaburanye acyemera kuva agifatwa bityo agasaba ko yagabanyirizwa igihano kuko amaze no kugororoka. Ubushinjacyaha buvuga ko uregwa atagabanyirizwa ibihano kubera ubugome bukabije yakoranye icyaha, ubwo yicaga umugore we amukebye ijosi akoreshe icyuma gityaye yari yitwaje amutegeye mu nzira, aho yakundaga kunyura agiye kurangura. Incamake y’icyemezo: Urukiko ntirutegetswe kugabanya igihano niyo hari impamvu nyoroshyacyaha, ahubwo rugena igihano mu bushishozi bwarwo rurebye imikorere y’icyaha uregwa akurikiranyweho cyangwa uburyo cyakozwemo. Ubujurire, nta shingiro bufite. Nta mategeko yashingiweho. Imanza zifashishijwe: RPAA 0021/14/CS - RPAA 0022/14/CS, Ubushinjacyaha na Uzabakiriho, rwaciwe n’Urukiko rw’Ikirenga ku wa 13/10/2017; RPAA 00610/2022/CA, Ubushinjacyaha na Nahimana Christophe, rwaciwe n’Urukiko rw’Ubujurire ku wa 25/09/2024; RPAA 00837/2024/CA, Ubushinjacyaha na Isezerano Sarah, rwaciwe n’Urukiko rw’Ubujurire ku wa 18/03/2025. Urubanza

## Page 2

IMITERERE Y’URUBANZA

[1] Ubushinjacyaha bwakurikiranyeho Bizimungu Kanyamibare icyaha cy’ubwicanyi, kubera ko ku wa 06/12/2021, saa tatu za mu gitondo, yishe umugore we Murebe Evelyne, amutegeye mu nzira aho yakundaga kunyura agiye kurangura kuko yacuruzaga agataro, amugenda inyuma atabizi, abonye ageze ahantu hatari abantu benshi, aramusuhuza amuturutse inyuma, umugore we akebutse ahita amufata, amukeba ijosi akoreshe icyuma yari yitwaje, arangije ariruka arahunga ajya kwihisha, abagenzi babibonye baratabaza, bagerageza kuzirika ijosi ry’umugore we ryavaga amaraso menshi ariko biba ibyubusa, Murebe Evelyne ahita apfira aho, bashakisha Bizimungu Kanyamibare, afatirwa mu bigori aho yari yihishe, ashyikirizwa Ubuyobozi bwa Polisi, arafatwa arafungwa. Bizimungu Kanyamibare yaburanye yemera icyaha. [2] Urukiko Rwisumbuye rwa Nyarugenge rwaregewe, rushingiye ku mvugo ya Bizimungu Kanyamibare wemeye icyaha, ku mvugo z’abatangabuhamya bamushinja barimo Ntawuruhunga, Nshimiyimana Théogѐne, Hitimana na Minani basobanura uko Bizimungu Kanyamibare yakoze icyaha anabemerera ko ariwe wamwishe, rwaciye urubanza nº RP 01721/2021/TGI/NYGE ku wa 24/01/2022, rwemeza ko Bizimungu Kanyamibare ahamwa n’icyaha cy’ubwicanyi, rumuhanisha igifungo cya burundu. [3] Bizimungu Kanyamibare yajuririye urwo rubanza mu Rukiko Rukuru, avuga ko akwiye kugabanyirizwa ibihano kubera ko yemera icyaha akanagisabira imbabazi, kuba yaragikoze akiri muto, no kuba yaragorotse agasubira mu muryango nyarwanda. Naho uhagarariye Ubushinjacyaha avuga ko Bizimungu Kanyamibare atagabanyirizwa ibihano kubera uburemere bw’icyaha yakoze yakigambiriye kandi ko yagikoze yaravuye mu bugimbi. [4] Urukiko Rukuru rushingiye ku mvugo za Bizimungu Kanyamibare wemeye icyaha mu Nzego z’Iperereza no mu Nkiko, no ku buhamya bw’abatangabuhamya bavuzwe haruguru barimo MINANI basobanuye uko Bizimungu Kanyamibare yakoze icyaha, rwaciye urubanza nº RPA 00196/2022/HC/KIG ku wa 01/08/2024, rwemeza ko imikirize y’urubanza rwajuririwe idahindutse, ko igifungo cya burundu Bizimungu Kanyamibare yahanishijwe kigumyeho, rusobanura ko atagabanyirijwe ibihano kubera ubugome yakoranye icyaha. [5] Bizimungu Kanyamibare yajuririye na none urwo rubanza mu Rukiko rw’Ubujurire, ubujurire bwe buhabwa nº RPAA 00872/2024/CA, urubanza rwaburanishijwe mu ruhame ku wa 07/10/2025, Bizimungu Kanyamibare yunganiwe na Me Barahira Mukazana Fidѐle naho Ubushinjacyaha buhagarariwe na Niyonkuru Françoise, Umushinjacyaha ku rwego rw’Igihugu. [6] Mu mwanzuro w’ubujurire no mu miburanire, Bizimungu Kanyamibare n’umwunganira bavuga ko akwiye kugabanyirizwa ibihano kuko yemeye icyaha anagisabira imbabazi, no kuba ari ubwa mbere akiguyemo. Naho uhagarariye Ubushinjacyaha avuga ko Bizimungu Kanyamibare atagabanyirizwa ibihano kubera ubugome bukabije yakoranye icyaha. [7] Urukiko rwasuzumye ikibazo cyo kumenya niba Bizimungu Kanyamibare yagabanyirizwa ibihano kubera ko yemera icyaha akanagisabira imbabazi.

## Page 3

II.ISESENGURA RY’IKIBAZO KIGIZE URUBANZA

Kumenya niba Bizimungu Kanyamibare yagabanyirizwa ibihano kubera ko yemera icyaha akanagisabira imbabazi. [8] Bizimungu Kanyamibare n’umwunganira bavuga ko akwiye kugabanyirizwa ibihano birebire yahawe kubera ko yemera icyaha akanagisabira imbabazi, no kuba ari ubwa mbere aguye mu cyaha, basaba ko hashingiwe ku ngingo ya 2 (a) y'Itegeko Nº 059/2023 ryo ku wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya uburyo ibihano bigabanywa iyo hari impamvu nyoroshyacyaha, yahanishwa igifungo cyimyaka 15, aho kuba igifungo cya burundu yahawe mbere. [9] Bizimungu Kanyamibare asobanura ko bahawe 500.000 Frw y’imfashanyo, umugore we akuramo 100.000 Frw yajyanye ku wundi mugabo, Bizimungu abanza kubyakira, ariko ko yamubonye, ahita agira umugambi wo kumwica, ko yagiye kugura icyuma mu isoko rya Kabuga, amugenda inyuma ari ku igari, amufatira Nyarugunga, ahita akimutera, arapfa, abisabira imbabazi. [10] Uhagahagarariye Ubushinjacyaha avuga ko Bizimungu Kanyamibare atagabanyirizwa ibihano kubera ubugome bukabije yakoranye icyaha, ubwo yicaga umugore we Murebe Evelyne amukebye ijosi akoreshe icyuma gityaye yari yitwaje amutegeye mu nzira, aho yakundaga kunyura agiye kurangura. [11] Avuga kandi ko iby’uko Bizimungu Kanyamibare atagabanyirizwa ibihano kubera ubugome bukabije yakoranye icyaha, byanemejwe mu manza nyinshi zaciwe n’Urukiko rw’Ikirenga nk’urubanza n° RPA 0050/12/CS rwaciwe ku wa 06/05/2016, haburana Ubushinjacyaha na Pte Ntawurushimana Jean Bosco, ndetse n’imanza zaciwe n’Urukiko rw’Ubujurire nk’urubanza n° RPAA 00178/2020/CA rwaciwe ku wa 28/04/2022, haburana Ubushinjacyaha na Ntezimana Jean Damascène,

UKO URUKIKO RUBIBONA

[12] Ikibazo cy’uko Urukiko rudategetswe kugabanya igihano kabone n’iyo hari impamvu nyoroshyacyaha cyatanzweho umurongo mu rubanza Nº RPAA 0021/14/CS- Nº RPAA 0022/14/CS rwaciwe n’Urukiko rw’Ikirenga ku wa 13/10/2017 haburana Ubushinjacyaha na Uzabakiriho, aho rwasobanuye ko “Urukiko ntirutegetswe kugabanya igihano niyo hari impamvu nyoroshyacyaha, ahubwo rugena igihano mu bushishozi bwarwo rurebye imikorere y’icyaha uregwa akurikiranyweho cyangwa uburyo cyakozwemo”. Uyu murongo ninawo wagiye ushingirwaho mu zindi manza zaciwe n’uru Rukiko nk’urubanza Nº RPAA 00610/2022/CA rwaciwe ku wa 25/09/2024 haburana Ubushinjacyaha na Nahimana Christophe (igika cya 12). [13] Na none ikibazo cy’uko uregwa atagabanya igihano kubera ubugome bukabije yakoranye icyaha cyatanzweho umurongo mu rubanza nº RPAA 0021/14/CS - nº RPAA 0022/14/CS rwaciwe ku wa 13/10/2017 haburana Ubushinjacyaha na Uzabakiriho, Uyu murongo ninawo wagiye

## Page 4

ushingirwaho mu zindi manza zaciwe n’uru Rukiko nk’urubanza Nº RPAA 00837/2024/CA rwaciwe ku wa 18/03/2025 haburana Ubushinjacyaha na Isezerano Sarah. [14] Nk’uko bigaragarira muri bika 17 by’urubanza rujuririrwa, Urukiko Rukuru rwasobanuye ko igifungo cya burundu Bizimungu Kanyamibare yahanishijwe n’Urukiko Rwisumbuye kigumyeho kubera ubugome yakoranye icyaha, kuko yishe umugore we babanaga mu buryo bwemewe n’amategeko amukereye ijosi ntacyo amuhoye, kuko atagaragaje ko uwo mugore yigeze amutuka cyangwa amusagarira kugira ngo bibe byaba intandaro y’icyaha yakoze.

[15] Urukiko rw’Ubujurire rurasanga nk’uko n’Urukiko Rukuru rwabibonye, n’ubwo Bizimungu Kanyamibare akomeje kwemera icyaha akanagisabira imbabazi, atagabanyirizwa ibihano kubera uburemere n’ubugome bukabije yakoranye icyaha cy’ubwicanyi yakigambiriye nk’uko byatanzweho umurongo mu manza zavuzwe haruguru, ubwo Bizimungu Kanyamibare yajyaga kugura icyuma gityaye mu isoko rya Kabuga, agafata igare akagenda akurikiye umugore we wari ugiye kurangura ibicuruzwa, yamusanga Nyarugunga, aho yari ageze, akamukerera ijosi akoresheje icyo cyuma akamwica, yarangiza agahunga. [16] Hashingiwe ku bisobanuwe haruguru, Urukiko rurasanga nta kosa Urukiko Rukuru, Urugereko rwa Rwamagana, rwakoze mu kutagabanyiriza igihano Bizimungu Kanyamibare, bivuze ko ubujurire bwe nta shingiro bufite, bityo hakaba hagumyeho imikirize y’urubana rwajuririwe.

III. ICYEMEZO CY’URUKIKO

[17] Rwemeje ko ubujurire bwa Bizimungu Kanyamibare nta shingiro bufite; [18] Rwemeje ko imikirize y’urubanza nº RPA 00196/2022/HC/KIG rwaciwe n’Urukiko Rukuru, ku wa 01/08/2024, idahindutse; [19] Rwemeje ko igifungo cya burundu Bizimungu Kanyamibare yahanishijwe n’Urukiko Rukuru kigumyeho.