DAYENU HOTEL LTD v BRD PLC NABANDI.

# DAYENU HOTEL LTD v BRD PLC NABANDI.

- Source: Amategeko - Section: Decisions (Judgements) - Date: 2023-07-01 - Case/document no.: RCAA00036/2022/CA - Collection: Court of Appeal

## Text

## Page 1

DAYENU HOTEL LTD vs BRD PLC N’ABANDI. [Rwanda URUKIKO RW’UBUJURIRE – RCAA00036/2022/CA (Ngagi, P.J.) 29 Kamena 2023] Amategeko agenga imiburanishirize y’imanza mbonezamubano – Ikirego cy’inyongera – Ikirego cy’inyongera, ni igiha uburenganzira uwareze bwo kugira ibindi asaba bifite aho bihuriye n’ibyo yasabye atanga ikirego. Amategeko agenga imanza z’imbonezamubano – Amasezerano – Kwishyurira undi muntu – Nta kibuza ko umuntu yishyurira undi umwenda afitiye banki – Kuba umuntu cyangwa ikigo kishyuye umwenda undi muntu afitiye banki, ntabwo yasaba banki kuyamusubiza ahubwo niba afite impamvu zemewe n’Amategeko, abisaba abo yishyuriye. Incamake y’ikibazo: Uru rubanza rwatangiye DAYENU Hotel Ltd irega Gasana, Dusabimana na BRD mu Rukiko Rwisumbuye rwa Huye isaba kwandikwaho umutungo ubaruye kuri UPI: 2/01/01/04/6262 wanditswe kuri Dusabimana nyiri hoteli na Gasana umugabo we. ivuga ko Gasana yayihaye umutungo ubaruye kuri UPI: 2/01/01/04/6262 ikawuhinduramo Hoteli, hanyuma igafata inshingano zo kwishyura amafaranga y’umwenda yayubatse ariko ko ngo kugeza ubu ikorera muri uwo mutungo, itarashoboye kuwandikwaho ku mpamvu y’itambama ryawukozweho na BRD Ltd ishingiye ku rubanza RCOMAA00067/2016/CS BRD Ltd yatsinzemo Gasana. BRD Plc yireguye ivuga ko yahaye Gasana na Dusabimana inguzanyo zinyuranye, mu masezerano, ngo bagiranye, Gasana naDusabimana bagaragazaga ko barimo kubaka i Hoteli DAYENU. Isobanura ko ubutaka, inyubako n'ibikoresho byazo byatanzweho ingwate kubera izo nguzanyo, ingwate y’ubutaka ikandikwa nuMwanditsi Mukuru, kandi ko muri ayo masezerano impande zombi zumvikanye ko abagurijwe badashobora kwivanaho na rimwe uwo mutungo itararangiza kwishyurwa. Hanyuma Gasana na Dusabimana ntibashoboye kwishyura izo nguzanyo bahawe, BRD Ltd ibitangira ikirego isaba kwishyurwa, ibatsindira umwenda ungana na 700.000.000Frw mu rubanza RCOMAA00067/2016/CS, rukaba rwararangijwe. Ivuga kandi ko DAYENU HOTEL Ltd yashatse kubangamira igurishwa ry'umutungo ikoreramo, igatanga ikirego cyo kujijisha isaba ko uwo mutungo uyandikwaho, bityo ngo ibivugwa na DAYENU Hotel Ltd nta kuri kurimo, ahubwo ari uburiganya ba nyirayo Gasana na Dusabimana bahimbye, bagamije gushaka uburyo baburizamo irangizwa ry'urubanza RCOMAA00067/2016/CS. Gasana na Dusabima biregura bavuga ko DAYENU Hotel Ltd yahawe ibikorwa biri mu mutungo ufite UPI: 2/01/01/04/6262, ukorerwamo ibijyanye na Hoteli igakomereza inyubako aho zari zigeze kugeza zuzuye, ikishyura BRD Ltd 200.000.000Frw, ahwanye n’agaciro k’aho ibikorwa byari bigeze, ariko ko DAYENU HOTEL itashoboye kwandikwaho uwo mutungo kubera itambama ryakozwe na BRD PLC mu rwego rwo kurangiza urubanza RCOMAA00067/2016/CS baburanye, bityo ko Urukiko ari rwo rukwiye gukemura icyo kibazo kuko bo bemera ko uwo mutungo ari uwa DAYENU HOTEL Ltd. Urukiko Mu rubanza RC00064/2020/TGI/HYE rwaciwe n’Urukiko Rwisumbuye rwa Huye rwemeje ko ikirego cya DAYENU Hotel Ltd nta shingiro gifite, ko umutungo ubaruye kuri UPI: 2/01/01/04/6262 uguma ku mazina ya Gasana na Dusabimana.

## Page 2

DAYENU HOTEL Ltd ntiyishimiye imikirize y’urwo rubanza, irujuririra mu Rukiko Rukuru, Urugereko rwa Nyanza, ivuga ko Urukiko Rwisumbuye rwa Huye rwirengagije inyandiko yo ku wa 22/09/2010, igaragaza ko umutungo wishingirwaga ari uwa DAYENU HOTL Ltd, na BRD PLC ikaba ngo yemera ko umutungo wishyurirwaga ubwishingizi ari uwa DAYENU HOTEL Ltd, kandi ko rwirengagije imvugo ya Gasana na Dusabimana ndetse n’ubwishyu bwatanzwe na DAYENU HOTEL Ltd yishyura inguzanyo bahawe. Ivuga kandi ko rutagize icyo ruvuga ku kirego cy’inyongera yatanze, aho yasabaga ko Urukiko ruramutse rutemeje ko yandikwaho umutungo BRD PLC yayisubiza 204.384.746Frw yishyuriye Gasana n’inyungu zayo. BRD Plc yiregura ivuga ko ntacyo Urukiko Rwisumbuye rwa Huye rwirengagije, kuko inyandiko yo ku wa 22/09/2010 ivugwa ari inyandiko y’amasezerano y’ubwishingizi bw’inkongi y’umuriro DAYENU HOTEL Ltd yagiranye na CORAR, BRD Plc ikayazamo nk’igomba kwishyurwa mbere mu gihe impanuka yaba ibaye. kuvuga kandi ko bemera ko bawutanze, barawihaga kuko DAYENU HOTEL Ltd yanditse kuri Dusabimana ijana ku ijana, naho kuba yarishyuwe na DAYENU ku nguzanyo yahaye Gasana na Dusabimana na byo atari ikimenyetso cyuko yeguriwe umutungo ubaruye kuri UPI: 2/01/01/04/6262 kuko bitabujijwe ko umuntu yishyurira undi. Ivuga kandi ko itagomba kuryozwa amafaranga DAYENU HOTEL Ltd yakoresheje yubaka kuko iyi Hotel yubatse ku nguzanyo BRD PLC yatanze, naho kuba yarishyuye bikaba byabazwa Gasana na Dusabimana niba yarabishyuriye bitari ngombwa. Gasana na Dusabimana bavuga ko ibimenyetso DAYENU HOTEL Ltd ivuga byirengagijwe koko, kuko umutungo uvugwa baweguriye DAYENU HOTEL Ltd, bityo Urukiko Rukuru, Urugereko rwa Nyanza, rukaba rwabikosora. Urukiko Rukuru, mu rubanza RCA00091/2021/HC/NYZ rwemeje ko ubujurire bwa DAYENU HOTEL Ltd nta shingiro bufite, ko urubanza rujuririrwa rudahindutse. Rutegeka DAYENU HOTEL Ltd kwishyura abaregwa indishyi zitandukanye. DAYENU HOTEL Ltd ntiyishimiye imikirize y’urubanza iyijuririra mu Rukiko rw’Ubujurire,isaba gusubizwa amafaranga yishyuriye Gasana na Dusabimana n’ayo yashyize ku nyubako ikoreramo kuko Urukiko Rukuru, Urugereko rwa Nyanza rwemeje ko itayasubizwa rwirengagije ko DAYENU HOTEL Ltd ifite ubuzima gatozi butandukanye n’ubwa Gasana na Dusabimana, ko kandi umutungo yakoresheje ari uwayo. BRD Plc yiregura ivuga ko ubujurire bwa DAYENU Hotel Ltd nta shingiro bufite kuko itagomba kwishyuzwa amafaranga DAYENU Hotel Ltd yishyuriye Gasana na Dusabimana. Ivuga kandi ko iki kirego kitagombaga kwakirwa kuko atari ikirego cy’inyongera, ko kandi kitari mu bubasha bw’inkiko ziburanisha imanza z’imbonezamubano. Gasana na Dusabimana biregura bavuga ko ibikorwa DAYENU HOTEL Ltd yakoze ku mutungo uburanwa n’amafaranga yishyuye BRD Plc batayahakana, ko rero Urukiko ari rwo rukwiye gukemura iki kibazo. Urukiko rw’Ubujurire rwabanje gusuzuma niba ikirego DAYENU Hotel Ltd yatanze gisaba gusubizwa 330.159.006Frw mu gihe itanditsweho umutungo ubaruye kuri UPI: 2/01/01/04/6262 ari ikirego cy’inyongera no kumenya ko cyari mu bubasha bw’Urukiko Rukuru.

## Page 3

Urukiko mu rubanza RCAA00036/2022/CA rwemeje ko ikirego DAYENU Hotel Ltd yatanze gisaba kwandikwaho umutungo ubaruye kuri UPI: 2/01/01/04/6262 ari ikirego cy’imbonezamubano, bityo ko n’ikirego cy’inyongera yatanze isaba gusubizwa 330.159.006Frw mu gihe itanditsweho uwo mutungo nacyo ari ikirego cy’imbonezamubano kuko gishamikiye ku kirego cy’iremezo yari yatanze mu rukiko, kikaba rero kiri mu bubasha bw’inkiko ziburanisha imanza z’imbonezamubano. Urukiko Rukuru, Urugereko rwa Nyanza, rukaba nta kosa rwakoze ryo gusuzuma icyo kirego. Ku bijyanye no kumenya niba hari ikosa Urukiko Rukuru rwakoze ryo kutemeza ko DAYENU HOTEL Ltd isubizwa 330.159.006Frw, Urukiko rwemeje ko ibyo DAYENU HOTEL Ltd yaba yarakoze ku nyubako ikoreramo, cyangwa amafaranga yaba yarishyuriye Gasana na Dusabimana bitabazwa BRD Plc, ahubwo byabazwa uwo yabikoreye, cyangwa abo yishyuriye, kuko bibujijwe ko umuntu yakwishyurira undi umwenda afite. Incamake y’icyemezo:1. Ikirego cy’inyongera, ni igiha uburenganzira uwareze bwo kugira ibindi asaba bifite aho bihuriye n’ibyo yasabye atanga ikirego. Bityo, umuburanyi watanze ikirego ashobora kugira ibindi asaba by’inyongera byuzuza ibyo yasabye ubwo yatangaga ikirego cyangwa ibindi byongera ikirego yari yatanze. 2.Ikirego cy’inyongera nubwo cyaba gikomoka ku iyubahirizwa ry’amasezerano y’ubucuruzi ariko gishingiye ku kirego cy’iremezo cy’imbonezamubano kiba kiri mu bubabasha bw’Urukiko ruburanisha imanza mbonezamubano. 3. Nta kibuza ko umuntu yishyurira undi umwenda afitiye banki. Bityo, kuba umuntu cyangwa ikigo kishyuye umwenda undi muntu afitiye banki, ntabwo yasaba banki kuyamusubiza ahubwo niba afite impamvu zemewe n’Amategeko, abisaba abo yishyuriye. 3. Amafaranga y’ikurikiranarubanza n’igihembo cya Avoka ntatangwa iyo ubujurire ndetse n’ubujurire bwuririye ku bundi butahawe ishingiro. Ubujurire n’ubujurire bwuririye ku bundi nta shingiro bufite. Amategeko yashingiweho: Itegeko N°22/2018 ryo ku wa 29/04/2018 ryerekeye imiburanishirize y’imanza mbonezamubano iz’ubucuruzi, iz’umurimo n’iz’ubutegetsi, ingingo ya 111, 112 na 150 Itegeko N° 15/2004 ryo ku wa 12/06/2004 ryeyekeye ibimenyetso mu manza n’itangwa ryabyo, ingingo ya 3 Imanza zifashishijwe: RPAA 00780/2021/CA, Ubushinjacyaha vs Mbabazi rwaciwe n’Urukiko rw’Ubujurire ku wa 17/3/2023 Urubanza

## Page 4

I. IMITERERE Y’URUBANZA [1] Uru rubanza rwatangiriye mu Rukiko Rwisumbuye rwa Huye, DAYENU Hotel Ltd irega Gasana Gaspard, Dusabimana Clothilde na BRD ivuga ko Gasana Gaspard yayihaye umutungo ubaruye kuri UPI: 2/01/01/04/6262 ikawuhinduramo Hoteli, hanyuma igafata inshingano zo kwishyura amafaranga yayubatse nk’uko bigaragazwa n’inyandiko yayishyuriyeho. Ko kugeza ubu ikorera muri uwo mutungo, ariko ko itashoboye kuwandikwaho ku mpamvu y’itambama ryawukozweho kubera urubanza RCOMAA00067/2016/CS BRD Ltd yatsinzemo Gasana Gaspard rwagombaga kurangizwa rurebana n’umwenda yabahaye, maze isaba kwandikwaho umutungo ubaruye kuri UPI: 2/01/01/04/6262 wanditswe kuri Dusabimana Clothilde nyiri hoteli na Gasana Gaspard umugabo we. [2] BRD Plc yireguye ivuga ko yagiye iha Gasana Gaspard na Dusabimana Clothilde inguzanyo zinyuranye guhera mu mwaka wa 2006 kugeza mu mwaka wa 2012. Mu masezerano, impande zombi zagiye zigirana, Gasana Gaspard na Dusabimana Clothilde bagaragazaga ko barimo kubaka inyubako zizakoreramo Hoteli bitaga DAYENU. Isobanura ko ubutaka, inyubako n'ibikoresho byazo byatanzweho ingwate kubera izo nguzanyo, ingwate y’ubutaka ikandikwa ku Mwanditsi Mukuru, kandi ko muri ayo masezerano impande zombi zumvikanye ko abagurijwe badashobora kwivanaho na rimwe uwo mutungo ugwatirijwe itararangiza kwishyurwa. Kandi ko Gasana Gaspard na Dusabimana Clothilde batashoboye kwishyura izo nguzanyo bahawe nk'uko byumvikanyeho, ikabitangira ikirego isaba kwishyurwa, ikabatsindira umwenda ungana na 700.000.000Frw mu rubanza no RCOMAA00067/2016/CS mu Rukiko rw'Ikirenga, ariko bakaba baranze kururangiza ku neza bigatuma rurangizwa ku gahato. [3] Ivuga na none ko DAYENU HOTEL Ltd yashatse kubangamira igurishwa ry'umutungo ikoreramo, igatanga ikirego cyo kujijisha isaba ko uwo mutungo uyandikwaho, ivuga ko ari uwayo yahawe na bene wo nyuma yo kumvikana na yo (BRD PLC) kandi ngo ntabyabayeho, kuko ibyo bitari gushoboka ko itanga amafaranga yo kubaka inyubako no kugura ibikoresho yemera ko ingwate yayo ijya mu maboko y'undi muntu abo yahaye inguzanyo batarayishyura. Bityo ko ibivugwa na DAYENU Hotel Ltd nta kuri kurimo, ahubwo ari uburiganya ba nyirayo Gasana Gaspard na DUSABIMA Clothilde bahimbye, bagamije gushaka uburyo baburizamo irangizwa ry’urubanza RCOMAA00067/2016/CS yabatsinzemo. [4] Gasana Gaspard na Dusabima Clothilde biregura bavuga ko DAYENU Hotel Ltd yahawe ibikorwa biri mu mutungo ufite UPI: 2/01/01/04/6262, ukorerwam o ibijyanye na Hoteli kuva muri 2010 ubwo yashingwaga, kandi ko yakomereje aho inyubako zari zigeze icyo gihe kugeza zuzuye, ikishyura BRD Ltd 200.000.000Frw, ahwanye n’agaciro k’aho ibikorwa byari bigezeho, ariko ko DAYENU HOTEL itashoboye kwandikwaho uwo mutungo kubera itambama ryakozwe na BRD PLC mu rwego rwo kurangiza urubanza RCOMAA00067/2016/CS baburanye, bityo ko Urukiko ari rwo rukwiye gukemura icyo kibazo kuko bo bemera ko uwo mutungo ari uwa DAYENU HOTEL Ltd, kandi ko na BRD PLC ibizi. [5] Mu rubanza RC00064/2020/TGI/HYE rwaciwe n’Urukiko Rwisumbuye rwa Huye ku wa 17/11/2021, urwo Rukiko rwemeje ko ikirego cya DAYENU Hotel Ltd nta shingiro gifite, ko umutungo ubaruye kuri UPI : 2/01/01/04/6262 uguma ku mazina ya Gasana Gaspard na Dusabimana Clothilde. Rutegeka DAYENU HOTEL Ltd guha BRD PLC 500.000Frw y’igihembo

## Page 5

cya Avoka, kandi ko amagarama yatanzwe na DAYENU HOTEL Ltd ahwanye n’ibyakozwe mu rubanza. [6] DAYENU HOTEL Ltd ntiyishimiye imikirize y’urwo rubanza, irujuririra mu Rukiko Rukuru, Urugereko rwa Nyanza, ivuga ko Urukiko Rwisumbuye rwa Huye rwirengagije inyandiko yo ku wa 22/09/2010, kandi ibiyikubiyemo bigaragaza ko umutungo wishingirwaga ari uwa DAYENU HOTEL Ltd, na BRD PLC ikaba yemera ko umutungo wishyurirwaga ubwishingizi ari uwa DAYENU HOTEL Ltd, kandi ko rwirengagije imvugo ya Gasana Gaspard na Dusabimana Clothilde ndetse n’ubwishyu bwatanzwe na DAYENU HOTEL Ltd yishyura inguzanyo bahawe. Ivuga kandi ko rutagize icyo ruvuga ku kirego cy’inyongera yatanze, aho yasabaga ko Urukiko ruramutse rutemeje ko yandikwaho umutungo BRD PLC yayisubiza 204.384.746Frw yishyuriye Gasana Gaspard n’inyungu zayo zibariwe kuri 18% ndetse Urukiko rugategeka ko DAYENU Hotel Ltd yishyurwa 125.774.260Frw z’ibyo DAYENU Hotel Ltd yakoze kuri uyu mutungo n’inyungu zayo zibariwe kuri 18%. [7] BRD Plc yiregura ivuga ko ntacyo Urukiko Rwisumbuye rwa Huye rwirengagije, kuko inyandiko yo ku wa 22/09/2010 ivugwa ari inyandiko y’amasezerano y’ubwishingizi bw’inkongi y’umuriro DAYENU HOTEL Ltd yagiranye na CORAR, BRD Plc ikayazamo nk’igomba kwishyurwa mbere mu gihe impanuka yaba ibaye kubera inguzanyo yari yarahaye Gasana Gaspard na Dusabimana Clothilde, ko nta kimenyetso cyanditse kigaragaza ko Gasana Gaspard na Dusabimana Clothilde beguriye Dayenu HOTEL Ltd uwo mutungo, kuvuga kandi ko bemera ko bawutanze nta wundi bawuhaga n’ubundi uretse kuwiha kuko DAYENU HOTEL Ltd yanditse kuri Dusabimana Clothilde ijana ku ijana, naho kuba yarishyuwe na DAYENU ku nguzanyo yahaye Gasana Gaspard na Dusabimana Clothilde na byo atari ikimenyetso cyuko yeguriwe umutungo ubaruye kuri UPI: 2/01/01/04/6262 kuko bitabujijwe ko umuntu yishyurira undi. Ivuga kandi ko itagomba kuryozwa amafaranga DAYENU HOTEL Ltd yakoresheje yubaka kuko iyi Hotel yubatse ku nguzanyo BRD PLC yatanze, naho kuba yarishyuye bikaba byabazwa Gasana Gaspard na Dusabimana Clothilde niba yarabishyuriye bitari ngombwa. [8] Gasana Gaspard na Dusabimana Clothilde bavuga ko ibimenyetso DAYENU HOTEL Ltd ivuga byirengagijwe kuko umutungo uvugwa baweguriye DAYENU HOTEL Ltd, bityo Urukiko Rukuru, Urugereko rwa Nyanza, rukaba rwabikosora. [9] Ku wa 27/10/2022, Urukiko Rukuru, Urugereko rwa Nyanza rwaciye urubanza RCA00091/2021/HC/NYZ rwemeza ko ubujurire bwa DAYENU HOTEL Ltd nta shingiro bufite, ko urubanza RC00064/2020/TGI/HYE rwajuririwe rudahinduts e ku birebana no kuba DAYENU HOTEL Ltd itagomba kwandikwaho ubutaka bubaruye kuri UPI:2/01/01/04/6262. Rutegeka DAYENU HOTEL Ltd kwishyura BRD Plc 1.000.000Frw y’indishyi zo gusiragira ku rubanza na 250.000Frw y’igihembo cya Avoka, yiyongera kuri 500.000Frw yari yagenewe ku rwego rwa mbere, yose hamwe akaba 1.750.000Frw, Rutegeka ko 40.000Frw, DAYENU HOTEL Ltd yari yatanzeho ingwate y’igarama ijurira aheze mu isanduku ya Leta. [10] DAYENU HOTEL Ltd ntiyishimiye imikirize y’urubanza iyijuririra mu Rukiko rw’Ubujurire, ubujurire bwayo buhabwa RCAA00036/2022/CA.

## Page 6

[11] Iburanisha mu ruhame ryabaye ku wa 05/06/2023, DAYENU Hotel Ltd ihagarariwe na Me Ngamije Eric, Gasana Gaspard na Dusabimana Clothilde bahagarariwe na Me Ndagijimana Ignace, naho BRD Plc ihagarariwe na Me Rwigema Vincent hasuzumwa ikibazo cyo kumenya niba DAYENU Hotel Ltd yaratsinzwe mu nkiko zombi zabanje hashingiwe ku mpamvu zimwe. Ku wa 15/06/2023, mu rubanza rubanziriza urundi, uru Rukiko rwemeza ko DAYENU Hotel Ltd itatsinzwe mu nkiko zombi zabanje hashingiwe ku mpamvu zimwe, bityo ko inzitizi yatanzwe na BRD Plc yo kutakira ubujurire bwa kabiri bwa DAYENU Hotel Ltd nta shingiro ifite. Urubanza rwaburanishijwe mu mizi ku wa 22/06/2023, ababuranyi bose bahagarariwe nka mbere. [12] Muri make DAYENU Hotel Ltd yajuriye isaba gusubizwa amafaranga yishyuriye Gasana Gaspard na Dusabimana Clothilde n’ayo yashyize ku nyubako ikoreramo kuko Urukiko Rukuru, Urugereko rwa Nyanza rwemeje ko itayasubizwa rwirengagije ko DAYENU HOTEL Ltd ifite ubuzima gatozi butandukanye n’ubwa Gasana Gaspard na Dusabimana Clothilde, ko kandi umutungo yakoresheje ari uwayo. BRD Plc yiregura ivuga ko ubujurire bwa DAYENU Hotel Ltd nta shingiro bufite kuko itagomba kwishyuzwa amafaranga DAYENU Hotel Ltd yishyuriye Gasana Gaspard na Dusabimana Clothilde. Ivuga kandi ko iki kirego kitagombaga kwakirwa kuko atari ikirego cy’inyongera, ko kandi kitari mu bubasha bw’inkiko ziburanisha imanza z’imbonezamubano. Naho Gasana Gaspard na Dusabimana Clothilde biregura bavuga ko ibikorwa DAYENU HOTEL Ltd yakoze ku mutungo uburanwa n’amafaranga yishyuye BRD Plc batayahakana, ko rero Urukiko ari rwo rukwiye gukemura iki kibazo. [13] Muri uru rubanza Urukiko rurasanga mbere yuko hasuzumwa ko DAYENU Hotel Ltd yagombaga gusubizwa amafaranga isaba mu gihe itanditsweho umutungo ubaruye kuri UPI: 2/01/01/04/6262 ari ngombwa kubanza gusuzuma ko icyo kirego gisaba gusubizwa amafaranga ari ikirego cy’inyongera ko kandi cyari mu bubasha bw’Urukiko Rukuru, bityo ibibazo Urukiko rugomba gusuzuma ni ibi bikurikira: Kumenya niba ikirego DAYENU HOTEL Ltd yatanze gisaba gusubizwa 330.159.006Frw mu gihe itanditsweho umutungo ubaruye kuri UPI: 2/01/01/04/6262 ari ikirego cy’inyongera no kumenya ko cyari mu bubasha bw’Urukiko Rukuru; Kumenya niba hari ikosa Urukiko Rukuru rwarakoze ryo kutemeza ko DAYENU HOTEL Ltd isubizwa 330.159.006Frw yaregeye ; Kumenya niba amafaranga y’ikurikiranarubanza n’igihembo cya Avoka asabwa muri uru rubanza afite ishingiro. II. ISESENGURA RY’IBIBAZO BIGIZE URUBANZA 1.Kumenya niba ikirego DAYENU Hotel Ltd yatanze gisaba gusubizwa 330.159.006 Frw mu gihe itanditsweho umutungo ubaruye kuri UPI: 2/01/01/04/6262 ari ikirego cy’inyongera no kumenya ko cyari mu bubasha bw’Urukiko Rukuru [14] Uhagarariye BRD Plc ashingiye ku ngingo ya 112 y’Itegeko Nº 22/2018 ryo ku wa 29/04/2018 ryibukijwe haruguru, , avuga ko mu gika cya 40 cy'urubanza no RCA00091/2021/HC/NYZ rujuririrwa, Urukiko Rukuru, Urugereko rwa Nyanza, rwafashe

## Page 7

nk'ikirego cy'inyongera, 330.159.006 Frw y'umwenda DAYENU HOTEL Ltd yasabye gusubizwa ivuga ko yayishyuriye Gasana Gaspard na Dusabimana Clothilde, n'ay’ibyo ivuga yongeye ku nyubako, kandi bitari bikwiriye, ngo kuko ayo mafaranga itari yarayaregeye ubwo yatangaga ikirego, ngo ibe yarasabye kucyuzuza cyangwa kucyongera. Ko kandi kuba ibyo DAYENU HOTEL Ltd yasabaga gusubizwa bishingiye ku iyubahirizwa ry'amasezerano y'ubucuruzi, bitari mu bubasha bw'Urukiko ruburanisha imanza z'imbonezamubano, ko ahubwo byari mu bubasha bw'Urukiko rw'ubucuruzi. Ko rero n’iyo Urukiko Rukuru, Urugereko rwa Nyanza, ruza gusanga ibyo yasabaga byari ikirego cy'inyongera, rwari kuba rwarabonye ko kitari mu bubasha bwarwo, bityo ntirugisuzume. [15] Uhagarariye DAYENU HOTEL Ltd mu kwiregura kuri iyi ngingo avuga ko ibyo BRD Plc ivuga bidakwiye guhabwa ishingiro kuko atari iby’ukuri, kuko DAYENU HOTEL Ltd yatanze icyo kirego nk’ikirego cy’inyongera, kandi ikaba yaragitanz e mu bihe no mu buryo buteganywa n’amategeko. Kandi ko ibyo BRD PLC ivuga ko ibyo DAYENU HOTEL Ltd yasabaga kubahiriza bishingiye ku masezerano y’ubucuruzi, bityo ko biri mu bubasha bw’inkiko z’Ubucuruzi, na byo atari ko biri, kuko ikirego cy’inyongera cyatanzwe na DAYENU HOTEL Ltd kitareba amasezerano yaba yaragiranye na BRD Plc, ko ahubwo ari ikirego cyari kigamije ko iyo hoteliyasubizwa ibyo yashyize ku mutungo yaregeye isaba ko yawandikwaho. Ko rero ari ikirego cy’inyongera cyujuje ibisabwa bishingiye ku mpamvu imwe n’ibyasabwaga mu kirego cy’iremezo, kandi kigamije kugira ibyo gisaba by’inyongera ku byari byaregewe (réclamation accessoire), ku buryo cyagombaga kwakirwa n’urwo Rukiko, hashingiwe ku ngingo ya 112 y'Itegeko Nº 22/2018 ryo ku wa 29/04/2018 ryibukijwe haruguru. [16] Uhagarariye Gasana Gaspard na Dusabimana Clothilde avuga ko iyi ngingo itareba Gasana Gaspard na Dusabimana, bityo abihariye ubushishozi bw'Urukiko. UKO URUKIKO RUBIBONA [17] Impaka kuri iyi ngingo zishingiye ku kumenya niba ikirego DAYENU HOTEL Ltd yatanze isaba gusubizwa 330.159.006Frw mu gihe itaba yanditsweho umutungo ubaruye kuri UPI: 2/01/01/04/6262 yasabye kwandikwaho ari ikirego cy’inyongera, ko kandi cyari mu bubasha bw’inkiko ziburanisha imanza z’imbonezamubano. [18] Ingingo ya 112 y’Itegeko Nº 22/2018 ryo ku wa 29/04/2018 ryibukijwe haruguru iteganya ko Ibirego by’inyongera ari ibishamikira ku birego by’iremezo bigamije gusaba inyongera ku byasabwe mbere mu itangwa ry’ikirego bicyuzuza cyangwa bicyongera bitewe ahanini n’ibyavutse mu iburanisha hagati bigomba gufatwaho icyemezo n’urukiko. [19] Urukiko rusesenguye ingingo yavuzwe haruguru rurasanga umushingamategeko yarateganyije ko umuburanyi watanze ikirego ashobora kugira ibindi asaba by’inyongera byuzuza ibyo yasabye ubwo yatangaga ikirego cyangwa ibindi byongere ikirego yari yatanze. Mu yandi magambo uwareze yemerewe kugira ibindi asaba bifite aho bihuriye n’ibyo yasabye atanga ikirego. [20] Ku birebana n’uru rubanza Urukiko rurasanga DAYENU HOTEL Ltd ari yo yatanze ikirego mu Rukiko Rwisumbuye rwa Huye isaba urwo Rukiko gutegeka ko umutungo ubaruye kuri UPI:

## Page 8

2/01/01/04/6262 wandikwa kuri DAYENU Hotel Lt. Mu mwanzuro wayo yasabye kandi ko mu gihe itakwandikwaho uwo mutungo, isaba gusubizwa amafaranga yawushyizeho n’ayo yishyuriye Gasana Gaspard na Dusabimana Clothilde. [21] Urukiko rurasanga ikirego DAYENU HOTEL Ltd yatanze gisaba gusubizwa amafaranga ivuga ko yishuye ku mutungo ubaruye kuri UPI: 2/01/01/04/6262 n’ayo yishyuriye Gasana Gaspard na Dusabimana Clothilde mu gihe icyifuzo cyayo cyo kwandikwaho uwo mutungo cyaba kidahawe ishingiro, ari ikirego cy’inyongera kuko nk’uko bigaragara gishamikiye ku kirego cy’iremezo yatanze gisaba kwandikwaho uwo mutungo, hanyuma isaba ibindi by’inyongera ko mu gihe itawanditsweho isaba gusubizwa amafaranga y’ibokorwa yakoze kuri uwo mutungo n’ayo yishyuye kubw’uwo mutungo, bityo rero ibyo BRD Plc ivuga ko atari ikirego cy’inyongera, nta shingiro bifite. [22] Urukiko rurasanga kandi ikirego DAYENU Hotel Ltd yatanze gisaba kwandikwaho umutungo ubaruye kuri UPI: 2/01/01/04/6262 ari ikirego cy’imbonezamubano, bikaba rero byumvikana ko n’ikirego cy’inyongera yatanze isaba gusubizwa 330.159.006Frw mu gihe itanditsweho uwo mutungo nacyo ari ikirego cy’imbonezamubano kuko gishamikiye ku kirego cy’iremezo DAYENU HOTEL Ltd yari yatanze mu rukiko, kikaba rero kiri mu bubasha bw’inkiko ziburanisha imanza z’imbonezamubano, bityo nta kosa Urukiko Rukuru, Urugereko rwa Nyanza, rwakoze ryo gusuzuma icyo kirego cyane ko Urukiko Rwisumbuye rwa Huye rutari rwagisuzumye kandi cyari mu byaregewe urwo Rukiko. [23] Ku byo uhagarariye BRD Plc avuga ko amafaranga DAYENU HOTEL Ltd isaba gusubizwa ashingiye ku iyubahirizwa ry'amasezerano y'ubucuruzi, ko rero icyo kirego kitari mu bubasha bw'Urukiko ruburanisha imanza z'imbonezamubano, ko ahubwo cyari mu bubasha bw'Urukiko rw'ubucuruzi, Urukiko rurasanga nta shingiro bifite kuko, nk’uko byasobanuwe haruguru gusaba kwandikwaho umutungo ni ikirego cy’imbonezamubano, bityo rero n’ikirego cy’inyongera gisaba gubizwa 330.159.006Frw DAYENU HOTEL Ltd ivuga ko yashyize kuri uwo mutungo hamwe nayo yishyuriye GASANA Gaspard na Dusabimana Clothilde, nacyo ni ikirego cy’imbonezamubano, nk’uko byibukijwe haruguru, cyane ko itagitanze ishingiye ku masezerano y’ubucuruzi yari hagati ya BRD Plc na Gasana Gaspard na Dusabimana Clothilde nk’uko uhagarariye BRD Plc ashaka kubyumvikanisha, ahubwo yagitanze ishingiye ku kirego cy’iremezo yatanze isaba kwandikwaho umutungo ubaruwe kuri UPI: 2/01/01/04/6262. [24] Urukiko rurasanga nyuma y’uko bigaragaye ko ikirego DAYENU Hotel Ltd yatanze ari ikirego cy’inyongera, ko kandi cyari mu bubasha bw’inkiko ziburanisha imanza z’imbonezamubano, rugiye gusuzuma niba hari ikosa Urukiko Rukuru rwakoze ryo kutemeza ko DAYENU HOTEL Ltd isubizwa amafaranga yaregeye. 2.Kumenya niba hari ikosa Urukiko Rukuru rwarakoze ryo kutemeza ko DAYENU HOTEL Ltd isubizwa 330.159.006Frw yaregeye [25] Uhagarariye DAYENU Hotel Ltd avuga ko Urukiko Rukuru, Urugereko rwa Nyanza, mu kwemeza ko DAYENU HOTEL Ltd itishyurwa amafaranga yishyuye

## Page 9

[26] ku bikorwa yongereye ku mutungo uburanwa n’ay’ibyo yakoresheje, rwavuze ko iyo hoteli yubatswe ku nguzanyo BRD Plc yahaye Gasana Gaspard na Dusabimana Clothilde, rwiregagije ko 204.384.746Frw yishyuriye Gasana Gaspard n’inyungu zayo zibariwe kuri 18%, ndetse na 125.774.260Frw z’ibyo DAYENU Hotel Ltd yakoresheje iwongerera agaciro nk’uko bigaragazwa n’igenagaciro ryakozwe, n’inyungu zayo zibariwe kuri 18% DAYENU Hotel isaba kwishyurwa, ntaho bihuriye n’inguzanyo BRD Plc yahaye Gasana Gaspard na Dusabimana Clothilde, kuko aya mafaranga yavuye mu mutungo wa DAYENU Hotel Ltd kandi ikaba ifite ubuzima gatozi ikaba itandukanye n’abo. Ko rero mu gihe Urukiko rwari rwanzuye ko hari impamvu zituma umutungo yashoyeho amafaranga utayandikwaho, asanga rwaragombaga gutegeka ko asubizwa ibyo yawutanzeho, bityo ko ari yo mpamvu asaba Urukiko rw’Ubujurire gutegeka ko DAYENU HOTEL Ltd isubizwa amafaranga amaze kuvugwa haruguru, hashingiw e kuri kw’igenagaciro rigaragaza agaciro k'imirimo DAYENU HOTEL yakoze ku mutungo uburanwa, no ku ngingo ya 24 y’Itegeko N° 007/2021 ryo ku wa 05/02/2021 rigenga amasosiyete y’ubucuruzi. [27] Mu iburanisha ryo ku wa 22/06/2023, yavuze na none ko BRD Plc ari yo yatumye DAYENU HOTEL Ltd itandikwaho umutungo wayo akaba ariyo mpamvu basabye ko amafaranga yatanze iyasubizwa na BRD Plc. [28] Uhagarariye BRD Plc yiregura kuri iyi ngingo y’ubujurire avuga ko nta shingiro ifite, kuko DAYENU HOTEL Ltd itagaragaza inenge ku byo Urukiko Rukuru, Urugereko rwa Nyanza, rwasobanuye mu bika bya 32 na 41 by'urubanza rujuririrwa, ngo inagaragaze uburyo byakosorwamo nk’uko biteganywa n'ingingo ya 150, agace ka 5º n’aka 6º y’Itegeko N°22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko: Ubujurire bukorwa mu buryo bw’umwanzuro utanga ʺ ikirego, ugaragaza ibi bikurikira: …(5°) urutonde rw’inenge z’urubanza zisabirwa gukosorwa n’ibindi bibazo bigomba gusuzumwa; (6°) ibisobanuro kuri buri nenge cyangwa kuri buri kibazo bigaragaza amakosa yakozwe n’uburyo agomba gukosorwa hashingiwe ku mategeko n’ibimenyetso n’igisabwa urukiko". [29] Avuga kandi ko DAYENU HOTEL Ltd nka sosiyete y'ubucuruzi ikora inyuze mu bagize inzego zayo, kandi Dusabimana Clothilde akaba ari we ugize inzego zayo zose, asanga ibyo yakoze mu nyungu ze bwite n'izasosiyete ye bifite agaciro. Byongeye kandi ko DAYENU HOTEL Ltd idakwiye gusaba BRD PLC kuyisubiza amafaranga yayishyuye kuko byari ngombwa ko yishyurwa, ko ahubwo ikwiye kuyisubiza ari uwo yishyuriye. Avuga ko ku bijyanye no kongerera agaciro iyo hoteli, Dusabimana Clothilde ntabyo yakoze, kuko inyubako n’ibikores ho biyirimo byakozwe ku nguzanyo ya BRD PLC, cyane ko adashobora kugaragaz a ahandi yaba yarakuye ubushobozi cyangwa ngo agaragaze agaciro k’ibyo BRD P lcyamuhereye inguzanyo, n’agaciro k’ibyo yita ko yaba yarikoreye ku giti cye n’aho yaba yarakuye ubwo bushobozi, cyane ko DAYENU HOTEL Ltd nka sosiyete ifite ubuzima gatozi (personne morale), ubushobozi bwayo bwagombaga kuva mu byo yakoze, ari na byo byagombaga kuvamo ubwishyu bw’inguzanyo, bityo ko kuba ibyo yakoze byarananiwe kuvamo ubwishyu bw’umwenda, itari kubona ubushobozi bwo kugira ibindi bikorwa yongeraho. [30] Avuga na none ko niba Gasana Gaspard na Dusabimana Clothilde bemera ko hari amafaranga DAYENU HOTEL Ltd yabishyuriye, bakwiye kuzayisubiza. Ko kandi ubwishyu Gasana Gaspard na Dusabimana Clothilde bagomba BRD PLC ari ubwategetswe mu rubanza

## Page 10

RCOMAA00067/2016/SC rwaciwe n’Urukiko rw’Ikirenga. Kandi ko nyuma y’icibwa ry’urwo rubanza nta bindi bikorwa byakozweho. [31] Uhagarariye Gasana Gaspard na Dusabimana Clothilde avuga ko ibikorwa DAYENU HOTEL Ltd yakoze ku mutungo uburanwa kuva yawuhabwa mu mwaka wa 2010, ndetse n’amafaranga yishyuye BRD PLC batayahakana. Ko Urukiko ari rwo rukwiye gukemura iki kibazo, kuko na mbere yuko amakimbirane avuka, BRD PLC yari izi neza ko uwo mutungo weguriwe DAYENU HOTEL Ltd, kandi ko itigeze igaragaza ko ibifiteho ikibazo, cyane ko n’ishami ryayo ryayikoreyemo igihe kirerekire. UKO URUKIKO RUBIBONA [32] Ingingo ya 150 y’itegeko N° 22/2018 ryo ku wa 29/04/2018 ryibukijwe haruguru, mu gace kayo ka 6, iteganya ko imyanzuro y’ubujurire igomba kugaragaza ibisobanuro kuri buri nenge cyangwa kuri buri kibazo bigaragaza amakosa yakozwe n’uburyo agomba gukosorwa hashingiwe ku mategeko n’ibimenyetso n’igisabwa urukiko. Bivuze ko uwajurije afite inshingano yo kugaragaza ukwibeshya kwakozwe n’Urukiko rubanza gushingiye ku mategeko cyangwa ku byabaye kwatumye urubanza rujuririrwa rucibwa nabi cyangwa kwatuma ruta agaciro. Iyo atabikoze ubwo bujurire burakirwa, urukiko rukemeza ko nta shingiro bufite1. [33] Ku birebana n’uru rubanza, Urukiko rurasanga Urukiko Rukuru, Urugereko rwa Nyanza, rwarasobanuye ko BRD Plc itagomba kuryozwa amafaranga DAYENU HOTEL Ltd yashyize ku nyubako ikoreramo ndetse n’ayo yishyuye BRD Plc ku mwenda wafashwe n’abayishinze banayikoreramo, kuko Gasana Gaspard na Dusabimana Clothilde basabye BRD Plc inguzanyo yo kubaka iyo hoteli, kandi ikaba yanditse ijana ku ijana kuri Dusabimana Clothilde. Rusobanura kandi ko kuba BRD Plc itemera ihererekanyamutungo ku mutungo yahaweho ingwate ikandikwa, atari ikosa ryatuma isubiza amafaranga yishyuwe ku mwenda, mu gihe abahawe inguzanyo batagaragaza ko aya mafaranga asabwa yishyuwe inguzanyo yose yaramaze kwishyurwa. [34] Urukiko rurasanga nk’uko byasobanuwe n’Urukiko Rukuru, Urugereko rwa Nyanza, ibyo DAYENU HOTEL Ltd yaba yarakoze ku nyubako ikoreramo, cyangwa amafaranga yaba yarishyuriye Gasana Gaspard na Dusabimana Clothilde bitabazwa BRD Plc, ahubwo byabazwa uwo yabikoreye, cyangwa abo yishyuriye. Kuba rero DAYENU HOTEL Ltd yanditse kuri Dusabimana Clotilde, ntabwo byumvikana uburyo DAYENU HOTEL Ltd yasaba ko ibyo yakoze kuri hoteli byaryozwa BRD Plc nkaho ari yo nyirayo. Na none amafaranga DAYENU HOTEL Ltd yaba yarishyuriye Gasana Gaspard na Dusabimana Clothilde ntabwo yabazwa BRD Plc, kuko nk’uko Urukiko Rukuru, Urugereko rwa Nyanza, rwabibonye ntabwo bibujijwe ko umuntu yakwishyurira undi umwenda afite. Mu gihe rero DAYENU HOTEL Ltd yasanga yarishyuriye Gasana Gaspard na Dusabimana Clothilde, kandi itaragombaga kubikora, ntakiyibuza gusaba abo yishyuriye kuba bayisubiza mu gihe haba hari impamvu yemewe n’amategeko yatuma iyasubizwa. [35] Urukiko rurasanga DAYENU HOTEL Ltd ntacyo ishingiraho cyemewe n’amategeko isaba ko BRD Plc iyisubiza amafaranga ivuga ko yishyuriye Gasana Gaspard na Dusabimana Clothilde, bityo hashingiwe ku ngingo ya 3 y’itegeko N° 15/2004 ryo ku wa 12/06/2004 ryeyekeye 1Reba urubanza Nº RPAA 00780/2021/CA rwaciwe n’Urukiko rw’Ubujurire ku wa 17/3/2023.

## Page 11

ibimenyetso mu manza n’itangwa ryabyo iteganya ko buri muburanyi agomba kugaragaza ukuri kw’ibyo aburana, Urukiko rurasanga mu gihe DAYENU HOTEL Ltd itagaragaza byerekana ko hari ikosa Urukiko Rukuru, Urugereko rwa Nyanza rwakoze, birumvikana ko iyi mpamvu yayo y’ubujurire nta shingiro ifite. [36] Ku byo DAYENU HOTEL Ltd ivuga ko Urukiko Rukuru, Urugereko rwa Nyanza rwirengagije ko ifite ubuzima gatozi, ikaba itandukanye na banyirayo, Urukiko rurasanga ntacyo byayimarira mu gihe itagaragaza ikosa ryakozwe na BRD Plc ryatuma iryozwa amafaranga DAYENU HOTEL Ltd yaba yarashyize kuri iyo hoteli n’ayo yishyuriye Gasana Gaspard na Dusabimana Clothilde. 3.Kumenya niba amafaranga y’ikurikiranarubanza n’igihembo cya Avoka asabwa muri uru rubanza afite ishingiro [37] Uhagarariye BRD Plc ashingiye ku biteganywa n’ingingo ya 111 y’Itegeko N°22/2018 ryo ku wa 29/04/2018 ryerekeye imiburanishirize y’imanza mbonezamubano iz’ubucuruzi, iz’umurimo n’iz’ubutegetsi, asaba Urukiko rw’Ubujurire gutegeka DAYENU HOTEL Ltd kwishyura BRD PLC 500.000 Frw y’ikurikiranarubanza, na 2.000.000 Frw y’igihembo cya Avoka kubera kuyishora mu manza z’amaherere bigatuma ikomeza kuzitakarizamo amafaranga bitari ngombwa. [38] Uhagarariye DAYENU Hotel Ltd yiregura kuri aya mafaranga y’ikurikiranarubanza n’igihembo cya Avoka BRD PLC isaba DAYENU HOTEL Ltd avuga ko ntayo ikwiye guhabwa, kuko kujuririra ibyo itishimiye ari uburenganzira bwayo, bikaba bidakwiye gufatwa nko kuyishora mu manza z'amaherere. [39] Uhagarariye Gasana Gaspard na Dusabimana Clothilde avuga ko iyi ngingo itareba Gasana na Clothilide Dusabimana. UKO URUKIKO RUBIBONA [40] Urukiko rurasanga nta mafaranga y’ikurikiranarubanza n’igihembo cya Avoka agomba gutangwa muri uru rubanza kuko yaba ubujurire bwa DAYENU Hotel Ltd yaba ubujurire bwuririye ku bundi bwatanzwe BRD Plc nta bwahawe ishingiro. III. ICYEMEZO CY’URUKIKO [41] Rwemeje ko ubujurire bwatanzwe na DAYENU Hotel Ltd, nta shingiro bufite; [42] Rwemeje ko ubujurire bwuririye ku bundi bwatanzwe na BRD Plc, nta shingiro bufite. [43] Rwemeje ko imikirize y’urubanza RCA00091/2021/HC/NYZ rwaciwe n’Urukiko Rukuru, Urugereko rwa Nyanza, ku wa 27/10/2022, idahindutse. [44] Ruvuze ko amagarama yatanzwe ahwanye n’ibyakozwe mu rubanza.