Re FENG

Re FENG

- Source: Amategeko - Section: Decisions (Judgements) - Date: 2022-07-06 - Case/document no.: RC 00013/2022/HC/KIG - Collection: High Court

Text

Page 1

Re FENG [Rwanda URUKIKO RUKURU - RC 00013/2022/HC/KIG (Ndahayo, P.J.) 06 Nyakanga 2022] Amategeko y’imiburunaishirize y’imanza – Imanza mbonezamubano – Ukuvuguruzanya kw’imanza zaciwe ku rwego rwa nyuma – Urukiko rufite ububasha bwo kuburanisha ikirego cyerekeye ukuvuguruzanya kw’imanza zaciwe ku rwego rwa nyuma - Ibibazo birebana n’ukuvuguruzanya kw’imanza zaciwe ku rwego rwa nyuma bigomba gukemurwa n’Urukiko rusanzwe ruca imanza ku rwego rwa nyuma ku birego bisanzwe. Incamake y’ikibazo: ku wa 27/04/2018 Feng yagiranye amasezerano y’ubugure bw’umutungo utimukanwa ugizwe n’inzu iri mu kibanza kibaruye kuri UPI 1/03/03/01/60 na Mugiraneza ntibahaita bakora ihererekanyamutungo nyuma uwagurishije yanga ko hakorwa iryo hererekanya bituma Feng ajya kumurega mu Rukiko Rwisumbuye rwa Nyarugenge asaba ko yakorerwa ihererekanyamutungo ku mutungo yaguze. Urukiko mu rubanza RC 00475/2020/TGI/NYGE rwemeje ko uwo umutungo wandikwa ku mazina ya Feng Zhigang wawuguze kandi uru rubanza rukaba rwarabaye itegeko. Agiye mu babishinzwe ngo hakorwe ihererekanyamutungo yatunguwe no kumenya amakuru ko uwo mutungo hari undi wawuguze ndetse nawe ufite urubanza narwo rwaciwe n’Urukiko rwisumbuye rwa Nyraugenge rw’uwitwa Ndayisaba nawe waguze uwo mutungo urukiko rukemeza ko awandikwaho mu rubanza RC 00532/2020/TGI/NYGE. Ibi nabyo byatumwe Feng atanga ikirego mu Rukiko Rukuru arusaba gukemura ikibazo

cyo kuvuguruzanya kiri hagati y’ibyemezo byafashwe mu rubanza N⁰ RC 00475/2020/TGI/NYGE, n’urubanza N⁰ RC 00532/2020/TGI/NYGE akanasaba ko Urukiko rwakwemeza ko uwo mutungo ariwe wakwandikwaho kuko ariwe wawuguze mbere dore ko yawuguze ku wa 27/04/2018 naho ndayisaba akawugura ku wa 14/10/2019. Ku kijyanye n’ububasha bw’uru rukiko mu gukemura icyo kibazo, avuga ko ngo hari imanza yiyambaje zigaragaza ko imanza zirimo ibyemezo bivuguruzanya ziregerwa urukiko rwisumbuye ku rwaruciye bityo Urukiko Rukuru akaba arirwo rufite ububasha. Ndayisaba we avuga ko agura ubwo butaka yabonaga nta kibazo bufite kuko hari icyangombwa cyabwo cy’umwimerere kandi ukaba utari waranatanzwe nk’ingwate muri banki iyariyo yose akaba yaragize ikibazo cy’uko Mugiraneza yanze kumukorera ihererekanyamutungo bigatuma atanga ikirego asaba ko yakorerwa iryo hererekanya. Urukiko rumaze kwemeza ko akorerwa ihererekanyamutungo yagiye ku murenge asanga uwo mutungo waratambamiwe. Akomeza asaba ko Urukiko rwakwemeza ko ariwe wakwandikwaho uwo mutungo kuko na Feng uvuga ko yawuguze mbere atawuguriye imbere ya Noteri. Incamake y’icyemezo: Ibibazo birebana n’ukuvuguruzanya kw’imanza zaciwe ku rwego rwa nyuma, bigomba gukemurwa n’Urukiko rusanzwe ruca imanza ku rwego rwa nyuma ku birego bisanzwe bityo Urukiko Rukuru rukaba rudafite ububasha bwo gukemura ikibazo cyo kuvuguruzanya kiri hagati y’ibyemezo byafashwe mu rubanza N⁰ RC 00475/2020/TGI/NYGE, n’urubanza N⁰ RC 00532/2020/TGI/NYGE. Nta bubasha Urukiko Rukuru rufite bwo kuburanisha ikirego RC 00013/2022/HC/KIG rwashyikirijwe na Feng.

Page 2

Nta mategeko yashingiweho: Imanza zifashishijwe: MININTCO Ltd na DRESOCECO Ltd n’undi, RCOM 00002/2019/SC rwaciwe n’Urukiko rw’Ikirenga ku wa 27/09/2019 Re Ndayisaba, RC 0008/2017/SC rwaciwe n’ Urukiko rw’Ikirenga ku wa 28/09/2018. Urubanza I. IMITERERE Y’URUBANZA [1] Feng Zhigang avuga ko yaguze umutungo utimukanwa ugizwe n’ikibanza UPI 1/03/03/01/60 giherereye mu Mudugudu wa Kagunga I, Akagari ka Kagunga, Umurenge wa Gikondo, Akarere ka Kicukiro, Umujyi wa Kigali. Kuva ubwo bugure bwaba kuwa 27/04/2018, kugeza uyu munsi ngo Mugiraneza Vincent ntiyigeze yemerera Feng Zhigang kumukorera ihererekanya ry’ubutaka (mutatiom), kuko buri gihe ngo aramurerega ntiyubahirize gahunda ubu hakaba hashize imyaka irenga ibiri yose yaraguze umutungo ariko akaba ntacyo yabasha kuwukoresha. [2] Akomeza avuga ko byabaye ngombwa ko atanga ikirego mu Rukiko Rwisumbuye rwa Nyarugenge gihabwa N⁰ RC 00475/2020/TGI/Nyge, Feng Zhigang akaba yaramuregaga asaba Urukiko kumutegeka gukora ihererekanya ry’umutungo yamugurishije, maze mu rubanza rwasomwe ku wa 30/12/2020, Urukiko rwemeza kandi rutegeka ko umutungo utimukanwa ufite UPI 1/03/03/01/60, wandukurwa ku mazina ya Mugiraneza Vincent, ukandikwa ku mazina ya Feng Zhigang wawuguze, kandi uru rubanza rukaba rwarabaye itegeko. [3] Yakomeje avuga ko yatunguwe no kumenya ko uriya mutungo waguzwe n’undi muntu witwa Ndayisaba Emmanuel kandi uyu nawe akaba

yaraburanye mu Rukiko Rwisumbuye rwa Nyarugenge mu rubanza RC 00532/2020/TGI/Nyge rwasomwe kuwa 06/05/2021 hakemezwa ko ubutaka bubaruye kuri UPI 1/03/03/01/60 bwanditse kuri Mugiraneza Vincent bwandikwa kuri Ndayisaba Emmanuel Kazungu. Ibi rero ngo bikaba bisobanuye ko uyu mutungo ubaruye kuri UPI 1/03/03/01/60, uherereye mu Mudugudu wa Kagunga I, Akagali ka Kagunga, Umurenge wa Gikondo, Akarere ka Kicukiro, Umujyi wa Kigali wagurishijwe abantu babiri, kandi bikaba bigaragarira buri wese ko ibi byemezo byafashwe mur’izi manza zombi twavuze haruguru zaciwe n’Urukiko rumwe zivuguruzanya mu buryo budasubirwaho; kandi ibi byemezo byombi bikaba byarafashwe hashingiwe ku kiburanwa kimwe kandi bikaba bishobora no guteza ikibazo ku irangizwa ryabyo. [4] Feng Zhigang rero arasaba urukiko Rukuru gukemura ikibazo cyo kuvuguruzanya kiri hagati y’ibyemezo byafashwe mu rubanza N⁰ RC 00475/2020/TGI/NYGE, n’urubanza N⁰ RC 00532/2020/TGI/NYGE. [5] Ikigomba gusuzumwa muri uru rubanza ni ukumenya niba Urukiko Rukuru rufite ububasha bwo gukemura ikibazo cy’ivuguruzanya ry’imanza

Page 3

II. ISESENGURA [6] Me Ndoba Augustin uhagarariye Feng Zhigang avuga ko Feng Zhigang ku itariki ya 27/04/2018 Feng Zhigang yagiranye amasezerano y’ubugure bw’umutungo utimukanwa na Mugiraneza Vincent, uwo mutungo ukaba ugizwe n’inzu iri mu kibanza kibaruye kuri UPI 1/03/03/01/60, giherereye mu Mudugudu wa Kagunga I, Akagali ka Kagunga, Umurenge wa Gikondo, Akarere ka Kicukiro, Umujyi wa Kigali; Akomeza avuga ko Mugiraneza Vincent yanze gukorera Feng Zhigang ihererekanya ry’umutungo (Mutation), maze biba ngombwa ko uyu amurega mu Rukiko Rwisumbuye rwa Nyarugenge, ikirego gihabwa n⁰ RC 00475/2020/TGI/Nyge, Feng Zhigang akaba yaramuregaga asaba Urukiko kumutegeka gukora ihererekanya ry’umutungo yamugurishije, maze mu rubanza rwasomwe kuwa 30/12/2020, Urukiko rwemeza kandi rutegeka ko umutungo utimukanwa ufite UPI 1/03/03/01/60, wandukurwa ku mazina ya Mugiraneza Vincent, ukandikwa ku mazina ya Feng Zhigang wawuguze, kandi uru rubanza rukaba rwabaye itegeko; [7] Me Ndora Augustin uhagarariye Feng Zhigang akomeza avuga ko urubanza RC 00475/2020/TGI/Nyge rwabaye ndakuka, hashingiwe ko rwashyizweho inyandikompuruza (Formule exécutoire) kuko rutigeze rujuririrwa ngo rukurweho n’ikindi cyemezo cy’Urukiko ariko ngo igitangaje n’uko mu gihe Feng Zhigang yari atangiye inzira z’uko uriya mutungo umwandikwaho hashingiwe ku cyemezo cy’urukiko cyavuzwe haruguru, yatunguwe no kumenya ko uriya

mutungo waguzwe n’undi muntu witwa Ndayisaba Emmanuel, nabyo bikaba byaremejwe n’Urukiko Rwisumbuye rwa Nyarugenge mu rubanza RC 00532/2020/TGI/Nyge rwasomwe kuwa 06/05/2021, rukaba rwarategetse ko ubutaka bubaruye kuri UPI 1/03/03/01/60 bwanditse kuri Mugiraneza Vincent bwandikwa kuri Ndayisaba Emmanuel Kazungu, bisobanuye ko uwo mutungo ubaruye kuri UPI 1/03/03/01/60 wagurishijwe abantu babiri, kandi bikaba bigaragarira buri wese ko ibi byemezo byafashwe muri izi manza zombi zaciwe n’Urukiko rumwe zivuguruzanya mu buryo budasubirwaho, kandi ibi byemezo byombi bikaba byarafashwe hashingiwe ku kiburanwa kimwe kandi bikaba bishobora no guteza ikibazo ku irangizwa ryabyo. [8] Feng Zhigang ashingiye ko kuwa 27/04/2018 aribwo yaguze uriya mutungo kandi aregera Urukiko Rwisumbuye rwa Nyarugenge asaba gukorerwa ihererekanya mutungo, urubanza rucibwa kuwa 30/12/2020, ashingiye ko ibi byombi yabikoze mbere y’uko Ndayisaba Emmanuel Kazungu abikora, kuko we yaguze uriya mutungo ari kuwa 14/10/2019, kandi mu kirego yatanze asaba Urukiko ko akorerwa ihererekanya mutungo, rwaciwe kuwa 06/05/2021, bityo rero izo mpamvu zose cyane cyane kuba biriya byemezo byombi bivuguruzanya, zikaba arizo Feng Zhigang aheraho asaba Urukiko Rukuru gutegeka ko urubanza RC 00532/2020/TGI/Nyge rwaciwe n’Urukiko Rwisumbuye rwa Nyarugenge kuwa 06/05/2021 ruvanwaho, maze hakazarangizwa icyemezo cyafashwe mu

rubanza RC 00475/2020/TGI/Nyge rwaciwe n’Urukiko Rwisumbuye rwa Nyarugenge kuwa 30/12/2020, kuko rwamaze kuba itegeko nk’uko biteganywa n’Ingingo ya 242 (Al.1) yo mu Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, aho iteganya ko Inyandikompuruza ari ikimenyetso kigaragaza ko ibyemejwe mu nyandikompesha zavuzwe mu ngingo ya 241 y’iri tegeko bishobora guhita bishyirwa mu bikorwa ku neza cyangwa ku ngufu za Leta.” [9] Ndayisaba Emmanuel nawe wahamagajwe muri uru rubanza avuga ko kuwa 14/10/2019 yagiranye amasezerano y'ubugure bw’ubutaka burimo inzu na Mugiraneza Vincent bubaruye kuri

Page 4

UPI: 1/03/03/01/60 buherereye mu mudugudu wa Kagunga I, Akagarai ka Kagunga, Umurenge wa Gikondo Akarere ka Kicukiro, ku mafaranga miliyoni 25,000,000Frw hatangwa 24,000,000Frw asigaye ngo bumvikana ko asigaye azatangwa igihe cyo gukora ihererekanya (Mutation) nk’uko bigaragara mu masezerano y’ubugure. Akomeza avuga Igihe bahanye cyageze aramuhamagara bahana umunsi n’isaha ngo aze amukorere ihererekanyamutungo ariko ngo arategereza ntiyaza ndetse ntiyafata na Telephone, akaba ngo yaragizengo ni ibibazo yahuye nabyo ariko aza gutungurwa no kubona ko icyo agamije ari ugukomeza kumurerega kuko ngo yakomeje kumuhamagara yanga kumwitaba bigatuma afata icyemezo cyo gutanga ikirego mu rukiko Rwisumbuye rwa Nyarugenge ikirego gihabwa Nº RC 00532/2020/TGI/NYGE urubanza rucibwa kuwa 06/05/2021 rutegeka ko ubutaka bubaruye kuri UPI: 1/03/03/01/60 bwanditse kuri Mugiraneza Vincent bwandikwa kuri Ndayisaba Emmanuel Kazungu. [10] Akomeza avuga ko urubanza rwabaye itegeko rushyirwaho inyandiko mpuruza, nyuma y’igihe ngo aza kumenya ko hari undi witwa Feng Zhigang waguze uwo mutungo kandi nawe wamaze kurega asaba ko uwo mutungo umwandikwaho nkuko yabisobanuye mu kirego cye. [11] Yakomeje avuga ko Feng Zhigang agura uyu mutungo nta cyangombwa cy’umutungo cy’umwimerere (Originale) yahawe n’amasezerano ye y’ubugure akaba atarabereye imbere ya Notaire w’ubutaka bivuze ko nta gaciro yahabwa kandi

ko ngo ubugure bw’uwo mutungo ufite UPI: 1/03/03/01/60 ku ruhande rwa Ndayisaba Emmanuel Kazungu bwabaye ugurisha n’ugura bahibereye kandi n’icyangombwa cy’umutungo ugurishwa cy’umwimerere gihari (Original) kandi akaba yarakorewe imbere ya Notaire, akomeza avuga ko ngo uyu wiyita ko yawuguze nta tambama yigeze awushyiraho nk’umuntu wari waguze ntahabwe icyangombwa cyawo cy’umwimerere. [12] Ndayisaba Emmanuel akomeza avuga ko ngo akora amasezerano y’ubugure umutungo nta kibazo na kimwe wari ufite haba gutambamirwa ngo nta mwenda w’imisoro ya RRA wari uhari ndetse no muri Bank ngo ntabwo wari waratanzweho ingwate, akaba asanga Feng Zhigang ntaho yahera avuga ko ariwe ugomba kwegukana umutungo kuko ibyo ashingiraho bigaragara ko nta kuri kurimo, ikindi ngo amasezerano y’ubugure ya Feng Zhigang yabo agaragaraho amafaranga make cyane kuko urebye ingano y’umutungo wagurishwaga ngo ntaho uhuriye n’amafaranga bawuguze. Ikindi ibimenyetso Feng Zhigang yatanze asaba ko umutungo umwandikwaho ngo ni za kopi gusa zitagira umwimerere bityo rero ngo akaba asaba ko iki kirego kitakwakirwa ngo kiburanishwe. [13] Nyuma yo kuburanisha Urukiko Rukuru rwasanze ari ngombwa ko rwongera gupfundurwa kugirango ababuranyi bagire icyo bavuga ku bubasha bw’uru Rukiko Rukuru ku bijyanye no gukemura ikibazo cy’ivuguruzanya mu manza. [14] Mw’iburanisha ryabaye ku wa 28/6/2022 Feng Zhigang ahagarariwe na Me

Ndoba Augustin yasobanuye ko ku bijyanye n’ububasha bw’Urukiko Rukuru mu gucyemura ikibazo cy’ivuguruzanya hagati y’imanza ngo hari imanza yiyambaje zigaragaza ko imanza zirimo ibyemezo bivuguruzanya ziregerwa urukiko rwisumbuye ku rwaruciye akomeza avuga ko yumva urubanza rureba uwo yunganira arirwo rugomba kugumaho kuko arirwo rwaciwe mbere ndetse ngo n’amasezerano y’ubuguru akaba ariyo yakozwe mbere y’ayakozwe na Ndayisaba Emmanuel. [15] Ndayisaba Emmanuel we avuga ko agura buriya butaka yabonaga nta tegeko rimubuza kugura kuko butari butambamiwe kandi ngo bamuhaye n’ icyangombwa cy’ ubutaka akomeza

Page 5

avuga ko ajya gutanga ikirego yagiye ku murenge kubaza ibijyanye na Mutation bamubwira ko ubutaka butambamiye ngo nibwo yatanze ikirego asaba mutation. [16] Ndayisaba Emmanuel akomeza avuga ko Mugiraneza bavuganye akamubaza impamvu umushinwa yatwaye ubwo butaka akambwira ko bakoranaga ko ari amafaranga yamuhaye akamuha ubutaka kandi ko atararangiza kumwishyura noneho ngo ageze mu kigo cy’ ubutaka nibwo bamubwiye ko hari undi muntu wabutsindiye, akomeza avuga ko agura nta mategeko yishe agaragara III.

UKO URUKIKO RUBIBONA [17] Urukiko Rukuru rurasanga uru rubanza rwerekeranye n’ibibazo birebana n’ukuvuguruzanya kw’imanza zaciwe ku rwego rwa nyuma n’Urukiko Rwisumbuye rwa Nyarugenge, izo manza zikaba ari urubanza RC 00532/2020/TGI/Nyge rwasomwe kuwa 06/05/2021, rukaba rwarategetse ko ubutaka bubaruye kuri UPI 1/03/03/01/60 bwanditse kuri Mugiraneza Vincent bwandikwa kuri Ndayisaba Emmanuel Kazungu ndetse n’urubanza RC 00475/2020/TGI/Nyge rwasomwe ku wa 30/12/2020, Urukiko Rwisumbuye rwa Nyarugenge rwategetsemo ko umutungo utimukanwa ubaruye kuri UPI 1/03/03/01/60, wandukurwa ku mazina ya Mugiraneza Vincent, ukandikwa ku mazina ya Feng Zhigang wawuguze. [18] Urukiko Rukuru rurasanga rudafite ububasha bwo kuburanisha iki kirego cyerekeye ivuguruzanya ry’imanza kuko ubwo bubasha bwahawe Urukiko Rukuru hashingiwe ku byemejwe mu rubanza Nº RCOM 00002/2019/SC rwaciwe n’Urukiko rw’Ikirenga ku wa 27/09/2019 muri urwo rubanza uwaregaga akaba ari MININTCO Ltd, mu izina ry’Umuyobozi wayo, abaregwa ari DRESOCECO Ltd, mu izina ry’Umuyobozi wayo, na UNITEX RWANDA Ltd, mu izina ry’Umuyobozi wayo, icyaburanwaga kikaba ari ugusaba Urukiko rw’Ikirenga gukemura ukuvuguruzanya kuri hagati y’imanza zaciwe ku rwego rwa nyuma n’Urukiko Rukuru rw’Ubucuruzi arizo Nº RCOMA 00194/2016/CHC/HCC na RCOMA 00236/2017/CHC/HCC. [19] Muri urwo rubanza Nº RCOM 00002/2019/SC Urukiko rw’Ikirenga rukaba

rwarasobanuye ko ibibazo birebana n’ukuvuguruzanya kw’imanza zaciwe ku rwego rwa nyuma, bigomba gukemurwa n’Urukiko rusanzwe ruca imanza ku rwego rwa nyuma ku birego bisanzwe, kubera ko ukuvuguruzanya kw’imanza ari ibibazo bisanzwe ugereranyije n’ububasha bwihariye bwasigaranywe n’Urukiko rw’Ikirenga. [20] Urwo rubanza rwashingiye ku murongo watanzwe muri rundi rubanza N° RC 0008/2017/SC rwaciwe kw’itariki ya 28/09/2018 aho Urukiko rw’Ikirenga rwaciye urubanza uwitwa Ndayisaba Protais yari yatanzemo ikirego kirebana n’ivuguruzanya ry’imanza rukemeza ko nta bubasha rufite kuri bene ibyo birego, ko bizajya bikemurwa n’Urukiko rw’Ubujurire IV. ICYEMEZO CY’URUKIKO [21] Rwemeje ko nta bubasha rufite bwo kuburanisha ikirego RC 00013/2022/HC/KIG rwashyikirijwe na Feng Zhigang.