ECOBANK RWANDA PLC v WDA

# ECOBANK RWANDA PLC v WDA

- Source: Amategeko - Section: Decisions (Judgements) - Date: 2024-12-16 - Case/document no.: RCOM 00009/2020/CA - Collection: Court of Appeal

## Text

## Page 1

ECOBANK RWANDA PLC v WDA [Rwanda URUKIKO RW’UBUJURIRE - RCOM 00009/2020/CA (Ngagi, P.J., Kaliwabo, Kamere, J.) 16 Ukuboza 2024] Amategeko agenga imiburanishirize y’imanza - Ukuvuguruzanya kw’imanza - Urukiko rw’Ikirenga nirwo rufite ububasha bwo kuburanisha ibibazo birebana n’ivuguruzanya ry’imanza zamaze kuba itegeko. Incamake y’ikibazo: ECOBANK Rwanda Plc yaregeye Urukiko rw’Ubujurire irusaba gukemura impaka zishingiye ku ivuguruzanya ry’urubanza nº RC 00282/2017/TB/KCY rwaciwe n’Urukiko rw’Ibanze rwa Kacyiru ku wa 08/05/2017 rutegeka ko amafaranga WDA ifitiye ECOTRAP yahabwa ECOBANK RWANDA Plc n’urubanza nº RCOM 00453/2017/TC/NYGE rwaciwe n’Urukiko rw’Ubucuruzi ku wa 14/9/2017 rwategetse ko ayo mafaranga yahabwa Kambanda Canisius kandi izi manza zombi zikaba zarabaye itegeko. Ababuranyi basabye umwanya wo gukemura ikibazo binyuze mu nzira y’ubuhuza ariko ntibagera ku mwanzuro, bituma urubanza rusubira kuri gahunda y’iburanisha. Mu gihe urubanza rwari rutegereje gucibwa, Urukiko rw’Ikirenga, mu rubanza nº RC 00001/2023/CS rwaciye ku wa 28/07/2023, rwatanze umurongo uvuga ko ari rwo rufite ububasha bwo gukemura impaka zishingiye ku ivuguruzanya ry’imanza zaciwe ku rwego rwa nyuma. Bituma Urukiko rw’Ubujurire rusuzuma niba urubanza rurebana no gukemura impaka zishingiye ku ivuguruzanya ry’imanza zabaye itegeko, ruri mu bubasha bwarwo. Incamake y’icyemezo: Nta ngingo y’Itegeko yagennye Urukiko rufite ububasha bwo kuburanisha ibibazo birebana n’ivuguruzanya ry’imanza zamaze kuba itegeko, ariko, mu rubanza nº RC 00001/2023/CS rwaciwe ku wa 28/07/2023, Urukiko rw’Ikirenga rwemeje ko ari rwo rufite ububasha bwo gukemura bene izi mpaka, ari yo mpamvu, urubanza nº RCOM 00009/2020/CA rugomba kohererezwa Urukiko rw’Ikirenga kuko ruri mu bubasha bwarwo. Urubanza ruri mu bubasha bw’Urukiko rw’Ikirenga. Nta mategeko yashingiweho. Imanza zifashishijwe: RC 00001/2023/CS, RUTAYISIRE Jean de Dieu v MUKANKURIKIYIMANA Béatrice n’abandi, rwaciwe n’Urukiko rw’Ikirenga kuwa 28/07/2023. Urubanza I. IMITERERE Y’URUBANZA

## Page 2

[1] ECOBANK RWANDA Plc yagiranye amasezerano yo ku wa 11/04/2014 na ECOTRAP ndetse na WDA iyashyiraho umukono, ateganya ko ubwishyu ECOTRAP izahabwa na WDA buzanyuzwa kuri konti nº 0010113806250501 iri muri ECOBANK RWANDA Plc kugira ngo yishyure umwenda yahawe mu kurangiza isoko ry’imirimo yakoreye WDA, aya masezerano akaba yarahamijwe mu rubanza nº RC 00282/2017/TB/KCY rwaciwe n’Urukiko rw’Ibanze rwa Kacyiru ku wa 08/05/2017. [2] Ku rundi ruhande uwitwa Kambanda Canisius avuga ko yagurije ECOTRAP amafaranga yo kurangiza amasoko yayo harimo n’irya WDA, ko yaregeye kwishyurwa hanyuma, mu rubanza nº RCOM 00453/2017/TC/NYGE rwaciwe ku wa 14/9/2017, Urukiko rw’Ubucuruzi rutegeka ko amafaranga WDA yagombaga kwishyura ECOTRAP ahabwa Kambanda Canisius kubera umwenda imufitiye. [3] Ku wa 06/03/2020, ECOBANK RWANDA Plc yaregeye Urukiko rw’Ubujurire irusaba gukemura impaka zishingiye ku ivuguruzanya ry’urubanza nº RC 00282/2017/TB/KCY rwaciwe n’Urukiko rw’Ibanze rwa Kacyiru ku wa 08/05/2017 rutegeka ko amafaranga WDA ifitiye ECOTRAP yahabwa ECOBANK RWANDA Plc n’urubanza nº RCOM 00453/2017/TC/NYGE rwaciwe n’Urukiko rw’Ubucuruzi ku wa 14/9/2017 rwategetse ko amafaranga avuzwe muri iki gika yahabwa Kambanda Canisius kandi izi manza zombi zikaba zarabaye itegeko. [4] Ababuranyi basabye umwanya wo gukemura ikibazo binyuze mu nzira y’ubuhuza ariko ntibagera ku mwanzuro, bituma urubanza rusubira kuri gahunda y’iburanisha. [5] Mu gihe uru rubanza rwari rutegereje gucibwa, Urukiko rw’Ikirenga, mu rubanza nº RC 00001/2023/CS rwaciye ku wa 28/07/2023, rwatanze umurongo uvuga ko ari rwo rufite ububasha bwo gukemura impaka zishingiye ku ivuguruzanya ry’imanza zaciwe ku rwego rwa nyuma. [6] Ku wa 16/12/2024, ababuranyi bitabye Urukiko rw’Ubujurire, ECOBANK RWANDA PLC ihagarariwe na Me Bimenyimana Eric, RWANDA TVET BOARD yasimbuye WDA ihagarariwe na Me Umwali Claire, ECOTRAP ihagarariwe na Me Bayingana Janvier naho Kambanda Canisius ahagarariwe na Me Niyomugabo Christophe, bamenyeshwa iby’urubanza nº RC 00001/2023/CS rwaciwe ku birebana n’Urukiko rufite ububasha bwo gukemura impaka zishingiye ku ivuguruzanya ry’imanza, bose bemeranywa ko urubanza rwakohererezwa Urukiko rw’Ikirenga kugira ngo ari rwo ruruca. [7] Ikibazo gisuzumwa muri uru rubanza n’icyo kumenya niba urubanza Nº RCOM 00009/2020/CA rurebana no gukemura impaka zishingiye ku ivuguruzanya ry’imanza zabaye itegeko, ruri mu bubasha bw’uru Rukiko. II. ISESENGURA RY’IBIBAZO BIGIZE URUBANZA  Kumenya Urukiko rufite ububasha bwo kuburanisha urubanza Nº RCOM 00009/2020/CA rurebana no gukemura impaka zishingiye ku ivuguruzanya ry’imanza zabaye itegeko [8] Me Bimenyimana Eric, uhagarariye ECOBANK RWANDA Plc, avuga ko uru urubanza rwaregewe Urukiko rw’Ubujurire kuko ari rwo rwari rufite ububasha bwo gukemura impaka

## Page 3

zishingiye ku ivuguruzanya ry’imanza, ko kuba, mu rubanza nº RC 00001/2023/CS, Urukiko rw’Ikirenga rwarasubiye ku murongo warwo rukemeza ko ari rwo rufite ububasha bwo kuburanisha ibi birego, nta kindi cyakorwa uretse kohereza urubanza mu Rukiko rw’Ikirenga kugira ngo rufatirwe umwanzuro. Kuri iki kibazo, abaregwa bose bemeranyijwe ko urubanza rutakiri mu bubasha bw’Urukiko rw’Ubujurire, ko ahubwo rugomba kohererezwa Urukiko rw’Ikirenga kuko ari rwo rufite ububasha bwo kuruburanisha. UKO URUKIKO RUBIBONA [9] Urukiko rurasanga nta ngingo y’Itegeko yagennye Urukiko rufite ububasha bwo kuburanisha ibibazo birebana n’ivuguruzanya ry’imanza zamaze kuba itegeko. Rurasanga ariko, mu rubanza nº RC 00001/2023/CS1 rwaciwe ku wa 28/07/2023, Urukiko rw’Ikirenga rwaremeje ko ari rwo rufite ububasha bwo gukemura bene izi mpaka, ari yo mpamvu, urubanza nº RCOM 00009/2020/CA rugomba kohererezwa Urukiko rw’Ikirenga kuko ruri mu bubasha bwarwo. III. ICYEMEZO CY’URUKIKO [10] Rwemeje ko urubanza nº RCOM 00009/2020/CA ruri mu bubasha bw’Urukiko rw’Ikirenga. [11] Rutegetse Ubwanditsi bw’uru Rukiko gukora ibisabwa kugira ngo dosiye y’urubanza nº RCOM 00009/2020/CA ishyikirizwe Urukiko rw’Ikirenga. [12] Ruvuze ko amagarama y’urubanza abaye asubitswe.

1 Reba urubanza RC 00001/2023/CS rwaciwe kuwa 28/07/2023 haburana RUTAYISIRE Jean de Dieu na MUKANKURIKIYIMANA Béatrice, TWAGIRAYEZU Béatha , KAYIGANA Darlène Isaro , UMUBYEYI Gabriella , igika cya 35 , page ya 15.