ECOBANK RWANDA PLC v. ABAZUNGURA BA RWIGEMA N’UNDI

# ECOBANK RWANDA PLC v. ABAZUNGURA BA RWIGEMA N’UNDI

- Source: Amategeko - Section: Decisions (Judgements) - Date: 2025-10-21 - Case/document no.: RCOMAA 00075/2024/CA - Collection: Court of Appeal

## Text

## Page 1

ECOBANK RWANDA PLC v. ABAZUNGURA BA RWIGEMA N’UNDI [Rwanda URUKIKO RW’UBUJURIRE – RCOMAA 00075/2024/CA (Rutazana, P.J.) 21 Ukwakira 2025] Amategeko agenga ububasha bw’Inkiko – Ububasha bw’Inkiko z’ubucuruzi – Ingwate itanditswe kuri nyirayo yatanzwe hishingirwa inguzanyo – Ikigo cy’imari nticyashingira gusa ku kuba cyarahaweho ingwate kubera inguzanyo, ariko uwo mutungo cyahawe ingwate ukaba utanditse kuri nyirawo, ngo kivuge ko ari ikibazo cy’ubucuruzi gikwiye gusuzumwa n’Inkiko z’ubucuruzi, kuko iyo bimeze gutyo, igisuzumwa ari ukumenya nyir’umutungo, kandi ibi bikaba atari impaka z’ubucuruzi. Incamake y’ikibazo: Uru rubanza rwatangiriye mu Rukiko rw’Ubucuruzi Ecobank Rwanda Plc irega Rwigema Jeanne Chantal isaba ko umutungo yatanzeho ingwate mu gihe yahabwaga inguzanyo, wandikwaho kuko ari uwe. Urukiko rwaciye urubanza Rwigema adahari, maze rwemeza ko uwo mutungo umwandikwaho kuko ari uwe ariko ukaba utamwanditseho; runamutegeka kwishyura ECOBANK RWANDA Plc 600.000 Frw y’igihembo cya Avoka na 200.000 Frw y’ikurikiranarubanza . Rwigema yasubirishijemo urwo rubanza avuga ko atamenye urwo rubanza, kuko yahamagawe ahatazwi bigatuma ruburanishwa adahari, nyamara hari urundi rubanza rujyanye n’umwenda yaburanye na ECOBANK RWANDA Plc afite aho abarizwa hazwi muri Kenya; ariko ko yaje kurumenya ku wa 28/06/2021. Abazungura (abana) ba Rwigema bagobotse aribo OLUOCH Peter Mboya na OLUOCH Yayden Liam bavuga ko umutungo uri mu mpaka atari uwa Rwigema ahubwo ari uwabo uwabo baguriwe na se witwaga LUCAS Mumia Oluoch utari warashyingiranywe na nyina, bavuga ko yakibaguriye atarapfa kandi ko yari yaranze ko cyandikwa kuri Rwigema. Urukiko rw’Ubucuruzi rwaciye urubanza rwemeza ko maze rwemeza ko ikirego cye kitakiriwe kuko yagitanze akerewe, rwemeza kandi ko n’ibirego by’abana bisaba kugoboka mu rubanza bitakiriwe. Abana ba Rwigema bajuririye mu Rukiko Rukuru rw’Ubucuruzi, urwo Rukiko rubyibwirije rubyutsa inzitizi irebana n’iburabubasha bw’Urukiko rw’Ubucuruzi rwaregewe, maze rwemeza ko Urukiko rw’Ubucuruzi rutari rufite ububasha bwo kuburanisha ikirego cya ECOBANK RWANDA Plc kuko ikibazo kiri hagati y’impande zombi ari ikibazo cy’imbonezamubano kikaba kitari mu bubasha bw’inkiko z’ubucuruzi; runatesha agaciro ibyemezo byose byafashwe n’urwo Rukiko rw’Ubucuruzi bijyanye n’icyo kirego. Ecobank Rwanda Plc yajuririye mu Rukiko rw’Ubujurire ivuga ko Urukiko Rukuru rw’Ubucuruzi rwemeje ko ikirego cyayo ari imbonezamubano atariko bimeze, ikavuga ko umutungo isaba ko wandikwa kuri Rwigema ari ingwate yayihaye kugirango ahabwe umwenda kandi ko atawishyuye, ikavuga ko impaka zavutse zidashingiye ku iyandikisha ry’ubutaka, ahubwo zishingiye ku kuba umutungo watanzweho ingwate mu bucuruzi wakwandikwa kugira ngo hishyurwe umwenda, kandi zikaba ziri mu bubasha bw’Inkiko z’Ubucuruzi.

## Page 2

Abazungura ba Rwigema baburanye bemeranya n’imiburanire y’urega, bavuga ko Inkiko z’ubucuruzi zari zifite ububasha bwo kuburanisha icyo kirego.

Incamake y’icyemezo: Ikigo cy’imari nticyashingira gusa ku kuba cyarahaweho ingwate kubera inguzanyo, ariko uwo mutungo cyahawe ingwate ukaba utanditse kuri nyirawo, ngo kivuge ko ari ikibazo cy’ubucuruzi gikwiye gusuzumwa n’Inkiko z’ubucuruzi, kuko iyo bimeze gutyo, igisuzumwa ari ukumenya nyir’umutungo, kandi ibi bikaba atari impaka z’ubucuruzi. Ubujurire nta shingiro bufite. Amategeko yashingiweho: Itegeko N˚ 30/2018 ryo ku wa 02/06/2018 rigena ububasha bw’inkiko, Ingingo ya 81, igika cya mbere. Nta manza zifashishijwe

Urubanza IMITERERE Y’URUBANZA [1] ECOBANK RWANDA Plc yahaye inguzanyo Rwigema Jeanne Chantal aza kunanirwa kuyishyura maze ishakisha imitungo yaba imwanditseho ku buryo yavamo ubwishyu, bituma itanga ikirego mu Rukiko rw’Ubucuruzi ivuga ko isaba ko inzu yayihayeho ingwate iri mu kibanza cyahoze gifite No 512 ubu kikaba kibaruye kuri UPI: 1/02/08/02/79 iherereye mu Kagari ka Kimihurura, mu Murenge wa Kimihurura, mu Karere ka Gasabo imwandikwaho kugira ngo ibashe kuyikurikiranaho ubwishyu. [2] Urubanza rwaburanishijwe Rwigema Jeanne Chantal adahari, mu rubanza RCOM 01958/2020/TC Urukiko rw’Ubucuruzi rwaciye remeza ko umutungo wavuzwe haruguru uri mu kibanza cyahoze gifite N˚ 512 ubu kikaba ari UPI: 1/02/08/02/79, uherereye mu Kagari ka Kimihurura, Umurenge wa Kimihurura, Akarere ka Gasabo wandikwa kuri Rwigema Jeanne Chantal kuko ari uwe ariko ukaba utamwanditseho; runamutegeka kwishyura ECOBANK RWANDA Plc 600.000 Frw y’igihembo cya Avoka na 200.000 Frw y’ikurikiranarubanza. [3] Ku wa 10/07/2021 Rwigema Jeanne Chantal yasubirishijemo urwo rubanza avuga ko atarumenye kuko yahamagawe ahatazwi bigatuma ruburanishwa adahari, nyamara hari urundi rubanza rujyanye n’umwenda yaburanye na ECOBANK RWANDA Plc afite aho abarizwa hazwi muri Kenya; ariko ko yaje kurumenya ku wa 28/06/2021. [4] Abana be bitwa OLUOCH Peter Mboya na OLUOCH Yayden Liam bagobotse muri urwo rubanza bagamije kugaragaza ko umutungo ECOBANK RWANDA Plc yaregeye atari uwa Rwigema Jeanne Chantal ahubwo ari uwabo baguriwe na se witwaga LUCAS Mumia Oluoch utari

## Page 3

warashyingiranywe na nyina rwigema Jeanne Chantal, bavuga ko yakibaguriye atarapfa kandi ko yari yaranze ko cyandikwa kuri Rwigema Jeanne Chantal. [5] Mu rubanza RCOM 00873/2021/TC rwaciwe n’Urukiko rw’Ubucuruzi ku wa 26/10/2021, rwasanze Rwigema Jeanne Chantal atataranze amakuru arebana no kuba yarahinduye aho yabarizwaga mu Rwanda, akaba nta n’ikimenyetso yagaragaje cyemeza ko ECOBANK RWANDA Plc yari izi aho abarizwa muri Kenya, maze rwemeza ko ikirego cye kitakiriwe kuko yagitanze akerewe, kuko umuhesha w’inkiko yamumenyesheje imikirize y’urubanza ku wa 15/06/2021 bityo ibihe byo gusaba gusubirishamo urubanza bikaba byaragombaga kubarwa guhera ku wa 16/06/2021 kugeza ku wa 06/07/2021, nyamara we akaba yaratanze ikirego ku wa 10/07/2021; rwemeza kandi ko n’ibirego by’abana be OLUOCH Peter Mboya na OLUOCH Yayden Liam bisaba kugoboka mu rubanza bitakiriwe. [6] OLUOCH Peter Mboya na OLUOCH Yayden Liam bahagarariwe na Rwigema Jeanne Chantal nk’umwishingizi wabo bajuririye urwo rubanza mu Rukiko Rukuru rw’Ubucuruzi, urwo Rukiko rwemeza ko ubujurire bwabo bufite ishingiro kuko imenyesharuhame ryarwo ryakozwe mu buryo bunyuranyije n’amategeko kuko Umuhesha w’inkiko atateganyije ko rimanikwa aho Inkiko Zisumbuye zikorera; rutegeka ko rusubizwa rusubizwa mu Rukiko rw’Ubucuruzi kugira ngo ruruburanishe mu mizi. [7] Urubanza rwahawe RCOM 00299/2023/TC, ku munsi w’iburanisha Rwigema Jeanne Chantal n’abana be OLUOCH Peter Mboya na OLUOCH Yayden Liam ntibitaba Urukiko, urubanza ruraburanishwa bisabwe n’ECOBANK RWANDA Plc, Urukiko rwemeza ko kirego cya ECOBANK RWANDA Plc nta shingiro gifite, ko urubanza rwasabiwe gusubirwamo ruhindutse mu ngingo zarwo zose kuko umutungo waregewe utabaruye kuri UPI: 1/02/08/02/79 nk’uko ECOBANK RWANDA Plc ibivuga. [8] Ibyo Urukiko rwabyemeje rushingiye ku nyandiko yanditswe n’Ikigo cy’Igihugu gishinzwe Ubutaka ku wa 08/11/2022 gisubiza ibaruwa yari yanditswe na Me Ndagijimana Emmanuel ku wa 27/09/2022, igaragaza ko ubutaka bwahoze bufite No 512 bwari bwarahawe inkondabutaka yari yanditswe kuri VOL. RT.XXV FOLIO 248, mu gihe cy’ibarura rusange ry’ubutaka bwahawe No 1201 (UPI: 1/02/08/02/1201) buri mu Karere ka Gasabo, Umurenge wa Kimihurura, Akagari ka Kimihurura, Umudugudu w’Urwego, bwanditswe kuri Mugwaneza Samuel na Kambere Saida Mamisa, no kuba muri system ya IECMS harimo inyandiko zigaragaza ko ubwo butaka bwaguzwe na Mugwaneza Samuel na Kambere Saida Mamisa muri cyamunara. [9] ECOBANK RWANDA Plc yajuririye urwo rubanza mu Rukiko Rukuru rw’Ubucuruzi, mu iburanisha Urukiko Rukuru rw’Ubucuruzi rubyibwirije rubyutsa inzitizi irebana n’iburabubasha bw’Urukiko rw’Ubucuruzi rwaregewe, maze mu rubanza RCOMA 00212/2024/HCC rwaciye ku wa 27/09/2024, rushingiye ku biteganywa n’ingingo ya 81, iya 27,4˚ no ku ngingo ya 31 z’itegeko N˚ 30/2018 ryo ku wa 02/06/2018 rigena ububasha bw’inkiko, rwemeza ko Urukiko rw’Ubucuruzi rutari rufite ububasha bwo kuburanisha ikirego cya ECOBANK RWANDA Plc kuko ikibazo kiri hagati y’impande zombi ari ikibazo cy’imbonezamubano kikaba kitari mu bubasha bw’inkiko z’ubucuruzi; runatesha agaciro ibyemezo byose byafashwe n’urwo Rukiko rw’Ubucuruzi bijyanye n’icyo kirego.

## Page 4

[10] ECOBANK RWANDA Plc yajuririye urwo rubanza mu Rukiko rw’Ubujurire, ubujurire bwayo buhabwa RCOMAA 00075/2024/CA, urubanza ruburanishwa mu ruhame ku wa 06/10/2025 ihagarariwe na Me Habakurama François Xavier, naho abazungura ba Rwigema Jeanne Chantal n’aba LUCAS Mumia Oluoch bahagarariwe na Me Ndagijimana Emmanuel. [11] Ubujurire bwa ECOBANK RWANDA Plc bugamije kugaragaza ko ikibazo iri hagati yayo na Rwigema Jeanne Chantal ku birebana n’iyandikisha ry’umutungo ubaruye kuri UPI: 1/02/08/02/79 ari icy’ubucuruzi kikaba kiri mu bubasha bw’inkiko z’ubucuruzi. Asaba kandi ko ECOBANK RWANDA Plc yishyurwa amafaranga y’ikurikiranarubanza n’igihembo cya Avoka. [12] Uhagarariye abaregwa avuga ko na we yemeranya na ECOBANK RWANDA Plc ko ikibazo kigibwaho impaka muri uru rubanza ari icy’ubucuruzi kuko gishingiye ku masezerano y’inguzanyo ECOBANK RWANDA Plc nk’ikigo cy’imari yagiranye na Rwigema Jeanne Chantal. Nawe asaba ko abo ahagarariye bahabwa indishyi zo gushorwa mu manza. [13] Hashingiwe ku bimaze kugaragazwa, harasuzumwa ibibazo bikurikira bigize urubanza: a) kumenya niba ikibazo ECOBANK RWANDA Plc ifitanye n’abazungura ba Rwigema Jeanne Chantal kijyanye n'iyandikisha ry'umutungo uri mu kibanza gifite UPI:1/02/08/02/79 kiri mu bubasha bw'Inkiko z'ubucuruzi; b) ibyerekeye amafaranga y’ikurikiranarubanza n’igihembo cya Avoka ababuranyi basaba. II. ISESENGURA RY’IBIBAZO BIGIZE URUBANZA 1) Kumenya niba ikibazo ECOBANK RWANDA Plc ifitanye n’abazungura ba Rwigema Jeanne Chantal kijyanye n’iyandikisha ry’umutungo uri mu kibanza gifite UPI: 1/02/08/02/79 kiri mu bubasha bw’inkiko z’ubucuruzi [14] Uhagarariye ECOBANK RWANDA Plc avuga ko mu bika bya 23-25 by’urubanza rwajuririwe, Urukiko Rukuru rw’Ubucuruzi rwemeje ko ikibazo kijyanye n’iyandikisha ry'umutungo ubaruye kuri UPI: 1/02/08/02/79 ari ikibazo cy’imbonezamubano kikaba kiri mu bubasha bw'Urukiko Rwisumbuye nyamara atariko bimeze. [15] Asobanura ko Urukiko Rukuru rw’Ubucuruzi rwirengagije ko imikoranire hagati y’impande zombi igaragaza ko Rwigema Jeanne Chantal yari yarabanje gutanga uwo mutungo ho ingwate muri FINA BANK kubera umwenda iyo banki yamuhaye, hanyuma ECOBANK RWANDA Plc iza kugura uwo mwenda inegukana ingwate zawo, kandi Rwigema Jeanne Chantal akaba atarawishyuye ndetse bikaza no kugaragara ko uwo mutungo waregewe utamwanditseho kuko mu gihe cy’ibarura rusange ry’ubutaka atagize ubushake bwo gushaka ibyangombwa byawo bishyashya; bityo rero impaka zavutse zikaba zidashingiye ku iyandikisha ry’ubutaka, ahubwo zishingiye ku kuba umutungo watanzweho ingwate mu bucuruzi wakwandikwa kugira ngo hishyurwe umwenda, kandi zikaba ziri mu bubasha bw’Inkiko z’Ubucuruzi.

## Page 5

[16] Akomeza asobanura ko Urukiko Rukuru rw’Ubucuruzi rutigeze ruhuza ikibanza gisabirwa kwandikishwa n'amasezerano Rwigema Jeanne Chantal yagiye agirana n'ibigo by'imari, yaba FINA BANK cyangwa ECOBANK RWANDA Plc, bituma rukora ikosa ryo kumva ko igisabwa gifite kamere y’imanza z’imbonezamubano nyamara atari ko bimeze, kuko inshuro nyinshi Rwigema Jeanne Chantal yagaragaje ko icyo kibanza cyari ingwate yahererwagaho inguzanyo. [17] Avuga ko rero ikirego cyabo kiri mu bubasha bw’inkiko z’ubucuruzi hashingiwe ku ngingo ya 81, agace ka 1˚ n’aka 3˚ y'Itegeko No 30/2018 ryo ku wa 02/06/2018 rigena ububasha bw’inkiko, iteganya ko “Urukiko rw'Ubucuruzi ruburanisha mu rwego rwa mbere imanza zose z’ubucuruzi, iz’imari, iz’imisoro, n'ibindi bibazo bifitanye isano na byo byerekeye: 1˚Impaka zivutse ku masezerano cyangwa ibikorwa by'ubucuruzi hagati y'abantu cyangwa ibigo by’ubucuruzi... 3˚ Impaka ziturutse ku masezerano abantu bagirana n'ibigo by'imari.” [18] Uhagarariye abazungura ba Rwigema Jeanne Chantal na OLUOCH Peter Mboya na OLUOCH Yayden Liam (abazungura ba LUCAS Mumia Oluoch) avuga ko yemeranya n’imiburanire ya ECOBANK RWANDA Plc, kuko ikibazo kiri hagati y’impande zombi kitarebana n’ihererekanya ry’umutungo (mutation) nk’uko Urukiko Rukuru rw’Ubucuruzi rwabyemeje, ahubwo ikigomba gusuzumwa ari amasezerano y’inguzanyo ECOBANK RWANDA Plc yahereweho iyo ngwate, kandi impaka zikaba ziri hagati y’umuturage n’ikigo cy’imari, hakaba hagomba gusuzumwa amasezerano y’inguzanyo n’umutungo watanzweho ingwate harebwa niba waraje kugurishwa muri cyamunara nk’uko Ikigo cy’Igihugu Gishinzwe Ubutaka cyasanze ikibanza N˚ 512 cyarahindutse UPI: 1/02/08/02/1201, mu gihe ECOBANK RWANDA Plc yo ivuga ko icyo kibanza ubu kibaruye kuri UPI: 1/02/08/02/79. UKO URUKIKO RUBIBONA [19] Impaka kuri iyi ngingo zishingiye ku kumenya niba ikirego cyatanzwe na ECOBANK RWANDA Plc kigamije gusaba Urukiko rw’Ubucuruzi gutegeka ko umutungo uri mu kibanza cyahoze gifite N˚ 512 ubu kikaba kibaruye kuri UPI: 1/02/08/02/79 wandikwa kuri Rwigema Jeanne Chantal, ari ikibazo cy’imbonezamubano kikaba kitari mu bubasha bw’inkiko ziburanisha imanza z’ubucuruzi. [20] Ingingo ya 81, igika cya mbere y’Itegeko N˚ 30/2018 ryo ku wa 02/06/2018 rigena ububasha bw’inkiko iteganya ibikurikira: “Haseguriwe ibivugwa mu ngingo ya 27, 4˚, Urukiko rw’Ubucuruzi ruburanisha mu rwego rwa mbere imanza zose z’ubucuruzi, iz’imari, iz’imisoro n’ibindi bibazo bifitanye isano na byo byerekeye: 1˚ impaka zivutse ku masezerano cyangwa ku bikorwa by’ubucuruzi hagati y’abantu cyangwa ibigo by’ubucuruzi; 3˚ impaka ziturutse ku masezerano abantu bagiranye n’ibigo by’imari.” [21] Mu bujurire bwa ECOBANK RWANDA Plc ivuga ko uru rubanza ruri mu bubasha bw’inkiko z’ubucuruzi kuko umutungo isaba ko wandikwa kuri Rwigema Jeanne Chantal yari yarawuhaweho ingwate kubera inguzanyo yamuhaye ntabashe kuyishyura, ikaba isaba ko umwandikwaho kugira ngo ibashe kubona ubwishyu; ko rero ibyo isaba bikomoka ku masezerano y’iyo nguzanyo itarishyuwe kandi umutungo yaregeye yari yarawuhaweho ingwate. Iyi ikaba ari nayo myumvire ya Me Ndagijimana Emmanuel uburanira urundi ruhande.

## Page 6

[22] Dosiye y’urubanza igaragaza ko ECOBANK RWANDA Plc yareze isaba ko umutungo uri mu kibanza cyahoze gifite N˚ 512 ubu kikaba kibaruye kuri UPI: 1/02/08/02/79 wandikwa kuri Rwigema Jeanne Chantal kuko ari uwe. [23] Dosiye y’uru rubanza igaragaza kandi ko mu gika cya 25 cy’urubanza rwajuririwe Urukiko Rukuru rw’Ubucuruzi rwasobanuye ko kumenya nyir’umutungo watanzweho ingwate ari igikorwa kibanziriza kwandikisha ingwate ariko ko atari impaka zishingiye ku iyubahirizwa ry’amasezerano y’iguriza, rubishingiraho rwemeza ko ikirego cya ECOBANK RWANDA Plc kiterekeye ikibazo cy’ubucuruzi ahubwo ko ari imbonezamubano. [24] Urukiko rw’Ubujurire rurasanga kugira ngo hemezwe ko umutungo waregewe wandikwa kuri Rwigema Jeanne Chantal nk’uko ECOBANK RWANDA Plc ibisaba, bigomba gushingira ku kuba ari uwe, ni ukuvuga ko ibi ari byo bigomba kubanza gusuzumwa, cyane cyane ko abana be bagobotse mu rubanza bagamije kugaragaza ko uwo mutungo ari uwabo baguriwe na se, bikaba rero byumvikana ko igisuzumwa ari ukumenya nyir’umutungo, kandi ibi bikaba atari impaka z’ubucuruzi. [25] Urukiko rurasanga kuba ECOBANK RWANDA Plc ari ikigo cy’imari, kuba uwo mutungo yari yarawuhaweho ingwate kubera inguzanyo yatanze ndetse ikaba ishaka kuwukuramo ubwishyu, atari byo byatuma icyo yaregeye muri uru rubanza gihinduka ikibazo cy’ubucuruzi, kuko mu byo isaba mu kirego cyayo no mu myiregurire y’uruhande baburana nta mpaka zigaragaramo ku bijyanye n’inguzanyo yatanze ndetse no kuba uwo mutungo yarawuhaweho ingwate. Yo isaba ko uwo mutungo wandikwa kuri Rwigema Jeanne Chantal kuko ari uwe, abo baburana bakavuga ko uwo mutungo atari uwa Rwigema Jeanne Chantal ahubwo ari uwabo. [26] Hashingiwe ku byasobanuwe byose mu bika bibanziriza iki, uru Rukiko narwo rurasanga ikirego cya ECOBANK RWANDA Plc kitagaragaramo impaka z’ubucuruzi, nk’uko Urukiko Rukuru rw’Ubucuruzi rwabibonye mu rubanza rwajuriiriwe kikaba kitaragombaga kwakirwa no kuburanishwa n’Urukiko rw’Ubucuruzi; bityo ubujurire bwa ECOBANK RWAND APlc bukaba nta shingiro bufite. 2) Ibyerekeye amafaranga y’ikurikiranarubanza n’igihembo cya Avoka [27] Ababuranyi bose basabye kugenerwa amafaranga y’ibyagiye ku rubanza. ECOBANK RWANDA Plc asaba 600.000 Frw y’ikurikiranarubanza na 2.000.000 Frw y’igihembo cya Avoka; naho abazungura ba Rwigema Jeanne Chantal n’aba LUCA Mumia Oluoch bagasaba 500.000 Frw y’ikurikiranarubanza na 1.000.000 Frw y’igihembo cya Avoka, uhagarariye ECOBANK RWAND APlc akavuga ko nta shingiro afite kuko ikirego cyatanzwe gishingiye ku ruhare rwabo rwo kwanga kwishyura umwenda. UKO URUKIKO RUBIBONA [28] Ingingo ya 111 y’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko:″ Ikirego cy’amafaranga y’ikurikiranarubanza ari ikirego gishamikiye ku kirego cy’iremezo kigamije kwishyuza ibyakoreshejwe mu rubanza.″ Naho ingingo ya 34 y’Amabwiriza n˚ 01/2014 agena ibihembo mbonera by’Abavoka iteganya ko “Avoka afite uburenganzira bwo kugena igihembo

## Page 7

ashyize mu gaciro, ariko kitari munsi y’amafaranga ibihumbi magana atanu (500.000 Frw) kandi kitarengeje amafaranga miliyoni eshatu (3.000.000 Frw).” [29] Urukiko rurasanga amafaranga y’ibyagiye ku rubanza ECOBANK RWANDA Plc isaba itagomba kuyahabwa kuko ubujurire bwayo nta shingiro buhawe; ahubwo ikaba igomba kwishyura abazungura ba Rwigema Jeanne Chantal n’aba LUCAS Mumia Oluoch amafaranga y’ikurikrianarubanza n’igihembo cya Avoka agenwe mu bushishozi kuko ayo basaba ari menshi; bityo ECOBANK RWANDA Plc ikaba igomba kubishyura 300.000 Frw y’ikurikiranarubanza na 500.000 Frw y’igihembo cya Avoka. III. ICYEMEZO CY’URUKIKO [30] Rwemeje ko ubujurire bwatanzwe na ECOBANK RWANDA Plc nta shingiro bufite. [31] Rwemeje ko imikirize y’urubanza RCOMA 00212/2024/HCC rwaciwe n’Urukiko Rukuru rw’Ubucuruzi ku wa 27/09/2024 idahindutse. [32] Rutegetse ECOBANK RWANDA Plc kwishyura abazungura ba Rwigema Jeanne Chantal n’abazungura ba LUCAS Mumia Oluoch ari bo OLUOCH Peter Mboya na OLUOCH Yayden Liam 300.000 Frw y’ikurikiranarubanza na 500.000 Frw y’igihembo cya Avoka.