KARANGWA v. RWANDA GOVERNANCE BOARD (RGB)

# KARANGWA v. RWANDA GOVERNANCE BOARD (RGB)

- Source: Amategeko - Section: Decisions (Judgements) - Date: 2015-11-06 - Case/document no.: RAD 0010/15/HC/KIG - Collection: High Court

## Text

## Page 1

KARANGWA v. RWANDA GOVERNANCE BOARD (RGB) [Rwanda URUKIKO RUKURU – RAD 0010/15/HC/KIG (Hitimana, P.J.) 06 Ugushyingo 2015] Amategeko agenga ububasha bw’inkiko – Inzitizi y’iburabubasha – Ububasha bw’Urukiko Rukuru – Ibyemezo by’ubutegetsi byemerewe kuregerwa mu Rukiko Rukuru – Urukiko Rukuru ruburanisha ibirego bikurikira bijyanye n’imanza z’ubutegetsi byerekeranye no gukuraho ibyemezo by’ubutegetsi byafashwe ku rwego rwa nyuma na Perezida wa Repubulika, Perezida wa Sena, Perezida w’Umutwe w’Abadepite, Minisitiri w’Intebe, Abaminisitiri n’Abanyamabanga ba Leta – Itegeko ngenga ryo ku wa 16/06/2013 rihindura kandi ryuzuza itegeko ngenga n° 51/2008 ryo ku wa 09/09/2008 rigena imiterere, imikorere n’ububasha by’inkiko, ingingo ya 15(7). Incamake y’icyemezo: Karangwa yasabye RGB kwandika Umuryango “Open Democracy and Sustainable Development Initiative” abereye umuvugizi; RGB isubiza ko umuryango ODESUDI udashobora guhabwa icyemezo cy’iyandikwa ry’agateganyo, kubera ko igenzura yakoze yasanze imikorere yawo irimo bimwe mu bikorwa bivugwa mu ngingo ya 20 y’itegeko N° 04/2012 ryo ku wa 17/02/2012 rigena imitunganyirize n’imikorere by’imiryango nyarwanda itari iya Leta. Karangwa yatanze ikirego muri uru Rukiko, asaba ko icyo cyemezo cyo kutandika ODESUDI gikurwaho. RGB yazamuye inzititizi y’iburabubasha ivuga ko Urukiko Rukuru atarirwo rufite ububasha bwo kuburanisha ikirego cya Karangwa ahubwo yagombaga kugitanga mu Rukiko Rwisumbuye, Urugereko ruburanisha imanza z’ubutegetsi. Karangwa avuga ko Urukiko Rukuru rufite ububasha, kuko Umuyobozi wa Rwanda Governance Board (RGB) ari mu rwego rumwe n’urw’Umunyamabanga wa Leta, kandi itegeko rigena imiterere, imikorere n’ububasha by’inkiko rikaba rishyira ibyemezo by‘Umunyamabanga wa Leta mu byemezo biregerwa mu Rukiko Rukuru. Incamake y’icyemezo: umuyobozi wa RGB ntiyafatwa nk’ Umunyamabanga wa Leta igihe Karangwa atagaragaza icyo ashingiraho abivuga ko ndetse no kuba icyemezo aregera kitarafashwe n’umwe mu bayobozi bavugwa mu itegeko bituma uru rukiko rutagira ububasha bwo kuburanisha kuko ari bo bonyine ibyemezo byabo biregerwa mu rukiko Rukuru kubwibyo ikirego kikaba cyoherejwe mu Rukiko Rwisumbuye. Inzitizi ifite ishingiro; Urubanza rwoherejwe mu Rukiko Rwisumbuye. Amategeko yashingiweho:

## Page 2

Itegeko ngenga ryo ku wa 16/06/2013 rihindura kandi ryuzuza itegeko ngenga n° 51/2008 ryo ku wa 09/09/2008 rigena imiterere, imikorere n’ububasha by’inkiko, ingingo ya 15(7) Nta rubanza rwifashishijwe Urubanza I. IMITERERE Y’URUBANZA [1] KARANGWA Frederick Hendrick yasabye Rwanda Governance Board (RGB) kwandika Umuryango “Open Democracy and Sustainable Development Initiative” abereye umuvugizi. Mu ibaruwa yayo yo ku wa 09/06/2015, Rwanda Governance Board (RGB) yamushubije ko umuryango ODESUDI udashobora guhabwa icyemezo cy’iyandikwa ry’agateganyo, kubera ko igenzura yakoze yasanze imikorere yawo irimo bimwe mu bikorwa bivugwa mu ngingo ya 20 y’itegeko n° 04/2012 ryo ku wa 17/02/2012 rigena imitunganyirize n’imikorere by’imiryango nyarwanda itari iya Leta. [2] KARANGWA Fredrick Hendrick yatanze ikirego muri uru Rukiko, asaba ko icyo cyemezo cyo kutandika ODESUDI gikurwaho. [3] Urubanza rwahamagawe kuburanishwa ku wa 03/11/2015, uhagarariye Rwanda Governance Board (RGB) atanga inzitizi y’iburabubasha, avuga ko Urukiko Rukuru atarirwo rufite ububasha bwo kuburanisha ikirego cya KARANGWA Fredrick Hendrick, ko ikirego cye yagombaga kugitanga mu Rukiko Rwisumbuye, Urugereko ruburanisha imanza z’ubutegetsi. [4] Harasuzumwa niba uru Rukiko rwararegewe atarirwo rugomba kuregerwa. II. ISESENGURA RY’IBIBAZO BIGIZE URUBANZA [5] Uhagarariye Rwanda Governance Board (RGB) avuga ko ashingiye ku ngingo ya 12, igika cya 2, icya 3 n’icya 4 y’itegeko ngenga ryo ku wa 16/06/2013 rihindura kandi ryuzuza itegeko ngenga n° 51/2008 ryo ku wa 09/09/2008 rigena imiterere, imikorere n’ububasha by’inkniko, ashingiye no ku ngingo ya 15 yaryo, asanga ikirego kitari mu bubasha bw’Urukiko Rukuru, ko ahubwo cyagombye kuregerwa Urukiko Rwisumbuye. [6] KARANGWA Fredrick Hendrick avuga ko Urukiko Rukuru rufite ububasha, kuko Umuyobozi wa Rwanda Governance Board (RGB) ari mu rwego rumwe n’urw’Umunyamabanga wa Leta, kandi ingingo ya 15 yavuzwe ikaba ishyira ibyemezo by‘Umunyamabanga wa Leta mu byemezo biregerwa mu Rukiko Rukuru. [7] Urukiko rurasanga ingingo 15 y’itegeko ngenga ryo ku wa 16/06/2013 rihindura kandi ryuzuza itegeko ngenga n° 51/2008 ryo ku wa 09/09/2008 rigena imiterere, imikorere n’ububasha by’inkniko, ivuga ko „Urukiko Rukuru ruburanisha ibirego bikurikira bijyanye n’imanza z’ubutegetsi byerekeranye no gukuraho

## Page 3

ibyemezo by’ubutegetsi byafashwe ku rwego rwa nyuma na Perezida wa Repubulika, Perezida wa Sena, Perezida w’Umutwe w’Abadepite, Minisitiri w’Intebe, Abaminisitiri n’Abanyamabanga ba Leta : ....“. [8] Urukiko rurasanga KARANGWA Fredrick Hendrick atagaragaza icyo ashingiraho avuga ko Umuyobozi wa Rwanda Governance Board (RGB) ari Umunyamabanga wa Leta, bityo Urukiko rukaba rutamufata nk’Umunyamabanga wa Leta. [9] Urukiko rurasanga kuba icyemezo KARANGWA Fredrick Hendrick aregera kitarafashwe n’umwe mu bayobozi bavugwa mu gika cya 7 cy’uru rubanza, ibyemezo byafashwe n’abayobozi bavugwa muri icyo gika bikaba aribyo byonyine biregerwa muri uru Rukiko, ni ukuvuga ko uru Rukiko atarirwo rufite ububasha bwo kuburanisha iki kirego. [10] Urukiko rurasanga ibirego bisaba gukuraho ibyemezo by’abategetsi batari abavuzwe mu gika cya 7 cy’uru rubanza, biri mu bubasha bw’Urukiko Rwisumbuye, urugereko ruburanisha imanza z’ubutegetsi, hashingiwe mu biteganywa n’ingingo ya 12 y’itegeko ngenga ryo ku wa 16/06/2013 rihindura kandi ryuzuza itegeko ngenga n° 51/2008 ryo ku wa 09/09/2008 rigena imiterere, imikorere n’ububasha by’inkiko. [11] Urukiko rurasanga urubanza rukwiye koherezwa mu Rukiko Rwisumbuye kuko arirwo rufite ububasha bwo kuburanisha uru rubanza. III. ICYEMEZO CY’URUKIKO [12] Rwemeje ko Urukiko Rukuru nta bubasha rufite bwo kuburanisha uru rubanza. [13] Rutegetse ko urubanza rwoherezwa mu Rukiko Rwisumbuye, urugereko ruburanisha imanza z’ubutegetsi, rufite ububasha bushingiye ku ifasi, kuko arirwo rufite ububasha bwo kuruburanisha