UBUSHINJACYAHA v. ZANINKA

# UBUSHINJACYAHA v. ZANINKA

- Source: Amategeko - Section: Decisions (Judgements) - Date: 2024-12-20 - Case/document no.: RPAA00420/2023/CA - Collection: Court of Appeal

## Text

## Page 1

UBUSHINJACYAHA v. ZANINKA [Rwanda URUKIKO RW’UBUJURIRE – RPAA00420/2023/CA (Mukamurenzi, P.J.) 20 Ukuboza 2024] Amategeko agenga ibimenyetso – Ibimenyetso mu manza nshinjabyaha – Mu manza nshinjabyaha, ibimenyetso byose byagiweho impaka n’ababuranyi bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) – Urukiko ni rwo rwemeza ko ibyo bimenyetso bishobora kwemerwa. Amategeko agenga imanza nshinjabyaha – Icyaha cyo gucuruza urumogi – Umuntu ntagirwa umucuruzi no kuba nta gikorwa cyo gucuruza urumogi cyagaragajwe, ahubwo harebwa ubwinshi bw’urumogi yafatanwe bugaragaza ko icyo yari agamije ari ukurucuruza cyangwa kurukwirakwiza, rutari urwo gukoresha ku giti cye. Incamake y’ikibazo: Zaninka na Ngarukiyimana bafatanywe udupfunyika tw’urumogi magana ane mirongo irindwi na tune, bakorwaho iperereza maze Ubushinjacyaha bubarega mu Rukiko Rwisumbuye rwa Karongi, bubakurikiranyeho icyaha cyo gucuruza uromogi, bubasabira igihano cyo gufungwa burundu n’ihazabu ya miliyoni mirongo itatu kuri buri wese. Ngarukiyimana yaburanye yemera icyaha agisabira n’imbabazi, ariko ashinja Zaninka ko ariwe yararuzaniye, mu gihe Zaninka yaburanye ahakana icyaha avuga ko urwo rumogi ari urwa Nkurikiyinka. Urukiko Rwisumbuye rwaciye urubanza rwemeza ko Abaregwa bahamwa n’icyaha cyo gucuruza ibiyobyabwenge by’urumogi, rubahanisha buri umwe igifungo cya burundu n’ihazabu ya miliyoni mirongo itatu. Iki cyemezo, bakijuririye mu Rukiko Rukuru, urugereko rwa Rusizi, Ngarukiyimana avuga ko atagabanyirijwe igihano kandi yaraburanye yemera icyaha akanagisabira imbabazi, naho Zaninka avuga ko noneho yemera icyaha akurikiranyweho agisabira imbabazi, ko yicuza ko yaruhije inzego z’ubutabera kandi icyaha cyamuhamye yaragikoze, ariko mu gihe kiburanisha yongeye kuburana ahakana icyaha asaba kureganurwa. Mu rubanza RPA00120/2021/HC/RSZ, Urukiko Rukuru rwemeje ko Zaninka yagabanyirizwa igihano rushingiye ku kuba ibibazo bisa bigomba kucyemurwa kimwe n’ubwo yaburanye ahakana icyaha, rumuhanisha igifungo cy’imyaka cumi n’itanu n’ihazabu y’amafaranga miliyoni icumi, mu gihe Ngarukiyimana na we yagabanyirijwe kuko yaburanye yemera icyaha rumuhanisha igifungo cy’imyaka icumi n’ihazabu y’amafaranga miliyoni eshanu. Zaninka yongeye kujurira muri uru Rukiko rw’Ubujurire avuga ko yahaniwe icyaha atakoze cyo gucuruza urumogi kandi Ubushinjacyaha butarabashije kugaragaza ibimenyetso ko yarucuruzaga usibye gushingira ku mvugo za mugenzi we zivuguruzanya. Ariko asaba ko uru Rukiko rusanze yarakoze icyaha rutamuhanira icyo cyaha cyo gucuruza urumogi kuko ibikorwa bigize icyaha bituzuye, ahubwo agahanirwa icyo gufatanwa urumogi. Ubushinjacyaha buvuga ko mu gushaka guhunga icyaha Zaninka yabanje kuvuga ko ntaho azi Ngarukiyimana ariko nyuma akaza kuvuga ko amuzi, atangira kumushinja acyeka ko ariwe wamugambaniye. Ikindi avuga ko nta foto yagaragajwe yerekana ko yafatanywe urumogi, nta shingiro bifite kuko yahamijwe icyaha cyo gucuruza urumogi hashingiwe ku bimenyetso byatanzwe ndetse no ku ngano y’urwo yafatanywe. Buvuga kandi ko ibyo asaba byo kongera kugabanyirizwa igihano cyangwa guhanirwa icyaha cyo gufatanwa urumogi ntibyashiboka, kuko yahawe igihano gito giteganyirijwe icyo cyaha ashinjwa ko yakoze.

## Page 2

Incamake y’icyemezo: 1. Mu manza nshinjabyaha, ibimenyetso byose byagiweho impaka n’ababuranyi bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale). Urukiko ni rwo rwemeza ko ibyo bimenyetso bishobora kwemerwa. 2.Umuntu ntagirwa umucuruzi no kuba nta gikorwa cyo gucuruza urumogi cyagaragajwe, ahubwo harebwa ubwinshi bw’urumogi yafatanwe bugaragaza ko icyo yari agamije ari ukurucuruza cyangwa kurukwirakwiza, rutari urwo gukoresha ku giti cye, hashingirwa no ku bindi bimenyetso bishimangira ko yari mu bikorwa byo gucuruza ibiyobyabwenge nk’imvugo z’abatangabuhamya. Ubujurire nta shingiro bufite. Amategeko yashingiweho: Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 yahinduwe ningingo ya 11 y’Itegeko Nº 69/2019 ryo ku wa 08/11/1019. Imanza zifashishijwe: RPAA00607/2021/CA, Ubushinjacyaha na Nyiraminani Dative rwaciwe n’Urukiko rw’Ubujurire ku wa 30/05/2024. RPAA00726/2021/CA, Ubushinjacyaha na Hakizimana Jean Damascène, rwaciwe n’Urukiko rw’Ubujurire ku wa 18/05/2023. RPAA00692/2021/CA, Ubushinjacyaha na Ndayishimiye Jean Damascène rwaciwe n’Urukiko rw’Ubujurire ku wa 20/01/2023. RPAA00408/2020/CA, Ubushinjacyaha na Niyitegeka Augustin rwaciwe n’Urukiko rw’Ubujurire ku wa 27/06/2022. Urubanza I. IMITERERE Y’URUBANZA [1] Mu gitondo cyo ku wa 21/12/2019, ku bufatanye bw’abaturage n’inzego z’ibanze bafatiye mu cyuho Ngarukiyimana Jérôme na Zaninka Clémentine mu Mudugudu wa Kaziga, Akagari ka Rundoyi, Umurenge wa Ruhango, Akarere ka Rutsiro, Intara y’Iburengerazuba, bombi batwaye urumogi udupfunyika (474), bashyikirizwa inzego zishinzwe gukurikirana ibyaha batangira gukurikiranwa. [2] Iperereza rirangiye, Ubushinjacyaha bwabareze mu Rukiko Rwisumbuye rwa Karongi bubakurikiranyeho icyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nkabyo (gucuruza urumogi), busaba ko kibahama, bagahanishwa igihano cy’igifungo cya burundu n’ihazabu ya 30.000.000 Frw kuri buri wese. [3] Ngarukiyimana Jérôme yaburanye yemera icyaha anagisabira imbabazi, ashinja Zaninka Clémentine ko ari we yari azaniye urumogi kugira ngo arugure, naho uyu ahakana icyaha, asaba kureganurwa avuga ko urumogi bamugerekaho ari urwa Ngarukiyimana Jérôme n’undi mugore wahise acika, ko we bahuriye mu nzira avuye mu isoko rya Gisenyi gucuruza amajeli, bafatwa bari kugendana mu muhanda. [4] Mu rubanza RP00029/2020/TGI/KNG rwaciwe ku wa 25/02/2021, Urukiko Rwisumbuye rwa Karongi, rwasanze hari ibimenyetso bibahamya icyaha cyo gucuruza ibiyobyabwenge by’urumogi, birimo kuba Ngarukiyimana Jérôme yemera icyaha akanashinja mugenzi we Zaninka Clémentine ubufatanyacyaha, imvugo z’abatangabuhamya bafatanye Zaninka Clémentine urumogi no kuba nawe

## Page 3

adahakana ko yafatiwe hamwe na Ngarukiyimana Jérôme, ruhanisha buri wese igifungo cya burundu n’ihazabu ingana n’amafaranga miliyoni mirongo itatu (30.000.000Frw). [5] Ngarukiyimana Jérôme na Zaninka Clémentine bajuririye imikirize y’urubanza mu Rukiko Rukuru, Urugereko rwa Rusizi, Ngarukiyimana Jérôme avuga ko Urukiko rubanza rutamugabanyirije ku gihano kandi yaraburanye yemera icyaha akanagisabira imbabazi, naho Zaninka Clémentine avuga ko noneho yemera icyaha akurikiranyweho akanagisabira imbabazi, ko yicuza ko yaruhije inzego z’ubutabera kandi icyaha cyamuhamye yaragikoze, ariko ageze mu Rukiko mu iburanisha yongera kuburana ahakana icyaha asaba kureganurwa. [6] Mu rubanza RPA00120/2021/HC/RSZ rwaciwe n’Urukiko Rukuru, Urugereko rwa Rusizi ku wa 18/09/2023, rwemeje ko ikirego cy’ubujurire cyatanzwe na Ngarukiyimana Jérôme na Zaninka Clémentine gifite ishingiro kuri bimwe, rwemeza ko urubanza no RP00029/2020/TGI/KNG rwaciwe ku wa 25/02/2021 n’Urukiko Rwisumbuye rwa Karongi, ruhindutse ku birebana n’ibihano, ruvuga ko n’ubwo Zaninka Clémentine yaburanye ahakana icyaha, ariko mu rwego rwo gutanga ubutabera busa ku bibazo bisa, rusanga nawe agomba kugabanyirizwa ibihano hashingiwe ku byemejwe mu rubanza RPAA 00726/2021/CA rwaciwe n’Urukiko rw’Ubujurire ku wa 18/05/2023, haburana Ubushinjacyaha na Hakizimana Jean Damascène, nawe wakurikiranyweho icyaha cyo gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nkabyo aho yari yafatanwe udupfunyika 783 tw’urumogi, agahanishwa igifungo cy’imyaka cumi n’itanu (15). Rwahanishije Zaninka Clémentine igifungo cy’imyaka cumi n’itanu (15) n’ihazabu ingana na 10.000.000Frw. Ruhanisha Ngarukiyimana Jérôme igifungo cy’imyaka icumi (10) n’ihazabu ingana na miliyoni eshanu (5.000.000Frw). [7] Zaninka Clémentine yajuririye imikirize y’urwo rubanza mu Rukiko rw’Ubujurire, urubanza ruhabwa RPAA00420/2023/CA, ruburanishwa mu ruhame ku itariki ya 05/12/2024, Zaninka Clémentine yunganiwe na Me Akimana Elisabeth, naho Ubushinjacyaha buhagarariwe na Rudatinya Nyangezi Gaspard, Umushinjacyaha ku rwego rw’Igihugu. [8] Mu mwanzuro w’ubujurire no mu miburanire, Zaninka Clémentine n’umwunganira bavuga ko yahanishijwe ibihano biremereye kandi nta cyaha cyo gucuruza urumogi yigeze akora kuko yanaburanye agihakana, ko imvugo za Ngarukiyimana Jérôme umushinja zivuguruzanya, bakaba batanaziranye, ko yamubonaga gusa yaje kugura ibirayi. Banavuga ko nta n’ikindi kimenyetso gishingirwaho kuko nta n’ifoto yagaragajwe afite urumogi, hakaba nta n’igikorwa cyo gucuruza cyangwa kugurisha urumogi Ubushinjacyaha bugaragaza yakoze, kuko nta umutangabuhamya wabajijwe ngo yemeze ko yaba yararumugurishije. [9] Me Akimana Elisabeth wunganira Zaninka Clémentine avuga ko asaba ko mu gihe Urukiko rwaba rusanze ahamwa n’icyaha, rwamuhamya icyaha cyo gufatanwa urumogi kuko icyo kurucuruza yahamijwe ibikorwa bikigize bituzuye kubera ko hatagaragajwe abo yarugurishije n’igiciro arutangiraho, ndetse n’abatangabuhamya babajijwe bose hakaba ntawavuze ko arucuruza. [10] Uhagarariye Ubushinjacyaha asanga igihano Zaninka Clémentine yahanishijwe ari cyo gito giteganyirijwe icyaha akurikiranyweho, kikaba kitakongera kugabanywa. Avuga kandi ko Zaninka mu gushaka guhunga icyaha yabanje kuvuga ko ntaho azi Ngarukiyimana Jérôme ariko nyuma avuga ko amuzi, ko yamubonye ari kuri telefone, nyuma akaza kumushinja kuko yacyekaga ko ariwe wamugambaniye. Anavuga ko ifoto avuga itaragaragajwe afite urumogi atari kamara, kuko hari abatangabuhamya bamubonye afatwa arufite. Naho ku bivugwa n’uwunganira Zaninka Clémentine ko mu gihe haba hari icyaha kimuhama cyaba icyo gufatanwa urumogi nabyo nta shingiro bifite, kuko yahamijwe icyaha cyo kurucuruza hagendewe ku bimenyetso biri muri dosiye no ku ngano nini y’urumogi yafatanwe.

## Page 4

[11] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari icyo kumenya niba Zaninka Clémentine yarahamijwe icyaha akurikiranyweho nta bimenyetso bidashidikanywaho bishingiweho. II. ISESENGURA RY’IKIBAZO KIGIZE URUBANZA 1. Kumenya niba Zaninka Clémentine yarahamijwe icyaha akurikiranyweho nta bimenyetso bidashidikanywaho bishingiweho [12] Zaninka Clémentine n’umwunganira bavuga ko yahanishijwe ibihano biremereye kandi nta cyaha cyo gucuruza urumogi yigeze akora kuko yanaburanye agihakana ariko Urukiko ntirwaha agaciro ibisobanuro bye n’ibimenyetso yatanze, ko basaba ko byakwitabwaho akarenganurwa kuko nta rumogi yacuruje, ahubwo yafatiwe mu nzira avuye kugurisha amajeli mabisi ku Gisenyi. Basobanura ko Ngarukiyimana Jérôme umushinja imvugo ze zivuguruzanya kuko hamwe avuga ko ari urw’umugore we ufunze, ahandi akavuga ko yari avuye kururangura kwa Mukamuganga, ko kuba rero baravuze ko acuruza urumogi ntaho babishingira, cyane ko nta n’ifoto yagaragajwe arufite. [13] Bakomeza bavuga ko n’Ubushinjacyaha butigeze bugaragaza igikorwa gifatika yakoze cyo gucuruza urumogi, hakaba nta n’umutangabuhamya n’umwe wabajijwe ngo agaragaze ko yaba yararumugurishije, naho Ngarukiyimana Jérôme umushinja we bakaba bataziranye, yamubonaga gusa yaje kugura ibirayi, ndetse n’utwo dupfunyika 474 tw’urumogi akaba ari we wadufatanwe, basaba ko hakorwa iperereza aho asanzwe abarizwa rikaba ari ryo rishingirwaho. [14] Me Akimana Elisabeth wunganira Zaninka Clémentine yangeraho ko mu gihe Urukiko rwaba rusanze ahamwa n’icyaha, rwamuhamya icyaha cyo gufatanwa urumogi kuko icyo kurucuruza yahamijwe ibikorwa bikigize bituzuye kandi hakaba hatagaragajwe abo yarugurishije n’igiciro arutangiraho, ndetse n’abatangabuhamya babajijwe bose hakaba ntawavuze ko arucuruza. [15] Uhagarariye Ubushinjacyaha avuga ko mu guhamya Zaninka Clémentine icyaha cyo gucuruza urumogi hashingiwe ku bimenyetso birimo imvugo za Ngarukiyimana Jérôme wasobanuye neza imikorere y’icyaha avuga ko umugore we wari ufungiye gucuruza urumogi ari we wamurangiye ahantu urwo rumogi rwari ruhishe, anamubwira ko azarugurisha Zaninka kuko bari basanzwe bakorana muri ubwo bucuruzi, ko hari n’inyandikomvugo y’ifatira yashyizeho umukono yemera ko afatanwe urumogi udupfunyika 474, abatangabuhamya babajijwe bemeza ko yarufatanwe, akaba ataranagaragaje ko hari icyo bapfa; ko ibyo avuga ko icyaha yakigeretsweho na Ngarukiyimana Jérôme nta shingiro bifite kuko atagaragaje ko hari amakimbirana baba bari bafitanye. [16] Akomeza avuga ko Zaninka Clémentine yaranzwe no kwivuguruza agerageza guhunga icyaha, aho yabanje kuvuga ko ntaho azi Ngarukiyimana Jérôme ariko nyuma akavuga ko amuzi, ko yamubonye avugira kuri telefone, bituma amushinja akekaga ko ariwe wamugambaniye, nyamara uyu akaba atarashoboraga kumushinja bataziranye; naho kuba atarafotowe afite urumogi bikaba ntacyo bihindura ku mikorere y’icyaha kuko hari abatangabuhamya bamubonye afatwa arufite. UKO URUKIKO RUBIBONA [17] Impaka kuri iyi ngingo zishingiye ku kumenya niba Zaninka Clémentine yarahamijwe icyaha cyo gucuruza urumogi nta bimenyetso bidashidikanywaho bishingiweho no kumenya niba nta gikorwa gifatika kigaragaza ko acuruza urumogi. [18] Mu rubanza RPAA00692/2021/CA rwaciwe ku wa 20/01/2023 haburana Ubushinjacyaha na Ndayishimiye Jean Damascène, Urukiko rw’Ubujurire rwasobanuye ko mu manza nshinjabyaha,

## Page 5

ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. Iri hame ryashingiweho no mu zindi manza zakurikiyeho zaciwe n’uru Rukiko, harimo urubanza RPAA00607/2021/CA rwaciwe ku wa 30/05/2024, haburana Ubushinjacyaha na Nyiraminani Dative. [19] Ibyerekeranye n’ibimenyetso by’ibikorwa biteganywa n’ingingo ya 263 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange yahinduwe n’ingingo ya 11 y’Itegeko Nº 69/2019 ryo ku wa 08/11/1019 byasobanuwe mu rubanza RPAA00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin. Muri urwo rubanza Urukiko rw’Ubujurire rwasobanuye ko mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking / drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu hafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge, (…)1. [20] Muri dosiye harimo inyandikomvugo y’ibazwa rya Ngarukiyimana Jérôme mu Bugenzacyaha no mu Bushinjacyaha, aho yemeye ko acuruza urumogi, asobanura ko urumogi udupfunyika 474 twafatanwe Zaninka Clémentine ari we wari warumuhaye kuko rwari rwarasizwe mu rugo n’umugore ufungiye muri Gereza ya Musanze kubera gucuruza urumogi, ko uwo mugore we yakoranaga na Zaninka kuko yazaga kurumugurira, ko urwo yari yaje kurugura ku mafaranga 100 agapfunyika kamwe, twose akaba yaragombaga kumwishyura amafaranga 44.000Frw. Ngarukiyimana Jérôme akaba yarakomeje no kwemera icyaha aburana mu Rukiko Rwisumbuye no mu Rukiko Rukuru, kandi hose yavuze ko urumogi Zaninka Clémentine yafatanwe ari we wari urumuzaniye ngo arugure, n’uko yari asanzwe akorana n’umugore we ibyo gucuruza urumogi. [21] Muri dosiye harimo kandi inyandikomvugo y’ibazwa ry’abatangabuhamya Rukundo Jean Marie Vianney na Banzubaze Damascѐne bavuze ko bari bafite amakuru bakuye mu baturage ko Ngarukiyimana Jérôme na Zaninka Clémentine bacuruza urumogi, bakaba barabafashe ku wa 21/12/2019 saa tatu, babafatana udupfunyika 474 tw’urumogi. Bishimangirwa na raporo y’umuyobozi w’Akagari ka Rudoyi yo ku itariki ya 21/12/2019, igaragaza ko Zaninka Clémentine afatanwe udupfunyika 474 tw’urumogi, n’uko yavuze ko yari arugurishijwe na Ngarukiyimana Jérôme n’inyandikomvugo z’ifatira ry’urumogi n’amafaranga 84.000Frw bashyizeho umukono. [22] Urukiko rusesenguye ibyo bimenyetso rusanga, nk’uko Urukiko Rukuru rwabigaragaje mu isesengura ry’urubanza mu bika bya 15 kugeza ku cya 20, ibimenyetso biri muri dosiye bivuzwe bidashidikanywaho kandi bigaragaza nta shiti ko Zaninka Clémentine yafatanwe urumogi yari amaze kugura na Ngarukiyimana Jérôme. Ibyo bimenyetso bikaba binagaragaza ko acuruza urumogi nk’uko abishinjwa na Ngarukiyimana Jerome ndetse, bikagaragazwa n’ubwinshi bw’urumogi yafatanwe. [23] Urukiko rw’Ubujurire rurasanga ibyo Zaninka Clémentine avuga ko yahamijwe icyaha cyo gucuruza urumogi ataragikoze, nta n’ibimenyetso bihamya ko yagikoze bishingiweho kuko Ngarukiyimana Jérôme umushinja yivuguruza nta shingiro bifite, kuko Ngarukiyimana Jérôme kuva yatangira kubazwa, anaburana mu Rukiko yagaragaje ko urwo rumogi ari we wari urumuzaniye nyuma yo kubibwirwa n’umugore we wari ufungiye gucuruza urumogi, ko yari kumuha amafarana 44.000. Izi mvugo akaba ntacyo azinenga uretse kuvuga ko yivuguruza n’uko batari basanzwe baziranye.

1Reba urubanza RPAA00408/2020/CA, rwaciwe n’Urukiko rw’Ubujurire ku wa 27/06/2022 haburana Ubushinjacyaha na Niyitegeka Augustin alias Niyirema, igika cya 18.

## Page 6

[24] Urukiko runasanga kandi Urukiko Rukuru rutarirengagije ibisobanuro bye n’ibimenyetso yatanze, kuko, n’ubwo kuri uru rwego atagaragaje ibyo bimenyetso yatanze bikirengagizwa, urubanza rujuririrwa rugaragaza ko yasabye ko hasuzumwa telefone ye n’iya Ngarukiyimana Jérôme, birakorwa ariko isuzuma rigaragaza ko nimero batanze bavuga ko bakoreshaga zitababaruyeho, iyo Zaninka Clémentine yatanze yo ikaba yarakomeje gukoreshwa kandi yaravugaga ko yafatiriwe; Urukiko Rukuru rukaba rwarasanze kuba nta nimero za telefone zatanzwe zigaragaza ko bahamagaranye nk’ikimenyetso cy’imikoranire y’abo, bitatuma akurwaho uburyozwacyaha mu gihe yatanze nimero ya telefone ajijisha azi neza ko itamubaruyeho. Mu bujurire bwe akaba ataragaragaje inenge iri muri iryo sesengura ry’Urukiko Rukuru. Uru Rukiko runasanga kuba nta foto yafotowe arufite, nabyo atari ikimenyetso kigaragaza ko atakoze icyaha aregwa, kuko hari ibindi bimenyetso byagaragajwe bihamya ko urwo rumogi yarufatanwe. [25] Urukiko rusanga kandi ibivugwa n’uwunganira Zaninka Clémentine, ko urukiko rusanze hari ibimenyetso bimuhamya icyaha, yahamwa n’icyaha cyo gufatanwa urumogi kuko nta gikorwa cy’uko arucuruza cyagaragajwe, nabyo nta shingiro bifite kuko, nk’uko urubanza RPAA00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin rwabisobanuye, ubwinshi bw’urumogi yafatanwe bugaragaza ko icyo yari agamije ari ukurucuruza cyangwa kurukwirakwiza, rukaba rero rutari urwo gukoresha ku giti cye ku buryo byakwitwa gufatanwa urumogi gusa. Ikindi kandi hakaba hari n’ibimenyetso bishimangira ko yari mu bikorwa byo gucuruza ibiyobyabwenge bigizwe n’imvugo z’abatangabuhamya. [26] Hashingiwe ku bisobanuro bimaze gutangwa no ku murongo watanzwe mu rubanza RPAA00692/2021/CA no mu rubanza RPAA00408/2020/CA, uru Rukiko rusanga hari ibimenyetso bidashidikanywaho bigaragaza ko Zaninka Clémentine yakoze icyaha akurikiranyweho cyo gucuruza ibiyobyabwenge byo mu bwoko bw’urumogi atabasha kuvuguruza, bityo hakaba nta kosa riri mu rubanza rwaciwe n’Urukiko Rukuru, urugereko rwa Rusizi. III. ICYEMEZO CY’URUKIKO [27] Rwemeje ko ubujurire bwa Zaninka Clémentine nta shingiro bufite. [28] Rwemeje ko imikirize y’urubanza RPA00120/2021/HC/RSZ-CMB00132/2021/HC/RSZ rwaciwe n’Urukiko Rukuru, Urugereko rwa Rusizi ku wa 18/09/2023 idahindutse. [29] Rwemeje ko igifungo cy’imyaka cumi n’itanu (15) n’ihazabu ingana na 10.000.000Frw yahanishijwe muri urwo rubanza kigumyeho. [30] Rutegetse ko Zaninka Clémentine asonerwa amafaranga y’amagarama y’urubanza kubera ko afunze.