UBUSHINJACYAHA v IRADUKUNDA

# UBUSHINJACYAHA v IRADUKUNDA

- Source: Amategeko - Section: Decisions (Judgements) - Date: 2024-09-25 - Case/document no.: RPAA 00164/2022/CA - Collection: Court of Appeal

## Text

## Page 1

UBUSHINJACYAHA v IRADUKUNDA [Rwanda URUKIKO RW’UBUJURIRE - RPAA 00164/2022/CA (Tugirayezu, P.J.) 25 Nzeri 2024] Amategeko agenga imanza z’inshinjabyaha - Gutunda ibiyobyabwenge - Gutunda ibiyobyabwenge bisobanuye gukura ibiyobyabwenge ahantu ukabijyana ahandi. Amategeko agenga imanza z’inshinjabyaha –Kwemeza icyo urumugi rwari rugiye gukoreshwa – Ingano y’urumogi - Ingano y’urumogi yitabwaho mu kwemeza icyo urumogi rwari rugiye gukoreshwa iyo nta bindi bimenyetso bigaragaza icyo rwari rugiye gukoreshwa. Amategeko agenga imanza z’inshinjabyaha –Kugabanya igihano – Mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye kabone n’ubwo impamvu z’ubujurire uregwa yashingiragaho zaba zitahawe ishingiro. Incamake y’ikibazo: Uru rubanza rwatangiriye mu Rukiko Rwisumbuye rwa Karongi, Ubushinjacyaha burega Iradukunda icyaha cyo gutunda, kubika no gucuruza ibiyobyabwenge byo mu bwoko bw’urumogi, busaba ko cyamuhama, akagihanirwa. Urwo rumogi ashinjwa akaba yararufatanywe ku wa 29/03/2019 ubwo yari mu kabari ariko we icyo gihe afatwa, akaba yarabwiye ubugenzacyaha ko atanywa urumogi ahubwo hari undi muntu yari arushyiriye. Aburana, yaje guhindura imvugo avuga ko urwo rumogi rwari urwe rwo kunywa. Urukiko rwasanze ahamwa n’icyaha cyo gutunda no gucuruza ibiyobyabwenge, rumuhanisha igifungo cy’imyaka 20 n’ihazabu ya 20.000.000 Frw. Uregwa ntiyishimiye icyo cyemezo akijuririra mu Rukiko Rukuru avuga ko yahamijwe icyaha atakoze kuko we yiyemerera ko urumogi yari afute rwari urwe rwo kunywa gusa atarucuruzaga bityo inyito y’icyaha ashinjwa ikaba igomba guhinduka. Urukiko Rukuru rwasanze Iradukunda ahamwa gusa n’icyaha cyo gutunda ariko igihano yahawe cyo nticyahinduka. Iradukunda yajuririye icyo cyemezo mu Rukiko rw’Ubujurire maze rusuzuma ikibazo cyo kumenya niba inyito y’icyaha Iradukunda yahamijwe cyo gutunda ibiyobyabwenge by’urumogi yahinduka. Uwajuriye asobanura ko Urukiko Rukuru rwamuhamije icyaha cyo gutunda ibiyobyabwenge byo mu bwoko bw’urumogi nyamara nta bimenyetso bishingiweho kuko bamusanze mu kabari abifite ntaho ari kujya ndetse ko hatagaragajwe uwo yari arushyiriye, ko we urumogi yari afite rwari urwo kunywa akaba yemera icyaha cyo kunywa urumogi bityo agasaba ko inyito y’icyaha ashinjwa yahinduka. Ubushinjacyaha buvuga ko nta bimenyetso bivuguruza ibyashingiweho Iradukunda ahamwa n’icyaha kandi ko mu ibazwa rye, yiyemereye ko urwo rumogi yari arushyiriye uwitwa Claude, ibyo bikaba bigize igikorwa cyo gutunda. Incamake y’icyemezo: 1. Gutunda ibiyobyabwenge bisobanuye gukura ibiyobyabwenge ahantu ukabijyana ahandi.

## Page 2

2. Mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye kabone n’ubwo impamvu z’ubujurire uregwa yashingiragaho zaba zitahawe ishingiro. Ubujurire nta shingiro bufite. Nta mategeko yashingiweho Imanza zifashishijwe: RPAA 00052/2021/CA, Ubushinjacyaha na Uwiringiye Franco, rwaciwe n’Urukiko rw’Ubujurire ku wa 29/07/2022; RPAA 00039/2021/CA, Ubushinjacyaha na Shakabatenda Jean de Dieu, rwaciwe n’Urukiko rw’Ubujurire ku wa 02/07/2021; RPAA 00299/2022/CA, Ubushinjacyaha na Hakizimana Alphonse, rwaciwe n’Urukiko rw’Ubujurire ku wa 25/06/2024. Urubanza I. IMITERERE Y’URUBANZA

[1] Ku wa 29/03/2019, Iradukunda Karajegera Placide ari mu mudugudu wa Nyabaguma, Akagari ka Kiniha, Umurenge wa Bwishyura, Akarere ka Karongi, Intara y'Iburengerazuba ari mu kabari, yafatanwe urumogi arufite mu ipantalo yari yambaye rungana n’udupfunyika 28, ahita ashyikirizwa Ubugenzacyaha nabwo bukora dosiye buyishyikiriza Ubushinjacyaha. [2] Nyuma y’iperereza, Ubushinjacyaha bwatanze ikirego mu Rukiko Rwisumbuye rwa Karongi bukurikiranyeho Iradukunda Karajegera Placide icyaha cyo gutunda, kubika no gucuruza ibiyobyabwenge byo mu bwoko bw’urumogi, busaba ko cyamuhama, akagihanirwa. [3] Iradukunda Karajegera Placide, yaburanye avuga ko yemera icyaha cyo kunywa urumogi ari nacyo asabira imbabazi. [4] Mu rubanza RP 00200/2019/TGI/KNG rwaciwe ku wa 30/12/2019, Urukiko Rwisumbuye rwa Karongi rwasanze hari ibimenyetso byemeza ko uregwa yakoze icyaha birimo:

a. Imvugo za Iradukunda Karajegera Placide yiyemerera ko urumogi rwafatiriwe ari urwe; b.

Imvugo z’abatangabuhamya barimo Nsengiyumva Appolinaire akaba n'Umuyobozi w'Umudugudu wemeje ko Iradukunda Karajegera Placide asanzwe ari ikirara acuruza urumogi ndetse anarunywa na PC Rugwizangonga Prosper Richard bagiye gufata uregwa bamaze guhabwa amakuru ko afite urumogi arimo acuruza mu kabari;

## Page 3

c. Raporo yakozwe n’inzego z’ibanze; d. Inyandiko yifatira Iradukunda Karajegera Placide yashyizeho umukono yemera ko afatanwe urumogi; e.

Kuba mu mabazwa ya Iradukunda Karajegera Placide uregwa, yarasobanuye ko urumogi yafatanywe yari arushyiriye umuntu atashatse gusobanura amazina ye, nyamara ntagaragaze ikindi yararumushiriye uretse kujya kurucuruza. Urukiko rushingiye kuri ibyo bimenyetso, rwemeje ko Iradukunda Karajegera Placide ahamwa n’icyaha cyo gutunda no gucuruza ibiyobyabwenge(urumogi), rumuhanisha igifungo cy’imyaka 20 n’ihazabu ya 20.000.000 Frw, rutegeka ko urumogi rwafatiriwe rutwikwa n’inzego z’umutekano.

[5] Iradukunda Karajegera Placide ntiyishimiye imikirize y’urwo rubanza ajuririra mu Rukiko Rukuru, Urugereko rwa Rusizi, avuga ko urukiko Rwisumbuye rwamuhamije icyaha atakoze rwirengagiza icyo yemera ari icyo kunywa urumogi, ko urumogi yaruguze agambiriye kurunywa, bityo ko asaba urukiko yajuririye guhindura inyito y’icyaha aho kuba gucuruza no gukwirakwiza urumogi, ikaba kurunywa, cyane ko hatagaragazwa uwo yarugurishije ngo babe babihereho bamurega icyo cyaha. Asaba Urukiko kubikorera iperereza kuko yabisabye Urukiko Rwisumbuye ntibyakorwa. [6] Ubushinjacyaha bwaburanye buvuga ko impamvu z’ubujurire za Iradukunda Karajegera Placide, zisaba ko hahindurirwa inyito y’icyaha, itahabwa ishingiro, kuko mu mvugo ze adashaka kuvugisha ukuri ku bijyanye n’aho akura urumogi n’icyo arumaza, ko imvugo ze zerekana ko ahunga ibikorwa yakoze kugira ngo arebe ko yahanishwa ibihano bito. [7] Mu rubanza RPA 00013/2020/HC/RSZ, rwaciwe ku wa 31/01/2022, Urukiko Rukuru, Urugereko rwa Rusizi, rwasanze kuba Iradukunda Karajegera Placide mu mabazwa ye yose yaremeye ko urwo rumogi hari uwo yari arushyiriye ku Mubuga, ibikorwa yakoze bigize icyaha cyo gutunda no kubika ibiyobyabwenge by’urumogi, ariko nta bimenyetso bihamya ko abicuruza, kuko amakuru avuga ko arucuruza adafite ibindi bimenyetso biyashyigikira. Naho ku birebana n’iperereza, Urukiko rwasanze nta mpamvu rwakora iperereza, mu gihe ibimenyetso rwashyikirijwe birufashije kubona ukuri, maze rwemeza ko ikirego cy’ubujurire rwashyikirijwe na Iradukunda Karajegera Placide, gifite ishingiro ku nyito y’icyaha igomba guhindura agahamwa n’icyaha cyo gutunda ibiyobyabwenge by’urumogi, ariko nta gihindutse ku gihano cy’igifungo cy’imyaka makumyabiri (20 ans) n’ihazabu ingana n’amafaranga 20.000.000 Frw yahanishijwe mbere. [8] Iradukunda Karajegera Placide, yajuririye imikirize y’urwo rubanza mu Rukiko rw’Ubujurire, urubanza ruhabwa nº RPAA 00164/2022/CA, iburanishwa rishyirwa ku wa 09/09/2024 ariko uwo munsi ntirwaburanishwa rwimurirwa ku wa 13/09/2024, Iradukunda Karajegera Placide yunganiwe na Me Rwahama Zacharie naho Ubushinjacyaha buhagarariwe na Ntawangundi Beatrice, Umushinjacyaha ku rwego rw’Igihugu. [9] Mu mwanzuro we w’ubujurire ndetse no mu miburanire ye, Iradukunda Karajegera Placide avuga ko Urukiko Rukuru rwamuhamije icyaha atakoze kuko we icyo yemera ari icyo kunywa urumogi. Asaba Urukiko kumuhindurira inyito y’icyaha.

## Page 4

[10] Me Rwahama Zacharie umwunganira avuga ko Urukiko Rukuru rwemeje ko nta kimenyetso kigaragaza ko Iradukunda Karajegera Placide yakoze icyaha cyo gucuruza urumogi, akaba asanga iryo sesengura rwakoze ari naryo rwari gukora ku cyaha cyo kurutunda kuko usibye kuba Iradukunda Karajegera yarabivuze mu Bugenzacyaha ariko nta kindi kimenyetso kibishyigikira, bikaba byari amatakirangoyi kuko yavugaga ko urumogi yafatanywe hari uwo yari arushyiriye kuko yatinyaga kuvuga ko arunywa, bityo yahanirwa kurunywa nk’uko abyivugira bityo agahanishwa igifungo cy’umwaka 1. [11] Ubushinjacyaha buvuga ko impamvu z’ubujurire za Iradukunda Karajegera Placide nta shingiro zifite kuko adatanga ibimenyetso bivuguruza ibyashingiweho mu kumuhamya icyaha, ko ibyo kuvuga ko yemera kunywa urumogi byaba icyaha gitandukanye n’icyo yafatiwemo, ariko bitakuraho icyo yahamijwe, busaba Urukiko rw’Ubujurire kwemeza ko nta gihindutse ku rubanza rwajuririwe, ko hagumyeho igihano yahawe cy’igifungo cy’imyaka 20 n’ihazabu ya 20.000.000Frw. [12] Urukiko ruhereye kuri izo mpaka, rurasanga ikibazo gikwiye gusuzumwa muri uru rubanza ari: Kumenya niba inyito y’icyaha Iradukunda Karajegera Placide yahamijwe cyo gutunda ibiyobyabwenge by’urumogi yahinduka.

II. ISESENGURA RY’IKIBAZO KIGIZE URUBANZA

Kumenya niba inyito y’icyaha Iradukunda Karajegera Placide yahamijwe cyo gutunda ibiyobyabwenge by’urumogi yahinduka

[13] Mu mwanzuro we w’ubujurire ndetse no mu miburanire ye, Iradukunda Karajegera Placide avuga ko Urukiko Rukuru rwamuhamije icyaha cyo gutunda ibiyobyabwenge byo mu bwoko bw’urumogi nyamara nta bimenyetso bishingiweho kuko bamusanze mu kabari abifite ntaho ari kujya ndetse ko hatagaragajwe uwo yari arushyiriye, ko we urumogi yari afite rwari urwo kunywa akaba yemera icyaha cyo kunywa urumogi. Asaba Urukiko kumuhindurira inyito y’icyaha. [14] Me Rwahama Zacharie umwunganira avuga ko Urukiko Rukuru rwemeje ko nta kimenyetso kigaragaza ko Iradukunda Karajegera Placide yakoze icyaha cyo gucuruza urumogi, akaba asanga iryo sesengura rwakoze ari naryo rwari gukora ku cyaha cyo kurutunda kuko usibye kuba Iradukunda Karajegera yarabivuze mu Bugenzacyaha ariko nta kindi kimenyetso kibishyigikira, bikaba byari amatakirangoyi kuko yavugaga ko urumogi yafatanywe hari uwo yari arushyiriye kuko yatinyaga kuvuga ko arunywa. Asobanura ko harebwe aho Iradukunda Karajegera Placide yafatiwe nta wamuhamya gutunda ibiyobyabwenge kuko yafashwe ari mu kabari kandi hakaba hataranagaragajwe aho akura urwo rumogi n’aho arujyana ndetse ko harebwe ingano y’urumogi Iradukunda Karajegera Placide yafatanwe bigaragara ko atari urwo gucuruza, ko rero uwo yunganira yahanirwa kunywa kuko aribyo yemera maze agahanishwa igifungo cy’umwaka 1. [15] Uhagarariye Ubushinjacyaha avuga ko impamvu z’ubujurire za Iradukunda Karajegera Placide nta shingiro zifite kuko adatanga ibimenyetso bivuguruza ibyashingiweho mu kumuhamya

## Page 5

icyaha, ko ibyo kuvuga ko yemera kunywa urumogi byaba icyaha gitandukanye n’icyo yafatiwemo, ariko bitakuraho icyo yahamijwe. [16] Uhagarariye Ubushinjacyaha asobanura ko mu mabazwa ye Iradukunda Karajegera Placide yivugiye ko yari arushyiriye uwitwa Claude ahitwa ku MUBUGA akaba ari nacyo urukiko rwashingiye rumuhamya gutunda kuko yivugiraga ko hari aho yari arujyanye. Bityo kuba yarabifatanye ariko akavuga ko yari abishyiriye umuntu ku Mubuga, bigize icyaha cyo gutunda. Mu gusoza, Uhagarariye Ubushinjacyaha asaba Urukiko rw’Ubujurire kwemeza ko nta gihindutse ku rubanza rwajuririwe, ko hagumyeho igihano yahawe cy’igifungo cy’imyaka 20 n’ihazabu ya 20.000.000Frw.

UKO URUKIKO RUBIBONA

[17] Hakurikijwe imiburanire ya buri ruhande, impaka kuri iyi ngingo zishingiye ku kumenya niba icyaha cyahama Iradukunda Karajegera Placide ari icyaha cyo gufatanwa no kunywa urumogi cyangwa ari icyo kurutunda. [18] Mu rubanza Nº RPAA 00052/2021/CA rwaciwe ku wa 29/07/2022 haburana Ubushinjacyaha na Uwiringiye Franco, Urukiko rw’Ubujurire rwasobanuye ko gutunda ibiyobyabwenge “bisobanuye gukura ibiyobyabwenge ahantu ukabijyana ahandi1”. [19] Dosiye y’urubanza igaragaza ko Iradukunda Karajegera Placide abazwa mu Bugenzacya yahakanye icyaha cyo kunywa urumogi ahubwo avuga ko urumogi rungana n’udupfunyika 28 yafatanwe yari arufite mu ipantalo yambaye arushyiriye uwitwa Claude w’umusangwabutaka ahitwa ku Mubuga wari warumusigiye anamuha n’itike izamugezayo, yasobanuye kandi ko yari asanzwe azi neza ko gukora ibikorwa byerekeranye n’ibiyobyabwenge yari asanzwe azi neza ko ari icyaha2. Naho ageze mu Bushinjacyaha Iradukunda Karajegera Placide yabanje kuvuga ko urumogi yafatanwe rwari urwo yari atoraguye, afatwa arufite mu ntoki ari kurangisha uwari warutaye, ariko nyuma yo kwibutswa ibyo yavugiye mu Bugenzacyaha, yisubiraho asobanura ko Claude warumusigiye batari baziranye ariko ko yarumusigiye akaba yarafashwe arumushyiriye3. [20] Nk’uko bigaragara mu gika cya 22 cy’urubanza No RPA 0O013/2020/HC/RSZ, rujuririrwa, Urukiko Rukuru Urugereko rwa Rusizi, rwahamije Iradukunda Karajegera Placide icyaha cyo gutunda urumogi rushingiye ku mvugo ze yavugiye mu Bugenzacyaha no mu Bushinjacyaha aho muri ayo mabazwa ye yose yemeye ko urwo rumogi hari uwo yari arushyiriye ku Mubuga. [21] Urukiko rw’Ubujurire rurasanga nk’uko Urukiko Rukuru, Urugereko rwa Rusizi, rwabibonye kuba Iradukunda Karajegera Placide mu Bugenzacyaha no mu Bushinjacyaha yariyemereye ko urwo rumogi yari arushyiriye uwitwa Claude ku Mubuga ndetse ko ubwo

1 Reba igika cyarwo cya 27 2 Reba inyandikomvugo y’ibazwa rye mu Bugenzacyaha yo ku wa 29/03/2019, ibisubizo yatanze ku kibazo cya 3, 6, 8, 9 na 11 3 Reba inyandikomvugo y’ibazwa rye mu Bushinjacyaha yo ku wa 03/04/2019, ibisubizo yatanze ku kibazo cya 4, icya 6 n’icya 10

## Page 6

yafatwaga yari arumushyiriye izo mvugo ze zigaragaza ko ibikorwa yakoze bigize icyaha cyo gutunda nk’uko byasobanuwe haruguru kuko yari arukuye aho yafatiwe mu Mudugudu wa Nyabaguma arujyanye ku Mubuga ahubwo afatwa ataragerayo. [22] Urukiko rw’Ubujurire rurasanga kandi, imvugo ya Iradukunda Karajegera Placide ko urumogi yafatanwe rwari urwo kwinywera itashingirwaho kuko agenda yivuguruza aho mu Bugenzacyaha yahakanye ko anywa urumogi ahubwo ko urwo yafatanwe rwari urwo yarashyiriye uwitwa Claude ku Mubuga ibyo akaba ari nabyo yasubiyemo ageze mu Bushinjacyaha naho ageze mu nkiko zibanza no muri uru Rukiko avuga ko urwo rumogi rwari urwo kunywa. Kuba rero Iradukunda Karajegera Placide ahakana gutunda ahubwo akavuga ko urwo yafatanywe ari urwo kwinywera akaba ari imiburanire igamije gusa guhunga icyaha cyo gutunda ibiyobyabwenge kugira ngo ahabwe igihano gito k’uko nk’uko byasobanuwe mu manza zitandukanye zaciwe n’uru Rukiko harimo n’urubanza Nº RPAA 00408/2020/CA4, rwaciwe ku wa 27/06/2022 haburana Ubushinjacyaha na Niyitegeka Augustin alias Niyirema ufatanwa n’unywa ibiyobyabwenge (simple drug possession) ahanwa byoroheje ugereranyije n’utunda (drugs trafficking). [23] Ku birebana n’imvugo z’umwunganizi wa Iradukunda Karajegera Placide ko akurikije ingano y’urumogi yafatanwe, udupfunyika 28 bigaragara ko ari urwo kunywa, Urukiko rw’Ubujurire rurasanga nta shingiro bifite kuko ubundi ingano y’urumogi yitabwaho mu kwemeza icyo urumogi rwari rugiye gukoreshwa iyo nta bindi bimenyetso bigaragaza icyo rwari rugiye gukoreshwa nyamara nk’uko byasobanuwe haruguru, hari ibimenyetso byemeza urukiko ko urumogi Iradukunda Karajegera Placide yari arushyiriye uwitwa Claude ku Mubuga bigize icyaha cyo gutunda ibiyobyabwenge. [24] Urukiko rw’Ubujurire rusanga rero hashingiwe kuri ibyo bisobanuro, urumogi Iradukunda Karajegera Placide yafatanwe yari arushyiriye Claude ku Mubuga, ibyo bikaba bigize icyaha cyo gutunda ibiyobyabwenge, bityo ingingo y’ubujurire ye y’uko inyito y’icyaha yahamijwe yahinduka ikava ku gutunda ikaba kunywa ibiyobyabwenge byo mu bwoko bw’urumogi ikaba nta shingiro ifite kuko mu kumuhamya icyaha cyo gutunda urumogi nta kosa Urukiko Rukuru, Urugereko rwa Rusizi, rwakoze. [25] Urukiko rw’ubujurire rurasanga n’ubwo impamvu y’ubujurire ya Iradukunda Karajegera Placide idahawe ishingiro, ariko harebwe uburemere bw’icyaha yakoze cyo gutunda ibiyobyabwenge bwo mu bwoko bw’urumogi aho yafatanywe udupfunyika 28 tw’urumogi ndetse ukabigeranya n’igihano kingana n’igifungo cy’imyaka makumyabiri (20) n’ihazabu ingana na 20.000.000 Frw ukanabihuza no kuba uregwa ari ubwa mbere yari akoze icyaha mu buryo buzwi kandi akaba yaragikoze aribwo akiva mu bwana (afite imyaka 22) no kuba yarafatanwe ingano nto y’urumogi, bigaragara ko igihano Iradukunda Karajegera Placide yahawe ari kirekire ugereranyije n’ibihano uru Rukiko rwatanze ku bandi bakoze icyaha nk’icye, bityo kikaba gikwiye kongera kugabanywa kugira uregwa ahanwe koko mu nyungu zo kurengera sosiyete no gukumira ibyaha bishya ariko binahuzwe n’inyungu yo gusubiza mu buzima busanzwe uwakatiwe. [26] Urukiko rw’Ubujurire rurasanga mu manza ruherutse guca harimo urubanza No RPAA 00299/2022/CA, rwaciwe ku wa 25/06/2024 haburana Ubushinjacyaha na Hakizimana Alphonse, aho uregwa yahamwe n’icyaha cyo gutunda ibiyobyabwenge bihambaye byo mu bwoko

4 Reba igika cyarwo cya 24

## Page 7

bw’urumogi, aho yafatanwe irobo (1/4 kg) y’urumogi ariko urukiko rushingiye ku mpamvu nyoroshyacyaha yo kuba bwari ari ubwa mbere yari akurikiranyweho icyaha mu buryo buzwi no ku kuba icyaha yaragikoze aribwo akiva mu bwana afite imyaka 20 y’amavuko, rumugabanyiriza igihano, rumuhanisha igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000 Frw) aho kuba igifungo cy’imyaka 20 n’ihazabu ya 21.000.000 Frw yari yahanishijwe n’inkiko zibanza. [27] Urukiko rw’Ubujurire rurasanga mu gihe Urukiko rwajuririwe rusanze igihano cyatanzwe ari kirekire hagereranyijwe uburyo icyaha cyakozwemo ndetse n’igihano inkiko zibanza zahanishije uregwa, nta cyabuza Umucamanza kugabanya icyo gihano mu rwego rwo gutanga ubutabera buboneye kabone n’ubwo impamvu z’ubujurire uregwa yashingiragaho zaba zitahawe ishingiro. Uyu murongo kandi ni nawo wagiye ufatwa mu zindi manza zaciwe n’uru Rukiko harimo urubanza Nº RPAA 00039/2021/CA rwaciwe ku wa 02/07/2021 rw’Ubushinjacyaha na Shakabatenda Jean de Dieu, muri urwo rubanza impamvu ze z’ubujurire zijyanye no kwemeza ko urumogi yafatanywe rwari urwo kunywa aho kuba urwo gucuruza (…) ntizahawe ishingiro ariko hashingiwe ku kuba yarafatanywe udupfunyika 4 gusa tw’urumogi no kuba ari ubwa mbere akoze icyaha bizwi, rwemeza ko agabanyirizwa igihano. [28] Hashingiwe ku bisobanuro byatanzwe haruguru, Urukiko rw’Ubujurire rurasanga Iradukunda Karajegera Placide nawe akwiye kongera kugabanyirizwa igihano hashingiwe ku kuba ari ubwa mbere yari akoze icyaha mu buryo buzwi kandi akaba yaragikoze aribwo akiva mu bwana no kuba yarafatanwe ingano nto y’urumogi; bityo mu rwego rwo gutanga ubutabera busa ku bibazo bisa nawe agahanishwa igifungo cy’igifungo cy’imyaka cumi n’itanu (15) n’ihazabu ingana na 5.000.000 Frw.

III. ICYEMEZO CY’URUKIKO

[29] Rwemeje ko ubujurire bwa Iradukunda Karajegera Placide nta shingiro bufite; [30] Rwemeje ko urubanza N˚ RPA 0O013/2020/HC/RSZ, rwaciwe n’Urukiko Rukuru, Urugereko rwa Rusizi, ku wa 31/01/2022 ruhindutse ku birebana n’igihano Iradukunda Karajegera Placide yari yahanishijwe mbere; [31] Ruhanishije Iradukunda Karajegera Placide igihano cy’igifungo cy’imyaka cumi n’itanu (15) n’ihazabu ingana na miliyoni eshanu (5.000.000 Frw); [32] Ruvuze ko Iradukunda Karajegera Placide asonewe amagarama y'urubanza kuko aburana afunze.