UBUSHINJACYAHA v. HABIYAREMYE

# UBUSHINJACYAHA v. HABIYAREMYE

- Source: Amategeko - Section: Decisions (Judgements) - Date: 2025-05-27 - Case/document no.: RPAA 00869/2024/CA - Collection: Court of Appeal

## Text

## Page 1

UBUSHINJACYAHA v. HABIYAREMYE [Rwanda URUKIKO RW’UBUJURIRE – RPAA 00869/2024/CA (Rutazana, P.J.) 27 Gicurasi 2025] Amategeko agenga imanza z’inshinjabyaha – Gucuruza cyangwa gukwirakwiza ibiyobyabwenge – Ibimenyetso – Mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge. Incamake y’ikibazo: Habiyaremye Sylvestre na Ntwari Hugues bakurikiranyweho n’Ubushinjacyaha icyaha cyo gucuruza ibiyobyabwenge byo mu bwoko bw’urumogi, bubaregera Urukiko Rwisumbuye rwa Ngoma busaba ko kibahama bagahanishwa igifungo cya burundu n’ihazabu ingana na 25.000.000 FRW kuri buri wese. Urwo Rukiko rwaciye urubanza rwemeza ko bombi bahamwa n’icyaha, rubahanisha igifungo cy’imyaka 25 n’ihazabu ingana na 21.000.000 FRW buri wese. Abaregwa bajuririye mu Rukiko Rukuru Urugereko rwa Rwamagana bavuga ko icyaha bakoze ari icyo kunywa urumogi basaba ko aricyo bahanirwa; Habiyaremye yongeraho ko bamusanganye agapfunyika 1 kandi akaba nta mafaranga yafatanywe agaragaza ko acuruza urumogi. Urukiko Rukuru, Urugereko rwa Rwamagana rwaciye urubanza rwemeza ko Ntwari ahamwa n’icyaha cyo kunywa ibiyobyabwenge byo mu bwoko bw’urumogi, rumuhanisha igifungo cy’umwaka1 rushingiye kukuba amakuru yaratanzwe n’umubyeyi we ko umwana we anywa urumogi, akanabereka aho arubika ndetse ko yaburanye abyemera ko arunywa. Naho Habiyaremye we ahamwa n’icyaha cyo gucuruza ibiyobyabwenge byo mu bwoko bw’urumogi, ariko rusanga akwiriye kugabanyirizwa igihano kuko ari ubwa mbere akurikiranyweho icyaha mu buryo buzwi kandi akaba yaraburanye acyemera akanagisabira imbabazi, rumuhanisha igifungo cy’imyaka 15 n’ihazabu ingana na10.000.000 FRW. Habiyaremye yajuririye mu Rukiko rw’Ubujurire asaba ko inyito y’icyaha yahamijwe ihinduka agahanirwa icyaha cyo kunywa ibiyobyabwenge byo mu bwoko bw’urumogi. Ku rundi ruhande Ubushinjacyaha buvuga ko ubujurire nta shingiro bufite kuko yafatanywe urumogi arucuruza, akaba abishinjwa na Ntwari Hugues n’abandi batangabuhamya kandi akaba yarabyemeye ubwo yaburanaga mu Rukiko Rwisumbuye. Incamake y’icyemezo: Mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi

## Page 2

bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge. Ubujurire nta shingiro bufite. Nta mategeko yashingiweho Imanza zifashishijwe: RPAA 00692/2021/CA; Ubushinjacyaha vs Ndayishimiye Jean Damascène rwaciwe n’Urukiko rw’Ubujurire ku wa 20/01/2023; RPAA 00408/2020/CA; Ubushinjacyaha vs Niyitegeka Augustin alias Niyirema rwaciwe n’Urukiko rw’Ubujurire ku wa 27/06/2022; RPAA 00582/2021/CA; Ubushinjacyaha vs Nyiraminani Julienne n’abandi rwaciwe n’Urukiko rw’Ubujurire ku wa 25/02/2025.

Urubanza I. IMITERERE Y’URUBANZA [1] Ku wa 06/09/2021 mu ma saa yine za mu gitondo (10h00), biturutse ku makuru yatanzwe n’umubyeyi wa Ntwari Hugues, uyu yafatanywe udupfunyika 3 tw’urumogi yaduhishe ku musego, abajijwe aho arukura avuga ko arugura na Habiyaremye Sylvestre, asaba abamufashe 300 FRW kugira ngo ajye kumuguraho akandi gapfunyika bityo babone ko ari we urumugurisha; ayo mafaranga barayamuhaye ajya kurugura kwa Habiyaremye Sylvestre, bombi bafatirwa mu cyuho arimo kumuha agapfunyika kamwe k’urumogi n’igipapuro cyo kurunywesha, bahita bashyikirizwa inzego z’ikurikiranacyaha. [2] Iperereza rirangiye, Ubushinjacyaha bwabareze mu Rukiko Rwisumbuye rwa Ngoma bubakurikiranyeho icyaha cyo gucuruza ibiyobyabwenge byo mu bwoko bw’urumogi, busaba ko kibahama bagahanishwa igifungo cya burundu n’ihazabu ingana na 25.000.000 FRW kuri buri wese. [3] Abaregwa bombi baburanye bemera icyaha, Ntwari Hugues asobanura ko ibyo Ubushinjacyaha bubarega ariko byagenze nta kindi yarenzaho uretse kubisabira imbabazi; avuga kandi ko Habiyaremye Sylvestre atari afite agapfunyika kamwe gusa ahubwo yari umucuruzi w‘urumogi; Habiyaremye Sylvestre nawe yemera ko yacuruzaga urumogi, asobanura ko yararuranguraga i Rwamagana k’uwitwa Shehe, ko ubwa mbere yaranguye udupfunyika 12, ubwa kabiri arangura udupfunyika 10 naho ubwa gatatu arangura udupfunyika 8 ari narwo yagurishijeho Ntwari Hugues; yavuze kandi ko uretse uyu hari n’abandi yagiye arugurisha, akaba abisabira imbabazi. [4] Mu rubanza RP 01297/2021/TGI/NGOMA rwaciwe n’Urukiko Rwisumbuye rwa Ngoma ku wa 29/09/2021, rushingiye ku buhamya bwa Niwebasa Cécile n’ubwa Nsengiyumva Emmanuel, kuri Raporo y‘inzego z’ibanze no kuba abaregwa bombi biyemerera icyaha bashinjwa

## Page 3

mu buryo buhura n’ibivugwa n’abo batangabuhamya, rwemeje ko bombi bahamwa n’icyaha cyo gucuruza urumogi, buri wese ahanishwa igifungo cy’imyaka 25 n’ihazabu ingana na 21.000.000 FRW. [5] Abaregwa bombi bajuririye Urukiko Rukuru, Urugereko rwa Rwamagana bombi bavuga ko icyaha bakoze ari icyo kunywa urumogi basaba ko aricyo bahanirwa; Habiyaremye Sylvestre yongeraho ko bamusanganye agapfunyika 1 kandi akaba nta mafaranga yafatanywe agaragaza ko acuruza urumogi. [6] Uhagarariye Ubushinjacyaha yaburanye avuga ko bujurire bwa Ntwari Hugues bufite ishingiro asaba ko ahamwa n’icyaha cyo kunywa urumogi ahaganishwa igifungo cy’imyaka 10 hashingiwe ku mpamvu nyoroshyacyaha z’uko ari munyeshuri, kuba yarafashwe hashize iminsi mike yujuje imyaka 18 kandi na mbere yo gukora icyaha akaba yari asanzwe yitwara neza; naho ubujurire bwa Habiyaremye Sylvestre uhagarariye Ubushinjacyaha yavuze ko nta shingiro bufite kuko Ntwari Hugues yahawe amafaranga akajya kugura urumogi iwe kandi akarumuha; cyakora asaba ko igihano yahanishijwe cyagabanywa agahanishwa igifungo cy’imyaka 15, kandi igihano cy‘ihazabu bahanishijwe kikagabanywamo kabiri kuri bombi. [7] Mu rubanza RPA 01268/2021/HC/RWG rwaciwe n‘Urukiko Rukuru, Urugereko rwa Rwamagana ku wa 26/07/2024, rwemeje ko Ntwari Hugues ahamwa n’icyaha cyo kunywa ibiyobyabwenge byo mu bwoko bw’urumogi, rumuhanisha igifungo cy’umwaka1, rushingiye ku mpamvu y’uko yafashwe biturutse ku makuru yatanzwe n’umubyeyi we wamenyesheje Ubuyobozi ko umwana we anywa urumogi akanabarangira aho arubika bajyayo bakaruhasanga kandi na Ntwari Hugues mu ibazwa rye mu Bugenzacyaha akaba yaremeye ko arunywa. [8] Ku bireba Habiyaremye Sylvestre, Urukiko Rukuru, Urugereko rwa Rwamagana rwasanze kuba ashinjwa na Ntwari Hugues ko ari we umugurisha urumogi anywa kandi akaba yarafashwe ari mu gikorwa cyo kurumugurisha, kuba inyandikomvugo y’ifatira ry’urumogi yashyizeho umukono yemera ko arufatanwe, no kuba Raporo y’inzego z’ibanze imushinja, ari ibimenyetso bigaragaza ko ahamwa n’icyaha cyo gucuruza ibiyobyabwenge byo mu bwoko bw’urumogi, rwemeza ko kimuhama ariko rusanga akwiriye kugabanyirizwa igihano kuko ari ubwa mbere akurikiranyweho icyaha mu buryo buzwi kandi akaba aburana acyemera akanagisabira imbabazi, rumuhanisha igifungo cy’imyaka 15 n’ihazabu ingana na10.000.000 FRW. [9] Habiyaremye Sylvestre yongeye kujurira mu Rukiko rw’Ubujurire, urubanza rwandikwa kuri RPAA 00869/2024/CA, ruburanishwa mu ruhame ku wa 06/05/2025 yunganiwe na Me Mukamazimpaka Marie Josée naho Ubushinjacyaha buhagarariwe na Sibomana Stanislas, Umushinjacyaha ku rwego rw’Igihugu. [10] Mu bujurire bwe Habiyaremye Sylvestre akomeza gusaba ko inyito y’icyaha yahamijwe ihinduka agahanirwa icyaha cyo kunywa ibiyobyabwenge byo mu bwoko bw’urumogi. [11] Uhagarariye Ubushinjacyaha avuga ko ubujurire bwa Habiyaremye Sylvestre nta shingiro bufite kuko yafatanywe urumogi arucuruza, akaba abishinjwa na Ntwari Hugues n’abandi batangabuhamya kandi akaba yarabyemeye ubwo yaburanaga mu Rukiko Rwisumbuye.

## Page 4

[12] Hashingiwe ku mpaka zagaragajwe haruguru, Urukiko rurasuzuma ikibazo cyo kumenya niba ibikorwa Habiyaremye Sylvestre yakoze bigize icyaha cyo kunywa ibiyobyabwenge byo mu bwoko bw’urumogi aho kuba icyaha cyo kubicuruza. II. ISESENGURA RY’IKIBAZO KIGIZE URUBANZA Kumenya niba ibikorwa Habiyaremye Sylvestre ashinjwa bigize cyo kunywa ibiyobyabwenge byo mu bwoko bw’urumogi aho kuba icyaha cyo kubicuruza. [13] Habiyaremye Sylvestre n’umwunganira bavuga ko mu rubanza rujuririrwa yahamijwe icyaha cyo gucuruza ibiyobyabwenge byo mu bwoko bw’urumogi nyamara atararucuruje, ahubwo urumogi yafatanywe ari urwo yari yaraye aguze hanyuma mu gitondo agiye guhinga ahura na Ntwari Hugues amubaza niba ntarwo yararanye ngo barusangire, nawe urwe baze kurusangira ahinguye, batangira kurutekera mu bipapuro abanyerondo bahita babafata, bajya no mu rugo rwe kureba niba nta rundi ruriyo bararubura. [14] Habiyaremye Sylvestre n’umwunganira bakomeza basobanura ko imvugo za Ntwari Hugues zidakwiriye gushingirwaho mu kumuhamya icyaha cyo gucuruza urumogi kuko yahisemo kumushinja ibinyoma mu rwego rwo kwirengera, kuko yari aziko uwo barugura atari bumubone; bavuga kandi ko intandaro y’uko kumushinja amubeshyera ari uko nawe (Habiyaremye Sylvestre) yigeze kumutanga yibye telefoni ya nyina; basoza basaba Urukiko kwemeza ko ahamwa n’icyaha cyo kunywa ibiyobyabwenge byo mu bwoko bw‘urumogi. [15] Uhagarariye Ubushinjacyaha avuga ko ubujurire bwa Habiyaremye Sylvestre nta shingiro bufite, kuko aburana mu Rukiko Rwisumbuye rwa Ngoma yemeye ko yakoze icyaha cyo gucuruza ibiyobyabwenge byo mu bwoko bw’urumogi, asobanura ko yari inshuro ya gatatu arurangura kandi ko yaruranguraga n’uwitwa Shehe, kandi akaba ashinjwa na Ntwari Hugues; kuba avuga ko yamushinje ibinyoma yirengera bikaba nta gaciro bikwiriye guhabwa kuko imvugo za Ntwari Hugues zishimangira ibyo Habiyaremye Sylvestre yiyemereye mu Rukiko akanabishinjwa n’abandi batangabuhamya bamufashe agurisha urwo rumogi Ntwari Hugues. Asoza asaba Urukiko kwemeza ko ahamwa n’icyaha cyo gucuruza urumogi kuko yafashwe arimo kurugurisha, kuba yarafatanywe agapfunyika kamwe nabyobikaba bidahindura inyito y’icyaha kuko n’ubundi urumogi rucuruzwa hifashishijwe agapfunyika (unité de commerce). UKO URUKIKO RUBIBONA [16] Impaka kuri iyi ngingo zishingiye ku kumenya niba ibikorwa Habiyaremye Sylvestre ashinjwa bigize icyaha cyo kunywa ibiyobyabwenge byo mu bwoko bw’urumogi aho kuba icyaha cyo kubicuruza. [17] Mu rubanza RPAA 00692/2021/CA rwaciwe ku wa 20/01/2023 haburana Ubushinjacyaha na Ndayishimiye Jean Damascène, Urukiko rw’Ubujurire rwasobanuye ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye, kandi ko Urukiko arirwo rwemeza ko ibyo bimenyetso

## Page 5

bishobora kwemerwa1. Uyu murongo washingiweho no mu zindi manza zaciwe n’uru Rukiko, mu ziheruka gucibwa harimo nk’urubanza RPAA 00946/2024/CA, rwaciwe ku wa 27/03/2025 haburana Ubushinjacyaha na Mukantwari Eugénie (igika cya 18). [18] Ibyerekeranye n’ibimenyetso by’ibikorwa biteganywa n’ingingo ya 263 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange yahinduwe n’ingingo ya 11 y’Itegeko Nº 69/2019 ryo ku wa 08/11/2019 byasobanuwe mu rubanza RPAA 00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin alias Niyirema (igika cya 18). Muri urwo rubanza Urukiko rw’Ubujurire rwasobanuye ko mu kwemeza niba ibiyobyabwenge uregwa yafatanywe atari ibyo kwikoreshereza ku giti cye (simple drug possession) ahubwo ari ibyo gucuruza cyangwa gukwirakwiza (drugs trafficking/drug distribution), hashingirwa ku bimenyetso bikurikira: kuba uregwa yafatanwa iminzani yabugenewe mu gupima, amasashe yifashishwa mu gupfunyikamo ibiyobyabwenge, amafaranga menshi bafatiye aho hantu, ahakoreshwa nk’ububiko, ubwinshi bw’ibiyobyabwenge basanze aho hantu, urujya n’uruza rw’abantu ahafatiwe ibiyobyabwenge, abatangabuhamya bemeza ko uwo muntu asanzwe acuruza ibiyobyabwenge, (…). Ibi bisobanuro byongeye kugarukwaho mu manza zitandukanye zaciwe n’uru Rukiko, mu ziheruka gucibwa harimo nk’urubanza RPAA 00386/2024/CA rwaciwe ku wa 29/01/2025 haburana Ubushinjacyaha na Nshimiyimana Sumayire (igika cya 15), n’urubanza RPAA 00343/2021/CA rwaciwe ku wa 24/02/2023 haburana Ubushinjacyaha na Uwemeyimana Joséph (igika cya 56). [19] Nk’uko bigaragara mu rubanza rujuririrwa, Habiyaremye Sylvestre yasabaga ko inyito y’icyaha ashinjwa ihinduka agahanirwa icyaha cyo kunywa urumogi ngo kuko atigeze arucuruza; Urukiko Rukuru, Urugereko rwa Rwamagana rwemeza ko icyaha yakoze ari icyo gucuruza urumogi rushingiye ku kuba ashinjwa na Ntwari Hugues ko ari we umugurisha urumogi anywa kandi akaba yarafashwe ari mu gikorwa cyo kurumugurisha ndetse agashyira umukono ku nyandikomvugo y’ifatira yemera ko afatanywe urumogi, hakaba hari na Raporo y’inzego z’ibanze imushinja. [20] Dosiye y’urubanza kandi igaragaza ko aburana mu Rukiko Rwisumbuye rwa Ngoma (reba igika cya igika cya 8) Habiyaremye Sylvestre yemeye ko acuruza urumogi, asobanura ko arurangura ku muntu witwa Shehe, ko yafashwe amaze kururangura inshuro eshatu, muri izo nshuro akaba yari amaze kurangura udupfunyika (boules) twose hamwe 30; yasobanuye kandi ko ubwo yafatwaga yari yaranguye udupfunyika 8, ari natwo yahayeho Ntwari Hugues ubwo yari aje kurugura. [21] Urukiko rw’Ubujurire rurasanga iyi miburanire ya Habiyaremye Sylvestre mu Rukiko Rwisumbuye rwa Ngoma ubwayo yumvikanisha ko impamvu ye y’ubujurire kuri uru rwego y’uko

1 N’ubwo uyu murongo ushingiye ku isesengura ry’ingingo ya 119 y’Itegeko Nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo ryakurikizwaga urubanza N° RPAA 00692/2021/CA rucibwa, ibyateganywaga n’iyo ngingo bihura n’ubundi n’ibiteganywa n’ingingo ya 87 y’Itegeko Nº 062/2024 ryo ku wa 20/06/2024 rigenga ibimenyetso rikurikizwa ubu, iteganya ko mu rubanza nshinjabyaha ikimenyetso gishingira ku mpamvu zose z’ibyabaye n’ibyemejwe n’amategeko, ababuranyi bapfa kuba barahawe umwanya wo kubijyaho impaka.

## Page 6

urwo rumogi rwari urwo kwinywera kandi ko yari agiye kurusangira na Ntwari Hugues nta shingiro ifite, kuko nk’uko byagaragajwe yemeye icyaha anasobanura uko yagikoze, kandi akaba atagaragaza ko hari igitutu yashyizweho; uko kwemera icyaha kwe kukaba kunashimangirwa n’imvugo z’abamushinja barimo Ntwari Hugues wemeje ko Habiyaremye Sylvestre ari we aguraho urumogi anywa, kandi koko akaba yarafashwe arimo kurumugurisha nk’uko byemezwa n’abatangabuhamya bari bahari afatwa. [22] Urukiko rw’Ubujurire rurasanga ibyo Habiyaremye Sylvestre avuga ko ubuhamya bwa Ntwari Hugues budakwiye gushingirwaho kuko yamushinje ibinyoma mu rwego rwo kwirengera, nta shingiro byahabwa kuko ku ruhande rumwe nta kimenyetso atanga kigaragaza amakimbirane avuga ko yari afitanye na Ntwari Hugues ku buryo yari kumushinja amubeshyera, mu gihe ahubwo mu miburanire ye muri uru Rukiko yavugaga ko bari inshuti basangira urumogi; ku rundi ruhande ibyo Ntwari Hugues amushinja bikaba bihura n‘ibyemejwe n’abatangabuhamya Niwebasa Cécile na Nsengiyumva Emmanuel bari bahari Habiyaremye Sylvestre afatwa, binahuza n’ibyo yiyemereye ubwo yaburanaga mu Rukiko Rwisumbuye rwa Ngoma nk’uko byagaragajwe haruguru; bityo rero Urukiko rukaba ntacyo rwagaragarijwe rwashingiraho rutesha agaciro ubuhamya bwa Ntwari Hugues. [23] Urukiko rw’ubujurire rurasanga kuba Habiyaremye Sylvestre yarafatanywe ingano nto y’urumogi bidakuraho ko yakoze icyaha cyo kurucuruza, kuko uretse no kuba yarafashwe arimo kurucuruza nk’uko byagaragajwe haruguru, hari n‘abatangabuhamya babimushinja barimo Ntwari Hugues yarucuruzagaho ubwo yafatwaga ariko akaba anemeza ko yari asanzwe arumuguraho, bikaba rero ntaho binyuranyije n’umurongo watanzwe mu rubanza RPAA 00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin alias Niyirema washingiweho mu rubanza rujuririrwa ukanagarukwaho muri uru rubanza.

[24] Hashingiwe ku bisobanuro byose byatanzwe, ubujurire bwa Habiyaremye Sylvestre bugamije gusaba guhindurirwa inyito y’icyaha bukaba nta shingiro bufite. [25] Urukiko rw’Ubujurire rurasanga ariko n’ubwo ubujurire bwe budahawe ishingiro, nta kirubuza gusuzuma niba igihano yahanishijwe gihuye n’uburemere bw’icyaha yahamijwe, hashingiwe ku murongo watanzwe mu rubanza RPAA 00039/2021/CA rwaciwe n’Urukiko rw’Ubujurire ku wa 02/07/2021 haburana Ubushinjacyaha na Shakabatenda Jean de Dieu, aho rwasobanuye ko “Ntacyabuza Urukiko kugabanyiriza igihano uregwa, hagamije gutanga igihano gihwanye n’uburemere bw’icyaha kabone n’ubwo impamvu z’ubujurire zaba zitahawe ishingiro.” Uwo murongo kandi ukaba warakomeje gushingirwaho mu zindi manza zaciwe n’uru Rukiko, mu ziheruka gucibwa harimo nk’urubanza RPAA 00582/2021/CA rwaciwe ku wa 25/02/2025 haburana Ubushinjacyaha na Nyiraminani Julienne n’abandi (igika cya 27 n’icya 28), n’urubanza RPAA 00546/2024/CA rwaciwe ku wa 19/03/2025 haburana Ubushinjacyaha na Mbihonge Jean (igika cya 31). [26] Urukiko rw’Ubujuire rurasanga hashigiwe kuri uwo murongo, igihano cy’ihazabu ingana na 10.000.000 FRW Habiyaremye Sylvestre yahanishijwe gikwiriye kongera kugabanywa ku buryo buruseho hashingiwe ku mpamvu y’uko yafatanywe ingano nto y’urumogi (agapfunyika 1), ikaba itaritaweho mu buryo bukwiriye mu rubanza rujuririrwa; bityo rero hagamijwe guhuza

## Page 7

imitangire y’ibihano ku bakoze ibyaha bifitanye isano mu mikorere yabyo, Habiyaremye Sylvestre akaba akwiriye guhanishwa ihazabu ingana na 5.000.000 FRW. Iki kigero cy’ihazabu gisa n’icyategetswe muri zimwe mu manza ziherutse gucibwa, harimo nk’urubanza RPAA 00417/2023/CA2 rwaciwe ku wa 20/12/2024 (igika cya 20), urubanza RPAA 00280/2024/CA3 rwaciwe ku wa 28/01/2025 (igika cya 21) n’urubanza RPAA 00752/2024/CA4 rwaciwe ku wa 27/03/2025 haburana Ubushinjacyaha na Nsekanabo Augustin (igika cya 23). III. ICYEMEZO CY ‘URUKIKO [27] Rwemeje ko ubujurire bwa Habiyaremye Sylvestre nta shingiro bufite. [28] Rwemeje ko urubanza RPA 01268/2021/HC/RWG rwaciwe n’Urukiko Rukuru, Urugereko rwa Rwamagana ku wa 26/07/2024 ruhindutse gusa ku bijyanye n’igihano cy’ihazabu Habiyaremye Sylvestre ahanishijwe. [29] Rutegetse ko Habiyaremye Sylvestre ahanishwa igifungo cy’imyaka cumi n’itanu (15) n’ihazabu ingana n’amafaranga y’u Rwanda miliyoni eshanu (5.000.000 FRW). [30] Rutegetse ko Habiyaremye Sylvestre asonewe amagarama y‘urubanza kuko aburana afunze.

2 Muri uru rubanza uregwa yari yafatanywe udupfunyika 500 tw’urumogi. 3 Muri uru rubanza uregwa yari yafatanywe udupfunyika 21 tw’urumogi. 4 Muri uru rubanza urgwa yari yafatanywe udupfunyika 129 tw’urumogi.