36 FAIDA V. MUJEJENDE N’ABANDI

# 36 FAIDA V. MUJEJENDE N’ABANDI

- Source: Amategeko - Section: Decisions (Judgements) - Date: 2014-11-14 - Case/document no.: RCOMAA 0032/14/CS - Collection: Supreme Court

## Text

## Page 1

FAIDA V. MUJEJENDE N’ABANDI [Rwanda URUKIKO RW’IKIRENGA – RCOMAA 0032/14/CS – (Mukanyundo, P.J., Rugabirwa na Hitiyaremye, J.) 14 Ugushyingo 2014] Amategeko agenga imitungo – Uburenganzira ku mutungo – Burimuntu afite uburenganzira ku mutungo bwite waba uwe ku giti cye cyangwa uwo afatanyihe n’abandi– Guhungabanya Umutungo – Ntushobora guhungabanywa keretse ku mpamvu z’inyungu rusange – Indishyi kubera guhungabanya umuntungo– Uwagize uruhare mu guhungabanya umutungo w’undi arabiryozwa akanabitangira indishyi–Itegeko Nshinga rya Repubulika y’u Rwanda ryo kuwa 04/06/2003 nk’uko ryavuguruwe kugeza ubu , ingingo ya 29 igika cya mbere n’icya 3 – Itegeko ryo kuwa 30/07/1888 ryerekeye amasezerano cyangwa imirimo nshinganwa,ingingo ya 258. Amategeko y’imiburanishirize y’imanza z’ubucuruzi – Gusubirana ibicuruzwa byafatiriwe cyangwa guhabwa amafaranga ahwanye n’agaciro kabyo – Iyo nta kimenyetso kigaragaza urutonde n’ubwoko bw’ibicuruzwa nihabe nikigaragaza yuko bikiri bizima uwabifatiriye aha banyirabyo amafaranga ahwanye n’agaciro kabyo. Amategeko agenga amasezerano cyangwa imirimo nshinganwa – Amasezerano y’ubukode bw’iduka – Kuvanwa mw’iduka iminsi y’ubukode itarashira – Uwakodeshejwe asubizwa ahwanye n’iminsi y’ubukode yari isigaye– Inkurikizi za masezerano – Amasezerano agira inkurikizi ku bayagiranye gusa – Itegeko nº 45/2011 ryo kuwa 25/11/2011 rigenga amasezerano mu Rwanda, Ingingo ya 113. Amategeko y’imiburanishirize y’imanza z’ubucuruzi –Igihembo cy’avoka – Ntabwo kigenerwa abafite ibyo batsindiwe mu rubanza–Gusaba kwongererwa indishyi kubera gutakaza abaguzi mu –Iyo nta kimenyetso cyerekana yuko izagenwe ari nke ntabwo urukiko ruzongera – Indishyi z’akababaro – Mu gihe indishyi z’akababaro zagenwe mbere ziri mu rugero rukwiye nta zindi zigenwa. Amategeko agenga amasezerano cyangwa imirimo nshinganwa –Ububasha bwa ba nyiri gukodesha bwo kuburana amasezerano y’ubukode – Mu gihe amasezerano y’ubukode yarangiye ba nyirigukodesha nta bubasha bwo kuyaburana baba bagifite. Amategeko y’imiburanishirize y’imanza z’ubucuruzi –Kugaragaza ibimenyetso by’ikiregerwa – Iyo urega atagaragaje ibimenyetso by’ibyo aregera uwarezwe aratsinda – Kugaragaza ukuri kw’ikiburanwa – Buri muburanyi aba agomba kugaragaza ukuri kw’ibyo aburana – Ntabwo urukiko rwategeka uwishyuzwa kwishyura mu gihe uwishyuza atagaragaza ukuri kwe mu buryo budashidikanywaho –Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 9– Itegeko 15/2004 ryo kuwa 12/06/2004 ryerekeye ibimenyetso mu manza n’itangwa ryabyo, ingingo ya 3 Amategeko y’imiburanishirize y’imanza z’ubucuruzi – Inyungu k’umwenda wafashe muri Banki – Gutegeka undi muntu kwishyurira undi inyungu z’umwenda yafashe muri banki– Ntabwo Urukiko rwategeka undi muntu kwishyurira undi amafaranga y’inyungu zikomoka ku mwenda yagurijwe na banki. Amategeko y’imiburanishirize y’imanza z’ubucuruzi – Kwishyura uwareze amafaranga y’ikurikirana rubanza n’igihembo cya avoka – Uwagize ibyo atsindira mu rubanza ntabwo yishyura uwamureze amafaranga y’ikurikirana rubanza n’igihembo cya avoka.

## Page 2

Amategeko y’imiburanishirize y’imanza z’ubucuruzi – Igihano gihatira kurangiza urubanza – Ntabwo urukiko rugitanga mu gihe nta kigaragaza yuko rutazarangizwa neza. Incamake y’ikibazo: Rwasibo Jean Baptiste yagurishije Amur Sultan igice cy’ikibanza nº 3641 cyubatsemo inzu y’ubucuruzi. Amaze kwitaba IMANA,abahungu be batatu aribo Rwasibo Louis, Rwasibo Jean Bosco na Rwasibo Joseph bagurisha Faida akandi gace kari gasigaye,bashiki babo;Kayitesi Françoise na Kayirere Marie Grâce barabareze hamwe na Faida mu Rukiko rw’Ubucuruzi rwa Nyarugenge basaba ko amasezerano y’ubugure bagiranye ateshwa agaciro kuko yakozwe batabizi, banasaba indishyi zinyuranye,Urukiko rwemeje ko ayo masezerano avanyweho, Rutegeka abaregwaga gufatanya guha Kayitesi na Kayirere amafaranga y’indishyi z’akababaro n’ay’ikurikiranarubanza. Kayitesi na Kayirere bakodesheje ako gace k’ikibanza batsindiye na Mujejende Béata, Hatibu Sani, Umutesi Mariam na Rukundo Abdoulahman, bahabwa 8.000.000 Frw y’ubukode y’umwaka wose. Faida yahise arega Kayitesi na Kayirere mu Rukiko rw’Ubucuruzi rwa Nyarugenge asaba ko rwakemura impaka zishingiye ku irangiza ry’urubanza rwavuze haruguru,narwo Rwemeje ko ahaguzwe ari ahayo masezerano yasheshwe n’Urukiko Rukiko rw’Ubucuruzi rwa Nyarugenge hagaruka mu kibanza nº 3641 nk’uko igishushanyo cy’abahanga mu by’ubwubatsi kibigaragaza.Faida yandikiye Mujejende na bagenzi be abasaba kumwishyura ibirarane by’ubukode,bamusubije ko bidashoboka kubera yuko nta masezerano y’ubukode bagiranye. Yahise afatira ibicuruzwa byabo, nabo bamuregana hamwe na Kayitesi na Kayirege Mu Rukiko rw’Ubucuruzi rwa Nyarugenge basaba gusubizwa ibicuruzwa byabo, n’iduka bacururizagamo, guhabwa indishyi zinyuranye zirimo n’iz’igihombo bagize. Mujejende ku giti cye yasabye ko yahabwa ayo yasize muri iryo duka hamwe n’inyungu zayo, rukanategeka ko habaho igihano gihatira kurangiza urubanza.Urukiko rwategetse Faida gusubiza Mujejende na bagenzi be ahwanye n’agaciro k’ibicuruzwa byabo akabana n’indishyi z’akababaro,atabikora ku neza akazajya aha buri wese 1.000.000 Frw buri kwezi y’indishyi z’ubukerewe. Faida yajuririye urwo rubanza mu Rukiko Rukuru rw’Ubucuruzi, narwo rumutegeka gusubiza Mujejende na bagenzi be ahwanye n’agaciro k’ibicuruzwa byabo hamwe n’ indishyi z’igihombo bagize,izo gutakaza abaguzi,izakababaro hamwe n’ayikurikirana rubanza,Runamutegeka kubaha ay’ubukode bishyuye,kubera ko yaratumye badakora, atabikora ku neza, akazajya yishyura buri wese buri kwezi y’igihano kimuhatira kurangiza urubanza gitangira kubarwa kuva urubanza rubaye itegeko, akanishyura Kayitesi na Kayirere 500.000 Frw y’igihembo cya Avoka. Faida yajuriye mu Rukiko rw’Ikirenga avuga ko Urukiko Rukuru rw’Ubucuruzi rwirengagije ko (1) atariwe wakuye ibicuruzwa mu idukango abibike muri“stock” ko niba ari ikosa ryakozwe ryakagombye kuryozwa umuheshabubasha w’inkiko wabihagejeje(2)Rukaba rwaramutse gutanga amafaranga ahwanye n’agaciro k’ibicuruzwa byabo,mu gihe rwaragombaga kubategeka kubifata kuko aricyo baregeye mu rwego rwa mbere (3)Runamutegeka gusubiza Mujejende na bagenzi be amafaranga y’ubukode aho kubitegeka Kayitesi na Kayirere kuyatanga, (4)Rumutegeka guha Kayitesi na Kayisire amafaranga y’igihembo cya Avoka kandi atariwe wabashoye mu manza. Mujejende na Bagenzi be bafatanyije na Kayitesi hamwe na Kayisire basubije ko:(1) ariwe wihaye ububasha bwo kubifungirana mu iduka bacururizagamo,arangije, ajya kubishyira ahantu hatazwi(2) akwiye kubaha amafaranga ahwanye n’agaciro k’ibicuruzwa byabo kubera ko atagaragaje urutonde rw’ibyo yafatiriye, akaba ataranerekanye niba bitarangiritse,(3) agomba

## Page 3

kubaha amafaranga y’ubukode yatsindiwe kubera ko ariwe wababujije gukomeza gucururiza muri iryo duka,Kayiyesi na Kayirere nabo bakaba barabishimangiye(4)Kujya mu manza babitewe na Faida wavanye Mujejende na Bagenzi be ku nguvu mu iduka ryabo babakodeshaga bigatuma biyambazaAvoka akaba ariyo mpamvu Faida agomba kuyatanga. Mujejende na Bagenzi be batanze ubujurire bwuririye ku bundi basabako (1)Faida yategekwa kubaha indishyi zo gutakaza abaguzi ziyongera kuzo bagenewe mbere kuko ubu bamaze amezi 12 badacuruza bakaba batazi niba bazongera kubafatisha,(2)banasabye ko n’indishyi z’akababaro zakwiyongera kuko bakomeje no kubabazwa no gukurwa aho bakoreraga,(3)bajuririye icyemezo cyuko batasubira mu iduka bacururizagamo kuko amasezerano y’ubukode yarangiye,rwirengagiza ko Faida yabavukije uburenganzira bwo kurikoreramo, mu gihe abo basezeranye bagifite ubushake bwo kuyongera kugira ngo bazakomeze kuricururizamo, (4)Banasabyeko ko Faida yabaha 5.000.000 Frw y’ikurikiranarubanza n’igihembo cya Avoka, aho kuba 2.800.000 Frw bagenewe mbere, kubera ko yajuriye bigatuma bongera gushaka avoka wo kubaburanira,(5)basabye ko yaha buri wese kandi buri kwezi 1.000.000 Frw y’igihano kimuhatira kurangiza urubanza kuko byagaragaye ko atinza irangizwa ryarwo.Faida yasubije ko(1) indishyi zo gutakaza abaguzi batazihabwa kuko babatakaje kubera amakosa yabo yo gukorana amasezerano y’ubukode n’abatari ba nyiri iduka,naho ku indishyi z’akababaro yasubije ko (2)zitatangwa kuberako nta gikorwa cye cyabangirije, (3)naho kubyerekeye gusubira mu iduka ntabwo bayisubiramo kubera yuko ari iye (4)ntaho ku indishyi z’ikurikirana rubanza hamwe n’igihembo cya avoka yasubije yuko atazitanga kubera yuko atari we wabashyoye mu manza,(5) Yasubije yuko atacibwa icyo gihano kuko nta kosa yakoreye Mujejende na bagenzi be. Mujejende, yatanze Ubujurire bwuririye ku bundi asaba ko Faida yategekwa kumusubiza amafaranga yasize mu iduka hiyongereyeho n’inyungu zayo kuko byamuteje igihombo.Faida yasubijeko zitatangwa kuko nta kimenyetso kigaragaza ko yayasize mu iduka yakoreragamo. Kayitesi na Kayirere nabo batanze ubujurire bwuririye ku bundi basaba Urukiko gutegeka Faida kubaha 3.000.000 Frw y’indishyi z’akababaro batahawe n’Urukiko Rukuru rw’Ubucuruzi, kandi rwari rwemeje ko nta ruhare bagize mu gikorwa cyakozwe cyo kuvana abakodesha babo mu iduka bacururizagamo,akanabaha 3.000.000 akubiyemo ay’ikurikiranarubanza, ay’igihembo cya Avoka n’ay’irangizarubanza yo mu Rukiko rw’Ikirenga yiyongera kuyo bagenewe mbere. Faida yasubije yuko indishyi z’akababaro zisabwa zitatangwa kubera ko nta gikorwa yabakoreye cyabangirije bitewe n’uko batari ba nyir’iduka yakodeshwaga, n‘izo ndishyi basaba nizatangwa kubera ko atariwe wabashoye mu manza kuko barezwe hamwe mu rwego rwa mbere Incamake y’icyemezo: 1. Buri muntu afite uburenganzira ku mutungo bwite, waba uwe ku giti cye cyangwa uwo afatanyije n’abandi. Ntushobora guhungabanywa keretse ku mpamvu z’inyungu rusange mu bihe no mu buryo buteganywa n’amategeko kandi habanje gutangwa indishyi zikwiye.bityo kuba ari Faida wavanye ibicuruzwa bya Mujejende na bagenzi be mu iduka bacururizagamo mu buryo bunyuranyije n’amategeko agomba kubiryozwa akabitangira indishyi kubera yuko Igikorwa cyose cy’umuntu cyangirije undi gitegeka nyirugukora ikosa rigikomokaho kuriha ibyangiritse, 2. Mu gihe nta kimenyetso kigizwe n’inyandiko-mvugo cyakozwe n’umuhesha w’inkiko ubifitiye ububasha cyangwa ikindi icyo aricyo cyose kigaragaza urutonde n’ubwoko

## Page 4

bw’ibicuruzwa bya buri mucururuzi bibitse,hakaba nta nikigaragaza yuko bikiri bizima,ntaho urukiko rwahera rutegeka ba nyirabyo gutwara ibyo bicuruzwa,ahubwo uwabifatiriye mu buryo bunyuranyije n’amategeko aba agomba guha banyirabyo amafaranga ahwanye n’agaciro kabyo. 3. Mu gihe amasezerano y’ubukode yabaye hagati y’abantu babiri, nyiri gukodeshwa akavanwa mu iduka yacururizagamo iminsi y’ubukode itararangira aba agomba gusubizwa ahwanye n’igihe cyari gisigaye ntabwo yayasubizwa n’utarebwa nayo masezerano ahubwo ayasubizwa n’uwamukodesheje.bityo kuba ayo masezerano yarabaye hagati ya Mujejende na bagenzi be hamwe na Kayitesi afatanyije na Kayirere,hanyuma Mujejende na bagenzi be bakavanwa mu iduka bacururizagamo iminsi itararangira,Kayitesi na Kayirere bagomba gufatanya kubasubiza amafaranga ahwanye n’iminsi yari isigaye,utarayagizemo uruhare nta kurikizi byamugiraho kuko“amasezerano agira inkurikizi ku bayagiranye gusa, ntabangamira undi wese kandi amugirira akamaro gusa mu biteganyijwe bijyanye no gusezerana ibifitiye undi akamaro”. 4. Urukiko ntabwo rugenera igihembo cy’avoka abafite ibyo batsindiwe mu rubanza, bityo kuba Kayitesi na Kayirere baratsinzwe kubijyanye no gusubiza Mujejende na bagenzi amafaranga y’ubukode ntabwo urukiko rwabagenera amafaranga y’igihembo cya avoka. 5. Mu gihe uwatanze ubujurire bwuririye ku bundi asaba yuko indishyi yagenewe kubera gutakaza abaguzi ziyongera ariko ntagaragaze ikimenyetso cyerekana yuko izo yagenewe ari nke, ntabwo urukiko ruzimuha. 6. Mu gihe indishyi z’akababaro zagenwe mbere ziri mu rugero rukwiye ntabwo urukiko rwagena izindi ziri hejuru y’izo, bityo Faida ntiyategekwa gutanga izindi mu gihe izari zagenwe ziri mu kigero gikiye. 7. Mu gihe amasezerano y’ubukode bw’iduka yarangiye,ba nyiri gukodeshwa ntabwo baba bafite ububasha bwo kuriburana.bityo ntabwo Mujejende na bagenzi be barisubiramo kuko amasezerano y’ubukode bwaryo bari baragiranye na Kayitesi Françoise afatanyije na Kayirere Marie Grâce yarangiye. 8. Urega agomba kugaragaza ibimenyetso by’ibyo aregera. Iyo abibuze, uwarezwe aratsinda”.na “Buri muburanyi aba agomba kugaragaza ukuri kw’ibyo aburana”.bityo ntabwo rero urukiko rwategeka ko Mujejende ahabwa 1.750.000 Frw hamwe n’inyungu zayo mu gihe nta kimenyetso yatanze kigaragaza mu buryo budashidikanywaho yuko yayasize mu iduka bacururizagamo. 9. Urukiko ntabwo rushobora gutegeka undi muntu kwishyurira undi amafaranga y’inyungu zikomoka ku mwenda yagurijwe na banki.bityo ntabwo rwategeka Faida kwishyurira Hatibu amafaranga y’inyungu akomoka ku mwenda yagurijwe na AGASEKE Bank. 10. Uwagize ibyo atsindira mu rubanza ntabwo yishyura uwamureze amafaranga y’ikurikirana rubanza n’igihembo cya avoka, bityo kuri uru rwego ntabwo Faida yayaha Mujejende na bagenzi be kubera yuko hari ibyo yatsindiye mu rubanza. 11. Mu gihe nta kimenyetso cyatanzwe cy’uko urubanza rutazarangizwa neza ntabwo urukiko rwatanga igihano gihatira kurangiza urubanza. 12.Mu gihe nta kimenyetso Kayitesi na Kayirere bagaragaza yuko umunsi Mujejende na bagenzi be bavanwaga mu iduka bacururizagamo bari bararitsindiye mu buryo budasubirwaho ntabwo urukiko rwabaha indishyi z’akababaro. 13. Ntabwo urukiko rwatanga amafaranga y’ikurikiranarubanza nay’igihembo cya Avoka mu gihe buri ruhande rufite ibyo rwatsindiye nta nubwo Rwatanga amafaranga y’irangiza rubanza

## Page 5

mugihe nta rubanza rurangizwa ruhari bisobanura ko Faida ataha Kayitesi na Kayirere amafaranga y’irangizarubanza kuko ntarwo afitanye nabo. Ubujurire bufite ishingiro kuri bimwe; Ubujurire bwuririye ku bundi bwatanze n’abarezwe bambere nta shingiro bufite; Ubujurire bwuririye ku bundi bwatanze n’abarezwe ba kabiri nta shingiro bufite; Urubanza rwajuririwe ruhindutse kuri bimwe; Rutegetse abarezwe ba kabiri gusubiza abareze ba mbere amafaranga y’ubukode; Amagarama y’urubanza aherereye k’uwajuriye no kubarezwe ba kabiri. Amategeko yashingiweho: Itegeko Nshinga rya Repubulika y’u Rwanda ryo kuwa 04/06/2003 nk’uko ryavuguruwe kugeza ubu , ingingo ya 29 igika cya mbere n’icya 3; Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 9; Itegeko nº 45/2011 ryo kuwa 25/11/2011 rigenga amasezerano mu Rwanda, Ingingo ya 113; Itegeko 15/2004 ryo kuwa 12/06/2004 ryerekeye ibimenyetso mu manza n’itangwa ryabyo, ingingo ya 3; Itegeko ryo kuwa 30/07/1888 ryerekeye amasezerano cyangwa imirimo nshinganwa, ingingo ya 258. Nta manza zifashishijwe. Urubanza I. IMITERERE Y’URUBANZA [1] Rwasibo Jean Baptiste yagurishije Amur Sultan igice cy’ikibanza nº 3641 cyubatsemo inzu y’ubucuruzi kiri muri “Quartier Commercial”, Akarere ka Nyarugenge, mu Mujyi wa Kigali. Rwasibo Jean Baptiste amaze gupfa, abahungu be batatu aribo Rwasibo Louis, Rwasibo Jean Bosco na Rwasibo Joseph bagurishije Amur Sultan akandi gace k’icyo kibanza kari gasigaye kakoreshwaga nka “corridor”. [2] Abakobwa ba Nyakwigendera Rwasibo Jean Baptiste bakaba n’abazungura be aribo Kayitesi Françoise na Kayirere Marie Grâce bareze Rwasibo Louis na Rwasibo Jean Bosco hamwe na Amur Sultan mu Rukiko rw’Ubucuruzi rwa Nyarugenge basaba ko amasezerano y’ubugure yo kuwa 23/05/1999 yabaye hagati yabo yateshwa agaciro kubera ko yakozwe batabizi, basaba kandi ko bahabwa n’indishyi zinyuranye. [3] Urwo Rukiko rwaciye urubanza nº RCOM 0043/09/TC/Nyge - RCOM 0044/09/TC/Nyge, rwemeza ko ayo masezerano avanyweho, rutegeka Rwasibo Louis, Rwasibo Joseph, Rwasibo Jean Bosco na Amur Sultan gufatanya guha Kayitesi Françoise na Kayirere Marie Grâce amafaranga 4.000.000 y’indishyi z’akababaro n’ay’ikurikiranarubanza.

## Page 6

[4] Nyuma y’aho, Kayitesi Françoise na Kayirere Marie Grâce bagiranye amasezerano y’ubukode bw’ako gace k’ikibanza batsindiye na Mujejende Béata, Hatibu Sani, Umutesi Mariam na Rukundo Abdoulahman, maze abakodesha babaha 8.000.000 Frw y’ubukode y’umwaka wose, ni ukuvuga kuva kuwa 17/04/2013 kugeza kuwa 17/04/2014. [5] Amur Sultan yareze Kayitesi Françoise na Kayirere Marie Grâce mu Rukiko rw’Ubucuruzi rwa Nyarugenge asaba ko rwakemura impaka zishingiye ku irangiza ry’urubanza rwavuze haruguru, ruca urubanza nº RCOM 0433/13/TC/Nyge, rwemeza ko ahaguzwe na Amur Sultan harebana n’aho amasezerano yasheshwe mu rubanza nº RCOM 0043/09/TC/Nyge - RCOM 0044/09/TC/Nyge, hangana na metero ebyiri (2) z’ubutambike kuri metero 23 z’uburebure ku mbago z’ikibanza nº 3642 hagaruka mu kibanza nº 3641 nk’uko igishushanyo cy’abahanga mu by’ubwubatsi kibigaragaza. [6] Faida Amur Sultan yandikiye Mujejende Béata na bagenzi be abasaba kumwishyura ibirarane by’ubukode bamubereyemo, bitaba ibyo, bakamuvira mu iduka, nabo bamwandikira bamubwira ko batamwishyura ayo mafaranga kuko nta masezerano y’ubukode bagiranye, ko ahubwo bayagiranye na Kayitesi Françoise na Kayirere Marie Grâce kubera ko aribo batsindiye iryo duka. [7] Mujejende Béata na bagenzi be biyambaje Polisi y’Igihugu kugira ngo ibaheshe ibicuruzwa byabo, birananirana, naho Faida Amur Sultan yiyambaza Ubuyobozi bw’Inzego z’Ibanze kugira ngo butegeke Mujejende Béata na bagenzi be kumwishyura ibirarane by’ubukode bamubereyemo no kumuvira mu iduka, ntibyashoboka. Faida Amur Sultan avuga ko Umuhesha w’Inkiko witwa Kazigaba André yavanye ibyo bicuruzwa mu iduka rye igihe yarangizaga urubanza nº RCOM 0433/13/TC/Nyge ajya kubibika muri “stock” yo kwa Faida Amur Sultan, aho biri kugeza ubu. [8] Mujejende Béata, Hatibu Sani, Umutesi Mariam na Rukundo bareze Kayitesi Françoise na Kayirere Marie Grâce hamwe na Faida Amur Sultan mu Rukiko rw’Ubucuruzi rwa Nyarugenge basaba gusubizwa ibicuruzwa byabo bifite agaciro kangana na 38.873.500 Frw n’iduka bacururizagamo, bakanahabwa indishyi zinyuranye zirimo n’iz’igihombo bagize, Mujejende Béata asaba kandi ko yahabwa 1.750.000 Frw yasize muri iryo duka hiyongereyeho n’inyungu zayo, rukanategeka ko habaho igihano kibahatira kurangiza urubanza. [9] Urwo Rukiko rwaciye urubanza rutegeka Faida Amur Sultan gusubiza Mujejende Béata na bagenzi be agaciro k’ibicuruzwa byabo kuko ariwe wabifatiriye bya kiboko mu buryo bunyuranyije n’amategeko nk’uko byemejwe n’urubanza RC 0541/13/TB/NYGE rwabaye itegeko, aho kuba Umuhesha w’Inkiko witwa Kazigaba André, akabaha agaciro kabyo mu buryo bukurikira: Mujejende Béata agahabwa 7.263.000 Frw, Hatibu Sani agahabwa 5.786.500 Frw, Rukundo Abdoulahman agahabwa 10.492.000 Frw, Umutesi Mariam agahabwa 15.332.000 Frw. Rwategetse kandi ko Faida Amur Sultan abaha n’indishyi z’igihombo yabateje mu buryo bukurikira: Mujejende Béata agahabwa 2.000.000 Frw, Umutesi Mariam agahabwa 2.000.000 Frw, Rukundo 2.600.000 Frw, naho Hatibu Sani agahabwa 1.800.000 Frw, zikiyongeraho 1.000.000 Frw y’indishyi z’akababaro kuri buri wese, bakanasubizwa n’iduka bakoreragamo, atabikora ku neza, akazajya aha buri wese 1.000.000 Frw buri kwezi y’indishyi z’ubukerewe.

## Page 7

[10] Faida Amur Sultan yajuririye urwo rubanza mu Rukiko Rukuru rw’Ubucuruzi, rumutegeka guha Mujejende Béata na bagenzi be indishyi ziteye zitya: -Mujejende Béata agahabwa 7.263.000 Frw ahwanye n’agaciro k’ibicuruzwa bye, 1.452.600 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 10.915.600 Frw. -Hatibu Sani agahabwa 5.786.500 Frw ahwanye n’agaciro k’ibicuruzwa bye, 1.157.300 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 9.143.800 Frw. -Rukundo Abdoulahman agahabwa 10.492.000 Frw ahwanye n’agaciro k’ibicuruzwa bye, 2.098.400 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 14.790.400 Frw. -Umutesi Mariam 15.332.000 Frw ahwanye n’agaciro k’ibicuruzwa bye, 3.066.400 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 20.598.400 Frw. Rutegeka kandi Faida Amur Sultan kubaha 5.333.336 Frw y’ubukode bishyuye, ariko akaba yaratumye badakora, atabikora ku neza, akazajya yishyura buri wese 1.000.000 Frw buri kwezi y’igihano kimuhatira kurangiza urubanza gitangira kubarwa kuva urubanza rubaye itegeko, akanishyura Kayitesi Françoise na Kayirere Marie Grâce 500.000 Frw y’igihembo cya Avoka. [11] Faida Amur Sultan yajuririye urwo rubanza mu Rukiko rw’Ikirenga avuga ko Urukiko Rukuru rw’Ubucuruzi rutagombaga kumutegeka guha Mujejende Béata na bagenzi be indishyi zingana na 65.281.536 Frw kubera ko atariwe wakuye ibicuruzwa byabo mu iduka bacururizagamo, ko ahubwo niba hari amakosa yaba yarakozwe n’Umuhesha w’Inkiko witwa Kazigaba André igihe yarangizaga urubanza RCOM 0433/13/TC/Nyge, yayaryozwa ku giti cye kuko ariwe wavanye ibyo bicuruzwa mu iduka byarimo akajya kubibika muri “stock” ye, aho bibitse kugeza ubu, ko kandi atagomba guha Kayitesi Françoise na Kayirere Marie Grâce amafaranga y’igihembo cya Avoka kubera ko atariwe wabashoye mu manza, ko ahubwo ayo mafaranga agomba gutangwa na Mujejende Béata na bagenzi be bitewe n’uko aribo babareze mu rwego rwa mbere. [12] Mujejende Béata, Hatibu Sani, Umutesi Mariam na Rukundo Abdoulahman batanze ubujurire bwuririye ku bundi basaba uru Rukiko ko rwategeka Faida Amur Sultan kubaha indishyi ziyongera kuzo bagenewe mbere kuko yakomeje kujurira bigakomeza kubateza igihombo. [13] Kayitesi Françoise na Kayirere Marie Grâce nabo batanze ubujurire bwuririye ku bundi basaba ko Faida Amur Sultan yabaha indishyi z’akababaro n’amafaranga y’ikurikiranarubanza n’igihembo cya Avoka batahawe mbere, nyamara bari bayasabye.

## Page 8

[14] Urubanza rwaburanishijwe mu ruhame kuwa 07/10/2014, Faida Amur Sultan yunganiwe na Me Kayitare Serge afatanyije na Me Uwamungu JMV, Mujejende Béata, Hatibu Sani, Umutesi Mariam na Rukundo Abdoulahman bunganiwe na Me Mukabibi Fatuma, naho Kayitesi Françoise na Kayirere Marie Grâce bahagarariwe na Me Nzirabatinyi Fidèle. II. IBIBAZO BIRI MU RUBANZA N’ISESENGURWA RYABYO A.Ku birebana n’ubujurire bwa Faida Amur Sultan 1. Kumenya niba Faida Amur Sultan yarafatiriye mu buryo bunyuranyije n’amategeko ibicuruzwa bya Mujejende Béata na bagenzi be ku buryo yabiryozwa [15] Faida Amur Sultan n’abamwunganira bavuga ko Urukiko Rukuru rw’Ubucuruzi rwemeje ko agomba guha Mujejende Béata, Hatibu Sani, Umutesi Mariam na Rukundo Abdoulahman indishyi zijyanye n’uko ariwe wavanye ibicuruzwa byabo mu iduka bacururizagamo, akajya kubibika muri “stock” ye, rwirengagije ko ari Ubuyobozi bw’Umurenge wa Nyarugenge bwategetse ko ibyo bicuruzwa bihavanwa, ariko ko banyirabyo banze kubivanamo bituma Faida yiyambaza Umuhesha w’Inkiko witwa Kazigaba André wabikuyemo akabishyira mu makarito, yarangiza, akabibika muri “stock” yo kwa Faida Amur Sultan, hanyuma akamuha imfunguzo z’iryo duka nk’uko nawe ubwe yabyiyemereye imbere y’urwo Rukiko, nyamara uko kwiyemerera kwe ntikwahabwa agaciro. [16] Me Kayitare Serge umwunganira avuga ko nta kosa uwo Muhesha w’Inkiko yakoze kubera ko yavanye ibyo bicuruzwa muri iryo duka igihe yarangizaga urubanza RCOM 0433/13/TC/Nyge rwabaye itegeko, rwemeje ko igice cy’ikibanza nº 3641 kirimo iryo duka ari icya Amur Sultan kubera ko yakiguze mu mwaka wa 1981, ko niba hari amakosa uwo Muhesha w’Inkiko yakoze mu kazi ke, ariwe wayaryozwa ku giti cye hashingiwe ku ngingo ya 42 y’Itegeko nº 12/2013 ryo kuwa 22/03/2013 rigena umurimo w’Abahesha b’Inkiko, iteganya ko Umuhesha w’Inkiko w’Umwuga aryozwa ku giti cye amakosa yakoze mu kazi ke, aho kuyaryoza Faida Amur Sultan utarigeze agira aho ahurira n’ibicuruzwa byabo. [17] Me Uwamungu JMV nawe wunganira Faida Amur Sultan avuga ko Urukiko Rukuru rwirengagije kubaza abatangabuhamya batanze kuko Biberabagabo Jean Bosco na Dushimiyimana Nasaléen bakwemeza ko Biberabagabo yari yaragiranye amasezerano y’ubukode na Mujejende na bagenzi be, nyamara Kayitesi na Kayirere bababuza kuzajya bamwishyura amafaranga y’ubukode, bituma abaha integuza yo kuva mu iduka bacururizagamo bakanishyura Faida Amur Sultan ibirarane by’ubukode bamubereyemo, bitaba ibyo bakarivamo, naho Kadja David we yakwemeza ko ariwe wakinguriye Umuhesha w’Inkiko iryo duka akavanamo ibicuruzwa bya Mujejende na bagenzi be kuko ariwe wabikaga imfunguzo zaryo, naho Masumbuko Jean Bosco na Binama Jean Paul bahamya ko igihe Umuhesha w’Inkiko yasohoraga ibicuruzwa muri iryo duka bari bahari, ndetse ko Binama Jean Paul yahamya ko yabonye aho Umuhesha w’Inkiko yabibitse. [18] Faida Amur Sultan asobanura ko Umuhesha w’Inkiko witwa Nsengiyumva Jean Bosco yatumwe na Kayitesi na Kayirere kurangiza urubanza nº RCOM 0043/09/TC/Nyge - RCOM 0044/09/TC/Nyge abwira abakodeshaga iyo nzu bose ko batazongera kumwishyura amafaranga y’ubukode bamuhaga, ko ahubwo bazajya bayishyura umuryango wa Rwasibo Jean Baptiste kubera ko ariwo watsindiye agace k’ikibanza karimo iduka bacururizagamo, ariko ko yitabaje

## Page 9

Me Kazungu Jean Bosco n’Abayobozi b’Inzego z’Ibanze, maze bakoresha abo bacuruzi inama, aho bamutegetse gusesa amasezerano y’ubukode yari yaragiranye na Biberabagabo akanamusubiza 6.000.000 Frw y’ubukode yari yaramuhaye, arabikora, ko kandi bategetse Mujejende na bagenzi be bakodeshaga Kayitesi na Kayirere ko batangira kumwishyura amafaranga y’ubukode, barabyanga, bituma yiyambaza Umuhesha w’Inkiko witwa Kazigaba André waje akaribakuramo adahari akanabika ibicuruzwa byabo muri “stock” yo kwa Faida Amur Sultan, arangije, ajyana imfunguzo z’aho hantu, ko rero ataryozwa ibyo bicuruzwa mu gihe bitigeze bigera mu maboko ye. [19] Mujejende Béata, Hatibu Sani, Umutesi Mariam na Rukundo Abdoulahman n’ubunganira bavuga ko nta kosa Urukiko Rukuru rw’Ubucuruzi rwakoze ubwo rwemezaga ko Faida Amur Sultan aryozwa ibicuruzwa byabo kubera ko ariwe wihaye ububasha bwo kubifungirana mu iduka bacururizagamo mu gihe kirenga iminsi itanu (5), arangije, ajya kubishyira ahantu hatazwi, ndetse ko nyuma y’aho atabibahaye ku neza, ko ahubwo yatanze ikirego mu Rukiko rw’Ibanze rwa Nyarugenge kuri nº RC 0541/13/TB/Nyge agamije kubishinganisha kugira ngo bizavemo ubwishyu bw’ibirarane by’ubukode yumvaga bamubereyemo, ariko ko urwo Rukiko rwemeje ko ikirego cye nta shingiro gifite kubera ko yasabye ibyo yarangije gukora atabiherewe uburenganzira, ko rero atari Umuhesha w’Inkiko witwa Kazigaba André wakoze amakosa yo kubifatira mu buryo bunyuranyije n’amategeko kuko yaje kwemeza ibyo Faida Amur Sultan yari yarangije gukora nk’uko yabyiyandikiye mu nyandiko-mvugo ye yo kuwa 14/09/2013 yandikishije intoki, ko kandi yabyemereye n’imbere y’Urukiko Rukuru igihe yahatangiraga ubuhamya kuwa 22/05/2014 bituma uru Rukiko rudaha agaciro imvugo ze kuko rwasanze zirimo ivuguruzanya ku bijyanye n’ihererekanya ry’imfunguzo kuko hamwe yavuze ko abacuruzi bazihaye Faida Amur Sultan, ahandi akavuga ko bazihaye Kazigaba André, nawe akazimushyikiriza. [20] Mujejende na bagenzi be basobanura ko bagiranye amasezerano y’ubukode na Kayitesi Françoise na Kayirere Marie Grâce bitewe n’uko Umuhesha w’Inkiko witwa Nsengiyumva Jean yari yabagaragarije ko aribo batsindiye agace k’ikibanza bacururizagamo igihe yazaga kurangiza urubanza nº RCOM 0043/09/TC/Nyge - RCOM 0044/09/TC/Nyge, nyamara Faida Amur Sultan yabareze ku Munyamabanga Nshingwabikorwa w’Umurenge wa Nyarugenge wemeje ko bakomeza gucururiza muri iryo duka no kwishyura abo mu muryango wa Rwasibo Jean Baptiste mu gihe bagitegereje icyemezo cy’Urukiko, ariko Faida Amur Sultan ntiyubahirije icyo cyemezo, ahubwo yafunze iryo duka, anatwara ibicuruzwa byabo nta burenganzira abifitiye, ko rero agomba kubiryozwa hashingiwe ku ngingo ya 258 CCLIII, cyane cyane ko nyuma yo kubifatira atashatse kubibasubiza ku neza, ko ahubwo yabifatiriye kugira ngo bazamwishyure amafaranga y’ubukode avuga ko bari bamubereyemo. [21] Me Nzirabatinyi Fidèle uburanira Kayitesi Françoise na Kayirere Marie Grâce avuga ko nta kosa Urukiko Rukuru rw’Ubucuruzi rwakoze igihe rwategekaga ko Faida Amur Sultan aryozwa ibicuruzwa bya Mujejende Béata na bagenzi be kubera ko ariwe wabikuye mu iduka bakoreragamo akajya kubibika iwe, ko kandi atakwirengagiza ko ariwe wahaye Umuhesha w’Inkiko akazi ko kwemeza ibyo yarangije gukora nk’uko bivugwa mu nyandiko-mvugo ye ibyemeza (PV de Constat) yo kuwa 14/09/2013 yandikishije intoki, aho yavuze ko “kuva kuwa 10/09/2013 kugeza kuwa 14/09/2013, inzugi z’iryo duka zari zifunze kubera ko imfunguzo zaryo zari zifitwe na Faida Amur Sultan, ndetse ko atakwirengagiza ko inyandiko-mvugo y’irangizarubanza yakozwe nyuma y’aho kuwa 17/09/2013”.

## Page 10

[22] Avuga ko ikindi kimenyetso kigaragaza ko atari Umuhesha w’Inkiko wakuye ibyo bicuruzwa muri iryo duka ari uko nta rubanza yarangizaga icyo gihe kubera ko urubanza nº RCOM 0433/13/TC/Nyge rutemeje ko agace k’ikibanza kaburanwa ari aka Faida Amur Sultan kuko atari abahanga mu bwubatsi bagaragaje ko metero 2 kuri 23 zigomba gusubira mu kibanza cya Amur Sultan bashinzwe guca urubanza, ko ahubwo rucibwa n’Urukiko, ko kandi umucamanza washyikirijwe ikirego kirebana n’impaka zivutse mu irangizarubanza atavuguruza urubanza rw’iremezo nº RCOM 0043/09/TC/Nyge - RCOM 0044/09/TC/Nyge rwemeje ko ako gace k’ikibanza ari aka Kayitesi Françoise na Kayirere Marie Grâce. UKO URUKIKO RUBIBONA [23] Ikibazo nyamukuru kigomba gusuzumwa muri uru rubanza nicyo kumenya niba Faida Amur Sultan yaragize uruhare mu gufatira mu buryo bunyuranyije n’amategeko ibicuruzwa bya Mujejende Béata na bagenzi be ku buryo yabiryozwa. [24] Ingingo ya 29 igika cya mbere n’icya 3 y’Itegeko Nshinga rya Repubulika y’u Rwanda ryo kuwa 04/06/2003 nk’uko ryavuguruwe kugeza ubu, iteganya ko “Buri muntu afite uburenganzira ku mutungo bwite, waba uwe ku giti cye cyangwa uwo afatanyije n’abandi. Ntushobora guhungabanywa keretse ku mpamvu z’inyungu rusange mu bihe no mu buryo buteganywa n’amategeko kandi habanje gutangwa indishyi zikwiye“. [25] Naho ingingo ya 258 y’Igitabo cya gatatu cy’amategeko y’imbonezamubano, igateganya ko “Igikorwa cyose cy’umuntu cyangirije undi gitegeka nyirugukora ikosa rigikomokaho kuriha ibyangiritse“. [26] Dosiye igaragaza ko kuwa 14/09/2013, igihe ibicuruzwa bya Mujejende na bagenzi be byavanwaga mu iduka bacururizagamo, Umuhesha w’Inkiko Kazigaba André yakoze inyandiko- mvugo yemeza (PV de constat) yandikishije intoki, aho yasobanuye ko David Kadja yashyikirije Faida Amur Sultan imfunguzo z’iryo duka kuwa 10/09/2013, ko kandi kuva icyo gihe kugeza kuwa 14/09/2013, iryo duka ryari rifunze ku buryo ibicuruzwa byabo byimuriwe muri “dépot“ yo kwa Amur Sultan kugira ngo benebyo bazabijyane ari uko babanje kumwishyura amafaranga y’ubukode bamubereyemo, ndetse ko Faida Amur Sultan amusabye kumubikira imfunguzo z’iryo duka no kumwishyuriza uwo mwenda bamufitiye. [27] Nyamara mu yindi nyandiko-mvugo yemeza (PV de constat), uwo Muhesha w’Inkiko Kazigaba André yandikishije imashini kuwa 14/09/2013, yasobanuye ko kuva kuwa 10/09/2013 kugeza kuwa 14/09/2013 iduka ryavuzwe haruguru ryari rifunze kuko ari Kadja David wari ufite imfunguzo zaryo, ko nyuma yo kuzishyikiriza Faida Amur Sultan, bahise barifungura, bakarisangamo ibicuruzwa by’abakodeshaga Biberabagabo banze kuza kubifata n’ubwo yabibasabye, ko kandi Faida Amur Sultan abasabye kumubikira imfunguzo z’iyo “dépot“, bene byo bakazabitwara ari uko bamaze kumwishyura amafaranga y’ubukode bamufitiye. [28] Dosiye igaragaza kandi ko kuwa 17/09/2013, aribwo Umuhesha w’Inkiko Kazigaba André yaje kurangiza urubanza nº RCOM 0433/13/TC/Nyge, maze abikorera inyandiko-mvugo yise iyo kurangiza urwo rubanza, aho yasobanuye ko ashyikirije Faida Amur Sultan imfunguzo z’iduka ryari mu makimbirane, ko kandi yemeza ko nta mukodesha n’umwe ukiririmo kubera ko n’ibintu byabo byasohowe muri iryo duka kuwa 14/09/2013.

## Page 11

[29] Muri dosiye hagaragaramo na none inyandiko-mvugo Umuhesha w’Inkiko Kazigaba André yakorewe mu Bugenzacyaha kuwa 26/09/2013, aho yasobanuye ko icyatumye agera ku iduka ryavuzwe haruguru kuwa Gatandatu ku itariki ya 14/09/2013, ari uko yari agiye kwemeza icyemezo cyari cyafashwe na Faida Amur Sultan cyo gukura ibicuruzwa muri iryo duka rye bitewe n’uko bene byo bari bamaze iminsi itanu (5) batahagera. [30] Urukiko rurasanga ibikubiye mu nyandiko-mvugo Kazigaba André yandikishije imashini yavuzwe haruguru bijyanye n’uko ari Kadja David wari ufite imfunguzo z’iduka ryavuzwe haruguru igihe ryari rifunze kuva kuwa 10/09/2013 kugeza kuwa 14/09/2013 bitahabwa agaciro kubera ko binyuranyije n’ibikubiye mu nyandiko-mvugo yemeza Kazigaba André yandikishije intoki igikorwa kikimara kuba kuwa 14/09/2013, aho yasobanuye ko igihe iryo duka ryari rifunze kimaze kuvugwa, imfunguzo zaryo zari zifitwe na Faida Amur Sultan kuko yazihawe na Kadja David kuwa 10/09/2013. [31] Byongeye kandi, ikigaragaza ko atari Umuhesha w’Inkiko Kazigaba André wakuye ibicuruzwa bya Mujejende na bagenzi be mu iduka bacururizagamo, ko ahubwo byahavanwe na Faida Amur Sultan ni uko inyandiko-mvugo y’irangiza ry’urubanza nº RCOM 0433/13/TC/Nyge yakozwe n’Umuhesha w’Inkiko kuwa 17/04/2013, mu gihe nyamara ibyo bicuruzwa byari byaravanywe muri ryo duka mbere y’aho kuwa 14/04/2013, ibi bikaba bigaragaza ko ahubwo Faida Amur Sultan yiyambaje uyu Muhesha w’Inkiko kugira ngo amufashe guhishira amakosa yari yararangije gukora yavuzwe haruguru. [32] Hakurikijwe ibyo bisobanuro, Urukiko rurasanga ari Faida Amur Sultan wavanye ibicuruzwa bya Mujejende na bagenzi be mu iduka bacururizagamo mu buryo bunyuranyije n’amategeko, aho kuba Umuhesha w’Inkiko Kazigaba André nk’uko ashaka kubyumvikanisha, bityo akaba agomba kuryozwa ayo makosa akabitangira indishyi hashingiwe ku ngingo ya 258 y’Igitabo cyavuzwe haruguru nk’uko byemejwe n’Urukiko Rukuru rw’Ubucuruzi. 2. Kumenya ingano y’indishyi Faida Amur Sultan agomba guha Mujejende na bagenzi be 1. Kumenya niba Mujejende na bagenzi be basubizwa ibicuruzwa byabo cyangwa niba bahabwa amafaranga ahwanye n’agaciro kabyo [33] Faida Amur Sultan n’abamwunganira bavuga ko Urukiko Rukuru rw’Ubucuruzi rutagombaga kumutegeka guha Mujejende Béata, Hatibu Sani, Umutesi Mariam na Rukundo Abdoulahman amafaranga ahwanye n’agaciro k’ibicuruzwa byabo, ko ahubwo rwagombaga gutegeka ko babifata kuko aricyo baregeye mu rwego rwa mbere, ko kandi bikibitse neza muri “stock” ye. [34] Me Mukabibi Fatuma wunganira Mujejende Béata na bagenzi be avuga ko Faida Amur Sultan akwiye kubaha amafaranga ahwanye n’agaciro k’ibicuruzwa byabo nk’uko n’Urukiko Rukuru rw’Ubucuruzi rwabyemeje kubera ko atagaragaje urutonde rw’ibyo yafatiriye mu buryo bunyuranyije n’amategeko, ko kandi atagaragaje niba bitarangiritse. [35] Me Nzirabatinyi Fidèle uhagarariye Kayitesi Françoise na Kayirere Marie Grâce avuga ko Faida Amur Sultan akwiye guha Mujejende Béata na bagenzi be amafaranga ahwanye n’agaciro k’ibicuruzwa byabo nk’uko n’Urukiko Rukuru rw’Ubucuruzi rwabyemeje kubera ko

## Page 12

atavuguruje ibimenyetso batanze bigaragaza agaciro kabyo, ko kandi atagaragaje niba bikiri bizima. UKO URUKIKO RUBIBONA [36] Ingingo ya 258 y’Igitabo cya gatatu cy’amategeko y’imbonezamubano, iteganya ko “Igikorwa cyose cy’umuntu cyangirije undi gitegeka nyirugukora ikosa rigikomokaho kuriha ibyangiritse“. [37] Ku birebana n’uru rubanza, muri dosiye hari ibimenyetso bigizwe n’inyandiko zatanzwe na Mujejende Béata na bagenzi be bigaragaza urutonde n’ubwoko bw’ibicuruzwa bari bafite mu iduka bacururizagamo, ariko bikaba byarafatiriwe mu buryo bunyuranyije n’amategeko na Faida Amur Sultan nk’uko byasobanuwe haruguru, aho Mujejende agaragaza ko ibicuruzwa bye byari muri iryo duka byari bifite agaciro kangana na 7.263.000 Frw, Hatibu Sani akagaragaza ko ibye byari bifite agaciro kangana na 5.786.500 Frw, ko ibya Umutesi Mariam byari bifite akangana na 15.332.000 Frw, naho ibya Rukundo Abdoulahman bikaba byari bifite akangana na 10.492.000 Frw. [38] Urukiko rurasanga kuba nta kimenyetso kigizwe n’inyandiko-mvugo yakozwe n’Umuhesha w’Inkiko ubifitiye ububasha cyangwa ikindi icyo aricyo cyose Faida Amur Sultan yarushyikirije kigaragaza urutonde n’ubwoko bw’ibicuruzwa bya buri mucuruzi abitse, kandi akaba atararugaragarije ko ibyo bicuruzwa bikiri bizima, dore ko abimaranye igihe cy’umwaka n’amezi abiri arenga, ntaho rwahera rutegeka Mujejende Béata na bagenzi be gutwara ibyo bicuruzwa, ahubwo Faida Amur Sultan wabifatiriye mu buryo bunyuranyije n’amategeko agomba kubaha amafaranga ahwanye n’agaciro kabyo nk’uko byemejwe n’Inkiko zabanje bitewe n’uko atavuguruje ibimenyetso byatanzwe na Mujejende Béata na bagenzi be byavuzwe haruguru. [39] Urukiko rurasanga rero Faida Amur Sultan agomba guha Mujejende Béata 7.263.000 Frw ahwanye n’agaciro k’ibicuruzwa bye, akanaha Hatibu Sani 5.786.500 Frw ahwanye n’agaciro k’ibicuruzwa bye, Umutesi Mariam agahabwa 15.332.000 Frw ahwanye n’agaciro k’ibicuruzwa bye, naho Rukundo Abdoulahman agahabwa 10.492.000 Frw ahwanye n’agaciro k’ibicuruzwa bye nk’uko byasobanuwe haruguru. 2. Kumenya niba Faida yategekwa guha Mujejende Béata na bagenzi be amafaranga y’ubukode [40] Me Kayitare Serge na Me Uwamungu JMV bunganira Faida Amur Sultan bavuga ko Urukiko Rukuru rw’Ubucuruzi rutagombaga kumutegeka guha Mujejende Béata na bagenzi be amafaranga y’ubukode atahawe, ko ahubwo rwagombaga gutegeka ko bayahabwa na Kayitesi Françoise na Kayirere Marie Grâce bayahaye igihe bakoranaga amasezerano y’ubukode. [41] Me Mukabibi Fatuma wunganira Mujejende Béata na bagenzi be avuga ko Faida Amur Sultan agomba kubaha amafaranga y’ubukode yatsindiwe muri urwo Rukiko kubera ko ariwe wababujije gukomeza gucururiza mu iduka ryavuzwe haruguru.

## Page 13

[42] Me Nzirabatinyi Fidèle uhagarariye Kayitesi Françoise na Kayirere Marie Grâce avuga ko Faida Amur Sultan akwiye guha Mujejende Béata na bagenzi be amafaranga y’ubukode nk’uko Urukiko Rukuru rw’Ubucuruzi rwabyemeje kubera ko ariwe wabahutaje akababuza gucururiza mu iduka bari barakodesheje. UKO URUKIKO RUBIBONA [43] Ingingo ya 113 y’Itegeko nº 45/2011 ryo kuwa 25/11/2011 rigenga amasezerano mu Rwanda, iteganya ko “Amasezerano agira inkurikizi ku bayagiranye gusa, ntabangamira undi wese kandi amugirira akamaro gusa mu biteganyijwe bijyanye no gusezerana ibifitiye undi akamaro”. [44] Ku birebana n’uru rubanza, muri dosiye hari amasezerano y’ubukode bw’iduka ryavuzwe haruguru agaragaza ko Mujejende Béata na Rukundo Abdoulahman bahagarariye Umutesi Mariam na Hatibu Sani bahaye Kayitesi Françoise na Kayirere Marie Grâce amafaranga 8.000.000 y’ubukode bw’iduka y’umwaka wose utangira kubarwa kuva kuwa 17/04/2013 kugeza kuwa 17/04/2014. [45] Urukiko rurasanga Faida Amur Sultan atasubiza Mujejende Béata na bagenzi be amafaranga y’ubukode basaba kuko atari we bayahaye, ko kandi atarebwa n’amasezerano y’ubukode yavuzwe haruguru hashingiwe ku ngingo ya 113 y’Itegeko nº 45/2011 ryavuzwe haruguru, bigaragara ko ahubwo bagomba kuyahabwa na Kayitesi Françoise afatanyije na Kayirere Marie Grâce bitewe n’uko aribo bagiranye ayo masezerano yabaye itegeko hagati y’impande zombi nk’uko biteganywa n’iyi ngingo. [46] Ku bijyanye n’ingano yayo, inyandiko-mvugo yakozwe n’Umuhesha w’Inkiko witwa Nsengiyuma Jean Bosco iri muri dosiye kuri kote ya 45, igaragaza ko iduka Mujejende Béata na bagenzi be bacururizagamo ryafunzwe guhera kuwa 09/09/2013, ko kandi batongeye kuricururizamo kuva icyo gihe kugeza kuwa 17/04/2014, umunsi ayo masezerano yagombaga kurangiriraho, bivuga ko iminsi batarikoreyemo bafitiye uburenganzira ari 218, bityo Urukiko rukaba rusanga Kayitesi Françoise na Kayirere Marie Grâce bagomba gufatanya kubaha amafaranga y’ubukode y’igihe cyari gisigaye abazwe mu buryo bukurikira: 8.000.000 Frw: iminsi 360 y’umwaka x iminsi 218 batacururije muri iryo duka = 4.844.444 Frw bakazigabanira aya mafaranga hashingiwe ku ruhare rwa buri wese bitewe n’uko batangiye hamwe amafaranga y’ubukode. 3. Kumenya niba Faida yategekwa guha Kayitesi na Kayirere 500.000 Frw y’igihembo cya Avoka yaciwe n’Urukiko Rukuru rw’Ubucuruzi [47] Me Kayitare Serge na Me Uwamungu JMV bunganira Faida bavuga ko Urukiko Rukuru rw’Ubucuruzi rutagombaga kumutegeka guha Kayitesi Françoise na Kayirere Marie Grâce 500.000 Frw y’igihembo cya avoka, ko ahubwo yagombaga gucibwa Kayitesi Françoise na Kayirere Marie Grâce kuko aribo babareze mu rwego rwa mbere. [48] Me Nzirabatinyi Fidèle uhagarariye Kayitesi Françoise na Kayirere Marie Grâce avuga ko Faida Amur Sultan akwiye guha Kayitesi Françoise na Kayirere Marie Grâce 500.000 Frw y’igihembo cya avoka nk’uko n’Urukiko Rukuru rw’Ubucuruzi rwabyemeje kuko ariwe

## Page 14

wabavukije uburenganzira bwabo igihe yavanaga ibicuruzwa bya Mujejende Béata na bagenzi be mu iduka ryabo babakodeshaga bigatuma biyambaza avoka wababuraniye. [49] Me Mukabibi Fatuma wunganira Mujejende Béata na bagenzi be avuga ko nta kosa Urukiko Rukuru rw’Ubucuruzi rwakoze ubwo rwategekaga Faida Amur Sultan guha Kayitesi Françoise na Kayirere Marie Grâce 500.000 Frw y’igihembo cya avoka kubera ko ari ibikorwa bye bya kiboko byabaye intandaro y’uru rubanza. UKO URUKIKO RUBIBONA [50] Urukiko rurasanga Faida Amur Sultan ataha Françoise na Kayirere Marie Grâce 500.000 Frw y’igihembo cya avoka yaciwe n’Urukiko Rukuru rw’Ubucuruzi kuko bafite ibyo batsindiwe muri uru rubanza bijyanye no gusubiza Mujejende Béata na bagenzi amafaranga y’ubukode yavuzwe haruguru. B Kumenya niba ubujurire bwuririye ku bundi bwatanzwe na Mujejende Béata na bagenzi be bufite ishingiro 1.Kumenya niba Mujejende Béata na bagenzi be bahabwa indishyi zijyanye n’uko batakaje abaguzi [51] Me Mukabibi Fatuma wunganira Mujejende Béata na bagenzi be avuga ko batanze ubujurire bwuririye ku bundi kugira ngo Faida Amur Sultan ahe buri wese 2.000.000 Frw y’indishyi z’uko batakaje abaguzi babo mu gihe gihwanye n’amezi 12 bamaze badacuruza kuko batazongera kubafatisha mu buryo bworoshye, yose hamwe akaba 8.000.000 Frw, aho kuba 500.000 Frw buri wese yagenewe n’Urukiko Rukuru rw’Ubucuruzi ahwanye n’amezi 8 bari bamaze babatakaje. [52] Me Kayitare Serge na Me Uwamungu JMV bunganira Faida Amur Sultan bavuga ko ataha Mujejende Béata na bagenzi be indishyi basaba z’uko batakaje abaguzi kubera ko aribo bakoze amakosa yo gukorana amasezerano y’ubukode na Kayitesi Françoise na Kayirere Marie Grâce batari ba nyir’iduka bacururizagamo. UKO URUKIKO RUBIBONA [53] Dosiye igaragaza ko mu rubanza rwajuririwe muri uru Rukiko, Mujejende Béata na bagenzi be bagenewe bose hamwe 2.000.000 Frw y’indishyi z’uko batakaje abaguzi babo, bivuga ko buri wese yagenewe 500.000 Frw y’indishyi, Urukiko rurasanga rero batahabwa 8.000.000 Frw y’indishyi zijyanye n’uko batakaje abaguzi basaba mu bujurire bwuririye ku bundi kuko nta kimenyetso barushyikirije kigaragaza ko 2.000.000 Frw bagenewe mbere ari make. 2. Kumenya niba Mujejende Béata na bagenzi be bahabwa indishyi z’akababaro [54] Me Mukabibi Fatuma wunganira Mujejende Béata na bagenzi be avuga ko batanze ubujurire bwuririye ku bundi kugira ngo Faida Amur Sultan ahe buri wese 5.000.000 Frw y’indishyi z’akababaro, aho kuba 1.000.000 Frw buri wese yagenewe mu rwego rwa mbere

## Page 15

kubera ko bakomeje guterwa akababaro n’ibikorwa yabakoreye byo kubavana mu iduka bakoreragamo. [55] Me Kayitare Serge na Me Uwamungu JMV bunganira Faida Amur Sultan bavuga ko ataha Mujejende Béata na bagenzi be indishyi z’akababaro basaba ko nta gikorwa cye cyabangirije. UKO URUKIKO RUBIBONA [56] Dosiye igaragaza ko Urukiko Rukuru rw’Ubucuruzi rwategetse Faida Amur Sultan guha Mujejende Béata na bagenzi be 1.000.000 Frw y’indishyi z’akababaro kuri buri wese, bityo Urukiko rurasanga batahabwa indishyi z’akababaro basaba mu bujurire bwuririye ku bundi kuko izo bagenewe mbere ziri mu rugero rukwiye. 3.Kumenya niba Mujejende Béata na bagenzi be basubira mu iduka bacururizagamo [57] Me Mukabibi Fatuma wunganira Mujejende Béata na bagenzi be avuga ko Urukiko Rukuru rw’Ubucuruzi rwemeje ko batasubira mu iduka bacururizagamo ngo kuko amasezerano y’ubukode yarangiye kuwa 17/04/2014, rwirengagiza ko Faida Amur Sultan yabavukije uburenganzira bwo kurikoreramo, ko kandi abagiranye ayo masezerano bagifite ubushake bwo kuyongera kugira ngo bazakomeze kuricururizamo. [58] Me Kayitare Serge na Me Uwamungu JMV bunganira Faida Amur Sultan bavuga ko Urukiko rw’Ikirenga rutategeka ko Mujejende Béata na bagenzi be basubizwa mu iduka bacururizagamo kubera ko atari iry’umuryango wa Rwasibo Jean Baptiste, ko ahubwo ari irye nk’uko byasobanuwe haruguru. UKO URUKIKO RUBIBONA [59] Urukiko rurasanga nk’uko n’Urukiko Rukuru rw’Ubucuruzi rwabyemeje, Mujejende Béata na bagenzi be batasubira mu iduka bacururizagamo kuko amasezerano y’ubukode bwaryo bari baragiranye na Kayitesi Françoise afatanyije na Kayirere Marie Grâce yarangiye kuwa 17/04/2014, bigaragara rero ko kuva kuri iyo tariki batari bagifite ububasha bwo kuburana iryo duka. 4. Kumenya niba Faida yategekwa guha Mujejende 1.750.000 Frw n’inyungu zayo [60] Me Mukabibi Fatuma wunganira Mujejende Béata avuga ko atanze ubujurire bwuririye ku bundi kugira ngo Faida Amur Sultan ategekwe kumuha 1.750.000 Frw yasize mu iduka yacururizagamo hiyongereyeho n’inyungu zayo zibariwe kuri 75% kuko Faida Amur Sultan yatwaye ayo mafaranga bikamuteza igihombo, yose hamwe akaba 2.887.500 Frw. [61] Me Kayitare Serge avuga ko Faida Amur Sultan ataha Mujejende 1.750.000 Frw n’inyungu zayo kuko nta kimenyetso yatanze kigaragaza ko yayasize mu iduka yakoreragamo. UKO URUKIKO RUBIBONA

## Page 16

[62] [61] Ingingo ya 9, igika cya mbere y’Itegeko n° 21/2012 ryo kuwa 14/06/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Urega agomba kugaragaza ibimenyetso by’ibyo aregera. Iyo abibuze, uwarezwe aratsinda”. [63] [Naho ingingo ya 3 y’Itegeko 15/2004 ryo kuwa 12/06/2004 ryerekeye ibimenyetso mu manza n’itangwa ryabyo, igateganya ko “Buri muburanyi agomba kugaragaza ukuri kw’ibyo aburana”. [64] Ku birebana n’uru rubanza, muri dosiye kuri kote ya 98 hari inyandiko yo kuwa 07/09/2013 igaragaza ko Nshonga Médiatrice yishyuye Mujejende Béatrice amafaranga 1.750.000. [65] Hashingiwe ku ngingo z’amategeko zimaze kuvugwa haruguru, Urukiko rurasanga Faida Amur Sultan ataha Mujejende ayo mafaranga n’inyungu zayo kuko ikimenyetso yatanze kigizwe n’inyandiko yo kuwa 07/09/2013 yavuzwe haruguru kitagaragaza mu buryo budashidikanywaho ko Mujejende yasize ayo mafaranga mu iduka bacururizagamo nk’uko byemejwe n’Urukiko Rukuru rw’Ubucuruzi. 5.Kumenya niba Faida yategekwa kwishyurira Hatibu Sani inyungu z’ubukererwe zikomoka ku mwenda abereyemo AGASEKE Bank [66] Me Mukabibi Fatuma wunganira Hatibu Sani avuga ko atanze ubujurire bwuririye ku bundi kugira ngo Faida Amur Sultan amwishyurire 298.392 Frw y’inyungu zikomoka ku mwenda yagurijwe n’AGASEKE Bank bitewe n’uko yafunze iduka yacururizagamo bituma atawishyura akoresheje amafaranga yavanaga mu bucuruzi bwe, nyamara yakomeje kuwishyura akoresheje amafaranga y’abandi agenda afata hirya no hino kugira ngo atazitwa bihemu bigatuma inzu ye itezwa cyamunara, ariko ko umubare nyawo w’izo ndishyi uzagaragazwa n’iyo Banki imaze kuzimubarira. [67] Me Kayitare Serge na Me Uwamungu JMV bunganira Faida Amur Sultan bavuga ko atakwishyurira Hatibu Sani inyungu z’umwenda afitiye AGASEKE Bank kubera ko nta kosa yamukoreye ryatumye atishyura inguzanyo yahawe. UKO URUKIKO RUBIBONA [68] Dosiye igaragaza ko Hatibu Sani yagenewe indishyi zinyuranye zavuzwe haruguru zirimo n’iz’igihombo yatewe no kubura ibicuruzwa bye, Urukiko rurasanga rero rutategeka Faida Amur Sultan kumwishyurira amafaranga y’inyungu akomoka ku mwenda yagurijwe na AGASEKE Bank. 6. Kumenya niba Faida yategekwa guha Mujejende Béata na bagenzi be amafaranga y’ikurikiranarubanza n’igihembo cya Avoka [69] Me Mukabibi Fatuma wunganira Mujejende Béata na bagenzi be avuga ko batanze ubujurire bwuririye ku bundi basaba ko Faida Amur Sultan abaha 5.000.000 Frw y’ikurikiranarubanza n’igihembo cya Avoka, aho kuba 2.800.000 Frw bagenewe mbere kubera ko yajuriye bituma bongera gushaka avoka wo kubaburanira.

## Page 17

[70] Me Kayitare Serge na Me Uwamungu JMV baburanira Faida Amur Sultan bavuga ko ataha Mujejende Béata na bagenzi be amafaranga y’ikurikiranarubanza n’igihembo cya Avoka basaba kuko atariwe wabakuruye mu manza, ko ahubwo aribo bamureze mu rwego rwa mbere. UKO URUKIKO RUBIBONA [71] Urukiko rurasanga Faida Amur Sultan ataha Mujejende Béata na bagenzi be amafaranga y’ikurikiranarubanza n’igihembo cya Avoka yo kuri uru rwego basaba kubera ko hari ibyo atsindiye muri uru rubanza. 7. Kumenya niba Faida yacibwa igihano kimuhatira kurangiza urubanza [72] Me Mukabibi Fatuma wunganira Mujejende Béata na bagenzi be avuga ko batanze ubujurire bwuririye ku bundi kugira ngo Faida Amur Sultan ahe buri wese kandi buri kwezi 1.000.000 Frw y’igihano kimuhatira kurangiza urubanza kuko byagaragaye ko atinza irangizwa ryarwo. [73] Me Kayitare Serge na Me Uwamungu JMV bunganira Faida Amur Sultan bavuga ko atacibwa icyo gihano kuko nta kosa yakoreye Mujejende Béata na bagenzi be. UKO URUKIKO RUBIBONA [74] Urukiko rurasanga Faida Amur Sultan atacibwa igihano kimuhatira kurangiza uru rubanza kuko nta kimenyetso Mujejende Béata na bagenzi be batanze kigaragaza ko atazarangiza uru rubanza ku neza. C. Kumenya niba ubujurire bwuririye ku bundi bwatanzwe na Kayitesi na Kayirere bufite ishingiro 1. Kumenya niba Faida yaha Kayitesi na Kayirere indishyi z’akababaro basaba [75] Me Nzirabatinyi Fidèle uhagarariye Kayitesi Françoise na Kayirere Marie Grâce avuga ko batanze ubujurire bwuririye ku bundi kugira ngo Urukiko rw’Ikirenga rutegeke Faida Amur Sultan kubaha 3.000.000 Frw y’indishyi z’akababaro batahawe n’Urukiko Rukuru rw’Ubucuruzi, kandi rwari rwemeje ko nta ruhare bagize mu gikorwa cyakozwe na Faida Amur Sultan cyo kuvana abakodesha babo mu iduka bacururizagamo. [76] Faida Amur Sultan n’abamwunganira bavuga ko ataha Kayitesi Françoise na Kayirere Marie Grâce indishyi z’akababaro basaba kubera ko nta gikorwa yabakoreye cyabangirije bitewe n’uko batari ba nyir’iduka Mujejende Béata na bagenzi be bakodeshaga. UKO URUKIKO RUBIBONA [77] Urukiko rurasanga Faida Amur Sultan ataha Kayitesi Françoise na Kayirere Marie Grâce indishyi z’akababaro basaba mu bujurire bwuririye ku bundi kuko nta kimenyetso batanze kigaragaza ko igihe Mujejende na bagenzi be bavanwaga mu iduka bacururizagamo bari bararitsindiye mu buryo budasubirwaho.

## Page 18

2. Kumenya niba Faida yaha Kayitesi na Kayirere amafaranga y’ikurikiranarubanza, ay’igihembo cya Avoka n’ay’irangizarubanza basaba [78] Me Nzirabatinyi Fidèle uhagarariye Kayitesi Françoise na Kayirere Marie Grâce avuga ko batanze ubujurire bwuririye ku bundi kugira ngo Urukiko rw’Ikirenga rutegeke Faida Amur Sultan kubaha amafaranga 3.000.000 akubiyemo ay’ikurikiranarubanza, ay’igihembo cya Avoka n’ay’irangizarubanza yo mu Rukiko rw’Ikirenga yiyongera kuyo bagenewe mbere. [79] Faida Amur Sultan n’abamwunganira bavuga ko ataha Kayitesi Françoise na Kayirere Marie Grâce izo ndishyi basaba kubera ko atariwe wabashoye mu manza kuko barezwe hamwe mu rwego rwa mbere. UKO URUKIKO RUBIBONA [80] Ku birebana n’amafaranga y’ikurikiranarubanza n’igihembo cya Avoka, Urukiko rurasanga Faida Amur Sultan ataha Kayitesi Françoise na Kayirere Marie Grâce ayo mafaranga kuko buri ruhande rufite ibyo rwatsindiye n’ibyo rwatsindiwe muri uru rubanza. [81] Ku bijyanye n’amafaranga y’irangizarubanza, Urukiko rurasanga Faida Amur Sultan ataha Kayitesi Françoise na Kayirere Marie Grâce ayo mafaranga kuko nta rubanza afitanye nabo rwo kurangiza. III. ICYEMEZO CY’URUKIKO [82] Rwemeje ko ubujurire bwatanzwe na Faida Amur Sultan bufite ishingiro kuri bimwe; [83] Rwemeje ko ubujurire bwuririye ku bundi bwatanzwe na Mujejende Béata na bagenzi be nta shingiro bufite; [84] Rwemeje ko ubujurire bwuririye ku bundi bwatanzwe na Kayitesi Françoise na Kayirere Marie Grâce nta shingiro bufite; [85] Ruvuze ko urubanza RCOMA 0183/14/HCC rwaciwe n’Urukiko Rukuru rw’Ubucuruzi kuwa 03/06/2014 ruhindutse kuri bimwe; [86] Rutegetse Faida Amur Sultan guha Mujejende na bagenzi be indishyi mu buryo bukurikira: -Mujejende Béata agahabwa 7.263.000 Frw ahwanye n’agaciro k’ibicuruzwa bye, 1.452.600 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 10.915.600 Frw. -Hatibu Sani agahabwa 5.786.500 Frw ahwanye n’agaciro k’ibicuruzwa bye, 1.157.300 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 9.143.800 Frw.

## Page 19

-Rukundo Abdoulahman agahabwa 10.492.000 Frw ahwanye n’agaciro k’ibicuruzwa bye, 2.098.400 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 14.790.400 Frw. -Umutesi Mariam 15.332.000 Frw ahwanye n’agaciro k’ibicuruzwa bye, 3.066.400 Frw y’indishyi z’igihombo yagize, 500.000 Frw y’indishyi zo gutakaza abaguzi, 700.000 Frw y’ikurikiranarubanza n’igihembo cya Avoka na 1.000.000 Frw y’indishyi z’akababaro, yose hamwe akaba 20.598.400 Frw. [87] Rutegetse Kayitesi Françoise gufatanya na Kayirere Marie Grâce guha Mujejende Béata, Hatibu Sani, Umutesi Mariam na Rukundo Abdoulahman 4.844.444 Frw y’ubukode babahaye bakazayigabanira bakurikije ayo buri wese yari yarishyuye; [88] Rutegetse Faida Amur Sultan gutanga kimwe cya 1/2 cy’amagarama y’uru rubanza angana na 50.000 Frw, naho Kayitesi Françoise agafatanya na Kayirere Marie Grâce gutanga ikindi cya 1/2 cyayo, ni ukuvuga 50.000 Frw, yose hamwe akaba 100.000 Frw.