3 CAF ISONGA Ltd v kabundi (kinyarwanda)

3 CAF ISONGA Ltd v kabundi (kinyarwanda)

- Source: Amategeko - Section: Decisions (Judgements) - Date: 2013-10-01 - Case/document no.: RCOM 0006/13/CS - Collection: Supreme Court

Text

Page 1

Caf Isonga v. Kabundi [Rwanda SUPREME COURT –2O13SC – RCOM 0006/13/CS (Kayitesi R., P.J., Mukandamage and Kanyange, J.) October,01 2013] Amategeko y’imiburanishirize – kwakirwa kw’Ikirego cyihutirwa – Itegeko n° 21/2012 ryo kuwa 14/06/2012 ryerekeye imiburanishirize y’imanza mbonezamubano, iz’ubucuruzi, iz’umurimo, n’iz’ubutegetsi ,ingingo ya 316 Facts :Urega yareze mu Rukiko rw’Ubucuruzi asaba ko uwo uregwa yamwishyura umwenda wa 26.301.221 Frw n’inyungu zawo.Urukiko rwemeje ko agomba kwishyurwa 7.549.499Frw, Urega ntiyishimiye imikirize, ajuririra mu Rukiko rw’Ikirenga Urubanza ruhabwa n° RCOMA 0127/12/CS Mu gihe urwo rubanza rutaraburanishwa,Urega yatanze ikirego cyihutirwa gisaba urukiko gufatira amafaranga 2.900.000 Frw Uregwa yatsindiye mu rubanza RSOCA 0007/11/HC/NYA rwaciwe n’Urukiko Rukuru, urugereko rwa Nyanza, ngo kuko aramutse amutsinze, atazashobora kuyishyura. Held: Ikirego cyihutirwa kugira ngo cyakirwe bisaba ko kiba gifitanye isano n’ikirego cy’iremezo nk’uko ingingo ya 316 y’Itegeko nº 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ibiteganya, iyo nta sano bifitanye nticyakirwa. Ikirego nticyakiriwe Amategeko yifashishijwe: Itegeko n° 21/2012 ryo kuwa 14/06/2012 ryerekeye imiburanishirize y’imanza mbonezamubano, iz’ubucuruzi, iz’umurimo, n’iz’ubutegetsi ,ingingo ya 316 Imanza zashingiweho: Ntazo Urubanza I. IMITERERE Y’URUBANZA [1] CAF ISONGA yaburanye na KABUNDI Joseph wahoze ari umukozi wayo, itsindirwa amafaranga 2.900.000 mu rubanza RSOCA 0007/11/HC/NYA rwaciwe n’Urukiko Rukuru, urugereko rwa Nyanza. [2] Ku rundi ruhande CAF ISONGA nayo yareze KABUNDI Joseph mu Rukiko Rukuru rw’Ubucuruzi isaba ko ayishyura umwenda ungana na 26.301.221 Frw n’inyungu zawo ayirimo

Page 2

ukomoka ku nguzanyo y’imodoka yamuhaye, urukiko rwemeza ko agomba kwishyura 7.549.499 Frw, ajuririra Urukiko rw’Ikirenga urubanza ruhabwa no RCOMA 0127/12/CS. [3] Mu gihe urwo rubanza rutaraburanishwa, CAF ISONGA yatanze ikirego cyihutirwa isaba ko urukiko rufatira amafaranga 2.900.000 Frw KABUNDI Joseph arimo kuyishyuza yavuzwe haruguru, ngo kuko iramutse imutsinze, atazashobora kuyishyura. [4] Urubanza rwaburanishijwe mu ruhame tariki ya 24/09/2013, CAF ISONGA iburanirwa na Me NGENDAHIMANA Alphonse, KABUNDI Joseph yunganiwe na Me MINYATI RUGAMBA Jacob. II. IKIBAZO KIGIZE URUBANZA N’ISESENGURA RYACYO: Kumenya niba ikirego cyihutirwa cyatanzwe na CAF ISONGA cyakwakirwa. [5] Iburanisha ritangiye, KABUNDI n’umwunganira bavuze ko hari inzitizi zituma ikirego cyihutirwa cya CAF ISONGA kigamije gufatira amafaranga 2.900.000 Frw yayitsindiye mu rubanza RSOCA 0007/11/HC/NYA rwaciwe n’Urukiko Rukuru, urugereko rwa Nyanza, kitakirwa ngo gisuzumwe kuko uru rukiko nta bubasha rufite bwo kukiburanisha. Basobanura ko ingingo ya 317 CPCCSA iteganya ibyerekeye abacamanza basuzuma bene ibyo birego, umucamanza wo mu Rukiko rw’Ikirenga akaba atarimo, bakaba basanga ahubwo icyo kirego cyagombye kuba cyaratanzwe ubwo baburanaga mu Rukiko rw’Ubucuruzi kuko urubanza RSOC 0007/11/HC/NYA rwari rumaze ukwezi rwarabaye itegeko. [6] Bavuga ko kandi ingingo ya 309 CPCCSA iteganya inkiko zifite ububasha

bwo gusuzuma ibirego byerekeye impaka zavutse mu mihango y’ifatira, hakaba hatarimo Urukiko rw’Ikirenga. [7] KABUNDI n’umwunganira bavuga na none ko nk’uko biteganywa n’ingingo ya 316 CPCCSA, ikirego cyihutirwa kiba cyuririye ku kirego cy’iremezo umuburanyi yatanze, bikaba bitumvikana ukuntu CAF ISONGA itanga ikirego cyuririye ku kirego itigeze itanga, kuko ari we watanze ubujurire, byongeye kandi ngo amafaranga isaba gufatira ntaburanwa mu kirego cy’iremezo, ahubwo ni ayo yatsindiye mu rundi rubanza. Banzura bavuga ko nta n’inyungu CAF ifite yo gushinganisha ayo mafaranga kuko nta mwenda KABUNDI ayibereyemo kuko batazi uzatsinda urubanza. [8] Me NGENDAHIMANA uburanira CAF ISONGA avuga ko yatanze ikirego cyihutirwa kubera ko KABUNDI Joseph yatangiye imihango yo kwishyuza ku ngufu, umuhesha w’inkiko akaba yarahaye CAF ISONGA itegeko ryishyuza amafaranga 2.900.000 yatsindiye mu rubanza RSOC 0007/11/HC/NYA, mu gihe hari urundi rubanza RCOMA 0127/12/CS baburana KABUNDI yatsindiwemo 7.549.499 Frw n’inyungu zayo, CAF ISONGA ikaba isaba ko ayo mafaranga yishyuzwa yafatirwa ikaba iyabitse mu gihe hagitegerejwe icibwa ry’urwo rubanza kugira ngo izayahereho yiyishyura rurangiye, kuko aramutse ayatwaye itazabona ubwishyu kuko KABUNDI yananiwe kwishyura kuva yafata inguzanyo.

Page 3

[9] Ku byerekeranye n’ububasha bw’uru rukiko bwo kuburanisha ibirego byihutirwa, Me NGENDAHIMANA asanga Urukiko rw’Ikirenga rubufite, kuko itegeko riteganya ko hagomba kuba hariho ikirego cy’iremezo mu rukiko, ko ritavuga ko umuburanyi ashingira ku kirego yitangiye ubwe kugira ngo atange ikirego cyihutirwa, ko ndetse hari n’ibindi birego nk’iki rwakiriye rukabisuzuma, akaba asanga rero ingingo ya 316 CPCCSA ari rusange ku nkiko zose. Avuga kandi ko CAF ISONGA ifite inyungu yo kurega kuko KABUNDI ayibereyemo umwenda w’amafaranga menshi. Uko urukiko rubibona [10] Ku byerekeranye n’ububasha bw’urukiko bwo kuburanisha ibirego byihutirwa, ingingo ya 316 y’Itegeko nº 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko “iyo hari ikirego cy’iremezo, ariko hagomba kugira icyemezwa by’agateganyo mu buryo bwihutirwa ku rubanza rwaregewe urukiko rutaraburanishwa, ikirego cyihutirwa gishyikirizwa umucamanza ushinzwe kurangiza impaka zihutirwa w’aho zigomba gukemurirwa hakurikijwe uburyo busanzwe bw’ihamagara”. [11] Urukiko rurasanga, hashingiwe ku biteganywa n’iyo ngingo, mu gihe hari urubanza rw’iremezo rwaregewe Urukiko rw’Ikirenga, ariko hari ikigomba kwemezwa by’agateganyo kuri urwo rubanza mu gihe rutaraburanishwa, Urukiko rw’Ikirenga rufite ububasha bwo gusuzuma ikirego cyihutirwa rwashyikirijwe, si

ngombwa kandi ko kiba cyatanzwe n’uwajuriye gusa. [12] Ku birebana n’ikirego cyihutirwa CAF ISONGA yashyikirije uru Rukiko, rurasanga, n’ubwo hari urubanza rutaraburanishwa rufite nº RCOMA 0127/12/CS, KABUNDI Joseph aburana na CAF ISONGA umwenda w’amafaranga 26.301.221 Frw n’inyungu zayo, ibyo isaba mu kirego cyihutirwa ko amafaranga 2.900.000 Frw igomba kwishyura KABUNDI harangizwa urubanza RSOCA 0007/11/HC/NYA rwaciwe n’Urukiko Rukuru, urugereko rwa Nyanza afatirwa by’agateganyo ikayabika, ntaho bihuriye n’urwo rubanza, bityo icyo kirego kikaba kitagomba kwakirwa ngo gisuzumwe kuko kinyuranije n’ibiteganywa n’ingingo y’itegeko yavuzwe haruguru. III. ICYEMEZO CY’URUKIKO [13] Rwemeje ko ikirego cyihutirwa cyatanzwe na CAF ISONGA kitakiriwe kuko kidakurikije amategeko.