UBUSHINJACYAHA v BUTARE

# UBUSHINJACYAHA v BUTARE

- Source: Amategeko - Section: Decisions (Judgements) - Date: 2025-10-20 - Case/document no.: RPAA 01103/2024/CA - Collection: Court of Appeal

## Text

## Page 1

UBUSHINJACYAHA v BUTARE [Rwanda – URUKIKO RW’UBUJURIRE - RPAA 01103/2024/CA (Rugabirwa, J.P.) 20 Ukwakira 2025] Amategeko agenga imanza z’inshinjabyaha – Igabanyagihano - Ugabanyirizwa ibihano ni uwemeye icyaha ku buryo budashidikanywaho akanagisabira imbabazi guhera nibura ku rwego rwa mbere. Incamake y’ikibazo: ku wa 28/11/2020, mu gihe cya saa cyenda zishyira saa kumi za nimugoroba, Butare Cyakabare yasanze Kubwimana mu rugo rwa Nyairamatabaro, umugore uyu Butare yari yarinjiriye, afata inkoni aramukubita kugeza aho apfiriye. Ubushinjacyaha bwatanze ikirego mu Rukiko rwisumbuye rwa Nyagatare busmurega icyaha cy’ubwicanyi. Uregwa yaburanye yemera icyaha anagisabira imbabazi, urukiko rusanga ahamwa n’icyaha cy’ubwicinyanyi bumuhanisha igifungo kigabanije cy’imyaka 25. Uregwa yajuririye icyo cyemezo mu Rukiko Rukuru asaba kugabanyirizwa kuko yabauranye yemera icyaha kandi akaba yarasembuwe, urukiko rusanga ubujurire bwe nta shingiro bufite. Yajuririye icyo cyemezo mu Rukiko rw’Ubujurire, uru rukiko rusuzuma ikibazo cyo kumenya niba yakongera kugabanyirizwa ibihano kubera ko yemera icyaha akanagisaba imbabazi. Uregwa avuga ko yaburanye yemera icyaha kandi akaba anagisambira imbabazi kuko yagikoze yitabara kubera ubusembure. Ubushinjacyaha buvuga ko uregwa atgabanyirizwa igihano kuko atemera icyaha mu buryo budashidikanywaho dore ko avuga ko yasembuwe kandi bitarabayeho ndetse nta nabitangire n’ibimenyetso. Incamake y’icyemezo: Ugabanyirizwa ibihano ni uwemeye icyaha ku buryo budashidikanywaho akanagisabira imbabazi guhera nibura ku rwego rwa mbere. Ubujurire, nta shingiro bufite. Nta mategeko yashingiweho. Imanza zifashishijwe: RPAA 0021/14/CS - nº RPAA 0022/14/CS, Ubushinjacyaha na Uzabakiriho Bernard na Ntabanganyimana, rwaciwe n’Urukiko rw’Ikirenga ku wa 13/10/201; RPAA 00048/2020/CA, Ubushinjacyaha na Bimenyimana Jean Paul rwaciwe n’Urukiko rw’Ubujurire ku wa 26/05/2022. Urubanza I. IMITERERE Y’URUBANZA

## Page 2

[1] Ubushinjacyaha bwakurikiranyeho Butare Cyakabare Fabien icyaha cy’ubwicanyi, kubera ko ku wa 28/11/2020, mu gihe cya saa cyenda zishyira saa kumi za nimugoroba, yishe uwitwa Kubwimana Emmanuel amusanze mu rugo rw'umugore Butare Cyakabare Fabien yari yarinjiye witwa Nyiramatabaro Marie, amukubita inkoni mu mbavu abonye undi yananiwe kweguka, yakomeje kumukubita inkoni kugeza apfuye, ariko ko Nyiramatabaro Marie yahuruje abaturanyi, kuko Butare Cyakabare Fabien yakubitiraga nyakwigendera mu nzu yayikinze. Butare Cyakabare Fabien yaburanye yemera icyaha anagisabira imbabazi. [2] Urukiko Rwisumbuye rwa Nyagatare rwaregewe, rushingiye ku mvugo ya Butare Cyakabare Fabien wemeye icyaha anagisabira imbabazi, ku mvugo z’abatangabuhamya bamushinja barimo Nyiramatabaro Marie, umugore we, rwaciye urubanza nº RP 01584/2020/TGI/NYG ku wa 11/01/2021, rwemeza ko Butare Cyakabare Fabien ahamwa n’icyaha cy’ubwicanyi, rumuhanisha igifungo cy’imyaka 25, rumugabanyirije igihano kubera ko yemeye icyaha kuva mu Bugenzacyaha kugera muri urwo Rukiko no kuba ari ubwa mbere aguye mu cyaha. [3] Butare Cyamatare Fabien yajuririye urwo rubanza mu Rukiko Rukuru, Urugereko rwa Rwamagana, arusaba kugabanyirizwa ibihano kubera ko yemeye icyaha anagisabira imbabazi, no kuba yarakoze icyaha abitewe n’ubusembure yakorewe na nyakwigendera ndetse asaba no kubisubikirwa. Naho uhagarariye Ubushinjacyaha avuga ko Butare Cyamatare Fabien atagabanyirizwa ibihano kuko yabigabanyirijwe bihagije ahanishwa igifungo cy’imyaka 25 aho guhanishwa igifungo cya burundu, kandi ko atasembuwe kuko yishe Kubwimana Emmanuel yabigambiriye ndetse ko atasubikirwa ibihano kubera ko yahanishijwe igifungo kiri hejuru y’imyaka 5. [4] Urukiko Rukuru rushingiye ku mvugo za Butare Cyakabare Fabien wemeye icyaha anagisabira imbabazi, ariko ko yagikoze yakigambiriye, rwaciye urubanza nº RPA 00340/2021/HC/RWG ku wa 11/11/2024, rwemeza ko urubanza rwajuririwe rudahindutse, ko igifungo cy’imyaka 25 Butare Cyamatare Fabien yahanishijwe kigumyeho, bityo ko atahabwa isubikagihano asaba kuko ahanishijwe igifungo kiri hejuru y’imyaka 5. [5] Butare Cyamatare Fabien yajuririye na none urwo rubanza mu Rukiko rw’Ubujurire, ubujurire bwe buhabwa nº RPAA 001103/2024/CA, urubanza rwaburanishijwe mu ruhame ku wa 07/10/2025, Butare Cyamatare Fabien yunganiwe na Me Kagame Alexis, naho Ubushinjacyaha buhagarariwe na Niyonkuru Françoise, Umushinjacyaha ku rwego rw’Igihugu. [6] Mu mwanzuro no mu miburanire, Butare Cyamatare Fabien n’umwunganira bavuga ko akwiye kongera kugabanyirizwa ibihano kubera ko yemeye icyaha anagisabira imbabazi, no kuba ari ubwa mbere agikoze yitabara kuko yari yasembuwe. [7] Naho uhagarariye Ubushinjacyaha avuga ko Butare Cyamatare Fabien atakongera kugabanyirizwa ibihano kuko yabigabanyirijwe bihagije, ko kandi atakoze icyaha abitewe n’ubusembure. [8] Urukiko rwasuzumye ikibazo cyo kumenya niba Butare Cyamatare Fabien yakongera kugabanyirizwa ibihano kubera ko yemera icyaha akanagisaba imbabazi.

## Page 3

II.ISESENGURA RY’IKIBAZO KIGIZE URUBANZA

Kumenya niba Butare Cyamatare Fabien yakongera kugabanyirizwa ibihano kubera ko yemera icyaha akanagisaba imbabazi

[9] Butare Cyamatare Fabien n’umwunganira bavuga ko akwiye kongera kugabanyirizwa ibihano kubera ko yemeye icyaha akanagisaba imbabazi, no kuba ari ubwa mbere agikoze atakigambiriye, ko ahubwo yagikoze bitewe n’ubusembure yakorewe na nyakwigendera, kuko yasanze amusambanyiriza umugore ku buriri, ubundi avuga ko ari muri salon, biramurakaza, bakarwana, Butare Cyamatare abatura umuhini awukubita nyakwigendera yitabara, ko Kubwimana Emmanuel yasohotse mu nzu aciye mu gikari ariko apfira ku irembo, aho abatangabuhamya bamusanze. [10] Bavuga ko hashingiwe ku ngingo ya 2 (b) y'Itegeko Nº 059/2023 ryo ku wa 04/12/2023 rihindura itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya uburyo ibihano bigabanywa iyo hari impamvu nyoroshyacyaha, Butare Cyamatare Fabien akwiye kongera kugabanyirizwa ibihano kubera impamvu nyoroshyacyaha zavuzwe haruguru, no ku murongo watanzwe mu rubanza RPAA 00227/2021/CA rwaciwe ku wa 18/01/2024, haburana Ubushinjacyaha na Kayitare Amini (igika cya 35) aho rwagaragaje ko ntacyabuza Urukiko rwajuririwe kongera kugabanyiriza uregwa igihano mu gihe rusanga kitaragabanyijwe mu buryo buhagije ubirebeye hamwe n’uburemere bw’icyaha cyakozwe, agahanishwa igihano cy’imyaka 15, aho kuba igifungo cy’imyaka 25 yahamijwe mbere. [11] Uhagahagarariye Ubushinjacyaha avuga ko Butare Cyamatare Fabien atakongera kugabanyirizwa ibihano kuko yabigabanyirijwe bihagije, kandi yarakoranye icyaha ubugome bukabije, ubwo yicaga Kubwimana Emmanuel amukubise inkoni kugeza amwishe, ko kandi atasembuwe na nyakwigendera kuko nta kimenyetso abitangira. [12] Asaba uru Rukiko kuzashingira ku mikirize y’urubanza RPAA 00178/2020/CA rwaciwe ku wa 28/04/2022, haburana Ubushinjacyaha na Ntezimana Jean Damascène, aho atagabanyirijwe ibihano kabone nubwo yemeye icyaha kuva mu Nzego z’iperereza, ndetse no ku rubanza n° RPA 0050/12/CS rwaciwe n’Urukiko rw’Ikirenga ku wa 06/05/2016, haburana Ubushinjacyaha na Pte Ntawurushimana Jean Bosco, aho atagabanyirijwe ibihano kubera ubugome bukabije yakoranye icyaha.

UKO URUKIKO RUBIBONA

[13] Ikibazo kijyanye n’ukwemera icyaha gushobora kugirira uregwa akamaro cyatanzweho umurongo mu rubanza nº RPAA 00048/2020/CA rwaciwe n’uru Rukiko ku wa 26/05/2022, mu gika cya 24, haburana Ubushinjacyaha na Bimenyimana Jean Paul, aho rwasobanuye ko ukwemera icyaha gushobora kugirira ushinjwa akamaro ari ugukozwe nibura iburanisha ku rwego rwa mbere ritarapfundikirwa.

## Page 4

[14] Naho iby’uko uregwa atagabanyirizwa ibihano kubera ubugome bukabije yakoranye icyaha cyatanzweho umurongo mu manza nyinshi zirimo urubanza nº RPAA 0021/14/CS - nº RPAA 0022/14/CS rwaciwe n’Urukiko rw’Ikirenga ku wa 13/10/201, haburana Ubushinjacyaha na Uzabakiriho Bernard na Ntabanganyimana Félicien, aho rwasobanuye ko n’ubwo Ntabanganyimana Félicien yemera icyaha aregwa, atagabanyirizwa ibihano kubera ubugome bukabije yakoranye icyaha. [15] Hashingiwe ku murongo watanzwe mu rubanza nº RPAA 00048/2020/CA rw’Ubushinjacyaha na Bimenyimana Jean Paul rwavuzwe haruguru, uvuga ko ugabanyirizwa ibihano ari uwemeye icyaha ku buryo budashidikanywaho akanagisabira imbabazi guhera nibura ku rwego rwa mbere, Urukiko rw’Ubujurire rurasanga Butare Cyamatare Fabien atakongera kugabanyirizwa ibihano kubera ko atemeye icyaha cy’ubwicanyi ku buryo budashidikanywaho, kuko aburanisha ubusembure kandi nta kimenyetso abutangira, uretse kubivuga gusa, kubera ko ntakigaragaza ko nyakwigendera Kubwimana Emmanuel yamusambanyirizaga umugore, kuko imbere y’uru Rukiko, uregwa yivugiye ko abatangabuhamya batabaye basanze nyakwigendera ku irembo aho yapfiriye. [16] Urukiko rw’Ubujurire rurasanga indi mpamvu ituma Butare Cyamatare Fabien atakongera kugabanyirizwa ibihano, ari ubugome bukabije yakoranye icyaha nk’uko byatanzweho umurongo mu rubanza rw’Ubushinjacyaha na Uzabakiriho Bernard na Ntabanganyimana Félicien rwavuzwe haruguru, ubwo yafatanga umuhini akawuhondaguza Kubwimana Emmanuel ku mubiri wose kugeza apfuye kandi nta kigaragaza ko nyakwigendera yamusembuye, kuko atigeze amurwanya. [17] Hashingiwe ku bisobanuwe haruguru, Urukiko rurasanga nta kosa Urukiko Rukuru, Urugereko rwa Rwamagana, rwakoze mu kutagabanyiriza Butare Cyakabare Fabien igihano, bivuze ko ubujurire bwe nta shingiro bufite, bityo imikirize y’urubana rwajuririwe ikaba itagomba guhinduka.

III. ICYEMEZO CY’URUKIKO

[18] Rwemeje ko ubujurire bwa Butare Cyakabare Fabien nta shingiro bufite. [19] Ruvuze ko imikirize y’urubanza nº RPA 00340/2021/HC/RWG rwaciwe n’Urukiko Rukuru, Urugereko rwa Rwamagana, ku wa 11/11/2024, idahindutse, ko igifungo cy’imyaka makumyabiri n’itanu (25) Butare Cyakabare Fabien yahanishijwe n’urwo Rukiko kigumyeho.