UBUSHINJACYAHA vs IRADUKUNDA JMV

# UBUSHINJACYAHA vs IRADUKUNDA JMV

- Source: Amategeko - Section: Decisions (Judgements) - Date: 2023-04-24 - Case/document no.: RPAA 00754/2021/CA - Collection: Court of Appeal

## Text

## Page 1

UBUSHINJACYAHA vs IRADUKUNDA [Rwanda URUKIKO RW’UBUJURIRE – RPAA 00754/2021/CA (Kanyange, P.J.) 24 Mata 2023] Amategeko agenga ibimenyetso – Ubuhamya – Nta cyabuza ko uwakorewe icyaha asobanura ibyamubayeho, Urukiko akaba ari rwo rusuzuma ireme ryabyo rubigereranya n’ibindi bimenyetso, uwakorewe icyaha ntagomba gufatwa nk’umutangabuhamya uvugwa mu ngingo ya 63 y’Itegeko Nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo kuko iyo ngingo ivuga umwana wumviswe nk’umutangabuhamya, ni ukuvuga uvuga ibyo yabonye cyangwa yumvise ku byerekeye ikiburanwa, bitandukanye n’uvuga ibyamubayeho. Incamake y’ikibazo: Uru rubanza rwatangiriye mu Rukiko Rwisumbuye rwa Ngoma uregwa akurikiranywe ku cyaha cyo gusambanya umwana, buvuga ko ku italiki ya 16/10/2018 yasambanyije umwana witwa U.D., nuko ntiyahita abivuga ngo kuko Iradukunda(uregwa) yari yamubwiye ko nabivuga azamwica; nuko nyuma U.D amaze kumenya ko Iradukunda arwaye SIDA, agira ubwoba abibwira nyina, nawe abibwira ubuyobozi atangira gukurikiranwa. Uregwa yaburanye ahakana icyaha avuga ko ashinjwa n’abantu bo mu muryango umwe, ko yabeshyewe bitewe n’uko yakoreye uwitwa Mutazana, agiye kumwishyuza bavugana nabi. Urwo Rukiko rwaciye urubanza rwemeza ko uregwa ahamwa n’icyaha rumuhanisha igifungo cya burundu. Uregwa yajuriye mu Rukiko Rukuru, Urugereko rwa Rwamagana, avuga ko yahamijwe icyaha hashingiwe ku bimenyetso bitamushinja icyaha. Urwo rukiko narwo rwaciye urubanza rusanga atarashoboye kuvuguruza ibimenyetso byashingiweho mu kumuhamya icyaha ahubwo avuga gusa ko asanganywe ikibazo n’umuryango w’umwana wahohotewe ariko ntabitangire gihamya. Rwasanze imvugo y’umwana wahohotewe n’iy’umubyeyi we zigomba guhabwa agaciro hashingiwe ku murongo watanzwe n’Urukiko rw’Ikirenga mu rubanza Nº RPAA 0012/08/CS. Uregwa yatanze ubujurire bwa kabiri mu Rukiko rw’Ubujurire avuga ko Urukiko Rukuru, Urugereko rwa Rwamagana rwamuhamije icyaha cyo gusambanya umwana nta kimenyetso cyerekana ko yakoze icyo cyaha, ko ibimenyetso byashingiweho bishidikanywaho. Ubushinjacyaha bwo bwaburanye buvuga ko uwajuriye akwiye gutanga ibimenyetso bivuguruza ibyo Urukiko Rukuru rwashingiyeho; ko ku birebana n’ubuhamya bw’umwana wakorewe icyaha, imvugo ye ishimangirwa n’imvugo z’abandi bana bari kumwe kuko bari batatu ariko asigarana n’umwe aramusambanya, abandi barahunga, ko kandi nubwo bose bari bafite imyaka iri munsi ya 14, hari abandi bantu bakuru bumvise ibyo abo bana bavuze. Incamake y’icyemezo: Nta cyabuza ko uwakorewe icyaha asobanura ibyamubayeho, Urukiko akaba ari rwo rusuzuma ireme ryabyo rubigereranya n’ibindi bimenyetso, uwakorewe icyaha ntagomba gufatwa nk’umutangabuhamya uvugwa mu ngingo ya 63 y’Itegeko Nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo kuko iyo ngingo ivuga umwana wumviswe nk’umutangabuhamya, ni ukuvuga uvuga ibyo yabonye cyangwa yumvise ku byerekeye ikiburanwa, bitandukanye n’uvuga ibyamubayeho. Ubujurire bufite ishingiro;

## Page 2

Uregwa ntahamwa n’icyaha. Amategeko yashingiweho: Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, Ingingo ya 111. Itegeko Nº 15/204 ryo ku wa 12/06/2004 ryerekeye ibimenyetso mu manza n’itangwa ryabyo, Ingingo ya 63. Imanza zifashishijwe: RPAA 00177/2018/CA, Ubushinjacyaha vs. Rwagitera rwaciwe n’Urukiko Rw’Ubujurire ku wa 21/02/2020. RPAA 0118/11/CS, Ubushinjacyaha vs. Ngurinzira rwaciwe n’Urukiko rw’Ikirenga ku wa 13/11/2013. Urubanza I. IMITERERE Y’URUBANZA [1] Iradukunda Jean Marie Vianney yarezwe n’Ubushinjacyaha mu Rukiko Rwisumbuye rwa Ngoma icyaha cyo gusambanya umwana, buvuga ko ku italiki ya 16/10/2018 ubwo yarimo yuhira imyaka yabonye abana bavuye kuvoma maze arabahamagara ngo baze abahe avoka, bamugezeho arababwira ngo bose bamuhe abarongore, abana baramubwira ngo nabanze uwitwa U.D., aramufata amutura hasi abandi bana babibonye bahita biruka ariko ntibabivuga kuko ngo bari bazi ko ari ugukina, U.D nawe ageze mu rugo ntiyabivuga ngo kuko Iradukunda Jean Marie Vianney yari yamubwiye ko nabivuga azamwica; ko nyuma U.D yongeye kubonana na ba bana bari kumwe maze bamubwira ko niba Iradukunda yaramusambanyije yabivuga kuko arwaye SIDA, maze agira ubwoba abibwira nyina, nawe abibwira ubuyobozi buhita bumufata. [2] Iradukunda Jean Marie Vianney yaburanye ahakana icyaha avuga ko ashinjwa n’abantu bo mu muryango umwe, ko yabeshyewe bitewe n’uko yakoreye uwitwa Mutazana, agiye kumwishyuza bavugana nabi. [3] Mu rubanza nº RP 00684/2018/TGI/NGOMA rwaciwe ku wa 30/01/2020, Urukiko Rwisumbuye rwa Ngoma rwasanze ibimenyetso Ubushinjacyaha bwatanze birimo cyane cyane imvugo z’umwana wasambanyijwe, wasobanuye neza ibyamubayeho, ibyo yavuze bugahura n’ibyo abandi bana bari kumwe bavuze hamwe na raporo ya muganga igaragaza ko hari ibintu bidasanzwe byagaragaye ku gitsina cya U.D, bihagije kugira ngo Iradukunda Jean Marie Vianney ahamwe n’icyaha aregwa, rumuhanisha igifungo cya burundu. [4] Iradukunda Jean Marie Vianney yajuriye mu Rukiko Rukuru, Urugereko rwa Rwamagana, avuga ko yahamijwe icyaha hashingiwe ku bimenyetso bitamushinja icyaha.

## Page 3

[5] Urukiko rwaciye urubanza nº RPA 00879/2018/HC/RWG ku wa 28/10/2021, rusanga Iradukunda Jean Marie Vianney atarashoboye kuvuguruza ibimenyetso byashingiweho mu kumuhamya icyaha ahubwo avuga gusa ko asanganywe ikibazo n’umuryango w’umwana wahohotewe ariko ntabitangire gihamya. Rwasanze imvugo y’umwana wahohotewe n’iy’umubyeyi we zigomba guhabwa agaciro hashingiwe ku murongo watanzwe n’Urukiko rw’Ikirenga mu rubanza nº RPAA 0012/08/CS rwaciwe ku wa 26/11/20100, rugasobanura ko nta cyabuza ko imvugo z’uwahohotewe zumvwa n’Urukiko kandi rukaziha agaciro igihe rusanze zihuye n’ukuri. Rwasanze kandi imvugo y’umutangabuhamya witwa Iradukunda Lea itakwamburwa agaciro no kuba harabayeho kwibeshya mu kwandika izina rye rya kabiri, kuko ibyo yavuze ari ukuri bitewe n’uko yabihagazeho kandi bigahura n’ibyo U.D. yavuze; ko na raporo ya muganga ari ikimenyetso cy’uko umwana yahohotewe kuko igaragaza ko nta karangabusugi afite [6] Urukiko rwasanze ariko Iradukunda Jean Marie Vianney akwiye kugabanyirizwa igihano ku mpamvu y’uko ari ubwa mbere akurikiranywe n’ubutabera kandi icyaha yakoze kikaba kitarateje ingaruka zikomeye cyane, maze rumuhanisha igifungo cy’imyaka 25. [7] Iradukunda Jean Marie Vianney yatanze ubujurire bwa kabiri mu Rukiko rw’Ubujurire avuga ko Urukiko Rukuru, Urugereko rwa Rwamagana rwamuhamije icyaha cyo gusambanya umwana nta kimenyetso cyerekana ko yakoze icyo cyaha, ko ibimenyetso byashingiweho bishidikanywaho. [8] Urubanza rwaburanishijwe mu ruhame ku wa 07/02/2023, Iradukunda Jean Marie Vianney yunganirwa na Me RUGEYO Jean naho Ubushinjacyaha buhagarariwe na Mukunzi Faustin, Umushinjacyaha ku rwego rw’igihugu. II. IKIBAZO KIGIZE URUBANZA N’ISESENGURA RYACYO: Kumenya niba Urukiko rwarashingiye ku bimenyetso bishidikanywaho [9] Iradukunda Jean Marie Vianney n’umwunganira bavuga ko Urukiko Rukuru, Urugereko rwa Rwamagana rwashingiye ku bimenyetso bishidikanywaho maze rukomeza kwemeza ko Iradukunda ahamwa n’icyaha cyo gusambanya umwana. [10] Bavuga ko ikimenyetso cya mbere cyashingiweho kandi gishidikanywaho kigizwe n’imvugo y’umwana bivugwa ko Iradukunda yasambanyije hamwe n’imvugo za bagenzi be, izo mvugo zikaba zishidikanywaho kuko bose bari munsi y’imyaka 14 y’amavuko kandi Itegeko ryerekeye ibimenyetso mu manza n’itangwa ryabyo rivuga ko bene ubwo buhamya bugomba gushyigikirwa n’ibindi bimenyetso. Iradukunda Jean Marie Vianney avuga ko impamvu abo bana bamushinje ari amafaranga se wabo w’umwana aregwa ko yasambanyije witwa Mutazana Pierre yari amubereyemo 6000 Frw, ajya kuyamwishyuza, mu gihe bakibirimo aba aribwo bamurega ko yasambanyije uwo mwana, ko na nyina w’uwo mwana yari amurimo 600 Frw. [11] Bavuga kandi ko Urukiko rwashingiye ku buhamya bwa nyina w’umwana wasambanijwe kandi atari ibintu yiboneye ahubwo yaravuze ibyo yabwiwe n’umwana uri munsi y’imyaka 14, ko rero ubwo buhamya nabwo bushidikanywaho.

## Page 4

[12] Ikindi kimenyetso bavuga ko cyashingiweho kandi gishidikanywaho kigizwe na raporo y’inzego z’ibanze kuko nayo ishingiye ku makuru yavuzwe n’umwana bivugwa ko yasambanyijwe, ko na raporo ya muganga yashingiweho itera gushidikanya kuko nubwo ivuga ko umwana nta karangabusigi afite, itemeza nta gushidikanya ko kavanweho n’uregwa kubera igikorwa cyo kumusambanya. [13] Bavuga kandi igishimangira ko ibimenyetso byashingiweho bishidikanywaho ari uko bitumvikana uburyo umwana w’imyaka 12 yafatwa ari kumwe n’abandi ariko bose bagaceceka, uwasambanyijwe akabivuga hashize icyumweru nk’uko bigaragara mu gika cya 9 cy’urubanza rujuririrwa. [14] Uhagarariye Ubushinjacyaha avuga ko ibyo Iradukunda Jean Marie Vn’umwunganira bavuga nta shingiro bifite, kuko bari bakwiye gutanga ibimenyetso bivuguruza ibyo Urukiko Rukuru rwashingiyeho; ko ku birebana n’ubuhamya bw’umwana wakorewe icyaha, imvugo ye ishimangirwa n’imvugo z’abandi bana bari kumwe kuko bari batatu ariko asigarana n’umwe aramusambanya, abandi barahunga, ko kandi nubwo bose bari bafite imyaka iri munsi ya 14, hari abandi bantu bakuru bumvise ibyo abo bana bavuze, hakaba n’imvugo ya nyina w’umwana wasambanyijwe. Asobanura ko uwo mwana yari yatinye kubibwira umubyeyi we, abivuga ari uko abandi bana bari kumwe bamubwiye ko uwamusambanyije arwaye SIDA, ko kandi umubyeyi atajya gusebya umwana we abeshya ko yasambanyijwe kubera 600 Frw, ahubwo abenshi baba badashaka ko bimenyekana. [15] Ku birebana na raporo y’inzego z’ibanze, uhagarariye Ubushinjacyaha avuga ko ntaho Urukiko Rukuru rwayishingiyeho, naho ku byerekeye raporo ya muganga, avuga ko nubwo atari ikimennyetso kamara, ariko bigaragara ko muganga yabonye ko umwana yasambanyijwe, ko kandi atari kuvuga uwamusambanyijwe mu gihe nta kizamini cya ADN cyakozwe. Avuga kandi ko ibivugwa na Iradukunda n’umwukuvuga ko muganga ataragaragaje niba akarangabusugi karavuyeho bitewe na Iradukunda, nta shingiro bigomba guhabwa, kuko muganga agaragaza ibyo yabonye kandi akaba yaragaragaje ko umwana nta karangabusugi agifite, ibyo yabonye bikaba ari byo bifasha Urukiko kugira ngo rumenye niba koko harabayeho igikorwa cyo gusambanywa. UKO URUKIKO RUBIBONA [16] Ingingo ya 63 y’Itegeko nº 15/204 ryo ku wa 12/06/2004 ryerekeye ibimenyetso mu manza n’itangwa ryabyo, iteganya ko: ‘’Uwo ari we wese ashobora kumvwa nk’umutangabuhamya mu Rukiko keretse abantu badafite ubushobozi bwo kuba abatangabuhamya mu nkiko. Abafatwa nk’abadashobora kuba abatangabuhamya mu nkiko ni abantu batabasha kubara inkuru y’uko ibintu byagenze baramutse batanzweho abatangabuhamya. Abana batarengeje imyaka 14 kimwe n’abantu bakuru badafite ubushobozi bemerewe gutanga ubuhamya mu nkiko batarahiye iyo babasha kubara inkuru y’uko byagenze ariko ubuhamya bwabo bugomba kunganirwa n’ibindi bimenyetso.’’ [17] Ingingo ya 111 y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, iteganya ko :’’Gushidikanya birengera ushinjwa. Iyo urubanza rwakurikiranywe mu buryo bwose, ntihagire ibimenyetso nyakuri biboneka byemeza nta shiti abacamanza ko ushinjwa yakoze icyaha koko, bagomba kwemeza ko atsinze.’’

## Page 5

[18] Iradukunda Jean Marie Vianney anenga ibimenyetso byashingiweho n’Urukiko Rukuru, Urugereko rwa Nyanza, ngo kuko byose bishidikanywaho, bityo ko agomba kugirwa umwere kuko gushidikanya birengera uregwa. [19] Imikirize y’urubanza rwajuririwe, igaragaza ko Urukiko Rukuru, Urugereko rwa Rwamagana rwemeje ko Iradukunda Jean Marie Vianney akomeza guhamwa n’icyaha cyo gusambanya umwana yahamijwe ku rwego rwa mbere, rushingiye ku byo uwo mwana yavuze, bihura n’iby’umubyeyi we yavuze atanga ikirego, rushingira no ku buhamya bwa Iradukunda Lea kuko ibyo yavuze bihuye n’ukuri bitewe n’uko yabihagazeho kandi bigahura n’ibyo U.D.yavuze, no kuri raporo ya muganga igaragaza ko umwana yahohotewe kuko igaragaza ko nta karangabusugi afite. [20] Dosiye igaragaza ko mu ibazwa ry’umwana Iradukunda aregwa ko yasambanyije, wahawe izina rya U.D mu manza za mbere, yasobanuye ko ubwo bari bavuye kuvoma ari kumwe n’abandi bana babiri harimo uwitwa Iradukunda Lea, Iradukunda Jean Marie Vianney yababwiye ngo baze abahe avoka, baratura baragenda, ahita avuga ngo bose baramuha, Iradukunda Lea aramuhakanira, Iradukunda Jean Marie Vianney ahita amufata (afata U.D.) amukubita umutego yitura hasi abandi bahita biruka, amukuramo imyenda aramusambanya, ko yajyaga kuvuza induru akamupfuka umunwa ko kandi arangije kumusambanya yamubwiye ko nabivuga azamwica, bituma abiceceka, abibwira nyina ku bukeye bitewe n’uko Iradukunda1 yari yamubwiye ko yamuteye SIDA maze bimutera ubwoba. [21] Muri dosiye harimo kandi ubuhamya bwa Iradukunda Lea yatangiye mu Bugenzacyaha, aho yavuze ko U.D. asambanywa yari ahari, ko yasambanyijwe na Iradukunda Jean Marie Vianney mu materasi ubwo bari bavuye kuvoma akabahamagara ngo baze abahe avoka agahita amufata, bo bakiruka. Yavuze kandi ko nta muntu babibwiye kuko bari bazi ko ari ugukina. [22] Na none muri dosiye harimo inyandikomvugo itanga ikirego ya Mukashaya Annonciata, umubyei wa U.D., wavuze ko arega Iradukunda Jean Marie Vianney wamusambanyirije umwana avuye kuvoma ari kumwe n’abandi bana, abashukisha kubaha avoka bamugezeho ababwira ngo bose bamuhe, babuze uko bamucika baramubwira ngo U.D. abanze, aramufata abandi bahita biruka, ahita amukubita hasi atangira kumusambanya, ko uwo mwana yatashye ntabivuge kuko uwamusambanyije yamubwiye ko nabivuga azamwica, ko n’abo bana bandi bacecetse, ko U.D. yabivuze ari uko abo bana bari kumwe mabumwiye ko agomba kubibwira mama we kuko uwamusambanyije yanduye SIDA, agira ubwoba arabimubwira. [23] Dosiye irimo kandi raporo ya muganga wasuzumye U.D., igaragaza ko isuzuma ryo ku mubiri (physical examination) nta kintu kidasanzwe ryagaragaje usibye kuba muganga yarasanze nta karangabusugi umwana afite, mu mwanzuro avuga ko hari uburwayi uwo mwana yasanganywe, ko kandi nta karabusugi afite.2 [24] Urukiko rurasanga ku birebana n’imvugo ya U.D., ibyo Iradukunda Jean Marie Vianney n’umwunganira bavuga ko itagombaga gushingirwaho nta shingiro bifite, kuko nk’umuntu uvuga ko yakorewe icyaha, nta cyabuza ko asobanura ibyamubayeho, Urukiko akaba ari rwo rusuzuma ireme ryabyo rubigereranya n’ibindi bimenyetso biba byashatswe n’abashinzwe 1 Ntawamenya niba ari Iradukunda uregwa cyangwa Iradukunda Lea. 2 Nous concluons à une infection génitale à l’examen gynécologique, absence de l’hymen

## Page 6

gukurikirana icyaha, bivuzerero ko uwakorewe icyaha atagomba gufatwa nk’umutangabuhamya uvugwa mu ngingo ya 63 y’Itegeko nº 15/2004 ryo ku wa 12/06/2004 ryavuzwe haruguru, kuko iyo ngingo ivuga umwana wumviswe nk’umutangabuhamya, ni ukuvuga uvuga ibyo yabonye cyangwa yumvise ku byerekeye ikiburanwa, bitandukanye n’uvuga ibyamubayeho. [25] Urukiko rurasanga kandi, hashingiwe ku murongo watanzwe n’Urukiko rw’Ikirenga mu rubanza nº RPAA 0118/11/CS rwaciwe n’Urukiko rw’Ikirenga ku wa 13/11/2013 haburana Ubushinjacyaha na Ngurinzira, nta cyabuza ko Mukashaya Annonciata, umubyeyi wa U.D., atanga ubuhamya ku byabaye ku mwana we kuko ingingo ya 63 y’Itegeko nº 15/2004 ryo ku wa 12/06/2004 ryavuzwe haruguru itabibuza, Urukiko akaba ari rwo rusuzuma agaciro ubwo buhamya bugomba guhabwa burebewe hamwe n’ibindi bimenyetso. [26] Urukiko rurasanga ariko ku birebana n’imvugo ya U.D. nk’uko yibukijwe haruguru, yumvikansha ko ubwo Iradukunda Jean Marie Vianney yamuhamagaraga we n’abandi bana bari kumwe ngo abahe avoka, abo bana barahise biruka, bivuze ko muby’ukuri abo bana batamubonye asambanya U.D., kuko no mu buhamya bw’uwabajijwe witwa Iradukunda Lea, bigaragara ko nubwo yatangiye avuga ko U.D. asambanywa yari ahari, yongeye avuga ko Iradukunda Jean Marie Vianney yamufashe (afata U.D) we n’undi mwana bari kumwe bagahita biruka, bikaba rero byumvikanisha ko nta kindi yabonye kirebana n’igikorwa cyo gusambanywa kwa U.D.. [27] Na none kandi harebwe imvugo ya Mukashaya Annonciata, umubyeyi wa U.D., Urukiko rurasanga nta gishya igaragaza kuko yasubiyemo ibyo U.D. yamubwiye, hakaniyongeraho ko atabimubwiye umunsi bivugwa ko ari wo icyaha cyakoreweho, kuko yavuze ko yabimubwiye mu ijoro ryo ku munsi wakurikiye. [28] Urukiko rurasanga rero imvugo ihari irebana n’igikorwa kigize icyaha Iradukunda Jean Marie Vianney akurikiranyweho, ari iya U.D., iyo mvugo ye ariko ikaba itera urujijo, kuko bitumvikana uburyo yari kuba ari kumwe n’abandi bana, bose bamaze kumenya umugambi wa Iradukunda Jean Marie Vianney wo kubasambanya, bakiruka bakamusiga wenyine kandi ntihagire nibura undi muntu babibwira ngo amutabare cyangwa ateshe uwari ugiye kumusambanya, mu gihe imvugo zabo zumvikanisha ko aho Iradukunda Jean Marie Vianney yarari hatari kure y’inzira abantu banyuramo bajya cyangwa bava kuvoma, ahubwo mu buhamya bwa Iradukunda Lea akavuga ko baketse ko ari imikino, ibi ariko bikaba bivuguruzwa n’ubwo ubwo buhamya bwabo bwumvikanisha ko bari bamaze kumenya ko umugambi wa Iradukunda Jean Marie Vianney ari uwo kubasambanya. Ikindi gishimangira urwo rujijo, ni ukuba U.D. yarageze mu rugo ntabwire umubyeyi we ibyamubayeho, cyangwa ngo abana bari kumwe babimubwire cyangwa babibwire ababyeyi babo. [29] Ku birebana na raporo ya muganga nayo yashingiweho nk’ikimenyetso gishinja Iradukunda Jean Mari Vianney, Urukiko rurasanga ibyo yagaragaje bitemeza mu buryo budashidikanywa ko ari ingaruka z’igikorwa cyo gusambanywa kwa U.D. cyabaye ku wa 15/10/2018, kuko nk’uko inyandiko isaba ko uwo mwana asuzumwa ibigaragaza, hasabwe ko muganga agaragaza niba yarasambanyijwe koko no gusuzuma niba nta burwayi uwamusambanyije yamuteye, ariko nk’uko byasobanuwe haruguru, muganga yavuze gusa ko umwana afite uburwayi bwo mu myanya ndangagitsina (infections génitales) ko kandi nta karangabusugi afite. Harebwe ibikubiye muri iyo raporo, ntaho Urukiko rwashingira ngo

## Page 7

rwemeze ko ubwo burwayi (infection) bwatewe byanze bikunze no kuba yarasambanyijwe cyangwa niba ari uburwayi bushobora gusanganwa n’undi muntu budatewe no gusambanywa. Byongeye kandi mu gihe ubwo burwayi bwaba bwaratewe no kuba U.D. yarasambanyijwe, hagombye kugaragazwa isuzuma ryakorewe Iradukunda Jean Marie Vianney ryemeje ko nawe afite ubwo burwayi. [30] Na none kandi ntaho Urukiko rwashingira ngo rwemeze nta gushidikanya ko U.D. yatakaje akarangabusugi bitewe n’igikorwa cyo gusambanywa avuga ko cyabaye ku wa 15/10/2018, kuko hashingiwe ku rundi rubanza rwaciwe n’uru Rukiko ku birebana n’igishobora gutuma umuntu atakaza akarangabusugi, aho rwashingiye ku bisobanuro bwatanwe n’umuganga rwari rwatumije, wasobanuye ko kuvaho kw’akarangabusugi bitavuze byanze bikunze ko byatewe n’imibonano mpuzabitsina, ko bishobora guterwa n’izindi mpamvu, nka siporo, imirimo itandukanye n’ibindi, maze rusanga ibimenyetso byarimo na raporo ya muganga bitera gushidikanya3, bityo kuba nta bindi bimenyetso isuzuma rya U.D. ryagaragaje byahuzwa n’uko gutakaza akarangabusugi, Urukiko ntirwakwemeza ko ari ingaruka z’igikorwa cyo gusambanywa avuga ko cyabaye ku wa 15/10/2018. [31] Hashingiwe ku bisobanuro byatanzwe, Urukiko rw’Ubujurire rurasanga ibimenyetso byashingiweho n’Urukiko Rukuru, Urugereko rwa Rwamagana atari ibimenyetso simusiga ku buryo budashidikanywaho byatuma hemezwa ko Iradukunda Jean Marie Vianney yakoze icyaha cyo gusambanya umwana, akaba rero agomba kugihanagurwaho hashingiwe ku biteganywa n’ingingo ya 111 y’Itegeko nº 027/2019 ryo ku wa 19/09/2019 ryavuzwe haruguru. III. ICYEMEZO CY’URUKIKO [32] Rwemeje ko ubujurire bwa Iradukunda Jean Marie Vianney bufite ishingiro; [33] Rwemeje ko urubanza nº RPA 0879/2019/HC/RWG rwaciwe n’Urukiko Rukuru, Urugereko rwa Rwamagana ku wa 28/10/2021 ruhindutse; [34] Rwemeje ko Iradukunda Jean Marie Vianney adahamwa n’icyaha cyo gusambanya umwana yari akurikiranyweho kubera gushidikanya; [35] Rwemeje ko Iradukunda Jean Marie Vianney asonewe amagarama y’urubanza kuko yaburanye afunze. 3 Yabisobanuye mu rubanza nº RPAA 00177/2018/CA rwaciwe ku wa 21/02/2020 haburana Ubushinjacyaha na Rwagitera Célestin, igiha cya 22.