UBUSHINJACYAHA v. KARAMBIZI

# UBUSHINJACYAHA v. KARAMBIZI

- Source: Amategeko - Section: Decisions (Judgements) - Date: 2025-10-24 - Case/document no.: RPAA 00192/2023/CA - Collection: Court of Appeal

## Text

## Page 1

UBUSHINJACYAHA v. KARAMBIZI [Rwanda URUKIKO RW’UBUJURIRE – RPAA 00192/2023/CA (Nyirandabaruta, P.J.) 24 Ukwakira 2025] Amategeko agenga imiburanishirize y’imanza z’inshinjabyaha – Ubuzime bw’ikurikiranacyaha – Uregwa apfuye nyuma yuko urubanza rujuririwe – Mu gihe uregwa apfuye nyuma y’uko urubanza rujuririwe, urukiko rwajuririwe rugomba kuvuga gusa ko habayeho ubuzime bw’ikurikiranacyaha. Incamake y’ikibazo: Ubushinjacyaha bwakurikiranyeho Karambizi Innocent icyaha kunywa no gucuruza ibiyobyabwenge, nyuma yuko afatanwe boules 11 z’urumogi n’amafaranga 7000 Frw yari amaze kurucuruzamo, mumuregera Urukiko Rwisumbuye rwa Nyarugenge bumusabira guhanishwa igifungo cya burundu n’ihazabu ya miliyoni makumyabiri n’eshanu (25.000.000 Frw). Urukiko Rwisumbuye rwa Nyarugenge rwaciye urubanza rwemeza ko Karambizi ahamwa n’icyaha rumuhanisha igifungo cy’imyaka 25 n’ihazabu ya ya miliyoni makumyabiri (20.000.000 Frw). Atishimiye icyo cyemezo, uregwa yajuririye mu Rukiko Rukuru asaba kugabanyirizwa igihano ku mpamvu zuko yaburanye yemera icyaha; Urwo Rukiko mu guca urubanza rwemeza ko nta gihindutse ku mikirize y’urubanza rujuririrwa kuko yigeze guhanirwa icyo cyaha, none akaba ari isubiracyaha. Karambizi yajuririye mu Rukiko rw’Ubujurire, urwo Rukiko ku munsi w’iburanisha ruhamagaje urubanza, umwunganizi mu mategeko wa Karambizi amenyesha urukiko ko umuclient we yapfuye, ko n’icyemezo cyemeza ko yapfuye kiri muri system. Ubushinjacyaha buburana buvuga ko kuba ukurikiranwe yapfuye, busanga harabayeho ubuzime bw’ikurikiracyaha butewe nuko yapfuye yapfuye ataraburana ubujurire bwe, bigateganywa n’ingingo ya 5 (1) y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha iteganya ko mu mpamvu zituma ikirego cy’ikurikiranacyaha kizima harimo n’urupfu rw’uregwa. Incamake y’icyemezo: Mu gihe uregwa apfuye nyuma y’uko urubanza rujuririwe, urukiko rwajuririwe rugomba kuvuga gusa ko habayeho ubuzime bw’ikurikiranacyaha. Habayeho ubuzime bw’ikurikiranacyaha. Nta mategeko yashingiweho Imanza zifashishijwe: RPAA 00272/2021/CA; Ubushinjacyaha vs Bayavuge Omar rwaciwe n’Urukiko rw’Ubujurire ku wa 02/06/2022.

## Page 2

Urubanza I. IMITERERE Y’URUBANZA [1] Ku wa 26/05/2019, mu Mudugudu w’Intambwe, Akagari ka Kimihurura, Umurenge wa Kimihurura, ubwo inzego zishinzwe umutekano zari ziri mu mukwabo zafashe Karambizi Innocent, ari gucuruza urumogi afatanwa boules 11 n’amafaranga ibihumbi birindwi (7.000Frw) yari amaze gucuruza mu rumogi. [2] Ubushinjacyaha bwamuregeye Urukiko Rwisumbuye rwa Nyarugenge, bumukurikiranyeho icyaha cyo kunywa no gucuruza ibiyobyabwenge, bumusabira guhanishwa igifungo cya burundu n’ihazabu ya miliyoni makumyabiri n’eshanu (25.000.000 Frw). [3] Karambizi Innocent yemera icyaha, akavuga ko yafatanywe udupfunyika 11 icyenda amaze kutugurisha ko amafaranga bamusanganye harimo ayo yari amaze gucuruza mu rumogi, andi ari ayo yari yakuye mu rugo, asaba imbabazi kandi yemera ko yari amaze iminsi mirongo itanu n’ine afunguwe. [4] Urukiko Rwisumbuye rwa Nyarugenge rwaciye urubanza RP 00882/2019/TGI/NYGE ku wa 30/07/2019, rushingiye ku mvugo za Karambizi Innocent yemera ko yafatanywe udupfunyika 11 tw’urumogi, utundi 9 amaze kutugurisha; ko n’amafaranga yafatanye harimo ayo yari amaze gucuruza mu rumogi, ku nyandiko mvugo y’ifatira Karambizi Innocent yashyizeho umukono, na kuri pv de constat; rwamuhamije icyaha cyo gufatanwa no kugurisha ibiyobyabwenge; rumuhanisha igifungo cy’imyaka makumyabiri n’itanu (25) n’ihazabu ya miliyoni makumyabiri (20.000.000 Frw). [5] Karambizi Innocent yajuriye mu Rukiko Rukuru avuga ko yaburanye yemera icyaha asaba n’imbabazi ariko Urukiko rwamuhaye ibihano biremereye, asaba kugabanyirizwa igihano kuko yemera icyaha akanagisabira imbabazi.Uhagarariye Ubushinjacyaha avuga ko Karambizi Innocent yagabanyirijwe ibihano, bityo ko atakongera kugabanyirizwa. [6] Urukiko Rukuru rwaciye urubanza RPA 01521/2019/HC/KIG, ku wa 12/11/2020, rushingiye ku ngingo ya 263(3 i) y’Itegeko Nº68/2018 ryo ku wa 30/08/2018 riteganya ibyaha n’ibihano muri rusange1, runashingira kuba urumogi ruri mu biyobyabwenge bihambaye, runashingira kuba Karambizi Innocent yigeze guhanirwa icyo cyaha ubu akaba ari isubiracyaha, rwasanze atakongera kugabanyirizwa igihano, rwemeza ko urubanza ajuririra rudahindutse. [7] Karambizi Innocent yajuririye imikirize y’urwo rubanza mu Rukiko rw’Ubujurire, urubanza ruhabwa RPAA 00192/2023/CA, ruhamagawe mu iburanisha mu ruhame ryo ku wa 09/10/2025, rusanga Karambizi Innocent atitabye ariko hari Me Kagamba Christophe wagombaga kumwunganira, amenyesha Urukiko ko Karambizi Innocent yapfuye ko n’icyemezo cy’uko

1 iteganya ko, Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

## Page 3

yapfuye kiri muri dosiye; Ubushinjacyaha buhagarariwe na Rudatinya Nyangezi Gaspard, Umushinjacyaha ku rwego rw’Igihugu. [8] Urukiko rumaze kubona ko icyemezo kiri muri dosiye cyemeza Karambizi Innocent uturuka Kigali-Ruhango Nyarugenge yapfuye ku wa ...... kitagaragaza niba Karambizi Innocent wapfuye ari mwene Karambizi na Mukandori wari utuye mu Mudugudu wa Ruhango, Akagari ka Kigali, Umurenge wa Kigali, Akarere ka Nyarugenge, rusanga kugira ngo rugire icyemezo rufata icyo aricyo cyose, ari ngombwa ko Ubwanditsi bw‘Urukiko buvugana na Gereza kugira ngo iruhamirize niba Karambizi Innocent uvugwa muri icyo cyemezo ari Karambizi Innocent ari mwene Karambizi na Mukandori wari utuye mu Mudugudu wa Ruhango, Akagari ka Kigali, Umurenge wa Kigali, Akarere ka Nyarugenge, uvugwa muri iyi dosiye, urubanza rukazasomwa ku wa 24/10/2025. [9] Ubwanditsi bw’Urukiko bwandikiye Ubuyobozi bw’Igororero rya Nyarugenge ibaruwa yo ku wa 10/10/2025 ibusaba kugaragaza niba Karambizi Innocent, mwene Kabirigi na Mukandori, utuye mu Mudugudu wa Ruhango, Akagari ka Kigali, Umurenge wa Kigali, Akarere ka Nyarugenge, Umujyi wa Kigali ariwe wapfuye koko, maze mu ibaruwa yo ku wa 20/10/2025, Ubuyobozi bw’Igororero rya Nyarugenge busubiza ko Karambizi Innocent mwene, Kabirigi na Mukandori, wavutse 1977, utuye mu Mudugudu wa Ruhango, Akagari ka Kigali, Umurenge wa Kigali, Akarere ka Nyarugenge, Umujyi wa Kigali ariwe koko wapfuye ku wa 22/06/2025. [10] Muri uru rubanza harasuzumwa ikibazo kijyanye no kumenya inkurikizi mu rwego rw’amategeko z’urupfu rwa Karambizi Innocent ku rubanza rwe. II. ISESENGURA RY’IKIBAZO KIGIZE URUBANZA Kumenya inkurikizi mu rwego rw’amategeko z’urupfu rwa Karambizi Innocent ku rubanza rwe. [11] Karambizi Innocent, yajuririye igihano yahawe n’Urukiko Rukuru mu rubanza RPA 01521/2019/HC/KIG ku cyaha cyo gufatanwa no kugurisha ibiyobyabwenge. Mu gihe yari ataraburana Ubujurire bwe, Me Kagamba Christophe, umwunganira yashyize muri dosiye icyemezo kigaragaza ko yapfuye. [12] Uhagarariye Ubushinjacyaha yavuze ko ashingiye ku cyemezo kiri muri système cyemeza ko Karambizi Innocent wari ukurikiranwe yapfuye no ku biteganywa n’ingingo ya 5 (1) y’Itegeko Nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha iteganya ko mu mpamvu zituma ikirego cy’ikurikiranacyaha kizima harimo n’urupfu rw’uregwa, asanga harabayeho ubuzime bw’ikurikiracyaha butewe n’uko Karambizi Innocent yapfuye ataraburana ubujurire bwe. UKO URUKIKO RUBIBONA [13] Ikibazo cyo kumenya uko bigenda igihe uregwa apfuye nyuma y’uko urubanza rujuririwe cyasuzumwe mu manza zitandukanye zirimo urubanza RPAA 00272/2021/CA, rwaciwe ku wa 02/06/2022 Ubushinjacyaha buburana na Bayavuge Omar (Igika cya 10). Muri urwo rubanza, uru

## Page 4

Rukiko rwemeje ko mu gihe uregwa apfuye nyuma y’uko urubanza rujuririwe, urukiko rwajuririwe rugomba kuvuga gusa ko habayeho ubuzime bw’ikurikiranacyaha. [14] Muri systeme ya IECMS, hagaragaramo icyemezo RFI/05679/25 cy’uwapfuye (Death Certifacate) cyo ku wa 29/07/2025, cyatanzwe na Dr. Nkurunziza Innocent (Medical Doctor Forensic Medicine Division) cyemeza ko Karambizi Innocent yapfuye ku wa 22/06/2025. [15] Hari kandi ibaruwa yo ku wa 20/10/2025, Ubuyobozi bw’Igororero rya Nyarugenge bwanditse busubiza ibaruwa y’Umwanditsi Mukuru w’Urukiko rw’Ubujurie yo ku wa 10/10/2025, yemeza ko Karambizi Innocent mwene, Kabirigi na Mukandori, wavutse 1977, wari utuye mu Mudugudu wa Ruhango, Akagari ka Kigali, Umurenge wa Kigali, Akarere ka Nyarugenge, Umujyi wa Kigali ariwe koko wapfuye ku wa 22/06/2025. [16] Urukiko rw’Ubujurire rushingiye kuri ibyo bimenyetso no ku murongo watanzwe mu rubanza rwavuzwe haruguru, rurasanga harabayeho ubuzime bw’ikurikiranacyaha kuri Karambizi Innocent kuko yapfuye atakiriho. III. ICYEMEZO CY’URUKIKO [17] Rwemeje habayeho ubuzime bw’ikurikiranacyaha kuri Karambizi Innocent [18] Ruvuze ko amafaranga y’ingwate y’amagarama aherezwa ku isanduku ya Leta.