BUGABO N’UNDI v MUSABWASONI N’ABANDI

# BUGABO N’UNDI v MUSABWASONI N’ABANDI

- Source: Amategeko - Section: Decisions (Judgements) - Date: 2023-12-21 - Case/document no.: RCAA00007/2023/CA-RCAA00008/2023/CA - Collection: Court of Appeal

## Text

## Page 1

BUGABO N’UNDI v MUSABWASONI N’ABANDI [Rwanda URUKIKO RW’UBUJURIRE – RCAA00007/2023/CA-RCAA00008/2023/CA (Ngagi, P.J.) 21 Ukuboza 2023] Amategeko agenga ubutaka – ikigaragaza ko ubutaka ari ubwawe – iyandikisha ry’ubutaka – Uburenganzira ku butaka bugaragazwa nuko ubwo butaka bwanditswe ku muntu muri rejisitiri y’ubutaka iriho umukono w’Umubitsi w’inyandikompamo z’ubutaka kandi afite icyemezo cy’iyandikishwa ry’ubutaka kimwanditseho. Amategeko agenga ubutaka – ibimenyetso bigaragaza ko ubutaka ari ubwawe – kugirango Urukiko ruteshe agaciro amasezerano y’ubugure bw’umutungo utimukanwa, rushingiye ku rubanza nshinjabyaha rwahamije umuntu icyaha cyo kugurisha ikintu cy’undi, urwo rubanza rugomba kuba rugaragaza neza uwo mutungo utimukanwa uwo ariwo. Incamake y’ikibazo: Uru rubanza rwatangiye Musabwasoni arega Butore umuhungu we, mu Rukiko Rwisumbuye rwa Nyarugenge asaba Urukiko gutegeka ko ubutaka bufite UPI: 1/03/05/03/3428, bumubaruyeho, bwandikwaho Musabwasoni kuko Butore yabwibarujeho akaza no kubugurisha mu buryo bw’uburiganya. Muri urwo rubanza hagobokeshejwemo Kagame, Bugabo na Mbabazi bagiye bahererekanya ubwo butaka binyuze mu masezerano y’ubugure. Urukiko mu rubanza RC00899/2020/TGI/NYGE rwemeje ko: Ikirego cyatanzwe na Musabwasoni nta shingiro gifite; ko nta hererekanya ry’ubutaka buburanwa, ngo bwandikwe kuri Musabwasoni; ko Musabwasoni agomba gutanga amafaranga y’igihembo cya Avoka nay’ikurikiranarubanza. Musabwasoni ntiyanyuzwe n’imikirize y’urwo rubanza, arujurira mu Rukiko Rukuru anenga ko Urukiko rwabanje mu guca urubanza rujuririrwa rutahaye agaciro ibimenyetso yatanze bigaragaza ko umutungo uburanwa ari uwe. Mu gusoza asaba indishyi zitandukanye. Butore yireguye avuga ko yibarujeho ubutaka buburanwa kandi butari ubwe, bityo ko yemeranya n’ibyavuye mu iperereza ry’Urukiko byose, ko yabaye umuhemu aho umubyeyi we Musabwasoni yamutumye kujya kumubaruzaho umutungo uvugwa muri uru rubanza akabirengaho akawibaruzaho akawugurisha Kagame, nawe akaza kuwugurisha Mbabazi bagakorana ihererekanya ryawo, hanyuma na we akawugurisha Bugabo. Bugabo, Mbabazi na Kagame bireguye bavuga ko ubujurire bwa Musabwasoni nta shingiro bufite, kuko ibaruwa yatanzwe n'Ikigo cy'ubutaka igaragaza ko ubutaka bwari ubwa Butore akaba ari na we wabugurishije. Bavuga kandi ko Musabwasoni atagaragaza aho akomora ubutaka buburanwa. Urukiko mu rubanza RCA00324/2021/HC/KIG rwemeje ko: Ubujurire bwatanzwe na Musabwasoni bufite ishingiro; Amasezerano y’ubugure bwose bwabaye ku mutungo uburanwa ateshejwe agaciro; Bugabo na Mbabazi bajuririye icyo cyemezo, bavuga ko banenga Urukiko Rukuru kuba rwaringagije ibimenyetso barugaragarije rugashingira ku buhamya burimo kuvuguruzanya kandi

## Page 2

bwatanzwe n’abantu batari bafite ubumenyi. Basaba Urukiko rw’Ubujurire kwemeza ko urubanza rujuririrwa ruhindutse. Kagame David avuga ko yemeranya n’ibyo abajuriye bavuga. Musabwasoni yiregura avuga ko kuba Butore yari afite icyangombwa cy’ubutaka bidahagije mu gihe atagaragaza inkomoko yabwo kandi akaba yarahamijwe n’Urukiko icyaha cy’uburiganya kuko yamutumye kumwandikishaho ubutaka akora uburiganya abwiyandikishaho. Butore avuga ko umutungo uburanwa ari uwa Musabwasoni nk’uko ngo byemejwe n’abatangabuhamya babajijwe n’Urukiko Rukuru. Avuga kandi ko yibarujeho umutungo utari uwe nk’uko byemejwe n’Urubanza rw’inshinjabyaha. Incamake y’icyemezo: 1.Uburenganzira ku butaka bugaragazwa nuko ubwo butaka bwanditswe ku muntu muri rejisitiri y’ubutaka iriho umukono w’Umubitsi w’inyandikompamo z’ubutaka kandi afite icyemezo cy’iyandikishwa ry’ubutaka kimwanditseho.Bityo, ikigaragaza ko ubutaka cyangwa umutungo utimukanwa ari uw’umuntu runaka ni uko agomba kuba afite icyemezo cy’iyandikisha ry’ubutaka kimwanditseho, kandi ibicyanditseho bifatwa nk’ukuri kudashidikanywaho, bishobora kuvuguruzwa gusa mu gihe hari undi wagaragaje ibimenyetso by’ukuri bigaragaza ko ubwo butaka cyangwa uwo mutungo utimukanwa ari uwe. 2. Urubanza nshinjabyaha ruhamya umuntu icyaha cyo gutwara ikintu cy’undi hakoreshejwe uburiganya n’icyaha cyo kugurisha ikintu cy’undi, rugomba kugaragaza neza icyo kintu icyo aricyo. Bityo, kugirango Urukiko ruteshe agaciro amasezerano y’ubugure bw’umutungo utimukanwa, rushingiye ku rubanza nshinjabyaha rwahamije umuntu icyaha cyo kugurisha ikintu cy’undi, urwo rubanza rugomba kuba rugaragaza neza uwo mutungo utimukanwa uwo ariwo. Ubujurire bufite ishingiro. Amategeko yashingiweho: Itegeko N° 27/2021 ryo ku wa 10/06/2021 rigenga ubutaka, Ingingo 17, 18,19 Imanza zifashishijwe: RS/INJUST/RC 00007/2021/CA, Karumuhinzi Baudoux Claire vs Nyirakaziga Kabeja Anne Marie rwaciwe n’Urukiko rw’Ubujurire ku wa 30/10/2023, Urubanza I. IMITERERE Y’URUBANZA [1] Uru rubanza rukomoka ku kirego Musabwasoni Asthérie yatanze mu Rukiko Rwisumbuye rwa Nyarugenge avuga ko mu mwaka wa 2019 haje abantu bakamubwira ko ava mu nzu yabagamo ngo kuko bayiguranye n’isambu yubatsemo, abikurikiranye aza kumenya ko umuhungu we Butore Ladislas yiyandikishijeho iyo sambu agahabwa icyangombwa gifite UPI: 1/03/05/03/3428. Ibyo byatumye arega Butore Ladislas, asaba Urukiko gutegeka ko ubutaka bufite UPI: 1/03/05/03/3428,

## Page 3

buherereye mu Mudugudu wa Cyurusagara, Akagari ka Karama, Umurenge wa Kanombe, Akarere ka Kicukiro, Umujyi wa Kigali bwandikwa kuri Musabwasoni Asthérie kuko yawibarujeho mu buryo bw’uburiganya. Muri urwo rubanza hagobokeshejwemo Kagame David, Bugabo Jean Pierre na Mbabazi Phoibe bagiye bahererekanya ubwo butaka mu buryo bw’ubugure, aho Butore Ladislas yabugurishije Kagame David akanamukorera ihererekanyamutungo, uyu na we akaza kubugurisha Mbabazi Phoibe, na we waje kubugurisha Bugabo Jean Pierre nawe bagakorana ihererekanyamutungo (mutation). [2] Mu rubanza RC00899/2020/TGI/NYGE rwaciwe n’Urukiko Rwisumbuye rwa Nyarugenge ku wa 20/10/2021, Urukiko rushingiye ku kuba Musabwasoni Asthérie atarabashije kugaragaza ko umutungo ashaka ko umwandikwaho ari uwe koko, no kuba abawuguze barawuguze mu buryo bukurikije amategeko rwemeje ko: ikirego cyatanzwe na Musabwasoni Asthérie nta shingiro gifite; nta hererekanya ry’ubutaka bubaruye kuri UPI: 1/03/05/03/3428 rigomba gukorerwa Musabwasoni Asthérie; Musabwasoni Asthérie agomba gutanga amafaranga angana na miliyoni imwe n’ibihumbi magana atanu (1.500.000Frw) akubiyemo igihembo cya Avoka n’ikurikiranarubanza, ko amagarama ahererera mu Isanduku ya Leta. [3] Musabwasoni Asthérie yajuririye Urukiko Rukuru anenga ko Urukiko Rwisumbuye rwa Nyarugenge mu guca urubanza RC00899/2020/TGI/NYGE rutahaye agaciro ibimenyetso yatanze bigaragaza ko umutungo uburanwa ari uwe. Mu gusoza asaba indishyi zitandukanye. [4] Butore Ladislas aburana avuga ko koko yibarujeho ubutaka buburanwa kandi butari ubwe, bityo ko yemeranya n’ibyavuye mu iperereza ry’Urukiko byose, ko yabaye umuhemu aho umubyeyi we Musabwasoni Asthérie w’imyaka 86 yamutumye kujya kumubaruzaho umutungo uvugwa muri uru rubanza akabirengaho akawibaruzaho akawuherekanya na Kagame David, uyu nawe akaza kuwugurisha Mbabazi Phoibe bagakorana ihererekanya ryawo, hanyuma na we akawugurisha Bugabo Jean Pierre na we bagakorana ihererekanyamutungo (mutation). [5] Bugabo Jean Pierre, Mbabazi Phoibe na Kagame David biregura muri rusange bavuga ko ubujurire bwa Musabwasoni Asthérie nta shingiro bufite, kuko ibaruwa yatanzwe n'Ikigo cy'ubutaka igaragaza ko ubutaka bwari ubwa Butore Ladislas, akaba ari na we wawugurishije abantu batandukanye, kandi akaba, yaragiye abukoreraho ibikorwa bitandukanye kandi bigifite agaciro kabyo. Bavuga kandi ko urubanza RP012256/2019/TB/KICU, Musabwasoni Asthérie ashingiraho ntacyo rwamumarira kuko bigaragara ko ari amayeri bakora bagamije kwigarurira ubwo butaka, ko kandi rutaba itegeko ku bantu bataruburanye, ko n’ubuhamya butangwa nta gaciro bwahabwa, ngo kuko ababutanze basa n’abasubira mu byo babwiwe. Ikindi, Musabwasoni Asthérie ntagaragaza aho abukomora, bityo ihererekanyamutungo ryagiye rikorwa rikaba rigomba kugumana agaciro karyo, kuko Butore Ladislas ari we wagaragaje mu buryo budashidikanwaho ko ari nyirawo. Iyo aza kuba yaribarujeho ubwo butaka mu buryo bw’uburiganya, Musabwasoni Asthérie akibimenya yari kumusaba ko bakora ihererekanyamutungo. Kandi kuba ubwo hagurishwaga igice kimwe cy’ubwo butaka kandi abona ko bubaruye kuri Butore Ladislas ariko ntabigireho ikibazo, ari uko na we ubwe yemeraga ko ari nyirabwo koko.

## Page 4

[6] Mu rubanza RCA00324/2021/HC/KIG rwaciwe n’Urukiko Rukuru ku wa 09/03/2023, Urukiko rwemeje ko : Ubujurire bwatanzwe na Musabwasoni Asthérie bufite ishingiro ; Amasezerano y’ubugure bwose bwabaye ku mutungo uburanwa ufite UPI : 1/03/05/03/3428, buherereye mu Mudugudu wa Cyurusagara, Akagari ka Karama, Umurenge wa Kanombe, Akarere ka Kicukiro, Umujyi wa Kigali, ateshwa agaciro ku mpamvu zamaze gusobanurwa ; Umutungo utimukanwa ubaruye kuri UPI : 1/03/05/03/3428 wavuzwe haruguru, wandikwa kuri Musabwasoni Asthérie ; Butore Ladislas, Kagame David, Mbabazi Phoibe na Bugabo Jean Pierre bafatanya guha Musabwasoni Asthérie amafaranga angana na miliyoni imwe n’ibihumbi magana atatu (1.300.000Frw) y’indishyi z’ibyo yatanze z’igihembo cya Avoka n’ikurikiranarubanza ku rwego rwa mbere no kuri urwo rwego rw’ubujurire, no kumusubiza ingwate y’amagarama yatanze ; Urubanza rwajuririwe RC00899/2020/TGI/NYGE rwaciwe n’Urukiko Rwisumbuye rwa Nyarugenge ku wa 20/10/2021 ruteshwa agaciro mu ngingo zarwo zose. [7] Bugabo Jean Pierre yajuririye Urukiko rw’Ubujurire, ubujurire bwe bwandikwa kuri RCAA00007/2023/CA. Mbabazi Phoibe na we yarajuriye, ubujurire bwe bwandikwa kuri RCAA00008/2023/CA, hanyuma ubujurire bwabo buhurizwa hamwe mu rubanza RCAA00007/2023/CA-RCAA00008/2023/CA. Urubanza rwaburanishijwe mu ruhame ku wa 04/12/2023, Bugabo Jean Pierre ahagarariwe na Me Twiringiyemungu Joseph afatanyije na Me Niyibizi Remy, Mbabazi Phoibe ahagarariwe na Me Ndahimana Jean Bosco, Musabwasoni Asthérie ahagarariwe na Me Mukakalisa Jeanne d’Arc, Butore Ladislas ahagarariwe na Me Kanimba Gratien, naho Kagame David ahagarariwe na Me Murangwa Faustin. [8] Mu myanzuro no mu miburanire ya Bugabo Jean Pierre na Mbabazi Phoibe banenga kuba Urukiko Rukuru kuba rwaringagije ibimenyetso barugaragarije rugashingira ku buhamya burimo kuvuguruzanya kandi bwatanzwe n’abantu bataribafite ubumenyi. Bavuga kandi ko urubanza RP01256/2019/TB/KIC rutagomba kugira ingaruka ku baguze kuko batigeze barubamo ababuranyi, ko impamvu Musabwasoni Asthérie atabamenyesheje urwo rubanza ngo barugeremo indishyi ari uko yatinyaga ko abaguze bagaragaza ko nta buriganya Butore Ladislas yagize mu kwiyandikishaho ubwo butaka kuko bwari ubwe, ko kandi nta kimenyetso na kimwe cyanditse Musabwasoni Asthérie atanga cyerekana ko yigeze atunga ubwo butaka, ibyo avuga bikaba bitagomba guhabwa agaciro. Bityo ko basaba Urukiko rw’Ubujurire kwemeza ko urubanza rujuririrwa ruhindutse mu ngingo zarwo zose. [9] Kagame David avuga ko yemeranya n’ibyo abajuriye bavuga byose, ko icyo yongeraho gusa ari uko urubanza rw’inshinjabyaha Musabwasoni Asthérie yashingiyeho arega rutagaragaza ko Butore Ladislas yakoze uburiganya kuri UPI: UPI:1/03/05/03/3428 iburanwa muri uru rubanza. Bityo ko urwo rubanza nta ngaruka rugomba kugira ku baguze cyane ko batigeze barubamo ababuranyi.

## Page 5

[10] Musabwasoni Asthérie yiregura avuga ko kuba Butore Ladislas yari afite icyangombwa cy’ubutaka bidahagije mu gihe atagaragaza inkomoko yabwo kandi akaba yarahamijwe n’Urukiko icyaha cy’uburiganya kuko yamutumye kumwandikishaho ubutaka akora uburiganya abwiyandikishaho. Avuga kandi ko ibimenyetso ashingiraho byemeza ko umutungo ari uwe, ari urubanza rw’inshinjabyaha rwemeje ko Butore Ladislas yakoze uburiganya akiyandikishaho umutungo utari uwe n’imvugo z’abatangabuhamya babajijwe n’Urukiko bemeza ko uwo mutungo ari uwe. [11] Butore Ladislas avuga ko umutungo uburanwa ari uwa Musabwasoni Asthérie nk’uko byemejwe n’abatangabuhamya babajijwe n’Urukiko Rukuru. Avuga kandi ko yibarujeho umutungo utari uwe nk’uko byemejwe n’Urubanza rw’inshinjabyaha rwamuhamije icyaha cy’uburiganya, akaba abyemera kandi abisabira imbabazi. [12] Urukiko rwemeranyijwe n’ababuranyi ko ruzasuzuma ikibazo kijyanye no kumenya niba Urukiko Rukuru rwarirengagije ibimenyetso byatanzwe na Bugabo Jean Pierre, Mbabazi Phoibe na Kagame David, hanyuma rugasuzuma niba indishyi Musabwasoni Asthérie yagenewe n’Urukiko Rukuru zifite ishingiro, rukanasuzuma ibijyanye n’amafaranga y’ikurikiranarubanza n’igihembo cya Avoka. II. ISESENGURA RY’IBIBAZO BIGIZE URUBANZA 1.Kumenya niba Urukiko Rukuru rwarirengagije ibimenyetso byatanzwe na Bugabo Jean Pierre, Mbabazi Phoibe na Kagame David byerekana ko umutungo Butore Ladislas yahererekanyije wari uwe [13] Abahagarariye Bugabo Jean Pierre na Mbabazi Phoibe bavuga ko Urukiko Rukuru rwashingiye ku buhamya burimo kuvuguruzanya kandi bwatanzwe n’abantu batari bafite ubumenyi ku kiburanwa rwirengagije icyangombwa cy’ubutaka kigaragaza ko Butore Ladislas yagurishije ubutaka bumwanditseho n’ibaruwa yatanzwe n’Ikigo cy’Igihugu Gishinzwe Imicungire y’Ubutaka, igaragaza ko ubwo butaka bwanditswe kuri Butore Ladislas kuva mu gihe cy’ibarura ry’ubutaka, ikanagaragaza ko umutungo uburanwa ukomoka ku kibanza cyari kibaruye kuri UPI : 01/03/05/03/1322 cyari cyanditse kuri Butore Ladislas kikaza kugabanywamo kabiri, hakavamo ibibanza bibiri ari byo igifite UPI:1/03/05/03/3428 n’igifite UPI:1/03/05/03/3429 nabyo bikandikwa kuri Butore Ladislas, akaza kubigurisha byombi, ariko Musabwasoni Asthérie akaba atarigeze agira ikibazo ku kibanza gifite UPI:1/03/05/03/3429, ahubwo akagira ikibazo ku kibanza gifite UPI:1/03/05/03/3428 kandi byombi byaragurishijwe na Butore Ladislas wari ubyanditseho. Basaba Urukiko kuzasuzuma imvugo za Butore Ladislas zo mu Rukiko Rwisumbuye rwa Nyarugenge, aho yagaragaje ko igice kimwe cy’ubutaka yakigurishije kugira ngo asanire nyina Musabwasoni Asthérie inzu ye, bikaba bitumvikana ukuntu ubugure bumwe bwahabwa agaciro ubundi ntibugahabwe, kandi ibyo bice byombi byari byanditse kuri Butore Ladislas. [14] Basobanura ko Urukiko Rukuru rwirengagije amategeko arebana n’imitangire y’ibimenyetso rushingira ku buhamya butagira ikibushyigikira rwirengagije ikimenyetso cyanditswe cyatazwe n’Ikigo cy’Igihugu Gishinzwe Imicungire y’Ubutaka cyemeza ko ubutaka ari ubwa Butore Ladisilas ko yabugurishije abyemerewe. Basobanura kandi ko icyerekana ko

## Page 6

abatangabuhamya batari bafite ubumenyi ku kiburanwa ari uko nta numwe wagaragaje ko uwo mutungo waguzwe ahari, ko kandi imvugo zabo zivuguruzanya kuko, Nteziyaremye Paul yavuze ko ubutaka buburanwa bwaguzwe na Musabwasoni Asthérie, mu gihe Rwabukwisi Enock avuga ko ubwo butaka bwaguzwe na Musabwasoni Asthérie n’umugabo we Seminega. [15] Bavuga kandi ko urubanza rw’inshinjabyaha RP01256/2019/TB/KICU rwemeje ko Butore Ladislas yakoze uburiganya rutabareba kuko batarubayemo ababuranyi, ko kandi nta kimenyetso na kimwe cyanditse Musabwasoni Asthérie atanga cyerekana ko yigeze atunga ubwo butaka, ibyo avuga bikaba bitagomba guhabwa agaciro. Basoza basaba Urukiko rw’Ubujurire kwemeza ko urubanza rujuririrwa ruhindutse mu ngingo zarwo zose. [16] Kagame David avuga ko yemeranya n’ibyo abajuriye bavuga byose, ko icyo yongeraho gusa ari uko urubanza rw’inshinjabyaha, Musabwasoni Asthérie yashingiyeho arega rutagaragaza ko Butore Ladislas yakoze uburiganya ku kibanza gifite UPI:1/03/05/03/3428 iburanwa muri uru rubanza. Bityo ko urwo rubanza nta ngaruka rugomba kugira ku baguze cyane ko batigeze barubamo ababuranyi. [17] Uhagarariye Musabwasoni Asthérie yiregura avuga ko kuba Butore Ladislas yari afite icyangombwa cy’ubutaka bidahagije mu gihe atagaragaza inkomoko yabwo kandi akaba yarahamijwe n’Urukiko icyaha cy’uburiganya kuko yamutumye kumwandikishaho ubutaka akora uburiganya abwiyandikishaho. Avuga kandi ko ibimenyetso ashingiraho byemeza ko umutungo ari uwe, ari urubanza rw’inshinjabyaha rwemeje ko Butore Ladislas yakoze uburiganya akiyandikishaho umutungo utari uwe n’imvugo z’abatangabuhamya babajijwe n’Urukiko bemeza ko uwo mutungo ari uwa Musabwasoni Asthérie. Mu iburanisha yasabwe kugaragaza uburyo uwo mutungo ari uwa Musabwasoni Asthérie avuga yawuguze, ko hari n’inyandiko y’ubugure, asabwe kuyigaragaza, abaza Musabwasoni Asthérie niba ayifiye, uyu avuga ko atawuguze, ko ahubwo ari gakondo, ko awukomora kuri Ntaganda. [18] Butore Ladislas yiregura avuga ko yakoze icyaha cyo kwibaruzaho umutungo utari uwe mu buryo bw’uburiganya, aho Musabwasoni Asthérie yamusabye kujya kumubaruriza umutungo aho kuwumwandikishaho akawibaruzaho mu mazina ye, aho Musabwasoni Asthérie abimenyeye aregera Urukiko asaba kwandikwaho umutungo we, Urukiko rwakora iperereza rusanga koko umutungo ari uwe. Bityo ko ubugure bwawukoreweho nta gaciro bwahabwa kuko bwakozwe Musabwasoni Asthérie atabizi. Ko yemeranya n’icyemezo cyafashwe mu rubanza rujuririrwa RCA00324/2021/HC/KIG, akanemera gusubiza amafaranga yatumye agwa mu cyaha akagurisha umutungo utari uwe. UKO URUKIKO RUBIBONA [19] Impaka kuri iyi ngingo y’ubujurire zishingiye ku kumenya niba hari ibimenyetso bigaragaza ko umutungo uri mu kibanza gifite UPI:1/03/05/03/3428 ari uwa Musabwasoni Asthérie ku buryo yawandikwaho, kuko Butore Ladislas yaba yarawuhererekanyije utari uwe. [20] Ingingo ya 17, igika cya mbere, y’Itegeko N° 27/2021 ryo ku wa 10/06/2021 rigenga ubutaka iteganya ibikurikira : “Umuntu afite inshingano yo kwandikisha ubutaka atunze”. Ingingo ya 18, igika cya mbere, y’iryo Tegeko iteganya ibikurikira : “Icyemezo cy’iyandikishwa ry’ubutaka

## Page 7

ni kopi y’umwimerere ya rejisitiri y’ubutaka iriho umukono w’umubitsi w’inyandikompamo z’ubutaka. Gishobora gutangwa mu buryo bw’ikoranabuhanga cyangwa mu buryo bw’impapuro”. Mu gika cya kabiri iteganya ibikurikira : “Icyemezo cy’iyandikishwa ry’ubutaka ni ikimenyetso ntashidikanywaho cy’uburenganzira ku butaka igihe cyose ubufite yabubonye mu buryo bukurikije amategeko.” [21] Ingingo ya 19, igika cya mbere, y’iryo Tegeko iteganya ibikurikira : “Icyemezo cy’iyandikishwa ry’ubutaka, ibyanditswe muri rejisitiri y’ubutaka n’izindi nyandiko zerekeye uburenganzira ku butaka zemejwe n’umubitsi w’inyandikompamo z’ubutaka ni ukuri mpamo kandi bikoreshwa gusa ku mpamvu zemewe n’amategeko”. Mu gika cya kabiri ivuga ibikurikira : “Icyakora, ibivugwa mu gika cya mbere cy’iyi ngingo bitakaza agaciro iyo bigaragaye ko bidashingiye ku kuri.” [22] Izi ngingo zisesenguriwe hamwe zumvikanisha ko uburenganzira ku butaka bugaragazwa nuko ubwo butaka bwanditswe ku muntu muri rejisitiri y’ubutaka iriho umukono w’Umubitsi w’inyandikompamo z’ubutaka ukaba ufite icyemezo cy’iyandikishwa ry’ubutaka kimwanditseho, ko kandi icyo cyemezo ari ikimenyetso kidashidikanywaho cy’uko ubwo butaka ari ubw’uwo bwanditseho, mu gihe cyose ubufite yabubonye mu buryo bukurikije amategeko, ko kandi ibiba bicyanditseho ari ukuri mpamo, ko bitakaza agaciro gusa mu gihe bidashingiye ku kuri. Mu yandi magambo ikigaragaza ko ubutaka cyangwa umutungo utimukanwa ari uw’umuntu runaka ni uko agomba kuba afite icyemezo cy’iyandikisha ry’ubutaka kimwanditseho, kandi ko ibicyanditseho bifatwa nk’ukuri kudashidikanywaho, bikaba bishobora kuvuguruzwa gusa mu gihe hari undi wagaragaje ibimenyetso by’ukuri bigaragaza ko ubwo butaka cyangwa uwo mutungo utimukanwa ari uwe. Ibi bivuze ko uvuga ko ubutaka cyangwa umutungo utimukanwa wanditse ku wundi muntu ari uwe, aba afite inshingano ikomeye yo kugaragaza ibimenyetso bidashidikanywaho kandi by’ukuri byerekana uburyo ubwo butaka cyangwa uwo mutungo utimukanwa ari uwe koko n’aho awukomora, ku buryo ibyo bimenyetso bishingirwaho hateshwa agaciro icyangombwa cy’ubutaka; bitagenze gutyo byateza umutekano muke ku bantu bafite ibyangombwa by’umutungo utimukanwa, kuko icyo gihe ubonetse wese ashobora kugerageza kumuhungabanya ku mutungo afitiye ibyangombwa yahawe n’ubuyobozi bubifitiye ububasha. [23] Ku birebana n’uru rubanza dosiye igaragaramo kopi y’icyangombwa cy’ubutaka iriho umukono wa Noteri, kigaragaza ko ubutaka bufite UPI: 1/03/05/03/3428 bwari bwanditse kuri Butore Ladislas 100% mbere y’uko abuhererekanya na Kagame David. [24] Dosiye y’urubanza igaragaramo ibaruwa yanditswe n’Ikigo Gishinzwe imicungure n’Imikoreshereze y’Ubutaka mu Rwanda yo ku wa 21/09/2021, igaragaza ko mu mwaka wa 2015 uwitwa Butore Ladislas yasabye ko ubutaka bufite UPI :1/03/05/03/1322 bwacibwamo kabiri (subdivision), bityo havukamo nomero ebyiri z’ubutaka ari zo UPI: 1/03/05/03/3428 na UPI 1/03/05/03/3429. Ku wa 10/05/2015, Butore Ladislas (1197280009217069) akora amasezerano y’ihererekanya ry’ubutaka bufite UPI : 1/03/05/03/3429, bityo ubutaka bwandikwa kuri Mulisa Fred, nawe ku wa 14/10/2020 akora amasezerano y’ihererekanya ry’ubutaka bwandikwa kuri Musoni Jean Pierre na Mutoni Olive bukaba bwanditsweho ingwate ya Banki. Ku wa 13/06/2018, Butore Ladislas yakoze amasezerano y’ihererekanya ry’ubutaka bufite UPI : 1/03/05/03/3428, bwandikwa kuri Kagame David, nawe ku wa 25/07/2018 yakoze amasezerano y’ihererekanya

## Page 8

ry’ubwo butaka bwandikwa kuri Mbabazi Phoibe (1198970166248055). Ku wa 18/06/2019, Mbabazi Phoibe nawe akora amasezerano y’ihererekanya ry’ubwo butaka bwandikwa kuri Mugabo Jean Pierre, uyu akaba ari we bwanditseho kuri ubu. [25] Dosiye igaragaramo kandi inyandikomvugo z’iperereza ryakozwe n’Urukiko Rukuru ku wa 16/01/2023, aho rwabajije abantu batandukanye barimo Nteziyaremye Paul wavuze ko ubwo butaka bwaguzwe na Musabwasoni Asthérie kuko Butore Ladislas yabaga mu gisirikare; Rwabukwisi Enock wavuze ko iyo sambu yaguzwe na Seminega Esperance, umukobwa wa Musabwasoni Asthérie wakoraga muri Caisse Sociale du Rwanda, ko Musabwasoni Asthérie yaje kunanirwa kuyihinga arayimukodesha akaba ari we uyihanga; Munyeshuri Charles wavuze ko azi Musabwasoni na Butore bahungutse bava i Burundi, ko babohoje iyo sambu, nyuma baza kuyigura, abajijwe abayiguze avuga ko ari umusaza n’umukecuru (bivuze Seminega na Musabwasoni); Seminega Esperance (umukobwa wa Musabwasoni) wavuze ko iyo sambu ari gakondo ya basekuruza, ko aho hantu habaga se wabo witwaga Ntaganda aza gupfa mu mwaka wa 1990, hasigara nyirasenge abasaba kuza kuba muri iyo sambu y’umuryango kuko bari barabohoje inzu, hanyuma baza kubagabanya na nyiriyo nzu, uyu ashaka kugurisha igice cye, ahagurira ababyeyi be ariko se ahita apfa, ko we na murumuna we bari barashatse, hanyuma mu gihe cyo kwandikisha ubutaka nyina atuma Butore Ladislas kumwandikishaho ubwo butaka arangije abwiyandikishaho. Mu mwaka wa 2018, Butore Ladislas amaze gushaka bashaka kwimura nyina kuko atari kuhaba wenyine bamubajije icyangombwa avuga ko ari Butore Ladislas ugifite, bagisabye Butore Ladislas basanga icyangombwa ari we cyanditseho, bamurega mu rubanza nshinjabyaha baramutsinda. Mu iburanisha uhagarariye Musabwasoni Asthérie yavuze ko uwo mutungo ari uwe kuko yawuguze, ko hari n’inyandiko y’ubugure, arongera avuga ko Musabwasoni Asthérie amubwiye ko atawuguze ahubwo ari gakondo, ko awukomora kuri Ntaganda. [26] Dosiye igaragaramo na none urubanza rw’inshinjabyaha RP01256/2019/TB/KICU rwaciwe n’Urukiko rw’Ibanze rwa Kicukiro ku wa 02/03/2020, haburana Ubushinjacyaha na Butore Ladislas. Muri urwo rubanza, Musabwasoni Asthérie yareze Butore Ladislas ko yamutumye kumubaruzaho ubutaka bwe hanyuma Butore abwibaruzaho ndetse akaba yarabugurishije undi muntu witwa Mbabazi Phoibe. Butore Ladislas yaburanye yemera icyaha avuga ko mu gihe cyo kubaruza ubutaka yabaga iwabo abana na nyina, bamubaza kubereka isambu yabu, arayibereka mubaza nyirayo avuga ko ari Seminega, ko yapfuye, bamubaza niba bayimubaruraho arabyemera, nyuma y’uko ashaka aguza amafaranga yo gucuruza arahomba, hanyuma akora mutation n’abo yari yarahaye ibyangombwa. Asobanura ko Kagame David yamuhaye miliyoni ebyiri (2,000,000Frw). Urukiko rushingiye ku mvugo za Musabwasoni, iza Seminega Esperance n’iza Nteziyaremye Paul ndetse no kwemera icyaha kwa Butore Ladislas rwemeje ko Butore Ladislas ahamwa n’icyaha cyo gutwara ikintu cy’undi hakoreshejwe uburiganya kuko yibarujeho umutungo wa Musabwasoni Asthérie, rumuhamya n’icyaha cyo kugurisha ikintu cy’undi, kuko yemera ko yakoze ihererekanya mutungo ku butaka yibarujeho atari ubwe, maze rumuhanisha igifungo cy’umwaka umwe, gisubitse mu gihe cy’imyaka ibiri n’ihazabu y’amafaranga miliyoni imwe. [27] Imikirize y’urubanza RC00899/2020/TGI/NYGE rwaciwe n’Urukiko Rwisumbuye rwa Nyarugenge ku wa 20/10/2021, igaragaza ko urwo Rukiko rwemeje ko Musabwasoni Asthérie atandikwaho ubutaka bubaruye kuri UPI: 1/03/05/03/3428 kuko atabashije kugaragaza ko umutungo ashaka ko umwandikwaho ari uwe koko, kuba abawuguze barawuguze mu buryo

## Page 9

bukurikije amategeko, no kuba urubanza RP01256/2019/TB/KICU rutashingirwaho kuko abaguze uwo mutungo batarubayemo ababuranyi. Naho imikirize y’urubanza rujuririrwa RCA00324/2021/HC/KIG rwaciwe n’Urukiko Rukuru ku wa 09/03/2023, igaragaza ko urwo Rukiko rwemeje ko amasezerano y’ubugure bwabaye ku mutungo uburanwa ubaruye kuri UPI: 1/03/05/03/3428 ateshwa agaciro, ko uwo mutungo wandikwa kuri Musabwasoni Asthérie rushingiye ku mvugo z’abatangabuhamya babajijwe mu iperereza rwakoze no kuba hari urubanza rw’inshinjabyaha RP01256/2019/TB/KICU rwahamije Butore Ladislas icyaha cyo gutwara ikintu cy’undi hakoreshejwe uburiganya n’icyaha cyo kugurisha ikintu cy’undi. [28] Nk’uko byagaragajwe haruguru ubutaka buburanwa bufite UPI: 1/03/05/03/3428 kuri ubu bwanditse kuri Bugabo Jean Pierre wabuguze na Mbabazi Phoibe nawe wabuguza na Kagame David, uyu nawe akaba yabuguza na Butore Ladislas wari ufite ubutaka bufite UPI:1/03/05/03/1322 bumwanditseho kuva mu gihe cyo kwandikisha ubutaka, akaza gusaba ko bwacibwamo kabiri (subdivision), maze buvamo nomero ebyiri z’ubutaka ari zo UPI: 1/03/05/03/3428 na UPI 1/03/05/03/3429. Ubwo butaka bwose akaba yarabugurishije. [29] Urukiko rurasanga kuba Bugabo Jean Pierre afite icyemezo cy’iyandikisha ry’ubutaka bufite UPI: 1/03/05/03/3428 yabonye mu buryo bumaze gusobanurwa haruguru; Musabwasoni Asthérie uvuga ko ari ubwe, akaba ari we ufite inshingano zo kugaragaza, ko nubwo uwo mutungo wanditse kuri Bugabo Jean Pierre kandi akaba afite ibyangombwa yahawe n’ubuyobozi bubifitiye ububasha, ashobora kuwakwa mu gihe, uvuga ko ari uwe abitangiye ibimenyetso bidashikanywaho bigaragaza ko umutungo ari uwe. uburyo umutungo ari uwe n’aho awukomora. [30] Urukiko rurasanga Musabwasoni Asthérie avuga ko ibimenyetso ashingiraho yemeza ko uwo mutungo ari uwe, ari imvugo z’abatangabuhamya babajijwe n’Urukiko Rukuru igihe rwari mu iperereza ndetse n’urubanza RP01256/2019/TB/KICU rwahamije Butore Ladislas icyaha cyo gutwara ikintu cy’undi hakoreshejwe uburiganya n’icyaha cyo kugurisha ikintu cy’undi. Uru Rukiko rukaba rugomba gusesengura ibi bimenyetso rugasuzuma niba Urukiko Rukuru rwaragombaga kubishingiraho rwemeza ko umutungo ari uwa Musabwasoni Asthérie, ukaba ugomba kumwandikwaho. [31] Ku bijyanye n’imvugo z’abatangabuhamya, nk’uko byavuzwe haruguru, Nteziyaremye Paul avuga ko ubutaka buburanwa bwaguzwe na Musabwasoni Asthérie kuko Butore Ladislas yabaga mu gisirikare, Rwabukwisi Enock avuga ko iyo sambu yaguzwe na Seminega Esperance, umukobwa wa Musabwasoni wakoraga muri Caisse Sociale du Rwanda, Munyeshuri Charles avuga ko Musabwasoni yabohoje iyo sambu, nyuma Seminega na Musabwasoni barayigura, Seminega Esperance (umukobwa wa Musabwasoni) avuga ko iyo sambu ari gakondo ya basekuruza, ko hari n’igicye cy’ubwo butaka yaguriye ababyeyi. Naho uhagarariye Musabwasoni Asthérie, mu iburanisha muri uru Rukiko, yavuze ko Musabwasoni Asthérie yabuguze, ko hari n’inyandiko y’ubugure ibigaragaza ; asabwa kuyigaragaza, avuga ko Musabwasoni Asthérie amubwiye ko atabuguze, ko ahubwo ari gakondo akomora kuri Ntaganda, ariko nta bindi bisobanuro atanze. [32] Urukiko rusesenguriye hamwe izi mvugo z’abatangabuhamya babaijwe n’Urukiko Rukuru ubwo rwakoraga iperereza aho ikiburanwa kiri, hamwe n’ibyavugiwe mu iburanisha muri uru Rukiko, rusanga zivuguruzanya kuko ntawe uhuza n’undi, dore ko Nteziyaremye Paul avuga ko bwaguzwe na Musabwasoni, Rwabukwisi Enock akavuga ko bwaguzwe na Seminega Esperance

## Page 10

(umukobwa wa Musabwasoni), Munyeshuri Charles akavuga ko iyo sambu yaguzwe na Seminega na Musabwasoni, mu gihe Seminega Esperance avuga ko ari gakondo ya basekuruza, akongera akavuga hari n’igice cy’iyo sambu yaguriye ababyeyi be, naho uhagarariye Musabwasoni Asthérie akavuga ko uwo ahagarariye yabuguze, ko hari n’inyandiko y’ubugure, yayibura akavuga ko ari gakondo, ko abukomora kuri Ntaganda, bityo rero izi mvugo ntizagombaga gushingirwaho n’Urukiko Rukuru ngo rwemeze ko ubwo butaka ari ubwa Musabwasoni Asthérie. [33] Urukiko rurasanga usibye kuba izi mvugo z’abatangabuhamya zivuguruzanya, kuko bavuga ibitandukanye nta n’ubwo zafatwa nk’ukuri mu gihe bavuga ko Musabwasoni Asthérie yaguze aho hantu, ariko Musabwasoni Asthérie akaba atabasha kugaragaza amasezerano y’ubugure cyangwa uburyo ubwo butaka ari gakondo. Rurasanga kandi ibivugwa na Seminega Esperance ko hari igice cy’ubwo butaka yaguriye ababyeyi nabyo nta kigaragaza ko ari ukuri mu gihe atagaragaza amasezerano y’ubugure, bikaba bitanumvikana ukuntu yari kugurira ababyeyi be ubutaka hanyuma ngo abe nta kimenyetso na kimwe cyanditse afite cyekana ukuri kw’ibyo avuga cyangwa se ngo mu gihe cyo kubaruza ubutaka muri 2009 abe atarabubabarujeho kandi yari mu Rwanda. [34] Urukiko rurasanga usibye kuba Seminega Esperance avuga ko aho hantu ari gakondo ya basekuruza, nta kimenyetso na kimwe Musabwasoni Asthérie wasabye ko bumwandikwaho agaragaza cyekana ko ubwo butaka bwigeze buba ubwe, dore ko na mbere yuko hashyirwaho Ikigo gishinzwe imicungure n’imikoreshereze y’Ubutaka mu Rwanda hari hasanzwe hatangwa ibyangombwa byerekana ko ubutaka runaka ari ubwa runaka, aha twavuga nk’icyemezo cy’umutungo, acte de notoriété na Cerficat d’enregistrement. Kuba rero Musabwasoni Asthérie nta kimenyetso na kimwe cyanditse abasha kugaragaza cyerekana ko ubutaka yasabye kwandikwaho ari ubwe koko, kandi n’imvugo z’abatangabuhamya zikaba zivuguruzanya, birumvikana ko Urukiko Rukuru rutagomba kwemeza ko ubwo butaka bumwandikwaho. [35] Ku bijyanye n’urubanza rw’inshinjabyaha RP01256/2019/TB/KICU rwahamije Butore Ladislas icyaha cyo gutwara ikintu cy’undi hakoreshejwe uburiganya n’icyaha cyo kugurisha ikintu cy’undi, Musabwasoni Asthérie ashingiraho avuga ko ubutaka buburanwa ari ubwe, uru Rukiko rurasanga urwo rubanza rutashingirwaho nk’ikimenyetso hemezwa ko ubutaka buburanwa bubaruye kuri UPI: 1/03/05/03/3428 ari ubwa Musabwasoni Asthérie, kuko muri urwo rubanza nta hagaragara ko ikintu cy’undi Butore Ladislas yatwaye ari ubutaka bubaruye kuri UPI: 1/03/05/03/3428, cyane ko atari bwo butaka bwonyine bwari bumubaruyeho yagurishije cyangwa se yahererekanyije n’abandi, kuko nk’uko byagaragajwe haruguru, ku wa 10/05/2015, Butore Ladislas yakoze amasezerano y’ihererekanya ry’ubutaka bufite UPI: 1/03/05/03/3429, ubwo butaka bwandikwa kuri Mulisa Fred. [36] Urukiko rurasanga indi mpamvu ituma urubanza RP01256/2019/TB/KICU rutagomba gushingirwaho nk’ikimenyetso cyerekana ko umutungo uburanwa ari uwa Musabwasoni Asthérie ni uko urwo rubanza rukomoka ku kirego Musabwasoni Asthérie yareze Butore Ladislas mu bugenzacyaha avuga ko yamutumye kumubaruriza ubutaka hanyuma abwibaruzaho, hanyuma Butore Ladislas aburana yemera ibyo aregwa, ariko urwo rubanza ntirugaragaza ko ubwo butaka Butore Ladislas yibarujeho atari ubwe ari UPI:1/03/05/03/1322, cyangwa ari UPI: 1/03/05/03/3429 cyangwa se ari UPI: 1/03/05/03/3428. Ikindi kandi nk’uko byagaragajwe haruguru ntabwo Musabwasoni Asthérie agaragaza ibimenyetso byerekana ko ubutaka buburanwa muri uru rubanza

## Page 11

bubaruye kuri UPI: 1/03/05/03/3428 bwigeze buba ubwe n’inkomo yabo, bikaba rero byumvikana ko Urukiko Rukuru rwakoze ikosa kwemeza ko bumwandikwaho. [37] Hashingiwe ku bisobanuro bimaze gutangwa haruguru, Urukiko rurasanga nta bimenyetso Musabwasoni Asthérie atanga bidashidikanywaho kandi by’ukuri byashingirwaho n’Urukiko ngo ruteshe agaciro icyangombwa cy’iyandikisha ry’ubutakaka gifite UPI: 1/03/05/03/3428 bwanditse kuri Bugabo Jean Pierre, bityo ibyemejwe n’Urukiko Rukuru ko ubwo butaka ari ubwe kandi bumwandikwaho, bivanweho. Ibi binahura n’ibyemejwe n’uru Rukiko mu rubanza RS/INJUST/RC00007/2021/CA1 rwaciwe ku wa 30/10/2023, haburana Karumuhinzi Baudoux Claire na Nyirakaziga Kabeja Anne Marie, aho rwasobanuye ko ntakigaragaza ko umutungo aburana ari we mu gihe atabasha kugaragaza inkomoko idashidikanywaho y’umutungo wanditse ku mazina ya Nyirakaziga Kabeja Anne Marie, ufite ibyangombwa bigaragaza ko yawuguze na Karumuhinzi Laura ku mugaragaro hari abayobozi b’inzego z’ibanze kugera k’Ubuyobozi bw’Umurenge wa Musha. 2.Kumenya niba indishyi MUSABWASONI Asthérie yagenewe n’Urukiko Rukuru zifite ishingiro [38] Uhagarariye Bugabo Jean Pierre avuga ko nta ndishyi Musabwasoni Asthérie yari akwiye, ngo kuko icyo Urukiko rwashingiyeho mu gufata icyemezo batacyemeranywaho. [39] Uhagarariye Musabwasoni Asthérie n’uhagarariye Butore Ladislas bavuga ko icyashingiweho mu kuzigena gifite ishingiro kandi ko Urukiko rwazigennye mu bushishozi bwarwo. UKO URUKIKO RUBIBONA [40] Imikirize y’urubanza RCA00324/2021/HC/KIG rwaciwe n’Urukiko Rukuru ku wa 09/03/2023, igaragaza ko urwo Rukiko rwategetse Butore Ladislas, Kagame David, Mbabazi Phoibe na Bugabo Jean Pierre bafatanya guha Musabwasoni amafaranga angana na miliyoni imwe n’ibihumbi magana atatu (1.300.000Frw) y’indishyi z’ibyo yatanze z’igihembo cy’Avocat n’ikurikiranarubanza ku rwego rwa mbere no kuri urwo rwego rw’ubujurire, no kumusubiza ingwate y’amagarama yatanze. [41] Nk’uko byagaragajwe haruguru, Urukiko Rukuru rwakoze ikosa kwemeza ko ubutaka buraruye kuri UPI: 1/03/05/03/3428 bwandikwa kuri Musabwasoni Asthérie, bikaba rero byumvikana ko nta n’indishyi yagombaga kugenerwa n’urwo Rukiko. Kuba rero bigaragaye ko ibyo avuga nta shingiro bifite kuri uru rwego, birumvikana ko indishyi yagenewe mu rubanza rujuririrwa zihwanye na miliyoni imwe n’ibihumbi magana atatu (1.300.000Frw) ntaho zishingiye zikaba zivanweho. 3.Ibijyanye n’amafaranga y’ikurikiranarubanza n’igihembo cya Avoka 1 Reba igika 37.

## Page 12

[42] Uhagarariye Musabwasoni Asthérie n’uhagarariye Butore Ladislas mu myanzuro yabo basabye Urukiko rw’Ubujurire kwemeza ko imikirize y’urubanza RCA00324/2021/HC/KIG ihamyeho no kubaha indishyi z’akababaro, izo gusiragizwa mu Nkiko, n’igihembo cya Avoka. UKO URUKIKO RUBIBONA [43] Urukiko rurasanga nta ndishyi z’akababaro, izo gusiragizwa mu nkiko n’igihembo cya Avoka Musabwasoni Asthérie na Butore Ladislas bagomba guhabwa muri uru rubanza, kuko ubujurire bwa Bugabo Jean Pierre na Mbabazi Phoibe bwahawe ishingiro. III.ICYEMEZO CY’URUKIKO [44] Rwemeje ko ubujurire bwa Bugabo Jean Pierre na Mbabazi Phoibe bufite ishingiro. [45] Rwemeje ko urubanza RCA00324/2021/HC/KIG rwaciwe n’Urukiko Rukuru ku wa 09/03/2023, ruhindutse mu ngingo zarwo zose. [46] Rwemeje ko amasezerano y’ihererekanya mutungo yabaye ku mutungo uburanwa ufite UPI: 1/03/05/03/3428, uherereye mu Mudugudu wa Cyurusagara, Akagari ka Karama, Umurenge wa Kanombe, Akarere ka Kicukiro, Umujyi wa Kigali, agumyeho. [47] Rwemeje ko umutungo uburanwa ubaruye kuri UPI: 1/03/05/03/3428 utagomba kwandikwa kuri Musabwasoni Asthérie nk’uko byasobanuwe haruguru. [48] Ruvuze ko amagarama yatanzwe ahwanye n’ibyakozwe mu rubanza.