BURIZA v. DIVERSEY EAST&CENTRAL AFRICA Ltd

# BURIZA v. DIVERSEY EAST&CENTRAL AFRICA Ltd

- Source: Amategeko - Section: Decisions (Judgements) - Date: 2015-01-09 - Case/document no.: RCOMAA 0024/14//CS - Collection: Supreme Court

## Text

## Page 1

BURIZA v. DIVERSEY EAST&CENTRAL AFRICA Ltd [Rwanda URUKIKO RW’IKIRENGA – RCOMAA 0024/14//CS (Kanyange, P.J., Gakwaya na Hitiyaremye, J.) Kuwa 9/1/2015] Amategeko agenga ububasha bw’Urukiko rw’Ikirenga – Ububasha bw’Urukiko rw’Ikirenga – Ibimenyetso byatanzwe nyuma y’ipfundikira ry’iburaninsha – Umuburanyi ntiyavuga ko urukiko rwaciye urubanza rushingiye ku bimenyetso byatanzwe nyuma yo gupfundikira urubanza mu gihe atagaragaza aho urubanza rujuririrwa ruvuga kuri ibyo bimenyetso, Itegeko Ngenga nᵒ 03/2012 ryo kuwa 13/6/2012 rigena imiterere, imikorere n’ububasha by’Urukiko rw’Ikirenga, ingingo ya 28, igika cya 2, 3ᵒ. Incamake y’ikibazo: Diversey Ltd na PCP Ltd bagiranye amasezerano. Muri ayo masezerano Diversey yagombaga guha PCP Ltd ibicuruzwa, ikabicuruza hanyuma ikayiha inyungu ingana na 13.04% y’urwunguko. PCP Ltd yaje kurega Diversey mu Rukiko rw’Ubucuruzi rwa Nyarugenge ivuga ko yayishyuye 152.366 USD gusa kandi yaragombaga kuyishyura 256.249 USD, hakaba hasigaye 103.888.9 PCP itayishyuye. Urukiko rw’Ubucuruzi rwa Nyarugenge rwemeje ko Diversey igomba kwishyura PCP Ltd 45.453.67 USD, igatanga n’indishyi z’akababaro. Diversey Ltd yajuririye mu Rukiko Rukuru Rw’ubucuruzi ivuga ko nta yandi mafaranga yari yasigaye kwishyura PCP Ltd. Uru Rukiko rwaciye urubanza rwemeza ko nta mwenda Diversey ibereyemo PCP Ltd, rutegeka PCP Ltd kwishyura Diversey indishyi hamwe n’igihembo cya avoka. Buriza umuyobozi wa PCP Ltd yajuririye mu Rukiko Rw’Ikirenga avuga ko Urukiko Rukuru Rw’Ubucuruzi rwaciye urubanza rushingiye ku bimenyetso byatanzwe nyuma yo gupfundikira urubanza. Diversey avuga ko impanvu urega atanga nta kuri kurimo kubera ko atagaragaza aho urubanza rujuririrwa ruvuga icyo kimenyetso bashingiraho cyatanzwe muri dosiye urubanza rumaze gupfundikirwa. Akomeza avuga ko urubanza rujuririrwa ruri mu bubasha bw’Urukiko rw’Ikirenga kubera ko Urukiko Rukuru rw’Ubucuruzi rwaciye urubanza rushingiye ku nyandiko zatanzwe urubanza rupfundikirwa hatabayeho isubukurwa ry’urubanza ngo ababuranyi bose bayijyeho impaka. Incamake y’igisubizo: 1. Ubujurire ntiburi mu bubasha bw`Urukiko rw’Ikirenga n’ubwo rwose ubwanditsi bw’Urukiko Rukuru Rw’Ubucuruzi bwakiriye inyandiko zatanzwe nyuma yo gupfundikira urubanza no mu gihe kandi bigaragara ko Urukiko Rukuru rw’Ubucuruzi rutashingiye kuri izo nyandiko. Ubujurire ntiburi mububasha bw’Urukiko rw‘Ikirenga. Amagarama y’urubanza aherereye kuwareze. Amategeko yifashishijwe: Itegeko Ngenga nᵒ 03/2012 ryo kuwa 13/6/2012 rigena imiterere, imikorere n’ububasha by’Urukiko rw’Ikirenga, ingingo ya 28, igika cya 2, 3ᵒ.

## Page 2

Nta manza zashingiweho: Urubanza I. IMITERERE Y’URUBANZA [1] Diversey East & Central Africa Ltd na Professionnal Cleaning Product (P.C.P. Ltd) bagiranye amasezerano yasinywe kuwa 01/01/2011 no kuwa 05/01/2011 n’ayandi y’inyongera yasinywe n’impande zombi kuwa 23/08/2012. Hakurikijwe ayo masezerano, P.C.P. Ltd yagombaga guhabwa ibicuruzwa na Diversey East & Central Africa Ltd, ikabicuruza, hanyuma igahabwa inyungu ingana na 13.04% y’urwunguko yiswe “distributor margin’’ ku bicuruzwa Diversey East & Central Africa Ltd yazanye mu Rwanda kuva kuwa 01/01/2011 kugeza kuwa 31/12/2012. [2] P.C.P. Ltd yareze Diversey East & Central Africa Ltd mu Rukiko rw’Ubucuruzi rwa Nyarugenge ivuga ko yayishyuye USD 152.366 gusa kandi yaragombaga kwishyurwa USD 256.249, bityo hakaba harasigaye USD 103.888,9 atarishyurwa. [3] Urukiko rw’Ubucuruzi rwa Nyarugenge rwaciye urubanza RCOM 0803/13/TC/Nyge, kuwa 06/11/2013, rwemeza ko Diversey East & Central Africa Ltd igomba kwishyura P.C.P. Ltd USD 45.453,67 itishyuye, hakiyongeraho indishyi z’akababaro zihwanye na 1.000.000 Frw na 200.000 Frw y’ikurikiranarubanza n’igihembo cya avoka. [4] Diversey East & Central Africa yajuriye mu Rukiko Rukuru rw’Ubucuruzi kuwa 03/I2/2013, ivuga ko nta yandi mafaranga yari yasigaje kwishyura P.C.P. Ltd, ahubwo ko Urukiko rwashingiye ku mibare itariyo no kuri ‘‘motivation‘‘ itariyo mu kwemeza amafaranga yishyuwe, rugaca n‘indishyi za 1.000.000 Frw ndetse n‘igihembo cya Avoka kingana na 200.000 Frw kandi iyo habaho kubara neza no gushishoza k’urukiko ayo mafaranga aba atarayaciwe. [5] Urukiko Rukuru rw’Ubucuruzi rwaciye urubanza RCOM A 0535/14/HCC kuwa 14/03/2014, rwemeza ko nta mwenda Diversey East & Central Africa Ltd ibereyemo P.C.P. Ltd, rutegeka P.C.P. Ltd kwishyura Diversey East & Central Africa Ltd indishyi n’igihembo cya avoka bingana na 700.000 Frw. [6] BURIZA Espérance ntiyishimiye imikirize y’urubanza, arujuririra mu Rukiko rw’Ikirenga avuga ko Urukiko Rukuru rw’Ubucuruzi rwaciye urubanza rushingiye ku bimenyetso byatanzwe nyuma yo gupfundikira urubanza. [7] Diversey East & Central Africa Ltd yatanze inzitizi ivuga ko ntaho bigaragara mu rubanza rwajuririwe ko Urukiko rw’Ubucuruzi rwashingiye ku kimenyetso cyaje muri dosiye nyuma yo gupfundikira urubanza. [8] Urubanza rwaburanishijwe mu ruhame kuwa 25/11/2014 n’Urukiko rw’Ikirenga, BURIZA Espérance yunganirwa na Me RUKUNDO Emile naho Me KABERA Johnson aburanira Diversey East & Central Africa Ltd, ababuranyi bajya impaka ku nzitizi gusa.

## Page 3

II. ISESENGURA RY’IKIBAZO KIGIZE URUBANZA Kumenya niba ubu bujurire bwa BURIZA Espérance buri mu bubasha bw’Urukiko rw’Ikirenga [9] Me KABERA Johnson avuga ko impamvu urega atanga nta kuri kurimo kubera ko atagaragaza aho urubanza rujuririrwa ruvuga icyo kimenyetso bashingiraho cyatanzwe muri dosiye urubanza rumaze gupfundikirwa, ko urubanza yajuririye rusobanura neza icyo rwashingiyeho kandi ko bigaragara ko rwashingiye ku nyandiko zari zaratanzwe kuva mu Rukiko rw’Ubucuruzi arizo Professional Cleaning Products Payment Summary by Diversey East and Central Africa Ltd ndetse na PCP/Diversey Reconciliations at July 2012. [10] Akomeza asobanura ko izo nyandiko bashyikirije Urukiko zari muri dosiye kuva mu Rukiko rw’Ubucuruzi, ko kuri ‘‘Cote 62‘‘ ya dosiye y’Urukiko Rukuru rw’Ubucuruzi, iyo nyandiko ihari isa neza n’iyo bavuga ko yaje nyuma, kandi ko yanaburanishijweho n’Urukiko rw’Ubucuruzi itanzwe na Diversey East & Central Africa Ltd ariko Umucamanza ntayumve neza ari nayo mpamvu bajuririye Urukiko Rukuru. Byongeye kandi no muri kopi y’urubanza rujuririrwa, ku rupapuro rwa gatanu, igika cya 14 na 15, hakaba naho havugwa inyandiko yaturutse mu Rukiko rw’Ubucuruzi. [11] Ku bijyanye n’ibisobanuro birebana n’urwo rupapuro, avuga ko bari babitanze mu rukiko rubanza kuko urwo rupapuro rwari rusanzwe mu rukiko, kandi ko ‘‘annotations‘‘ ziriho ari amafaranga Diversey East & Central Africa Ltd yari ifitiye P.C.P. Ltd n’ayasigaye. [12] Me RUKUNDO Emile avuga ko urubanza rujuririrwa rwaburanishijwe ku rwego rwa kabiri n’Urukiko Rukuru rw’Ubucuruzi, rukaba ruri mu bubasha bw‘Urukiko rw’Ikirenga hashingiwe ku ngingo ya 28,agace ka 2, 3ᵒ n’iya 32 z‘Itegeko Ngenga n° 03/2012/OL ryo kwa 13/6/2012 rigena imiterere, imikorere, n’ububasha by’Urukiko rw’Ikirenga, kubera ko Urukiko Rukuru rwaciye urubanza rujuririrwa rushingiye ku nyandiko yatanzwe kuwa 5/3/2014, urubanza rupfundikirwa kuwa 10/2/2014, hatabayeho isubukurwa ry’urubanza ngo ababuranyi bose bayijyeho impaka. [13] Asobanura ko inyandiko zari muri dosiye mbere zitandukanye n’izo zatanzwe nyuma kuko hari ibyo Diversey East & Central Africa Ltd yongereyeho, kandi ko n’ibyo bisobanuro yatanze nyuma uwo baburana yagombaga kubyisobanuraho, ndetse ko niba icyo kimenyetso cyari muri dosiye nta mpamvu yari ihari yo kongera kugitanga cyane cyane ko yivugira ko umucamanza atari yabyumvise neza. Akomeza avuga ko ibyo bimenyetso byashingiweho bigatuma BURIZA Espérance adahabwa amafaranga yari yatsindiye. UKO URUKIKO RUBIBONA [14] Ingingo ya 28, igika cya 2, 3ᵒ y’Itegeko Ngenga nᵒ 03/2012 ryo kuwa 13/6/2012 rigena imiterere, imikorere n’ububasha by’Urukiko rw’Ikirenga iteganya ko ‘‘Urukiko rw’Ikirenga rufite kandi ububasha bwo kuburanisha mu rwego rw’ubujurire imanza zaciwe ku rwego rwa

## Page 4

kabiri n’Urukiko Rukuru, Urukiko Rukuru rw’Ubucuruzi cyangwa Urukiko Rukuru rwa Gisirikare, iyo zaciwe hashingiwe ku kimenyetso, inyandiko cyangwa imyanzuro byatanzwe nyuma yo gupfundikira urubanza kandi hatarabayeho gusubukura iburanisha‘‘. [15] Urukiko rw’Ikirenga rurasanga inyandiko ivugwa na BURIZA Espérance ko yatanzwe nyuma yo gupfundikira urubanza iri kuri ‘‘cote 73‘‘ ya dosiye y‘Urukiko Rukuru rw’Ubucuruzi irebana n’imbonerahamwe isobanura amafaranga impande zombi zari zifitanye. [16] Urukiko rw’Ikirenga rurasanga kandi iyo mbonerahamwe yari isanzwe muri dosiye kuva mu Rukiko rw’Ubucuruzi ariko aho itandukaniye n’iyatanzwe kuwa 5/3/2014 nyuma y‘uko Urukiko Rukuru rw’Ubucuruzi rupfundikira urubanza ari ibindi bisobanuro byongeweho bigaragaza amafaranga impande zombi zari zifitanye ariko nta gihinduwe ku mibare. [17] Byongeye kandi, Urukiko rw’Ikirenga rurasanga n’ubwo Ubwanditsi bw’Urukiko Rukuru rw’Ubucuruzi bwakiriye iyo nyandiko ivugwa na BURIZA Espérance, isuzuma ry’urubanza rwajuririwe rigaragaza ko mu gufata icyemezo cyarwo, Urukiko Rukuru rw’Ubucuruzi rutashingiye kuri iyo nyandiko. [18] Hashingiwe ku ngingo ya 28, igika cya 2, 3ᵒ y’Itegeko Ngenga nᵒ 03/2012 ryo kuwa 13/6/2012 ryavuzwe haruguru, BURIZA Espérance ashingiraho no ku bisobanuro byatanzwe, Urukiko rw`Ikirenga rurasanga mu gihe bigaragara ko Urukiko Rukuru rw’Ubucuruzi rutashingiye kuri iyo nyandiko yatanzwe nyuma yo gupfundikira urubanza, ubujurire bwe butari mu bubasha bw`uru Rukiko. III. ICYEMEZO CY’URUKIKO [19] Rwemeje ko ubujurire bwatanzwe na BURIZA Espérance butari mu bubasha bw`Urukiko rw`Ikirenga. [20] Rutegetse BURIZA Espérance kwishyura amagarama y`uru rubanza angana na 100.000 Frw.