Dr GAHIMBARE vs Dr BARIBWIRA

# Dr GAHIMBARE vs Dr BARIBWIRA

- Source: Amategeko - Section: Decisions (Judgements) - Date: 2023-11-17 - Case/document no.: RCA 00006/2023/CA - Collection: Court of Appeal

## Text

## Page 1

Dr GAHIMBARE vs Dr BARIBWIRA [Rwanda URUKIKO RUKURU – RCA 00024/2023/HC/RWG (Munyangeri, P.J.) 17 Ugushyingo 2023] Iitegeko rigenga ububasha bw’Inkiko – Ubujurire – Ubujurire bwa kabiri – kutubahiriza ibiteganywa n’amategeko nti biri mu mpamvu zatuma ubujurire bwa kabiri bwakirwa ngo buburanishwe mu mizi kandi ntibifatwa nko gushingira ku itegeko ritariho kuko kutubahiriza amategeko ari amakosa yakosorwa binyuze mu zindi nzira ziteganywa n’itegeko, adakosorwa mu rwego rw’ubujurire bwa kabiri. Incamake y’ikibazo: Uru rubanza rwatangiye Dr Gahimbare arega Dr Baribwira mu Rukiko rw’Ibanze rwa Kicukiro asaba ubutane bwa burundu ku mpamvu z’uko Dr Baribwira yakoze ubusambanyi akaba anamuhoza ku nkeke. Dr Baribwira yireguye avuga ko izo mpamvu Dr Gahimbare ashingiraho asaba ubutane zidakwiye guhabwa ishingiro kubera ko zimaze imyaka igera kuri 29. Urukiko mu rubanza RC00050/2020/TB/KICU rwaciwe n’Urukiko rw’Ibanze rwa Kicukiro rwemeje ko: Dr Gahimbare na Dr Baribwira bashyingiranywe ku mu gihugu cy’Uburundi batanye burundu; ko Dr Gahimbare na Dr Baribwira bafatanya kwishyurira amashuri umwana wabo muto, ko umutungo basangiye uri mu Rwanda n’imyenda bahuriyeho bafashe mu Rwanda, babigabana ku buryo bungana, umutungo basangiye uherereye i Burundi ukazaregerwa mu nkiko zaho uherereye; Dr Baribwira ntiyanyuzwe nicyo cyemezo akijuririra mu Rukiko Rwisumbuye rwa Nyarugenge, asaba ko urubanza rwaciwe n’Urukiko rw’Ibanze rwa Kicukiro ruvanwaho kuko yatanze inzitizi zituma ikirego kitakirwa harimo iyo kuba hari urubanza rwaciwe n’urukiko rw’i Burundi rutabanje kwemezwa n’Urukiko Rukuru, kuba hatarabaye inama y’umuryango mbere yo gutanga ikirego cy’ubutane; Dr Baribwira avuga kandi ko anenga kuba Urukiko rw’Ibanze rwarashingiye ku busambanyi bwo muri 1992, ndetse ngo rushingira ku Itegeko ryo mu Rwanda aho gushingira ku Itegeko ry’i Burundi kuko ari abarundi kandi akaba ariho bashyingiriwe. Avuga nanone ko atafasha Dr Gahimbare kwishyura amashuri y’umwana muto kuko ageze mu zabukuru. Dr Gahimbare yireguye avuga ko inzitizi zabyukijwe n’urega ndetse n’impamvu ze z’ubujurire nta shingiro byahabwa, kubera ko ari uburyo bwo gutinza urubanza, Mu rubanza rubanziriza urundi mu rubanza RCA00139/2021/TGI/NYGE Urukiko rwemeje ko inzitizi zitandukanye za Dr Baribwira z’irimo n’iyibura bubasha bw’Urukiko nta shingiro zifite. Dr Baribwira Cyprien yajuririye icyemezo ku nzitizi mu Rukiko Rukuru, avuga ko kuba ababuranyi bombi ari Abarundi, Urukiko rw’Ibanze rwa Kicukiro rutari rufite ububasha bwo kubaburanisha urubanza rw’ubutane, hashingiwe ku rubanza RC655/2019 rwaciwe na Tribunal de Résidence de Gihosha ku wa 26/11/2020 ndetse ko hari umuhango ndemyagihugu uteganywa n’ingingo ya 250 y’Itegeko ryerekeye imiburanishirize y’imanza z’imbonezamubano,... utarubahirijwe na byo byari gutuma ikirego cya Dr Gahimbare Laetitia kitakirwa.

## Page 2

Dr Gahimbare yireguye avuga ko atumva impamvu Dr Baribwira ashaka ko ikirego kitakirwa kandi ari we wajuriye kandi ko habaho exequatur ari uko hari ibyategetswe n’inkiko zo mu mahanga. Urukiko mu rubanza RC00003/2023/HC/KIG rwaciwe rwemeje ko ubujurire bwatanzwe na Dr Baribwira Cyprien butakiriwe, ko nta ndishyi zitanzwe muri urwo rubanza. Dr Baribwira ntiyanyuzwe nicyo cyemezo ikijuririra mu Rukiko rw’Ubujurire, asaba Urukiko kwemeza ko ikirego cya Dr Gahimbare kitagombaga kwakirwa kuva ku rwego rwa mbere hatabayeho exequatur y’urubanza RC655/2019, ko rero kuba Urukiko Rukuru rwaremeje ko icyemezo cyafashwe n’Urukiko Rwisumbuye gifite ishingiro, ari ukuvugisha Itegeko icyo ridateganya. Dr Gahimbare yatanze inzitizi yo kutakira ubujurire bwa kabiri bwatanzwe na Dr Baribwira kubera ko nta mpamvu n’imwe mu ziteganywa n’Itegeko rigena ububasha bw’inkiko yatuma ubwo bujurire bugera mu Rukiko rw’Ubujurire. Dr Baribwira avuga ko iyo nzitizi nta shingiro ifite. Incamake y’icyemezo:1. kutubahiriza ibiteganywa n’amategeko nti biri mu mpamvu zatuma ubujurire bwa kabiri bwakirwa ngo buburanishwe mu mizi kandi bitafatwa nko gushingira ku itegeko ritariho kuko kutubahiriza amategeko ari amakosa yakosorwa binyuze mu zindi nzira ziteganywa n’itegeko, adakosorwa mu rwego rw’ubujurire bwa kabiri. 2.Icyemezo ku nzitizi yo kutakira ikirego kijuririrwa cyonyine ni igishyira iherezo ku rubanza. Bityo, iyo icyemezo kuri iyo nzitizi gitegeka ko urubanza rukomeza mu mizi gishobora kujurirwa hamwe n’urubanza mu mizi. Inzitizi y’iburabubasha bw’Urukiko rw’Ubujurire ifite ishingiro. Amategeko yashingiweho: Itegeko N˚ 30/2018 ryo ku wa 02/06/2018 rigena ububasha bw’inkiko, ingingo ya 52 Imanza zifashishijwe: Urubanza RPAA 00322-00323/2022/CA, Ubushinjacyaha vs RENZAHO Alexis, na FX Tugirane Ubumwe Mining Co Ltd iregera indishyi, rwaciwe n’Urukiko rw’Ubujurire ku wa 26/04/2023, igika cya 32. Urubanza I. IMITERERE Y’URUBANZA [1] Dr Gahimbare Laetitia yari yarashyingiranywe na Dr Baribwira Cyprien mu buryo bwemewe n’amategeko ku wa 02/08/1990 mu gihugu cy’Uburundi nyuma umubano wabo ntiwagenda neza, biba ngombwa ko Dr Gahimbare Laetitia atanga ikirego mu Rukiko rw’Ibanze rwa Kicukiro asaba ubutane bwa burundu ku mpamvu z’uko Dr Baribwira Cyprien yakoze ubusambanyi akaba anamuhoza ku

## Page 3

nkeke. Dr Baribwira Cyprien yireguye avuga ko izo mpamvu Dr Gahimbare Laetitia ashingiraho asaba ubutane zidakwiye guhabwa ishingiro kubera ko zimaze imyaka igera kuri makumyabiri n’icyenda (29). [2] Mu rubanza RC00050/2020/TB/KICU rwaciwe n’Urukiko rw’Ibanze rwa Kicukiro ku wa 21/07/2021, urwo Rukiko rushingiye ku ngingo ya 218 y’Itegeko N˚ 32/2016 ryo ku wa 28/08/2016 rigenga abantu n’umuryango no ku ngingo ya 8 y’Itegeko N˚ 27/2016 ryo ku wa 08/07/2016 ryerekeye imicungire y’umutungo w’abashyingiranywe, impano n’izungura, rwemeje ko : Dr Gahimbare Laetitia na Dr Baribwira Cyprien bashyingiranywe ku wa 02/08/1990 mu gihugu cy’Uburundi batanye burundu; icyo cyemezo cyandukurwa mu bitabo by’irangamimerere urubanza rumaze kuba ndakuka; Dr Gahimbare Laetitia na Dr Baribwira Cyprien bafatanya kwishyurira amashuri umwana wabo muto witwa Baribwira Kira Erwan wavutse mu mwaka wa 2000, bitakorwa ku neza bigakorwa ku ngufu za Leta; umutungo basangiye uri mu Rwanda nk’uko wasobanuwe n’imyenda bahuriyeho bafashe mu Rwanda, babigabana ku buryo bungana kuva urubanza rubaye ndakuka, umutungo basangiye uherereye i Burundi ukazaregerwa mu nkiko zaho uherereye; Dr Baribwira Cyprien asubiza Dr Gahimbare Laetitia amafaranga ibihumbi icumi (10.000Frw) yatanzeho ingwate y’amagarama arega. [3] Dr Baribwira Cyprien yajuririye urwo rubanza mu Rukiko Rwisumbuye rwa Nyarugenge, asaba ko urubanza rwaciwe n’Urukiko rw’Ibanze rwa Kicukiro ruvanwaho kubera ko rwaciwe mu buryo bunyuranyije n’amategeko. Asobanura ko yari yatanze inzitizi zituma ikirego kitakirwa harimo iyo kuba hari urubanza rwaciwe n’urukiko rw’i Burundi rutabanje kwemezwa n’Urukiko Rukuru, kuba inama y’umuryango (réunion de la famille) iteganywa n’ingingo ya 160 y'Itegeko-Teka N˚ 1/024 ryo ku wa 28/04/1993 ryavuguruye igitabo cy’amategeko agenga abantu n’umuryango itarabaye kandi ari umuhango simusiga; ko ababuranyi bitabye Urukiko rw’Ibanze bwa mbere mu muhango wo kubunga (tentative de conciliation), rubumva batunganiwe, ko rero uwo muhango utabayeho kandi ari simusiga ndetse ari ndemyagihugu mu birego by’ubutane, ndetse urukiko rw’ibanze rukaba rwaranategetse ko urubanza rukorerwa inama ntegurarubanza igihe cy’amezi atatu ateganywa n’itegeko kitaragera. [4] Dr Baribwira Cyprien yajuriye anenga Urukiko rw’Ibanze rwa Kicukiro kuba rwarashingiye ku busambanyi bwo muri 1992 nk’impamvu y’ubutane, ndetse rushingira ku Itegeko N˚ 32/2016 ryo ku wa 28/08/2016 rigenga abantu n’umuryango ryo mu Rwanda, nyamara rwaragombaga gushingira ku Itegeko ry’i Burundi kandi ko atafasha Dr Gahimbare Laetitia kwishyura amashuri y’umwana muto kuko ageze mu zabukuru. Yavuze kandi ko yasabye indezo ntiyayihabwa. [5] Dr Gahimbare Laetitia yireguye avuga ko inzitizi zabyukijwe n’urega ndetse n’impamvu ze z’ubujurire nta shingiro byahabwa, kubera ko ari uburyo bwo gutinza urubanza, ko imibanire ye na Dr. Baribwira Cyprien yabaye mibi cyane, atanga ikirego cy’ubutane mu Rwanda, aho batuye imyaka isaga 20, mu gihe amenyesherejwe icyo kirego, Dr. Baribwira Cyprien yabanje kwemeza ko inkiko

## Page 4

z’u Rwanda nta bubasha zifite bwo kuburanisha ubwo butane, uwamwunganiraga amugira inama yo kureka iyo nzitizi, bumvikana gusaba ubutane bwumvikanyweho, Dr.Baribwira Cyprien yaremeye hatangizwa gahunda y’uburyo bazumvikana, hatangizwa gahunda yo kunga abashyingiranywe, ababuranyi bombi basaba abunganizi babo kujya kumenyesha urukiko ko hatangijwe uburyo bwo gutandukana ku bwumvikane cyane ko impande zombi zemeranyaga ko kwiyunga kwabo kutagishoboka. [6] Dr Gahimbare Laetitia yakomeje avuga ko Urukiko rwasubitse uwo muhango inshuro zirenze imwe nk’uko bigaragara muri dosiye, ko umuhango wa nyuma wo kungwa wabaye tariki ya 24/06/2020. Dr Baribwira Cyprien ubwe yitabye urukiko naho we yohereje umunyamategeko umuhagararira kugira ngo amenyeshe Urukiko ko kwiyunga bidashoboka, Dr Baribwira Cyprien akaba yaratanze inzitizi y’iburabubasha bw’Urukiko asabwa kuzayitangira mu mizi y’urubanza. [7] Mu rubanza rubanziriza urundi RCA00139/2021/TGI/NYGE rwaciwe n’Urukiko Rwisumbuye rwa Nyarugenge ku wa 28/12/2022, urwo Rukiko rwafashe icyemezo ku nzitizi zatanzwe na Dr Baribwira Cyprien rwemeza ko nta shingiro zifite, ko iburanisha rizakomeza ku wa 08/02/2023. [8] Dr Baribwira Cyprien yajuririye icyemezo ku nzitizi mu Rukiko Rukuru, avuga ko kuba ababuranyi bombi ari Abarundi, Urukiko rw’Ibanze rwa Kicukiro rutari rufite ububasha bwo kubaburanisha urubanza rw’ubutane, hashingiwe ku rubanza RC655/2019 rwaciwe na Tribunal de Résidence de Gihosha ku wa 26/11/2020 ndetse ko hari umuhango ndemyagihugu uteganywa n’ingingo ya 250 y’Itegeko ryerekeye imiburanishirize y’imanza z’imbonezamubano, iz’ubuuruzi, iz’umurimo n’iz’ubutegetsi utarubahirijwe na byo byari gutuma ikirego cya Dr Gahimbare Laetitia kitakirwa. [9] Uhagarariye Dr Gahimbare Laetitia yireguye avuga ko atumva impamvu Dr Baribwira Cyprien ashaka ko ikirego kitakirwa kandi ari we wajuriye mu Rukiko Rwisumbuye rwa Nyarugenge kandi ko habaho exequatur ari uko hari ibyategetswe n’inkiko zo mu mahanga. Yasoje asaba indishyi. [10] Mu rubanza RC00003/2023/HC/KIG rwaciwe n’Urukiko Rukuru ku wa 25/04/2023, urwo Rukiko rushingiye ku ngingo ya 129 n’iya 147 z’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko ubujurire bwatanzwe na Dr Baribwira Cyprien butakiriwe, ko nta ndishyi zitanzwe muri urwo rubanza. [11] Ku wa 28/04/2023, Dr Baribwira Cyprien yajuririye urwo rubanza mu Rukiko rw’Ubujurire, ubujurire bwe bwandikwa kuri RCA00006/2023/CA. Urubanza rwaburanishijwe mu ruhame ku wa 06/11/2023, Dr Baribwira Cyprien yunganiwe na Me Zitoni Pierre Claver afatanyije na Me Ndaruhutse Janvier, Dr Gahimbare Laetitia yunganiwe na Me Buzayire Angēle. [12] Mu myanzuro yo kujurira, Dr Baribwira Cyprien asaba Urukiko kwemeza ko ikirego cya Dr Gahimbare Laetitia kitagombaga kwakirwa kuva ku rwego rwa mbere hatabayeho exequatur y’urubanza RC655/2019, ko rero kuba Urukiko Rukuru rwaremeje ko icyemezo cyafashwe n’Urukiko Rwisumbuye rwa Nyarugenge gifite ishingiro, ari ukuvugisha Itegeko icyo ridateganya no guhunga gutanga ubutabera ku kibazo cy’uko nta rubanza rwaciwe n’inkiko zo hanze rwakurikizwa mu Rwanda, rutabanje kwemezwa n’Urukiko Rukuru mu buryo buteganywa n’Itegeko.

## Page 5

[13] Mbere yo kwiregura ku mpamvu z’ubujurire, Dr Gahimbare Laetitia n’umwunganira batanze inzitizi yo kutakira ubujurire bwa kabiri bwatanzwe na Dr Baribwira Cyprien kubera ko nta mpamvu n’imwe mu ziteganywa n’Itegeko rigena ububasha bw’inkiko yatuma ubwo bujurire bugera muri uru Rukiko. [14] Dr Baribwira Cyprien n’abamwunganira bavuga ko iyo nzitizi nta shingiro ifite, ko bajuriye bashingiye ku ngingo ya 129 y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi. [15] Nyuma y’izo mpaka, Urukiko rurasanga hagomba gusuzumwa ikibazo gikurikira: Kumenya niba ubujurire bwatanzwe na Dr Baribwira Cyprien buri mu bubasha bw’Urukiko rw’Ubujurire II. ISESENGURA RY’IKIBAZO KIGIZE URUBANZA Kumenya niba ubujurire bwatanzwe na Dr BARIBWIRA Cyprien buri mu bubasha bw’Urukiko rw’Ubujurire [16] Dr Gahimbare Laetitia n’umwunganira bavuga ko bashingiye ku ngingo ya 52 y’Itegeko N˚ 30/2018 ryo ku wa 02/06/2018 rigena ububasha bw’inkiko, basanga nta mpamvu n’imwe mu ziteganywa n’iryo tegeko yari gutuma Dr Baribwira Cyprien azana ubujurire bwa kabiri muri uru Rukiko. [17] Basobanura ko inzitizi y’urubanza rugomba gukorerwa exequatur yatangiye gutangwa mu Rukiko rw’Ibanze rwa Kicukiro, ijuririrwa mu Rukiko Rwisumbuye, irongera ijuririrwa mu Rukiko Rukuru, bikaba rero bitumvikana ukuntu yaba yarajuririwe mu Rukiko rw’Ubujurire kandi ubundi ibibazo byatangiriye mu nkiko z’ibanze bidashobora kwandikwa mu Rukiko rw’Ubujurire. Ku birebana no kuba Dr Baribwira Cyprien n’abamwunganira bavuga ko Urukiko Rwisumbuye rwa Nyarugenge rwafashe icyemezo rushingiye ku itegeko ritabaho, Dr Gahimbare Laetitia n’umwunganira bavuga ko bakwiye kugaragaza ibirebana n’ubujurire bw’urubanza rwaciwe n’Urukiko Rukuru kubera ko ari rwo rwajuririwe kandi k obo babona amategeko yose akubiye mu cyemezo cyarwo ariho. [18] Dr Baribwira Cyprien n’abamwunganira bavuga ko bo bajuriye bashingiye ku ngingo ya 129 y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, aho mu gika cyayo cya gatatu iteganya ko icyemezo gifashwe ku nzitizi yo kutakira ikirego gishobora kujuririrwa cyonyine mu gihe gishobora guhagarika urubanza kandi ko Itegeko ridateganya aho ubujurire bwacyo bugarukira. [19] Bakomeza bavuga ko bakurikije ibiteganywa n’ingingo ya 52 y’Itegeko rigena ububasha bw’inkiko n’ubwo atari yo bashingiyeho bajurira, bavuga ko umucamanza w’Urukiko Rwisumbuye rwa Nyarugenge yafashe icyemezo gishingiye ku itegeko ritabaho kubera ko nta tegeko rimwemerera gushyira mu bikorwa urubanza rwaciriwe mu mahanga, Urukiko Rukuru rutabyemeje. Basobanura ko kuba itegeko ritabaho, byumvikanisha gukoresha itegeko mu buryo butari bwo. Uko Urukiko rubibona

## Page 6

[20] Impaka kuri iyi ngingo zishingiye ku kumenya niba kuba Urukiko rwakoresha itegeko mu buryo butari bwo byafatwa ko rwaciye urubanza rushingiye ku itegeko ritariho ku buryo umuburanyi yatanga ubujurire bwa kabiri muri uru Rukiko. [21] Ibyerekeye kumenya niba kutubahiriza ibiteganywa n’amategeko mu rubanza byafatwa nko gushingira ku itegeko ritariho biteganywa mu ngingo ya 52 y’itegeko rigena ububasha bw’Inkiko bigatuma ubujurire bwa kabiri bwakirwa bukaburanishwa mu mizi byafashweho umurongo n’uru Rukiko mu rubanza RPAA00322-00323/2022/CA rwaciwe n’Urukiko rw’Ubujurire ku wa 26/04/2023 haburana Ubushinjacyaha na Renzaho Alexis na FX Tugirane Ubumwe Mining Co Ltd. [22] Muri urwo rubanza Ubushinjacyaha na FX Tugirane Ubumwe Mining Co Ltd bavugaga ko gufata icyemezo ku bitaraburanishijwe cyangwa ku bitarajuririwe (ultra petita) ari ugukoresha umuhango udateganyijwe n’amategeko, bikwiye gufatwa nko gushingira ku itegeko ritariko, Urukiko rw’Ubujurire rushingiye ku biteganywa n’ingingo ya 52 y’Itegeko N˚ 30/2018 ryo ku wa 02/06/2018 rigena ububasha bw’inkiko, rwanzuye ko kutubahiriza ibiteganywa n’amategeko bitari mu mpamvu zatuma ubujurire bwa kabiri bwakirwa ngo buburanishwe mu mizi kandi bitafatwa nko gushingira ku itegeko ritariho kandi ko kutubahiriza amategeko ari amakosa yakosorwa binyuze mu zindi nzira ziteganywa n’itegeko, adakosorwa mu rwego rw’ubujurire bwa kabiri1. [23] Muri uru rubanza, Dr Baribwira Cyprien n’abamwunganira bavuga ko kuba Urukiko Rwisumbuye rwa Nyarugenge rwaravuze ko nta cyo gusuzuma kiriho ku kibazo cya exequatur, ari ugufata icyemezo gishingiye ku itegeko ritariho kandi bakaba batabasha kurigaragaza. [24] Kuba urega n’abamwunganira batabasha kugaragaza itegeko ritariho Urukiko Rukuru rwaba rwarashingiyeho rufata icyemezo dore ko ari cyo cyajuririwe kandi rukaba rutarinjiye mu mujyo umwe n’uw’Urukiko Rwisumbuye rwa Nyarugenge kuko Urukiko Rukuru rwo rutigeze runasuzuma ingingo z’ubujurire kuko ikirego kitakiriwe, Urukiko rurasanga impamvu itangwa n’urega yabateye gutanga ubujurire bwa kabiri nta shingiro ifite. [25] Ku birebana no kuba urega n’abamwunganira bavuga ko ubujurire bari batanze bari babushingiye ku ngingo ya 129 y’itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Urukiko rurasanga nta shingiro byahabwa kuko nk’uko babyivugiye icyemezo ku nzitizi yo kutakira ikirego gishobora kujuririrwa cyonyine iyo cyashyize iherezo ku rubanza, ku bibareba icyemezo cyafashwe kikaba kidashyira iherezo ku rubanza kubera ko Urukiko Rwisumbuye rwa Nyarugenge rwemeje ko iburanisha ry’urubanza rikomeza. [26] Hashingiwe ku bisobanuro bitanzwe, Urukiko rurasanga ubujurire bwa kabiri bwatanzwe na Dr Baribwira Cyprien butari mu bubasha bw’uru Rukiko. III. ICYEMEZO CY’URUKIKO [27] Rwemeje ko inzitizi y’iburabubasha bw’Urukiko yatanzwe na Dr Gahimbare Laetitia, ifite ishingiro. 1 Reba urubanza n˚ RPAA 00322-00323/2022/CA rwaciwe n’Urukiko rw’Ubujurire ku wa 26/04/2023 haburana Ubushinjacyaha na RENZAHO Alexis, uregera indishyi: FX Tugirane Ubumwe Mining Co Ltd, igika cya 32.

## Page 7

[28] Rwemeje ko ubujurire bwatanzwe na Dr Baribwira Cyprien butakiriwe kuko butari mu bubasha bw’Urukiko rw’Ubujuirire. [29] Ruvuze ko amafaranga y’ingwate y’amagarama Dr Baribwira Cyprien yatanze ajurira, ahwanye n’ibyakozwe mu rubanza.