BALTON CP v. NEW CENTURY DEVELOPMENT Ltd (NCD Ltd)

# BALTON CP v. NEW CENTURY DEVELOPMENT Ltd (NCD Ltd)

- Source: Amategeko - Section: Decisions (Judgements) - Date: 2022-09-23 - Case/document no.: RCOMAA 00040/2022/CA - Collection: Court of Appeal

## Text

## Page 1

BALTON CP v. NEW CENTURY DEVELOPMENT Ltd (NCD Ltd) [Rwanda URUKIKO RW UBUJURIRE – RCOMAA 00040/2022/CA, (Ngagi, P.J.,) 23 Nzeli 2022] Amategeko agenga imiburanishirize y’ imanza z’ ubucuruzi – Ikirego cyihutirwa – Ibihe byo kujurira ikirego cyihutirwa – Urubanza rwa burundu ku kirego cy’iremezo rutuma ifatira rihinduka ifatirabwishyu iyo uwareze atsinze, bene urwo rubanza ruburanishwa mu buryo bw’ibirego byihutirwa – Mu kubara ibihe byo kujuririra icyemezo cyihutirwa harebwa umunsi igikorwa cyakoreweho nukuvuga umunsi icyemezo cyasomeweho, hakabarwa igihe cy’iminsi itatu y’akazi, iyo ibyo bihe bitubahirijwe ubujurire ntibwakirwa ngo busuzumwe kuko buba bwatanzwe impitagihe – Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 188, iya 232 niya 275. Incamake y ikibazo: Uru rubanza rwatangiriye mu Rukiko rw’Ubucuruzi sosiyete BALTON CP irega sosiyete New Century Development Ltd (NCD Ltd), ivuga ko yagiranye nayo amasezerano yo kugemura ibikoresho bya sosiyete BMS System of Kigali Marriot kandi ko impande zombi zumvikanye ko ikiguzi cy’ibikoresho ari 169.849, 68 USD. Sosiyete BALTON CP ivuga ko yubahirije inshingano zayo igemura ibikoresho bumvikanye ibishyikiriza NCD Ltd irabyakira irabishima, ariko ko NCD Ltd itubahirije amasezerano bagiranye, kuko yishyuye 108.849,69USD ariko hasigara 61.000 USD; bityo ko isaba Urukiko kwemeza ko NCD Ltd iyifitiye umwenda w’ubucuruzi yanze kwishyura ku neza, irusaba kandi kwemeza ko ifatira ryakoze rihinduka ifatirabwishyu. Sosiyete NCD Ltd yatanze inzitizi isaba Urukiko gutegeka BALTON CP gutanga ingwate itangwa n’abanyamahanga kuko ari sosiyete itanditswe mu Rwanda kandi idakomoka mu bihugu by’Umuryango w’Afurika y’Iburasirazuba, kandi ko ikirego cyatanzwe na BALTON CP kitagomba kwakirwa kubera ko harimo impaka zishingiye ku kuba ari yo itarubahirije amasezerano bagiranye, kuko yagemuye ibikoresho bitandukanye n’ibyo bumvikanye mu masezerano. Urukiko rw’Ubucuruzi rwasanze nta ngwate itangwa n’abanyamahanga BALTON CP igomba gutanga, kuko ibyo iregera ari umutungo wayo yavukijwe kandi ifitiye ibimenyetso. Rutegeka NCD Ltd kuyishyura umwenda remezo n inyungu zawo. Rutegeka kandi ko ifatira rya konti yayo rihunduka ifatirabwishyu ku mwenda wa 61.000 USD.

NCD Ltd ntiyishimiye imikirize y’urubanza irujuririra mu Rukiko Rukuru rw’Ubucuruzi ivuga ko Urukiko rw’Ubucuruzi rwanze ubasabe bwayo bwo gutegeka BALTON CP kwishyura ingwate itangwa n’abanyamahanga, ariko mu iburanisha ry’urubanza abayihagarariye bavuga ko iyo nzitizi bayiretse.

## Page 2

Urukiko Rukuru rw’Ubucuruzi rwaciye urubanza maze rwemeza ko Urukiko rw’Ubucuruzi rutagombaga kwakira ikirego cyatanzwe na BALTON CP, kuko rwaregewe mu buryo budakurikije amategeko; bityo ko urubanza rwaciwe n’Urukiko rw’Ubucuruzi ruvuyeho. BALTON CP yajuririye mu Rukiko rw ubujurire ivuga ko mu rubanza rujuririrwa, Urukiko rwumvise nabi ingingo y itegeko ryakoreshejwe, bityo ko isaba uru Rukiko gusuzuma niba hari amategeko yishwe mu kuba yaratanze ikirego. Sosiyete NCD Ltd ivuga ko sosiyete BALTON CP yatanze ubujurire bwayo mu buryo bw'ibirego byihutirwa, bityo ko bwagombaga kubahiriza ibihe biteganywa mu gutanga bene ibyo birego kuko itegeko ritegenya ko kujuririra icyemezo ari iminsi itarenze itatu (3) y’akazi uhereye ku munsi icyemezo cyasomeweho cyangwa ababuranyi bakimenyeyeho, bityo ko kuba BALTON CP yarajuriye ku munsi wa kane kandi ikaba itagaragaza impamvu yatumye ikererwa kujurira, asanga ikirego cyayo cy'ubujurire kidakwiye kwakirwa kubera ko yagitanze mu buryo bunyuranyije n'amategeko. Sosiyete BALTON CP nayo yiregura ivuga isanga iminsi itatu igomba kubarwa kuva umunsi kopi y’icyemezo yashyiriwe muri sisitemu kuko ari bwo bamenyeshejwe icyemezo cy’Urukiko kubera ko batari mu isomwa ry’urubanza. Incamake y icyemezo: Mu kubara ibihe byo kujuririra icyemezo cyihutirwa harebwa umunsi igikorwa cyakoreweho n’ukuvuga umunsi icyemezo cyasomeweho, hakabarwa igihe cy’iminsi itatu y’akazi, iyo ibyo bihe bitubahirijwe ubujurire ntibwakirwa ngo busuzumwe kuko buba bwatanzwe impitagihe. Inzitizi ifite ishingiro. Amagarama y urubanza ahwanye n ibyarukozwemo. Amategeko yashingiweho: Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 188, iya 232 niya 275. Imanza zifashishijwe: Urubanza RCOMAA 00031/2020/CA rwaciwe n’Urukiko rw’Ubujurire ku wa 25/8/2020, haburana SOTRAPROMETAL Ltd na BANQUE POPULAIRE DU RWANDA Ltd hamwe n’Umwanditsi Mukuru muri RDB; Urubanza RCOMAA 00034/2022/CA rwaciwe n’Urukiko rw’Ubujurire ku wa 29/06/2022, haburana Kigali Citizens Polyclinic Ltd (KCP Ltd) na Mukandori Kankwanzi Alphonsine.

## Page 3

Uubanza I. IMITERERE Y’URUBANZA

[1] Uru rubanza rwatangiriye mu Rukiko rw’Ubucuruzi BALTON CP irega New Century Development Ltd (NCD Ltd), ivuga ko ku wa 20/12/2015 yagiranye nayo amasezerano yo kugemura ibikoresho bya BMS System of Kigali Marriot kandi ko impande zombi zumvikanye ko ikiguzi cy’ibikoresho ari 169.849, 68 USD. BALTON CP ivuga ko yubahirije inshingano zayo, ku wa 23/03/2016, igemura ibikoresho bumvikanye ibishyikiriza NCD Ltd irabyakira irabishima, ariko ko NCD Ltd itubahirije amasezerano bagiranye, kuko yishyuye 108.849,69 USD hasigara 61.000 USD; BALTON CP isaba Urukiko kwemeza ko NCD Ltd iyifitiye umwenda w’ubucuruzi ungana na 61.000 USD yanze kwishyura ku neza, irusaba kandi kwemeza ko ifatira ryakoze ku wa 07/01/2022 rihinduka ifatirabwishyu.

[2] NCD Ltd yatanze inzitizi isaba Urukiko gutegeka BALTON CP gutanga ingwate itangwa n’abanyamahanga kuko ari sosiyete itanditswe mu Rwanda kandi idakomoka mu bihugu by’Umuryango w’Afurika y’Iburasirazuba. NCD Ltd yanavuze ko ikirego cyatanzwe na BALTON CP kitagomba kwakirwa kubera ko harimo impaka zishingiye ku kuba BALTON CP ari yo itarubahirije amasezerano bagiranye, kuko yagemuye ibikoresho bitandukanye n’ibyo bumvikanye mu masezerano yo ku wa 20/12/2015.

[3] Mu rubanza RCOM 00042/2021/TC rwaciwe n’Urukiko rw’Ubucuruzi ku wa 21/01/2022, urwo Rukiko rwasanze nta ngwate itangwa n’abanyamahanga BALTON CP igomba gutanga, kuko ibyo iregera ari umutungo wayo yavukijwe kandi ifitiye ibimenyetso. Rutegeka NCD Ltd kwishyura BARTON CP 61.000 USD y’umwenda remezo na 27.517 USD y’inyungu zawo. Rutegeka kandi ko ifatira rya konti N° 100002146341 iri muri Bank of Kigali Plc ya NCD Ltd ryakozwe tariki ya 07/01/2022 rihunduka ifatirabwishyu ku mwenda wa 61.000 USD, runayitegeka kwishyura BALTON CP 720.000 Frw y’igihembo cya Avoka n’ikurikiranarubanza.

[4] NCD Ltd ntiyishimiye imikirize y’urubanza irujuririra mu Rukiko Rukuru rw’Ubucuruzi ivuga ko Urukiko rw’Ubucuruzi rwanze ubasabe bwayo bwo gutegeka BALTON CP kwishyura ingwate itangwa n’abanyamahanga, ariko mu iburanisha ry’urubanza abayihagarariye bavuga ko iyo nzitizi bayiretse. NCD Ltd yavuze kandi ko Urukiko rwayitegetse kwishyura umwenda ungana 61.000 USD, kandi nta mwenda ibereyemo BALTON CP, kuko ari yo yishe inshingano, inavuga ko itemera indishyi z’ibyagiye ku rubanza yaciwe.

[5] Ku wa 16/2/2022, Urukiko Rukuru rw’Ubucuruzi rwaciye urubanza RCOMA 00067/2022/HCC rwemeza ko Urukiko rw’Ubucuruzi rutagombaga kwakira ikirego

## Page 4

cyatanzwe na BALTON CP, kuko rwaregewe mu buryo budakurikije amategeko; rwemeza ko urubanza RCOM 00042/2022/TC rwaciwe n’Urukiko rw’Ubucuruzi ku wa 21/01/2022 ruvuyeho. [6] BALTON CP yajuririye uru Rukiko ivuga ko mu rubanza rujuririrwa, Urukiko rwumvise nabi ingingo ya 232 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. Isaba uru Rukiko gusuzuma niba hari amategeko yishwe mu kuba BALTON CP yaratanze ikirego cyihutirwa gishingiye ku ngingo ya 232 y’Itegeko ryavuzwe haruguru gisaba kwemeza umwenda NCD Ltd iyibereyemo, inasaba ibyo yatakaje mu rubanza, ubujurire bwayo bwandikwa kuri RCOMAA 00040/2022/CA. [7] Urubanza rwahamagajwe ku wa 13/09/2022, kuri uwo munsi ntirwaburanishwa kubera ko Me Ndahayo Karisti, uhagarariye BALTON CP, yarimo kuburana urundi rubanza rw’inshinjabyaha kandi uhagarariye NCD Ltd nawe afite izindi manza nyuma ya saa sita, rwimurirwa ku wa 20/09/2022. Uwo munsi urubanza ruburanishwa BALTON CP ihagarariwe na Me Ndahayo Karisti afatanyije na Me Mugisha Fred, naho NEW CENTURY DEVELOPMENT Ltd ihagarariwe na Me Rukangira Emmanuel, haburanishwa inzitizi zatanzwe na NEW CENTURY DEVELOPMENT Ltd zirimo kuba BALTON yaratinze kujurira, kuba itemerewe kujurira bwa kabiri kuko ibyemezo by’imanza zihutirwa bijuririrwa inshuro imwe gusa, no kuba ubu bujurire butari mu bubasha bw’uru Rukiko kuko ikiburanwa kitageze nibura kuri 75.000.000 Frw. II. IBIBAZO BIGIZE URUBANZA N’ISESENGURA RYABYO 1. Kumenya niba ubujurire bwa BALTON CP butaratanzwe mu bihe bikurikije amategeko [8] Uhagarariye NCD Ltd avuga ko BALTON CP yatanze ubujurire bwayo mu buryo bw'ibirego byihutirwa, ko rero bwagombaga kubahiriza ibihe biteganywa mu ngingo ya 188, igika cya 2, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. Avuga ko kuba urubanza rujuririrwa rwaraciwe ku wa 16/02/2022, BALTON CP ikajurira ku wa 19/02/2022, asanga itarubahirije ibikubiye mu ngingo ya 188, igika cya 2, y’Itegeko No 22/2018 ryo ku wa 29/04/2018 ryibukijwe haruguru iteganya ko igihe cyo kujuririra icyemezo ari iminsi itarenze itatu (3) y’akazi uhereye ku munsi icyemezo cyasomeweho cyangwa ababuranyi bakimenyeyeho, ko kuba rero BALTON CP yarajuriye ku munsi wa kane kandi ikaba itagaragaza impamvu yatumye ikererwa kujurira, asanga ikirego cyayo cy'ubujurire kidakwiye kwakirwa kubera ko yagitanze mu buryo bunyuranyije n'amategeko.

[9] Avuga kandi ko ibivugwa mu ngingo ya 188 y’Itegeko No 22/2018 ryo ku wa 29/04/2018 ryavuzwe haruguru ari irengayabora ku bivugwa mu ngingo ya 275 y’iryo tegeko, ko rero

## Page 5

ingingo ya 275 idakoreshwa ku birego byihutirwa. Avuga na none ko ibivugwa n’abahagarariye BALTON CP ko ibihe byabarwa kuva umunsi kopi yashyiriwe muri sisitemu kuko ari bwo bamenyeshejwe urubanza, nta shingiro bikwiye guhabwa, kuko umuburanyi umenyeshwa urubanza ari uwaburanishijwe adahari kandi BALTON CP yo ikaba yaburanye urubanza ihari.

[10] Abahagarariye BALTON CP bavuga ko basaba Urukiko kuzashingira ku ngingo ya 275 y’Itegeko No 22/2018 ryavuzwe haruguru ivuga uburyo ibihe bibarwa mu masaha no minsi bibarwa kuko iteganya ko umunsi igikorwa cyakoreweho utabarwa, ko kuba rero icyemezo cyarafashwe ku wa 16/02/2022 kikajuririrwa ku wa 19/02/2022, basanga ibihe byo kujurira byarubahirijwe, kuko uhereye ku wa 17/02/2022 kugeza ku wa 19/02/2022 bigaragara ko iminsi itatu iteganywa n’itegeko yubahirijwe.

[11] Bavuga kandi ko n’iyo hashingirwa ku biteganywa n’ingingo ya 188 y’Itegeko No 22/2018 ryo ku wa 29/04/2018 ryavuzwe haruguru, basanga iminsi itatu igomba kubarwa kuva ku wa 17/02/2022, umunsi kopi y’icyemezo yashyiriwe muri sisitemu kuko ari bwo bamenyeshejwe icyemezo cy’Urukiko kubera ko batari mu isomwa ry’urubanza.

UKO URUKIKO RUBIBONA

[12] Ingingo ya 188, igika cya kabiri, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi itaganya ibikurikira: “Igihe cyo kujuririra icyemezo ni iminsi itarenze itatu (3) y’akazi uhereye ku munsi icyemezo cyasomeweho cyangwa ababuranyi bakimenyeyeho. Urubanza narwo rucibwa mu gihe kitarenze iminsi itatu (3) y’akazi”. [13] Ingingo ya 232, igika cya 3, y’Itegeko No 22/2018 ryo ku wa 29/04/2018 ryavuzwe haruguru, iteganya ko ifatira rivugwa mu gika cya 2 cy’iyi ngingo rigumaho, keretse iyo muri urwo rubanza uwafatiriwe asabye ko rivaho akabyemererwa n’urukiko. Urubanza rwa burundu ku kirego cy’iremezo rutuma ifatira rihinduka ifatirabwishyu iyo uwareze atsinze. Bene urwo rubanza ruburanishwa mu buryo bw’ibirego byihutirwa. [14] Ingingo ya 274 y’Itegeko No 22/2018 ryo ku wa 29/04/2018 ryavuzwe haruguru iteganya ibikurikira: “Usibye mu gihe itegeko ryaba ribiteganya ukundi, ibihe byagenwe mu manza z’imbonezamubano, iz’ubucuruzi, iz’umurimo n’iz’ubutegetsi bikurikiza amategeko avugwa muri uyu mutwe”. Ingingo ya 275 y’iryo Tegeko iteganya ibikurikira: “Ku bihe bibarwa mu minsi cyangwa mu masaha, bibarwa umunsi ku munsi, n’isaha ku isaha hakurikijwe igihe bimara kandi umunsi igikorwa cyakoreweho ntubarwamo, ahubwo habarwa umunsi wa nyuma kigomba kurangiriraho”.

## Page 6

[15] Urukiko rusomeye hamwe ingingo ya 274 n’iya 275 z’Itegeko No 22/2018 ryo ku wa 29/04/2018 ryavuzwe haruguru rusanga izo ngingo zumvikanisha ko iyo nta bundi buryo Umushingamategeko yateganyije bwerekana uko ibihe bivugwa mu itegeko ryerekeye imiburanishirize y’imanza z’imbonezamubano iz’ubucuruzi, iz’umurimo n’iz’ubutegetsi bigomba kubarwa, ibyo bihe bigomba kubarwa nk’uko ingingo ya 275 y’Itegeko No 22/2018 ryo ku wa 29/04/2018 ibiteganya. Mu yandi magambo ingingo ya 275 ikoreshwa mu kubara ibihe bivugwa muri iryo tegeko iyo nta bundi buryo umushingamategeko yateganyije bwo kubara ibihe bivugwa mu ngingo runaka y’iryo tegeko. [16] Nk’uko byibukijwe haruguru, ingingo ya 232, igika cya gatatu, y’Itegeko N° 22/2018 ryo ku wa 29/4/2018 ryavuzwe haruguru, iteganya ko ibirego bisaba kwemeza umwenda no kwemeza ko ifatira ryakozwe rihinduka ifatirabwishyu biburanishwa mu bihe biteganywa n’amategeko ku birebana n’ibirego byihutirwa. [17] Urukiko rusesenguye ingingo ya 188 y’Itegeko No 22/2018 ryo ku wa 29/04/2018 ryavuzwe haruguru, rusanga iyi ngingo yumvikanisha ko icyemezo ku kirego cyihutirwa kijuririrwa mu minsi itarenze itatu (3) y’akazi ibarwa kuva ku munsi icyemezo cyasomeweho cyangwa kuva ku munsi ababuranyi bakimenyeyeho. Mu yandi magambo iyi minsi itatu ibarwa kuva ku munsi icyemezo cyasomeweho ku baburanyi bari bahari mu iburanisha ry’urubanza cyangwa ikabarwa kuva ku munsi ababuranyi bamenyeshejwe icyemezo ku muburanyi utari uhari urubanza ruburanishwa. [18] Urukiko rurasanga ibiteganywa mu ngingo ya 188 y’Itegeko No 22/2018 ryo ku wa 29/04/2018 ryavuzwe haruguru, ari irengayobora ku biteganywa mu ngingo ya 275 y’iryo Tegeko, kuko mu ngingo 188 y’Itegeko No 22/2018 ryo ku wa 29/04/2018 Umushingamategeko yashyizeho uburyo iminsi itatu igomba kubarwa butandukanye n’ubuteganywa mu ngingo ya 275 y’iryo Tegeko, bikaba rero byumvikana ko mu kubara ibihe byo kujuririra icyemezo cyihutirwa hatarebwa uburyo bwo kubara ibihe buteganywa mu ngingo ya 275 y’Itegeko No 22/2018 ryo ku wa 29/04/2018 yavuzwe haruguru, ahubwo umunsi igikorwa cyakoreweho nawo urabarwa nk’uko biteganywa mu ngingo ya 188 y’iryo Tegeko. Ibi ni nako uru Rukiko rwabibonye mu manza zitandukanye zirimo urubanza RCOMAA 00031/2020/CA, haburana SOTRAPROMETAL Ltd na BANQUE POPULAIRE DU RWANDA Ltd hamwe n’Umwanditsi Mukuru muri RDB1, ndetse n’urubanza RCOMAA 00034/2022/CA, haburana Kigali Citizens Polyclinic Ltd (KCP Ltd) na Mukandori Kankwanzi Alphonsine.2 1 Reba igika cya 19 n’icya 20 by’urubanza RCOMAA 00031/2020/CA rwaciwe n’Urukiko rw’Ubujurire ku wa 25/8/2020, haburana SOTRAPROMETAL Ltd na BANQUE POPULAIRE DU RWANDA Ltd hamwe n’Umwanditsi Mukuru muri RDB. 2 Reba igika cya 30 n’icya 34 by’urubanza RCOMAA 00034/2022/CA rwaciwe n’Urukiko rw’Ubujurire ku wa 29/06/2022, haburana Kigali Citizens Polyclinic Ltd (KCP Ltd) na Mukandori Kankwanzi Alphonsine.

## Page 7

[19] Ku bijyanye n’uru rubanza, dosiye igaragaza ko urubanza RCOMA 00067/2022/HCC, BALTON CP ijuririra rwasomwe ku wa 16/02/2022, itanga ubujurire bwayo muri uru Rukiko ku wa 19/02/2022. [20] Urukiko rushingiye ku biteganywa mu ngingo ya 188, igika cya 2, y’Itegeko N° 22/2018 ryo ku wa 29/4/2018 ryavuzwe haruguru, rusanga igihe cyo kujurira cyaragombaga gutangira kubarwa ku wa 16/02/2022, umunsi icyemezo cyasomeweho, hakabarwa igihe cy’iminsi itatu y’akazi, bityo kuba tariki ya 16/02/2022 hari ku wa gatatu (Wednesday), birumvikana ko uhereye kuri uwo munsi, iminsi itatu y’akazi yuzuye ku wa gatanu (Friday) tariki ya 18/02/2022, akaba ari yo tariki BALTON CP itagombaga kurenza kugira ngo ibe yubahirije ibihe byo kujurira biteganywa n’amategeko. Kuba rero yarajuriye ku wa 19/02/2022, biragaragara ko itubahirije ibihe byo kujurira biteganywa n’Itegeko nk’uko byibukijwe haruguru, bityo ubujurire bwayo bukaba butagomba kwakirwa ngo busuzumwe kuko bwatanzwe impitagihe. [21] Ku byo abahagarariye BALTON CP bavuga ko basanga iminsi itatu igomba kubarwa kuva ku wa 17/02/2022, umunsi kopi y’icyemezo yashyiriwe muri sisitemu kuko ari bwo bamenyeshejwe icyemezo cy’Urukiko kubera ko batari mu isomwa ry’urubanza, Urukiko rurasanga nta shingiro byahabwa, kuko urubanza rujuririrwa rwaburanishijwe BALTON CP ihagarariwe na Me Ndahayo Karisti afatanyije na Me Mugisha Fred nk’uko bigaragazwa n’inyandikomvugo y’iburanisha ryo mu Rukiko Rukuru rw’Ubucuruzi yo ku wa 08/02/2022, bikaba rero byumvikana ko itagombaga kumenyeshwa urubanza rwaburanishijwe ihari, cyane cyane ko itariki bamenyeshejwe mu iburanisha urubanza rugomba gusomerwaho ari yo tariki rwasomeweho kandi inyandikomvugo y’isomwa ry’urubanza igahita ishyirwa muri sisitemu; bityo ubujurire bwatanzwe na BALTON CP ntabwo bwakiriwe. [22] Urukiko rurasanga kuba inzitizi ya mbere uhagarariye NCD Ltd yatanze ijyanye no kutubahiriza ibihe byo kujurira biteganywa n’amategeko, yahawe ishingiro atari ngombwa gusuzuma izindi nzitizi yatanze. 2. Kumenya niba NCD Ltd igomba guhabwa amafaranga y’ikurikiranarubanza n’igihembo cya Avoka [23] Me Rukangira Emmanuel, uhagarariye NCD Ltd avuga ko mu myanzuro batanze basabye amafaranga y’ikurikiranarubanza n’igihembo cya Avoka. Abahagarariye BALTON CP bavuga ko bayireguyeho mu myanzuro yabo. UKO URUKIKO RUBIBONA [24] Urukiko rurasanga mu myanzuro yo kwiregura ya NCD Ltd, Me Rukangira Emmanuel yabwiye Urukiko ko rwazayishingiraho, ntaho yigeze isaba amafaranga y’ikurikiranarubanza n’igihembo cya Avoka; bityo kuba ntaho yayasabye, rusanga ntaho rwahera ruyayigena.

## Page 8

III. ICYEMEZO CY’URUKIKO [25] Rwemeje ko inzitizi yo kutakira ubujurire bwa BALTON CP kubera ko itubahirije ibihe byo kujurira yatanzwe na NEW CENTURY DEVELOPMENT Ltd ifite ishingiro. [26] Rwemeje ko ubujurire bwatanzwe na BALTON CP butakiwe kuko bwatanzwe impitagihe. [27] Ruvuze ko amafaranga y’amagarama yatanzwe ahwanye n’ibyakozwe mu rubanza.