UBUSHINJACYAHA vs Kaburere

UBUSHINJACYAHA vs Kaburere

- Source: Amategeko - Section: Decisions (Judgements) - Date: 2023-07-06 - Case/document no.: RP 00001/2022/CA - Collection: Court of Appeal

Text

Page 1

UBUSHINJACYAHA vs KABURERE [Rwanda URUKIKO RW’UBUJURIRE – RP 00001/2022/CA (Mukandamage, P.J. Kaliwabo na Gakwaya J.) 06 Nyakanga 2023] Amategeko agenga imiburanishirize y’imanza nshinjabyaha – Gusubirishamo urubanza ingingo nshya – Ikimenyetso umuburanyi yashoboraga kubona mu gihe cyo kuburana, ntigishobora gufatwa nk'ingingo nshya mu gihe akigaragaje urubanza rwarabaye itegeko – Ntibihagije ko ikimenyetso kiba ari gishya ngo gisubirishemo urubanza ahubwo kigomba no kuba ari kamarampaka ku buryo kivuguruza ibimenyetso byashingiweho mu guca urubanza rusabirwa gusubirwamo, ingingo ya 197,5° y'Itegeko N° 27/2019 ryo kuwa 19/09/2019 ryerekeye imiburanishirize y'imanza z'inshinjabyaha. Amategeko agenga ibimenyetso – Ubuhamya bw'ikinyoma – Umuburanyi utanga ikimenyetso cy'ubuhamya bw'ikinyoma agomba kugaragaza icyemezo cy'Urukiko cyahamije ko ubuhamya bwashingiweho mu guca urubanza rusabirwa gusubirwamo, ari ikinyoma, ingingo ya 197, 4° y'Itegeko N° 27/2019 ryo kuwa 19/09/2019. Incamake y’ikibazo: Uru rubanza rwatangiriye mu Rukiko Rukuru, Urugereko rwihariye ruburanisha ibyaha mpuzamahanga n’ibyaha byambuka imbibi, Ubushinjacyaha bukurikiranye uregwa ku cyaha cyo gucuruza abantu, buvuga ko yafashwe atwaye uwitwa Nizigiyimana amuvanye i Burundi, amushyiriye abantu bari muri Uganda bakamujyana muri Arabie Saoudite, hagamijwe kumubonamo inyungu. Uregwa yaburanye ahakana icyaha aregwa,

avuga ko Nizigiyimana yamuhawe n’umugabo we witwa Bayingana, akaba abona nta cyaha yakoze kuko yari ajyanye na Nizigiyimana mu rwego rwo kumuyobora no kumufasha kugeza abonanye n’uwo yari agiye kureba, nk’uko yari yabisabwe. Urwo Rukiko rwaciye urubanza nuko rwemeza ko uregwa ahamwa n’icyaha cyo gucuruza abantu, rumuhanisha igifungo cy’imyaka makumyabiri (20) n’ihazabu y’amafaranga y’u Rwanda miliyoni makumyabiri (20.000.000 Frw). Uregwa yajuririye Urukiko rw’Ubujurire avuga ko inyito y’icyaha Urukiko rwamuhamije idahura n’ibikorwa rwaregewe, ko Urukiko rwashingiye ku mvugo zivuguruzanya za Nizigiyimana, ko kandi rutagaragaje inyungu yari afite mu icuruzwa rye. Urwo Rukiko narwo rwaciye urubanza rusanga ibimenyetso byashingiweho n’Urukiko Rukuru bifite ishingiro. Uregwa yaje gutanga ikirego mu Rukiko rw’Ubujurire cyo gusubirishamo urubanza RPA 00035/2020/CA ingingo nshya, avuga ko ikirego cye gishingiye ku bimenyetso bishya yabonye nyuma y’uko urwo rubanza ruciwe, ibyo bikaba birimo inyandiko yakozwe n’uwakorewe icyaha ivuga ko yari yarabeshye uregwa, ubuhamya bw’uwitwa Miburo, amafoto agaragaza ko uregwa yari mu birori bya Miburo, Icyangombwa cy’imico n’imyifatire by’uregwa. Ubushinjacyaha bwo bwaburanye buvuga ko ikirego kidakwiye kwakirwa, kubera ko ibimenyetso ashingiraho bitari kamarampaka kandi ko mu igihe cyo kuburana urubanza mu bujurire, byose yashoboraga kubibona no kubiburanisha. Incamake y’icyemezo: 1. Ikimenyetso umuburanyi yashoboraga kubona mu gihe cyo kuburana, ntigishobora gufatwa nk'ingingo nshya mu gihe akigaragaje urubanza rwarabaye itegeko –

Page 2

Ntibihagije ko ikimenyetso kiba ari gishya ngo gisubirishemo urubanza ahubwo kigomba no kuba ari kamarampaka ku buryo kivuguruza ibimenyetso byashingiweho mu guca urubanza rusabirwa gusubirwamo.

2. Umuburanyi utanga ikimenyetso cy'ubuhamya bw'ikinyoma agomba kugaragaza icyemezo cy'Urukiko cyahamije ko ubuhamya bwashingiweho mu guca urubanza rusabirwa gusubirwamo, ari ikinyoma. Ikirego cyo gusubirishamo urubanza ingingo nshya nticyakiriwe. Amategeko yashingiweho: Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, Ingingo ya 197, agace ka 4°. Imanza zifashishijwe: RS/REV/RCOM 00001/2018/SC, Shema & Bashangire vs. I&M Bank Rwanda Plc, rwaciwe n’Urukiko rw’Ikirenga ku wa 24/07/2020. RS/REV/CIV 0002/12/SC Mulindahabi vs. ATRACO, rwaciwe n’Urukiko rw’Ikirenga ku wa 18/01/2019. RS/REV/COM 0007/1 4/CS, Furaha & Kayitesi Zainabu vs. BRD, rwaciwe n’ Urukiko rw’Ikirenga ku wa 4/3/2016. Inyandiko z’abahanga: Serge Guinchard, Droit et pratique de la procédure civile, 8è édition, Paris, 2014, p.

1619. Urubanza I. IMITERERE Y’URUBANZA [1] Uru rubanza rwatangiriye mu Rukiko Rukuru, Urugereko rwihariye ruburanisha ibyaha mpuzamahanga n’ibyaha byambuka imbibi, Ubushinjacyaha bukurikiranyeho Kaburere Gérard icyaha cyo gucuruza abantu, buvuga ko ku wa 30/09/2018 yafashwe atwaye uwitwa Nizigiyimana Aline amuvanye i Burundi, amushyiriye Besta na Claudine bari muri Uganda bakamujyana muri Arabie Saoudite, hagamijwe kumubonamo inyungu. [2] Kaburere Gérard yaburanye ahakana icyaha aregwa, avuga ko Nizigiyimana Aline yamuhawe n’umugabo we witwa Bayingana Sylvèstre na musaza we bita Manager kugira ngo amujyane, amushyikirize uwitwa Gasongo bari busange kuri Volcano i Kampala, akaba abona nta cyaha yakoze kuko yari ajyanye na Nizigiyimana Aline mu rwego rwo kumuyobora no kumufasha kugeza abonanye n’uwo yari agiye kureba, nk’uko yari yabisabwe. [3] Mu rubanza nº RP 00042/2018/HC/HCCIC rwaciwe ku wa 17/07/2019, Urukiko Rukuru, rushingiye ku mvugo ya Nizigiyima Aline wasobanuye uburyo Kaburerere Gérard ariwe

Page 3

wamuhaye amafaranga y’ibyangombwa by’inzira n’ay’urugendo rujya muri Arabie Saoudite, aho yari yashakiwe akazi, rushingiye no kuba yarafashwe agerageza kumwambutsa umupaka, rwemeje ko Kaburere Gérard ahamwa n’icyaha cyo gucuruza abantu, rumuhanisha igifungo cy’imyaka makumyabiri (20) n’ihazabu y’amafaranga y’u Rwanda miliyoni makumyabiri (20.000.000 Frw). [4] Kaburere Gérard yajuririye Urukiko rw’Ubujurire avuga ko inyito y’icyaha Urukiko rwamuhamije idahura n’ibikorwa rwaregewe, ko Urukiko rwashingiye ku mvugo zivuguruzanya za Nizigiyimana Aline, ko kandi rutagaragaje inyungu yari afite mu icuruzwa rye. [5] Mu rubanza nº RPA 00035/2020/CA rwaciwe ku wa 29/04/2022, Urukiko rw’Ubujurire rwasanze ibimenyetso byashingiweho n’Urukiko Rukuru bifite ishingiro, ko kandi ivuguruzanya rya Nizigiyimana Aline rishingiye ku tuntu duto ku buryo butabangamira ireme ry’ubuhamya yatanze, rwemeza ko imikirize y’urubanza nº RP 00042/2018/HC/HCCIC rwaciwe ku wa 17/07/2019 n’Urukiko Rukuru igumyeho. [6] Ku wa 29/09/2022, Kaburere Gérard yaregeye Urukiko rw’Ubujurire asaba gusubirishamo ingingo nshya urubanza Nº RPA 00035/2020/CA rwaciwe n’Urukiko rw’Ubujurire ku wa 29/04/2022, avuga ko ikirego cye gishingiye ku bimenyetso bishya yabonye nyuma y’uko urwo rubanza ruciwe, ibyo bikaba ari: - Inyandiko yakozwe na Nizigiyimana Aline avuga ko yabeshyeye Kaburere Gérard kubera ko yashyizweho iterabwoba; -

Inyandiko ikubiyemo ubuhamya bwa Miburo Cynthia, mushiki wa Kaburere Gérard, uvuga ko ku wa 30/09/2018, uyu yaje mu birori bye byo guhabwa “diplôme” kandi ko yasubiye muri Uganda ajyanye na Nizigiyimana Aline ku busabe bwa Manager n’umugabo wa Nizigiyimana Aline, kuko hari ibicuruzwa yari agiye gushaka muri Uganda; - Amafoto yerekana ko Kaburere Gérard yari mu birori bya Miburo Cynthia; - Icyangombwa cy’imico n’imyifatire ya Kaburere Gérard cyatanzwe n’inzego z’ibanze z’aho asanzwe atuye muri Uganda. [7] Ubushinjacyaha buvuga ko ikirego cya Kaburere Gérard kidakwiye kwakirwa, kubera ko ibimenyetso ashingiraho bitari kamarampaka kandi ko mu igihe cyo kuburana urubanza mu bujurire, byose yashoboraga kubibona no kubiburanisha. Naho ku birebana n’inyandiko ya Nizigiyimana Aline uvuga ko yabeshye mu buhamya bwe, Ubushinjacyaha buvuga ko nta rubanza KABURERE Gérard agaragaza rwemeje ko Nizigiyimana Aline yatanze ubuhamya bw’ibinyoma. [8] Iburanisha ry’urubanza ryabaye ku wa 20/06/2023, Kaburere Gérard yunganiwe na Me Ndayisabye Alex, naho Ubushinjacyaha buhagarariwe na Niyonkuru Françoise, Umushinjacyaha ku rwego rw’Igihugu. [9] Uru Rukiko rugiye gusuzuma niba ikirego cyatanzwe na Kaburere Gérard gikwiye kwakirwa harebwe ibiteganywa n’amategeko.

Page 4

II. ISESENGURA RY’IKIBAZO KIGIZE URUBANZA Kumenya niba ikirego cyatanzwe na Kaburere Gérard gikwiye kwakirwa Kumenya niba inyandiko yakozwe na Nizigiyimana Aline avuguruza ubuhamya bwe ari ikimenyetso cyatuma urubanza n° RPA 00035/2020/CA rusubirirwamo [10] Kaburere Gérard yaregeye Urukiko rw’Ubujurire asaba gusubirishamo urubanza Nº RPA 00035/2020/CA rwaciwe n’uru Rukiko ku wa 29/04/2022 ingingo nshya ashingiye ku nyandiko ikubiyemo ubuhamya bwa Nizigiyimana Aline yabonye ku wa 16/9/2022, uyu akaba yaranditse avuga ko yabeshyeye Kaburere Gérard abitewe n’iterabwoba yashyizweho mu ibazwa rye, ko yari asanzwe ajya mu gihugu cya Uganda gushakayo ibicuruzwa, akaba atarigeze ashukwa cyangwa ngo ajyanwe atazi aho agiye. [11] Kaburere Gérard avuga kandi ko iyi nyandiko ari kamarampaka, kuko urubanza yaciriwe ahanini rushingiye ku buhamya bw’ibinyoma bwa Nizigiyimana Aline, ko kandi atashoboraga kubona iyi nyandiko igihe yaburanaga urubanza, kubera ko yari muri gereza, akaba yarayibonye abifashijwe n’umubyeyi we, na we wifashishije Minisiteri y’Ububanyi n’Amahanga mu gihugu cy’u Burundi na Ambassade y’u Burundi mu Rwanda. [12] Me Ndayisabye Alex, wunganira Kaburere Gérard, avuga ko inyandiko yakozwe na Nizigiyimana Aline ivuguruza ibyashingiweho Kaburere Gérard ahamwa n’icyaha cyo gucuruza abantu, ko iki kimenyetso cyabonetse bisabwe n’umubyeyi we wakomeje gutakambira

inzego z’ubutegetsi bw’u Burundi kugeza ubwo habonetse iyi nyandiko, uburyo bwakoreshejwe bukaba butari kugerwaho na Kaburere Gérard wari muri gereza. Avuga ko iyi nyandiko yujuje ibisabwa kugira ngo urubanza rusubirishwemo ingingo nshya nk’uko biteganywa mu ngingo ya 197 y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha. [13] Ku birebana n’inyandiko ya Nizigiyimana Aline, Ubushinjacyaha buvuga ko idashobora kuba ikimenyetso cyatuma urubanza rusubirwamo, kuko nta Rukiko rwigeze rwemeza ko ubuhamya bwe bwashingiweho hacibwa urubanza Nº RPA 00035/2020/CA ari ubuhimbano, iyi ngingo Kaburere Gérard ashingiraho ikaba itujuje ibisabwa mu gace ka kane (4°) k’ingingo ya 197 y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha.

UKO URUKIKO RUBIBONA [14] Ingingo ya 197, agace ka 4°, y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, iteganya ko Urubanza rushobora gusubirishwamo ingingo nshya iyo Urukiko rwaciye urubanza rushingiye ku mpapuro, ku buhamya cyangwa indahiro byaje kugaragara cyangwa kwemezwa n’urukiko ko ari ibihimbano nyuma y’icibwa ry’urwo rubanza.

Page 5

[15] Urukiko rurasanga ikimenyetso kigizwe n’inyandiko yakozwe na Nizigiyimana Aline ku wa 16/09/2022, Kaburere Gérard ashingiraho asaba ko urubanza nº RPA 00035/2020/CA rusubirwamo kitashingirwaho ngo ikirego cye cyo gusubirishamo urubanza cyakirwe, kubera ko icyo yagombaga kugaragaza ari icyemezo cy’Urukiko cyahamije ko ubuhamya bwatanzwe mbere na Nizigiyimana Aline ari ikinyoma, nk’uko bisabwa mu gace ka 4° k’ingingo ya 197 y’Itegeko n° 27/2019 ryavuzwe haruguru. Ku byerekeranye n’inyandiko ya Miburo Cynthia, amafoto yerekana ko Kaburere Gérard yari mu birori bye n’inyandiko yatanzwe n’inzego z’ibanze za Uganda [16] Kaburere Gérard avuga ko nyuma y’icibwa ry’urubanza, habonetse ubuhamya bwa Miburo Cynthia wemeza ko Kaburere Gérard yavuye mu gihugu cya Uganda aje i Burundi mu birori bye byo guhabwa‘’diplôme’’, ubwo buhamya bwe bugashimangirwa n’amafoto yafatiwe muri ibyo birori agaragaza nta gushidikanya ko Kaburere Gérard yari abirimo, ko ubwo buhamya n’amafoto ari igisubizo ku kibazo Kaburere Gérard yabajijwe cyo kumenya icyari cyamuzanye i Burundi, bityo ko urugendo rwe ntaho ruhuriye no gucuruza abantu. Avuga kandi ko iyi nyandiko yemeza ko Miburo Cynthia yiboneye musaza wa Nizigiyimana Aline witwa Manager n’umugabo we baje gusaba ko Kaburere Gérard yazajyana nawe muri Uganda kuzana ibicuruzwa, bityo ko urubanza yaciriwe rwamurenganyije, rumuhamya gucuruza

Nizigiyimana Aline. [17] Kaburere Gérard avuga na none ko, nyuma y’uko aciriwe urubanza, habonetse icyemezo cy’imico n’imyifatire myiza cyatanzwe n’Ubuyobozi bw’inzego z’ibanze mu gihugu cya Uganda, aho yabarizwaga i Kayanja - Triangle - Zone LCI - Rubaga division - Rubaga Parish, ko iyo aza kuba acuruza abantu atari guhabwa iki cyemezo, bityo nacyo kikaba ari ikimenyetso gishya ingingo nshya cyatuma urubanza n° RPA 00035/2020/CA rusubirwamo. Avuga ariko ko iki cyemezo kitanyuze mu nzira zikoreshwa ku byemezo byakorewe mu mahanga kugira ngo bigire agaciro mu Rwanda. [18] Ubushinjacyaha busanga ibimenyetso bishingiye ku buhamya bwa Miburo Cynthia n’amafoto agaragaza ibirori Kaburere Gérard yari yitabiriye atari bishya kubera ko yaburanye azi neza ko yagiye muri ibyo birori, ndetse ko hafatiwemo amafoto, akaba yaragombaga kubiburanisha mu gihe yumva ko hari icyo byari kumurenganuraho, ko nta kintu cyamubuzaga kubona ibi bimenyetso, kuko uburyo bwakoreshejwe abizana ubu yari abufite n’igihe yaburanaga urubanza ashaka gusubirishamo, ndetse akaba atarigeze agaragariza Urukiko ko abikeneye mu rubanza n’icyo byamurenganuraho ngo rwange kubisuzuma. [19] Ku birebana n’inyandiko y’imico n’imyifatire, Ubushinjacyaha buvuga ko itagomba kwakirwa nk’ikimenyetso gishya, kuko itanyuze mu nzira zemewe, kandi ko ntacyamubujije kuyisaba igihe yaburanaga urubanza rwe. [20] Ubushinjacyaha busoza buvuga ko ibimenyetso Kaburere Gérard ashingiraho bitari kamarampaka ku rubanza asubirishamo, kuko bidashobora kuvuguruza ibimenyetso byashingiweho n’Urukiko ruca urubanza nº RPA 00035/2020/CA.

UKO URUKIKO RUBIBONA

Page 6

[21] Ingingo ya 197, mu gace ka 5°, y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, iteganya ko ‘’ Urubanza rushobora gusubirishwamo ingingo nshya iyo, nyuma y’icibwa ry’urubanza habonetse ikimenyetso gishya kimara impaka, kigaragaza neza akarengane katewe n’urubanza rusabirwa gusubirwamo’’. [22] Mu rubanza n° RS/REV/RCOM 00001/2018/SC rwaciwe n’Urukiko rw’Ikirenga ku wa 24/07/2020, Shema Charles na Bashangire Grâce baburana na I&M Bank Rwanda Plc, Urukiko rwasobanuye ko uburanisha ikimenyetso gishya, agomba kugaragariza Urukiko ko atigeze amenya ko gihari, cyangwa ko yari azi ko gihari ariko akaba atarashoboraga kukigeraho igihe yaburanaga1. [23] Na none, mu rubanza n° RS/REV/CIV 0002/12/SC rwaciwe n’Urukiko rw’Ikirenga ku wa 18/01/2019, haburana Mulindahabi Fidèle na ATRACO, Urukiko rwasobanuye ko ikimenyetso gishya kigomba kuba ari kamarampaka, ni ukuvuga ko cyashoboraga gutuma umucamanza afata icyemezo gitandukanye n’icyo yafashe2. [24] Urukiko rurasanga ibivuzwe haruguru, bihuza n’igitekerezo cy’umuhanga mu mategeko, Serge Guinchard uvuga ko, ikimenyetso cyemerwa nk’igishya mu buryo butuma urubanza rusubirishwamo ingingo nshya, ari ikimenyetso cyari gutuma hafatwa icyemezo gitandukanye n’icyafashwe mu rubanza rusabirwa gusubirwamo3. [25] Urukiko rurasanga, mu manza zivuzwe haruguru, Urukiko rw’Ikirenga rwarasobanuye neza

ingingo ya 197, agace ka gatanu (5°), y’Itegeko nº 27/2019 yavuzwe haruguru, ko ikimenyetso gishya ari ikimenyetso umuburanyi atashoboraga kumenya ko cyaba gihari, akakibona nyuma cyangwa akaba atarabashaga kukigeraho igihe yaburanaga, kandi ko n’iyo ari gishya gihabwa agaciro gusa iyo gishobora kuvuguruza ibyari byashingiweho mu ica ry’urubanza rusabirwa gusubirishwamo ingingo nshya. [26] Urukiko rurasanga inyandiko ikubiyemo ubuhamya bw’uwitwa Miburo Cynthia n’amafoto yerekana ko Kaburere Gérard yari mu birori bya mushiki we Miburo Cynthia, atari ibimenyetso bishya, kuko byari bisanzwe bizwi n’uregwa kuva urubanza rwatangira kuburanishwa, akaba ahubwo yaragombaga kwifashisha iyo mpamvu yari yamuzanye i Burundi nk’ikimenyetso igihe yaburanaga urubanza asubirishamo, kuko yivugira ko byashatswe n’umubyeyi we, inzira uyu mubyeyi yakoresheje ngo biboneke, nta cyamubujije kuyikoresha mbere y’uko urubanza ruba itegeko. Ibivuzwe muri iki gika nibyo byemejwe n’Urukiko rw’Ikirenga mu rubanza n° RS/REV/COM 0007/14/CS4, bityo ibimenyetso byavuzwe haruguru bikaba bitagomba kwakirwa nk’ingingo nshya. 1 Reba igika cya 21 cy’urubanza n° RS/REV/RCOM 00001/2018/SC rwaciwe n’Urukiko rw’Ikirenga ku wa 24/07/2020, SHEMA Charles hamwe na Bashangire Grâce baburanamo na I & M Bank Rwanda Plc. 2 Reba igika cya 29 cy’urubanza n° RS/REV/RIV 0002/12/SC rwaciwe n’Urukiko rw’Ikirenga ku wa

18/01/2019, haburana Mulindahabi Fidèle na ATRACO 3 “Eu égard à l objet du recours, qui est de modifier ou annuler une décision déjà rendue, le bon sens commande de ‟ n’accepter celui-ci que dans la mesure où la pièce découverte aurait changé les choses. Si, à raison du caractère peu décisif de la pièce, le jugement n’eût pas été différent, le recours n’est pas admis”: Serge Guinchard, Droit et pratique de la procédure civile, 8è édition, Paris, 2014, p. 1619. 4 Reba igika cya 35 cy’urubanza n° RS/REV/COM 0007/1 4/CS rwaciwe n’ Urukiko rw’Ikirenga ku wa 4/3/2016, haburana Furaha Pascal, Kayitesi Zainabu Sylvie na BRD, Urup 9.

Page 7

[27] Urukiko rurasanga ibivuzwe ku nyandiko yakozwe na Miburo Cynthia ari nako biri ku birebana n’icyemezo cy’imico n’imyifatire Kaburere Gérard aburanisha, hakiyongeraho no kuba kitaranyuze mu nzira zinyuzwamo ibyemezo byakorewe mu mahanga kugira ngo bigire agaciro mu rwanda, kandi nta n’icyamubujije kugisaba igihe yaburanaga urubanza yifuza gusubirishamo. [28] Urukiko rurasanga kandi, ibimenyetso bigizwe n’inyandiko ya Miburo Cynthia, amafoto yafashwe Kaburere Gérard ari mu bukwe n’icyemezo cy’imico n’imyifatire, uretse no kuba nta cyamubujije kubiburanisha mu rubanza asaba ko rusubirwamo, nyamara kandi nta nubwo bigize ikimenyetso kamarampaka, kuko Kaburere Gérard aterekana uburyo byari kuvuguruza ibimenyetso byashingiweho mu guca urubanza, birimo ubuhamya bwa Nizigiyimana Aline, wasobanuye ibyamubayeho n’uburyo yajyanywe muri Arabie Saoudite bigizwemo uruhare na Kaburere Gérard afatanyije na Besta na Claudine, uko yavuye i Burundi ari kumwe na Kaburere, uyu akamuha amafaranga yo gushaka Laissez – passer, ay’urugendo n’ayo gusiga mu rugo, bikaba bigaragara ko n’iyo ibi bimenyetso biza kugaragazwa mu iburanisha, ataribyo byari gutuma Urukiko rufata icyemezo kinyuranye n’icyo rwafashe. [29] Urukiko, rushingiye ku ngingo 197, agace ka kane (4°) n’aka gatanu (5°), y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, no ku bisobanuro

byavuzwe haruguru, rurasanga ikirego gisubirashamo ingingo nshya urubanza n° RPA 00035/2020/CA, cyatanzwe na Kaburere Gérard kitagomba kwakirwa ngo gisuzumwe, kuko kitujuje ibisabwa n’amategeko. III. ICYEMEZO CY’URUKIKO [30] Rwemeje ko ikirego cya Kaburere Gérard gisubirishamo urubanza n° RPA 00035/2020/CA ingingo nshya kitakiriwe. [31] Rutegetse ko Kaburere Gérard asonerwa gutanga amagarama y’urubanza, kuko yaburanye afunzwe.