UBUSHINJACYAHA vs KARONGOZI

# UBUSHINJACYAHA vs KARONGOZI

- Source: Amategeko - Section: Decisions (Judgements) - Date: 2024-11-14 - Case/document no.: RS/INJUST/RP 00003/2021/CA - Collection: Court of Appeal

## Text

## Page 1

UBUSHINJACYAHA vs KARONGOZI [Rwanda URUKIKO RW’UBUJURIRE – RS/INJUST/RP 00003/2021/CA (Rukundakuvuga P.J., Umugwaneza na Tugireyezu J.) 14 Ugushyingo 2024] Amategeko yerekeye imiburanishirize y’imanza nshinjabyaha – Gusubirishamo urubanza ku mpamvu z’akarengane – Kureka ikirego cy’akarengane – Iyo uwatanze ikirego cyo gusubirishamo urubanza ku mpamvu z’akarenane akiretse, aba agomba kubyemererwa nta mpaka, hakagumaho imikirize y’urubanza rwasubirishijwemo ku mpamvu z’akarengane, kandi akaba adashobora kwemererwa kugarura icyo kirego. Amategeko yerekeye imiburanishirize y’imanza nshinjabyaha – Gusubirishamo urubanza ku mpamvu z’akarengane – Indishyi z’ikurikiranarubanza igihe uwareze yaretse ikirego – Iyo uwatanze ikirego cyo gusubirishamo urubanza ku mpamvu z’akarenane akiretse, aba ashobora gucibwa amafaranga y’ibyagiye ku rubanza, igihe abo baburana babisabye. Incamake y’ikibazo: KARONGOZI Abdoul Muhamed yandikiye Perezida w’Urukiko rw’Ubujurire asaba ko urubanza No RPA 00720/2018/HC/KIG yaregwagamo n’Ubushinjacyaha kwandika no gukoresha inyandiko yahinduwe cyangwa irimo ibinyoma, rwamutegetse kwishyura amafaranga y’indishyi MUKAYISA Christine, KABAYUNDO Thérèse, MUKAYIRERE Anne Marie na UMULISA Françoise na MUKAYIRANGA Béatrice rusubirwamo ku mpamvu z’Akarengane, asanga bifite ishingiro maze ruhabwa nº RS/INJUST/RP 00003/2021/CA, ariko nyuma yandika avuga ko yaretse ikirego. Incamake y’icyemezo: Iyo uwatanze ikirego cyo gusubirishamo urubanza ku mpamvu z’akarenane akiretse, aba agomba kubyemererwa nta mpaka, hakagumaho imikirize y’urubanza rwasubirishijwemo ku mpamvu z’akarengane, kandi akaba adashobora kwemererwa kugarura icyo kirego. Aba kandi ashobora gucibwa amafaranga y’ibyagiye ku rubanza, igihe abo baburana babisabye. Bikaba binumvikana ko igihe batabisabye, Urukiko rwaregewe rwemeza gusa ko kureka ikirego byemewe; ko kandi birangije burundu impaka zari mu kirego bari bashyikirije urukiko rwaregewe. Amategeko yakoreshejwe: Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 122 n’iya 124. Rwemeye ukureka ikirego byasabwe; Rwemeje ko amagarama y’uru rubanza aherera ku isanduku ya Leta. Urubanza I. IMITERERE Y’URUBANZA [1] Nyuma y’uko mu rubanza No RPA 00720/2018/HC/KIG, rwaciwe n’Urukiko Rukuru ku wa 22/02/2019, hemeje ko KARONGOZI Abdoul Muhamed adahamwa n’icyaha cyo kwandika no gukoresha inyandiko yahinduwe cyangwa irimo ibinyoma ariko rukamutegeka kwishyura amafaranga y’indishyi MUKAYISA Christine, KABAYUNDO Thérèse, MUKAYIRERE Anne Marie na UMULISA Françoise na MUKAYIRANGA Béatrice baregera indishyi, KARONGOZI Abdoul Muhamed ntiyishimiye icyo cyemezo cy’Urukiko Rukuru, maze yandikira Perezida w’Urukiko rw’Ubujurire asaba ko urwo rubanza No RPA 00720/2018/HC/KIG rusubirwamo ku mpamvu z’Akarengane. Amaze gusuzuma dosiye, Perezida w’Urukiko rw’Ubujurire yandikiye Perezida w’Urukiko rw’Ikirenga amumenyesha ko muri urwo rubanza habayemo

## Page 2

kwirengagiza ibimenyetso ku buryo bugaragarira buri wese, rukaba rugomba gusubirwamo ku mpamvu z’akarengane. [2] Mu cyemezo no N°134/CJ/2021 cyo ku wa 29/03/2021, Perezida w’Urukiko rw’Ikirenga yemeje ko urubanza no RPA 00720/2018/HC/KIG rusubirwamo ku mpamvu z’akarengane, yemeza kandi ko urwo rubanza rwoherezwa mu Rukiko rw’Ubujurire rukandikwa mu bitabo byabugenewe kugira ngo abe ari rwo ruzaruburanisha. [3] Mu Rukiko rw’Ubujurire, urwo rubanza rwahawe nº RS/INJUST/RP 00003/2021/CA, iburanisha rishyirwa ku wa 13/11/2024; Urukiko ruhamagaye urubanza rusanga, Ubushinjacyaha bwitabye buhagarariwe na NIYIBIZI Tite, Umushinjacyaha ku rwego rw’igihugu, KARONGOZI Abdoul Muhamed, KABAYUNDO Thérèse, MUKAYIRERE Anne Marie, MUKAYIRANGA Béatrice, UMULISA Françoise na MUKAYISA Christine batitabye. Urukiko rwasanze ariko muri dosiye inyandiko zigaragaza ko KARONGOZI Abdoul Muhamed yaretse ikirego, ko ndetse atazaza kuburana, ko mu icibwa ry’urubanza hazagenderwa ku nyandiko yatanze, n’izindi abo baburanaga banditse bavuga ko bemera ukureka ikirego kwa KARONGOZI Abdoul Muhamed kuko bemeranyije uburyo bazakemura ikibazo bari bafitanye ndetse ko nabo batazaza mu iburanisha kuko ikirego bagikemuye mbere y’uko riba. Uhagarariye Ubushinjacyaha we yasobanuye ko ntacyo Ubushinjacyaha bwabivugaho. [4] Urukiko ruhereye ku bivugwa n’ababuranyi, rurasanga ikibazo gikwiye gusuzumwa ari Ukumenya niba kureka ikirego kwa KARONGOZI Abdoul Muhamed kwakwemerwa n’ingaruka zabyo. II. ISESENGURA RY’IKIBAZO KIGIZE URUBANZA Kumenya niba KARONGOZI Abdoul Muhamed yakwemererwa kureka ikirego n’ingaruka zabyo. [5] Ku wa 31/05/2024, KARONGOZI Abdoul Muhamed yandikiye Urukiko rw’Ubujurire arumenyesha ko yaretse ikirego gifite No RS/INJUST/RP 00003/2021/CA yari yarezemo MUKAYISA Christine na UMULISA Françoise ndetse ko nabo babyemera kuko bemeranyije ko areka ikirego nabo bagakuraho itambama bari barashyize ku mutungo we. Ku wa 11/11/2024, Me MUNYANTWARI Wellars mu izina rya KARONGOZI Abdoul Muhamed yandikiye Urukiko arumenyesha ko we n’uwo yunganira batazaza mu iburanisha ryo ku wa 13/11/2024 kuko KARONGOZI Abdoul Muhamed ari muri Tanzania naho we akaba afite ubutumire mu Karere ka Gisagara, asaba ko mu guca urubanza, hazashingirwa ku nyandiko impande zombi zandikiye urukiko zigaragaza ko ikibazo cyakemutse. [6] KABAYUNDO Thérèse, MUKAYIRERE Anne Marie na MUKAYIRANGA Béatrice mu myanzuro yabo bakaba baragaraje ko ntacyo bakurikiranyeho KARONGOZI Abdoul Muhamed kuko ikirego cy’indishyi bakiretse ndetse banandikira ibaruwa Perezida w’Urukiko rw’Ubujurire basaba ko bakurwa mu rubanza No RS/INJUST/RP 00003/2021/CA. [7] Uhagarariye Ubushinjacyaha asobanura ko ntacyo Ubushinjacyaha bwavuga ku byo KARONGOZI Abdoul Muhamed asaba Urukiko rw’Ubujurire, ko ahubwo abafite ijambo ari abo arega ari nabo bagomba kubyireguraho. [8] Ku wa 11/11/2024, UMULISA Françoise na MUKAYISA Christine bandikiye Perezida w’Urukiko rw’Ubujurire bamumenyesha ko bemera kureka ikirego kwa KARONGOZI Abdoul Muhamed gifite nº RS/INJUST/RP 00003/2021/CA kuko bemeranyije uko ikibazo bari bafitanye kizakemuka ndetse bavuga ko batazaza kuburana cyangwa ngo bashake Abavoka babahagararira kuko bakemuye ikibazo mbere y’uko iburanisha rigera. UKO URUKIKO RUBIBONA

## Page 3

[9] Ikibazo kigomba gusuzumwa aha ni ukumenya uko bigenda iyo uwatanze ikirego cyo gusubirishamo ku mpamvu z’akarengane akiretse noneho n’uregwa (abaregwa) nabo bakemeza ko nta kibazo babifiteho; ndetse n’Ubushinjacyaha bugasanga ntacyo bwabivugaho. [10] Ingingo ya 122 y’Itegeko N⁰ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibukurikira: “Kureka ikirego ni ukwiyambura ububasha bwo kuburana. Bijyana no kwiyambura uburenganzira umuntu yari afite bwo gukomeza gukurikirana icyo kirego. Ukwemera k’undi muburanyi si ngombwa”. [11] Ingingo ya 124 y’iryo tegeko yongeraho ko “Kureka ikirego (…) bituma ibintu bisubira uko byari bimeze ku mpande zombi mbere y’uko urukiko ruregerwa”; ko “Uretse ikirego (…) ashobora gucibwa amafaranga y’amagarama cyangwa igihembo cy’avoka n’andi yose yatanzwe n’uwo yari yareze mu gukurikirana urubanza”; Ko “(…) uretse ikirego aba yiyambuye uburenganzira bwo kongera kururegera. [12] Izi ngingo zombi zisomewe hamwe, zumvikanisha ko iyo uwatanze ikirego cyo gusubirishamo urubanza ku mpamvu z’akarenane akiretse, aba agomba kubyemererwa nta mpaka, hakagumaho imikirize y’urubanza rwasubirishijwemo ku mpamvu z’akarengane, kandi akaba adashobora kwemererwa kugarura icyo kirego. Aba kandi ashobora gucibwa amafaranga y’ibyagiye ku rubanza, igihe abo baburana babisabye. Bikaba binumvikana ko igihe batabisabye, Urukiko rwaregewe rwemeza gusa ko kureka ikirego byemewe; ko kandi birangije burundu impaka zari mu kirego bari bashyikirije urukiko rwaregewe. [13] Urukiko rurasanga rero, hashingiwe ku bivuzwe mu gika kibanziriza iki, KARONGOZI Abdoul Muhamed afite uburenganzira bwo kureka ikirego cye yari yatanze, bityo akaba abyemerewe kandi akaba ntacyo aryozwa kuri uru rwego kuko ntacyo abaregwa basabye; ibyo bikaba birangije burundu impaka zari mu kirego yari yashyikirije uru rukiko. III. ICYEMEZO CY’URUKIKO [14] Rwemeye ukureka ikirego byasabwe na KARONGOZI Abdoul Muhamed; [15] Rwemeje ko amagarama y’uru rubanza aherera ku isanduku ya Leta.