DELIVRANCE CHURCH N’UNDI vs SHOWERS OF BLESSINGS CHURCH

# DELIVRANCE CHURCH N’UNDI vs SHOWERS OF BLESSINGS CHURCH

- Source: Amategeko - Section: Decisions (Judgements) - Date: 2023-06-29 - Case/document no.: RRCA00076/2022/HC/RWG - Collection: High Court

## Text

## Page 1

DELIVRANCE CHURCH N’UNDI vs SHOWERS OF BLESSINGS CHURCH [Rwanda URUKIKO RUKURU URUGEREKO RWA RWAMAGANA – RCA00076/2022/HC/RWG (Nyirabagande, P.J.) 29 Kamena 2023] Amategeko agenga imanza z’imbonezamubano – Amasezerano y’impano – Ntabwo umuntu, ikigo cyangwa ishyirahamwe ryatanga impano hanyuma ngo ryisubire rivuge ko ntaryo ryatanze kandi hari ibimenyetso bigaragaza ko iyo mpano yatanzwe. Amategeko agenga imiburanishirize y’imanza mbonezamubano – Ikirego gishya mu rwego rw’ubujurire – Iyo ababuranyi bagaragaje ikibazo mu rubanza ku rwego rwa mbere, Urukiko ntirugire icyo rukivugaho, nta cyabuza Urukiko rwajuririwe kugifataho umwanzuro kuko kitaba ari ikirego gishya. Incamake y’ikibazo: Uru rubanza rwatangiye Showers Of Blessings Church irega Delivrance Church na Kimete Segashumba mu Rukiko Rwisumbuye rwa Nyarugenge asaba Urukiko kwemeza ko Showers of Blessings Church (SBC) ari yo yubatse Urusengero na Biro yarwo ku bwumvikane na Kimete Segashumba mu butaka yaguze mu masezerano yagiranye na Bazizane, no kwemeza ko ari yo ifite uburenganzira bwo gusengeramo; ni nyuma yaho Kimete we n’abakirisitu yari ayoboye wandikiye itorero rya Showers Of Blessings Church avuga ko ari umukozi w’Imana ukorera mu Karere ka Gatsibo ariko ko badafite irindi Torero babarizwamo, bakaba bifuza kwakirwa nk’abakirisitu n’abayoboke b’Itorero Showers of Blessings Church, iri naryo rirabyemera. Kimete Segashumba we avuga ko ari ntamutungo wa Showers of Blessings Church yubatse kubutaka yaguze na Bazizane, avuga ko uwo mutungo ugizwe n’Urusengero na Biro byubatswe n’abakirisitu atari Showers of Blessings Church yabyubatse. Urukiko mu rubanza RC00068/2021/TGI/NYG rwemeje ko urusengero na biro byubatswe mu butaka buvugwa mu masezerano Kimete Segashumba yagiranye na Bazizane byubatswe na Showers Of Blessings Church, kuko Kimete Segashumba yandikiye Showers Of Blessings Church asaba kwakirwa muri iryo torero we n’abakirisitu, bakabyemererwa, no kuba hari P.V. de remise et reprise » Kimete Segashumba yakoze agiye mu kiruhuko cy’izabukuru igaragazwamo imitungo ya Paroisse Nyabiheke irimo insengero 2 na biro byubatswe ku butaka buvugwa mu masezerano ya Kimete na Bazizane, Urukiko rwemeza ko iyo mitungo itakwitirirwa Delivrance Church, Kimete yagiyemo nyuma, kuko ntaho ihuriye n’uwo mutungo. Delivrance Church na Kimete Segashumba bajuririye Urukiko Rukuru. Delivrance Church ivuga ko hirengagijwe ko umutungo uburanwa ari uwayo kuko urusengero rwayo rwari ruhubatse rugasenywa na Showers of Blessing Church kandi rwubakwa n’abakirisitu harimo n’abo muri Delivrance Church kandi hirengagizwa ko n’ubutaka ari ubwayo n’ubwo mu masezerano hari handitseho Kimete, uyu kandi ngo akaba abyemeza, Kimete yajuririye avuga ko, nyuma yo kwemeza ko urusengero na biro byeguriwe Showers of Blessings Church, Urukiko Rwisumbuye rutavuze uko bizagenda ku birebana n’umuburanyi

## Page 2

ugomba gusubiza amafaranga y’ubutaka kuko ngo bitashoboka ko umwe agira urusengero na biro undi ngo agire ubutaka. Showers of Blessings Church ivuga ko impamvu z’ubujurire za Delivrance Church na Kimete Segashumba zitahabwa ishingiro hashingiwe ku byo Kimete yemera kandi akabyemeranywaho na Showers of Blessings Church, kandi ko yanditse asaba kwakirwa we n’abakirisitu, ndetse na « PV de remise et reprise » ivugwamo imitungo ihererekanyijwe. Showers of Blessings Church kandi ivuga ko ikibazo cy’ubutaka bwubatsweho urusengero na biro cyavuzweho mu rubanza rujuririrwa ariko Urukiko ntirwagifataho icyemezo bityo ngo kikaba kitasuzumwa bwa mbere ku rwego rw’ubujurire. Incamake y’icyemezo:1. Ntabwo umuntu, ikigo cyangwa ishyirahamwe ryatanga impano hanyuma ngo ryisubire rivuge ko ntaryo ryatanze kandi hari ibimenyetso bigaragaza ko iyo mpano yatanzwe. Bityo kuba umuntu yakoraga nka pasitoro afite abakirisitu ndetse n’imitungo agasaba ko yakirwa n’irindi torero agaragaza nibyo yaratunze birimo n’umutungo utimukanwa, akabyemererwa biba bibaye ibyiryo torero ryamwakiriye kuko aba abizanye nk’impano. 2. Iyo ababuranyi bagaragaje ikibazo mu rubanza ku rwego rwa mbere, Urukiko ntirugire icyo rukivugaho, nta cyabuza Urukiko rwajuririwe kugifataho umwanzuro kuko kitaba ari ikirego gishya. Bityo kuba haburanwa ubutaka n’ibibyubatsweho hagafatwa umwanzuro ku byubatse ku butaka gusa Urukiko ruba rukoze ikosa, rikosorwa n’urukiko rwajuririwe. 3. Iyo Urukiko rusanze abajuriye batsindwa n’urubanza, indishyi baciwe mu rubanza rujurirwa zigumaho iyo batabasha kugaragaza ko baziciwe bidakwiye. Ubujurire nta shingiro bufite. Amategeko yashingiweho: Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’ubucuruzi, iz’umurimo n’iz’ubutegetsi, Ingingo ya 6, 12, 111 Itegeko No 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, Ingingo ya 14,15 Nta manza zifashishijwe. Urubanza I. IMITERERE Y’URUBANZA [1] Delivrance Church na Kimete Segashumba bajuririye Urukiko Rukuru banenga icyemezo cyafashwe n’Urukiko Rwisumbuye rwemeje ko urusengero na biro byubatswe mu butaka buvugwa mu masezerano Kimete Segashumba yagiranye na Bazizane Patricie yo ku wa 1/01/2010 byubatswe

## Page 3

na Showers Of Blessings Church kuko ari umutungo w’Itorero ndetse Showers Of Blessings Church igakomeza gukorera muri izo nyubako kuko ari umutungo wayo ; Rutegetse ko umutungo uburanwa ugizwe n’Urusengero na Biro, biherereye mu Karere ka Gatsibo, Umurenge wa Gatsibo, Akagari ka Nyabicwamba, Umudugudu wa Kabashenda ari uwa Showers Of Blessings Church, izo nyubako bakaba bemerewe kuzikoreramo nta nkomyi kuko ari umutungo wayo ; rutegetse Kimete Segashumba kwishyura Showers Of Blessings Church indishyi z’akababaro zingana na 1.000.000 Frw n’igihembo cya avocat kingana na 600.000Frw, amafaranga akayishyura ku neza mu gihe giteganywa n’amategeko (ukwezi kumwe) atayatanga agakurwa mu bye ku ngufu za Leta. Bityo Showers of Blessings Church igafungurirwa isengero zayo nta nkomyi kuko ari umutungo wayo. [2] Muri iyi dosiye habonekamo amasezerano y’ubugure hagati ya Bazizane Patricie na Kimete Segashumba yo ku wa 01/10/2010 kuri 110.000 Frw, hari ibaruwa yo ku wa 08/08/2015 Kimete Segashumba yanditswemo ko afite abakristu, abapasiteri n’abadiyakoni, akaba ashaka gukorana na Showers Of Blessings Church, iyi yasubije ko yishimiye gukorana na we mu ibaruwa yo ku wa 9/8/2015. Habonekamo kandi raporo yakozwe na Pastor Kimete Segashumba agaragaza ibikorwa bya Showers Of Blessings Church ivugwamo ko bafashwa kubakirwa urusengera rwa Paroisse ya Nyabiheke, ko urwo bafite ruri gusenyuka. Hari kandi « remise et reprise » yo ku wa 05/05/2018 hagati ya Kimete Segashumba na Mukiza Mezake, hakaba raporo y’inama yo ku wa 9/02/2019 yanzuwemo ko hagiye kubakwa urusengero na biro ya Kabeza. Ku wa 12/3/2019 Rev. Past. Kimete Segashumba yandikiye Showers Of Blessing Church asaba gukatirwa ikibanza ku rusengero ngo yongere aho atuye. [3] Showers Of Blessing Church yasabye Kimete Segashumba uburenganzira bwo gukorerwa ihererekanya kuri wa mutungo yubatse ku butaka yaguze na Bazizane Patricie, ikavuga ko yabuhawe na Kimete. Uyu avuga ko ubwo butaka ari we wabuguze, urusengero rwubakwa ku bwitange bw’abakirisitu nyuma y’uko Showers Of Blessing Church ntacyo isubije ku iburuwa ya Kimete wasabaga kubakirwa urusengero, avuga ko yaje kujya Delivrance Church hamwe n’igice cy’abakirisitu. [4] Showers Of Blessing Church yaregeye Urukiko Rwisumbuye isaba ko rwemeza ko urusengero na biro ari ibyayo, ko ari iyo ikwiye gukomeza kurusengeramo kuko ubutaka rwubatsweho babuhaweho impano na Kimete. Uyu avuga ko uwo mutungo atari uwa Showers OF Blessings Church ko itanagize uruhare mu kubaka urusengero, ko n’inyandiko ishingirwaho ko Kimete yatanze uwo mutungo hari ibyongewemo. [5] Mu kwemeza ko urusengero na biro byubatswe mu butaka buvugwa mu masezerano Kimete Segashumba yagiranye na Bazizane Patricie yo ku wa 1/01/2010 byubatswe na Showers Of Blessings Church kuko ari umutungo w’Itorero ndetse igakomeza gukorera muri izo nyubako, hashingiwe ku nyandiko, iyo ku wa 08/08/2015, Kimete Segashumba ahagarariye Paroisse ya Nyabiheke yarandikiye Showers Of Blessings Church asaba kwakirwa muri iryo torero we n’abakirisitu, bakabyemererwa mu ibaruwa yo ku wa 09/08/2015, hashingirwa kandi kuri P.V. de remise et reprise » Kimete Segashumba agiye mu zabukuru igaragazwamo imitungo ya Paroisse Nyabiheke irimo insengero 2 na biro byubatswe ku butaka buvugwa mu masezerano ya Kimete na Bazizane ; ko bitakwitirirwa Delivrance Church, Kimete yagiyemo nyuma, ko ntaho ihuriye n’uwo mutungo.

## Page 4

[6] Delivrance Church yajuririye Urukiko Rukuru ivuga ko hirengagijwe ko umutungo uburanwa ari uwayo kuko urusengero rwayo rwari ruhubatse rugasenywa na Showers Of Blessing Church kandi rwubakwa n’abakirisitu harimo n’abo muri Delivrance Church kandi hirengagizwa ko n’ubutaka ari ubwayo n’ubwo mu masezerano hari handitseho Kimete, uyu kandi akaba abyemeza, kandi yari umuyoboke wa Delivrance Church yasezeyemo ku wa 14/08/2015 kandi abisobanura mu ibaruwa yo ku wa 14/08/2021 yicuza uburiganya yagize. [7] Showers Of Blessings Church ivuga ko ibirebana n’uburiganya bitasuzumirwa ku rwego rw’ubujurire kuko ari ikirego gishya kitasuzumiwe mu rubanza rujuririrwa. Ivuga kandi ko impamvu z’ubujurire zitahabwa ishingiro hashingiwe ku byo Kimete yemera kandi akabyemeranywaho na Showers Of Blessings Church, aho yemera ko ubutaka bwubatseho insengero Kimete yabuguze na Bazizane, akemera ko insengero zubatswe n’abakirisitu yari abereye umuyobozi, ko yanditse asaba kwakirwa we n’abakirisitu. Hari kandi « PV de remise et reprise » ivugwamo imitungo ihererekanyijwe ; Kimete yanditse asaba akabanza ko kubakamo. Urukiko rurasuzuma niba hari uburiganya bwirengagijwe bugaragaza ko biro n’urusengero ari ibya Delivrance Church. [8] Kimete Segashumba yajuririye Urukiko Rukuru avuga ko mu rubazna rujuririrwa, nyuma yo kwemeza ko urusengero na biro ari byeguriwe Showers Of Blessings Church ko ari yo igomba kurusengeramo, ntirwavuze uko bizagenda ku butaka ngo hagaragazwe umuburanyi ugomba gusubiza amafaranga ku birebana n’ubutaka kuko bitabaho ko umwe agira urusengero na biro undi ngo agire ubutaka. [9] Me Ngendahayo Kabuye Jean uhagarariye Showers Of Blessings Church avuga ko icyaburanwe mu rubanza rujuririrwa ari ukwemeza ko ari yo yubatse urusengero na biro ariko nk’uko na dosiye ibigaragaza Kimete Segashumba yeguriye Showers Of Blessings Church umutungo wose nyuma yo gusaba kwakirwa akabyemerwa harimo n’ubutaka yaguze na Bazizane Patricie ; n’ubwo nyuma aho imanza ziberereho yagiye gusaba kwiyandikishaho ubutaka. Urukiko rurasuzuma niba ikibazo cy’ubutaka bwubatsweho urusengero na biro kitaravuzweho mu rubanza rujuririrwa kikaba kitaburanishwa kuri uru rwego. [10] Mu rubanza rujuririrwa Kimete Segashumba yategetswe kwishyura indishyi zinyuranye Showers Of Blessings Shurch, mu bujurire buri muburanyi yasabye kugenerwa indishyi zitandukanye : Delivrance Church isaba 10.000.000Frw z’akababaro, 2.000.000Frw y’igihembo cya avoka, ikurikiranarubanza 500.000Frw na 40.000Frw y’igarama. Showers Of Blessings Church ivuga ko ikibazo cy’indishyi z’akababaro kitasuzumwa kuko kiregewe bwa mbere mu Rukiko kandi ntigaragaza icyo yangirijwe kuko ishingira kuri Kimete. Yongeraho ko ntawashoye Delivrance Church mu manza ahubwo ni yo yizanyemo kandi idafite inyungu mu byo iburana. Urukiko rurasuzuma niba hari indishyi zagenwa muri uru rubanza. [11] Urubanza rwaburanishirijwe mu ruhame ku wa 19/06/2023 Delivrance Church na Kimete Segashumba bahagarariwe na Me Sebagabo Faustin naho Showers Of Blessings Church iburanirwa na Me Kabuye. [12] Ikibazo gisuzumwa ni iki gikurikira :

## Page 5

Kumenya niba hari ibimenyetso byirengagijwe bigaragaza ko biro n’urusengero ari ibya Delivrance Church. Kumenya niba ikibazo cy’ubutaka bwubatsweho urusengero na biro kitaravuzweho mu rubanza rujuririrwa kikaba kitaburanishwa kuri uru rwego. Kumenya niba hari indishyi zagenwa muri uru rubanza. II. IBIBAZO BIRI MU RUBANZA N’ISESENGURWA RYABYO. A. Kumenya niba hari ibimenyetso byirengagijwe bigaragaza ko biro n’urusengero ari ibya Delivrance Church. [13] Ingingo ya 12 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’ubucuruzi, iz’umurimo n’iz’ubutegetsi, iteganya ko urega agomba kugaragaza ibimenyetso by’ibyo aregera. Iyo abibuze, uwarezwe aratsinda. Ingingo ya 14 y’Itegeko No 15/2004 ryo ku wa 12/06/2004 ryerekeye ibimenyetso mu manza n’itangwa ryabyo iteganya ko inyandikobwite ni urwandiko rufite umukono w’umwe cyangwa wa benshi mu barwanditse cyangwa se, hakabaho ibikumwe byabo. Amasezerano arukubiyemo abera inshingano abayagiranye gusa. Ingingo ya 15 y’iryo Tegeko igateganya ko inyandikobwite, yemewe n’uwo bayiregesha cyangwa yemewe kuko ariko amategeko avuga, iba gihamya kugeza igihe ivugurujwe n’ikindi kimenyetso cyanditse cyangwa cyunganiwe n’ikindi kimenyetso cyanditse kituzuye iyo ari nyir’urubanza uyiburanisha. Izi ngingo zumvikanisha ko umuburanyi agaragaza ibimenyetso byemewe n’amategeko by’ibyo aregera, bikaba bishobora no kuba inyandikobwite z’umuburanyi. [14] Mu kwemeza ko urusengero na biro byubatswe mu butaka buvugwa mu masezerano Kimete Segashumba yagiranye na Bazizane Patricie yo ku wa 1/01/2010 byubatswe na Showers Of Blessings Church kuko ari umutungo w’Itorerondetse Showers Of Blessings Church igakomeza gukorera muri izo nyubako kuko ari umutungo wayo, Urukiko rwashingiye ku nyandiko, iyo ku wa 08/08/2015, Kimete Segashumba ahagarariye Paroisse ya Nyabiheke yarandikiye Showers Of Blessings Church asaba kwakirwa muri iryo torero we n’abakirisitu, bakabyemererwa mu ibaruwa yo ku wa 09/08/2015, hashingirwa kandi kuri « P.V. de remise et reprise » Kimete Segashumba agiye mu zabukuru igaragazwamo imitungo ya Paroisse Nyabiheke irimo insengero 2 na biro byubatswe ku butaka buvugwa mu masezerano ya Kimete na Bazizane ; bikaba rero bitakwitirirwa Delivrance Church, Kimete yagiyemo nyuma, ko ntaho ihuriye n’uwo mutungo. [15] Delivrance Church na Kimete Segashumba bajuririye Urukiko Rukuru Me Bagabo avuga ko hirengagijwe ko umutungo uburanwa ari uwayo kuko urusengero rwayo rwari ruhubatse rugasenywa na Showers Of Blessing Church kandi rwubakwa n’abakirisitu harimo n’abo muri Delivrance Church kandi hirengagizwa ko n’ubutaka ari ubwayo n’ubwo mu masezerano hari handitseho Kimete, uyu kandi akaba abyemeza, kandi yari umuyoboke wa Delivrance Church yasezeyemo ku wa 14/08/2015 kandi abisobanura mu ibaruwa yo ku wa 14/08/2021 yicuza uburiganya yagize. [16] Me Ngendahayo Kabuye Jean uhagarariye Showers Of Blessings Church avuga ko ibirebana n’uburiganya bitasuzumirwa ku rwego rw’ubujurire kuko ari ikirego gishya kitasuzumiwe mu rubanza rujuririrwa. Avuga kandi ko impamvu z’ubujurire zitahabwa ishingiro hashingiwe ku byo

## Page 6

Kimete yemera kandi akabyemeranywaho na Showers Of Blessings Church, aho yemera ko ubutaka bwubatseho insengero Kimete yabuguze na Bazizane, akemera ko insengero zubatswe n’abakirisitu yari abereye umuyobozi, ko yanditse asaba kwakirwa we n’abakirisitu. Hari kandi « PV de remise et reprise » ivugwamo imitungo ihererekanyijwe ; Kimete yanditse asaba akabanza ko kubakamo. [17] Hashingiwe ku biboneka muri dosiye, hari amasezerano y’ubugure yo ku wa 01/10/2010, avugwamo ko Bazizane Patricie agurishije Kimete Segashumba ubutaka ku 110.000 Frw. Muri ayo masezerano humvikanamo ko ikibanza kiguzwe na Kimete Segashumba, nkawe ku giti cye, ntahagaragara ko yatumwe n’itorero cyangwa n’undi uwo ari we wese. Ku wa 08/08/2015, Kimete Segashumba yandikiye Ubuyobozi bw’Itorero Showers Of Blessings Church asaba kwakirwa ngo bakorane umurimo w’Imana, abyemererwa mu ibaruwa yandikiwe ku wa ku wa 9/8/2015. Ku wa 27/04/2017, Itorero Showers Of Blessings Church Paroisse Nyabiheke, rihagarariwe na Kimete Segashumba yatanze raporo y’igihembwe cya mbere cya 2017, muri iyo raporo hanasabwe ko iyo paroisse ifashwa kugura ibyuma no kubaka urusengero kuko urundi ruri gusenyuka. Ku wa 05/05/2018 hakozwe « PV ya remise et reprise » hagati ya Kimete Segashumba na Mukiza, muri yo ku mitungo havugwamo insengero 2. Ku wa 12/03/2019, Kimete Segashumba yandikiye Ubuyobozi w’Itorero Showers Of Blessings Church asaba gukeberwa agapariseri gato ku kibanza cy’itorero kugira ngo yongere aho atuye, kubera ko ari mu zabukuru kandi akaba yarakoreye neza itorero ; arabyemererwa. [18] Nyuma yo gusesengura izi nyandiko zavuzwe haruguru, bigahuzwa n’ukuntu ibintu byagiye bisimburana mu bihe, Urukiko rusanga umutungo uburanwa muri uru rubanza (buro n’uresengero) ari ibya Showers Of Blessings Church, kubera ko ikibanza kivugwa mu masezerano cyaguzwe na Kimete Segashumba akigura we ku giti cye ; we yasabye kwakirwa muri iryo Torero n’umutungo, arabyemererwa, anayobora Paroisse ya Nyabiheke. Hagaragazwa ko yatangaga raporo y’imikorere y’iyo paroisse Nyabiheke ayishyikiriza Showers Of Blessings Church, anayisaba kubakirwa no kugurirwa ibyuma kandi nta kinyoboza ko yubakiwe, kuko nyuma muri PV de remise et reprise habonekamo insengero 2. Rusanga kandi igishingirwaho mu kwemeza ko umutungo uburanwa (biro na urusengero) ari ibya Showers Of Blessings ariko Kimete yaje gusaba kongererwa ikibanza ngo yongere aho atuye ko iwe ari hato arabyemererwa nk’uko biboneka mu nyandiko. [19] Urukiko rero rukaba rusanga ibiburanishwa na Me Bagabo Faustin ko Kimete Segashumba yaguze ikibanza kivugwa muri ya masezerano yatumwe na Delivrance Church bitahabwa agaciro kuko nta kimenyetso kigaragazwa. Ku byerekeranye n’ibikubiye mu nyandiko ya Kimete Segashumba avuga ko yari yakoreye Delivrance Church uburiganya, Uru Rukiko rusanga bitahabwa agaciro kubera ko nta mpamvu atanga yashingirwaho mu kwemeza noneho ibyo yanditse ari byo by’ukuri cyane ko nta kimenyetso kibishyigikira : nta nyandiko yerekana ko ibyo yakoraga yabikoraga mu izina rya Delivrance Church, nta kigaragaza nibura ko muri biriya bihe yari umuyoboke wayo. [20] Urukiko rusanga kandi iyo biza kuba ari uburiganya yakoreye Delivrance Church, ntibyari gushoboka ko atanga umutungo wayo kuva mu 2015 harimo n’abayoboke, ngo ibirebere, akore « remise et remise » y’Itorero Showers Of Blessings Church Paroisse Nyabiheke arishyikiriza ibirmo n’insengero n’abakirisitu mu 2018, ngo Delivrance Church ibyihorere ; hubakwe urundi rusengero mu rwa Delivrance Church, iyi itagira icyo ihagarika, n’ubwo nta kigaragaza ko yari iruhafite. Rusanga kandi niba hari uburiganya bwaba bwarakozwe na Kimete Segashumba abukoreye

## Page 7

Delivrance Church, ntibyabazwa Showeres Of Blessings Church, ahubwo byabazwa Kimete Segashumba, kuko asaba kuba umuyoboke ntiyagaragaje ko yaba ari umuyoboke kwa Delivrance Church, uyu kandi ntiyakwitwaza amakosa ye ngo ayasabire uburenganzira ; iyi mpamvu y’ubujirire rero nta shingiro ihawe. B. Kumenya niba ikibazo cy’ubutaka bwubatsweho urusengero na biro kitaravuzweho mu rubanza rujuririrwa kikaba kitaburanishwa kuri uru rwego. [21] Ingingo 6 y’Itegeko No 22/2018 ryo ku wa 22/09/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko ikiburanwa kigenwa n’ibisabwa na buri muburanyi. Ibisabwa bigaragarira mu myanzuro iregera urukiko n’imyanzuro yo kwiregura, bigashimangirwa burundu mu nama ntegurarubanza ku manza iteganyijwemo. Iyi ngingo yerekana ibyo impande zombi ziburana biboneka mu byo buri muburanyi yasabye bikubiye mu myanzuro. [22] Mu rubanza rujuririrwa hemejwe ko biro n’urusengero biburanwa byubatswe na Showers Of Blessings Church ko ikomeza kubikoresha no kubisengeramo nta nkomyi. Kimete Segashumba, Delivrance Church na Me Bagabo Faustin ubahagarariye avuga ko atari byo ko hafatwa icyemezo cy’uko biro n’urusengero ari ibya Showers Of Blessings Church kandi ariko ntihavugwe uko bizagenda ku butaka bwaguzwe na Kimete Segashumba abuguriye Delivrance Church. Ku ruhande rwa Showers Of Blessings Church, Me Ngendahayo Kabuye uyihagarariye avuga ko icyo kibazo kitagombye gusuzumwa, ko kitaregewe, yongeraho ariko ko imanza zitangiye Kimete Segashumba yabwiyandikishijeho, kandi nyamara baramwakiranye n’umutungo n’abakirisitu. [23] Nk’uko biboneka muri dosiye, ikirego cyatanzwe na Showers Of Blessings Church ni « kwemeza ko Showers Of Blessings Church (SBC) ari yo yubatse Urusengero na biro yarwo ku bwumvikane na Kimete Segashumba mu butaka buri mu masezerano yagiranye na Bazizane no kwemeza ko ari yo ifite uburenganzira bwo gusengeramo”. Me Bagabo Faustin akavuga ko ntacyo Urukiko rwemeje ko ubutaka bwubatsweho urusengero na biro ari iby’uwareze ; bikaba byaba akarengane kuko ubutaka ari ubwa Delivrance Church yaguriwe na Kwimete Segashumba, bikaba bitashoboka ko umwe aba nyir’urusengero undi akaba nyir’ubutaka. [24] Me Ngendahayo Kabuye uburanira Showers Of Blessings Church avuga ko n’ubwo ubutaka bwatanzwe na Kimete Segashumba, akaza nyuma gusaba guhabwaho akabanza gato, ariko iby’ubutaka ntibyari byaregewe mu rubanza rujuririrwa, kandi ubu Kimete Segashumba, kubera imanza yagiye gusaba kubwiyandikishaho. [25] Hasuzumwe ibikubiye mu nyandiko yo gutanga ikirego n’ibibazo by’amategeko byari byatanzwe n’impande zombi, Urukiko rurasanga ikibazo cy’ubutaka na cyo cyari ugusuzuma niba ubutaka Bazizane yagurishije Kimete Segashumba nawe akabutangaho impano kuri Showers Of Blessings Church bwari ubwe koko. Ku ruhande rwa Delivrance Church na Kimete Segashumba bo bavuze ko ikibazo cy’uwo mutungo kireba abagiranye amasezerano, ko SHowers Of Blessings Church ntaho ihuriye n’ayo masezerano, kandi niba ubwo butaka butanditse kuri Kimete Segashumba cyangwa Bazizane, nyir’ukubugura azanyura mu nzira ziteganywa n’amategeko asaba kwandikwaho uwo mutungo.

## Page 8

[26] Urukiko rusanga rero kuba mu rubanza rujuririrwa hataravuzwe ku mutungo wubatseho urusengero na biro ari ikosa ryabaye kuko buri ruhande rwari rwagaragaje icyo rutekereza kuri iki kibazo. Uru Rukiko rukaba rusanga nta mpamvu ibirebana na nyir’ubutaka bitavugwaho kuko bitashoboka ko umwe atunga urusengero na biro byubatse ku butaka bw’undi muntu nta bwumvikane. [27] Hashingiwe ariko ku biboneka muri dosiye, Urukiko rusanga ubutaka buvugwa mu masezerano y’ubugure hagati ya Bazizane na Kemete Segashumba ari ubw’Itorero Showers Of Blessings Church hakuweho aho yahawe n’iryo Torero. Ibi bishingirwa ku kuba mu masezerano ntahagaragara undi muntu Kimete Segahumba yaba yaraguriye nk’uko byasobanuwe haruguru ; muri » PV de remise et reprise » yasinyiye insengero 2 kandi zubatse kuri ubwo butaka, havuzwe raporo y’igihembwe agasaba no kubakirwa urusengero kuko urundi rushaje, hagaragajwe ibimenyetso by’uko Showers Of Blessings Church yubatse kandi Kimete ntagaragaza ubundi butaka bwubatsweho. Rusanga kandi iyo Kimete Segashumba aba azi ko ubutaka buvugwa mu masezerano yabuhaye Showers Of Blessings Church ntiyari kuyandikira asaba guhabwa agapariseri gato ngo yongere ku bwe, akanabyemererwa. Rusanga rero nta kindi kimenyetso cyashingirwaho ngo hemezwe ko uriya mutungo ari uwa Kimete Segashumba cyangwa uwa Delivrance Church ; bikaba byumvikanisha ko urusengero na biro byubatswe na Showers Of Blessings Church, ku butaka yahawe na Kimete Segashumba. C.Ku byerekeranye no kumenya niba hari indishyi zagenwa mu uru rubanza. [28] Ingingo ya 111 y’Itegeko No 22/2018 ku wa 29/04/2018 Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, iteganya ko ikirego cy’amafaranga y’ikurikiranarubanza ni ikirego gishamikiye ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Ingingo ya 12 yaryo igateganya ko buri muburanyi agaragaza ukuri kw’ibyo aburana. Iyi ngingo yumvikanisha ko umuburanyi watsinze ufite ibyo yatakaje ku rubaza, yishyurwa iyo abigaragarije ikimenyetso. [29] Mu rubanza rujuririrwa Kimete Segashumba kwishyura Showers Of Blessings Church indishyi z’akababaro zingana na 1.000.000Frw n’igihembo cya avoka kingana na 600.000Frw. Delivrance Church yasabye 10.000.000Frw y’indishyi z’akababaro, 2.000.000Frw y’igihembo cya avoka na 500.000Frw y’ikurikiranarubanza na 40.000Frw y’amagarama. Me Ngendahayo Kabuye Jean uburanira Showers Of Blessings Church avuga ko ikwiye guhabwa na Deliverance Church 10.000.000Frw yo gushorwa mu manza no kuyisebya, 5.000.000Frw y’igihembo cy’Avoka, na 2.000.000Frw y’ikurikirana rubanza. [30] Hashingiwe ku byasobanuwe haruguru, Showers Of Blessings Church yatsinze ku rwego rwa mbere, Delivrance Church na Kimete Segashumba barajurira, Urukiko rwemeje ko impamvu z’ubujurire nta shingiro zifite, bityo rero indishyi zagenwe ku rwego rubanza zirakwiye, zikaba ariko zidahindutse kuko hagenwe 1.000.000Frw ariko zagenwe mu bushishozi kuko bene izo ndishyi zidatangirwa ibimenyetso kandi ntihagaragazwa ko zaba zidakwiye. Igihembo cya avoka na cyo ntigihindutse, indishyi zose zibariwe hamwe zirakwiye, gusa zikwiye kwishyurwa na Delivrance Church na Kimete Segashumba bafatanyije kuko kuba Delivrance Church yarajuriye

## Page 9

bigaragaza ko yari ihuje na Kimete Segashumba inyungu muri uru rubanza, igomba rero no kwirengera ingaruka. III. ICYEMEZO CY’URUKIKO [31] Rwemeje ko ikirego cy’ubujurire cya Delivrance Church na Kimete Segashumba nta shingiro gifite ; [32] Rwemeje ko umutungo w’ubutaka uvugwa mu masezerano yo ku wa 1/01/2010 hagati ya Bazizane Patricie na Kimete Segashumba wari mu bisabwa n’ababuranyi bombi mu myanzuro y’ababuranyi ; [33] Rwemeje ko urubanza RC00068/2021/TGI/NYG rwaciwe ku wa 28/10/2022 n’Urukiko Rwisumbuye rwa Nyagatare ruhindutse kuri nyir’umutungo gusa ; [34] Rwemeje ko ubutaka buvugwa mu masezerano Kimete Segashumba yagiranye na Bazizane Patricie ku wa 1/01/2010 bweguriwe Showers Of Blessings Church, hakuwemo ubwo Itorera ryeguriye Kimete Segashumba ; [35] Rutegetse ko amafaranga ibihumbi mirongo ine yatanzwe na Delivrance Church na Kimete Segashumba bajurira (40.000Frw) ahwanye n’ibyakoreshejwe mu rubanza.