UBUSHINJACYAHA v KAMBARI

# UBUSHINJACYAHA v KAMBARI

- Source: Amategeko - Section: Decisions (Judgements) - Date: 2025-09-29 - Case/document no.: RPAA 00866/2024/CA - Collection: Court of Appeal

## Text

## Page 1

UBUSHINJACYAHA v KAMBARI [Rwanda URUKIKO RW’UBUJURIRE - RPAA 00866/2024/CA (Kanyange, P.J.) 29 Nzeri 2025] Amategeko agenga imanza z’inshinjabyaha – Ibimenyetso – Agaciro k’ibimenyetso - Mu manza z’inshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye, kandi urukiko ni rwo rwemeza ko ibyo bimenyetso bishobora kwemerwa. Incamake y’ikibazo: Kambari yasanzwe mu gihuru ari hejuru y’umwana w’umukobwa w’imyaka 8, abonwa n’uwitwa Mugisha Samuel, na we azamura ipantalo ariruka. Uwo mwana abajijwe, yavuze ko ubwo yari agiye kuvoma, yanyuzeho uregwa aramufata, amupfuka umunwa aramusambanya amubwira ko amuha Frw 100. Uregwa yashyikirjwe ubutabera, Ubushinjacyaha bumurega mu Rukiko Rwisumbuye rwa Ngoma icyaha cyo gusambanya umwana. Uregwa yaburanye ahakana icyaha, avugaka ko atasambanyije uwo mwana ko ahubwo yamukizaga intozi. Urukiko rwasanze ahamwa n’icyaha aregwa, rumuhanisha igifungo cya burundu. Uregwa yajuyririye icyo cyemezo mu Rukiko Rukuru avuga ko yahamaijwe icyaha atakoze, ngo ariko ubwo raporo ya muganga igaragaza ko umwana yasambanyijwe, yagabanyirizwa igihano ariko ngo si we wamusambanyije. Urukiko rushingiye ku mvugo y’uwakorewe icyaha ndetse n’imvugo y’umutangabuhamya witwa Mugisha Samuel ndetse na raporo ya muganga, rwasanze uregwa ahamwa n’icyaha ariko kubera ari ubwa mbere akurikiranwe n’ubutabera, rusanga akwiye kugabanyirizwa igihano, rumuhanisha igifungo cy’imyaka 16. Uregwa ntiyanyuzwe, ajurira mu Rukiko rw’Ubujurire avuga ko yahamijwe icyaha hashingiwe ku bimenyetso bivuguruzanya. Urukiko rwasuzumye ikibazo cyo kumenya niba Kambari Paul yarahamijwe icyaha hashingiwe ku bimenyetso bishidikanywaho kandi bivuguruzanya. Kambari asobanura ko inkiko zabanje zamuhamije icyaha zishingiye ku buhamya butera gushidikanya kuko Mugisha Samuel yavuze ko yamusanze yambara ipantalo, umwana yambara ikabutura, akaba atarigeze amubona amusambanya. Akomeza avuga ko yahimbiwe icyaha kubera amakimbirane yari afitanye n’umuryango w’uwo mwana nk’uko bigaragazwa na raporo y’ubuyobozi bw’Umudugudu bityo agasaba ko yagirwa umwere. Yongeraho kandi ko hashingiwe ku buhamya bw’umwana w’imyaka 14 nta kindi kimenyetso kibushyigikira ndetse na raporo ya muganga ikaba itavuga ko yasambanyije uwo mwana. Ubushinjacyaha buvuga ko n’ubwo Mugisha Samuel atabonye uregwa asambanya umwana, ariko yamubonye azamura ipantalo, bikuzuzwa n’imvugo y’umwana wasobanuye ko yasambanijwe, na raporo ya muganga ikaba igaragaza ko igitsina cy’umwana cyatukuraga. Yongera ho ko, urukiko ari rwo rusuzuma imvugo z’abatangabuhamya rukamenya ko zikwiye. Incamake y’icyemezo: Mu manza z’inshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale), ababuranyi bakaba barahawe uburyo bwo kuhaba ngo banyomozanye, kandi urukiko ni rwo rwemeza ko ibyo bimenyetso bishobora kwemerwa. Ubujurire, nta shingiro bufite.

## Page 2

Amategeko yashingiweho: Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 119; Imanza zifashishijwe: Nº RPAA0118/11/CS, Ubushinjacyaha na Ngurinzira, rwaciwe n’Urukiko rw’Ikirenga ku wa 13/11/2015; RPAA 00692/2021/CA, Ubushinjacyaha na Ndayishimiye Jean Damascène, rwaciwe n’Urukiko rw’Ubujurire ku wa 20/01/2023; RPAA 01288/2024/CA, Ubushinjacyaha na Turikumwe Gilbert, rwaciwe n’Urukiko rw’Ubujurire ku wa 18/07/2025; Urubanza I. IMITERERE Y’URUBANZA [1] MUSABIREMA Antoine yatanze ikirego mu Bugenzacyaha avuga ko ku wa 23/03/2021 mu gihe cya saa kumi n’igice z’umugoroba, Kambari Paul yasambanyije umwana we w’umukobwa witwa D.H.1 w’imyaka umunani (8) y’amavuko, babibwirwa n’uko uwitwa Mugisha Samuel yanyuze hafi y’aho Kambari Paul yari ari abona ari hejuru y’uwo mwana amwikanze ahita azamura ipantaro, umwana nawe arahaguruka azamura ikabutura ariruka, Mugisha Samuel avuza induru abatambukaga bafata uwo mwana, bamubajije ababwira ko yari agiye kuvoma anyura aho Kambari Paul yahiraga ubwatsi, aramufata amupfuka umunwa amwambura ikabutura aramusambanya, amubwira ko amuha amafaranga ijana (100 Frw), Kambari Paul atangira gukurikiranwa. [2] Nyuma y’iperereza Ubushinjacyaha bwareze Kambari Paul mu Rukiko Rwisumbuye rwa Ngoma icyaha cyo gusambanya umwana, bushingiye ku bimenyetso birimo imvugo z’uwo mwana, n’ubuhamya bwa Mugisha Samuel, bumusabira guhanishwa igifungo cya burundu. [3] Kambari Paul yireguye ahakana icyaha, avuga ko uwo mwana yamunyuzeho yumva aratatse avuga ko ariwe n’intozi, amukuramo umwenda ngo amukize intozi zari zamutondagiye, Mugisha Samuel ahageze avuza induru umwana arikanga ariruka, kandi ko atari kumusambanya kuko ari umwuzukuru we, naho umushinja bakaba bari bafitanye ibibazo. [4] Mu rubanza N°RP 00441/2021/TGI/NGOMA rwaciwe ku wa 14/04/2021, Urukiko rwemeje ko Kambari Paul ahamwa n’icyaha cyo gusambanya umwana, rushingiye ku bimenyetso birimo ubuhamya bwa Mugisha Samuel wavuze ko yamubonye yunamye mu gihuru, amwegereye aramwikanga azamura ipantalo, abona na D.H. yambara ikabutura, imvugo ze zigahura n’iz’uwo mwana wavuze ko ubwo yari agiye kuvoma yanyuze kuri Kambari Paul yahira ubwatsi aramufata amukuramo ikabutura amujya hejuru aramusambanya, amupfuka umunwa ngo atavuza induru amubwira ko amuha igiceri cy'ijana (100Frw) ngo atazabivuga, Mugisha Samuel asanga amuri hejuru. Rwasanze ibivugwa na Kambari Paul ko yamukuyemo umwenda amukiza intozi nta shingiro ryabyo, kuko umwana atari kunanirwa kuvuga ko ari intozi yamukizaga, ko n’ibyo avuga

1 Amazina arahinwe kubera kamere y’icyaha n’imyaka y’uwahohotewe.

## Page 3

ko abeshyerwa kuko hari abo bafitanye amakimbirane nabyo nta shingiro byahabwa kuko ntacyo abishingiraho. Rwamuhanishije igifungo cya burundu. [5] Kambari Paul yajuririye urwo rubanza mu Rukiko Rukuru/Urugereko rwa Rwamagana, avuga ko yahamijwe icyaha atakoze, asaba Urukiko kongera gusuzuma ibimenyetso byashingiweho n’imiburanire ye akagirwa umwere, ariko mu iburanisha avuga ko ubwo raporo ya muganga igaragaza ko umwana yasambanyijwe, asaba kugabanyirizwa igihano, ariko ko umwana yaba yarabikorewe n’abandi kuko we nta cyaha yakoze. [6] Ubushinjacyaha bwasubije ko ubujurire bwe nta shingiro bufite, kuko atabashije kuvuguruza ibyashingiweho ahamwa n’icyaha, ariko ko bitewe n’uko Itegeko ryashingiweho mu kumuhana ryahindutse mu buryo bumwongerera amahirwe y’uko igihano yahanishijwe cyagabanywa, ryashingirwaho icyo gihano kikagabanywa mu mbibi z’iryo tegeko. [7] Mu rubanza N° RPA 00739/2021/HC/RWG rwaciwe ku wa 22/07/2024, Urukiko rwasanze ubujurire bwatanzwe na Kambari Paul nta shingiro bufite, kuko atabashije kuvuguruza ibimenyetso byashingiweho n’Urukiko rwa mbere, birimo ubuhamya bwa Mugisha Samuel wavuze ko yasanze arimo gusambanya D.H., kandi bugahura n’imvugo z’uwo mwana, Kambari Paul nawe ubwo yabazwaga akaba atarabihakanye uretse kuvuga ko ubwo Mugisha Samuel yababonaga yarimo gukiza uwo mwana intozi, ariko mu iburanisha akaba yarasabye imbabazi no kugabanyirizwa igihano, hakaba kandi na raporo ya muganga yerekana ko umwana yagaragazaga ibimenyetso by’uko yasambanyijwe. Rwasanze ariko n’ubwo ubujurire bwe nta shingiro bufite, igihano yahawe cyagabanywa kuko ari ubwa mbere akurikiranwe mu butabera mu buryo buzwi, rumuhanisha igifungo cy’imyaka 16. [8] Kambari Paul yajuriye mu Rukiko rw’Ubujurire urubanza ruhabwa N° RPAA 00866/2024/CA, iburanisha ribera mu ruhame ku wa 11/09/2025 Kambari Paul yunganiwe na Me Winnie Umurerwa, Ubushinjacyaha buhagarariwe na Habineza Jean Damascène, Umushinjacyaha ku rwego rw’Igihugu. [9] Mu myanzuro y’ubujurire no mu miburanire, Kambari Paul n’umwunganira bavuga ko yajurijwe n’uko yahamijwe icyaha atakoze, hashingiwe ku bimenyetso birimo gushidikanya no kuvuguruzanya. [10] Uhagarariye Ubushinjacyaha avuga ko ubwo bujurire nta shingiro bufite, kuko ntacyo Kambari Paul anenga urubanza ajuririra, kandi ko ibimenyetso byashingiweho bitavuguruzanya ahubwo byuzuzanya. [11] Ikibazo kigomba gusuzumwa muri uru rubanza n’icyo kumenya niba Kambari Paul yarahamijwe icyaha atakoze hashingiwe ku bimenyetso bishidikanywaho kandi bivuguruzanya. II. ISESENGURA RY’IKIBAZO KIGIZE URUBANZA Kumenya niba Kambari Paul yarahamijwe icyaha hashingiwe ku bimenyetso bishidikanywaho kandi bivuguruzanya. [12] Kambari Paul n’umwunganira bavuga ko yajurijwe n’uko yahamijwe icyaha atakoze hashingiwe ku bimenyetso bivuguruzanya kandi bishidikanywaho, uko gushidikanya kukaba

## Page 4

gushingiye ku buhamya bwa Mugisha Samuel wavuze ko yasanze Kambari Paul azamura ipantaro naho umwana azamura ikabutura, agakeka ko yamusambanyaga ariko ko ntaho avuga ko yabonye amusambanya. Naho ukuvuguruzanya kukaba kugaragazwa n’uko umwana yavuze ko Mugisha Samuel yasanze Kambari Paul amuri hejuru mu gihe Mugisha Samuel we avuga ko yasanze yambara ipantaro. Bavuga ko ahubwo umwana yamwitabaje intozi zirimo kumurya maze amukuramo ishati ngo azimukize, akaba ari byo Mugisha Samuel yabonye, ndetse ko hari abantu barimo nyirakuru w’umwana bamusuzumye bagasanga ntacyo yabaye, akaba kandi atari gusambanya umwuzukuru we, ko ahubwo yari afitanye amakimbirane n’abayobozi b’Umudugudu, n’umutangabuhamya akaba amushinja ibinyoma kuko ari umuvandimwe wa se w’uwo mwana. [13] Bavuga ko kandi Urukiko rwirengagije raporo ya muganga ivuga ko nta kimenyetso cyo gusambanywa cyagaragaye kuri uwo mwana, kandi ihuje kamere n’ikiburanwa nk’uko biteganywa n’ingingo ya 6 y’Itegeko Nº 062/2024 ryo ku wa 20/06/2024 rigenga ibimenyetso2, ko kandi n’ubwo iyo raporo igaragaza ko ku gitsina cy’umwana hatukuraga atari ikimenyetso cy’uko yasambanyijwe kuko hari izindi mpamvu zatera uko gutukura, cyane cyane ko muganga yasanze izindi ngingo nta kibazo zifite, kandi ko itagaragaje ko hari igitsina kinjiye mu cy’umwana, naho gukomereka bikaba byaratewe n’uko umwana yituye hasi yikanze Mugisha Samuel, ko rero hagombaga kugaragazwa ko hari urugingo Kambari Paul yashyize mu gitsina cy’umwana nk’uko ingingo y’Itegeko irebana n’icyaha cyo gusambanya umwana ibisobanura, cyane cyane ko ntabyo umwana yavuze. [14] Kambari Paul n’umwunganira bavuga kandi ko Urukiko rwashingiye ku buhamya bw’umwana udafite imyaka 14 nta kindi kimenyetso kibushyigikira nk’uko biteganywa n’ingingo ya 51 (2) y’Itegeko Nº 062/2024 ryo ku wa 20/06/2024 rigenga ibimenyetso, kandi hari igihe umwana ashukwa n’abo yizera bakamubwira ibyo avuga, bityo kuba raporo ya muganga itagaragaza ko yasambanyijwe, imvugo y’uwo mwana ikaba ishidikanywaho, ko rero kuba nta kimenyetso Ubushinjacyaha bwagaragaje cyemeza nta gushidikanya ko yakoze icyaha, Urukiko rwashingira ku ngingo ya 111 y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha3, akagirwa umwere. [15] Uhagarariye Ubushinjacyaha avuga ko ubujurire bwa Kambari Paul nta shingiro bufite, kuko atagaragaza icyo anenga urubanza yajuririye nk’uko biteganywa n’ingingo ya 183y’Itegeko nº 027/2019 ryo ku wa 19/09/2019 ryerekeye imiburanishirize y’imanza nshinjabyaha; Ko Kambari Paul aburana mu Rukiko Rukuru yahakanye icyaha ariko avuga ko raporo ya muganga iramutse igaragaje ko icyaha cyakozwe, yazacyemera akanagisabira imbabazi, anasaba Urukiko ko rwazamugabanyiriza ibihano, ko rero iyo mvugo itakoreshwa n’umuntu utaragize uruhare mu cyaha, ko kuba ubu ntacyo ayivugaho ari uburyo bwo guhunga icyaha. [16] Avuga kandi ko iby’uko hari abantu baba barasuzumye umwana bagasanga nta kibazo afite nta gaciro byahabwa, kuko abo bantu atari abaganga cyangwa impuguke, mu gihe raporo ya muganga yashingiweho n’Urukiko yakozwe n’impuguguke nk’uko amategeko abiteganya, naho

2 Iyo ngingo iteganya ko: “urwego rufite ububasha rufata icyemezo ku byo rwashyikirijwe hakurikijwe ubwoko bw’ibimenyetso bihuje na kamere y’ikiburanwa cyangwa y’ikibazo kiri mu mpaka ». 3 Iyo ngingo iteganya ko: “gushidikanya birengera ushinjwa, iyo urubanza rwakurikiranwe mu buryo bwose, ntihagire ibimenyetso nyakuri biboneka byameza nta shiti abacamanza ko ushinjwa yakoze icyaha koko, bagomba kwemeza ko atsinze”.

## Page 5

abayobozi b’inzego z’ibanze avuga ko bafitanye ikibazo, uretse kuba nta kimenyetso abitangira, batari kumubeshyera kuko bagejejweho ikibazo cyamaze kuba, babikorera raporo. [17] Uhagarariye Ubushinjacyaha avuga kandi ko n’ubwo Mugisha Samuel atabonye Kambari Paul asambanya uwo mwana ariko yaketse ibyo yari arimo, kuko yasanze amuri hejuru yunamye arimo kwambara ipantaro, umwana ari hasi nawe ahita abyuka arambara, bivuze ko yamubonye avuye ku mwana, ibyo yabonye bikaba bishimangirwa n’imvugo z’uwo mwana kuko yavuze ko yamusambanyije anasobanura aho bahuriye, ko rero Mugisha Samuel ashobora kuba yaramumukuyeho atararangiza gukora ibyo yakoraga byose, ariko ko nta kuvuguruzanya kuri mu mvugo zabo, ko ahubwo zuzuzanya kandi zigashimangirwa na raporo ya muganga yagaragaje ko igitsina cy’umwana cyari cyahungabanyijwe (redness on the vestibule), kandi nta kindi muganga yasabwe uretse kugaragaza uko yasanze igitsina cye kimeze, iryo hungabana rikaba rero ryaratewe n’ibikorwa bya Kambari Paul, cyane cyane ko yemera ko yabonanye n’uwo mwana igihe Mugisha Samuel yamugeragaho n’ubwo avuga ko yamukizaga intozi, nyamara nta wundi wavuze iby’izo ntozi, kandi ko Umucamanza ari we ufite ububasha bwo gusuzuma imvugo z’abatangabuhamya akaziha agaciro zikwiye, abihuje n’ibindi bimenyetso.4 [18] Uhagarariye Ubushinjacyaha anavuga ko ntacyari gutuma imvugo za D.H. zidashingirwaho kuko ariwe wahohotewe kandi hakaba hari ibindi bimenyetso byavuzwe hejuru byunganira imvugo ze, birimo na raporo ya muganga, kandi umwana akaba atarigeze avuga ko hari uwamubwiye ibyo avuga, ko rero Urukiko rwakwemeza ko ubujurire bwe nta shingiro bufite, hakagumaho imikirize y’urubanza rwajuririwe.

UKO URUKIKO RUBIBONA [19] Impaka kuri iki kibazo zishingiye ku kumenya niba Kambari Paul yarahamijwe icyaha cyo gusambanya umwana hashingiwe ku bimenyetso bishidikanywaho kandi bivuguruzanya. [20] Ku byerekeye ibimenyetso mu manza, mu rubanza N° RPAA 00692/2021/CA rwaciwe n’Urukiko rw’Ubujurire ku wa 20/01/20235, hasesenguwe ingingo ya 119 y’Itegeko N° 15/2004 ryo ku wa 12/06/2004 ryerekeye ibimenyetso mu manza n’itangwa ryabyo,6 cyane cyane ku mwihariko w’imanza nshinjabyaha, Urukiko rusobanura ko mu manza nshinjabyaha, ibimenyetso byose bishobora gushingirwaho mu gihe bigaragaza ukuri kw’ibyabaye (principe de la liberté de la preuve en matière pénale) ababuranyi bakaba barahawe uburyo bwo kuhaba ngo banyomozanye, kandi ko urukiko arirwo rwemeza ko ibyo bimenyetso bishobora kwemerwa. Ibi ni nako byashingiweho mu zindi manza zakurikiyeho zaciwe, harimo urubanza N° RPAA 01288/2024/CA rwaciwe n’Urukiko rw’Ubujurire ku wa 18/07/2025, haburana Ubushinjacyaha na Turikumwe Gilbert.

4 Abishingira ku ngingo ya 65 y’Itegeko N° 15/2004 ryo ku wa 12/06/2004 ryerekeye ibimenyetso, abishingira no ku murongo watanzwe mu rubanza N°RPAA 0118/11/CS, rwaciwe ku wa 13/11/2015 haburana Ubushinjacyaha na Ngurinzira. 5 Haburana Ubushinjacyaha na Ndayishimiye Jean Damascène 6 Iyo ngingo ihura n’ingingo ya 87 y’Itegeko Nº 062/2024 ryo ku wa 20/06/2024 rigenga ibimenyetso.

## Page 6

[21] Nk’uko imikirize y’urubanza rwajuririwe ibigaragaza, mu guhamya Kambari Paul icyaha cyo gusambanya umwana, Urukiko Rukuru rwashingiye ku bimenyetso birimo ubuhamya bwa Mugisha Samuel wasobanuye uburyo yamwikanze akazamura ipantalo n’umwana arimo kuzamura ikabutura, ubwo buhamya bugahura neza n’imvugo z’uwo mwana wasobanuye uburyo yamusambanyije, Kambari Paul nawe abazwa akaba atarabihakanye n’ubwo yavuze ko Mugisha Samuel yababonye arimo gukiza uwo mwana intozi, ndetse no mu iburanisha akaba yaravuze ko kuba raporo ya muganga igaragaza ko umwana yasambanyijwe, yemera kubisabira imbabazi agasaba kugabanyirizwa igihano, runashingira kuri raporo ya muganga igaragaza ko umwana yari afite ibimenyetso byo gusambanywa. [22] Ku bijyanye n’ibyo Kambari Paul n’umwunganira banenga ubuhamya bwa Mugisha Samuel bavuga ko burimo gushidikanya bukanavuguruzanya n’imvugo za D.H., Urukiko rw’Ubujurire rurasanga ibyo uwo mutangabuhamya yavuze ko yasanze Kambari Paul mu murima yunamye hejuru y’umwana, yamwikanga akazamura ipantaro naho umwana wari hasi agahaguruka akambara ikabutura, bihura n’imvugo z’uwo mwana kuko yasobanuye ko Kambari Paul yamukuyemo ikabutura amujya hejuru aramusambanya, abonye Mugisha Samuel amuvaho, bikaba byumvikana ko imvugo zabo zihura kandi zuzuzanya, ndetse ko nta gushidikanya kurimo, cyane cyane ko Kambari Paul nawe adahakana ko Mugisha Samuel yamusanganye n’uwo mwana muri uwo murima, bigashimangirwa na raporo ya muganga igaragaza ko ku gitsina cy’uwo mwana hari hatukuye. [23] Urukiko rw’Ubujurire rurasanga kandi ibyo Kambari Paul avuga ko uwo mutangabuhamya yaketse ko yasambanyaga uwo mwana bitewe n’uko yasanze yamwambuye ishati kugira ngo amukize intozi nta shingiro bifite, kuko nta bimenyetso abitangira uretse kubivuga gusa, cyane cyane ko yaba uwo mwana cyangwa Mugisha Samuel wabasanze aho, nta wavuze iby’izo ntozi Kambari Paul avuga ko yarimo akiza uwo mwana. [24] Ku bivugwa na Kambari Paul n’umwunganira ko Urukiko rwirengagije ibyo raporo ya muganga yagaragaje kuko ivuga ko nta kimenyetso cyo gusambanywa cyagaragaye kuri uwo mwana, Urukiko rw’Ubujurire rurasanga nabyo nta shingiro bifite, kuko iyo raporo yagaragaje ko ku gitsina cy’umwana hari hatukuye (redness on the vestibule), ibyagaragajwe n’iyo raporo bikaba byarahujwe n’ibindi bimenyetso birimo imvugo z’umwana n’ubuhamya bwa Mugisha Samuel, bikagaragaza ko uko gutukura kw’igitsina cy’umwana bifitanye isano n’igikorwa cyo gusambanywa cyakozwe na Kambari Paul, naho ibyo we n’umwunganira bavuga ko byaterwa n’izindi mpamvu bikaba bitahabwa agaciro, kuko badasobanura impurirane yo kuba Mugisha Samuel yarasanze yunamye ku mwana yamwikanga agahita azamura ipantaro umwana nawe wari hasi agahaguruka yambara ikabutura akanavuga ko yamusambanyije, no kuba muganga yarabonye ibyo bimenyetso ku gitsina cy’uwo mwana. [25] Urukiko rw’Ubujurire rurasanga na none iby’uko raporo ya muganga itagaragaje ko hari urugingo rwa Kambari Paul rwinjiye mu gitsina cy’umwana kandi ko n’uwo mwana ntabyo yavuze, bitatuma iyo raporo idashingirwaho, kuko muganga yagaragaje ibimenyetso yabonye ku mwana nk’uko ari nazo nshingano yari yahawe, naho ibyo kuvuga icyabiteye bigasuzumwa n’Urukiko rwaregewe, rubihuza n’ibindi bimenyetso byavuzwe haruguru nk’uko rwabikoze, rusanga Kambari Paul ahamwa n’icyaha cyo gusambanya umwana, bityo kuba umwana ataravuze urugingo yakoresheje amusambanya bikaba bitavuze ko icyo gikorwa kitabayeho harebwe ibimenyetso muganga yabonye ku gitsina cy’umwana.

## Page 7

[26] Naho iby’uko hari abantu barimo nyirakuru w’umwana bamusuzumye bagasanga ntacyo yabaye, Urukiko rw’Ubujurire rurasanga atari byo byashingirwaho kuko abo bantu batabifitemo ubumenyi nk’ubwa muganga ubihugukiwe wahawe inshingano zo kumusuzuma akanagaragaza ibyo yabonye ku gitsina cye. [27] Urukiko rw’Ubujurire rurasanga kandi rutaha agaciro ibirebana n’amakimbirane Kambari Paul avuga ko yari afitanye n’abayobozi b’Umudugudu, kuko nta kimenyetso abigaragariza, cyane cyane ko raporo y’ubuyobozi yakozwe nyuma umwana yamaze kuvuga ibyo yakorewe, n’ibyo kuba umutangabuhamya amushinja ibinyoma kubera ko ari umuvandimwe wa se w’umwana bikaba bitahabwa agaciro, kuko n’ubwo baba bafitanye isano bitatesha agaciro ubuhamya bwe kubera ko yavuze ibyo yabonye,7 kandi ubuhamya bwe bukaba butarashingiweho bwonyine ahubwo bwahujwe n’ibindi bimenyetso. [28] Ku birebana n’imvugo z’umwana wasambanyijwe, Kambari Paul n’umwunganira banenga ko zashingiweho kandi zidashyigikiwe n’ibindi bimenyetso, Urukiko rw’Ubujurire rurasanga mu kumuhamya icyaha hatarashingiwe gusa ku mvugo za D.H., kuko hari na raporo ya muganga yagaragaje cyane cyane ko ku myanya ndangagitsina ye hatukuraga, ndetse n’imvugo z’umutangabuhamya wamubonye yunamye naho umwana ari hasi yamwikanga agahita yambara ipantalo, umwana nawe akabyuka akambara ikabutura akiruka, bamubaza akavuga ko yamusambanyije, bityo hakaba nta cyabuza imvugo ze gushingirwaho kuko zunganiwe n’ibindi bimenyetso nk’uko byemejwe n’Urukiko rw’Ikirenga mu rubanza NºRPAA 0133/10/CS haburana Ubushinjacyaha na Mvuyekure Faustin. [29] Urukiko rw’Ubujurire rurasanga rero ibimenyetso byashingiweho n’Urukiko Rukuru/Urugereko rwa Rwamagana mu guhamya Kambari Paul icyaha cyo gusambanya umwana bitavuguruzanya cyangwa ngo bishidikanyweho ahubwo bigaragaza ukuri kw’ibyabaye, bityo hakaba hagumyeho imikirize y’urubanza rwajuririwe n’igihano yahanishijwe, cyane cyane ko gikwiranye n’uburemere bw’icyaha yakoze. III. ICYEMEZO CY’URUKIKO [30] Rwemeje ko ubujurire bwatanzwe na Kambari Paul nta shingiro bufite; [31] Rwemeje ko urubanza nº RPA 00739/2021/HC/RWG rwaciwe n’Urukiko Rukuru/Urugereko rwa Rwamagana ku wa 22/07/2024, rugumanye agaciro mu ngingo zarwo zose; [32] Rutegetse ko igihano cy’igifungo cy’imyaka cumi n’itandatu (16) Kambari Paul yahawe kigumyeho.

7 Byatanzweho umurongo watanzwe mu rubanza Nº RPAA0118/11/CS, rwaciwe n’Urukiko rw’Ikirenga ku wa 13/11/2015 haburana Ubushinjacyaha na Ngurinzira.