BUCYEDUSENGE N’ABANDI v NIYIGENA MINING COMPANY Ltd

# BUCYEDUSENGE N’ABANDI v NIYIGENA MINING COMPANY Ltd

- Source: Amategeko - Section: Decisions (Judgements) - Date: 2023-02-28 - Case/document no.: RS/INJUST/RC 00015/2022/CA - Collection: Court of Appeal

## Text

## Page 1

BUCYEDUSENGE N’ABANDI v NIYIGENA MINING COMPANY Ltd [Rwanda URUKIKO RW’UBUJURIRE – RS/INJUST/RC 00015/2022/CA (Nyirandabaruta P.J, Munyangeri na Mukandamage J.) 28 Gashyantare 2023] Itegeko ryerekeye imiburanishirize y’imanza z’imbonezamubano – gusimbura umuntu waruhagarariye sosiyete mu rubanza – Iyo umuntu aguze sosiyete ifite imanza iburana mu Nkiko, agomba kugaragaza icyo amasezerano y’ubugure avuga kuri izo manza kugirango yemererwe gusimbura uwaruyihagarariye, iyo bitabaye bityo ntabwo uvuga ko yaguze yemererwa gusimbura mu rubanza uwagurishije. Itegeko rigenga sosiyete z’ubucuruzi – kwandikisha sosiyete – Isosiyete yanditswe mu buryo bukurikije Amategeko, iba ifite ubuzima gatozi bwite n’izina yanditsweho kandi ikomeza gukora kugeza igihe izasibirwa mu gitabo cy’amasosiyete n’ibikorwa by’ubucuruzi. Itegeko N˚ 07/2009 ryo ku wa 27/04/2009 ryerekeye amasosiyete y’ubucuruzi, Ingingo ya 18 Itegeko rigenga sosiyete z’ubucuruzi – kwandikisha sosiyete – sosiyete ikora akazi ko gucukura no gucuruza amabuye y’agaciro – uburenganzira bwo gucukura amabuye y’agaciro butangira igihe umuntu yandikishije sosiyete ye mu kigo cy’igihugu gishinzwe kwandika sosiyete z’ubucuruzi. Incamake y’ikibazo: Uru rubanza rwatangiye Bucyedusenge na bagenzi be bafitanye isano na Habinshuti barega Niyigena Mining Company Ltd mu Rukiko Rwisumbuye rwa Rubavu basaba Urukiko kuyitegeka gutanga indishyi zitandukanye kubera impanuka yabereye mu kirombe kiyo sosiyete mu kirombe gicukurwamo amabuye y’agaciro giherereye mu Mudugudu wa Nyagatama, Akagari ka Vuganyana, Umurenge wa Nyange, Akarere ka Ngororero, Intara y’Iburengerazubua igahitana Habinshuti. Urukiko mu rubanza RC00079/2017/TGI/RBV rwemeje ko ibirego byatanzwe na Bucyedusenge na bagenzi be bifite ishingiro, rutegeka Niyigena Mining Company Ltd guha Bucyedusenge na bagenzi be bafitanye isano na Habinshuti indishyi zitandukanye. Niyigena Mining Company Ltd yajuririye icyo cyemezo mu Rukiko Rukuru, Urugereko rwa Musanze, ivuga ko Urukiko Rwisumbuye rutagombaga kwakira ikirego, kuko harezwe Niyigena Mining Company Ltd, aho kurega Niyigena ku giti cye. Urukiko Rukuru mu rubanza RCA00010/2018/HC/ rwemeje ko ubujurire bwa Niyigena Mining Company Ltd nta shingiro bufite, ko ubujurire bwuririye ku bundi bwatanzwe na Bucyedusenge na bagenzi be bufite ishingiro kuri bimwe, ko imikirize y’urubanza rwaciwe n’Urukiko Rwisumbuye rwa Rubavu ihindutse ku bijyanye n’uburyo zimwe mu ndishyi zagenwe. Niyigena Mining Company Ltd yasubirishijemo urubanza RCA00010/2018/HC/MUS ingingo nshya, ishingiye ku ibaruwa yahawe n’Ikigo gishinzwe Mine, Peteroli na Gazi mu Rwanda nyuma y’icibwa ry’urwo rubanza, icyo kigo kikaba cyasabaga Niyigena Mining Company Ltd kuzuza ibyangombwa kugira ngo yemererwe gukora. Urukiko mu rubanza RS/REV/RC 00001/2020/HC/MUS rwemeje ko icyo kirego cyatanzwe na Niyigena Mining Company Ltd gifite ishingiro, ko ikirego yari yararezwe

## Page 2

kitagombaga kwakirwa, kuko ntaho ihuriye n’impanuka yabaye itaratangira gucukura amabuye y’agaciro mu kirombe cyabereyemo impanuka, rwemeza ko imikirize y’imanza z’abanje iteshwa agaciro, rutegeka Bucyedusenge na bagenzi be gufatanya guha Niyigena Mining Company Ltd amafaranga y’igihembo cya Avoka. Bucyedusenge na bagenzi be basabye Urukiko rw’Ubujurire ko urubanza RS/REV/RC00001/2020/HC/MUS rwaciwe n’Urukiko Rukuru, Urugereko rwa Musanze rusubirishwamo ku mpamvu z’akarengane, Perezida w’Urukiko rw’Ubujurire abona ko rushobora kuba rurimo akarengane, akorera raporo Perezida w’Urukiko rw’Ikirenga, nawe Mu cyemezo n° 201/CJ/2022 yemeje ko urwo rubanza rusubirwamo ku mpamvu z’akarengane, kandi ko rwoherezwa mu Rukiko rw’Ubujurire kugira ngo abe ari rwo ruruburanisha. Uhagarariye Bucyedusenge avuga ko Niyigena Mining Company Ltd ari yo yagombaga kuregwa indishyi z’impanuka, hashingiwe ku bimenyetso birimo inyandikomvugo yakozwe n’Ubugenzacyaha, icyemezo cy’ubucuruzi cyatanzwe na Rwanda Development Board (RDB), n’ibindi. Niyigena we avuga ko Niyigena Mining Company Ltd itakoraga igihe impanuka yabaga, ko yari yanditse gusa muri RDB, itegereje guhabwa ibyangombwa byo gukora, bityo ko hakoraga Niyigena ku giti cye, akaba ari nawe wagombaga kuregwa. Urukiko rw’Ubujurire mu rubanza RS/INJUST/RC 00015/2022/CA, rwemeje ko mu gihe impanuka yabaga ku wa 23/09/2016, Niyigena Mining Company Ltd ariyo yari ifite uburenganzira bwo gucukura amabuye y’agaciro mu kirombe cyabereyemo impanuka u kuko ari yo yabiherewe uburenganzira bugaragazwa n’icyemezo cyitwa “Full registration information of domestic company code 103040523” cyatanzwe na RDB. Bityo, Urukiko rwemeje ko kuba Urukiko Rukuru, Urugereko rwa Musanze rwaremeje ko Niyigena ari we wagombaga kuregwa indishyi zikomoka ku mpanuka yabereye mu kirombe cyasobanuwe haruguru, aho kuba Niyigena Mining Company Ltd bigaragaramo akarengane. Bityo ko, urubanza rusubirishwamo ku mpamvu z’akarengane rugomba guhinduka mu ngingo zarwo zose, hakagumaho imikirize y’urubanza RCA00010/2018/HC/MUS rwategetse Niyigena Mining Company Ltd kubaha indishyi. Urukiko rwanategetse kandi Niyigena Mining Company Ltd kwishyura Bucyedusenge n’abagenzi be amafaranga y’ikurikiranarubanza n’igihembo cya Avoka yagenwe mu bushishozi bw’Urukiko. Incamake y’icyemezo: 1. Iyo umuntu aguze sosiyete ifite imanza iburana mu Nkiko, agomba kugaragaza icyo amasezerano y’ubugure avuga kuri izo manza kugirango yemererwe gusimbura uwaruyihagarariye, iyo bitabaye bityo ntabwo uvuga ko yaguze yemererwa gusimbura mu rubanza uwagurishije. 2.Isosiyete yanditswe mu buryo bukurikije Amategeko, iba ifite ubuzima gatozi bwite n’izina yanditsweho kandi ikomeza gukora kugeza igihe izasibirwa mu gitabo cy’amasosiyete n’ibikorwa by’ubucuruzi. 3.Uruhushya rwo kurambagiza no gushakashaka amabuye y’agaciro rutangwa na Minisitiri ufite mines mu nshingano kandi ntiruha uburenganzira uwarusabye bwo gucukura amabuye y’agaciro.

## Page 3

Bityo, uburenganzira bwo gucukura amabuye y’agaciro butangira igihe umuntu yandikishije sosiyete ye mu kigo cy’igihugu gishinzwe kwandika sosiyete z’ubucuruzi. 4.Indishyi z’ikurikirana rubanza n’igihembo cya Avoka kigenwa mu bushishozi bw’Urukiko. Gusubirishamo Urubanza ku mpamvu z’akarengane bifite ishingiro. Amategeko yashingiweho. Itegeko N˚ 30/2018 ryo ku wa 02/06/2018 rigena ububasha bw’inkiko, ingingo ya 63 Itegeko N˚ 07/2009 ryo ku wa 27/04/2009 ryerekeye amasosiyete y’ubucuruzi, Ingingo ya 4, 17,18 Iteka rya Minisitiri N˚ 0247/601MINIRENA/2012 ryo ku wa 24/08/2012, Ingigo ya 3, 6 Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi Ingingo ya 111 Nta manza zifashijwe. Urubanza I. IMITERERE Y’URUBANZA [1] Ku wa 23/09/2016, mu kirombe sosiyete Niyigena Mining Company Ltd icukuramo amabuye y’agaciro habereye impanuka, ihitana abakozi bayo batatu barimo Habinshuti Vincent, maze abafitanye isano ya hafi na nyakwigendera baregera Urukiko Rwisumbuye rwa Rubavu basaba indishyi zinyuranye. [2] Mu rubanza RC00079/2017/TGI/RBV rwaciwe ku wa 31/10/2017, Urukiko Rwisumbuye rwa Rubavu rwemeje ko ibirego byatanzwe na Bucyedusenge Consolée na bagenzi be bifite ishingiro, rutegeka Niyigena Mining Company Ltd guha Bucyedusenge Consolée, umugore wa nyakwigendera Habinshuti Vincent, indishyi mbangamirabukungu zingana na 1.500.000Frw, indishyi z’akababaro zingana na 500.000Frw, indishyi zijyanye no gushyingura zingana na 200.000Frw, amafaranga y’igihembo cya Avoka angana na 500.000Frw, n’amafaranga y’ikurikiranarubanza angana na 100.000Frw, yose hamwe akaba 2.800. 000Frw. [3] Urukiko Rwisumbuye rwa Rubavu rwategetse kandi Niyigena Mining Company Ltd, guha Mukeshimana Goretti na Tuyizere Alodie, abana ba nyakwigendera Habinshuti Vincent, buri wese 200.000Frw y’indishyi z’akababaro, guha Gakwaya Boniface na Mukarubibi Bonifrida, ababyeyi ba nyakwigendera, buri wese 100.000Frw y’indishyi z’akababaro, guha Mukamurara Marie Chantal, Uwamahoro Claudine, Mukamurigo Sylvanie na Mukakagina Elisabeth, abavandimwe ba nyakwigendera, buri wese indishyi z’akababaro zingana na 100.000Frw, no gusubiza buri wese 50.000Frw y’ingwate y’amagarama yatanze arega.

## Page 4

[4] Niyigena Mining Company Ltd yajuririye icyo cyemezo mu Rukiko Rukuru, Urugereko rwa Musanze, ivuga ko Urukiko Rwisumbuye rwa Rubavu rutagombaga kwakira ikirego, kuko harezwe Niyigena Mining Company Ltd, aho kurega Niyigena Innocent ku giti cye. [5] Mu rubanza RCA00010/2018/HC/MUS rwaciwe ku wa 10/12/2018, Urukiko Rukuru, Urugereko rwa Musanze, rwemeje ko ubujurire bwa Niyigena Mining Company Ltd nta shingiro bufite, ko ubujurire bwuririye ku bundi bwatanzwe na Bucyedusenge Consolée na bagenzi be bufite ishingiro kuri bimwe, ko imikirize y’urubanza RC00079/2017/TGI/RBV rwaciwe n’Urukiko Rwisumbuye rwa Rubavu ku wa 31/10/2017 ihindutse ku bijyanye n’uburyo zimwe mu ndishyi zagenwe, rutegeka Niyigena Mining Company Ltd guha Bucyedusenge Consolée indishyi z’ibangamirabukungu zingana na 6.518.343Frw, guha Bucyedusenge Consolée, Mukeshimana Goretti, Tuyizere Alodie, Gakwaya Boniface, Mukarubibi Bonifrida, Mukamurara Marie Chantal, Uwamahoro Claudine, Mukamurigo Sylvanie na Mukakagina Elisabeth indishyi z’ibangamirwa ku muco zingana na 5.670.000Frw, no guha Bucyedusenge Consolée, Mukeshimana Goretti, Tuyizere Alodie, Gakwaya Boniface, Mukarubibi Bonifrida, Mukamurara Marie Chantal, Uwamahoro Claudine, Mukamurigo Sylvanie na Mukakagina Elizabeth 1.050.000Frw y’ikurikiranarubanza n’igihembo cya Avoka. [6] Ku wa 10/02/2020, Niyigena Mining Company Ltd yasubirishijemo urubanza n˚ RCA 00010/2018/HC/MUS ingingo nshya, ikirego cyandikwa kuri RS/REV/RC 00001/2020/HC/MUS, ishingiye ku ibaruwa yahawe n’Ikigo gishinzwe Mine, Peteroli na Gazi mu Rwanda nyuma y’icibwa ry’urwo rubanza, muri iyo baruwa, icyo kigo kikaba cyarasabaga Niyigena Mining Company Ltd kuzuza ibyangombwa kugira ngo yemererwe gukora. [7] Mu rubanza RS/REV/RC 00001/2020/HC/MUS rwaciwe ku wa 11/11/2021, Urukiko Rukuru, Urugereko rwa Musanze, rwemeje ko icyo kirego cyatanzwe na Niyigena Mining Company Ltd gifite ishingiro, ko ikirego yari yararezwe kitagombaga kwakirwa, kuko ntaho ihuriye n’impanuka yabaye itaratangira gucukura amabuye y’agaciro, ko imikirize y’urubanza RCA00010/2018/HC/MUS ndetse n’urubanza RC00079/2017/TGI/RBV iteshwa agaciro, rutegeka Bucyedusenge Consolée na bagenzi be gufatanya guha Niyigena Mining Company Ltd 1.000.000Frw y’igihembo cya Avoka, no kuyisubiza 80.000Frw y’ingwate y’amagarama yatanze ijurira inasubirishamo urubanza ingingo nshya. [8] Bucyedusenge Consolée na bagenzi be basabye Urukiko rw’Ubujurire ko urubanza RS/REV/RC 00001/2020/HC/MUS rwaciwe n’Urukiko Rukuru, Urugereko rwa Musanze ku wa 11/11/2021 rusubirishwamo ku mpamvu z’akarengane, Perezida w’Urukiko rw’Ubujurire abona ko rushobora kuba rurimo akarengane, akorera raporo Perezida w’Urukiko rw’Ikirenga. Mu cyemezo n° 201/CJ/2022 cyo ku wa 29/09/2022, Perezida w’Urukiko rw’Ikirenga yemeje ko urwo rubanza rusubirwamo ku mpamvu z’akarengane, kandi ko rwoherezwa mu Rukiko rw’Ubujurire kugira ngo abe ari rwo ruruburanisha, ikirego cyandikwa kuri RS/INJUST/RC 00015/2022/CA. [9] Urubanza rwaburanishijwe mu ruhame ku wa 08/02/2023, Bucyedusenge Consolée na bagenzi be bahagarariwe na Me Sayinzoga Jean Pierre afatanyije na Me Nsabiyumva Cyubahiro Jean Damascēne, Niyigena Mining Company Ltd ihagarariwe na Ntigashira Patrick, avuga ko ari we usigaye ari umuyobozi wayo, yunganiwe na Me Mukamusoni Antoinette.

## Page 5

[10] Ntigashira Patrick yasabwe gusobanura uburyo yasimbuye Niyigena Innocent muri sosiyete yabaga ahagarariye mu rubanza, avuga ko yaguze imigabane yari iya Niyigena Innocent mu mwaka wa 2018, asabwe kugaragaza amasezerano y’ubugure bw’iyo sosiyete yagiranye na Niyigena Innocent kugira ngo hamenyekane niba harimo ingingo irebana n’imanza Niyigena Mining Company Ltd yari ifite mu nkiko, asubiza ko nta masezerano y’ubugure afite, ko bujurije impapuro muri RDB gusa, ko ariko agura iyo sosiyete yari azi ko hari imanza yaburanaga mu nkiko, akaba atarazizunguye, ahubwo azaburana imanza za sosiyete zizavuka nyuma yo kuyigura. [11] Nyuma yo kumva ibisobanuro bya Ntigashira Patrick, Urukiko rwasanze mu rwego rw’amategeko, Ntigashira Patrick nta bubasha afite bwo guhagararira Niyigena Mining Company Ltd, hanashingiwe ku biteganywa n’ingingo ya 63 y’Itegeko N˚ 30/2018 ryo ku wa 02/06/2018 rigena ububasha bw’inkiko1, Me Mukamusoni Antoinette avuga ko atakomeza kuba mu rubanza rwa Niyigena Mining Company Ltd, kubera ko yari arurimo yunganira Ntigashira Patrick kuko ari we wenyine yari azi. Iburanisha ryimuriwe ku wa 14/02/2023 kugira ngo Niyigena Mining Company Ltd izitabe Urukiko ihagarariwe mu buryo bukurikije amategeko. [12] Ku itariki ya 14/02/2023, urubanza rwaburanishijwe mu ruhame, Bucyedusenge Consolée na bagenzi be bahagarariwe na Me Sayinzoga Jean Pierre, afatanyije na Me Nsabiyumva Cyubahiro Jean Damascēne na Me Muhikira Jean Claude, Niyigena Mining Company Ltd ihagarariwe na Niyigena Innocent, yunganiwe na Me Nduwamungu Jean Vianney afatanyije na Me Kadage Laban, abunganizi ba Niyigena Innocent basaba ko inyandiko yashyizwe muri dosiye y’urubanza yiswe ”Note de plaidoirie” ifatwa nk’umwanzuro wa Niyigena Mining Company Ltd. II. IBIBAZO BIGIZE URUBANZA N’ISESENGURA RYABYO 1.Kumenya uwagombaga kuregwa indishyi z’impanuka yabereye mu kirombe cyo mu Midugudu ya Nyagatama mu Kagari ka Vuganyana hagati ya Niyigena Mining Company Ltd na Niyigena Innocent [13] Me Nsabiyumva Cyubahiro Jean Damascēne, uhagarariye Bucyedusenge Consolée na bagenzi be, avuga ko Niyigena Mining Company Ltd ari yo yagombaga kuregwa indishyi z’impanuka, hashingiwe ku bimenyetso birimo inyandikomvugo yakozwe n’Ubugenzacyaha impanuka ikimara kuba, icyemezo cy’ubucuruzi cyatanzwe na Rwanda Development Board (RDB), n’ibaruwa yo ku wa 06/07/2018 RDB yandikiye Me Sayinzoga Jean Pierre, isubiza ibaruwa ye yo ku wa 25/06/2018, imumenyesha ko nta sosiyete yitwa Niyigena Innocent bafite mu bitabo by’Umwanditsi Mukuru, ko ahubwo bafite sosiyete yitwa Niyigena Mining Company Ltd, umunyamigabane wayo 100% akaba ari Niyigena Innocent, iyo sosiyete ikaba yaranditswe ku wa 18/07/2013, igomba gukorera mu Murenge wa Nyange, mu Karere ka Ngororero. Avuga ko hanashingirwa ku mpapuro z’imenyekanisha n’iyishyurwa ry’umusoro ku nyungu zo guhera muri 2013 kugeza muri 2019, zakorwaga mu izina rya Niyigena Mining Company Ltd, ikoresheje nomero y’umusoreshwa 103040523, kuba yari itunze ipatanti nk’ikorera mu Karere ka Ngororero, na raporo y’iperereza Urukiko Rukuru, Urugereko rwa Musanze rwakoreye mu Kigo cy’Imisoro n’Amahoro (RRA) no muri RDB. 1 Ingingo ya 63 y’itegeko n˚ 30/2018 ryo ku wa 02/06/2018 rigena ububasha bw’inkiko iteganya ko” Iyo Urukiko rw’Ikirenga cyangwa urundi rukiko Perezida w’Urukiko rw’Ikirenga agena rushyikirijwe urubanza rusabirwa gusubirwamo ku mpamvu z’akarengane, rurusuzuma mu mizi bundi bushya, abarubayemo ababuranyi bose bahamagajwe”.

## Page 6

[14] Ku birebana no kuba Niyigena Mining Company Ltd ivuga ko igihe impanuka y’ikirombe yabaga ku wa 23/09/2016, Niyigena Innocent yakoraga ku giti cye, Me Sayinzoga Jean Pierre asaba urukiko kutabiha ishingiro, kuko idasobanura ukuntu ibigo bibiri (Niyigena Mining Company Ltd na Niyigena Innocent), byaba ibya Niyigena Innocent nk’umuntu umwe, bigahurira mu kirombe kimwe kiri mu Mudugudu wa Nyagatama mu bihe bimwe, bikanakoresha abakozi bamwe mu mirimo imwe. [15] Me Sayinzoga Jean Pierre asobanura ko inyandikomvugo y’impanuka, igaragaza ko iyo mpanuka yabereye mu kirombe gikoreramo Niyigena Mining Company Ltd, ko ari we wasabye ko inyandikomvugo y’impanuka ikosorwa, kubera ko mu ya mbere hari handitswemo ko impanuka yabereye mu kirombe cya sosiyete yitwa Niyigena Innocent Mining Company Ltd, kandi mu nyandiko bari bavanye muri RDB, izina Innocent ritariho, ariko ko Umugenzacyaha yanze kuyikosora, avuga ko sosiyete yitwa Niyigena Mining Company Ltd itabaho, ahubwo habaho iyitwa Niyigena Innocent, biba ngombwa ko yandikira RDB ayibaza niba habaho sosiyete yitwa Niyigena Innocent, imusubiza ko iyo sosiyete ntayo ibaho, ahubwo ko hari iyitwa Niyigena Mining Company Ltd kuva ku wa 18/07/2013. [16] Ku birebana n’uburyo inyandiko y’imenyekanisha ry’umusoro ku nyungu wa 2014 yabonetse n’uwayitanze, Me Sayinzoga Jean Pierre avuga ko iyo nyandiko yatanzwe n’umukozi wa RRA ariko yanga kugaragaza imyirondoro ye, kubera ko yari ayitanze mu buryo butemewe n’amategeko, ko abo ahagarariye bayitanze mu Rukiko bagira ngo Urukiko Rukuru, Urugereko rwa Musanze ruzikorere iperereza. Avuga ko iyo nyandiko bari bayisabye muri RRA binyuze mu nzira zemewe, RRA yanga kuyibaha, bituma uwo muburanyi ayishakisha mu bundi buryo. Avuga ko ku bwe yumva ibikubiye muri iyo nyandiko byafatwa nk’ukuri, uru Rukiko rwashidikanya ku kuri kwayo, na rwo rukaba rwakwikorera iperereza. [17] Me Muhikira Jean Claude avuga ko icyemezo cya RDB kigaragaza ko Niyigena Mining Company Ltd yabayeho kuva ku wa 18/07/2013, ifite umunyamigabane umwe witwa Niyigena Innocent, ari na we muyobozi wayo, kandi ko n’inyandiko za RRA zigaragaza ko Niyigena Mining Company Ltd ari yo yari umusoreshwa wayo. [18] Niyigena Innocent avuga ko Habinshuti Vincent, Munyaneza Valens na Ntibiringirwa Védaste baguye mu mpanuka y’ikirombe yakoreragamo ku mazina ye bwite, akaba yarakoreraga mu Midugudu ya Nyagatama na Mbobo, mu Kagari ka Vuganyana, mu Murenge wa Nyange, Akarere ka Ngororero, Intara y’Iburengerazuba, ndetse ko yari yarabafatiye ubwishingizi muri sosiyete y’ubwishingizi yitwaga CORAR yahindutse SANLAM Plc, ko impanuka ikimara kuba yabimenyesheje umwishingizi we, imiryango imwe igahabwa indishyi, indi igahitamo kwiyambaza inkiko ivuga ko ari Niyigena Mining Company Ltd yabakoreshaga, ko kugeza uyu munsi, uwo mwishingizi yandika amabaruwa asaba abagize umuryango wa Habinshuti Vincent na Munyaneza Valens kumugana bagahabwa impozamarira. [19] Niyigena Innocent akomeza avuga ko Niyigena Mining Company Ltd itakoraga igihe impanuka yabaga, ko yari yanditse gusa muri RDB, itegereje guhabwa ibyangombwa byo gucukura amabuye y’agaciro, ko ukurikije imikorere y’ubucukuzi bw’amabuye y’agaciro, sosiyete idashobora gucukura ayo mabuye nta burenganzira ibifitiye, kuko idashobora kuyabonera isoko, kandi ko ku kirombe haba hari umukozi w’Ikigo Gishinzwe Mine, Peteroli na Gazi mu Rwanda ushyira ibimenyetso kuri ayo mabuye y’agaciro; ko iyo abakozi bamaze gucukura amabuye y’agaciro,

## Page 7

nimugoroba bayasukura, umukozi w’icyo kigo agashyiraho ibimenyetso, akayohereza i Kigali, bityo ko kubera izo nzira zigomba kunyurwamo, hakoraga Niyigena Innocent ku giti cye, ndetse ko mu ibaruwa Rwanda Mining Board (RMB) yandikiye Me Sayinzoga Jean Pierre, yamusobanuriye ko mu gihe Niyigena Mining Company Ltd itarahabwa uburenganzira bwo gucukura amabuye y’agaciro, Niyigena Innocent azaba akora ku giti cye nka Niyigena Innocent. [20] Niyigena Innocent avuga na none ko amaze kumenya ko Bucyedusenge Consolée na bagenzi be bagaragaje inyandiko z’imenyesha ry’umusoro ku nyungu, atamenye uwabikoze, ko ariko ku wa 30/11/2022 yatanze ikirego cy’inyandiko mpimbano muri Rwanda Investigation Bureau (RIB) ku cyicaro gikuru, arega Me Sayinzoga Jean Pierre n’abandi bireba, ko yaje kumva ko Me Sayinzoga Jean Pierre n’uwitwa Didace basobanuye ko izo nyandiko bazikuye muri serivisi z’Irembo, akaba atazi abantu binjira muri konti za sosiyete. Avuga ko na sosiyete Niyigena Mining Company Ltd yatanze ikirego muri RIB mu Karere ka Ngororero, irega Me Sayinzoga Jean Pierre, akaba atazi aho dosiye z’ibyo birego byombi zigeze. Asaba ko izo nyandiko z’imenyekanisha ry’imisoro zitahabwa agaciro, kubera ko habayeho kwinjirira ikoranabuhanga rya konti ya sosiyete, na cyane cyane ko izo nyandiko zitagaragaza ingano y’umusaruro n’ingano y’umusoro wakatwaga, ntihagaragazwe aho umusoro wishyuriwe, nyamara we nka Niyigena Innocent ku giti cye, iyo yajyaga kumenyekanisha umusoro ku nyungu, babanzaga kumukata 4% y’imisoro. [21] Niyigena Innocent avuga kandi ko aho yagurishirizaga amabuye y’agaciro ari ho yakura ibimenyetso bigaragaza ko yishyuraga imisoro ku giti cye kugeza mu mwaka wa 2019, ko Ikigo Gishinzwe Mine, Peteroli na Gazi mu Rwanda ari cyo cyamufasha kubona ibyo bimenyetso. [22] Me Kadage Laban avuga ko kuba Umugenzacyaha wakoze inyandikomvugo y’impanuka yarashyizemo Niyigena Mining Company Ltd, atari byo biha sosiyete uburenganzira bwo gukora, kandi ko kuba sosiyete yanditswe muri RDB, na byo bidahita biyiha uburenganzira bwo gutangira gukora. Asobanura ko sosiyete ifatwa nk’iriho igihe imaze guhabwa icyemezo cyo kwandikwa (certificat d’enregistrement), ko mu mwaka wa 2013, sosiyete Niyigena Mining Company Ltd yariho, ariko itarahabwa ibyangombwa biyemerera gukora. [23] Akomeza avuga ko inyandiko z’imenyekanisha z’umusoro ku nyungu bivugwa ko ryakorwaga na Niyigena Mining Company Ltd atari ikimenyetso cyihagije, keretse byibuze hagaragajwe ibimenyetso byemeza ko uwo musoro wishyuwe. Yemera ko n˚ 103040523 y’umusoreshwa yagaragajwe ari iya sosiyete Niyigena Mining Company Ltd. [24] Me Nduwamungu Jean Vianney avuga ko sosiyete ivuka iyo imaze kwandikwa mu bitabo by’amasosiyete muri RDB igahabwa n’icyemezo cyo kwandikwa, ko Niyigena Mining Company Ltd yanditse muri RDB kuva mu mwaka wa 2013, ariko ko itashoboraga kujya gucukura amabuye y’agaciro idafite uburenganzira bwo kuyacukura ihabwa n’Ikigo Gishinzwe Mine, Peteroli na Gazi mu Rwanda, nk’uko biteganywa n’ingingo ya 112 y’Itegeko N˚ 37/2008 ryo ku wa 11/08/2008 rigenga ubucukuzi bw’amabuye y’agaciro na kariyeri mu Rwanda; ko ibaruwa yanditswe n’ubuyobozi bw’Akagari ka Vuganyana ku wa 19/04/2018, ivuguruza amakuru yatanzwe impanuka ikimara kuba 2 Igika cya mbere n’icya kabiri by’iyi ngingo y’itegeko iteganya ko” [……] imirimo yo kurambagiza inganzo, cyangwa gukora ubushakashatsi bugamije kuvumbura amabuye y’agaciro cyangwa ya kariyeri ntishobora gutangira uyikora atarabibonera uruhushya. Gucukura amabuye y’agaciro cyangwa ya kariyeri bishoboka gusa iyo ubikora abifitiye uburenganzira.

## Page 8

ku wa 23/09/2016 y’uko uwacukuraga amabuye mu kirombe cya Vuganyana, mu Kagari ka Nyagatama ari Niyigena Mining Company Ltd ikagaragaza ko uwahacukuraga amabuye y’agaciro mu gihe impanuka yabaga ari Niyigena Innocent, ko inyandiko y’ako Kagari yo ku wa 27/04/2017, n’iyo ku wa 05/10/2018, ndetse n’iyanditswe n’Ikigo Gishinzwe Mine, Peteroli na Gazi mu Rwanda, zose zivuguruza izatanzwe n’abarega. [25] Me Nduwamungu Jean Vianney akomeza avuga ko icyemezo cyo kwandikwa kwa sosiyete kidahwanye n’uburenganzira bwo gukora ubucukuzi bw’amabuye y’agaciro, ko mu gihe cy’impanuka, uwari ufite ubwo burenganzira ari Niyigena Innocent ku giti cye, kandi ko ari na we wafashe ubwishingizi bw’abakozi be ku giti cye, mu gihe impanuka yabaga hakorwa inyandikomvugo yayo, uwayanditse akora ikosa ryo kwandika ko ikirombe cyabereyemo impanuka cyakoreshwaga na Niyigena Mining Company Ltd, nyuma haza gukorwa inyandikomvugo y’inyongera ikosora iya mbere, ivuga noneho ko ikirombe cyakoreshwaga na Niyigena Innocent ku giti cye, iyo nyandikomvugo ya kabiri ikaba yarakozwe ku wa 04/06/2018, mu barega akaba nta wayiregeye ayikemanga. [26] Ku kibazo cy’uko abarega bavuga ko kuba Niyigena Mining Company Ltd yaratangaga umusoro w’ipatanti ndetse n’imenyekanisha ry’umusoro ku nyungu, byumvikanisha ko yakoraga, Me Nduwamungu Jean Vianney avuga ko atari ko biri, kubera ko iyo umaze kwiyandikisha muri RDB, wakora utakora, uba ugomba kwishyura umusoro w’ipatanti wa buri mwaka, uwo musoro ukaba wishyurwa Akarere, kandi ko kugira ngo ukurirweho kwishyura uwo musoro, bisaba ko uwiyandikishije muri RDB abanza kwisibisha. Avuga ko Niyigena Mining Company Ltd itigeze ikora imenyekanisha (déclaration) ry’umusoro ku nyungu w’umwaka wa 2014 muri RRA, ko kubera inyandiko zagaragajwe, yatanze ikirego cy’inyandiko mpimbano ku rwego rw’Igihugu rushinzwe iperereza. Avuga ko uruhande rw’uwo yunganira rutemera inyandiko z’imenyekanisha ry’umusoro ku nyungu zatanzwe n’abarega bavuga ko Niyigena Mining Company Ltd ari yo yazikoresheje, kuko ruzifata nk’inyandiko mpimbano kubera ko rutazi uburyo zabonetse. Uko Urukiko rubibona [27] Impaka ziri muri uru rubanza zishingiye ku kumenya uwagombaga kuregwa indishyi zikomoka ku mpanuka yabereye mu kirombe gicukurwamo amabuye y’agaciro giherereye mu Mudugudu wa Nyagatama, Akagari ka Vuganyana, Umurenge wa Nyange, Akarere ka Ngororero, Intara y’Iburengerazuba hagati ya Niyigena Mining Company Ltd na Niyigena Innocent harebwe, mu buryo buteganywa n’amategeko, uwari wemerewe kuhakorera. [28] Ingingo ya 4 y’Itegeko N˚ 07/2009 ryo ku wa 27/04/2009 ryerekeye amasosiyete y’ubucuruzi, ryakoreshwaga igihe impanuka yo ku wa 23/09/2016 yabaga, iteganya ko” Kwandikisha isosiyete mu biro by’Umwanditsi Mukuru ni itegeko”. Ingingo ya 17, agace ka 2˚ y’iryo tegeko iteganya ko” Icyemezo cy’iyandikisha ry’isosiyete kiba ari ikimenyetso kigaragaza ko isosiyete ishinzwe uhereye ku itariki icyemezo cyanditsweho”, naho ingingo ya 18 y’itegeko rimaze kuvugwa igateganya ko” Isosiyete yanditswe hakurikijwe iri tegeko, iba ifite ubuzimagatozi bwite n’izina yanditsweho kandi ikomeza gukora kugeza igihe izasibirwa mu gitabo cy’amasosiyete n’ibikorwa by’ubucuruzi”.

## Page 9

[29] Mu gufata umwanzuro ku isesengura ry’ikibazo cyo kumenya niba haragombaga kuregwa Niyigena Innocent ku giti cye cyangwa Niyigena Mining Company Ltd, Urukiko Rukuru, Urugereko rwa Musanze, mu rubanza RS/REV/RC 00001/2020/HC/MUS rusubirwamo ku mpamvu z’akarengane, rwasanze ababuranyi bemeranya ko Niyigena Mining Company Ltd yabayeho guhera ku wa 18/07/2013, ubwo yandikwaga n’ikigo gishinzwe kwandika amasosiyete y’ubucuruzi nk’uko byagaragajwe n’inyandiko yitwa “Certificate of Domestic Company Registration” cyatanzwe na RDB ku wa 28/03/2017, rusanga Niyigena Innocent ari we wagombaga kuregwa, kuko igihe impanuka yabaga ku wa 23/09/2016, ari we wacukuraga amabuye y’agaciro mu kirombe cyavuzwe haruguru, aho kuba Niyigena Mining Company Ltd, kubera ko icyo gihe yari itarahabwa uburenganzira bwo gucukura amabuye y’agaciro, kuko n’ubwo yari yanditse muri RDB nka sosiyete y’ubucukuzi bw’amabuye y’agaciro, yagombaga kubanza guhabwa uburenganzira bwo gucukura, ikaba yarabuhawe ku wa 23/10/2020. Rushingiye ku ngingo ya 1583, igika cya mbere y’Itegeko No 22/2018 ryo ku wa 29/04/2018, rwategetse ko imanza zaciwe mbere zose zivanyweho ubifitemo inyungu akaba yatanga ikirego bundi bushya. [30] Mu bimenyetso biri muri dosiye y’urubanza haririmo Iteka rya Minisitiri N˚ 0247/601MINIRENA/2012 ryo ku wa 24/08/2012, ryemereye Niyigena Innocent uruhushya rwo kurambagiza amabuye y’agaciro ya koluta na gasegereti ari mu mbago ya Nyagatama iri mu Kagari ka Vuganyana, mu Murenge wa Nyange, mu Karere ka Ngororero, Intara y’Iburengerazuba. Ingingo ya 3, igika cya mbere y’iryo Teka igaragaza ko uhawe urwo ruhushya atemerewe gukora imirimo y’ubushakashatsi cyangwa y’ubucukuzi bw’amabuye y’agaciro, naho ingingo yayo ya 6 igateganya ko urwo ruhushya rwagombaga kumara imyaka ine ibarwa kuva ku munsi rwatangiweho kandi ko rwashoboraga kongerwaho indi myaka ine inshuro imwe iyo uwaruhawe yashoboye kugaragaza ko yakoze imirimo yari iteganyijwe kandi bikaba ari ngombwa ko yongererwa igihe. [31] Nyuma yo kubona urwo ruhushya rwo gushakashaka amabuye y’agaciro, ku wa 18/07/2013, Niyigena innocent yandikishije sosiyete yitwa Niyigena Mining Company Ltd abereye umunyamigabane 100%, ikorera Nyange, Ngororero, Iburengerazuba, Rwanda. [32] Urukiko rurasanga igihe impanuka yabaga ku wa 23/09/2016, Niyigena Mining Company Ltd ariyo yari ifite uburenganzira bwo gucukura amabuye y’agaciro mu kirombe cyavuzwe haruguru kuko ari yo yabiherewe uburenganzira bugaragazwa n’icyemezo cyitwa “Full registration information of domestic company code 103040523” cyatanzwe na RDB kuwa 28/03/2017 cyerekana ko sosiyete Niyigena Mining Company Ltd yashinzwe ku wa 18/07/2013 na Niyigena Innocent nk’umunyamigabane umwe rukumbi akaba n’Umuyobozi w’Inama y’ubutegetsi, ikorera Nyange – Ngororero – Iburengerazuba, ikora ibikorwa bijyanye na Mine na Kariyeri. [33] Urukiko rw’Ubujurire rurasanga ibyo Urukiko Rukuru, Urugereko rwa Musanze rwashingiyeho rwemeza ko Niyigena Innocent ari we wagombaga kuregwa indishyi zikomoka ku mpanuka yabereye mu kirombe cyavuzwe haruguru ngo kuko ari we wakoreraga aho hantu ku giti cye nta shingiro bifite, kuko nk’uko byagaragajwe haruguru, Niyigena Mining Company Ltd ariyo yari 3Iyo Urukiko rwajuririwe rusanze urubanza rwararegewe mu rwego rwa mbere mu buryo budakurikije amategeko cyangwa rwararegeye urukiko rudafite ububasha, nyamara urwo rukiko rukaba rwarafashe icyemezo cyo kurwakira kandi rutaragombaga kurwakira, urukiko rwajuririrwe rwakira ubwo bujurire, rukagaragaza ko urwo rubanza rwajuririwe rwari rwararegewe urukiko rwa mbere mu buryo bunyuranyije n’amategeko, rugatesha agaciro ibyemezo byose byashingiye kuri iryo kosa; ubifitemo inyungu akaba yakongera agatanga ikirego bundi bushya.

## Page 10

ifite ubwo burenganzira nka sosiyete yanditswe mu buryo bukurikije ingingo z’Itegeko zavuzwe haruguru, ikaba rero ari yo yagombaga kuregwa indishyi zikomoka kuri iyi mpanuka. Iby’uko kandi Niyigena Innocent nta burenganzira yari afite bwo gucukura amabuye y’agaciro ahantu havuzwe byanasobanuwe mu ibaruwa yo ku wa 06/07/2018 Umuyobozi Mukuru wa RDB yandikiye Me Sayinzoga Jean Pierre amumenyesha ko ntaho Niyigena Innocent agaragara mu bitabo by’Umwanditsi Mukuru nk’umucuruzi ukora ubucukuzi bw’amabuye y’agaciro. [34] Urukiko rw’Ubujurire rurasanga kandi ibyo Urukiko Rukuru, Urugereko rwa Musanze rwashingiyeho rwabwiwe n’umukozi w’Ikigo cy’Igihugu gishinzwe Mine, Gazi na Peteroli ko Niyigena Innocent yari yemerewe gukora ngo n’ubwo icyemezo cyamuhaga ubwo burenganzira cyari cyararangiye nta shingiro bifite, kuko nk’uko byagaragajwe haruguru, Iteka rya Minisitiri No 0247/MINIRENA/2012 ryavuzwe haruguru ryamuhaga uruhushya rwo kurambagiza ritamuhaga uburenganzira bwo gushakashaka cyangwa gucukura, uburyo abunganizi ba Niyigena Innocent bavuga yakoragamo bwemejwe n’umukozi w’icyo Kigo bukaba bunyuranyije n’amategeko. [35] Urukiko rurasanga rero kuba Urukiko Rukuru, Urugereko rwa Musanze rwaremeje ko Niyigena Innocent ari we wagombaga kuregwa indishyi zavuzwe haruguru aho kuba Niyigena Mining Company Ltd rukabishingiraho ruvanaho imanza zose zari zaraciwe mbere bigaragaramo akarengane. 2.Kumenya niba Niyigena Mining Company Ltd ihagarariwe na Niyigena Innocent yategekwa Kwishyura abarega indishyi yategetswe mu rubanza RCA00010/2018/HC/MUS [36] Me Sayinzoga Jean Pierre, uhagarariye Bucyedusenge Consolée na bagenzi be, avuga ko Urukiko Rukuru, Urugereko rwa Musanze rwatesheje agaciro urubanza RCA00010/2018/HC/MUS n’urubanza RC00079/2017/TGI/RBV, rushingiye gusa ku buhamya budafite ishingiro, rwirengagije ibimenyetso byatanzwe n’abo ahagarariye bishingiye ku nyandikomvaho zatangiweho imisoro, iz’ipatanti n’ibyemezo by’ubucuruzi bya RDB, akaba asaba Urukiko rw’Ubujurire gutesha agaciro urubanza RS/REV/RC00001/2020/HC/MUS rwasubirishijemo urubanza RCA00010/2018/HC/MUS ingingo nshya, no kwemeza ko urubanza RCA00010/2018/HC/MUS rugumanye agaciro karwo, abari bararugenewemo indishyi bakazihabwa. [37] Me Nduwamungu Jean Vianney avuga ko Niyigena Mining Company Ltd itatanga izo ndishyi kuko nta ho ihuriye n’impanuka yabaye muri 2016 kubera ko yari itaratangira imirimo yo gucukura amabuye y’agaciro, bityo ko atari yo yagombaga kuregwa. Uko Urukiko rubibona [38] Urukiko rw’Ubujurire rurasanga, kuba rwagaragaje ko Bucyedusenge Consolée na bagenzi be barenganye mu rubanza RS/REV/RC 00001/2020/HC/MUS rwaciwe n’Urukiko Rukuru, Urugereko rwa Musanze ku wa 11/11/2021, urwo rubanza rugomba guhinduka mu ngingo zarwo zose, hakagumaho imikirize y’urubanza RCA00010/2018/HC/MUS rwaciwe n’urwo Rukiko ku wa 10/12/2018 rwategetse Niyigena Mining Company Ltd kubaha indishyi. 3.Ku byerekeye amafaranga y’igihembo cya Avoka n’ay’ikurikiranarubanza yasabwe muri uru rubanza

## Page 11

[39] Me Sayinzoga Jean Pierre, uhagarariye Bucyedusenge Consolée na bagenzi be, asaba Urukiko rw’Ubujurire gutegeka Niyigena Mining Company Ltd guha abo ahagarariye 5.000.000Frw akubiyemo 1.500.000Frw yishyuwe Abavoka batatu baburanye urubanza rwo gusubirishamo ingingo nshya, 1.500.000Frw y’igihembo cya Avoka kuri uru rwego, na 2.000.000Frw y’ikurikiranarubanza no gusiragizwa mu nkiko. [40] Me Nduwamungu Jean Vianney, uhagarariye Niyigena Mining Company Ltd avuga ko amafaranga asabwa atagomba gutangwa na Niyigena Mining Company Ltd, kubera ko itagombaga kuregwa. Uko Urukiko rubibona [41] Ingingo ya 111 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Ikirego cy’amafaranga y’ikurikiranarubanza ni ikirego gishamikiye ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishwa rimwe n’ikirego cy’iremezo. Gishobora kandi kwakirwa kikaburanishwa n’iyo ikirego cy’iremezo cyaba kitakiriwe. [42] Urukiko rw’Ubujurire rurasanga kuba byagaragaye ko Bucyedusenge Consolée na bagenzi be barenganyijwe mu rubanza basabye ko rusubirwamo ku mpamvu z’akarengane kandi bakaba barashatse aba Avoka bo kurukurikirana no kuruburana, Niyigena Mining Company Ltd igomba kubishyura amafaranga y’ikurikiranarubanza n’igihembo cya Avoka akagenwa mu bushishozi bw’Urukiko, kubera ko ayo basaba ari menshi kandi bakaba batagaragaza ibimenyetso by’uko ayo basaba ariyo batanze koko, ikabishyura , 200.000Frw y’ikurikiranarubanza kuri buri wese na 1.500.000Frw y’igihembo cya Avoka, bose hamwe kuri uru rwego, yose hamwe, akaba 3.300.000Frw. III. ICYEMEZO CY’URUKIKO [43] Rwemeje ko ikirego cya Bucyedusenge Consolée, Mukarubibi Bonifride, Uwamahoro Claudine, Mukamurara Marie Chantal, Gakwaya Boniface, Mukakagina Elisabeth, Mukamurigo Sylvanie, Tuyizere Alodie na Mukeshimana Goretti, cyo gusubirishamo ku mpamvu z’akarengane urubanza n˚ RS/REV/RC 00001/2020/HC/MUS, rwaciwe n’Urukiko Rukuru, Urugereko rwa Musanze ku wa 11/11/2021, gifite ishingiro. [44] Rwemeje ko urubanza RS/REV/RC 00001/2020/HC/MUS rwaciwe n’Urukiko Rukuru, Urugereko rwa Musanze ku wa 11/11/2021 rugaragaramo akarengane. [45] Rwemeje ko urubanza RS/REV/RC 00001/2020/HC/MUS rwaciwe n’Urukiko Rukuru, Urugereko rwa Musanze ku wa 11/11/2021, ruhindutse mu ngingo zarwo zose. [46] Rwemeje ko sosiyete Niyigena Mining Company Ltd ihagarariwe na Niyigena Innocent, ari yo yagombaga kuregwa indishyi zikomoka ku mpanuka yabereye mu kirombe gicukurwamo amabuye y’agaciro ku wa 23/09/2016, mu Mudugudu wa Nyagatama, Akagari ka Vuganyana, Umurenge wa Nyange, Akarere ka Ngororero, Intara y’Iburengerazuba.

## Page 12

[47] Rutegetse ko hagumyeho urubanza RCA00010/2018/HC/MUS rwaciwe n’Urukiko Rukuru, Urugereko rwa Musanze, ku wa 10/12/2018. [48] Rutegetse Niyigena Mining Company Ltd ihagarariwe na Niyigena Innocent guha Bucyedusenge Consolée, Mukarubibi Bonifride, Uwamahoro Claudine, Mukamurara Marie Chantal, Gakwaya Boniface, Mukakagina Elisabeth, Mukamurigo Sylvanie, Tuyizere Alodie na Mukeshimana Goretti, 200.000Frw y’ikurikiranarubanza kuri buri wese na 1.500.000Frw y’igihembo cya Avoka, bose hamwe kuri uru rwego, yose hamwe, akaba 3.300.000Frw. [49] Ruvuze ko amagarama y’urubanza aherera ku Isanduku ya Leta.