UBUSHINJACYAHA v. HABUMUGISHA

# UBUSHINJACYAHA v. HABUMUGISHA

- Source: Amategeko - Section: Decisions (Judgements) - Date: 2025-05-30 - Case/document no.: RS/REV/RP 00004/2023/CA - Collection: Court of Appeal

## Text

## Page 1

UBUSHINJACYAHA v. HABUMUGISHA [Rwanda URUKIKO RW’UBUJURIRE – RS/REV/RP 00004/2023/CA (Rutazana, P.J., )30 Gicurasi 2025] Amategeko agenga imiburanishirize y’imanza nshinjabyaha – Icyaha cyo gucuruza abantu – Gusubirishamo ingingo nshya – Ikimenyetso gishya ni ikimenyetso umuburanyi atashoboraga kumenya ko cyaba gihari, akakibona nyuma cyangwa akaba atarabashaga kukigeraho igihe yaburanaga, kandi ko n’iyo ari gishya gihabwa agaciro gusa iyo gishobora kuvuguruza ibyari byashingiweho mu ica ry’urubanza rusabirwa gusubirishwamo ingingo nshya. Incamake y’ikibazo: Uwitwa Mukeshimana Hadidja, yageze ku mupaka w’Akanyaru uhuza Rwanda n’u Burundi, abakozi b’Urwego Rushinzwe Abinjira n’Abasohoka mu Rwanda bamubajije aho agiye, ikimugenza n’uwo bari kumwe ababwira ko agiye mu kazi mu gihugu cya Oman kandi ko ari kumwe na mubyara we witwa Habumugisha Hamza; uyu nawe abagezeho bamubajije bigaragara ko nta sano abo bagenzi bombi bafitanye; bituma hakekwa ko Habumugisha Hamza yari mu bikorwa by’icuruzwa ry’abantu, arafatwa ashyikirizwa inzego z’ikurikiranacyaha. Iperereza rirangiye Ubushinjacyaha bwamureze mu Rukiko Rukuru, Urugereko rwihariye ruburanisha ibyaha byo mu rwego mpuzamahanga n’ibyambuka imbibi, bumukurikiranyeho icyaha cyo gucuruza abantu; Habumugisha Hamza yaburanye avuga ko icyaha ashinjwa ntacyo yakoze kuko Mukeshimana Hadidja yari agiye i Burundi. Urukiko Rukuru, Urugereko rwihariye ruburanisha ibyaha byo mu rwego mpuzamahanga n’ibyambuka imbibi, rushingiye ku bikubiye mu mvugo za Habumugisha Hamza mu Bugenzacyaha no mu Bushinjacyaha binashimangirwa n’ibyagaragaye muri telefone ye, rwemeje ko ahamwa n’icyaha cyo gucuruza abantu, rumuhanisha igifungo cy’imyaka 20 n’ihazabu ingana na 20.000.000 FRW, runategeka ubunyagwe bwa Telefone Tecno Spak 2, Telefone Techno Ros1, amafaranga y’amarundi (FBU) 385.000, amafaranga y’amanyarwanda (Frw) 16.000, n’amadolari y’Amerika (USD) 200 byari byafatiriwe. Habumugisha Hamza yajuririye Urukiko rw’Ubujurire avuga ko yahamijwe icyaha cyo gucuruza abantu hashingiwe ku bimenyetso bishidikanywaho, asaba ko ibyo yemereye mu Bugenzacyaha no mu Bushinjacyaha bikwiye guteshwa agaciro kuko yakorewe iyicarubozo, avuga kandi ko n’ubwo atemera icyaha ashinjwa, asanga yaragombaga gukurikiranwaho ubwinjiracyaha mu cyaha cyo gucuruza abantu kuko ibikorwa bigize icyaha ashinjwa bigaragaza ko cyari kitaratsotsobwa. Urukiko rw’ubujurire rwasanze ubujurire bwe nta shingiro bufite kuko n’ubwo anenga ibimenyetso byashingiweho n’Urukiko rumuhamya icyaha ku rwego rwa mbere, nawe ubwe mu ibazwa rye yemera ko yari ajyanye Mukeshimana Hadidja muri Kenya kumuhuza n’umuntu wari kumuha akazi. Nyuma yaho, Habumugisha Hamza yatanze ikirego mu Rukiko rw’Ubujurire asaba gusubirishamo ingingo nshya urubanza RPA 00026/2020/CA, avuga ko hari ibimenyetso bitandukanye

## Page 2

byabonetse nyuma y’uko urubanza asaba ko rusubirwamo ruciwe, kandi bikaba bivuguruza ibyashingiweho mu kumuhamya icyaha. Uhagarariye Ubushinjacyaha avuga ko ikirego cya Habumugisha Hamza kidakwiriye kwakirwa kuko ibimenyetso agishingiraho atari ibimenyetso bishya kandi bya kamarampaka, kuko kuva yafatwa yari azi ko Mukeshimana Hadidja ahari, kandi kugira ngo icyaha cyo gucuruza abantu kihebo si ngombwa ko uwagikorewe aba yabuze; naho ibindi bimenyetso bigizwe n’ubuhamya bikaba ntaho bihuriye n’icyaha ashinjwa. Uru Rukiko rwasuzumye ikibazo cyo kumenya niba ikirego cya Habumugisha Hamza gisaba gusubirishamo ingingo nshya urubanza RPA 00026/2020/CA gikwiriye kwakirwa. Incamake y’icyemezo: Ikimenyetso gishya ni ikimenyetso umuburanyi atashoboraga kumenya ko cyaba gihari, akakibona nyuma cyangwa akaba atarabashaga kukigeraho igihe yaburanaga, kandi ko n’iyo ari gishya gihabwa agaciro gusa iyo gishobora kuvuguruza ibyari byashingiweho mu ica ry’urubanza rusabirwa gusubirishwamo ingingo nshya. Ikirego gisaba gusubirishamo ingingo nshya nticyakiriwe. Amategeko yashingiweho: Itegeko N 027/2019 ryo ku wa 19/09/2019 ryerekeye iburanishirize y’imanza z’inshinjabyaha, ingingo ya 197. Imanza zifashishijwe: Urubanza RS/REV/CIV 0001/15/CS rwa Nyamaswa Ephron na Mukamusoni; rwaciwe n’Urukiko rw’Ikirenga ku wa 21/04/2017; Urubanza RS/REV/RP 00007/2023/CA rw’Ubushinjacyaha na Ngabo Faustin; rwaciwe ku wa 28/12/2023; Urubanza RS/REV/RP 00003/2024/CA haburana Ubushinjacyaha na Sgt Ahishakiye Cassien; rwaciwe ku wa 21/02/2025.

Urubanza I. IMITERERE Y’URUBANZA [1] Ku wa 10/03/2019 uwitwa Mukeshimana Hadidja, yageze ku mupaka w’Akanyaru uhuza Rwanda n’u Burundi, abakozi b’Urwego Rushinzwe Abinjira n’Abasohoka mu Rwanda bamubajije aho agiye, ikimugenza n’uwo bari kumwe ababwira ko agiye mu kazi mu gihugu cya Oman kandi ko ari kumwe na mubyara we witwa Habumugisha Hamza; uyu nawe abagezeho bamubajije bigaragara ko nta sano abo bagenzi bombi bafitanye; bituma hakekwa ko Habumugisha Hamza yari mu bikorwa by’icuruzwa ry’abantu, arafatwa ashyikirizwa inzego z’ikurikiranacyaha. [2] Iperereza rirangiye Ubushinjacyaha bwamureze mu Rukiko Rukuru, Urugereko rwihariye ruburanisha ibyaha byo mu rwego mpuzamahanga n’ibyambuka imbibi, bumukurikiranyeho

## Page 3

icyaha cyo gucuruza abantu; Habumugisha Hamza yaburanye avuga ko icyaha ashinjwa ntacyo yakoze kuko Mukeshimana Hadidja yari agiye i Burundi. [3] Mu rubanza RP 00018/2019/HC/HCCIC rwaciwe n’ Urukiko Rukuru, Urugereko rwihariye ruburanisha ibyaha byo mu rwego mpuzamahanga n’ibyambuka imbibi ku wa 31/10/2019, rushingiye ku bikubiye mu mvugo za Habumugisha Hamza mu Bugenzacyaha no mu Bushinjacyaha binashimangirwa n’ibyagaragaye muri telefone ye, rwemeje ko ahamwa n’icyaha cyo gucuruza abantu, rumuhanisha igifungo cy’imyaka 20 n’ihazabu ingana na 20.000.000 FRW, runategeka ubunyagwe bwa Telefone Tecno Spak 2, Telefone Techno Ros1, amafaranga y’amarundi (FBU) 385.000, amafaranga y’amanyarwanda (FRW) 16.000, n’amadolari y’Amerika (USD) 200 byari byafatiriwe. [4] Habumugisha Hamza yajuririye Urukiko rw’Ubujurire avuga ko yahamijwe icyaha cyo gucuruza abantu hashingiwe ku bimenyetso bishidikanywaho, asobanura ko ibyo yemereye mu Bugenzacyaha no mu Bushinjacyaha bikwiye guteshwa agaciro kuko yakorewe iyicarubozo, kandi Urukiko rukaba rutarabashije kumuhuza n’abantu bane bivugwa ko bafatanyije mu gikorwa cyo gucuruza Mukeshimana Hadidja, ndetse n’imvugo z’uyu ashijwa gucuruza zikaba zidakwiriye gushingirwaho kuko zivuguruzanya (ngo uretse ku byo yavuze bijyanye no kuba Habumugisha Hamza yarakorewe iyicarubozo). Mu bujurire bwe kandi yavugaga ko n’ubwo atemera icyaha ashinjwa, asanga yaragombaga gukurikiranwaho ubwinjiracyaha mu cyaha cyo gucuruza abantu kuko ibikorwa bigize icyaha ashinjwa bigaragaza ko cyari kitaratsotsobwa. [5] Mu rubanza RPA 00026/2020/CA rwaciwe n’Urukiko rw’ubujurire ku wa 28/01/2022 rwasanze ubujurire bwe nta shingiro bufite kuko n’ubwo anenga ibimenyetso byashingiweho n’Urukiko rumuhamya icyaha ku rwego rwa mbere, nawe ubwe mu ibazwa rye yemera ko yari ajyanye Mukeshimana Hadidja muri Kenya kumuhuza n’umuntu wari kumuha akazi, nyamara Mukeshimana Hadidja akaba atari azi uwagombaga kumuha akazi cyane ko yagenderaga ku mabwiriza ya Habumugisha Hamza dore ko ari nawe wamwishyuriraga itike akanamuha amabwiriza y’ibyo ari bubeshye inzego zishinzwe zbinjira n’abasohoka ku mupaka. [6] Ku wa 21/02/2023 Habumugisha Hamza yatanze ikirego mu Rukiko rw’Ubujurire asaba gusubirishamo ingingo nshya urwo rubanza RPA 00026/2020/CA, urubanza ruhabwa RS/REV/RP 00004/2024/CA, ruburanishwa mu ruhame kuwa 23/05/2025 Habumugisha Hamza yunganiwe na Me Uzamukunda Sarah, naho Ubushinjacyaha buhagarariwe na Sibomana Stanislas, Umushinjacyaha ku rwego rw’Igihugu. [7] Ikirego cya Habumugisha Hamza agishingira ku bimenyetso bikurikira avuga ko byabonetse nyuma y'uko urubanza asaba ko rusubirwamo ruciwe, kandi bikaba bivuguruza ibyashingiweho mu kuhamya icyaha: - Icyemezo (Certificate of residence) cyatanzwe n’Umurenge wa Ngoma ku wa 11/1/2023, cyemeza ko Mukeshimana Hadidja ashinjwa kuba yaracuruje ahari kandi atuye muri uwo Murenge, bityo akaba yaragombaga gukurikiranwaho ubwinjiracyaha mu cyaha cyo gucuruza abantu; - Amasezerano y’akazi, passport na visa bya Mukeshimana Hadidja, n’ubuhamya bwatanzwe na Ndayishimiye Hadidja (bwuganiwe n’ubwatanzwe n’umubyeyi we witwa Mukarwego Zahara) n’ubwatanzwe na Ndoruhirwe Aisha, bose bemeza ko Habumugisha

## Page 4

Hamza yabafashije gushaka akazi mu gihugu cya Kuwait kandi ko bagakoze neza karangira bakagaruka mu Rwanda nta kibazo bagize. Avuga ko ibyo bimeyetso byerekana ko atari agiye gucuruza Mukeshimana Hadidja ahubwo uyu yari agiye mu kazi mu gihugu cya Oman kandi ko yari yabihisemo ku bushake. [8] Uhagarariye Ubushinjacyaha avuga ko ikirego cya Habumugisha Hamza kidakwiriye kwakirwa kuko ibimenyetso agishingiraho atari ibimenyetso bishya kandi bya kamarampaka, kuko kuva yafatwa yari azi ko Mukeshimana Hadidja ahari, kandi kugira ngo icyaha cyo gucuruza abantu kihebo si ngombwa ko uwagikorewe aba yabuze; naho ibindi bimenyetso bigizwe n’ubuhamya bikaba ntaho bihuriye n’icyaha ashinjwa. [9] Hashingiwe ku mpaka zagaragajwe haruguru, Urukiko rurasuzuma niba ikirego cya Habumugisha Hamza gisaba gusubirishamo ingingo nshya urubanza RPA 00026/2020/CA gikwiriye kwakirwa. II. ISESENGURA RY’ IKIBAZO KIGIZE URUBANZA

Kumenya niba ikirego cya Habumugisha Hamza gisaba gusubirishamo ingingo nshya urubanza RPA 00026/2020/CA gikwiriye kwakirwa [10] Habumugisha Hamza na Me Uzamukunda Sarah umwunganira bavuga ko nyuma y'uko urubanza RPA 00026/2020/CA ruciwe babonye ibimenyetso bikurikira, bivuguruza ibyashingiweho mu kumuhamya icyaha ashinjwa, bakabishingiraho basaba ko rusubirwamo: - Icyemezo (Certificate of residence) cyatanzwe n’Umunyamabanga Nshingwabikorwa w‘Umurenge wa Ngoma ku wa 11/01/2023, kigaragaza ko Mukeshimana Hadidja ashinjwa kuba yaracuruje ahari kandi atuye mu Murenge wa Ngoma, Akarere ka Huye, akaba nta n’ihungabana yagize ryafatwa nk’ingaruka z’ikibazo yahuye nacyo ku mupaka w’u Rwanda n’ Uburundi. - Ibimenyetso bigizwe n’Amasezerano y’akazi, passport na visa byo kwijira mu gihugu, bya Mukeshimana Hadidja, bigaragaza ko Habumugisha Hamza atari agiye kumucuruza ahubwo ko yari agiye mu kazi mu gihugu cya Oman kandi ko yari yabihisemo ku bushake; bigashimangirwa n’ubuhamya bwatanzwe na Ndayishimiye Hadidja ku wa 21/03/2025 (bwuganiwe n’ubwatanzwe n’umubyeyi we witwa Mukarwego Zahara ku wa 21/03/2025) n’ubwatanzwe na Ndoruhirwe Aisha ku wa 02/05/2025, bose bemeza ko Habumugisha Hamza yabafashije gushaka akazi mu gihugu cya Kuwait baragakora, karangiye bagaruka mu Rwanda nta kibazo bagize.

[11] Habumugisha Hamza n’umwunganira bakomeza basobanura ko Icyemezo (Certificate of residence) cyavuzwe haruguru ari ikimenyetso gishya kuko yakibonye nyuma y’icibwa ry’urubanza kandi mu gihe rwaburanishwaga kukigeraho bitari gushoboka kuko yari afungiye kure y’abo mu muryango we akaba atarabashaga kuvugana nabo kandi na telefone ze zikaba zari zarafatiriwe; n’uwitwa Asia wamuhuje na Mukeshimana Hadidja akaba yarabaga muri Oman kandi hakaba nta wundi muntu n’umwe baziranye unaziranye na Mukeshimana Hadidja. Bavuga kandi ko icyo kimenyetso ari kamarampaka kuko kigaragaza ko yari gukurikiranwaho

## Page 5

ubwinjiracyaha mu cyaha cyo gucururuza abantu, bityo kikaba kivuguruza ibyashingiweho n’Urukiko rumuhamya icyaha. [12] Habumugisha Hamza n’umwunganira bavuga ko n’ubuhamya bwavuzwe haruguru ari ibimenyetso bishya kuko bwatanzwe nyuma y’uko urubanza asaba ko rusubirwamo ruciwe, kandi akaba atarashoboraga ku bugeraho mu gihe cy’iburanisha kuko ababutanze bari bataragaruka mu Rwanda, na nyuma y’aho ingendo mpuzamahanga zigahita zihagarara kubera icyorezo cya Covid 19; bavuga kandi ko ubwo buhamya ari ikimenyetso kamarampaka kuko bugaragaza ko ibyabaye ku babutanze ari nabyo byari kuba kuri Mukeshimana Hadidja dore ko bagendeye igihe kimwe mu mwaka wa 2019, bityo icyaha yakoze kikaba ari ugushakira abantu akazi mu bihugu by’amahanga atabifitiye uburenganzira. [13] Uhagarariye Ubushinjacyaha asaba Urukiko kutakira ikirego cya Habumugisha Hamza, kuko ibimenyetso agishingiraho atari bishya kandi ko bitari kamarampaka, akabisobanura mu buryo bukurikira: - Icyemezo (Certificate of residence) cyatanzwe n’Umurenge wa Ngoma si ikimenyetso gishya kuko Mukeshimana Hadidja atigeze aburirwa irengero, kandi Habumugisha Hamza yari abizi kuko kuva yafatwa atigeze amenyeshwa ko yabuze; uhagarariye

-Ubushinjacyaha avuga kandi ko icyo kimenyetso kitari kamarampaka kuko kugira ngo icyaha cyo gucuruza abantu kibeho bidasaba ko uwagikorewe aba yaraburiwe irengero cyangwa ko intego yari igamijwe iba yagezweho, ko ahubwo bihagije kugaragaza ko mu gukora icyaha hifashishijwe uburyo ubu n’ubu kandi ko uwagikoze yari agamije gushaka inyungu (exploitation). - Ibindi bimenyetso bigizwe n’ubuhamya bwavuzwe haruguru nabyo si ikimenyetso kamarampaka byatuma urubanza rusubirwamo, kuko ibyo abatanze ubwo buhamya bavuga bidahuye n’ibyo Habumugisha Hamza aregwa. UKO URUKIKO RUBIBONA [14] Impaka kuri iki kibazo zishingiye ku kumenya niba ibimenyetso byavuzwe haruguru, bigizwe n’Icyemezo (Certificate of residence) cyatanzwe n’Umurenge wa Ngoma ku wa 11/01/2023 kigaragaza ko Mukeshimana Hadidja atuye muri uwo Murenge, Amasezerano y’akazi, passport na visa bya Mukeshimana Hadidja, n’ubuhamya bwatanzwe na Ndayishimiye Hadidja (bwuganiwe n’ubwatanzwe n’umubyeyi we) n’ubwatanzwe na Ndoruhirwe Aisha, ari ibimenyetso bishya kandi bya kamarampaka byashingirwaho ikirego cyatanzwe na Habumugisha Hamza gisaba gusubirishamo ingingo nshya urubanza RPA 00026/2020/CA cyakirwa. [15] Ingingo ya 197, igika cya mbere, agace ka 5 y’Itegeko N 027/2019 ryo ku wa 19/09/2019 ryerekeye iburanishirize y’imanza z’inshinjabyaha nk’uko ryahinduwe kugeza ubu, iteganya ko “Urubanza rushobora gusubirishwamo ingingo nshya kubera imwe mu mpamvu zikurikira: iyo kuva aho urubanza ruciriwe, habonetse ikimenyetso gishya kimara impaka kigaragaza neza akarengane katewe n’urubanza rusabirwa gusubirwamo”. Naho igika cya 2 cy’iyo ngingo kigateganya ko “Ikimenyetso gishya kivugwa mu gace ka 5 k’igika cya mbere cy’iyi ngingo ari

## Page 6

ikimenyetso umuburanyi atashoboraga kumenya ko cyaba gihari, akakibona nyuma cyangwa akaba atarabashaga kukigeraho igihe yaburanaga”. [16] Ibijyanye no kumenya ikimenyetso gishobora gushingirwaho urubanza rwaciwe burundu rusubirwamo, byasobanuwe mu manza zinyuranye zaciwe n’Urukiko rw’Ikirenga n’Urukiko rw’Ubujurire, zihuriza ku murongo ugira uti: Ikimenyetso gishya ni ikimenyetso umuburanyi atashoboraga kumenya ko cyaba gihari, akakibona nyuma cyangwa akaba atarabashaga kukigeraho igihe yaburanaga, kandi ko n’iyo ari gishya gihabwa agaciro gusa iyo gishobora kuvuguruza ibyari byashingiweho mu ica ry’urubanza rusabirwa gusubirishwamo ingingo nshya”. Muri izo manza twavuga nk’urubanza RS/REV/CIV 0001/15/CS rwaciwe n’Urukiko rw’Ikirenga ku wa 21/04/2017 haburana Nyamaswa Ephron na Mukamusoni Astérie (igika cya 22), urubanza RS/REV/RP 00007/2023/CA rwaciwe ku wa 28/12/2023 haburana Ubushinjacyaha na Ngabo Faustin (igika cya15), urubanza RS/REV/RP 00003/2024/CA rwaciwe ku wa 21/02/2025 haburana Ubushinjacyaha na Sgt Ahishakiye Cassien (igika cya 13) n’izindi. [17] Ku birebana n’uru rubanza, ikimenyetso cya mbere Habumugisha Hamza ashingiraho mu kirego cye ni Icyemezo (Certificate of residence) cyatanzwe n’Umunyamabanga Nshingwabikorwa w‘Umurenge wa Ngoma ku wa 11/01/2023. Icyo Habumugisha Hamza ashaka kugaragaza yifashishije iki kimenyetso ni uko adakwiriye guhamwa n’icyaha cyo gucuruza Mukeshimana Hadidja kuko ahari kandi atuye muri uwo Murenge. Urukiko rw’Ubujurire rurasanga kuba Mukeshimana Hadidja ahari atari bishya kuko ibikubiye muri dosiye bigaragaza ko ubwo Habumugisha Hamza yafatirwaga ku mupaka w’u Burundi bari kumwe, no mu bimenyetso Habumugisha Hamza yireguzaga mu Rukiko Rukuru hakaba harimo ibaruwa yo ku wa 01/04/2019 yavugaga ko yanditswe na Mukeshimana Hadidja amushinjura, igaragaza ko atuye mu Murenge wa Ngoma; ndetse uyu Mukeshimana Hadidja akaba yaritabye Urukiko Rukuru mu iburanisha ryo ku wa 01/10/2019 akanatanga ubuhamya; bityo rero iyi ikaba atari ingingo nshya yatuma urubanza rusubirwamo. Kuba icyemezo (Certificate of residence) cyavuzwe haruguru cyarashatswe nyuma y’icibwa ry’urubanza bikaba bitakigira ikimenyetso gishya cyatuma urubanza rusubirwamo kuko nk’uko byasobanuwe amakuru kigaragaza Habumugisha Hamza yari asanzwe ayazi ndetse anagaragara mu nyandiko zigize dosiye y’urubanza. Hashingiwe kuri ibyo bisobanuro iki kimenyetso kikaba kitagomba kwakirwa. [18] Urukiko rw’Ubujurire rurasanga kandi Amasezerano y’akazi, passeport na visa bya Mukeshimana Hadidja atari ibimenyetso bishya kuko dosiye igaragaza ko Habumugisha Hamza yabishingiragaho imyiregurire ye mu Rukiko Rukuru (reba imyanzuro ye yo ku wa 21/08/2021 n’Inyandikomvugo y’iburanisha mu Rukiko Rukuru, yo ku wa 03/09/2019) aho yasobanuraga ko ibyo bimenyetso bigaragaza ko we na Mukeshimana Hadidja batari bagiye ahantu hamwe; hashingiwe kuri izo mpamvu ibi bimenyetso nabyo bikaba bitagomba kwakirwa kuko atari bishya. [19] Urukiko rw’Ubujurire rurasanga ubuhamya bwavuzwe haruguru bwatanzwe na Ndayishimiye Hadidja (bwuganiwe n’ubwatanzwe n’umubyeyi we Mukarwego Zahara) n’ubwatanzwe na Ndorihirwe Aisha nabwo atari bushya, kuko Habumugisha Hamza yari asanzwe azi ko abo bantu yabafashije kubona akazi nk’uko abivuga kandi ko bahari, nyamara akaba atagaragaza ko yabigaragarije Urukiko kugira ngo nirusanga ari ngombwa rushake uko rubabaza; kuba rero yarabashatse nyuma bikaba atari byo bigira ubuhamya bwabo ikimenyetso gishya cyatuma urubanza rusubirwamo; hashingiwe kuri ibyo bisobanuro, iki kimenyetso nacyo kikaba kitagomba kwakirwa.

## Page 7

[20] Hashingiwe ku byasobanuwe byose no ku murongo watanzwe mu manza zagaragajwe haruguru (igika cya 16), Urukiko rw’Ubujurire rurasanga ibimenyetso Habumugisha Hamza ashingiraho ikirego cye atari bishya ku buryo byashingirwaho urubanza RPA 00026/2020/CA rusubirwamo, bityo ikirego cye kikaba kitagomba kwakirwa.

III. ICYEMEZO CY’URUKIKO [21] Rwemeje ko ikirego cyatanzwe na Habumugisha Hamza gisaba gusubirishamo ingingo nshya urubanza RPA 00026/2020/CA rwaciwe n’Urukiko rw’Ubujurire ku wa 28/01/2022 kitakiriwe. [22] Rutegetse ko Habumugisha Hamza asonewe amagarama y’urubanza kuko aburana afunze.