KOBIL PETROLEUM RWANDA Ltd v. MILIMO

# KOBIL PETROLEUM RWANDA Ltd v. MILIMO

- Source: Amategeko - Section: Decisions (Judgements) - Date: 2016-01-08 - Case/document no.: RS/INJUST/COM 0002/14/CS - Collection: Supreme Court

## Text

## Page 1

KOBIL PETROLEUM RWANDA Ltd v. MILIMO [Rwanda URUKIKO RW’IKIRENGA – RS/INJUST/COM 0002/14/CS (Hitiyaremye, P.J., Kanyange na Gakwaya, J.) 08 Mutarama 2016] Amategeko agenga imiburanishirize y’imanza z’ubucuruzi – Uburenganzira bwo kurega – sosiyete y’ubucuruzi ifite ubuzima gatozi – sosiyete y’ubucuruzi igira uburenganzira bwo kurega iyo ifite ubuzima gatozi – Ikirego nticyakirwa iyo umwe mu banyamigabane bagize sosiyete atanze ikirego ku giti cye mw’izina rya sosiyete mu gihe sosiyete ahagarariye ifite ubuzima gatozi – Ikirego nticyakirwa mu rukiko rwaregewe ngo gisuzumwe iyo uwagitanze adafite ububasha bwo kurega bityo urubanza ruvaho kuko impamvu z’akarengane zirebana n’urwo rubanza zitasuzumwa. Itegeko nº 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 2 Incamake y’ikibazo: Ste CITIEX SARL ihagarariwe na MILIMO Gaspard yakoranye na KOBIL PETROLEUM RWANDA SARL amasezerano y’ubwikorezi bw’amavuta, nyuma yaho MILIMO arega ROBIL mu Rukiko Rukuru rw’Ubucuruzi avuga ko itubahirije amasezerano bakoranye bituma agira igihombo, asaba urukiko gutegeka KOBIL kuyishyura amafaranga angana na 576.313.920 Frws y’igihombo avuga yamuteje, ay’ikurikiranarubanza n’ay’igihembo cy’avoka hamwe n’indishyi z’akababaro. Kubera ko urubanza rwaciwe KOBIL ititabye, yasabye ko rwasubirishwamo, urukiko rwemeza ko ugusubirishamo urubanza kwakiriwe. Nyuma yaho ariko MILIMO aza kujurira icyo cyemezo mu Rukiko rw’Ikirenga, rwemeza ko urubanza rutasubirwamo kubera ko nta mpamvu ikomeye yayibujije kwitaba urukiko. KOBIL yasubirishijemo ingingo nshya urubanza rwaciwe n’Urukiko Rukuru rw’Ubucuruzi, rwemeza ko ikirego kitakiriwe, yongera ijurira mu Rukiko rw’Ikirenga narwo rwemeza ko ubujurire bwe budateganyijwe n’amategeko. KOBIL ntiyarekeyaho, yaje kwandikira urwego rw’umuvunyi isaba ko urubanza rwaciwe n’Urukiko Rukuru rw’Ubucuruzi rwasubirishwamo ku mpamvu z’akarengane, urukiko rusuzuma ikibazo cyabyukijwe narwo cyo kumenya niba CITIEX S.A.R.L ari sosiyete y’ubucuruzi cyangwa ari izina ry’ubucuruzi rya Milimo Gaspard mu rwego rwo kumenya niba MILIMO ari we wagombaga gutanga ikirego. Kuri iki kibazo KOBIL yiregura ivuga CITIEX ari sosiyete y’ubucuruzi ifite ubuzima gatozi hashingiwe ku nyandiko yahawe n’Ikigo cy’igihugu gishinzwe iterambere (RDB), ikaba ariyo yagombaga gutanga ikirego, bityo ko ikirego Milimo yatanze kitagombaga kwakirwa kuko cyatanzwe n’utaragiranye amasezerano na KOBIL. Kobil ikomeza ivuga ko hari inyandiko zatanzwe na RDB zigaragaza ko CITIEX yishyuye amafaranga yo gutangaza statuts zayo mu gazeti ya leta ariko ko MILIMO atashatse kuzigaragaza, ivuga ko nubwo statuts zitatangajwe nk’uko bivugwa, ibyo ntibyamuhesha uburenganzira bwo gutanga ikirego kuko amasezerano yabaye hagati ya KOBIL na CITIEX. Ivuga kandi ko nta Tegeko ryemerera abagize sosiyete gutanga ikirego ahubwo gitangwa na sosiyete ubwayo. Kobill isoza isaba ko ibyemezo by’inkiko byabanje byakurwaho kuko hareze

## Page 2

utaragombaga kurega, inkiko zigaha indishyi utaragombaga kuzihabwa kuko atari we wasinye amasezerano. MILIMO yisobanura avuga yagenerwa indishyi kuko yari afite uburenganzire bwo kurega kubera ko igihe yatangaga ikirego Ste CITIEX ntiyaririho kuko itari yujuje ibisabwa n’amategeko kugirango yandikwe muri RDB, avuga kandi ko statuts zayo zitigeze zitangazwa. Incamake y’icyemezo: 1. Ikirego nticyakirwa mu rukiko ngo gisuzumwe iyo uwagitanze adafite ububasha bwo kurega bityo urubanza ruvaho kuko impamvu z’akarengane zirebana n’urwo rubanza zitasuzumwa. Nta bubasha uwareze yari afite bwo gutanga ikirego . Amagarama y’urubanza aherereye kuwareze. Amategeko yashingiweho: Itegeko Nº21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi,ingingo ya 2 Nta manza zifashishijwe: Urubanza I. IMITERERE Y’URUBANZA [1] Uru rubanza rukomoka ku masezerano y’ubwikorezi bw’amavuta yabaye hagati ya CITIEX S.A.R.L na KOBIL PETROLEUM RWANDA S.A.R.L, MILIMO Gaspard akaba yarareze Kobil Petroleum Rwanda S.A.R.L avuga ko itubahirije ayo masezerano bikamutera igihombo. [2] Urukiko Rukuru rw’Ubucuruzi rwaciye urubanza RCOM 0103/09/HCC, rwemeza ko Kobil Petroleum Rwanda S.A.R.L itubahirije amasezerano yo ku wa 01/05/2006 yagiranye na CITIEX S.A.R.L. ya MILIMO Gaspard, rutegeka Kobil Petroleum Rwanda S.A.R.L. kumwishyura 576.313.920 Frw y’igihombo yamuteje na 2.500.000 Frw y’ikurikiranarubanza n’igihembo cya avoka, hamwe na 5.000.000 Frw y’indishyi z’akababaro. [3] Kobil Petroleum Rwanda Ltd yasubirishijemo urwo rubanza rwari rwaciwe ititabye, Urukiko Rukuru rw’Ubucuruzi rwemeza ko gusubirishamo urubanza kwakiriwe, MILIMO Gaspard ajuririra icyo cyemezo mu Rukiko rw’Ikirenga, rwemeza ko nta mpamvu ikomeye yabujije Kobil Petroleum Rwanda S.A.R.L kwitaba Urukiko Rukuru rw’Ubucuruzi, ikaba itemerewe isubirishamo ry’urubanza. [4] Kobil Petroleum Rwanda Ltd yasubirishijemo urubanza RCOM 0103/09/HCC ingingo nshya mu Rukiko Rukuru rw’Ubucuruzi, rwemeza ko ikirego cyayo kitakiriwe, ijuririra mu Rukiko rw’Ikirenga, rwemeza ko ubwo bujurire budateganyijwe n’amategeko.

## Page 3

[5] Nyuma y’izo manza, Kobil Petroleum Rwanda Ltd yandikiye Urwego rw’Umuvunyi isaba ko urubanza RCOM 0103/09/HCC rwasubirishwamo ku mpamvu z’akarengane, nyuma yo gusuzuma impamvu zayo, Urwego rw’Umuvunyi rwandikira Urukiko rw’Ikirenga ku wa 16/09/2014 rusaba ko urubanza RCOM 0103/09/HCC rusubirwamo ku mpamvu z’akarengane. Amaze gusuzuma raporo y’Ubugenzuzi Bukuru bw’Inkiko, Perezida w’Urukiko rw’Ikirenga yemeje ko dosiye ishyikirizwa ubwanditsi kugira ngo urubanza ruburanishwe. [6] Habanje gusuzumwa inzitizi yatanzwe na MILIMO Gaspard yo kutakira ikirego cya Kobil Petroleum Rwanda Ltd, mu rubanza rubanziriza urundi rwo ku wa 09/01/2015, Urukiko rwemeza ko nta shingiro ifite. Iburanisha ryakomeje ku wa 25/11/2015, Kobil Petroleum Rwanda Ltd ihagarariwe na Me RUTABINGWA Athanase hamwe na Me MUGENI Anita, MILIMO Gaspard ahagarariwe na Me KAYITARE Serge, hasuzumwa ikibazo cyabyukijwe n’Urukiko cyo kumenya niba CITIEX S.A.R.L ari sosiyete y’ubucuruzi cyangwa ari izina ry’ubucuruzi rya Milimo Gaspard, icyo kibazo kikaba cyarabyukijwe mu rwego rwo kumenya niba MILIMO Gaspard ari we wagombaga gutanga ikirego gishingiye ku masezerano yo ku wa 01/05/2006 yabaye hagati ya Kobil Petroleum Rwanda S.A.R.L na CITIEX S.A.R.L. IKIBAZO KIRI MU RUBANZA N’ISESENGURA RYACYO. ●Kumenya niba MILIMO Gaspard ari we wagombaga gutanga ikirego gishingiye ku masezerano yo ku wa 01/05/2006. [7] Ababuranira Kobil Petroleum Rwanda Ltd bavuga ko inyandiko zatanzwe n’Ikigo cy’igihugu gishinzwe iterambere (RDB), zigaragaza ko CITIEX S.A.R.L ari sosiyete y’ubucuruzi yabayeho ku wa 19/05/2004 igizwe n’abanyamigabane barindwi barimo na Milimo Gaspard, ko rero igihe yakoranaga amasezerano na Kobil Petroleum Rwanda S.A..R.L. ku wa 01/05/2006 yari ifite ubuzimagatozi kandi yemerewe gukora amasezerano, ikaba ariyo yagombaga gutanga ikirego. Bakomeza bavuga ko kuba mu rubanza RADA 0001/05/CS rwaciwe n’uru Rukiko ku wa 24/07/2013 haremejwe ko CITIEX S.A.R.L ari izina ry’ubucuruzi rya Milimo Gaspard, byatewe n’uko Umujyi wa Kigali baburanaga utashoboye kugaragaza ibimenyetso Kobil Petroleum Rwanda Ltd igaragaza ubu, byerekana ko ari sosiyete y’ubucuruzi, ko rero hashingiwe ku ngingo ya 2 y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ikirego Milimo Gaspard yatanze kitagombaga kwakirwa kuko cyatanzwe n’utaragiranye amasezerano na Kobil Petroleum Rwanda S.A.R.L. [8] Bakomeza bavuga ko ingingo ya 7 y’Itegeko nº 06/1988 ryo ku wa 12/02/1988 ryerekeye amasosiyete y’ubucuruzi yateganyaga ko sosiyete ibona ubuzimagatozi ku munsi yandikiweho mu gitabo cy’ubucuruzi, ko CITIEX S.A.R.L yanditswe muri icyo gitabo ku wa 10/12/2004, ikaba ishobora no kuba yaratangajwe mu Igazeti ya Leta kuko inyandiko y’Urukiko rw’Umujyi wa Kigali yo ku wa 27/07/2005 igaragaza ko CITIEX S.A.R.L yari mu masosiyete yagombaga gutangazwa (arriérés des actes de sociétés à publier au Journal Officiel.), ko kandi ibivugwa mu ngingo ya 18 y’Itegeko rimaze kuvugwa byabuzaga sosiyete itaratangaje ‘’Statuts’’ gutanga ikirego ariko bitayamburaga ubuzimagatozi.

## Page 4

[9] Basobanura ko inyandiko zatanzwe na RDB zigaragaza ko CITIEX S.A.R.L yishyuye amafaranga yo kugira ngo ‘’Statuts’’ zayo zitangazwe mu Igazeti ya Leta ikaba yaranishyuye ihazabu y’ubukererwe, ko gusa Milimo Gaspard atashatse kugaragaza Igazeti ya Leta izo ‘’Statuts’’ zatangajwemo. Bavuga kandi ko n’ubwo byafatwa ko izo ‘’Statuts’’ zitatangajwe, atari byo biha uburenganzira Milimo Gaspard bwo gutanga ikirego mu izina rye mu gihe amasezerano aregerwa yabaye hagati ya Kobil Petroleum Rwanda S.A.R.L.na CITIEX S.A.R.L kandi iyi akaba ari sosiyete igizwe n’abanyamigabane batandukanye. [10] Na none kandi ngo usibye ko nta Tegeko ryemerera abagize sosiyete gutanga ikirego ahubwo gitangwa na sosiyete ubwayo, nta n’ubwo byafatwa ko Milimo Gaspard yatanze ikirego afite abo ahagarariye kuko n’iyo biza kuba byo atari kugitanga mu izina rye, naho ibirebana na ‘’Certificate of Enterprise Registration’ iri muri dosiye, bavuga ko itarebana na sosiyete CITIEX S.A.R.L yashinzwe muri 2004 ahubwo irebana n’ubucuruzi bwa Milimo Gaspard ku giti cye. [11] Basobanura kandi ko hashingiwe ku ngingo ya 385 y’Itegeko ryerekeye amasosiyete y’ubucuruzi rikurikizwa ubu, basanga CITIEX S.A.R.L iriho ariko ikaba igomba kuzuza ibisabwa n’amategeko, ko kandi kuba itariyandikishije muri RDB nk’uko iryo Tegeko ribiteganya, bidasobanuye ko iyo sosiyete iba ivuyeho kuko sosiyete ivanwaho n’iseswa ryayo, ko kandi n’ubwo yaba itakiriho, nabyo bidaha Milimo Gaspard uburenganzira bwo kurega ku giti cye. Basanga ahubwo hashingiwe ku biteganywa n’ingingo ya 346 y’Itegeko rimaze kuvugwa, CITIEX S.A.R.L. ari sosiyete idakora, ko kandi kuba ikirego cyaratanzwe muri 2009, ntacyari kubuza ko gitangwa na CITIEX S.A.R.L kuko Itegeko rishya ryerekeye amasosiyete y’ubucuruzi ridateganya ibyo gutangaza ‘’Statuts’’ mu Igazeti ya Leta. [12] Mu gusoza, bavuga ko kuba amasezerano yarabaye hagati ya Kobil Petroleum Rwanda S.A.R.L. na CITIEX S.A.R.L ariko hakarega Milimo Gaspard, bivuze ko hareze utagombaga kurega, n’inkiko ziha indishyi utarasinye amasezerano, ko ku bw’izo mpamvu, basaba ko ibyemezo by’inkiko byabanje byakurwaho. [13] Ku ruhande rw’uburanira Milimo Gaspard, yabanje gusobanura mu myanzuro yanditse ko CITIEX ari izina ry’ubucuruzi bwa Milimo Gaspard, ko kuba mu masezerano aburanwa haranditswe CITIEX S.A.R.L byatewe no kwibeshya kwakozwe na Kobil yateguye ayo masezerano, ko kandi icyo kibazo cyagiweho impaka mu manza RCOM 0395/08/HCC na RADA 0001/05/CS, inkiko zemeza ko nta sosiyete ibaho yitwa CITIEX S.A.R.L. [14] Nyuma yo kugaragarizwa inyandiko zaturutse muri RDB, uburanira Milimo Gaspard yahinduye imiburanire, avuga ko muri 2004 yashatse gushinga sosiyete afatanyije n’abana be ariko ibijyanye no kuyiha ubuzimagatozi ntibyarangira kuko amategeko shingiro yayo (Statuts) atatangajwe mu Igazeti ya Leta, ku buryo nta sosiyete yari iriho yashoboraga gutanga ikirego, ko Milimo Gaspard ariwe washoboraga kugitanga mu izina rye kuko hashingiwe ku ngingo ya 18 y’Itegeko ryagengaga amasosiyete, ikirego iyo sosiyete yari gutanga kitari kwakirwa, n’ubwo yashoboraga gucuruza no gukora amasezerano. [15] Asobanura ko mu gutanga ikirego, Milimo Gaspard yabikoze mu nyungu ze n’iz’umuryango kuko yabonaga sosiyete itujuje ibisabwa n’amategeko kugira ngo irege, ko kandi kugeza uyu munsi iyo sosiyete itigeze ibona ubuzimagatozi. Ku kibazo cyo kumenya abagize iyo yosiyete, Uburanira Milimo Gaspard yasobanuye ko harimo abana batatu ba Milimo

## Page 5

Gaspard bakiri bato, mukuru wa Milimo Gaspard, muramu we na mubyara we bose bafite imyaka y’ubukure. [16] Avuga kandi ko nta mafaranga yishyuwe yo kugira ngo sosiyete itangazwe mu Igazeti ya Leta, ko inyandiko abo baburana batanze igaragaza gusa ko ari amafaranga yagombaga kwishyurwa ariko akaba atarishyuwe. [17] Asanga CITIEX S.A.R.L uyu munsi ntayiriho kandi n’igihe ikirego cyatangwaga ntayariho, ko kuba ‘’Statuts’’ zitaratangajwe, zifite agacirio hagati y’abagize sosiyete gusa ariko zidashobora kugira ingaruka ku bandi bantu, ko kandi ingingo ya 7 y’Itegeko ryagengaga amasosiyete ritakoreshwa kuri CITIEX S.A.R.L kuko ‘’Statuts’’ zitigeze zitangazwa. Avuga kandi ko ikirego cyatanzwe muri 2009 Milimo Gaspard yaramaze gufata icyemezo cyo kudakomeza ibirebana na sosiyete CITIEX S.A.R.L, ko hashingiwe ku ngingo ya 385 yItegeko rishya rigenga amasosiyete iteganya igihe cy’imyaka ibiri kugira ngo sosiyete ibe yujuje ibisabwa n’iryo Tegeko, iyo myaka ikaba yararangiye muri 2011, bivuze ko CITIEX S.A.R.L itabaho muri RDB, ko kandi sosiyete yashoboraga kujyanwa muri RDB ari iyabaga yujuje ibisabwa n’amategeko, CITIEX S.A.R.L ikaba itari ibyujuje. [18] Asanga ibyo abo baburana basaba ko imanza zabanje zavanwaho byatera akarengane Milimo Gaspard kuko yaba abujijwe uburenganzira bwe bwose bitewe n’uko sosiyete CITIEX S.A.R.L itarega kuko itigeze ibaho, ko ahubwo kuba sosiyete itariho, indishyi zagenerwa Milimo Gaspard, abandi bagize sosiyete bakaba aribo bagaragaza ko bibabangamiye. UKO URUKIKO RUBIBONA [19] Ingingo ya 2 y’Itegeko nº 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko ‘’ikirego kitemerwa mu rukiko iyo urega adafite ububasha, inyungu n’ubushobozi bwo kurega’’. [20] Ingingo ya 142 y’Itegeko nº 21/2012 ryo ku wa 14/06/2012 rimaze kuvugwa, iteganya ko ‘’Impamvu ituma ikirego kitakirwa ishobora kubyutswa n’umuburanyi cyangwa n’urukiko rubyibwirije’’. Mu gika cyayo cya kabiri, iyo ngingo iteganya kandi ko, ‘’Impamvu zituma ikirego kitakirwa zigaragazwa n’urukiko rubyibwirije iyo ari ndemyagihugu, nko kurenza igihe cyo kujurira cyangwa kutagira ububasha, ubushobozi cyangwa inyungu byo kurega’’. [21] Inyandiko ababuranira Kobil Petroleum Rwanda Ltd bagejeje ku Rukiko zitanzwe n’Ikigo RDB, zigaragaza ko CITIEX S.A.R.L ari sosiyete y’ubucuruzi yashinzwe ku wa 19/05/2004 nk’uko ‘’Statuts’’ zayo ziriho kashe ya Noteri zibigaragaza, izo ‘’statuts’’ zikaba zigaragaza ko abanyamigabane b’iyo sosiyete ari Milimo Gaspard, Munyabahutu Augustin, Milimo Iradukunda Cédric, Vunabandi Patrick, Milimo Ishimwe Edric, Munyana Diane, Maniraho Narcisse. [22] Inyandiko zatanzwe na RDB zigaragaza kandi ko CITIEX S.A.R.L yanditswe mu bitabo by’ubucuruzi (Registre de commerce) ku wa 10/12/2004 kuri RCA 2761/Kig. Hari kandi inyandiko y’Urukiko rw’Umujyi wa KIGALI yo ku wa 27/07/2005 yerekeranye n’ibirarane bya ‘’Statuts’’ zagombaga gutangazwa mu Igazeti ya Leta (Arriérés des actes de sociétés à publier au Journal Officiel), igaragaza ko ku birebana na CITIEX S.A.R.L, hasuzumwe ibirebana

## Page 6

n’amafaranga yagombaga kwishyurwa yerekeye iryo tangazwa (…certifie avoir vérifié, ce jour, la régularité des droits dus au Trésor Public en vue de la publication au Journal Officiel des statuts de CITIEX S.A.R.L), inerekana umubare w’amafaranga yishyuwe (droits payés). [23] Hashingiwe ku bimaze kugaragazwa, Urukiko rurasanga CITIEX S.A.R.L ari sosiyete y’ubucuruzi yabayeho inafite ubuzimagatozi kuva ku wa 10/12/2004 kuko ingingo ya 7 y’Itegeko ryo ku wa 12/02/1988 ryakurikizwaga icyo gihe yateganyaga ko ‘’sosiyete igira ubuzimagatozi kuva ku munsi yandikiwe mu bitabo by’ubucuruzi’’, kandi nta kigaragaza ko yigeze iseswa mu buryo ubwo aribwo bwose, binashimangirwa n’ibaruwa y’Umwanditsi Mukuru muri RDB (Registrar General) yandikiye Me Mugeni Anita yohereza inyandiko zavuzwe haruguru, aho nyuma yo kugaragaza ko CITIEX S.A.R.L yanditse mu bitabo by’ubucuruzi kuri RCA 2761/KIG, anavuga ko iyo sosiyete igomba kongera kwiyandikisha mu rwego rwo kubahiriza Itegeko rishya rigenga amasosiyete (….we hereby present to you the Certificate domestic company registration, for CITIEX SARL registered in register for companies under RCA 2761/KIG. Please note that the company has to be re-registered in order to comply with the companie’s Act of 2009). [24] Urukiko rurasanga n’ubwo ibisabwa kugira ngo ‘’Statuts’’ za CITIEX S.A.R.L zitangazwe mu Igazeti ya Leta byari byujujwe, nta kigaragaza ko byakozwe kuko iyo Gazeti itabashije kugaragazwa, ibyo ariko ubwabyo bikaba bitabuza kuba CITIEX S.A.R.L yari iriho nk’uko byavuzwe haruguru, ingaruka y’iryo tangazwa ritakozwe ikaba yari ukutemererwa gutanga ikirego hashingiwe ku byateganywaga n’ingingo ya 18 y’Itegeko ryo ku wa 12/02/1988 ryavuzwe haruguru 1. [25] Urukiko rurasanga ariko, n’ubwo uburanira Milimo Gaspard avuga ko ikirego cya CITIEX SARL kitari kwakirwa hashingiwe ku ngingo ya 18 imaze kuvugwa, bigaragara ko cyatanzwe iyo ngingo itagikurikizwa kuko inyandiko itanga icyo kirego ari iyo ku wa 19/06/2009, icyo gihe hakaba harakurikizwaga Itegeko nº 07/2009 ryo ku wa 27/04/2009 ryerekeye amasosiyete y’ubucuruzi nk’uko ryavuguruwe kugeza ubu, iryo Tegeko rikaba ntaho riteganya ko sosiyete igomba gutangaza ‘’Statuts’’ zayo mu Igazeti ya Leta kugira ngo ibashe gutanga ikirego. Uretse kandi no kuba iyo ngingo itari igikurikizwa, nta ngingo y’Itegeko uburanira Milimo Gaspard yagaragaje imuha uburenganzira bwo kurega ku giti cye mu gihe amasezerano ikirego gishingiyeho yabaye hagati ya Kobil Petroleum Rwanda S.A.R.L na CITIEX S.A.R.L, akaba ataranareze nk’uhagarariye iyo sosiyete kuko atanemera ko yabayeho. [26] Urukiko rurasanga kandi, kuba imyaka ibiri iteganywa n’ingingo ya 385 y’Itegeko nº 07/2009 ryo ku wa 27/04/2009 ryavuzwe haruguru yararenze CITIEX S.A.R.L itarongera kwiyandikisha muri RDB, bitavuze ko itakiriho kuko iyo ngingo atari ko ibiteganya ahubwo ingingo ya 81 y’iryo Tegeko iteganya ko isosiyete iyo ariyo yose yanditswe hakurikijwe itegeko rivanyweho igomba gufatwa nkaho yanditswe hakurikijwe iri Tegeko (ni ukuvuga itegeko rishya) kandi rigomba gukurikizwa kuri iyo sosiyete (….). Byongeye kandi, ubwo ikirego cyatangwaga ku wa 19/06/2009, iyo myaka ibiri iteganywa n’iyo ngingo yari itararangira. 1 Est irrecevable, toute action intentée par une société dont l’acte constitutif n’a pas été publié ou dont la mention ne figure pas à l’acte introductif. L ‘irrecevabilité est prononcée d’office mais elle peut être couverte par la publication ou sa mention faite en cours d’instance. (…).

## Page 7

[27] Ku birebana n’imanza uburanira Milimo Gaspard avuga ko zakemuye ikibazo zemeza ko CITIEX S.A.R.L ari izina ry’ubucuruzi bwa Milimo Gaspard, Urukiko rurasanga kuba byaremejwe bityo byaratewe n’uko nta nyandiko zirebana na CITIEX S.A.R.L nka sosiyete y’ubucuruzi zigeze zigaragazwa nk’uko byagenze muri uru rubanza. [28] Urukiko rurasanga rero harebwe igihe ikirego cyatangiwe n’tegeko ryakurikizwaga, ntacyari kubuza CITIEX Ltd gutanga ikirego kirebana n’amasezerano yakoranye na Kobil Petroleum Rwanda SARL, kuba cyaratanzwe na Milimo Gaspard ku giti cye utabifitiye ububasha, kikaba kitaragombaga kwakirwa, bityo urubanza RCOM 0103/109/HCC rwaciwe n’Urukiko Rukuru rw’Ubucuruzi ku wa 06/08/2010 rukaba rugomba kuvaho, akaba atari na ngombwa gusuzuma impamvu z’akarengane zirebana n’urwo rubanza zari zatanzwe na Kobil Petroleum Rwanda Ltd. III.ICYEMEZO CY’URUKIKO [29] Rwemeje ko nta bubasha Milimo Gaspard yari afite bwo gutanga ikirego gishingiye ku masezerano yabaye hagati ya Kobil Petroleum Rwanda S.A.R.L na CITIEX S.A.R.L; [30] Rwemeje ko urubanza RCOM 0103/109/HCC rwaciwe n’Urukiko Rukuru rw’Ubucuruzi ku wa 06/08/2010 ruvanyweho, akaba atari na ngombwa gusuzuma impamvu z’akarengane zirebana n’urwo rubanza; [31] Rutegetse MILIMO Gaspard gutanga amagarama y’urubanza angana na 100.000 Frw.