CONSULTANCY IN BUILDING SERVICES (CBS) Ltd vs. SAHASRA ELECTRONICS RWANDA PVT (SERP) Ltd

# CONSULTANCY IN BUILDING SERVICES (CBS) Ltd vs. SAHASRA ELECTRONICS RWANDA PVT (SERP) Ltd

- Source: Amategeko - Section: Decisions (Judgements) - Date: 2022-11-02 - Case/document no.: RCOMAA00049/2022/CA - Collection: Court of Appeal

## Text

## Page 1

CONSULTANCY IN BUILDING SERVICES (CBS) Ltd vs. SAHASRA ELECTRONICS RWANDA PVT (SERP) Ltd [Rwanda URUKIKO RW’UBUJURIRE – RCOMAA00049/2022/CA (Kamere, P.J.,) 02 Ugushyingo2022] Amategeko agenga imiburanishirize y’imanza – Kutitaba urukiko k’urega n’uregwa – Gusiba urubanza – Urubanza rurasibwa iyo ku munsi w’iburanisha, urega n’uregwa batitabye urukiko nta mpamvu, kuko ibyo bigaragaza ko nta nyungu bagifite kuri rwo. Incamake y’ikibazo : Sosiyete CBS Ltd ivuga ko yahawe n’umujyi wa Kigali isoko ryo gukora no kugurisha amatara yo ku muhanda, maze bakorana amasezerano, nyuma yaho ikorana andi masezerano y’ubufatanye(sous traitance) bwo gukora iryo soko na sosiyete SERP Ltd. Impande zombi zumvikanye ko ikiguzi kizishyurwa igihe iyo mirimo izarangira, ariko sosiyete SERP Ltd ivuga ko ataruko byangenze kuko itishyuwe nkuko babyumvikanye, bituma iyirega mu Rukiko rw’Ubucuruzi isaba kwishyurwa. Urukiko rw’Ubucuruzi rwemeza ko ingano y’umwenda wishyuzwa ungana na 71.400.000Frw n’inyungu zawo zingana na 6.958.507Frw hamwe n’indishyi ziwukomokaho. CBS Ltd ntiyishimiye icyo cyemezo, maze ikijuririra mu Rukiko Rukuru rw’Ubucuruzi, inenga imikireze y’Urukiko rw’Ubucuruzi.Urukiko Rukuru rw’Ubucuruzi rwakijije urwo rubanza, maze rwemeza ko ubujurire bwa CBS Ltd nta shingiro bufite, bityo ko hagumyeho imikirize y’urubanza rwaciwe n’Urukiko rw’Ubucuruzi. CBS Ltd yajuririye na none mu Rukiko rw’Ubujurire, inenga kuba Urukiko Rukuru rw’Ubucuruzi rwayitegetse kwishyura inyungu zitateganyijwe mu masezerano. Ku munsi n’isaha iburanisha ryari riteganyijweho, ababuranyi bombi ntibitabye urukiko kandi bari bamenyeshejwe umunsi n’isaha ry’iburanisha. Incamake y’icyemezo : Urubanza rurasibwa iyo ku munsi w’iburanisha, urega n’uregwa batitabye urukiko nta mpamvu, kuko ibyo bigaragaza ko nta nyungu bagifite kuri rwo. Urukiko rutegetse ko urubanza rusibwa. Amategeko yashingiweho: Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 59. Nta manza zifashishijwe. Urubanza

## Page 2

I.IMITERERE Y’URUBANZA [1] Ku wa 06/09/2017 SERP Ltd yagiranye amasezerano na CBS Ltd, yo gukora no kugurisha amatara yo ku muhanda (LED Street lights -120- Watt cool white 440 pcs), kugira ngo CBS Ltd ishobore gukora isoko yari yarahawe n’Umujyi wa Kigali ryo gushyira amatara ku mihanda. Muri ayo masezerano SERP Ltd yiyemeje ko izakora ndetse ikanagurisha CBS Ltd amatara yo ku muhanda (LED Street lights -120- Watt cool white 440 pcs) ku giciro kingana na 81.400.000 Frw. Impande zombi zumvikanye ko CBS Ltd izishyura SERP Ltd ayo mafaranga igihe isoko yari yahawe n’Umujyi wa Kigali rizaba risojwe. SERP Ltd ivuga ko nyuma y’uko iryo soko risojwe, yandikiye CBS Ltd inshuro nyinshi iyisaba kuyishyura 81.400.000Frw nk’uko akubiye mu masezerano ikabyanga, hanyuma yandikira Umujyi wa Kigali isaba ko uyishyura amafaranga wakagombye kwishyura CBS Ltd, hanyuma Umujyi wa Kigali uyishyura 10.000.000Frw gusa, hasigara umwenda remezo ungana na 71.400.000Frw. [2] SERP Ltd imaze kubona ko CBS Ltd itayishyuye ayo mafaranga yari asigaye, yayireze mu Rukiko rw’Ubucuruzi, ikirego cyayo gihabwa RCOM01302/2020/TC, isaba Urukiko rw’Ubucuruzi kuyitegeka kuyishyura umwenda iyisigayemo ungana na 71.400.000Frw. CBS Ltd yireguye ivuga ko idahakana uwo mwenda ariko ko kutawishyura atari yo byaturutseho, ko ahubwo Umujyi wa Kigali wiyemeje kuba umuhuza ubwo yagiranaga amasezerano na SERP Ltd ari wo utarubahirije amasezerano kuko utahise wishyura igihe imirimo yari irangiye, isoza isaba Urukiko ko yakwemererwa kwishyura mu byiciro uwo mwenda iregwa. [3] Urukiko rw’Ubucuruzi rwasuzumye ingano y’umwenda CBS Ltd ibereyemo SERP Ltd n’inyungu zawo, maze rusanga CBS Ltd ibereyemo SERP Ltd umwenda ungana na miliyoni mirongo irindwi n’imwe na magana ane (71.400.000Frw) kandi na CBS Ltd iwemera. Ku wa 30/12/2020 Urukiko rw’Ubucuruzi rwakijije urwo rubanza, rwemeza ko Consultancy in Buildng Sevices Ltd (CBS Ltd) igomba kwishyura SAHASRA Electronics Rwanda PVT Ltd umwenda ungana na 71.400.000Frw n’inyungu zawo zingana na 6.958.507Frw, n’indishyi zo gushorwa mu manza zingana na 620.000Frw. [4] CBS Ltd ntiyishimiye icyo cyemezo, ikijuririra mu Rukiko Rukuru rw’Ubucuruzi, ubujurire bwayo buhabwa RCOMA00086/2021/HCC, inenga kuba Urukiko rw’Ubucuruzi rwaremeje ko yishyura umwenda ibereyemo SERP Ltd, ariko ntirwagira icyo ruvuga ku bijyanye n’ubusabe bwayo bwo kuwishyura mu byiciro, no kuba rwaragennye indishyi zitagira aho zishingiye. [5] Urukiko Rukuru rw’Ubucuruzi rwasesenguye ibibazo bijyanye no kumenya niba CBS Ltd yari kwemererwa kwishyura mu byiciro, no kumenya niba yategekwa kwishyura n’indishyi z’ikurikiranarubanza n’igihembo cya Avoka maze rusanga rutategeka ibyo kwishyura mu byiciro mu gihe abagiranye amasezerano batashoboye kubyumvikanaho kuko biri mu nshingano zabo, bityo ko impamvu y’ubujurire irebana no kuba CBS Ltd yakwemererwa kwishyura mu byicirio nta shingiro ifite, kandi ko kuba itsindwa urubanza igomba kwishyura 500.000Frw y’igihembo cya Avoka, na 100.000Frw y’ikurikiranarubanza. [6] Ku wa 11/02/2022, Urukiko Rukuru rw’Ubucuruzi rwakijije urwo rubanza, rwemeza ko ubujurire bwa CBS Ltd nta shingiro bufite, ko hagumyeho imikirize y’urubanza

## Page 3

RCOM01302/2020/TC rwaciwe n’Urukiko rw’Ubucuruzi ku wa 30/10/2020. Rutegeka CBS Ltd kwishyura SERP Ltd amafaranga 600.000Frw, agizwe na 500.000Frw y’igihembo cya Avoka na 100.000 Frw y’ikurikiranarubanza kuri urwo rwego rw’ubujurire. [7] Ku wa 09/03/2022, CBS Ltd yajuririye imikirize y’urubanza RCOMA00086/2021/HCC mu Rukiko rw’Ubujurire, ubujurire bwayo bwandikwa kuri RCOMAA00049/2022/CA, mu mwanzuro wayo utanga ubujurire inenga kuba Urukiko Rukuru rw’Ubucuruzi rwarayitegetse kwishyura inyungu zitateganyijwe mu masezerano, kuba ntacyo rwavuze ku busabe bwayo bwo kuba yakwishyura mu byiciro no kuba mu kugena indishyi z’igihembo cya Avoka rwarirengagije ibiteganywa n’itegeko. [8] SERP Ltd nayo mu mwanzuro wayo wo kwiregura ivuga ko n’ubwo nta nyungu zategetswe mu masezerano ariko ko ziteganywa n’itegeko, kandi ko ibyo CBS Ltd isaba ko yakwishyura umwenda iyibereyemo mu byiciro bitaba impamvu y’ubujurire, kuko Urukiko rutari kubitegeka impande zombi zitabyumvikanaho, kandi ko Urukiko rwatanze umwanya wo kumvikana akaba ari yo ibura, ndetse ntinubahirize payment plan yari yitangiye ubwayo. [9] Nyuma y’uko ku wa 23/08/2022 habaye inama ntegurarubanza ikitabirwa n’uwarezwe gusa naho uwajuriye atayitabiriye, iburanisha ry’urubanza ryashyizwe ku wa 02/11/2022, Urukiko ruhamagaye ababuranyi rusanga nta muburanyi n’umwe witabye, haba Consultancy in Building ServiceS Ltd mu izina ry’Umuyobozi wayo cyangwa SAHASRA Electronics Rwanda PVT Ltd isanzwe ihagarariwe na Me Zimurinda Jackson, ariko Umucamanza abona muri dosiye ku mugereka wa 010 inyandiko yiswe “Medical certificate” yashyizwemo n’uwitwa Mihigo Bernard kuri uyu munsi w’iburanisha i saa mbili n’iminota irindwi (08h07), iyo nyandiko ikaba ivuga ko ku wa 31/10/2022 uwitwa Iyamubonye Jean d’Amour yasuzumwe mu ivuriro rya CIMERWA Plc, agahabwa imiti y’iminsi ine. Mu ntebe y’abacamanza Urukiko rwahise rusuzuma kandi rufata icyemezo ku bijyanye n’ukutitabira iburanisha kw’ababuranyi bombi. II.ISESENGURA RY’IKIBAZO KIGIZE URUBANZA Gusuzuma ibijyanye n’ukutitaba mu iburanisha k’uwajuriye n’uwarezwe mu bujurire, n’uko Urukiko rubibona [10] Ku munsi n’isaha iburanisha ryari riteganyijweho, Urukiko rwahamagaye ababuranyi rubura n’umwe witabye kandi nyamara iyi gahunda bari basanzwe barayimenyeshejwe guhera ku wa 23/08/2022 hasozwa inama ntegurarubanza. Ikigaragara gishya cyabaye kuri dosiye nyuma y’iyo tariki kikaba ari uko ku wa 02/11/2022, saa mbili n’iminota irindwi za mu gitondo, muri dosiye hari uwitwa Mihigo Bernard washyizemo inyandiko ivuga ko uwitwa Iyamubonye Jean d’Amour yasuzumwe mu ivuriro rya CIMERWA Plc ku wa 31/10/2022, agahabwa imiti y’iminsi ine, iyo nyandiko yo kwivuza ikaba itagaragaza neza aho ihurira n’ukutitaba kw’ababuranyi cyangwa se aho uwo witwa Iyamubonye Jean d’Amour yaba ahurira n’iburanisha ry’uru rubanza kuko nta kindi agaragaraho yaba yarigeze akora mbere kuri uru rubanza muri ubu bujurire. [11] Ku bijyanye n’uko bigenda iyo nta muburanyi n’umwe witabye Urukiko, ingingo ya 59, igika cya 1, y’Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibi bikurikira: “Iyo ku

## Page 4

munsi w’iburanisha nta muburanyi n’umwe witabye urukiko kandi ababuranyi baramenyeshejwe umunsi w’iburanisha mu buryo bukurikije amategeko, Urukiko rushobora kwimurira urubanza ku wundi munsi, cyangwa gusiba urubanza mu gihe bigaragarira urukiko ko ababuranyi badafite inyungu yo gukurikirana urubanza rwabo″. [12] Urukiko rw’Ubujurire, rushingiye ku gice cy’iyo ngingo ya 59 kimaze kwibutswa haruguru, ku kuba uwajuriye wakabaye afata iya mbere mu gukurikirana imigendekere y’ubujurire bwe ataranigeze yitabira inama ntegurarubanza no ku kuba ibyashizwe muri dosiye nyuma y’imenyeshwa ry’ababuranyi ry’umunsi w’iburanisha by’uko hari uwitwa Iyamubonye Jean d’Amour wivurije mu ivuriro rya CIMERWA Plc akanahahererwa imiti ntacyo bivuze cyaha ishingiro ukutitaba k’uwajuriye n’uk’uwarezwe mu bujurire, rurasanga ukutitaba nta mpamvu kw’ababuranyi bombi nta kindi kurugaragariza uretse gusa kuba nta nyungu bagifite zo gukurikirana urubanza rwabo. Bityo nk’uko biteganywa n’ingingo y’itegeko yavuzwe haruguru, uru rubanza rukaba rugomba gusibwa kandi amafaranga uwajuriye yatanzeho igarama ry’urubanza agahera mu Isanduku ya Leta. III.ICYEMEZO CY’URUKIKO [13] Rutegetse ko urubanza RCOMAA00049/2022/CA rusibwa; [14] Ruvuze ko amagarama y’urubanza yatanzwe n’uwajuriye ahwanye n’ibyarukozwemo.