GRILL INVESTMENTS v. RWANYAGATARE

# GRILL INVESTMENTS v. RWANYAGATARE

- Source: Amategeko - Section: Decisions (Judgements) - Date: 2015-07-10 - Case/document no.: RCOMAA 0046/14/CS - Collection: Supreme Court

## Text

## Page 1

GRILL INVESTMENTS v. RWANYAGATARE [Rwanda URUKIKO RW’IKIRENGA – RCOMAA 0046/14/CS (Mutashya, P.J., Munyangeri na Gakwaya, J.) 10 Nyakanga 2015] Amategeko agenga Urukiko rw’Ikirenga – Ububasha bw’Urukiko rw’Ikirenga – Gutsindwa ku mpamvu zimwe mu rwego rwa mbere n’urwa kabiri – Ubujurire ntibwaba mu bubasha bw’Urukiko rw’Ikirenga mu gihe umuburanyi yatsinzwe ku mpamvu zimwe mu rwego rwa mbere n’urwakabiri, Itegeko Ngenga n° 03/2012/OL ryo ku wa 13/6/2012 rigena imiterere, imikorere, n’ububasha by’Urukiko rw’Ikirenga,ingingo ya 28. Incamake y’ikibazo: Rwanyagatare Patrice ufite inzu ikorerwamo iby’amahoteli yakoranye amasezerano abiri na sosiyete yitwa GRILL INVESTMENT Ltd. Aya mbere yari yo gukodesha iyo Hotel ku giciro cya 10.000 USD ku kwezi na TVA ya 1.800 USD buri kwezi. Amasezerano ya kabiri yari ayo gukodesha ubusitani ku giciro cya 6.000 USD ku kwezi mu gihe cy’amezi atandatu, hanyuma ashyirwa kuri 10.000 USD. GRILL INVESTMENT Ltd yaje kurega Rwanyagatare Patrice mu Rukiko rw’Ubucuruzi rwa Nyarugenge ivuga ko bakoze amasezerano y’ubukode bw’inzu ikorerwamo iby’amahoteli ariko ntabareka ngo bakorere mu mudendezo. GRILL INVESTMENT ikaba isaba ko amasezerano yubahirizwa, inasaba indishyi. Rwanyagatare nawe yatanze ikirego muri uru Rukiko asaba ko amasezerano bakoranye yaseswa kuko GRILL INVESTMENT itayubahiriza. Urukiko rwemeza ko amasezerano ari GRILL INVESTMENT Ltd itayubahiriza, ruyitegeka kumwishyura 179.656 USD y’ubukode hatarimo indishyi. GRILL INVESTMENT Ltd ijurira mu Rukiko Rukuru rw’Ubucuruzi ivuga ko urukiko rubanza rwirengagije ko amasezerano yemewe impande zombi zagiranye ari amwe gusa, ntirwita ku bimenyetso bigaragaza ko ibikoresho bya Hotel byaguzwe. Urukiko rwemeje ko imikirize y’urubanza rwa mbere idahindutse cyeretse kubirebana n’indishyi. GRILL INVESTMENT Ltd yajuriye mu Rukiko rw’Ikirenga ivuga ko Urukiko Rukuru rwirengagije ibisobanuro n’ibimenyetso yarugaragarije, ikaba isaba indishyi z’ikurikiranarubanza. Rwanyagatare nawe yatanze ubujurire bwuririye kubwa GRILL INVESTMENT Ltd asaba indishyi zitandukanye. Uhagarariye Rwanyagatare avuga ko ubujurire bwa GRILL INVESTMENT Ltd butari mu bubasha bw’Urukiko rw’Ikirenga kuko yatsinzwe mu rwego rwa mbere n’urwa kabiri ku mpamvu zimwe, kubera ko muri izo nzego zose yaburanaga yemera gusa amasezerano y’ubukode bwa Hotel, ihakana amasezerano y’ubusitani ivuga ko itayemera kubera ko ayo masezerano atabereye imbere ya noteri, Rwanyagatare akaba asaba ko ubujurire bwayo butagomba kwakirwa. Uhagarariye GRILL INVESTMENT Ltd we akavuga ko n’ubwo kubijyanye n’amasezerano impamvu ari zimwe kuko inkiko zombi zemeje ko amasezerano ari abiri, avuga ko ubujurire buri mu bubasha bw’Urukiko rw’Ikirenga kubera ko ku birebana n’indishyi ndetse n’ibirarane urukiko rubanza rwageneye Rwanyagatare zitandukanye n’izo Urukiko Rukuru rw’Ubucuruzi rwamugeneye zingana na 135.993 USD, zikaba ziri hejuru ya 50.000.000 Frws zigena ububasha bw’Uru Rukiko.

## Page 2

Incamake y’icyemezo: 1. Kuba Urukiko rw’Ubucuruzi n‘Urukiko Rukuru rw’Ubucuruzi zivuga ko impande zombi zagiranye amasezerano abiri, amwe yerekeranye no gukodesha inzu, andi yerekeranye no gukodesha ubusitani, uwakodesheje ikaba itarubahirije ayo masezerano, ikaba igomba kuyiha indishyi z’igihombo yamuteye kubera kutubahiriza inshingano zayo zikomoka ku masezerano bagiranye, bivuze ko uwareze akaba yatsinzwe mu rwego rwa mbere n’urwa kabiri ku mpamvu zimwe. Ubujurire ntiburi mu bubasha bw’urukiko rw’ikirenga. Amagarama y’urubanza aherereye kuwareze. Amategeko yashingiweho Itegeko ngenga n° 03/2012/OL ryo kuwa 13/6/2012 rigena imiterere, imikorere, n’ububasha by’Urukiko rw’Ikirenga,ingingo ya 28, Itegeko nᵒ 21/2012 ryo ku wa 14/6/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo, n’iz’ubutegetsi,ingingo ya 9. Nta manza zifashishijwe Urubanza I. IMITERERE Y’URUBANZA [1] RWANYAGATARE Patrice afite inzu ikorerwamo iby’amahoteli. Kuwa 01/8/2012 yagiranye na GRILL Investments Ltd amasezerano abiri: aya mbere yo gukodesha iyo Hoteli yiswe “Agreement for compound rent (Scola App. Hotel)” bumvikana ko azajya yishyura 10.000 USD y’ubukode ku kwezi, na TVA ingana na 1.800 USD buri kwezi. Amasezerano ya kabiri yiswe “Agreement for compound rent” yagombaga kwishyurwa 6.000 USD ku kwezi mu gihe cy’amezi atandatu hanyuma ashyirwa kuri 10.000 USD. [2] GRILL Investments Ltd yaje gutanga ikirego mu Rukiko rw’Ubucuruzi rwa Nyarugenge, ivuga ko yakodesheje iyo Hoteli ariko ko RWANYAGATARE Patrice atareka ngo bakore mu mudendezo, agasaba ko amasezerano yubahirizwa, asaba n’indishyi. [3] RWANYAGATARE Patrice nawe yatanze ikirego muri urwo Rukiko, avuga ko GRILL Invest. Ltd itubahiriza amasezerano, agasaba ko yaseswa, akishyurwa ibirarane by’ubukode atahawe, n’izindi ndishyi zitandukanye. [4] Izo manza zombi zahurijwe hamwe (RCOM 0921/13/TC/NYGE- RCOM 1272/13/TC/NYGE), maze Urukiko mu kuzica rwemeza ko GRILL Investments Ltd ariyo itubahirije amasezerano y’ubukode yo kuwa 01/08/2012, ruyitegeka kwishyura RWANYAGATARE Patrice 179.656 USD y’ubukode atishyuwe, kandi igatanga n’indishyi za 1.000.000 Frw. Rwemeje kandi ko GRILL Investments Ltd isubizwa 21.507.000 Frw hamaze gukorwa ibarura ry’ibikoresho yahawe, ko nta rangizarubanza ry’agateganyo rigomba gukorwa.

## Page 3

[5] GRILL Investments Ltd yajuriye mu Rukiko Rukuru rw’Ubucuruzi kuri RCOMA 0227/14/HCC, ivuga ko Urukiko rwa mbere rwirengagije ko amasezerano yemewe impande zombi zagiranye ari amwe gusa, no kuba ngo Urukiko rutitaye ku bimenyetso bigaragaza ko ibikoresho byo muri Hoteli byaguzwe. [6] Mu guca urubanza, urwo Rukiko rwemeje ko imikirize y’urubanza rwa mbere idahindutse uretse ku birebana n’indishyi z’ikurikiranarubanza n’igihembo cya Avoka zingana na 800.000 Frw zahawe RWANYAGATARE Patrice, akiyongera kuri 1.000.000 Frw yahawe mu rwego rwa mbere, yose hamwe akaba 1.800.000 Frw. Rwemeje kandi ko 21.507.000 Frw yishyuwe ku bikoresho hamwe na 10.000 USD GRILL Investments Ltd yishyuye mu kwezi kwa gatanu 2014 itagomba kuyasubizwa, ahubwo agomba kuvanwa mu mwenda wa 179.656 USD ifitiye RWANYAGATARE Patrice, bivuze ko ishigaje kwishyura 135.993 USD. [7] GRILL Investments Ltd ntiyishimiye imikirize y’urwo rubanza, irujuririra mu Rukiko rw’Ikirenga, ivuga ko Urukiko Rukuru rwirengagije ibisobanuro n’ibimenyetso yarugaragarije, ikanasaba indishyi z’akababaro zo gusiragizwa mu manza nta mpamvu. [8] Mu gusubiza ku myanzuro ya GRILL Investments Ltd, RWANYAGATARE Patrice yatanze inzitizi yo kutakira ubujurire bwa GRILL Investments Ltd hashingiwe ku ngingo ya 28, igika cya 4 y’Itegeko Ngenga nᵒ 03/2012/OL ryo ku wa 13/6/2012 rigena imiterere, imikorere n’ububasha by’Urukiko rw’Ikirenga. RWANYAGATARE Patrice yatanze kandi ubujurire bwuririye ku bwa GRILL Investments Ltd, asaba indishyi zitandukanye. [9] Urubanza rwaburanishijwe mu ruhame ku wa 02/06/2015, Me RUTAGENGWA Jean Damascène aburanira GRILL Investments Ltd, naho Me NIYONDORA NSENGIYUMVA aburanira RWANYAGATARE Patrice. Kuri iyo tariki, Urukiko rwasuzumye gusa inzitizi yatanzwe na RWANYAGATARE Patrice. II. ISESENGURA RY’IKIBAZO KIGIZE URUBANZA Kumenya niba impamvu zatsinze GRILL Investments Ltd mu rwego rwa mbere n’urwa kabiri ari zimwe, bikaba byatuma ubujurire bwayo butaba mu bubasha bw’Urukiko rw’Ikirenga [10] Me NIYONDORA NSENGIYUMVA avuga ko ubujurire bwa GRILL Investments Ltd butari mu bubasha bw’Urukiko rw’Ikirenga kuko yatsinzwe mu rwego rwa mbere n’urwa kabiri kubera impamvu zimwe ndetse ingingo zaburanywe mu Rukiko rw‘Ibanze no mu Rukiko Rukuru rw’Ubucuruzi ari zimwe kandi GRILL Investments Ltd yazitsinzweho. [11] Me NIYONDORA NSENGIYUMVA asobanura ko ku rwego rwa mbere n’urwa kabiri, GRILL Investments Ltd yaburanye yemera gusa amasezerano y’ubukode bwa hoteli, igahakana amasezerano y’ubukode bw’ubusitani ivuga ko ayo masezerano atigeze abera imbere ya Noteri ndetse ko atigeze ashyirwa mu bikorwa. [12] Me NIYONDORA NSENGIYUMVA akomeza asobanura ko ku rwego rwa mbere n’urwa kabiri, Inkiko zasanze ayo masezerano yombi yarabayeho kandi atandukanye ndetse yarashyizwe mu bikorwa mu gihe cy’amezi atandatu. Yongeraho ko izo Nkiko zasanze kandi

## Page 4

GRILL Investments ariyo itubahirije amasezerano, zemeza ko amasezerano asheshwe ndetse ziyitegeka kwishyura ibirarane by’ubukode n’indishyi. [13] Me NIYONDORA NSENGIYUMVA asoza avuga ko kuba GRILL Investments Ltd yaratsinzwe ku rwego rwa mbere n’urwa kabiri kubera impamvu zimwe, asanga hashingiwe ku ngingo ya 28 y’Itegeko Ngenga nᵒ 03/2012/OL ryo ku wa 13/6/2012 rigena imiterere, imikorere n’ububasha by’Urukiko rw’Ikirenga, ubujurire bwayo butagomba kwakirwa. [14] Ku birebana n’ibiteganywa n’ingingo ya 28, igika cya 2, 7ᵒ y’Itegeko Ngenga nᵒ 03/2012/OL ryo ku wa 13/6/2012 ryavuzwe haruguru, Me NIYONDORA NSENGIYUMVA avuga ko muri iyo ngingo ivugwa, Umushingamategeko yagaragaje ibigomba gushingirwaho mu kugena ububasha bw’Urukiko rw’Ikirenga mu rwego rw’ubujurire bwa kabiri ariko mu gika cya 4 cy’iyo ngingo agashyiraho ‘‘exception‘‘, isobanura ko igihe cyose bigaragara ko Umucamanza wa mbere n’uwa kabiri bakemuye urubanza ku mpamvu zimwe, ababuranyi batagomba kujurira mu Rukiko rw’Ikirenga. [15] Me RUTAGENGWA Jean Damascène asubiza ko iyo nzitizi nta shingiro yahabwa kuko haburanywe ibintu bibiri, hanyuma imanza zihurizwa hamwe, ngo ku rwego rwa mbere, RWANYAGATARE Patrice yatsindiye 179.656 Usd, maze ku rwego rwa kabiri atsindira 153.593 Usd, bityo akaba asanga iyo aza gutsinda ku mpamvu zimwe ayo mafaranga ntabwo aba yarahindutse. [16] Me RUTAGENGWA Jean Damascène asobanura ko n’ubwo ku bijyanye n’amasezerano impamvu ari zimwe kuko Inkiko zombi zemeje ko amasezerano ari abiri, ariko ngo ku birebana n’indishyi ndetse n’ibirarane byasabwaga, izo Nkiko ntabwo zashingiye ku mpamvu zimwe kuko indishyi n’ibirarane Urukiko rubanza rwahaye RWANYAGATARE Patrice zitandukanye n’izo Urukiko Rukuru rw’Ubucuruzi rwamugeneye. [17] Me RUTAGENGWA Jean Damascène asoza avuga ko usibye n’ibyo, hashingiwe ku ngingo ya 28, igika ka 2, 7ᵒ y’Itegeko Ngenga nᵒ 03/2012/OL ryo ku wa 13/6/2012 ryavuzwe haruguru, ubujurire bwa GRILL Investments Ltd buri mu bubasha bw’Urukiko rw’Ikirenga kuko Urukiko Rukuru rw’Ubucuruzi rwageneye RWANYAGATARE Patrice indishyi zigana na 135.993 Usd, ziri hejuru ya 50.000.000 Frw zigena ububasha bw’uru Rukiko. UKO URUKIKO RUBIBONA [18] Ingingo ya 28, igika cya 5 y‘Itegeko Ngenga n° 03/2012/OL ryo ku wa 13/6/2012 rigena imiterere, imikorere, n’ububasha by’Urukiko rw’Ikirenga iteganya ko ‘‘ Icyakora, urubanza umuburanyi yatsinzwe ku rwego rwa mbere n’urwa kabiri ku mpamvu zimwe, ntirushobora kujuririrwa mu Rukiko rw’Ikirenga‘‘. [19] Urukiko rw’Ikirenga rurasanga impamvu z’urubanza zigomba kumvikana nk’ibisobanuro ku byabaye (motifs de fait) no ku bw‘amategeko (motifs de droit) Urukiko rwashingiyeho mu gufata icyemezo cyarwo1. 1 ‘’Les motifs sont des raisons de fait et de droit qui expliquent et justifient la décision’’, Loïc Cadiet, Droit judiciaire privé, 2e édition, Litec, Paris, 1998, P. 596. ‘’Les motifs ou la motivation constituent une partie du jugement par laquelle un juge indique les raisons de sa décision’’, MATADI NENGA GAMANDA, Droit judiciaire privé, Bruylant-

## Page 5

[20] Urukiko rw’Ikirenga rusanga ko impamvu nyamukuru yatumye GRILL Investments Ltd ijurira mu Rukiko Rukuru rw’Ubucuruzi, ku rubanza rwaciwe mu rwego rwa mbere n’Urukiko rw’Ubucuruzi ari iy’uko Urukiko ku rwego rubanza rwirengagije ko amasezerano yemewe impande zombi zagiranye ari amwe gusa no kuba rutitaye ku bimenyetso bigaragaza ko ibikoresho byo muri hoteli byaguzwe. [21] Ku birebana no kumenya niba impande zombi zaragiranye amasezerano abiri atandukanye, Urukiko rw’Ikirenga rusanga ko isuzumwa ry‘ibice bya 8, 10, 11 na 12 by’urubanza rwaciwe n’Urukiko rw’Ubucuruzi, igaragaza ko urwo Rukiko rwavuze ko GRILL Investments Ltd na RWANYAGATARE Patrice bagiranye amasezerano abiri, amwe akaba yerekeranye no gukodesha inzu (agreement for App. Hôtel), andi akaba yerekeranye no gukodesha ubusitani (agreement for Compound rent), ko n’ubwo GRILL Investments Ltd itemera amasezerano arebana no gukodesha ubusitani kubera ko atajyanywe kwa Noteri, ariko harebwe uko yishyuye ubukode kuva ku wa 1/8/2012 kugeza muri Mutarama 2013, bigaragara ko yishyuraga ubukode ku masezerano yombi ndetse ko ubusitani butandukanye na hoteli ubwayo, kuko biri mu bibanza bibiri bitandukanye n’ubwo byose ari iby’umuntu umwe. [22] Ku birebana no kumenya niba GRILL Investments Ltd yari yaguze ibikoresho byo muri hoteli, Urukiko rw’Ikirenga rusanga ko isuzumwa ry‘igice cya 17 cy’urubanza rwaciwe n’Urukiko rw’Ubucuruzi, igaragaza ko urwo Rukiko rwasanze ko ibivugwa na GRILL Investments Ltd by’uko yaguze ibyo bikoresho na RWANYAGATARE Patrice 21.507.000 Frw, atari byo kuko nta kimenyetso yigeze igaragaza ko babiguze koko. [23] Urukiko rw’Ikirenga rusanga ko mu gusubiza kuri ibyo bibazo mu rwego rw’ubujurire, ku birebana n’amasezerano yabaye hagati y’impande zombi, Urukiko Rukuru rw’Ubucuruzi rwavuze mu gace ka 6 k’urubanza rwarwo, ko ibimenyetso byatanzwe n’impande zombi bigaragaza ko habayeho amasezerano abiri, ko nta kintu kigaragaza ko hari amasezerano muri ayo yombi yaba yarateshejwe agaciro mu buryo ubwari bwo bwose. Rwavuze kandi ko mu bimenyetso byatanzwe n’ababuranyi uko ubwishyu bwatanze mu mezi atandatu abanza bigaragaza ko hatanzwe ubwishyu burenga ubwa ‘‘contrat‘‘ imwe kandi GRILL Investments Ltd ikaba itagaragaza impamvu yaba yaratumye itanga ubwishyu burenze ubwa ‘‘contrat‘‘ imwe muri icyo gihe. [24] Ku birebana n’ibikoresho byo muri hoteli, Urukiko rw’Ikirenga rusanga ko Urukiko Rukuru rw’Ubucuruzi rwavuze mu gace ka 9 k’urubanza rwarwo, ko nta masezerano y’ubugure bw’ibikoresho yigeze agaragazwa, bityo rushingiye ku ngingo ya 9 y’Itegeko nᵒ 21/2012 ryo ku wa 14/6/2012 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ntaho rwahera rwemeza ko ibyo bikoresho bya hoteli byagurishijwe kuko nta bimenyetso byabitangiwe. [25] Hashingiwe ku bisobanuro byatanzwe mu bika bibanziriza iki, Urukiko rw’Ikirenga rusanga ko Urukiko rw’Ubucuruzi n‘Urukiko Rukuru rw’Ubucuruzi, zombi zasobanuye ku birebana n’amasezerano, zivuga ko impande zombi zagiranye amasezerano abiri, amwe akaba yerekeranye no gukodesha inzu, andi akaba yerekeranye no gukodesha ubusitani ndetse ko ari GRILL Investments Ltd itubahirije ayo masezerano, ko nta kimenyetso kigaragaza ko habaye hagati y’impande zombi amasezerano y’ubugure bw’ibikoresho byo muri hoteli, kandi ko kuba Academia, Louvain-La-Neuve, 2006, P. 133.

## Page 6

ariyo itubahirije amasezerano bagiranye, igomba kwishyura RWANYAGATARE Patrice indishyi z’igihombo yamuteye kubera kutubahiriza inshingano zayo zikomoka ku masezerano bagiranye, bityo rukaba rusanga ko GRILL Investments Ltd yatsinzwe mu rwego rwa mbere n’urwa kabiri ku mpamvu zimwe. [26] Ku birebana n’ibivugwa na GRILL Investments Ltd by’uko itatsinzwe ku mpamvu zimwe mu rwego rwa mbere n’urwa kabiri kubera ko mu bujurire, Urukiko Rukuru rw’Ubucuruzi rwagabanyije indishyi RWANYAGATARE Patrice yari yagenewe n’Urukiko rw’Ubucuruzi, Urukiko rw’Ikirenga rusanga nta shingiro bifite kuko indishyi zisabwa n’umuburanyi zituruka ku ngaruka z‘uburenganzira yavukijwe2 ku buryo mu kuzihabwa Urukiko rugomba mbere na mbere kugaragaza impamvu yatuma mu byabaye (faits) no mu mategeko (droit) yaba azikwiriye. [27] Ku birebana n’ibivugwa na GRILL Investments Ltd by’uko hashingiwe ku ngingo ya 28, igika cya 2, 7ᵒ y’Itegeko Ngenga nᵒ 03/2012/OL ryo ku wa 13/6/2012 ryavuzwe haruguru3, ubujurire bwayo buri mu bubasha bw’Urukiko rw’Ikirenga kuko Urukiko Rukuru rw’Ubucuruzi rwageneye RWANYAGATARE Patrice indishyi zigana na 135.993 Usd, ziri hejuru ya 50.000.000 Frw zigena ububasha bw’uru Rukiko, bityo igika cya 5 cy’iyo ngingo kikaba kitagomba gukoreshwa muri uru rubanza, Urukiko rw’Ikirenga rusanga, ahubwo isuzumwa ry’igika cya 5 cy’ingingo ya 28 ryumvikanisha nta gushidikanya ko igihe cyose bigaragara ko ku rwego rwa mbere no ku rwego rwa kabiri, umuburanyi yatsinzwe ku mpamvu zimwe, iyo atanga ubujurire mu Rukiko rw’Ikirenga, uru Rukiko ntirushobora kuruburanisha kuko butari mu bubasha bwarwo n’ubwo ku rwego rwa kabiri haba haragenwemo n’Urukiko indishyi zingana nibura na miliyoni mirongo itanu z’amafaranga y’u Rwanda (50.000.000 Frw). [28] Kubera izo mpamvu zose, Urukiko rw’Ikirenga rurasanga hashingiwe ku ngingo ya 28, igika cya 5 y‘Itegeko Ngenga n° 03/2012/OL ryo ku wa 13/6/2012 ryavuzwe haruguru, ubujurire bwa GRILL Investments Ltd butari mu bubasha bwarwo. III. ICYEMEZO CY’URUKIKO [29] Rwemeje ko ubujurire bwatanzwe na GRILL Investments Ltd butari mu bubasha bw`Urukiko rw`Ikirenga. [30] Rutegetse GRILL Investments Ltd kwishyura amagarama y`uru rubanza angana na 100.000 Frw. 2 Dommages et intérêts: somme d’argent due à un créancier par le débiteur pour la réparation du dommage causé par l’inexécution, la mauvaise exécution ou l’exécution tardive de son obligation, et qui est en principe calculée de manière à compenser la perte subie et le gain dont il a été privé, Gérard Cornu, vocabulaire juridique, 6e édition, PUF, Paris, 1996, P. 295. 3 Ingingo ya 28, igika cya 2, 7ᵒ y’Itegeko Ngenga nᵒ 03/2012/OL ryo ku wa 13/6/2012 ryavuzwe haruguru iteganya ko ‘’Urukiko rw’Ikirenga rufite ububasha bwo kuburanisha mu rwego rw’ubujurire imanza zaciwe ku rwego rwa kabiri n’Urukiko Rukuru, Urukiko Rukuru rw’Ubucuruzi cyangwa Urukiko Rukuru rwa Gisirikare, iyo zagenwemo n’urukiko indishyi zingana nibura na miliyoni mirongo itanu z’amafaranga y’u Rwanda (50.000.000 Frw) cyangwa se zifite agaciro kagenwe n’umucamanza igihe habaye impaka, kangana nibura n’amafaranga y’u Rwanda miliyoni mirongo itanu (50.000.000 Frw)’’.