Re MIRACLE CENTER CHURH

Re MIRACLE CENTER CHURH

- Source: Amategeko - Section: Decisions (Judgements) - Date: 2025-05-23 - Case/document no.: RC 00003/2025/CA - Collection: Court of Appeal

Text

Page 1

Re MIRACLE CENTER CHURH [Rwanda URUKIKO RW’UBUJURIRE – RC 00003/2025/CA (Kamere, P.J.) 23 Gicurasi 2025] Amategeko agenga imiburanishirize y’imanza z’imbonezamubano – Ikirego cyo gukosoza urubanza – Ikirego gikosora cyangwa gisobanura urubanza kiburanishwa nk’inyandiko nsobanurakirego itanzwe n’umuranyi umwe. Urubanza rukosora urundi, rukosora gusa amakosa y’imyandikire. Incamake y’ikibazo: Cyankazi Annet yareze Miracle Center Church mu Rukiko rwisumbuye rwa Nyarugenge asaba kwishyurwa agaciro k’ubutaka bwe bubaruye kuri UPI: 1/03/05/04/1305 buherereye mu Mudugudu wa Beninka, mu Kagari ka Rubirizi, mu Murenge wa Kanombe. Urwo Rukiko rwemeza ko ubutaka buburanwa ari ubwa Cyankazi Annet, rutegeka Miracle Center Church gusubiza Cyankazi Annet ingurane/agaciro k’ubutaka bwe bubatseho mu buryo butemewe n’amategeko kugira ngo ibugumane no kugira ngo inyubako yayo idasenywa, kandi ko agaciro k’ubwo butaka kazagenwa ku bwumvikane bw’ababuranyi. Nyuma yuko binyuze mu bwumvikane impande zombi zitabashije kugena agaciro k’ubwo butaka, Cyakazi yongeye gutanga ikirego mu Rukiko rwisumbuye rwa Nyarugenge arusaba gutegeka Miracle Center church kwishyura agaciro k’ubutaka bwe kangana na 130.910.164 Frw n’indishyi zitandukanye zirimo n’amafaranga y’ubukode bw’igihe gishize Miracle Center Church ifite umutungo we. Urwo Rukiko rwaciye urubanza rwemeza ko Miracle Center Churh iha Cyankazi Annet

ingurane ku kibanza kibaruye kuri UPI :1/03/05/04/1305, ingana n’amafaranga 56.580.000 Frw. Ayo mafaranga agatangwa ku neza urubanza rukimara kuba ndakuka, bitaba ibyo agakurwa mu mutungo wa Miracle Center Churh ku ngufu za Leta; Ko Miracle Center Churh iha Cyankazi Annet 2.120.000 Frw akubiyemo ay’igihembo cya Avoka, ay’ikurikiranarubanza n’igarama; ko amafaranga y’igarama yatanzwe ahwanye n’ibyarukozwemo mu rubanza. Miracle Center Church yajuririye mu Rukiko Rukuru, ariko igaragaza ko iretse ikirego, Cyankazi atanga ubujurire bwuririye ku bundi agira ibyo asaba Urukiko. Urwo Rukiko ruca urubanza rwemeza ko ukureka ikirego kwatanzwe na Miracle Center Church gufite ishingiro, ko ubujurire bwuririye ku bundi bwatanzwe na Cyankazi bufite ishingiro, rutegeka uwajuriye kwishyura Cyankazi indishyi zingana n’amafaranga 2.500.000 Frw akubiyemo igihembo cya Avoka n’ikurikiranarubanza, ndetse ko urubanza RC 00078/2020/TGI/NYGE rwaciwe n’Urukiko Rwisumbuye rwa Nyarugenge ku wa 16/07/2021 rugumye uko rwakijijwe. Cyankazi yajuririye mu Rukiko rw’Ubujurire anenga urubanza rwaciwe n’Urukiko Rukuru. Mu iburanisha rw’uwo rubanza, habaho ubwumvikane hagati y’impande zombi, Miracle Center Church yemera kwishyura Cyankazi 70.000.000 Frw bakaba barangije mu bwumvikane ikibazo cy'imanza bari bafitanye muri uru Rukiko, ko abashyize Caveat (ifatira) kuri uwo mutungo bahita bayikuraho bakimara kumvikana, icyemezo cy'umutungo kikandikwa kuri Miracle Center Church in Rwanda, ko iryo Torero ryishyura Cyankazi Annet 25.000.000 Frw bitarenze ku wa 15/07/2024 andi 45.000.000 Frw bakajya bayishyura buri mpera z'ukwezi hishyurwa nibura 7.500.000 Frw guhera mu kwezi kwa munani 2024 bitarenze amezi atandatu.

Page 2

Miracle yatanze ikirego mu Rukiko rw’Ubujurire ikosoza urwo rubanza, ku makosa ivuga ko yarugaragayemo, mu bika byose bya Copie y’urubanza ndetse no mu kiregerwa, aho ngo bigaragara ko Umucamanza yibeshye ku izina ry’uwarezwe ari we Miracle Center Church akajya yandika ko ari Miracle Center Churh in Rwanda. Itanga RGB Certificate yo ku wa 12/07/2022 nk’ikimenyetso cyemeza amazina ya nyayo y’uwaregwaga. Incamake y’icyemezo: Ikirego gikosora cyangwa gisobanura urubanza kiburanishwa nk’inyandiko nsobanurakirego itanzwe n’umuranyi umwe. Urubanza rukosora urundi, rukosora gusa amakosa y’imyandikire. Ikirego cyo gusoza urubanza nta shingiro gifite. Amategeko yashingiweho: Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 7 n’iya 140. Nta manza zifashishijwe

Urubanza I. IMITERERE Y’URUBANZA [1] Cyankazi Annet yareze “Miracle Center Churh in Rwanda”, ikorera mu Mudugudu wa Beninka, Akagari ka Rubirizi, Umurenge wa Kanombe, Akarere ka Kicukiro, Umujyi wa Kigali kwishyura agaciro k'ubutaka bubaruye kuri UPI: 1/03/05/04/1305 buherereye mu Mudugudu wa Beninka, mu Kagari ka Rubirizi, mu Murenge wa Kanombe. [2] Mu rubanza RC 0633/14/TGI/NYGE Cyankazi Annet yaburanyemo na “Miracle Center Churh in Rwanda”, ku wa 12/12/2014 Urukiko Rwisumbuye rwa Nyarugenge rwaciye urwo rubanza, rwemeza ko ubutaka buburanwa ari ubwa Cyankazi Annet, rutegeka MIRACLE CENTER CHURCH gusubiza Cyankazi Annet ingurane/agaciro k’ubutaka bwe bubatseho mu buryo butemewe n’amategeko kugira ngo ibugumane no kugira ngo inyubako yayo idasenywa, kandi ko agaciro k’ubwo butaka kazagenwa ku bwumvikane bw’ababuranyi. [3] Kugena agaciro ku bwumvikane bw’ababuranyi ntibyashobotse, ku wa 20/01/2020 Cyankazi Annet atanga ikindi kirego mu Rukiko Rwisumbuye rwa Nyarugenge gihabwa RC 00078/2020/TGI/NYGE, muri urwo rubanza yareze asaba Urukiko gutegeka MIRACLE CENTER CHURCH kwishyura agaciro k’ubutaka UPI :1/03/05/04/1305 bwe gahwanye na 130.910.164 Frw n’indishyi zitandukanye zirimo n’amafaranga y’ubukode bw’igihe gishize MIRACLE CENTER CHURCH ifite umutungo we. [4] Ku wa 16/07/2021 Urukiko Rwisumbuye rwa Nyarugenge rwakijje urwo rubanza ko ikirego cyatanzwe na Cyankazi Annet gifite ishingiro; ko MIRACLE CENTER CHURH iha Cyankazi Annet ingurane ku kibanza kibaruye kuri UPI :1/03/05/04/1305, ingana n’amafaranga

Page 3

56.580.000 Frw. Ayo mafaranga agatangwa ku neza urubanza rukimara kuba ndakuka, bitaba ibyo agakurwa mu mutungo wa MIRACLE CENTER CHURH ku ngufu za Leta; Ko MIRACLE CENTER CHURH iha Cyankazi Annet 2.120.000 Frw akubiyemo ay’igihembo cya Avoka, ay’ikurikiranarubanza n’igarama; ko amafaranga y’igarama yatanzwe ahwanye n’ibyarukozwemo mu rubanza. [5] MIRACLE CENTER CHURCH in Rwanda ntiyanyuzwe n’icyo cyemezo, ku wa 15/08/2021 ikijuririra Urukiko Rukuru, ikirego gihabwa RCA 00237/2021/HC/KIG, ivuga ko itishimiye icyemezo kuko Urukiko Rwisumbuye rwa Nyarugenge rwayitegetse kwishyura ubuso bw’ubutaka bungana na 475 sqm budahari bwa baringa gusa, kuba rwarageneye Cyankazi Annet amafaranga y’igihembo cya Avoka n’ay’ikurikiranarubanza kandi ari we wabashoye mu manza nta mpamvu. [6] Urukiko rukurikije ibyabaye mu rubanza byose n’imigendekere yarwo rwasuzumye ibyerekeranye no kumenya niba uwajuriye yakwemererwa kureka ikirego cye cy’ubujurire kuri urwo rwego, agaciro k’ibisabwa n’uregwa, usaba kudaha ishingiro icyo cyifuzo cyo kureka ikirego n’ibyo asaba mu bujurire bwe bwuririye ku bundi, hanyuma rwemeza ko icyifuzo cya “MIRACLE CENTER CHURCH in Rwanda” cyo kureka ikirego cy’ubujurire gihawe ishingiro. Ko ubujurire bwuririye ku bundi bwatanzwe na Cyankazi Annet bufite ishingiro kuri bimwe. Ko “MIRACLE CENTER CHURCH in Rwanda” iha Cyankazi Annet indishyi zingana n’amafaranga

2.500.000 Frw akubiyemo igihembo cya Avoka n’ikurikiranarubanza. Ko urubanza RC 00078/2020/TGI/NYGE rwaciwe n’Urukiko Rwisumbuye rwa Nyarugenge ku wa 16/07/2021 rugumye uko rwakijijwe. [7] Cyankazi Annet ntiyishimiye iyo mikirize y’urubanza, ku wa 28/09/2023, ayijuririra mu Rukiko rw’Ubujurire, ikirego gihabwa RCAA 00002/2024/CA, anenga urubanza rwaciwe; [8] Iburanisha ryabaye ku wa 24/06/2024, hari ababuranyi Cyankazi Annet n'Itorero Miracle Center Church in Rwanda ihagarariwe na Pastor Bagumà Innocent kandi bunganiwe n‘Abavoka babo, bemeranwa ko iryo Torero ryishyura Cyankazi Annet 70.000.000 Frw bakaba barangije mu bwumvikane ikibazo cy'imanza bari bafitanye muri uru Rukiko, ko abashyize Caveat (ifatira) kuri uwo mutungo bahita bayikuraho bakimara kumvikana, icyemezo cy'umutungo kikandikwa kuri Miracle Center Church in Rwanda, ko iryo Torero ryishyura Cyankazi Annet 25.000.000 Frw bitarenze ku wa 15/07/2024 andi 45.000.000 Frw bakajya bayishyura buri mpera z'ukwezi hishyurwa nibura 7.500.000 Frw guhera mu kwezi kwa munani 2024 bitarenze amezi atandatu. Bityo ayo masezerano bagiranye muri ubwo bwumvikane Miracle Center Church in Rwanda igomba kwishyura Cyankàzi Annet amafaranga yose hamwe miliyoni mirongo irindwi (70.000.000 Frw) y'ingurane ku mutungo ubaruwe kuri UPI: 1/03/05/04/1305 waregewe, Cyankazi Annet na we agakorera Miracle Center Church in Rwanda ihererekanya kuri

uwo mutungo. [9] Ku wa 17/04/2025 MIRACLE CENTER CHURH yatanze ikirego gikosoza urwo rubanza RCAA 00002/2024/CA, ku makosa ivuga ko yarugaragayemo, mu bika byose bya Copie y’urubanza ndetse no mu kiregerwa, aho ngo bigaragara ko Umucamanza yibeshye ku izina ry’uwarezwe ari we Miracle Center Church akajya yandika ko ari Miracle Center Churh in Rwanda. Itanga RGB Certificate yo ku wa 12/07/2022 nk’ikimenyetso cyemeza amazina ya nyayo y’uwaregwaga.

Page 4

[10] Iburanisha ry’urubanza mu nama y’abacamanza (Chambre du Conseil) ryashyizwe ku wa 07/05/2025, Urukiko rusuzuma mu mwiherero ikibazo cya Miracle Center Churh, ivuga ko umucamanza yibeshye mu rubanza, akajya yandika ahantu hanyuranye ko ari “Miracle Center Churh in Rwanda” kandi byagombye kuba “Miracle Center Church”, urubanza rurapfundikirwa, Urukiko rutangaza ko ruzasomwa ku wa 23/05/2025 ari na wo munsi rusomweho.

II. IKIBAZO KIGIZE URU RUBANZA N’ISESENGURA

RYACYO

Gusuzuma niba hari amakosa y’imyandikire Urukiko rw’Ubujurire rwakoze mu rubanza RCAA 00002/2024/CA rwaciwe ku wa 20/12/2024 yakosorwamo [11] Mu myanzuro Miracle Center Churh yatanze irega yakomojweho hejuru mu bika bibanziriza iki, yavuze ko yatanze ikirego gikosoza urubanza RCAA 00002/2024/CA uru Rukiko rwaciye, aho nyuma yo kubona kopi yarwo, basanzemo amakosa ahantu henshi hagaragaramo umwirondoro w’umuburanyi Miracle Center Churh, Urukiko rwagiye rwita Miracle Center Churh “in Rwanda”, isaba ko ayo magambo “in Rwanda” yavanwa ku mwirondoro wayo muri urwo rubanza hakandikwa gusa “Miracle Center Churh” nk’uko bigaragara kuri RGB Certificate yo ku wa 12/07/2022 yashyikirije Urukiko.

UKO URUKIKO RUBIBONA [12] Ikibazo kiri imbere y’uru Rukiko cyo gukosora amakosa y’imyandikire rwaba rwarakoze mu rubanza ni cyo kigomba guhuzwa n’amategeko y’ikosora ry’imanza1, rubihuza n’andi mategeko2 n’ibimenyetso bigaragara muri dosiye, rugafata icyemezo kuri iki kibazo rwashyikirijwe. [13] Dosiye y’urubanza igaragaza ko mu rubanza kuva rugitangira izina Cyankazi Annet yagaragaje ko ari iry’uregwa ari “Miracle Center Churh in Rwanda”, ko mu bujurire bwa mbere yakomeje kwitwa gutyo nk’uwajuriye mu rubanza, mu nama ntegurarubanza mu Rukiko rw’Ubujurire iryo zina riba ari ryo rikomeza kugaruka kugeza urubanza ruciwe kandi ababuranyi bose bahari, hakaba muri icyo gihe cyose nta n’umwe wigeze agaragaza ko ahamagarwa mu izina atitwa.

1 Ingingo ya 140 y’Itegeko n° 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibi bikurikirira: “Ikirego gikosora cyangwa gisobanura urubanza kiburanishwa nk’inyandiko nsobanurakirego itanzwe n’umuranyi umwe. Urubanza rukosora urundi, rukosora gusa amakosa y’imyandikire”.

2 Ingingo ya 7, agace ka 2o y’ryo tegeko, ku nshingano z’urega iteganya ibi bikurikirira: “Kugaragaza umwirondoro w’uregwa wuzuye n’aho abarizwa, harimo e-mail na nimero ya telefoni yabarizwaho iyo bishoboka no kumenyesha Urukiko igihe uhindutse;

Page 5

[14] Dosiye igaragaza kandi ibaruwa yanditswe ku wa 01/08/2024 na Me Mugume Stephen, avuga ko ari mu izina no mu mwanya w’Itorero Miracle Center Church in Rwanda, ikaba yarandikiwe Nyakubahwa Perezida w’Urukiko rw’Ubujurire Kigali, ifite umutwe ugira uti: „gusaba ko amasezerano y’ubwumvikane (mediation) hagati ya Cyankazi Annet n’Itorero Miracle Center Church in Rwanda yo ku itariki ya 24/06/2024 aguma uko ari mu ngingo zayo zose bitaba ibyo iburanisha rigasubukurwa“. [15] Ibimenyetso bimaze kuvugwa haruguru bigaragaza neza ko amazina y’ababuranyi muri urwo rubanza ari Cyankazi Annet na Miracle Center Church in Rwanda. Aya mazina kandi niyo Urukiko rwakoresheje mu rubanza RCAA 00002/2024/CA rwaciwe ku wa 20/12/2024 rusabirwa gukosorwa. [16] Hashingiye ku bimaze gusobanurwa haruguru, Urukiko rurasanga ibivugwa n’urega ko rwakoze amakosa y’imyandikire rukita umuburanyi MIRACLE CENTER CHURH IN RWANDA kandi we yitwa MIRACLE CENTER CHURCH, nta shingiro bifite; iki kirego kikaba kitagomba guhabwa ishingiro. III. ICYEMEZO CY’URUKIKO [17] Rwemeje ko ikirego cyatanzwe na Miracle Center Church cyo gukosoza urubanza RCAA 00002/2024/CA rwaciwe n’Urukiko rw’Ubujurire ku wa 20/12/2024 nta shingiro gifite.