UBUSHINJACYAHA v. HATEGEKIMANA Et Al.

# UBUSHINJACYAHA v. HATEGEKIMANA Et Al.

- Source: Amategeko - Section: Decisions (Judgements) - Date: 2021-11-12 - Case/document no.: RPAA 00334/2020/CA - Collection: Court of Appeal

## Text

## Page 1

UBUSHINJACYAHA v. HATEGEKIMANA Et Al. [Rwanda URUKIKO RW’UBUJURIRE – RPAA 00334/2020/CA (Munyangeri, P.J.) 12 Ugushyingo 2021] Amategeko agenga ibimenyetso – Imyitwarire isanzwe iranga uregwa – Kuba abaregwa basanzwe bitwara nabi, ntibivuze ko ibibazo byose bivutse bigomba kubitirirwa no mu gihe bidafitiwe ibimenyetso. Incamake y’ikibazo: Uru rubanza rwatangiriye mu Rukiko Rwisumbuye rwa Gicumbi, Ubushinjacyaha bukurikiranye abaregwa ku cyaha cy’ubwicanyi nyuma yuko baketswe kugira uruhare mu rupfu rw’uwitwa Kagabo wishwe anigishijwe umukandara mu ijosi, hanyuma amaze kwicwa umurambo we uzirikwa ku giti cy’inturusu. Abaregwa bose baburanye bahakana icyaha, icyakora uwitwa Hategekimana umwe mu baregwa mu Bugenzacyaha yari yemeye ko yari kumwe na bo baregwanwa bica Kagabo ko ariko we nta ruhare yabigizemo. Urwo Rukiko rwaciye urubanza rwemeza ko abaregwa bahamwa n’icyaha cy’ubwicanyi, ruhanisha buri wese igifungo cya burundu. Abaregwa bajuririye urubanza mu Rukiko Rukuru, bavuga ko bahamijwe icyaha batakoze kuko nta hantu bahuriye ngo babe bacura umugambi wo kwica Kagabo, basaba kugirwa abere. Urwo Rukiko narwo rwaciye urubanza rwemeza ko abaregwa bahamwa n’icyaha bashinjwa, ruhanisha buri wese igifungo cy’imyaka makumyabiri n’itanu (25), uretse uwitwa Muhawenimana wagizwe umwere. Abahamijwe ibyaha barongeye barajurira mu Rukiko Rw’Ubujurire bavuga ko Urukiko Rukuru rwirengagije uko ibintu byagenze, ko hari ubuhamya bw’abantu banyuranye bagombaga kwemeza aho biriwe umunsi nyakwigendera Kagabo yiciweho. Bavuga bafashwe n’inzego z’umutekano mbere y’amasaha Ubushinjacyaha bugaragaza ko ariyo nyakwigendera yiciweho. Ubushinjacyaha bwo bwaburanye buvuga ko Hategekimana alias Bishyinga (umwe mu baregwa) yemeye icyaha ndetse asobanura uburyo yafatanyije na bagenzi be, ko bishe nyakwigendera bamunize kandi bamunigishije umukandara, bikaba bihura na raporo ya muganga igaragaza ko Kagabo yishwe anizwe, Bukomeza buvuga ko iby’amasaha bavuga ko nyakwigendera yishwe mu ma saa tatu atari byo, ko nta muhanga wigeze yemeza isaha nyakwigendera yiciweho, ko ikizwi ari uko yishwe mu masaha ya nimugoroba. Incamake y’icyemezo: 1. Kuba abaregwa basanzwe bitwara nabi, ntibivuze ko ibibazo byose bivutse bigomba kubitirirwa no mu gihe bidafitiwe ibimenyetso, bityo uruhare uruhare rw’abajuriye mu cyaha cyo kwica Kagabo Théophile rukaba rushidikanywaho. Urubanza rwajuririwe ruhindutse mu ngingo zarwo zose; Abaregwa ntibahamwa n’icyaha. Amategeko yashingiweho: Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, Ingingo ya 111.

## Page 2

Itegeko Ngenga N° 01/12/OL ryo ku wa 02/05/2012 rishyiraho igitabo cy’amategeko ahana, Ingingo ya 140 n’iya 119. Nta manza zifashishijwe. Urubanza I. IMITERERE Y’URUBANZA [1] Mu ijoro ryo ku wa 14/04/2018 rishyira ku wa 15/04/2018, uwitwa Kagabo Théophile yishwe anigishijwe umukandara mu ijosi, hanyuma amaze kwicwa umurambo we uzirikwa ku giti cy’inturusu. Mu baketswe kugira uruhare mu rupfu rwe, harimo Hategekimana Jean Claude alias Bishyinga, Hafashimana Samuel alias Munigantama, Hagenimana alias Rukara Barungi na Muhawenimana Titus. Inzego z’ubutabera zishinzwe iperereza zakurikiranye dosiye, iperereza rirangiye Ubushinjacyaha buregera Urukiko Rwisumbuye rwa Gicumbi. Abaregwa bose baburanye bahakana icyaha, Hategekimana Jean Claude alias Bishyinga abazwa mu Bugenzacyaha yari yemeye ko yari kumwe na Hafashimana Samuel alias Munigantama na Hagenimana alias Rukara Barungi bica Kagabo Théophile, ko ariko we nta ruhare yabigizemo. [2] Mu rubanza n° RP 00144/2018/TGI/GIC rwaciwe ku wa 28/09/2018, Urukiko Rwisumbuye rwa Gicumbi rwemeje ko Hategekimana Jean Claude alias Bishyinga, Hafashimana Samuel alias Munigantama, Hagenimana alias Rukara Barungi na Muhawenimana Titus bahamwa n’icyaha cy’ubwicanyi, ruhanisha buri wese igifungo cya burundu. [3] Hategekimana Jean Claude alias Bishyinga, Hafashimana Samuel alias Munigantama, Hagenimana alias Rukara Barungi na Muhawenimana Titus bajuririye icyo cyemezo mu Rukiko Rukuru, bavuga ko bahamijwe icyaha batakoze kuko nta hantu bahuriye ngo babe bacura umugambi wo kwica Kagabo Théophile, basaba kugirwa abere. [4] Mu rubanza n° RPA 00943/2018/HC/KIG rwaciwe ku wa 28/02/2019, Urukiko Rukuru rwemeje ko Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi bahamwa n’icyaha bashinjwa, ruhanisha buri wese igifungo cy’imyaka makumyabiri n’itanu (25), na ho Muhawenimana Titus agirwa umwere. [5] Hategekimana Jean Claude alias Bishyinga, Hafashimana Samuel alias Munigantama, Hagenimana alias Rukara Barungi bajuririye icyo cyemezo mu Rukiko rw’Ubujurire. Mu mwanzuro w’ubujurire, Hategekimana Jean Claude alias Bishyinga avuga ko Urukiko rwirengagije uko ibintu byagenze, ko rwashingiye ku mvugo ye yo kwemera icyaha kuri polisi kandi yarabihatiwe, ko hari abantu bazi neza ko yiriwe avoma amazi yo kwenga ibigage barimo uwitwa Ndereyimana Jean Pierre, Ntigurirwa, Muhuza, Samuel, Nsengimana na Didier, akaba atari gushobora kuba mu bishe Kagabo Théophile mu masaha yiciweho. [6] Mu mwanzuro w’ubujurire, Hafashimana Samuel alias Munigantama avuga ko Urukiko Rukuru rwirengagije uko ibintu byagenze, ko hari ubuhamya bw’abantu banyuranye bagombaga

## Page 3

kwemeza aho yiriwe uwo munsi, ko kandi uwo munsi atigeze ahura n’abo bareganwa, atigeze ahura na nyakwigendera Kagabo Théophile. Akomeza avuga ko iperereza ryakozwe nabi kuko hatabajijwe abantu bazi neza aho yiriwe barimo uwitwa Nyampinga Euphrasie, Giraneza, Anwarita na Joyeuse batahanye avuye kugura ibirayi i Karago, Ntahobari Maurice na Mukankuranga Veneranda, ko Urukiko rwatesheje agaciro raporo y’inzego z’ibanze kuri Muhawenimana Titus wenyine, nyamara rukayiha agaciro kuri we kandi bose ibavugaho bimwe. [7] Mu mwanzuro w’ubujurire, Hagenimana alias Rukara Barungi avuga ko Urukiko Rukuru rwirengagije ukuri k’uko ibintu byagenze, ko iperereza ryakozwe nabi kuko hatabajijwe abantu bazi neza ko uwo munsi yiriwe yinura umucanga i Karago n’aho bagenzi be bareganwa biriwe harimo uwitwa Ndayisaba, Ngabo, Muhuza, Niringiyimana, Depite. Avuga kandi ko Hategekimana Jean Claude alias Bishyinga yahatiwe kumushinja. [8] Iburanisha ry’uru rubanza ryabereye mu ruhame ku wa 07/10/2021, Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi bunganiwe na Me Ntuyenabo Jean de Dieu, Ubushinjacyaha buhagarariwe na Uwizeye Jean Marie, Umushinjacyaha ku rwego rw’igihugu. [9] Ku wa 29/10/2021, Urukiko rw’Ubujurire rwaciye urubanza rubanziriza urundi, rwemeza ko mbere yo guca urubanza burundu, ari ngombwa ko iburanisha ripfundurwa kugira ngo ababuranyi bagire icyo bavuga ku kimenyetso cya ADN kiri muri dosiye batigeze bavugaho. [10] Urubanza rwapfunduwe ku wa 11/11/2021, Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi bunganiwe na Me Ntuyenabo Jean de Dieu, Ubushinjacyaha buhagarariwe na Uwizeye Jean Marie, Umushinjacyaha ku rwego rw’igihugu. II. IKIBAZO KIGIZE URUBANZA N’ISESENGURA RYACYO Kumenya niba Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi, barahamijwe icyaha batakoze [11] Hategekimana Jean Claude alias Bishyinga avuga ko agihakana icyaha, ko mu Bugenzacyaha yacyemeye kubera gukubitwa, bakaba baramuhatiye kucyemera no gushinja bagenzi be, bamubwira ko niyemera icyaha bari bumurekure, kubera ko yari afite imyaka cumi n’irindwi (17) y’amavuko, akumva ko bari bumurekure koko. Akomeza avuga ko Ubushinjacyaha buvuga ko Kagabo Théophile yishwe saa tatu z’ijoro, we akaba yarafashwe n’inzego z’umutekano saa moya z’umugoroba, akaba yibaza ukuntu yaba yari mu maboko y’izo nzego akajya no kwica nyakwigendera, asaba ko Urukiko rwajuririwe rwakora iperereza ryimbitse. [12] Hagenimana alias Rukara Barungi avuga ko Urukiko rwamurenganyije, ko bamukuye iwe mu ma saa moya n’igice bavuga ngo asobanure uburyo Hategekimana Jean Claude alias Bishyinga yambuye Habinshuti telefoni, ababwira ko ayimwambura atari ahari n’abandi bavuga ko atari ahari, bamutwara kuri polisi gutyo. Asobanura ko bageze mu nzira abashinzwe umutekano aba ari bo babona umurambo wa nyakwigendera, kubera ko Hategekimana Jean

## Page 4

Claude alias Bishyinga yari umwana muto, aba ari we babwira ngo yemere ko ari we wamwishe bafatanyije. [13] Hafashimana Samuel alias Munigantama avuga ko abashinzwe irondo muri Gasiza baje mu rugo iwe mu ma saa mbiri z’ijoro bamubwira ko hari umuntu uri ku nda bagiye kujyana kwa muganga, abona baramushoreye bamugeza aho uwo murambo wari uri, asanga bagenzi be bo bahageze mbere. Avuga ko yahageze bakamukubita inkoni mu mutwe, ko kandi umuntu wapfuye atamuzi, uretse kumva bavuga ko yitwa Kagabo. Avuga ko bababwira ko uwo muntu yapfuye saa tatu mu gihe bo bari mu maboko y’inzego z’ubuyobozi saa mbiri, akaba ari ho ahera avuga ko barenganyijwe. [14] Me Ntuyenabo Jean de Dieu wunganira abaregwa, avuga ko bagaragaje ko hatagaragazwa aho umuntu yiciwe n’umugambi bagize, ko abo yunganira bari bigeze babonana na nyakwigendera. Asaba Urukiko kuzareba ibazwa ryo kuri 15/04/2018 ryakorewe Hategekimana Jean Claude alias Bishyinga, kuri cote ya 35, urupapuro rwa 4, Ubugenzacyaha bwamubajije isaha bahuriyeho na nyakwigendera bakamwica, asubiza ko hari saa tatu z’ijoro, nyamara saa tatu z’umugoroba ari bwo abanyerondo bagiye kubyutsa Hagenimana alias Rukara aho yari aryamye. Mu gika cya 12, urubanza rwaciwe n’Urukiko Rukuru rusobanura ko abaregwa bageze mu ishyamba rya Buhambe bakabona uwo murambo. Me Ntuyenabo Jean de Dieu avuga ko abanyerondo bafashe abo yunganira bashaka gukemura ikibazo cya telefoni cyari cyavutse, babonye gifashe indi ntera babajyana kuri polisi mu kujya kuri polisi, aba ari bwo bahura n’uwo murambo. [15] Me Ntuyenabo Jean de Dieu akomeza avuga ko uwitwa Ngaruyinka François utuye hafi y’aho umurambo wabonetse, atigeze avuga ko yabonye abaregwa barimo kumwica ndetse n’abanyerondo babajijwe bavuze ko mu ma saa moya ari bwo babafashe. Ashingiye ku ngingo ya 851 y’itegeko ryerekeye imiburanishirize y’imanza z’inshinjabyaha ryo muri 2013, avuga ko bagaragaza ko abaregwa nta ruhare bagize mu rupfu rwa Kagabo Théophile, Ubushinjacyaha bukaba bufite inshingano zo gushaka ibindi bimenyetso nk’uko Urukiko rw’Ikirenga rwabitanzeho umurongo mu rubanza nº RPAA 0066/15/CS. Arasaba ko abo yunganira batahamwa n’icyaha, kubera ko nta kigaragaza ko hari aho bahuriye ngo bacure umugambi wo kwica Kagabo Théophile, kuko bose babonye umurambo bari kumwe n’abanyerondo. Kuri raporo ya ADN, avuga ko igaragaza o abo yunganira batigeze bakora ku mukandara wakoreshejwe mu kwica nyakwigendera Kagabo Théophile, agasaba ko Urukiko rwaha agaciro ikimenyetso cya ADN, abo yunganira bakagirwa abere. [16] Hategekimana Jean Claude alias Bishyinga asoza avuga ko yatse uwitwa Habinshuti telefoni, abanyerondo bakamutwara, akavuga ko yayimwatse ari kumwe na Hafashimana na Hagenimana, ko kwemera icyaha mu Bugenzacyaha yabitewe n’inkoni kandi ko kugaragaza inyandiko yivurijeho bitashoboka, kubera ko umuntu atagukubita ngo narangiza ajye no kukuvuza, akongera gusaba ko hakorwa iperereza ryimbitse. Yabajijwe icyo avuga kuri raporo ya ADN, asubiza ko nta yo yabonye. 1 Ingingo ya 85 y’itegeko nº 30/2013 ryo ku wa 24/05/2013 ryerekeye imiburanishirize y’imanza z’inshinjabyaha iteganya ko “Ubushinjacyaha, uwakorewe icyaha cyangwa se abamufiteho uburenganzira iyo baregeye indishyi z’akababaro cyangwa biregeye umuburanyi, no bo bagomba ibimenyetso byemeza icyaha.”

## Page 5

[17] Hagenimana alias Rukara Barungi asoza avuga ko abanyerondo bamutwaye azira ko yakubise Hategekimana urushyi, bamubwira ko bagiye kubikemurira kuri polisi, na ho Hafashimana Samuel alias Munigantama asoza avuga ko ibya telefoni atabizi, ko bamutwaye bamubwira ko hari umugore w’umuturanyi wabo witwa Tuyisenge uri ku nda bashaka ko bajyana kwa muganga, yisanga bamugejeje aho bagenzi be bari ku murambo wa Kagabo Théophile. Na bo babajijwe icyo bavuga kuri raporo ya ADN, basubiza ko nta raporo babonye, ko baheruka batanga ikizamini cyayo. [18] Uhagarariye Ubushinjacyaha avuga ko Hategekimana Jean Claude alias Bishyinga yemeye icyaha ndetse asobanura uburyo yafatanyije na Hafashimana Samuel alias Munigantama na Hagenimana alias Rukara Barungi, ko yemeye icyaha ariko bagenzi be bahakana ku ikubitiro, agakomeza kubashinja. Avuga ko iby’amasaha bavuga ko nyakwigendera yishwe mu ma saa tatu atari byo, ko nta muhanga wigeze yemeza isaha nyakwigendera yiciweho, ko ikizwi ari uko yishwe mu masaha ya nimugoroba, keretse hagize utanga ubuhamya avuga ko nyuma y’uko aba bafatwa, yabonye Kagabo Théophile ari ku igare, ahetse imizigo ye. [19] Uhagarariye Ubushinjacyaha avuga kandi ko Hategekimana Jean Claude atireze gusa ko afatanyije na bagenzi be bishe Kagabo Théophile, ahubwo yanasobanuye uko byagenze:Yasobanuye ko bishe nyakwigendera bamunize kandi bamunigishije umukandara, raporo ya muganga ikaba igaragaza ko Kagabo Théophile yishwe anizwe, akibaza uburyo umuntu yatanga ubuhamya ko banize nyakwigendera akubitwa, bigahura neza na expertise ya muganga, akomeza avuga ko Hategekimana Jean Claude alias Bishyinga yanasobanuye ko bamaze kumuniga, bamuziritse ku giti bakoresheje umukandara, ibi bikaba bihura n’ibivugwa n’abanyerondo ko basanze nyakwigendera azirikishije umukandara. Uhagarariye Ubushinjacyaha avuga ko kwirega kwa Hategekimana Jean Claude alias Bishyinga byarenze kwirega, ahubwo asobanura n’ibyo atabajijwe, aho yasobanuye ko bamaze kwica Kagabo Théophile, bamwambuye na 20.000 Frw afatanyije na Hafashimana na Hagenimana. [20] Uhagarariye Ubushinjacyaha avuga kandi ko bagenzi ba Hategekimana Jean Claude alias Bishyinga kuva bafatwa, nta n’umwe wigeze avuga ko hari icyo apfa na we. Yibaza impamvu uwakubise Hategekimana Jean Claude alias Bishyinga amuhatira kwemera icyaha, atakubise na Hagenimana na Hafashimana kugira ngo bacyemere kandi kuva bafatwa bagihakana. Avuga ko kuba Hategekimana Jean Claude alias Bishyinga yarageze nyuma agahakana icyaha nta shingiro byahabwa, kubera ko atabasha kugaragaza agahato yashyizweho ngo yemere icyaha, ntavuga aho yakubitiwe, ntavuga uwamukubise n’icyo akora, ntagaragaza inyandiko yivurijeho ibikomere yaba yaratewe n’inkoni yakubiswe, ko ahubwo ari uguhindura imvugo gusa. [21] Ku byerekeye umugambi wo gukora icyaha, uhagarariye Ubushinjacyaha avuga ko Hategekimana Jean Claude alias Bishyinga yasobanuye ko we na bagenzi be bumvikanye ko bari butege Kagabo Théophile avuye ku isoko kuko azaba afite amafaranga, ko rero byumvikanisha umugambi wo kugikora. Avuga ko hari imanza bashyize muri dosiye zitanga umurongo uvuga ko uwemeye icyaha mu iperereza nyuma akisubiraho, agomba gusobanura impamvu yabyo. Asoza asaba ko ubujurire bwatanzwe butahabwa ishingiro, kubera ko abajuriye batashoboye kuvuguruza ibimenyetso byashingiweho bahamwa n’icyaha, igihano cy’igifungo cy’imyaka makumyabiri n’itanu (25) bahanishijwe kigumeho.

## Page 6

[22] Uhagarariye Ubushinjacyaha yabajijwe icyo avuga kuri raporo ya ADN, asubiza ko bashinjaga abaregwa bashingiye ku buhamya bwatanzwe na Hategekimana Jean Claude alias Bishyinga, Ubugenzacyaha n’Ubushinjacyaha bukaba bwari bwarasabye ko hakorwa ibizamini bya ADN, ikizamini gisuzumirwa mu Budage, umuganga wabisuzumye akaba yaragaragaje ko abaregwa nta ho bahuriye n’umukandara wakoreshejwe mu kwica Kagabo Théophile. Akomeza avuga ko hari ibindi bimenyetso bwari bwashingiyeho bushinja abaregwa, ko mu gufata icyemezo, Urukiko rwazakoresha ubushishozi bwarwo. UKO URUKIKO RUBIBONA [23] Ingingo ya 140 y’Itegeko Ngenga n° 01/12/OL ryo ku wa 02/05/2012 rishyiraho igitabo cy’amategeko ahana, ryakoreshwaga igihe icyaha cyakorwaga iteganya ko" Kwica umuntu ubishaka byitwa ubwicanyi. Bihanishwa igifungo cya burundu." [24] Ingingo ya 119 y’iryo tegeko, igateganya ko ″Mu manza nshinjabyaha, ibimenyetso bishingira ku mpamvu zose z’ibyabaye n’ibyemejwe n’amategeko, ababuranyi bapfa kuba barahawe uburyo bwo kuhaba ngo banyomozanye. Urukiko ruhamya ku buryo butavuguruzwa ko ibimenyetso byose birega cyangwa biregura ari byo kandi ko bishobora kwemerwa. “ [25] Ingingo ya 111 y’itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha iteganya ko “Gushidikanya birengera ushinjwa. Iyo urubanza rwakurikiranywe mu buryo bwose, ntihagire ibimenyetso nyakuri biboneka byemeza nta shiti abacamanza ko ushinjwa yakoze icyaha koko, bagomba kwemeza ko atsinzwe.” [26] Dosiye y’urubanza igaragaza ko ku wa 15/04/2018, Uwimanizanye Devotha (umugore wa Kagabo Théophile) yagiye gutanga ikirego mu Bugenzacyaha, mu ibazwa rye akaba yarasobanuye ko mu ma saa kumi n’imwe z’igitondo ari bwo umugore w’uwitwa Pascal yaje kumubyutsa amubwira ko umugabo we yishwe. Asobanura ko yumvise abaturage bavuga ko polisi yajyanye abakekwaho kumwica harimo Rukara na Munigantama ko ariko uretse kumva amazina, abo bantu atabazi. Yavuze ko ku wa 14/04/2018 yavuye mu rugo agiye guhinga, agasiga umugabo mu rugo avuga ko ari bujye i Byumba kwiga umwuga wo gukanika telefoni no kugura amaguru y’imashini idoda, akaba yari afite 35.000 Frw asanganywe, asaba umugore kumuha andi 20.000 Frw yari abitse, ateganya ko ashobora gusanga amaguru y’imashini ahenze. [27] Mu nyandikomvugo yo ku wa 15/04/2018 mu Bugenzacyaha, uwitwa Habinshuti Théophile yagiye gutanga ikirego arega Hategekimana Jean Claude alias Bishyinga kuba yaramutegeye mu nzira akamwambura telefoni ye. Asobanura ko akimara kuyimwaka yavugije induru, abanyerondo baratabara, bafata Hategekimana Jean Claude alias Bishyinga bamwaka iyo telefoni, ko ibyo byabaye ku wa 14/04/2018 hagati ya saa mbiri n’igice na saa tatu n’igice, mu Mudugudu wa Kivugiza, mu Kagari ka Kivugiza, mu Murenge wa Byumba. [28] Mu nyandikomvugo yo ku wa 15/04/2018 yakorewe Hategekimana Jean Claude alias Bishyinga mu Bugenzacyaha, abazwa nk’uregwa, asobanura ko atemera icyaha cy’ubwicanyi aregwa bwakorewe Kagabo Théophile kubera ko ari Hafashimana Samuel alias Munigantama na Hagenimana alias Rukara Barungi bamwishe ahari ariko we atigeze abafasha kandi ko bafashwe. Asobanura ko bamunigishije umukandara yari yambaye, barangije bamuzirika ku giti, bamwambura 20.000 Frw yari afite na telefoni, ko Hagenimana alias Rukara Barungi ari we

## Page 7

wakuye ibyo bintu bamwambuye mu mufuka. Avuga ko ku wa 14/04/2018 mu ma saa tatu, ubwo yari avuye mu ishyamba rya Buhambe, Kagabo Théophile yamanutse ku igare, Hafashimana Samuel alias Munigantama arimukuraho aramubwira ngo amuhe amafaranga, ni bwo Hagenimana na Hafashimana bafashe umukandara yari yambaye bawuzingira mu ijosi barakurura ahita yitura hasi, arasamba, bamaze kumwica bamuzirika ku giti, igare rye baryegeka iruhande rwe, ko birangiye bamanukanye gato, Hategekimana Jean Claude aliasBishyinga agahita ataha, na bo baca ukwabo. Avuga ko nta ruhare yagize mu iyicwa rye, ko impamvu atamutabarije, ari uko bamubwiye ko navuza induru na we bari bumurangize, ko kandi naramuka avuze ko ari bo bamwishe bagafungwa, nibafungurwa bazamwica. [29] Mu ibazwa ryakorewe mu Bugenzacyaha ku wa 15/04/2018, Hafashimana Samuel alias Munigantama avuga ko atemera icyaha cy’ubwicanyi aregwa, yabajijwe aho yavanye amaraso ari ku myenda yambaye, ibizinga biri ku ipatalo yambaye, mu nzara no mu mutwe, asubiza ko ari ayo yavuye mu mutwe aho yakomeretse bamukubita kandi ko uwamukubise atamuzi. Avuga ko yabonye Hategekimana Jean Claude alias Bishyinga na Hagenimana alias Rukara Barungi ku mugoroba wo ku wa 14/04/2018 mu ma saa kumi n’imwe (17h00) muri centre ya Karago buri wese yigendera, ko atigeze avugana na bo kuko yari agiye guhaha, ko ku wa 14/04/2018 kuva saa moya (19h00) kugeza ku wa 15/04/2018 saa kumi n’imwe (5h00) yari mu rugo wenyine, ko yamaze guteka agahita aryama, uwitwa Ukundimana Anuarita akaba yaramubonye. Asobanura kandi ko atari asanzwe azi Kagabo Théophile, ko yamenye ko yapfuye ari uko abanyerondo bamugejeje ahari umurambo, bakavuga ko ari ho yiciwe, kandi ko bamuvana mu rugo atamenye icyo bamutwariye akaba yarabimenye asanze Hategekimana Jean Claude alias Bishyinga arimo gusobanura uko byagenze kugira ngo bamwice. Avuga ko nta cyo asanzwe apfa na Hategekimana Jean Claude alias Bishyinga, ko ariko Bishyinga avukana na Hagenimana alias Rukara Barungi, akaba yumva bashobora kumubeshyera kubera ko aba wenyine, kugira ngo bafatanye ibihano kandi nta cyaha yakoze. [30] Dosiye y’urubanza igaragaza kandi ko mu nyandikomvugo yakorewe mu Bugenzacyaha ku wa 15/04/2018, Hagenimana alias Rukara Barungi ahakana icyaha cy’ubwicanyi, avuga ko abavuga ko bafatanyije kwica Kagabo Théophile bamubeshyera, kubera ko mu ijoro ryo ku wa 14/04/2018 rishyira ku wa 15/04/2018, abanyerondo bamuvanye mu rugo bamubwira ko yagize uruhare mu kwiba telefoni afatanyije na Hategekimana Jean Claude alias Bishyinga, bamumanura ku muhanda bahasanga Bishyinga bamwaka ya telefoni, bababwira ko babajyanye kuri polisi, bageze mu muhanda w’Abarera (Buhambe), bahasanga umuntu bahiciye bamuzirikiye ku giti. Avuga ko ku wa 14/04/2018 atigeze abonana na Hategekimana Jean Claude alias Bishyinga, ko adasanzwe azi Kagabo Théophile, uwitwa Nteziryayo Anastase akaba yatanga ubuhamya ko yamubonye ava kugura avoka. [31] Ku wa 15/04/2018, Muhawenimana Tsitsiri yabajijwe mu Bugenzacyaha, avuga ko ahakana icyaha cy’ubwicanyi, ko abamushinja ko bafatanyije bamubeshyera, kuko afatwa yaziraga gukina urusimbi, ko ku wa 14/04/2018 yavuye muri centre ya Karago mu ma saa tanu n’igice (11h30). [32] Ku wa 15/04/2018, Hategekimana Jean Claude alias Bishyinga yabajijwe mu Bugenzacyaha nk’umutangabuhamya icyo yaba azi ku rupfu rwa Kagabo Théophile, asobanura ko nka saa tatu z’ijoro, ari kumwe na Barungi Rukara na Hafashimana bazamutse mu muhanda wa Buhambe bahura na Kagabo Théophile ataha, Barungi Rukara aramuhagarika, amusaba

## Page 8

kubaha ibyo afite, atabibaha bakamwica. Akomeza avuga ko Hafashimana yamukuye ku igare yitura hasi, bamwambura umukandara yari yambaye bawuzirika mu ijosi barakurura, Rukara akurura amaguru ahita asamba arapfa, ko birangiye bafashe wa mukandara bamuzirika ku gati kari hafi y’umuhanda bahita batandukana, Hategekimana Jean Claude alias Bishyinga ataha wenyine, bagenzi be (Hafashimana Samuel alias Munigantama na Hagenimana alias Rukara Barungi) bo baratahana. [33] Hategekimana Jean Claude alias Bishyinga avuga kandi ko bari bamenye ko Kagabo Théophile yagiye i Byumba uwo munsi kuko Hafashimana Samuel alias Munigantama yari yamusunikiye igare agenda ahetse ibirayi kandi ko bari bamenye ko ataha akerewe, ko mu gutaha yari afite agafuka k’ifu, amaze kwicwa Rukara agenda akikoreye ari kumwe na Hafashimana, na ho igare baryegeka ku mukingo hafi n’umurambo. Avuga kandi ko bamaze kwica Kagabo Théophile atashye, yahuye n’abanyerondo bamufata bavuga ko yambuye uwitwa Jenerali (Habinshuti Théophile) telefoni ye, bahita bamujyana kuri polisi, bahageze bavuga ko Rukara na Hafashimana bishe umuntu bari kumwe na Hategekimana Jean Claude alias Bishyinga. Hategekimana Jean Claude alias Bishyinga asobanura kandi ko amaze kwambura Habinshuti Théophile alias Jenerali telefoni, undi yasakuje agahita ayimusubiza, aramanuka ahurira na bagenzi be ku kiraro kinini hafi y’icyayi, barazamukana, ko bahuriye kuri icyo kiraro bose bateze abagenzi, aba ari bwo bacura umugambi wo gukora ibyo bakoze. [34] Inyandikomvugo yakorewe mu Bugenzacyaha ku wa 15/04/2018, umutangabuhamya witwa Twizerimana Vincent, asobanura ko hagati ya saa mbiri n’igice (20h30) na saa munani n’igice (2h30) ari bwo Habinshuti Théophile alias Jenerali yavugije induru ko uwitwa Hategekimana Jean Claude alias Bishyinga amwambuye telefoni bajya kumushaka, bamugezeho ababwira ko yari kumwe na Rukara na Hafashimana, bamwaka iyo telefoni bayisubiza nyirayo. Akomeza asobanura ko bagumanye Hategekimana Jean Claude alias Bishyinga bajyana kureba Rukara basanga aryamye baramubyutsa, bamubajije ibyo bamaze gukora arabihakana, Hategekimana Jean Claude alias Bishyinga abisubiramo, Rukara abyumvise amukubita ingumi ku munwa ava amaraso, babonye batangiye kurwana bafata umwanzuro wo kubashyikiriza polisi, bageze ahitwa mu rw’Abarera abari imbere babona umurambo w’umuntu, babimenyesha umukuru w’Umudugudu wa Gasiza bahita baza n’izindi nzego zirahagera. Twizerimana Vincent avuga kandi ko abaregwa bose yari yababonye muri centre arikoahura na buri wese ukwe, akaba akeka ko ari bo bishe Kagabo Théophile kubera ko bavuze ko bari hamwe (uko ari batatu), akaba kandi ari bo bafashwe muri ayo masaha, kandi basanzwe bazwiho ubuzererezi. [35] Inyandikomvugo yo ku wa 15/04/2018 yakorewe umutangabuhamya witwa Nteziryayo Anastase mu Bugenzacyaha, asobanura ko Habinshuti Théophile yarimo kunywera mu kabari ke, atashye asanga Hategekimana Jean Claude alias Bishyinga yamutegeye mu nzira amwambura telefoni ye, Habinshuti Théophile alias Jenerali ahita agaruka muri ako kabari amubwira ko asanze Hategekimana Jean Claude alias Bishyinga yamutegeye mu nzira amwambura telefoni ye, ko muri uwo mwanya Hategekimana Jean Claude alias Bishyinga na we yahise aza muri ako kabari avuga ko Habinshuti Théophile alias Jenerali amubeshyera, ko ahubwo yarimo koga mu ngezi telefoni yitura hasi arayitoragura. Nteziryayo Anastase avuga kandi ko yabwiye Hategekimana Jean Claude alias Bishyinga ko natamubwiza ukuri amukubita, abona kwemera ko telefoni yayishikuje nyirayo, ni bwo yahise ayimusubiza, ko Hategekimana Jean Claude alias Bishyinga adasanganywe ingeso yo kwiba, ahubwo akora akazi ko kwisuma.

## Page 9

[36] Inyandikomvugo y’ibazwa yo ku wa 15/04/2018 yakorewe Habimana Laurent mu Bugenzacyaha, asobanura ko bari ku irondo bafata Hategekimana Jean Claude alias Bishyinga wari wateze Habinshuti Théophile akamwambura telefoni ye, bajya no gufata Hagenimana alias Rukara Barungi bamubaza niba yari kumwe na Hategekimana Jean Claude alias Bishyinga mu gihe yamburaga telefoni, ko bahise babajyana kuri polisi, bakazenguruka umuhanda, muri uwo muhanda bahasanga umuntu urimo umukandara mu ijosi uhambiriye ku giti, batabaza polisi ijyana abo bari bafashwe kubera telefoni, bajya no gufata Hafashimana Samuel alias Munigantama. Avuga ko Hategekimana Jean Claude alias Bishyinga, Hagenimana alias Rukara Barungi na Hafashimana Samuel alias Munigantama bavuze ko batazi Kagabo Théophile ko ari ubwa mbere bamubonye, ko kandi nta cyo yamenya k’uwaba yaramwishe kubera ko abaregwa bafashwe saa mbiri z’umugoroba (20h00 PM), uwo murambo ukabonwa saa saba z’ijoro (1h00 AM). [37] Inyandikomvugo y’ibazwa yo ku wa 15/04/2018 yakorewe Hakizimana Jean Claude mu Bugenzacyaha, asobanura ko ku wa 14/04/2018 yari ku irondo na bagenzi be, saa tatu z’ijoro (21h00) , bumva Habinshuti Théophile atabaza ko bamwambuye telefoni kandi ko ayambuwe na Hategekimana Jean Claude alias Bishyinga, ko muri uwo mwanya Hategekimana Jean Claude alias Bishyinga na we yahise abasanga aho bari, avuga ko azanye telefoni atoraguye, ko bamubajije abo bari hamwe, asubiza ko yari kumwe na Hagenimana alias Rukara Barungi na Hafashimana Samuel alias Munigantama ko kandi bo bumvise Habinshuti Théophile avugije induru bahita biruka, Hafashimanasamuel ajya mu Kagari ka Nyamabuye atuyemo. Hakizimana Jean Claude avuga kandi ko bagiye kureba Hagenimana alias Rukara Barungi iwabo, bamujyana hamwe na Hategekimana Jean Claude alias Bishyinga kuri polisi, bageze mu muhanda bahasanga umuntu wapfuye, umukandara uziritse mu ijosi ufashe no ku giti, umurambo wegetse ku mukingo, babona indangamuntu irambitse hasi yanditseho amazina ya Kagabo Théophile, simcard ya tigo n’utundi dupapuro. Avuga ko babimenyesheje umuyobozi w’Akagari ka Kivugiza na we amenyesha izindi nzego ko hari umuntu waguye mu Kagari ka Nyamabuye, polisi ihagera isanga umuyobozi w’Umudugudu wa Gasiza yahagejeje na Hafashimana Samuel kubera ko yavugwaga mu bari kumwe na Hategekimana Jean Claude alias Bishyinga na Hagenimana alias Rukara Barungi mu kwambura telefoni, ko kandi kuva mu Mudugudu wa Kivugiza aho bavanye Hategekimana Jean Claude alias Bishyinga na Hagenimana alias Rukara Barungi, kugera aho basanze umurambo wa Kagabo Théophile hari intera ireshya n’ibilometero bibiri n’igice. [38] Ku wa 15/04/2018, uwitwa Ngaruyinka François yakorewe inyandikomvugo mu Bugenzacyaha, asobanura ko bamuhamagaye kuri telefoni bamubwira ko haruguru y’iwe hapfiriye umuntu, arazamuka atabaye asanga hari polisi n’ibisambo byari byafashwe, ko bambitse umurambo wa Kagabo Théophile ukajyanwa kwa muganga, akaba atarashoboye kumenya abamwishe. [39] Mu nyandikomvugo yo ku wa 23/04/2018 yakorewe mu Bushinjacyaha, Hagenimana alias Rukara Barungi yahakanye icyaha cy’ubwicanyi akurikiranyweho, avuga ko atari azi Kagabo Théophile, ko atazi n’aho yari atuye, ko baje kumufata iwe mu ma saa tanu n’igice z’ijoro ku kibazo cya telefoni Hategekimana Jean Claude aliasa Bishyinga yari yibye, bagera kuri polisi akumva ari kubashinja kwica umuntu.

## Page 10

[40] Mu nyandikomvugo yo ku wa 23/04/2018 yakorewe mu Bushinjacyaha, Muhawenimana Titus yabajijwe niba yemera icyaha cy’ubwicanyi avuga ko atacyemera, ko atazi Kagabo Théophile wishwe, ko Umuyobozi w’Umudugudu yamuvanye iwe akamushyira mu bishe Kagabo Théophile ngo kubera ko akina urusimbi. Avuga kandi ko atigeze abonana na Hategekimana Jean Claude alias Bishyinga ku wa 14/04/2018, ko yamusanze kuri polisi gusa. [41] Inyandikomvugo yo ku wa 23/04/2018 yakorewe mu Bushinjacyaha, Hafashimana Samuel alias Munigantama ahakana icyaha cy’ubwicanyi, avuga ko atari azi Kagabo Théophile, ndetse ko atazi impamvu yateye Hategekimana Jean Claude alias Bishyinga kumushinja icyaha atakoze, ko no ku wa 14/04/2018, yageze mu rugo saa kumi n’imwe z’umugoroba, avuye kugura ibirayi muri centre ya Karago. [42] Muri dosiye y’urubanza harimo kandi inyandiko ebyiri (2) z’Ubugenzacyaha, imwe yiyambaza impuguke yo gupima umubiri wa Kagabo Théophile, hakagaragazwa niba ugifite ubuzima no kugaragaza icyateye igikomere afite mu gahanga, indi yiyambaza impuguke yo gupima ADN, hakagaragazwa niba ibimenyetso byabonetse ku mukandara byahuzwa na ADN yafashwe ku mukandara wa Kagabo Théophile, no kugaragaza niba ibimenyetso byafashwe ku mukandara byahuzwa n’abakekwa gukora icyaha. Raporo ya muganga yemeza ko Kagabo Théophile yapfuye anizwe. Inyandikomvugo y’ifatira ya telefoni yari ifitwe na Hategekimana Jean Claude alias Bishyinga n’inyandikomvugo isubiza Habinshuti Théophile telefoni yari yafatiriwe. [43] Dosiye y’urubanza igaragaza kandi inyandiko yiyambaza impuguke yakorewe mu Bushinjacyaha ku wa 17/05/2018, isaba gusuzuma umukandara no kuwuhuza n’abakekwaho gukora icyaha hifashishijwe ikizamini cya ADN, no gusuzuma ibikumwe, kugaragaza niba abakekwaho gukora icyaha barakoze kuri uwo mukandara cyangwa niba hari umwe muri bo wawukoreshaga. Raporo y’ikizamini cya ADN yashyikirijwe Ubushinjacyaha ku Rwego Rwisumbuye rwa Gicumbi ku wa 22/08/2018, ikaba igaragaza ko abaregwa batigeze bakora kuri uwo mukandara. [44] Urukiko Rukuru rwafashe icyemezo rushingiye ku mvugo ya Hategekimana Jean Claude yo mu Bugenzacyaha ashinja Hafashimana Samuel alias Munigantama na Hagenimana alias Rukara Barungi, rusanga n’ubwo bwose yaje kuyihakana, itateshwa agaciro kubera ko uburyo yasobanuye imikorere y’icyaha, bigaragara ko atari ibintu yahimbye abitewe no gukubitwa kuko nta n’ikimenyetso agaragaza cyemeza ko yakubiswe koko. Imvugo ya Hategekimana Jean Claude alias Bishyinga rwayihuje kandi na raporo ya muganga yemeza ko Kagabo Théophile yanizwe, na raporo y’inzego z’ibanze, rusanga abaregwa bahamwa n’icyaha cy’ubwicanyi. [45] Ku birebana no kuba hatagaragazwa uburyo abaregwa bacuze umugambi wo gukora icyaha cy’ubwicanyi, Urukiko rurasanga ibisobanuro byatanzwe na Hategekimana Jean Claude alias Bishyinga mu ibazwarye ryo mu Bugenzacyaha, aho yasobanuye ko amaze kwambura Habinshuti Théophile telefoni ye yavugije induru ahita ayimusubiza, amanuka ku kiraro kinini hafi y’icyayi ahahurira na Hafashimana Samuel alias Munigantama na Hagenimana alias Rukara Barungi bose bateze, bahita bajya umugambi wo kuza gutega Kagabo Théophile, atakwemera kubaha ibyo afite ku neza bakamwica, Urukiko rurasanga ibisobanuro byatanzwe na Hategekimana Jean Claude alias Bishyinga biteye urujijo, mu gihe umutangabuhamya witwa Twizerimana Vincent ubwo yabazwaga mu Bugenzacyaha, yavuze ko Habinshuti Théophile

## Page 11

yatabaje avuga ko Hategekimana Jean Claude alias Bishyinga amwambuye telefoni, bajya kumureba bagasanga ari wenyine, ibyo avuga ko yari kumwe na Hafashimana Samuel alias Munigantama na Hagenimana alias Rukara Barungi, ntibishoboka, kuko kuva icyo gihe yagumye mu maboko y’abashinzwe irondo, byumvikanisha ko umugambi wo kwica Kagabo Théophile utacuzwe nyuma y’uko Habinshuti Théophile yamburwa telefoni. [46] Ku kibazo cyo kumenya isaha Kagabo Théophile yiciweho, Urukiko rurasanga isaha ya saa tatu z’ijoro yaravuzwe na Hategekimana Jean Claude alias Bishyinga mu buhamya yatanze ashinja bagenzi be, ibi na byo kubihuza n’ubuhamya bwatanzwe n’abanyerondo bafashe Hategekimana Jean Claude alias Bishyinga na bagenzi be bahuriza ku kuba guhera mu ma saa mbiri z’ijoro ryo ku wa 14/04/2018 bari kumwe n’abakekwaho gukora icyaha kugeza saa saba (1h00) zo ku wa 15/04/2018, ubwo babonaga umurambo wa Kagabo Théophile, na byo biteye urujijo, bigaragaza uguhuzagurika kwa Hategekimana Jean Claude alias Bishyinga mu buhamya yatanze, ndetse binateye kwibaza indi saha y’umugoroba abaregwa baba bariciyeho KAGABO Théophile. [47] Urukiko rurasanga, kuba Hategekimana Jean Claude alias Bishyinga yaremereye mu Bugenzacyaha ko yabonye Hafashimana Samuel alias Munigantama na Hagenimana alias Rukara Barungi bica Kagabo Théophile, bidahagije kugira ngo abaregwa bahamwe n’icyaha cy’ubwicanyi, mu gihe nta bindi bimenyetso bishimangira ubuhamya bwa Hategekimana Jean Claude alias Bishyinga, wanageze nyuma akavuga ko ubuhamya yatanze budahuye n’ukuri, cyane ko nyuma yo gusuzuma ikizamini cya ADN, mu rwego rwo guhuza ADN z’abaregwa n’umukandara wakoreshejwe mu kwica Kagabo Théophile, igisubizo cya muganga kigaragaza ko nta turemangingo (ADN) tw’abaregwa, tugaragara kuri uwo mukandara wakoreshejwe mu iyicwa rya Kagabo Théophile. [48] Urukiko rurasanga iperereza risabwa n‘abaregwa, ritari ngombwa, harebwe raporo ya muganga wapimye ADN igaragaza ko ntaho abaregwa bahuriye n’umukandara wakoreshejwe mu kwica, ubuhamya bwatanzwe n’abashinzwe irondo, byose bigaragaza ugushidikanya ku kuri k’ubuhamya bwashingiweho n’Urukiko Rukuru mu guhamya icyaha abajuriye bwatanzwe na Hategekimana Jean Claude alias Bishyinga wavuze ko yari kumwe na bagenzi be bica Kagabo Théophile.Rurasanga kandi ikindi kimenyetso cya raporo y’inzego z’ibanze ivuga ko abaregwa bitwara nabi nacyo cyashingiweho n’Urukiko Rukuru mu kubahamya icyaha, nta shingiro cyahabwa, kubera ko kuba abantu bafite imyitwarire idashimwa na rubanda, bitavuze ko ibibazo byose bivutse bigomba kubitirirwa no mu gihe bidafitiwe ibimenyetso. [49] Urukiko rushingiye ku ngingo z’amategeko zavuzwe haruguru no ku bisobanuro byose byatanzwe, rusanga ubujurire bwatanzwe na Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi bufite ishingiro, uruhare rwabo mu cyaha cyo kwica Kagabo Théophile rukaba rushidikanywaho. III. ICYEMEZO CY’URUKIKO [50] Rwemeje ko ubujurire bwa Hategekimana Jean Claude alias Bishyinga, Hafashimana Samuel alias Munigantama n‘ubwa Hagenimana alias Rukara Barungi, bufite ishingiro;

## Page 12

[51] Rwemeje ko urubanza n° RPA 00943/2018/HC/KIG rwaciwe n’Urukiko Rukuru ku wa 28/02/2019, ruhindutse mu ngingo zarwo zose; [52] Rwemeje ko Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi, badahamwa n’icyaha cy’ubwicanyi bakurikiranyweho kubera gushidikanya; [53] Rutegetse ko Hategekimana Jean Claude alias Bishyinga, Hafashimana Samuel alias Munigantama na Hagenimana alias Rukara Barungi, bahita barekurwa uru rubanza rukimara gusomwa; [54] Rutegetse ko amagarama y’urubanza aherera ku Isanduku ya Leta.