KARAGIRE v. DOFFICE

# KARAGIRE v. DOFFICE

- Source: Amategeko - Section: Decisions (Judgements) - Date: 2023-12-21 - Case/document no.: RS/RECUS/RCOMAA 00002/2023/CA - Collection: Court of Appeal

## Text

## Page 1

KARAGIRE v. D’OFFICE [Rwanda URUKIKO RW’UBUJURIRE – RS/RECUS/RCOMAA 00002/2023/CA (Rukundakuvuga, P.J.) 21 Ukuboza 2023] Amategeko agenga imiburanishirize y’imanza – Ubwihane bw’umucamanza – Impamvu z’ubwihane – Zigomba kuba ari impamvu zishingiye ku byo umuburanyi yamenye mu mibanire cyangwa mu isano umucamanza asanzwe afitanye n’umuburanyi cyangwa azi ku rubanza, zidashingiye ku miburanishirize y’urubanza kandi umuburanyi akabigaragariza ibimenyetso bigaragara bidashingiye ku kugenekereza. Incamake y’ikibazo: Karagire Yaramba Jean Baptiste yatanze ikirego mu Rukiko rw’Ubujurire, mu rubanza RCOMAA 00015/2023/CA yihana umucamanza Kamere Emmanuel avugako ko amufitiye urwango rukomeye kuko mu gihe yari umucamanza mu Rukiko Rukuru rw’ubucuruzi atamuhaye umwanya wo gusobanura ikirego cye no kuvuguruzanya mu bwisanzure mu rubanza RCOMA 00203/2019/HCC - CMB RCOMA 00125/2019/HCC yaburanishije kandi uru rufatwa nk’ikimenyetso gikomeye mu rubanza RComAA 00015/2023/CA. Akavuga kandi ko uwo mucamanza anagirana ubucuti n'abo baburana, bityo akaba atizeye ko yamuha ubutabera. Urubanza rwaburanishijwe mu nama y'abacamanza kuwa 21/12/2023, rusuzuma impamvu z'ubwihane zatanzwe na Karagire. Incamake y’icyemezo: Impamvu z’ubwihane bw’umucamanza ziteganywa n’ingingo ya 103 y’itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi si impamvu zituruka mu buryo urubanza rwaburanishijwe, ahubwo ni impamvu zishingiye ku byo umuburanyi yamenye mu mibanire cyangwa mu isano umucamanza asanzwe afitanye n’umuburanyi cyangwa azi ku rubanza, bishobora kugaragazwa bidashingiye ku miburanishirize y’urubanza. Impamvu nk’izo zigomba kuba zifitiwe ibimenyetso bigaragara bidashingiye ku kugenekereza. Ikirego nta shingiro gifite. Amategeko yifashishijwe: Itegeko NO 22/2018 ryo ku wa 29/04/2018 ryerekeye imiburanishírize y'imanza z'imbonezamubano, iz'ubucuruzi, iz'umurimo n'iz'ubutegetsi, ingingo ya 103. Imanza zifashishijwe: Urubanza RS/RECUS/RCOM 00002/2019/SC; Frederick MUZIMA RUTIKANGA vs D’OFFICE rwaciwe n’Urukiko rw’ikirenga kuwa 15/11/2019. Urubanza I. IMITERERE Y'URUBANZA

## Page 2

[1] Mu iburanisha ryo kuwa 18/10/2023 mu rubanza RComAA 00015/2023/CA rwa Karagire Yaramba Jean Baptiste na Mukasangwa Madeleine barega BARROW EDUCATION CONSULT LTD mu izina ry’umuyobozi wayo na Hategekimana Jonas, Karagire Yaramba Jean Baptiste yasabye ijambo avuga ko yihannye Umucamanza Kamere Emmanuel kuko abona amufitiye urwango; [2] Ntaganda Kabare Festo wunganira Karagire Yaramba Jean Baptiste mu myanzuro yashyize muri iki kirego asobanara ko Kamere Emmanuel igihe yari umucamanza mu Rukiko Rukuru rw’Ubucuruzi ariwe waburanishije urubanza RCOMA 00203/2019/HCC - CMB RCOMA 00125/2019/HCC rufatwa nk’inkimenyetso gikomeye mu rubanza RComAA 00015/2023/CA [3] Avuga ko urwango rukomeye uyu mucamanza amaufitiye ari uko atahaye umwanya Karagire Yaramba wo gusobanura ikirego cye no kuvuguruzanya mu bwisanzure muri urwo rubanza yaburanishije. [4] Yongeraho ko umucamanza yageneye indishyi Business Partners kandi itabaye umuburanyi mu rubanza RCOMA 00203/2019/1-ICC-CMB RCOMA 00125/2019/HCC, arushyiraho kashempuruza mu gihe cy'ibyumweru bibiri yirengagije ko yajuriye. [5] Karagire avuga ko yasabye ko iyo kashempuruza iteshwa agaciro ariko yanga no kumwakira incuro zirenze enye, bigeza n'aho abo arega barangiza urwo rubanza kandi rwarajuririwe [6] Avuga ko ibyo byose bigaragaza ko umucamanza amufitiye urwango rukabije, akanagirana ubucuti n'abo baburana, bityo akaba atizeye ko yamuha ubutabera. [7] Urubanza ku bwihane rwaburanishijwe mu nama y'abacamanza kuwa 21/12/2023, rusuzuma impamvu z'ubwihane zatanzwe na Karagire Yaramba Jean Baptiste zikurikira:  Kuba hari imanza zifitanye isano n'uru ruburanishwa umucamanza yaburanishije mu Rukiko Rukuru rw'Ubucuruzi akazifatamo icyemezo;  Kuba amufitiye urwango rukabije, akanagirana ubucuti n'abo baburana. Il. ISESENGURA RY'IMPAMVU Y'UBWIHANE a. Ibyerekeye isano iri mu manza umucamanza yaburanishije n'uru rubanza [8] Kuri iki kibazo, urukiko rusanga imanza zivugwa na Karagire zifitanye isano, ariko atari isano ivugwa mu ngingo ya 103 y' itegeko NO 22/2018 ryo ku wa 29/04/2018 ryerekeye

## Page 3

imiburanishírize y'imanza z'imbonezamubano, iz'ubucuruzi, iz'umurimo n'iz'ubutegetsi1 kuko izo manza atari zimwe, cyane ko urubanza RCOMAA 00015/2023/CA rudakomoka kuri izo. [9] Urukiko rusanga impamvu zituma habaho ubwihane bw'umucamanza nk'uko biteganyijwe mu ngingo ya 103 yavuzwe haruguru, ari ukuba umucamanza yaraburanishije urubanza rufitanye isano n'urwo agomba kuburanisha mu gihe ikiburanwa atari kimwe, kandi nk’uko bigaragara iyo mpamvu ntayo irimo. [10] Kubera izo mpamvu, iyi ngingo ikaba itashingirwaho ngo Umucamanza Kamere Emmanuel avanwe muri urwo rubanza. b. Ibyerekeye urwango Umucamanza amufitiye n'ubucuti afitanye n'abo baburana. [11] Karagire Yaramba Jean Baptiste avuga ko hari imanza ebyiri RCOMA 00203/2019/1- ICCCMB RCOMA 00125/2019/HCC zifitanye isano n'urwo yihannyemo Umucamanza Kamere Emmanuel, izo manza akaba yarazifashemo ibyemezo, agenera Business Parteners kandi itarabaye umuburanyi muri urwo rubanza, rugaterwaho kashempuruza rukanarangizwa. Ibyo ni byo Karagire Yaramba Jean Baptiste afata nk'urwango rukabije yamugaragarije ndetse bikaba n'ikimenyetso cy'ubucuti afitanye n'abo baburana. [12] Muri make, ibyo Karagire yita urwango kuri we cyangwa ubucuti ku bo baburana abishingira ku kuba atarishimiye imikirize y'izindi manza Umucamanza yaciye n'uburyo zarangijwe, ibyo akaba aribyo agenekereza akabyita urwango. [13] Nyamara, ibyo kwihana umucamanza hashingiwe ku bimenyetso bigenekereje, Urukiko rw'lkirenga rwabitanzeho umurongo mu rubanza RS/RECUS/RCOM 00002/2019/SC rwaciye ku wa 15/11/20192, rwemeza ko impamvu zo kwihana umucamanza zigomba kuba zifitiwe ibimenyetso bigaragara bidashingiye ku kugenekereza kandi bidashingiye ku miyoborere y’urubanza. 1Ingingo ya 103 CPCCSA iteganya ko Umucamanza bashobora kumwihana iyo: 10 Ubwe cyangwa UWo bashakanye n'abana babo, bafite inyungu bwite mu rubanza; 2' Ubwe, cyangwa UWO bashakanye afitanye isano y'amaraso cyangwa yo gushyingiranwa ku buryo butaziguye cyangwa afitanye isano ku buryo buziguye kugeza ku gisanira cya kane n'urnwe mu baeize inteko y'urukiko, ñ'umwe mu baburanyi, n"umwunganira cyangwa umuhagarariye; 30 Urnwe mu baburanyi agaragaje ishingiro ry'urwango afitanye n'umucamanza; 40 Umwe mu baburanyi agaragaje ko urnucamanza afitanye ubucuti bwihariye n'undi mu baburanyi cyangwa kuva aho urubanza rutangiriye, yarigeze kwakirwa mu buryo bwihariye n'urnwe mu baburanyi ku mafaranga ye, cyangwa yaremeye impano ahawe n'umuburanyi; 56 Yigeze kugira icyo avuga cyangwa agatanga inama kuri tarwo rubanza mbere y'uko ruburanishwa; 69 Yigeze kuba mu rubanza ari umucamanza, umwunzi, umushinjacyaha, umugenzacyaha, umuburanyi, umutangabuhamya, umusemuzi, inzobere, cyangwa umukozi wo mu butegetsi bwa Leta; 7' Habayeho urubanza rw'ishinjabyaha cyangwa rw'imbonezamubano, hagati ytumucarnanza cyangwa uwo bashakanye, abafitanye n'umucamanza isano ishingiye ku maraso cyangwa ku gushyingirwa ku buryo butaziguye cyangwa ku buryo buziguye kugeza ku gisanira cya kane n'umwe mu baburana, uwo bashakanye cyangwa abo bafitanye isano ishingiye ku maraso cyangwa ku gushYingirwa ku buryo butaziguye cyangwa ku buryo buziguye kugeza ku gisanira cya kane. 2 Reba RS/RECUS/RCOM 00002/2019/SC rwaciwe n'Urukiko rw'lkirenga kuwa 15/11/2019 mu gika cyarwo cya 23

## Page 4

[14] Kubera izo mpamvu, rusanga impamvu zo kwihana umucamanza zitangwa na Karagire Yaramba Jean Baptiste atari impamvu zatuma umucamanza uburanisha urubanza RCOMAA 00015/2023/CA aruvanwamo kuko nta shingiro zifite. [15] Rusanga icyakora, mu rwego rwo kumumara impungenge, atari ngombwa ko Umucamanza waruburanishaga arugumamo; rukaba ruzahabwa indi nteko. III. ICYEMEZO CY'URUKIKO [16] RWEMEJE ko ikirego cy'ubwihane cyantanzwe na Karagire Yaramba Jean Baptiste nta shingiro gifite; [17] RUTEGETSE ariko ko urubanza RCOMAA 00015/2023/CA ruzaburanishwa n'indi nteko ku mpamvu zasobanuwe;