UBUSHINJACYAHA v MBANGUTSE

# UBUSHINJACYAHA v MBANGUTSE

- Source: Amategeko - Section: Decisions (Judgements) - Date: 2025-10-24 - Case/document no.: RPAA 00413/2025/CA - Collection: Court of Appeal

## Text

## Page 1

UBUSHINJACYAHA v MBANGUTSE [Rwanda URUKIKO RW’UBUJURIRE - RPAA 00413/2025/CA (Kanyange, P.J.) 24 Ukwakira 2025] Amategeko agenga imanza z’inshinjabyaha – Imitangire y’ibimenyetso - Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi Urukiko ni rwo rwemeza ko ibyo bimenyetso bishobora kwemerwa. Incamake y’ikibazo: Mbangutse yaketswe gusambanya umwana w’umukobwa w’imyaka 6, ubwo uwo mwana yasibaga ishuri hanyuma Tuyishimire Clarisse wabanaga na we amubajije amusobanurira ko yasambanijwe na Mbangutse bigatuma atabasha kwicara. Umwana yajyanywe kwa muganga basanga afite udukomere ku myanya ndanga gitsina, Mbangutse arafatwa atangira gukurikiranwa. Ubushinjacyaha bwamureze mu Rukiko Rwisumbuye rwa Musanze icyaha cyo gusambanya umwana, aburana ahakana avuga ko italiki ivugwa atigeze ahura n’uwo mwana kandi ko afite icyo apfa n’abaturanyi be bamushinja. Urukiko rwasanze icyaha rumuhamya, rubishingiye ku mvugo y’umwana, abatangabuhamya yabibwiye na raporo ya muganga, rumuhanisha igihano cy’igifungo cya burundu. Uregwa yajuririye icyo cyemezo mu Rukiko Rukuru, rusanga ubujurire nta shingiro bufite. Abonye atanyuzwe, uyu yajuririye icyo cyemezo mu Rukiko rw’Ubujurire, rusuzuma ikibazo cyo kumenya niba Urukiko rwarirengagije amakimbirane Mbangutse Venant yari afitanye n’umuryango urera U.P no kumenya niba raporo ya RFL yahabwa agaciro kandi niba ivuguruza ibindi bimenyetso byashingiweho. Mbangutse asobanura ko yari afitanye amakimbirane n’abatangabuhamya bamushinja akaba ariyo mpamvu bamushinja icyaha atakoze. Akomeza avuga ko raporo ya RFL yagaragaje ko nta masohoro babonye muri uwo mwana bityo hakaba nta kimenyetso kigaragaza ko ari we wamusambanyije. Ubushinjacyaha buvuga ko amasohoro atari cyo kimenyetso kigaragaza ko umwana yasambanyijwe ko ahubwo raporo ya mugangaga igaragaza ko hari udusebe ku gitsina cy’umwana. Ibyo bihujwe n’imvugo z’uwo mwana ndetse n’abatangabuhamya, bigaragaza neza ko uregwa ari we wasambanyije uwo mwana. Naho ku birebana n’amakimbirane, mu ibazwa rye mu bugenzacyaha, uregwa yavuze ko nta makimbirane afitanye n’abamushinja bityo iyo mpamvu nayo ikaba nta shingiro ifite. Incamake y’icyemezo: Mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi Urukiko ni rwo rwemeza ko ibyo bimenyetso bishobora kwemerwa. Ubujurire, nta shingiro bufite. Amategeko yashingiweho:

## Page 2

Itegeko Nº062/2024 ryo ku wa 20/06/2024 rigenga ibimenyetso, ingingo ya 4; Itegeko Nº 68/2028 ryo ku wa 30/08/2018 riteganya ibyaha n’ibihano muri rusange, ingingo ya 14, 133. Imanza zifashishijwe: RPAA 00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na Ndayishimiye Jean Damascène; Urubanza I. IMITERERE Y’URUBANZA

[1] Mbangutse Venant akurikiranweho icyaha cyo gusambanya umwana w’umukobwa w’imyaka itandatu (6) wahawe izina rya U.P.1 mu manza zabanje, cyamenyekanye biturutse ku makuru yatanzwe na TUYISHIMIRE Clarisse ubana n’uwo mwana, nyuma y'uko yari amubonye atabasha kwicara neza, atameze neza yanasibye ishuri yiriwe aryamye, amubajije icyo yabaye amubwira ko yasambanyijwe na Mbangutse ku wa 17/06/2021 ubwo bahuraga agiye ku ishuri, Mbangutse Venant atangira gukurikiranwa. [2] Nyuma y’iperereza, Ubushinjacyaha bwamureze mu Rukiko Rwisumbuye rwa Musanze icyaha cyo gusambanya umwana, bushingiye ku mvugo za U.P, iz’abatangabuhamya, raporo ya muganga na raporo y’inzego z’ibanze, bumusabira igifungo cya burundu. [3] Mbangutse Venant yaburanye ahakana icyaha, avuga ko umunsi bavuga ko umwana yasambanyijwe ntaho yigeze ahurira nawe, asaba kugirwa umwere. [4] Urukiko rwaciye urubanza Nº RP 00685/2021/TGI/MUS ku wa 11/07/2023, rusanga ibimenyetso byatanzwe n’Ubushinjacyaha bisesenguriwe hamwe bimuhamya icyaha mu buryo budashidikanywaho, bikaba bigizwe n’imvugo za U.P n’iz’abatangabuhamya yabibwiye barimo Nyirabukeye Theresie na TUYISHIIMIRE Clarisse, hamwe na raporo ya muganga yagaragaje ko umwana yari afite ibimenyetso by’uko yangijwe mu myanya ndangagitsina (based on our physical examination, we have seen that there are features of sexual abuse). [5] Rwasanze kandi ibivugwa na Mbangutse Venant ko umwana amubeshyera kubera ibibazo byo mu miryango, nta shingiro bifite, kuko mu Bugenzacyaha no mu Bushinjacyaha yavuze ko ntacyo apfa n’umuryango urera uwo mwana, akaba atanagaragaza ibyo bibazo byatumye uwo mwana amubeshyera cyane cyane ko yari atarahamara igihe muri uwo muryango, maze rwemeza ko ahamwa n’icyaha cyo gusambanya umwana, rumuhanisha igifungo cya burundu. [6] Mbangutse Venant yajuriye mu Rukiko Rukuru/Urugereko rwa Musanze, avuga ko Urukiko Rwisumbuye rutahaye agaciro ibisobanuro bye ngo rubihuze n’ibindi bimenyetso n’imvugo z’abatangabuhamya be, ko rutanitaye kucyo apfa n’ababyeyi barera umwana ashinjwa

1 Yahawe iri zina kuko ari umwana

## Page 3

gusambanya ntirwanasesengura raporo y’abahanga ngo rugaragaze aho ahuriye n’icyaha akurikiranweho. [7] Ubushinjacyaha bwasubije ko ku birebana n’amakimbirane, Urukiko rwasobanuye ko Mbangutse yivugiye mu nzego z’iperereza ko ntacyo apfa n’umuryango wa U.P., ko kandi mu bimenyetso byashingiweho ahamwa n’icyaha harimo raporo ya muganga igaragaza ko hari ibimenyetso by’uko yasambanyijwe. [8] Urukiko rwaciye urubanza Nº RPA 00448/2023/HC/MUS ku wa 20/03/2025, rusanga kugira ngo Urukiko rwa mbere rwemeze ko Mbangutse Venant yasambanyije U.P, rwarabishingiye ku mvugo z’uwo mwana wasobanuye uburyo bahuye agiye kwiga akamusambanya, bukeye bimunanira kujya kwiga kubera kubabara, runashingira kuri raporo raporo ya muganga ivuga ko isuzuma ryagaragaje ibimemyetso by’uko yangijwe mu myanya ndangagitsina, no ku mvugo z’abatangabuhamya. [9] Rwasobanuye ko kuba U.P yari afite imyaka 6 kandi Mbangutse bakaba bari baturanye, atari kumuyoberwa, ko kandi ibyo uwo mwana yavuze bishimangirwa n’abatangabuhamya Nyirabukeye Theresie na TUYISHIMIRE Clarisse babanaga n’uwo mwana, basobanuye ko yavuye ku ishuri bikamunanira kurya na bukeye ntiyajya kwiga ko kandi babonaga atameze neza, nyuma TUYISHIMIRE amubajije icyo yabaye amubwira ko Mbangutse yamusambanyije. Rwasanze kandi ibyo Mbangutse avuga ko yari afite icyo apfa na nyirasenge Nyirabukeye Theresie ari nawe urera U.P bitahabwa agaciro, kuko mu Bugenzacyaha yavuze ko ntacyo bapfa na Nyirabukeye avuga ko ntacyo bapfa, akaba rero adasobanura impamvu ifatika yatuma agerekwaho icyaha atakoze. [10] Ku birebana na raporo ya muganga, rwasobanuye ko kuba yaragaragaje ko umwana yari afite ibimenyetso by’uko yangijwe mu myanya ndangagitsina, bihura n’imvugo y’uwo mwana kuko yavuze ko impamvu atagiye kwiga byatewe n’uko yari afite igisebe hagati y’amaguru cyatewe na Mbangutse wamushyizemo ikintu kandi ko yamubabaje, na Nyirabukeye akaba yaravuze ko umwana atabashaga kwicara neza, runasobanura ko kuba raporo ya RFL yaragaragaje ko nta masohoro yasanzwe mu gitsina cy’uwo mwana, bitavanaho ko habayeho igikorwa cyo kumusambanya kuko amasohoro atariyo agaragaza ko icyo gikorwa cyabaye hashingiwe ku biteganywa n’Itegeko. [11] Mbangutse Venant yatanze ubujurire bwa kabiri mu Rukiko rw’Ubujurire, urubanza rwandikwa kuri Nº RPAA 00413/2025/CA, ruhabwa itariki yo kuburanishwa yo ku wa 07/010/2025, uwo munsi ruburanishwa yunganiwe na Me UMUTONI Josianne, Ubushinjacyaha buhagarariwe na SIBOMANA Stanislas, Umushinjacyaha ku rwego rw’Igihugu. [12] Mu myanzuro y’ubujurire no mu miburanire, Mbangutse Venant n’umwunganira bavuga ko yajurijwe n’uko Urukiko rwamuhamije icyaha rwiregagije ko gishingiye ku makimbirane afitanye n’umuryango urera U.P, rwanga no guha agaciro raporo ya Rwanda Forensic Laboratory (RFL) kandi ivuguruza ibindi bimenyetso byashingiweho. [13] Uhagarariye Ubushinjacyaha avuga ko izo mpamvu nta shingiro zifite, kuko atagaragaza icyo amakimbirane avuga ashingiyeho kandi ko mu Bugenzacyaha yavuze ko nta kibazo afitanye

## Page 4

n’umuryango urera U.P, naho kuba raporo ya RFL yaragaragaje ko nta masohoro yasanzwe mu gitsina cy’uwo mwana bikaba bitavanaho ko yasambanyijwe. [14] Muri uru rubanza harasuzumwa niba Urukiko rwarirengagije amakimbirane Mbangutse Venant yari afitanye n’umuryango urera U.P, no kuba rutarahaye agaciro raporo ya RFL kandi ivuguruza ibindi bimenyetso byashingiweho. II. ISESENGURA RY’IBIBAZO KIRI MU RUBANZA

1) Kumenya niba Urukiko rwarirengagije amakimbirane Mbangutse Venant yari afitanye n’umuryango urera U.P [15] Mbangutse Venant n’umwunganira bavuga ko Urukiko Rukuru rwirengagije ko yarugaragarije ko afitanye amakimbirane n’umuryango urera U.P ashingiye ku bibazo byo mu miryango, kuko Nyirabukeye Theresie (ni nyirasenge) yari afitanye amakimbirane na se ashingiye ku masambu, TUYISHIMIRE Clarisse nawe akaba ari umukobwa wa Nyirabukeye babana mu rugo, ko rero ibyo uwo mwana yavuze ari ibyo bamushyizemo. Bavuga ko kandi Urukiko rwatesha agaciro imvugo y’Ubushinjacyaha y’uko Mbangutse Venant yemeye ko ntacyo apfa na nyirasenge, ko yabivuze ariko ntibyandikwe. [16] Uhagarariye Ubushinjacyaha avuga ko iyo mpamvu nta shingiro ifite, kuko ibirebana n’amakimbirane Mbangutse Venant avuga ko yari afitanye na nyirasenge n’umukobwa we, Urukiko rwabisobanuye mu gika cya 16 cy’urubanza rujuririrwa, rusobanura ko mu Bugenzacyaha yavuze ko nta kibazo afitanye na nyirasenge ari nawe wareraga U.P, na nyirasenge akaba yaravuze ko ntacyo bapfa, ko rero kuba yaratangiye kuvuga iby’ayo makimbirane ageze mu Rukiko ari uburyo bwo gushaka guhunga icyaha, ko kandi usibye kuba atarabivugiye mu nzego z’iperereza ngo bikorweho iperereza, nta n’ikimenyetso atanga kigaragaza amakimbirane avuga ko se yari afitanye na mushiki we usibye kubivuga mu magambo gusa kandi bihabanye n’ibiteganywa n’ingingo ya 4 y’Itegeko Nº062/2024 ryo ku wa 20/06/2024 rigenga ibimenyetso.2 UKO URUKIKO RUBIBONA

[17] Impaka kuri iyi ngingo zishingiye ku kumenya niba Urukiko rwarirengagije amakimbirane Mbangutse Venant yari afitanye n’umuryango urera U.P. [18] Ingingo ya 4 y’Itegeko Nº062/2024 ryo ku wa 20/06/2024 rigenga ibimenyetso, iteganya ko urega cyangwa utanze ikibazo agaragaza ikimenyetso cy’ibyo aregera cyangwa asaba, uwiregura nawe akagaragaza ikimenyetso gishyigikira ukwiregura kwe.

2 Iteganya ko “Urega cyangwa utanze ikibazo agaragaza ikimenyetso cy’ibyo aregera cyangwa asaba. Uwiregura agaragaza ikimenyetso gishyigikira ukwiregura kwe. Icyakora, umucamanza cyangwa ukemura ikibazo ashobora gutegeka umuburanyi cyangwa umwe mu bafitanye ikibazo cyangwa undi muntu gutanga cyangwa kwerekana ikimenyetso afite”

## Page 5

[19] Nk’uko dosiye ibigaragaza, ikibazo cy’amakimbirane Mbangutse avuga ko afitanye n’umuryango urera U.P, yakiburanishije kuva ku rwego rwa mbere, mu Rukiko Rwisumbuye rwa Musanze avuga ko yabeshyewe kubera ibibazo byo mu miryango ariko atavuze ibyo aribyo, urwo Rukiko rusanga ibyo avuga nta shingiro bifite, kuko atagaragaza ibyo bibazo byatumye uwo mwana amubeshyera kandi yari atarahamara igihe muri uwo muryango, ko kandi mu nzego z’iperereza yavuze ko ntacyo apfa n’uwo muryango ku buryo bamubeshyera. [20] Icyo kibazo Mbangutse Venant yanakijuririye mu Rukiko Rukuru avuga ko amakimbirane afitanye n’umuryango urera U.P ashingiye ku kibazo cy’amasambu se yari afitanye na mushiki we Nyirabukeye Theresie akaba nyirasenge wa Mbangutse, urwo Rukiko narwo rusanga ibyo Mbangutse avuga bitahabwa agaciro, kuko mu Bugenzacyaha yavuze ko ntacyo apfa na nyirasenge ndetse n’uyu avuga ko ntacyo bapfa, ko rero adasobanura impamvu ifatika yatuma agerekwaho icyaha atakoze [21] Urukiko rw’Ubujurire rurasanga rero ikibazo cy’amakimbirane Mbangutse Venant avuga ko afitanye n’umuryango urera U.P kitarirengagijwe nk’uko abivuga, kandi usibye kukigarura mu bujurire bwa kabiri, ntagaragaza icyo anenga ibisobanuro inkiko za mbere zatanze cyangwa ngo agaragaze ikimenyetso cy’ayo makimbirane usibye kubivuga gusa, cyangwa se ngo asobanure impamvu yibutse kuvuga iby’ayo makimbirane ageze mu Rukiko kandi agifatwa (mu Bugenzacyaha) yarabajijwe niba hari ikibazo asanzwe agirana no kwa nyirasenge aho U.P aba, asubiza ngo ‘‘nta kibazo ngirana nabo rwose‘‘, na nyirasenge (Nyirabukeye) akaba yaravuze ko nta kibazo bafitanye, bityo kuba atagaragaza ikimenyetso cy’ibyo avuga, Urukiko rurasanga iby’amakimbirane avuga atari byo byabaye intandaro yo kuregwa icyaha akurikiranweho, kuko atagaragaza ko ari yo yatumye U.P avuga ko ari we wamusambanyije. [22] Urukiko rurasanga kandi n’iyo ayo makimbirane yaba ahari, bitakwambura agaciro ibindi bimenyetso byashingiweho biribo imvugo z’umwana wasambanyijwe, wasobanuye ko impamvu yasibye ishuri ku wa 18/06/2021 byatewe n’uko yari arwaye igisebe hagati y‘amaguru yatewe na Mbangutse wamushyizemo ikintu (akivanye hagati y’amaguru), ibyo yavuze bikaba bishimangirwa na raporo ya muganga yagaragaje ko yari afite ibimenyetso byo gusambanywa. 2) Kumenya niba Urukiko rutarahaye agaciro raporo ya RFL no kumenya niba ivuguruza ibindi bimenyetso byashingiweho [23] Mbangutse Venant n’umwunganira bavuga ko Urukiko rwanze guha agaciro raporo ya RFL yagaragaje ko nta masohoro basanze ku bimenyetso byafashwe ku myanya ndangatsina y’umwana, kandi impamvu yo gukora iyo raporo kwari ukugira ngo hamenyekane uwasambanyije hagati ya Mbangutse na NIYOMUGISHA wavuzwe n’uwo mwana ko nawe yamusambanyije, cyane cyane ko na raporo ya muganga itagaragaje ko hari igikomere uwo mwana yari afite usibye kugaragaza ko ku myanya ndangagitsina hari hatukuye kandi ari ibisanzwe ku gitsina cy’umwana w’umukobwa, ko kuba uwo mwana yaravuze ko Mbangutse yamushyizemo ikintu, muganga aba yarabonye ibisebe ku gitsina cye, ko no mu myanzuro muganga yavuze ko ashobora kuba yarasambanyijwe, bityo ko iyo raporo irebewe hamwe na raporo ya RFL, basanga hari ugushidikanya ku cyaha Mbangutse akurikiranweho. [24] Uhagarariye Ubushinjacyaha avuga ko ibirebana na raporo ya RFL, Urukiko rwabisobanuye mu gika cya 19 cy’urubanza rujuririrwa, ko kandi nk’uko rwabisobanuye, amasohoro ataricyo kimenyetso kigaragaza ko umwana yasambanyijwe, ko ahubwo hashingiwe

## Page 6

kuri raporo ya muganga wo mu bitaro bya Ruli yagaragaje ko ku myanya ndangagitsina cy’umwana hari hatukuye (redness on labia minora, redish on vestibule, redish in fourchette) kandi akababara bakozeho (tender on labia majora, painful on palpitation on vagina), byumvikana ko Mbangutse yakubyeho igitsina kuko atari kucyinjizamo harebwe imyaka yari afite n’iy’umwana, ko rero kuba nta masohoro basanze mu gitsina atari igitangaza, cyane cyane ko yasuzumwe hashize iminsi ibiri asambanyijwe. [25] Avuga ko kandi umwana yavuze koko ko yasambanyijwe n’abantu babiri, anasobanura ko uwamubabaje muri abo bombi ari Mbangutse, akaba yarabivuze ku wa 18/06/2021 kuko yamusambanyije ku wa 17/06/2021 agiye kwiga, atashye ananirwa kurya, bamubajije avuga ko yasambanyijwe na Mbangutse, muganga nawe aza gusanga ku myanya ndangagitsina inyuma hatukuye, ko rero kuba atabasha kuvuguruza ibimenyetso byashingiweho nk’uko biteganywa n’ingingo ya 107 y’itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, hagomba kugumaho imikirize y’urubanza rwajuririwe. UKO URUKIKO RUBIBONA

[26] Impaka kuri iyi ngingo zishingiye ku kumenya niba Urukiko rwarahamije Mbangutse Venant icyaha rwirengagije raporo ya RFL no kumenya niba ivuguruza ibindi bimenyetso. [27] Ku byerekeye ibimenyetso mu manza n’itangwa ryabyo, byasesenguwe mu rubanza n° RPAA 00692/2021/CA rwaciwe n’Urukiko rw’Ubujurire ku wa 20/01/2023, haburana Ubushinjacyaha na NDAYISHIMIYE Jean Damascène, Urukiko rukaba rwarasobanuye ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso bishobora kwemerwa. N’ubwo uyu murongo ushingiye ku isesengura ry’ingingo ya 119 y’Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo ryakurikizwaga urubanza rucibwa, ibyateganywaga n’iyo ngingo bihura n’ubundi n’ibiteganywa n’ingingo ya 87 y’Itegeko nº062/2024 ryo ku wa 20/06/2024 rigenga ibimenyetso rikurikizwa ubu.3 [28] Dosiye igaragaza ikimenyetso cya raporo yakozwe na Laboratwari y'u Rwanda y'Ibimenyetso Bishingiye ku Bumenyi n'Ubuhanga Bikoreshwa mu Butabera (RFL) yakozwe ku wa 14/12/2021, ivuga ko ku bimenyetso byafashwe mu myanya ndangagitsina (vaginal swabs) ya U.P nta masohoro arimo. [29] Bigaragara ko mu byo Mbangutse Venant yari yajuririye mu Rukiko Rukuru, harimo kuba urukiko rwa mbere rutarasesenguye raporo ya RFL ngo rugaragaze aho ahuriye n’icyaha akurikiranweho, urwo Rukiko rubisuzumye rusanga kuba nta masohoro yasanzwe mu gitsina cy’umwana wasambanyijwe bitavanaho ko habayeho igikorwa cyo kumusambanya, kuko

3 Iyo ngingo ivuga ko mu rubanza nshinjabyaha ikimenyetso gishingira ku mpamvu zose z’ibyabaye n’ibyemejwe n’amategeko, ababuranyi bapfa kuba barahawe umwanya wo kubijyaho impaka.

## Page 7

amasohoro atariyo agaragaza ko icyo gikorwa cyabaye hashingiwe ku biteganywa n’ingingo ya 14 y’itegeko Nº 68/2028 ryo ku wa 30/08/2018 riteganya ibyaha n’ibihano muri rusange.4 [30] Urukiko rw’Ubujurire narwo rurasanga kuba raporo ya RFL yaragaragaje ko nta masohoro yasanzwe mu gitsina cya U.P, ubwabyo bitavanaho ko yasambanyijwe, kuko usibye ko ku birebana n’umwana, bitagombera ko uwamusambanyije aba yinjije igitsina mu cye ngo abe yanamushyiramo amasohoro kugira ngo byitwe ko yakoze icyaha cyo kumusambanya.5 Byongeye kandi, nta kuntu ayo masohoro yari kumugaragaraho harebwe ko atahise asuzumwa agisambanywa ahubwo yasuzumwe nyuma y’iminsi ibiri, bikanagaragara ko yasuzumwe yamaze guhindura imyenda (n’ikariso) ndetse yaramaze gukaraba inshuro eshatu, bivuze ko hari ibimenyetso muganga atari kumusangaho. [31] Ku bivugwa na Mbangutse Venant n’umwunganira ko raporo ya RFL ivuguruza ibindi bimenyetso byashingiweho ahamwa n’icyaha, Urukiko rurasanga nta shingiro bifite, kuko nk’uko byavuzwe haruguru, kuba nta masohoro yasanzwe mu gitsina cya U.P. bitavanaho ko yasambanyijwe kandi hari ibimenyetso bibyemeza, birimo imvugo y’uwo mwana wamushinje ko ari we wamusambanyije bahuriye mu nzira, agasobanura ko nyuma yo kumusambanya byamunaniye kujya ku ishuri kuko yari arwaye igisebe hagati y’amaguru yatewe na Mbangutse wamushyizemo ikintu yavanye mu ipantaro, ababana n’uwo mwana nabo bagasobanura ko babonye atameze neza yanananiwe kurya nyuma akababwira ko yasambanyijwe na Mbangutse. [32] Bigaragara ko ibyo umwana yabwiye abo babana akanabibwira Umugenzacyaha, bishimangirwa n’ibyo muganga yabonye ku gitsina cye, kuko raporo yakoze igaragaza ko ku myanya ndangagitsina hari hatukuye6 ahandi hipfunditse amaraso,7 anababara mu gitsina iyo bamukozeho,8 mu kwanzura muganga avuga ko hari ibimenyetso by’uko yahohotewe,9 ibyo bimenyetso byagaragaye birimo gutukura kw’imyanya ndangagitsina ahandi naho amaraso yipfunditse bikaba aribyo umwana yise ko ari igisebe yatewe n’ikintu Mbanguka yamushyizemo agikuye mu ipantaro, ibyo bimenyetso rero bikaba bitavuguruzwa n’uko raporo ya RFL yagaragaje ko nta masohoro yasanzwe mu mwana. [33] Urukiko rurasanga kandi kuba umwana yaravuze ko hari undi wamusambanyije witwa NIYOGUSHIMWA bidashinjura Mbangutse, kuko yanavuze ko nawe yamusambanyije, asobanura ko NIYOGUSHIMWA ari we wabanje kumusambanya ubwo yari yagiye kwahira ubwatsi, anavuga ko Mbangutse ari we wamubabaje. N’ubwo rero atavuze igihe NIYOGUSHIMWA yamusambanyirije, imvugo ye yumvikanisha ko ibimenyetso raporo ya muganga yagaragaje atari we wabiteye, bitewe n’uko byari ibya vuba (ku gitsina hari hatukuye, hari aho amaraso yipfunditse kandi ababara) kandi mbere yo kujyanwa kwa muganga, umwana

4 Iteganya ko umuntu wese ushyira urugingo urwo arirwo rwose rw’umubiri w’umuntu mu gitsina cyangwa mu kibuno cy’umwana, ukora ikindi gikorwa cyose ku mubiri w’umwana hagamijwe ishimishamubiri, aba akoze icyaha. 5 Reba ibindi bikorwa bigize icyaha biteganywa n’ingingo ya 133 y’Itegeko Nº 68/2028 ryo ku wa 30/08/2018 riteganya ibyaha n’ibihano muri rusange nk’uko ryahinduwe

6 Labia minora: redness 7 Vestibule and fourchette: redish 8 Vagina: Painful on palpitation 9 Based on our physical examination we have seen that there are features of sexual abuse

## Page 8

akaba yarabwiye abo babana ko yasambanyijwe na Mbangutse, anabwira Umugenzacyaha ko ari we wamuteye igisebe hagati y’amaguru cyatumye atajya kwiga, byumvikana rero ko ari ingaruka y’ibyo yavuze ko yakorewe na Mbangutse ku wa 17/06/2021. [34] Hashingiwe ku byasobanuwe, Urukiko rurasanga ubujurire bwa Mbanguka Venant bugamije kugaragaza ko hirengagijwe amakimbirane afitanye n’umuryango urera U.P na raporo ya RFL kandi ivuguruza ibindi bimenyetso, nta shingiro bufite, ahubwo ibimenyetso byashingiweho bigaragaza ukuri kw’ibyabaye kandi bimuhamya icyaha nk’uko byemejwe n’inkiko za mbere. [35] Urukiko rurasanga ariko n’ubwo ubujurire bwe nta shingiro bufite, hasuzumwa niba igihano yahawe gikwiranye n’uburemere bw’icyaha yakoze.10 [36] Ku birebana n’igihano Mbanguka Venant yahanishijwe, imikirize y’urubanza rwajuririwe igaragaza ko Urukiko Rukuru/Urugereko rwa Musanze rwagumishijeho igifungo cya burundu yahanishijwe n’Urukiko Rwisumbuye, rubishingiye ku kuba yarakomeje kurushya ubutabera no ku kinyuranyo cy’imyaka yari afite n’iy’umwana yasambanyije. Uru Rukiko rurasanga ariko n’ubwo byumvikana ko icyaha yakoze gifite uburemere harebwe cyane cyane imyaka y’umwana yasambanyije, dosiye itagaragaza ko hari ikindi cyaha yigeze ahanirwa, bivuze ko ari ubwa mbere akurikiranwe mu nkiko mu buryo buzwi, iyo mpamvu rero ikaba yarashoboraga gushingirwaho akagabanyirizwa igihano cy’igufungo cya burundu agahabwa igifungo cy’igihe kizwi kugira ngo nyuma yo kugororwa azasubire mu muryango we. [37] Mu zindi manza zaciwe ku bantu barezwe icyaha kijya gusa n’icyo Mbangutse Venant akurikiranweho, harimo urubanza no RPAA 00502/2023//CA rwaciwe ku wa 18/03/2023 haburana Ubushinjacyaha na Gakwerere Steven bita Nyinya, wasambanyije umwana w’imyaka 4 we afite imyaka 36, Urukiko rubyibwirije rukaba rwaramugabanyirije igihano rushingiye ku kuba ari ubwa mbere akurikiranweho icyaha mu buryo buzwi, rumuhanisha igifungo cy’imyaka 24; bityo kuba iyo mpamvu ayihurijeho na Mbangutse Venant kandi bombi bakaba bari mu kigero kijya kuba kimwe ndetse n’abana basambanyije bari mu kigero kijya kuba kimwe, bahanwa mu buryo bumwe mu rwego rwo gutanga ubutabera busa ku bibazo bisa, nawe agahanishwa igifungo cy’imyaka makumyabiri n’ine (24), bivuze ko urubanza rwajuririwe ruhindutse gusa ku birebana n’igihano Mbangutse Venant yari yahanishijwe.

III. ICYEMEZO CY’URUKIKO

[38] Rwemeje ko ubujurire bwatanzwe na Mbangutse Venant nta shingiro bufite.

10 Ibyo kuba urukiko rwasuzuma ibirebana n’igihano uregwa yahawe n’ubwo ubujurire nta shingiro bufite, Urukiko rw’Ubujurire rwabitanzeho umurongo mu rubanza RPAA 00039/2021/CA rwaciwe 02/07/2021 haburana Ubushinjacyaha na SHAKABATENDA Jean de Dieu, wakurikijwe no mu manza zaciwe vuba, nk’urubanza Nº RPAA 00012/2021/CA, rwaciwe n’Urukiko rw’Ubujurire ku wa 29/04/2025, haburana Ubushinjacyaha na UMUBYEYI Yvette

## Page 9

[39] Rwemeje ko urubanza NoRPA 00448/2023/HC/MUS rwaciwe n’Urukiko Rukuru/Urugereko rwa Musanze ku wa 20/03/2025, ruhindutse gusa ku birebana n’igihano Mbangutse Venant yari yahanishijwe.

[40] Ruhanishije Mbangutse Venant igifungo cy’imyaka makumyabiri n’ine (24).