UBUSHINJACYAHA v KANYAMASHYAKA

# UBUSHINJACYAHA v KANYAMASHYAKA

- Source: Amategeko - Section: Decisions (Judgements) - Date: 2025-01-30 - Case/document no.: RPAA 00475/2024/CA - Collection: Court of Appeal

## Text

## Page 1

UBUSHINJACYAHA v KANYAMASHYAKA [Rwanda URUKIKO RW’UBUJURIRE - RPAA 00475/2024/CA (Umugwaneza, P.J.) 30 Mutarama 2025] Amategeko agenga imiburanishirize y’imanza z’inshinjabyaha – Ibimenyetso - Ibimenyetso bishobora gushingira ku mpamvu zose z’ibyabaye n’ibyemejwe n’amategeko, ababuranyi bapfa kuba barabigiyeho impaka. Urukiko ruhamya ku buryo butavuguruzwa ko ibimenyetso byose bishinja cyangwa bishinjura ari byo kandi bishobora kwemerwa. Amategeko agenga imanza z’inshinjabyaha - Gufatanwa, gukora, guhinga, guhindura, gutunda, kubika ibiyobyabwenge – Igisobanuro cyo gufatanwa ibiyobabwenge no gukora, guhinga, guhindura, gutunda no kubibika – bitandukanira ku ngano y’ibiyobyabwenge n’ikigiye gukoreshwa ibiyobyabwenge uregwa yafatanwe, yakoze, yahinze, yahinduye, yatunze, yabitse.. Incamake y’ikibazo: Ku wa 06/04/2020, Kanyamashyaka ari mu murenge wa Jali, yafatanwe udupfunyika 1528 tw’urumogi ruri mu gikapu. Ubushinjacyaha bwamureze mu Rukiko Rwisumbuye rwa Gasabo icyaha cyo gucuruza ibiyobyabwenge (urumogi) busaba ko cyamuhama agahanishwa igifungo cya burundu n’ihazabu ya 21.000.000 Frw. Uregwa yaburanye ahakana icyo cyaha avuga ko igikapu yafatanwe yagihawe na Niyongira kandi akaba atarazi ko harimo urumogi kuko yari yabwiwe ko harimo imyenda. Urukiko rwemeje ko uregwa ahamwa n’icyaha cyo gutunda ibiyobyabwenge byo mu bwoko bw’urumogi, ahanishwa igifungo cya burundu n’ihazabu y’amafaranga y’u Rwanda miliyoni makumyabiri (20.000.000 Rrw). Uregwa ntiyishimiye icyo cyemezo maze akijuririra mu Rukiko Rukuru avuga ko yahamijwe icyaha cyo gutunda ibiyobyabwenge nta bimenyetso. Urukiko rwasanze ubujurire nta shingiro bufite kuko ibimenyetso byitaweho mu kumuhamya icyaha ariko kuko bwari ubwa mbere akoze icyaha rumuhanisha igifungo cy’imyaka 15 n’ihazabu 5.000.000 Frw, rutegeka ko kuri iyo hazabu yishyura 500.000 Frw gusa, isigaye igasubikwa mu gihe cy’umwaka umwe. Uregwa yajuririye icyo cyemezo mu Rukiko rw’Ubujurire avuga ko inkiko zabanje zititaye ku bimenyetso yatanze maze hasuzumwa ikibazo cyo kumenya niba koko yarahamijwe icyaha cyo gutunda ibiyobyabwenge nta bimenyetso bidashikanywaho bikimuhamya bishingiweho. Uregwa asobanura ko yahamijwe icyaha hashingiwe ku bimenyetso bigenekereje kandi igikapu kirimo urumogi yafatanwe kitari icye kuko yari yagihawe na Emmanuel ngo agishyire umugore we akaba yari azi ko ari imyenda amushyiriye bityo ko nta bushake yagize bwo gukora icyaha cyo gutunda ibiyobywabwenge. Ubushinjacyaha buvuga ko ibimenyetso ushinjwa yatanze byose byasuzumwe urukiko rusanga nta shingiro bifite. Bukomeza buvuga ko ibivugwa n’uregwa ko yahamwa n’icyaha cyo gufatanywa ibiyobyabwenge nta shingiro bifite kuko urumogi yafatanwe ari rwinshi cyane bityo ko yakomeza guhamwa n’icyaha yahamijwe. Incamake y’ikibazo: Ibimenyetso bishobora gushingira ku mpamvu zose z’ibyabaye n’ibyemejwe n’amategeko, ababuranyi bapfa kuba barabigiyeho impaka. Urukiko ruhamya ku buryo butavuguruzwa ko ibimenyetso byose bishinja cyangwa bishinjura ari byo kandi bishobora kwemerwa.

## Page 2

Ubujurire nta shingiro bufite. Amategeko yashingiweho: Itegeko N° 027/2019 ryo ku wa 19/09/2019 ryerekeye imiburanishirize y’imanza z’inshinjabyaha nk’uko ryahinduwe kugeza ubu, ingingo ya 108; Itegeko N° 062/2024 ryo ku wa 20/06/2024 rigenga ibimenyetso, ingingo ya 4; Imanza zifashishijwe: RPAA 00408/2020/CA, Ubushinjacyaha na Niyitegeka Augustin alias Niyirema, rwaciwe n’Urukiko rw’Ubujurire ku wa 27/06/2022 Urubanza I. IMITERERE Y’URUBANZA [1] Ku wa 06/04/2020, Kanyamashyaka Théophile ari mu Kagari ka Muko, Umurenge wa Jali, yafatanywe ibiyobyabwenge byo mu bwoko bw’urumogi, rungana n’udupfunyika igihumbi na maganatanu na makumyabiri n’umunane (1.528 boules) ruri mu gikapu. Ubushinjacyaha bwamureze icyaha cyo gucuruza ibiyobyabwenge byo mu bwoko bw’ururumogi, mu Rukiko Rwisumbuye rwa Gasabo, busaba ko icyo cyaha cyamuhama agahanishwa igifungo cya burundu n’ihazabu y’amafaranga y’u Rwanda miliyoni makumyabiri n’imwe (21.000.000 Frw). [2] Kanyamashyaka Théophile yaburanye ahakana icyaha aregwa, avuga ko igikapu basanzemo urumogo yagihawe na Niyongira Innocent alias Kirenge Kazungu ngo akimutwaze, yemera kugitwara atazi ko kirimo urumogi kuko Niyongira yamubwiye ko harimo umuceri n’imyenda. [3] Mu rubanza N° RP 00773/2020/TGI/GSBO, rwaciwe ku wa 30/04/2021, Urukiko Rwisumbuye rwa Gasabo, rwemeje ko Kanyamashyaka Théophile ahamwa n’icyaha cyo gutunda ibiyobyabwenge byo mu bwoko bw’urumogi, ahanishwa igifungo cya burundu n’ihazabu y’amafaranga y’u Rwanda miliyoni makumyabiri (20.000.000 Rrw). [4] Kanyamashyaka Théophile yajuririye Urukiko Rukuru, avuga ko yahamijwe icyaha cyo gutunda ibiyobyabwenge nta bimenyetso bikimuhamya bishingiweho. Ubushinjacyaha bwavuze ko ubujurire bwe nta shingiro bufite kuko mu icibwa ry’urubanza ajuririra, hashingiwe ku bimenyetso bidashikanywaho bimuhamya icyaha yahamijwe. [5] Mu rubanza N° RPA 00750/2021/HC/KIG, rwaciwe ku wa 22/05/2024, Urukiko Rukuru rwasanze ubujurire bwa Kanyamashyaka Théophile nta shingiro bufite, rusanga ariko akwiye kugabanyirizwa igihano kuko ari ubwa mbere yari akurikiranyweho icyaha imbere y’inkiko, rumuhanisha igifungo cy’imyaka cumi n’itanu (15) n’ihazabu y’amafaranga y’u Rwanda miliyoni eshanu (5.000.000 Frw), rutegeka ko kuri iyo hazabu yishyura ibihumbi magana atanu (500.000 Frw) gusa, isigaye ingana na miliyoni enye n’ibihumbi magana atanu (4.500.000 Frw) igasubikwa mu gihe cy’umwaka umwe (1).

## Page 3

[6] Kanyamashyaka Théophile, yajuririye Urukiko rw’Ubujurire, ruhabwa ruhabwa N° RPAA 00475/2024/CA, ruburanishwa mu ruhame ku wa 16/01/2025, Kanyamashyaka Théophile yunganiwe na Me Rwimo Clotulde, Ubushinjacyaha buhagarariwe na Butera Oscar, Umushinjacyaha ku rwego rw’igihugu. [7] Kanyamashyaka Théophile n’umwunganira, bavuga ko yahamijwe icyaha mu buryo bugenekereje hirengagijwe ibisobanuro n’ibimenyetso yatanze byemeza ko igikapu cyarimo urumogi yafatanywe kitari icye, bityo ko nta bushake yagize bwo gukora icyaha kuko atari azi ko icyo gikapu kirimo urumogi, ko nta bimenyetso bidashikanywaho byemeza ko yatunze ibiyobyabwenge. [8] Uhagarariye Ubushinjacyaha avuga ko, Kanyamashyaka Théophile atahamijwe icyaha mu buryo bugenekereje cyangwa hirengagijwe ibisobanuro n’ibimenyetso yatanze, ahubwo ko byakiriwe birasuzumwa, Urukiko rusanga nta shingiro bifite rumuhamya icyaha cyo gutunda ibiyobyabwenge byo mu bwoko bw’urumogi, bityo ko ubujurire bwe nta shingiro bufite kuko nta bimenyetso atanga bivuguruza ibyashingiweho bimuhamya icyaha, byumvikanisha ko nta nenge cyangwa amakosa biri mu rubanza rwajuririwe byatuma ruhindurwa. [9] Hakurikijwe imiburanire y’impande zombi, muri uru rubanza harasuzumwa ikibazo cyo kumenya niba Kanyamashyaka Théophile yarahamijwe icyaha cyo gutunda ibiyobyabwenge nta bimenyetso bidashikanywaho bikimuhamya bishingiweho. II. ISESENGURA RY’IKIBAZO KIRI MU RUBANZA Ibyerekeye kumenya niba Kanyamashyaka Théophile yarahamijwe icyaha cyo gutunda ibiyobyabwenge nta bimenyetso bidashidikanywaho bikimuhamya bishingiweho [10] Kanyamashyaka Théophile n’umwunnganira bavuga ko yahamijwe icyaha mu buryo bugenekereje hirengagijwe ibisobanuro n’ibimenyetso yatanze byemeza ko igikapu cyarimo urumogi yafatanywe kitari icye, bityo ko nta bushake yagize bwo gukora icyaha kuko atari azi ko icyo gikapu kirimo urumogi. Basobanura ko igikapu Kanyamashyaka Théophile yafatanywe kirimo urumogi, yari yagihawe na Emmanuel wari Boss we aho yakoraga mu ruganda rukora imigati, amubwira ko kirimo imyenda n’umuceri, ko akijyana akagiha umugore we (umugore wa Emmanuel), agitwara atazi ko kirimo urumogi, ko ibyo yabisobanuye mu Rukiko Rukuru anatanga nomero za telefone za Emmanuel, ariko ntiyahamagazwa ngo agaragaze koko ko ariwe wamuhaye icyo gikapu, bityo rero ko nta bimenyetso bidashikanywaho byemeza ko Kanyamashyaka Théophile yatunze ibiyobyabwenge kuko atari azi ko igikapu yahawe na Emmanuel kirimo urumogi, bivuze ko nta bushake yagize bwo gutunda urumogi. [11] Kanyamashyaka Théophile n’umwunganira bakomeza bavuga ko, adahakana ko yafatanywe urumogi kuko n’ubwo atari azi ko icyo gikapu kirimo urumogi kuko kitari icye, ariko yemera ko yagifatanywe kandi kirimo urumogi, ko Urukiko rwazabona ko nta bushake yagize bwo gukora icyaha cyo gutunda ibiyobyabwenge, ahubwo ko icyabayeho ari uko yafatanywe urumogi, maze rwemeze ko ahamwa n’icyaha cyo gufatanwa ibiyobyabwenge.

## Page 4

[12] Uhagarariye Ubushinjacyaha avuga ko, ubujurire bwa Kanyamashyaka Théophile nta shingiro bufite kuko atahamijwe icyaha mu buryo bugenekereje cyangwa hirengagijwe ibisobanuro n’ibimenyetso yatanze nk’uko abivuga, ahubwo ko byakiriwe birasuzumwa, Urukiko rusanga nta shingiro bifite rumuhamya icyaha cyo gutunda ibiyobyabwenge, kugeza ubu akaba adatanga ibimenyetso bivuguruza ibyashingiweho bimuhamya icyaha kandi ari we ubifite mu nshingano, byumvikanisha ko nta nenge cyangwa amakosa biri mu rubanza rwajuririwe byatuma ruhindurwa. [13] Uhagarariye Ubushinjacyaha akomeza avuga ko imiburanire ya Kanyamashyaka Théophile y’uko icyaha yakoze ari icyo gufatanwa ibiyobyabwenge (urumogi), nta shingiro ifite kuko urumogi yafatanywe ari rwinshi (udupfunyika 1.528) ku buryo rufatwa ko ari urwo kwikoreshereza ku giti cye, ahubwo rwari urwo gukwirakwiza cyangwa kugurisha, bityo ko yakomeza guhamwa n’icyaha yahamijwe. Uko Urukiko rubibona [14] Impaka ziri muri uru rubanza, zishingiye ku kumenya niba ibimenyetso byashingiweho n’Urukiko rubanza bihamya ku buryo budashidikanyaho Kanyamashyaka Théophile icyaha cyo gutunda ibiyobyabwenge. [15] Ingingo ya 108 y’Itegeko N° 027/2019 ryo ku wa 19/09/2019 ryerekeye imiburanishirize y’imanza z’inshinjabyaha nk’uko ryahinduwe kugeza ubu ivuga ko “Ibimenyetso bishobora gushingira ku mpamvu zose z’ibyabaye n’ibyemejwe n’amategeko, ababuranyi bapfa kuba barabigiyeho impaka. Urukiko ruhamya ku buryo butavuguruzwa ko ibimenyetso byose bishinja cyangwa bishinjura ari byo kandi bishobora kwemerwa”. [16] Ingingo ya 4, agace ka (1) y’Itegeko N° 062/2024 ryo ku wa 20/06/2024 rigenga ibimenyetso ivuga ko “Urega cyangwa utanze ikibazo agaragaza ikimenyetso cy’ibyo aregera cyangwa asaba. Uwiregura agaragaza ikimenyetso gishyigikira ukwiregura kwe….”. [17] Nk’uko bigaragazwa n’imanza zabanje, mu Rukiko Rwisumbuye rwa Gasabo, Kanyamashyaka Théophile yahamijwe icyaha cyo gutunda ibiyobyabwenge byo mu bwoko bw’urumogi, hashingiwe ku kuba yemera ko yafatanywe urumogi rungana n’udupfunyika igihumbi na maganatanu na makumyabiri n’umunane (1.528 boule) akaba yaranashyize umukono ku nyandikomvugo y’ifatira ryarwo no kuba ashinjwa na Twizeyimana Janvier (DASSO) wamufatanye urwo rumogi. Kanyamashyaka Théophile yajuririye Urukiko Rukuru ahakana icyaha, urwo Rukiko rushingiye ku kuba yarafatanywe ingano nini y’ibiyobyabwenge (udupfunyika 1.528 tw’urumogi) no kuba yararanzwe no kwivuguruza ku bijyanye n’urwo rumogi yafatanywe, aho abazwa mu Bugenzacyaha yabanje kuvuga ko ari urwa Niyongira Innocent alias Kirenge Kazungu, ubundi akavuga ko rwari mugikapu yahawe na Emmanuel ngo agishyire umuntu agitwara atazi ko kirimo urumogi, ntiyagaragaza ikimenyetso na kimwe cyerekana ko haba hari undi muntu wamuhaye icyo gikapu cyasanzwemo urumogi yafatanywe, uretse kubivuga mu magambo gusa; rwemeza ko ubujurire bwe nta shingiro bufite, ko akomeza guhamwa n’icyaha cyo gutunda ibiyobyabwenge (urumogi). [18] Dosiye y’urubanza igaragaza ko Kanyamashyaka Théophile abazwa mu Bugenzacyaha ku wa 06/04/2020, yabanje kuvuga ko nta gikupu kirimo urumogi yafatanywe, ko we yari afite

## Page 5

agafuka karimo inkweto, ikiringiti n’imyenda, igikapu gifitwe na Niyongira, mugihe bamaze kubafata basuka hasi ibyo buri wese yari afite, mu gikapu cya Niyongira basangamo urumogi udupfunyika igihumbi na magana atanu na makamyabiri n’umunane (1.528 boules). [19] Kanyamashyaka Théophile yongeye kubazwa mu Bugenzacyaha ku wa 07/04/2020, avuga ko ariwe wafatanywe urumogi rungana n’udupfunyika 1.528 rwari mu gikapu, ko mu ibazwa rya mbere yabeshyeye Niyongira ko ariwe warufatanywe bitewe n’uko ariwe wari umaze gufatanwa udupfunyika 13 tw’urumogi, akomeza avuga ko igikapu yari yagihawe na Emmanuel ngo akimujyanire kuko yari agiye i Kigali ngo ari buze kumuhuza n’umuntu ari bugihe, ko yacyakiriye atazi ko kirimo urumogi kuko Emmanuel yari yamubwiye ko harimo umuceri. Ageze mu Bushinjacyaha ku wa 14/04/2020, Kanyamashyaka Théophile yongeye kuvuga nk’ibyo yavuze mu Bugenzacyaha ku wa 07/04/2020 ko urumogi yaruhawe na Emmanuel ruri mu gikapu acyakira atazi ko kirimo urumogi kuko yamubwiye ko ari umuceri urimo, amubwira ko akimuhera umugore we. Mu iburanisha mu Rukiko Rwisumbuye rwa Gasabo Kanyamashyaka Théophile yavuze ko igikapu cyasanzwemo urumogi yagihawe na Niyongira ngo amutwaze kuko yari afite ibikapu bibiri, amubwira ko kirimo umuceri, naho mu Rukiko Rukuru no muri uru Rukiko, avuga ko igikapu yagihawe na Emmanuel. [20] Muri dosiye y’urubanza hari kandi ubuhamya bwa Twizeyimana Janvier wemeza ko ku itariki ya 06/04/2019, bafashe Kanyamashyaka Théophile afite urumogi mu gikapu yari ahetse rungana n’udupfunyika igihumbi na maganatanu na makumyabiri n’umunane (1.528 boules)1. [21] Urukiko rw’Ubujurire rushingiye ku ngingo ya 108 y’Itegeko N° 027/2019, rurasanga kuba Kanyamashyaka Théophile yarafatanywe urumogi rungana n’udupfunyika igihumbi na maganatanu na makumyabiri n’umunane (1.528 boules) aruhetse mu gikapu nk’uko nawe ubwe abyiyemerera bikanemezwa n’imvu y’umutangabuhamya Twizeyimana Janvier, no kuba yararanzwe no kwivuguruza ku bijyanye n’urwo rumogi aho rimwe avuga ko nta rumogi yafatanywe ko igikapu cyasanzwemo udupfunyika 1.528 tw’urumogi ari icyaha Niyongira, abundi akavuga ko icyo gikapu cyasanzwemo urumogi yagihawe na Emmanuel ngo akijyanire umugore we acyakira atazi ko harimo urumogi kuko yari yamubwiye ko kirimo umuceri, ubundi akavuga ko yari yagihawe na Niyongira ngo akimutwaze kuko yari afite ibikapu bibiri, ubundi akongera akavuga ko yari yagihawe na Emmanuel; ari ibimenyetso byemeza nta shiti ko Kanyamashyaka Théophile ahamwa n’icyaha cyo gutunda urumogi. [22] Urukiko rw’Ubujurire rusanga nk’uko n’Urukiko Rukuru rwabibonye, imiburanire ya Kanyamashyaka Théophile y’uko urumogi rutari urwe ko rwari urwa Emmanuel kandi ko yarwakiriye atabizi, ibyo akabishingiraho avuga ko nta bushake bwo gukora icyaha yagize; Urukiko rw’Ubujurire rushingiye ku ngingo ya 4 y’Itegeko N° 062/2024 ryavuzwe haruguru, rusanga nta shingiro ifite kuko uretse kuba abivuga mu magambo gusa, atagaragaza ibimenyetso byemeza ko ari ukuri. Cyane cyane ko yaranzwe no kwivuguruza nk’uko byasobanuwe mu gika kibanziriza iki, ibyo bikaba bigaragaza ko ari urwe kuko iyo ruza kuba ari urw’undi muntu ariwe aba yaravuze kuva yatangira gukurikiranwa kugeza urubanza rwe rurangiye. [23] Ku bijyanye na none n’imiburanire ya Kanyamashyaka Théophile n’umwunganira y’uko yahamwa n’icyaha cyo gufatanwa ibiyobyabwenge, Urukiko rw’ubujurire rurasanga nta shingiro

1 Reba inyandikomvugo y’ubuhamya bwa Twizeyimana Janvier yatanze mu Bugenzacyaha ku wa 06/04/2020

## Page 6

ifite, kuko ingano y’ibiyobyabwenge yafatanywe (udupfunyika 1.528) ari nini ku buryo rutafatwa nk’aho ari urwo kwikoreshereza ku giti cye (simple drug possession/ personal usage), ahubwo ari urwo gukwirakwiraza (drugs trafficking /drug distrubution) nk’uko byatanzweho umurongo mu rubanza N° RPAA 00408/2020/CA rwaciwe n’Urukiko rw’Ubujurire ku wa 27/06/2022 haburana Ubushinjacyaha na Niyitegeka Augustin alias Niyirema2. [24] Ibijyanye no kuvuga ko Emmanuel yagombaga guhamagazwa akemeza ko ariwe wahaye Kanyamashyaka Théophile igikapu kirimo urumogi, Urukiko rw’Ubujurire rurasanga nta shingiro bifite kuko Urukiko Rukuru rutari kujya kumuhamagaza mugihe bimaze kurugaragarira ko Kanyamashyaka Théophile atavugisha ukuri, kuko nk’uko byasobanuwe haruguru yari yabanje kuvuga ko urumogi ari urwa Niyongira akongera akivuguruza akavuga ko ari urwa Emmanuel, akongera akavuga ko ari urwa Niyongira, akongera akavuga ko ari urwa Emmanuel; bigaragaza ko abo babose ari abo apfa kwivugira gusa mu buryo bwo gushaka guhunga icyaha kuko iyo ruza kuba ari urw’umwe muribo aba ariwe yavuze kuva yatangira gukurikiranwa kugeza urubanza rushoje. [25] Urukiko rw’Ubujurire rushingiye ku bisobanuro byose bimaze gutagwa, rurasanga ubujurire bwa Kanyamashyaka Théophile, nta shingiro bufite kuko yahamijwe icyaha hashingiwe ku bimenyetso bidashikanywaho bikimuhamya, bityo urubanza yajuririye rukaba rudahindutse. III. ICYEMEZO CY’URUKIKO [26] Rwemeje ko ubujurire bwatanzwe na Kanyamashyaka Théophile nta shingiro bufite; [27] Rwemeje ko urubanza N° RPA 00750/2021/HC/KIG (CMB 00827/2021/HC/KIG), rwaciwe n’Urukiko Rukuru ku wa 22/05/2024, rudahindutse; [28] Rutegetse ko amagarama y’urubanza aherereye ku Isanduku ya Leta kuko Kanyamashyaka Théophile yajuriye afunze akaba asonewe kuyatanga.

2 Muri urwo rubanza Urukiko rw’Ubujurire rwemeje ko “amagambo arebana no gufatanwa (avugwa mu gika cya mbere cy’ingingo ya 263 ), gukora, guhinga, guhindura, gutunda, kubika (avugwa mu gika cya 3 cy’ingingo ya 263) agomba kumvikana hakurikijwe ingano y’ibiyobyabwenge n’ikigiye gukoreshwa ibiyobyabwenge uregwa yafatanywe, yakoze, yahinze, yahinduye, yatunze, yabitse maze byagaragara ko kuri buri gikorwa muri ibyo ikigamijwe ari ukubikoresha ku giti cye (simple drug possession/ personal usage), uregwa agahabwa ibihano bito bivugwa mu gika cya mbere cy’ingingo ya 263 bingana n’igifungo kitari munsi y’umwaka umwe (1) ariko kitarenze imyaka ibiri (2) cyangwa imirimo y’inyungu rusange, ariko byagaragara ko ingano y’ibiyobyabwenge yafatanywe ari nini bikaba byashingirwaho hemezwa ko ataribyo gukoresha ku giti cye, ahubwo ikigamijwe ari gucuruza cyangwa gukwirakwiza ibiyobyabwenge (drugs trafficking /drug distrubution) uregwa agahabwa igihano kiremereye kivugwa mu gika cya gatatu cy’ingingo ya 263 cy’igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye”.