LIFE GOAL COMPANY Ltd vs ECK STRONG Ltd N’UNDI

# LIFE GOAL COMPANY Ltd vs ECK STRONG Ltd N’UNDI

- Source: Amategeko - Section: Decisions (Judgements) - Date: 2024-02-16 - Case/document no.: RCOMA 00004/2023/CA - Collection: Court of Appeal

## Text

## Page 1

LIFE GOAL COMPANY Ltd vs ECK STRONG Ltd N’UNDI [Rwanda URUKIKO RW’UBUJURIRE – RCOMA 00004/2023/CA (Munyangeri, P.J.) 16 Gashyantare 2025] Amategeko yerekeye imiburanishirize y’imanza mbonezamubano – Ikirego cyihutirwa – Ikirego kihutirwa nticyakirwa ngo kiburanishwe iyo kitaregewe n’uwatanze ikirego cy’iremezo. Bityo, uwatanze ikirego cy’iremezo ni nawe ugomba gutanga ikirego cyihutirwa. Amategeko yerekeye imiburanishirize y’imanza mbonezamubano – Ikirego cyihutirwa – Amafaranga y’ikurikiranarubanza n’igihembo cya Avoka – Amafaranga y’ikurikiranarubanza n’igihembo cya Avoka ntatangwa mu kirego kihutirwa kuko kiba kigamije ko hafatwa ibyemezo by’agateganyo mu gihe ababuranyi bategereje kuburana urubanza rw’iremezo akaba ari naho bayasabira, Icyakora iyo bigaragara ko urubanza rw’iremezo rwamaze kuburanishwa rusigaje gusomwa, ntacyabuza Urukiko ruburanisha urubanza rwihutirwa gutanga ayo mafaranga. Incamake y’ikibazo: Uru rubanza rwatangiye Life Goal Company Ltd irega Eck Strong Ltd n’umuyobozi wayo witwa Niyonsaba Edouard mu Rukiko rw’Ubucuruzi isaba ko Eck Strong Ltd iyisubiza amafaranga angana na miliyoni eshanu n’ibihumbi magana inani na mirongo itandatu na bitatu (5.863.000Frw) n’izindi ndishyi ziyakomokaho ajyanye n’ubugure bw’amatiyo butuzujuje ubuziranenge nkuko RICA yemeje ko ayo matiyo atujuje ibipimo bisabwa ndetse ko atanamewe gucuruzwa mu Rwanda, inabasaba kuyatwika babanje kubimenyesha REMA . Eck Strong Ltd yireguye ivuga ko amatiyo yahaye Life Goal Company Ltd yari yujuje ibipimo ubuziranenge kandi ko mbere yo kuyagura yabanje kuyagenzura. Avuga ko bashobora kuba baraguranye. Niyonsaba avuga ko sosiyete ahagarariye itabuze ubwishyu, ko bitari ngombwa ko nawe aregwa. Urukiko mu rubanza RCOM00807/2022/TC rushingiye ku ngingo ya 115 y’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ku ngingo ya 3 n’iya 108 z’Itegeko N˚ 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, no ngingo ya 64 n’iya 70 z’Itegeko N˚ 45/2011 ryo ku wa 25/11/2011 rigenga amasezerano, rwemeje ko, ikirego cya Life Goal Company Ltd gifite ishingiro; Niyonsaba afatanya na Eck Strong Ltd kwishyura Life Goal Company Ltd amafaranga ahwanye n’amafaranga miliyoni umunani n’ibihumbi magana atanu na makumyabiri na bitandatu (8.526.000Frw), akubiyemo ayo Life Goal Company Ltd yishyuye n’imdishyi zitandukanye. Eck Strong Ltd na Niyonsaba bajuririye urwo rubanza mu Rukiko Rukuru rw’Ubucuruzi ruhabwa RCOMA00258/2023/HCC, banenga kuba Urukiko rw’Ubucuruzi, rwarirengagije amategeko n’ibimenyetso, bigaragaza ko yahaye Life Goal Company Ltd amatiyo yuzuje ubuziranenge kandi ko Niyonsaba atari kuregwa, inasaba indishyi. Mu gihe urubanza RCOMA00258/2023/HCC rwari rutaraburanishwa, Life Goal Company Ltd yatanze ikirego cyihutirwa, isaba gushinganisha umutungo ubaruye kuri UPI: 1/03/10/02/1476 na UPI: 1/02/04/01/1523 wa Niyonsaba Edouard na Uwera Claudine kubera ko Niyonsaba Edouard yimukiye mu mahanga ndetse n’ibikorwa by’ubucuruzi yakoraga akaba ariho yabyimuriye. Uharariye Niyonsaba yireguye avuga ko atigeze ahunga igihugu, ndetse ko Eck Strong Ltd igikora ibikorwa byayo by’ubucuruzi aho yabikoreraga mbere hose, ikaba inafite amafaranga ahagije yakuramo ubwishyu.

## Page 2

Urukiko mu rubanza RCOM00035/2023/HCC rushingiye ku ngingo ya 12 n’iya 212 z’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko, ikirego cya Life Goal Company Ltd nta shingiro gifite. Life Goal Company Ltd yajuririye urwo rubanza mu Rukiko rw’Ubujurire, isaba kwemeza ko imitungo ibaruye kuri UPI: 1/03/10/02/1476 na UPI: 1/02/04/01/1523 ishinganishwa, no gutegeka Niyonsaba gutanga indishyi. Urukiko rubyibwirije, rwazamuye inzitizi irebana no kumenya niba Life Goal Company Ltd yari ifite ububasha bwo gutanga ikirego cyihutirwa mu Rukiko Rukuru rw’Ubucuruzi kandi atariyo yaregaga mu rubanza rw’iremezo. Uhagarariye Niyonsaba yavuze ko asanga kitaragombaga kwakirwa kubera ko yareze uwo ahagarariye nyamara atari we munyamigabane wenyine wa Life Goal Company Ltd ndetse sosiyete ahagarariye ikaba itarabuze ubwishyu. Urukiko mu rubanza RCOMA00004/2023/CA rwemeje ko ikirego kihutirwa kitagombaga kwakirwa kuko uwagitanze atari we watanze ikirego cy’iremezo. Incamake y’icyemezo: 1. Ikirego kihutirwa nticyakirwa ngo kiburanishwe iyo kitaregewe n’uwatanze ikirego cy’iremezo. Bityo, uwatanze ikirego cy’iremezo ni nawe ugomba gutanga ikirego cyihutirwa. 2. Amafaranga y’ikurikiranarubanza n’igihembo cya Avoka ntatangwa mu kirego kihutirwa kuko kiba kigamije ko hafatwa ibyemezo by’agateganyo mu gihe ababuranyi bategereje kuburana urubanza rw’iremezo akaba ari naho bayasabira, Icyakora iyo bigaragara ko urubanza rw’iremezo rwamaze kuburanishwa rusigaje gusomwa, ntacyabuza Urukiko ruburanisha urubanza rwihutirwa gutanga ayo mafaranga. Ikirego cyihutirwa nticyagombaga kwakirwa mu Rukiko rukuru rw’Ubucuruzi. Nta mategeko yashingiweho. Imanza zifashshijwe: Urubanza RCOM00004/2023/CA haburana Entreprise Muhamyankaka Vanuste na Wild Urban International Development Ltd, rwaciwe n’Urukiko rw’Ubujurire ku wa 14/07/2023, igika cya 15 n’icya 16. Urubanza RCOMA00006/2023/CA haburana Nzirorera Cyprien na Muhimpundu Rosine, rwaciwe n’Urukiko rw’Ubujurire ku wa 23/05/2022, igika cya 23. Urubanza. I. IMITERERE Y’URUBANZA [1] Life Goal Company Ltd yatsindiye isoko ryo kugemura amatiyo muri Paruwasi ya Mutete iyagura ku mucuruzi witwa Eck Strong Ltd, kubera ko zari zifite ibipimo bitandukanye, hakaba hari izo yagombaga kugura ku giciro cy’amafaranga ibihumbi mirongo itandatu na bitanu (65.000Frw), izindi ku mafaranga ibihumbi mirongo itatu na birindwi imwe (37.000Frw). Life Goal Company Ltd yishyuye Eck Strong Ltd ikiguzi cy’ayo matiyo kingana n’amafaranga miliyoni eshanu n’ibihumbi magana inani na mirongo itandatu na bitatu (5.863.000Frw), iyagejeje aho yagombaga kuyagemura bayibwira ko atujuje ibipimo bavuganye, ibibwiye umucuruzi avuga ko ibipimo byuzuye, biba ngombwa ko Life Goal Company Ltd yiyambaza ikigo cya RICA ngo igenzure niba ayo matiyo yujuje ibipimo byari kuri fagitire,

## Page 3

RICA imaze kuyagenzura yemeza ko ayo matiyo atujuje ibipimo bisabwa ndetse ko atanamewe gucuruzwa, ibasaba kuyatwika babanje kubimenyesha REMA. [2] Life Goal Company Ltd imaze kumenyesha Eck Strong Ltd ibyavuye mu igenzura ryakozwe na RICA, yayisabye ko iyisubiza amafaranga yayo ntiyagira icyo ikora, niko kwiyambaza Urukiko rw’Ubucuruzi irega iyo sosiyete, umuyobozi wayo witwa Niyonsaba Edouard agobokeshwa mu rubanza ku gahato, isaba ko ECK STRONG Ltd iyisubiza amafaranga angana na miliyoni eshanu n’ibihumbi magana inani na mirongo itandatu na bitatu (5.863.000Frw) n’izindi ndishyi ziyakomokaho zinyuranye. [3] Eck Strong Ltd yireguye ivuga ko amatiyo yahaye Life Goal Company Ltd yari yujuje ibipimo n’ubuziranenge kandi ko mbere yo kuza kuyagura, Life Goal Company Ltd yabanje yohereje abantu baje kuyarambagiza muri bo harimo umucuruzi usanzwe ucuruza amatiyo, akaba atari kuyoberwa ko atujuje ubuziranenge, bityo ko bashobora kuba baraguranye matiyo Eck Strong Ltd yabahaye, ayasanganywe inenge bagashaka kuyiyitirira, ikaba itagomba gusubizwa amafaranga isaba. [4] Niyonsaba Edouard Wagobokeshejwe Mu Rubanza Urega Avuga Ko Sosiyete Ahagarariye Yabuze Ubwishyu, Yavuze ko Eck Strong Ltd ifite amafaranga kuri konti ndetse no mu iduka ryayo ifitemo ibicuruzwa bikubye inshuro icumi (10) amafaranga Life Goal Company Ltd iregera, ko itigeze itangazwa nk’iyahombye na cyane ko buri mwaka ikora imenyekanisha ry’imisoro, ko rero bitari ngombwa ko agobokeshwa mu rubanza. [5] Mu rubanza RCOM00807/2022/TC rwaciwe n’Urukiko rw’Ubucuruzi ku wa 24/04/2023, urwo Rukiko rushingiye ku ngingo ya 115 y’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’uucuruzi, iz’umurimo n’iz’ubutegetsi, ku ngingo ya 3 n’iya 108 z’Itegeko N˚ 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ku ngingo ya 64 n’iya 70 z’Itegeko N˚ 45/2011 ryo ku wa 25/11/2011 rigenga amasezerano, rwemeje ko : Ikirego cya Life Goal Company Ltd gifite ishingiro ; Niyonsaba Edouard wagobokeshejwe mu rubanza agomba gufatanya na Eck Strong Ltd kwishyura Life Goal Company Ltd amafaranga bahawe bakayigurisha ibikoresho bitujuje ubuziranenge ; Eck Strong Ltd na Niyonsaba Edouard bafatanya kwishyura Life Goal Company Ltd amafaranga bamugomba yatakaje ku bicuruzwa bitujuje ubuziranenge, amafaranga y’indishyi z’ikurikiranarubanza n’igihembo cya Avoka, yose hamwe ahwanye n’amafaranga miliyoni umunani n’ibihumbi magana atanu na makumyabiri na bitandatu (8.526.000Frw). [6] Eck Strong Ltd na Niyonsaba Edouard bajuririye urwo rubanza mu Rukiko Rukuru rw’Ubucuruzi, ubujurire bwabo bwandikwa kuri RCOMA00258/2023/HCC banenga kuba Urukiko rw’Ubucuruzi : Rwarirengagije ko Life Goal Company Ltd yatwaye amatiyo igahabwa inyemezabwishyu nyuma ikaza kuvuga ko atujuje ubuziranenge ; Rwarashingiye ku mvugo za Life Goal Company Ltd zivuga ko umuhesha w’inkiko yagiye kuri konti yayo agasanga nta mafaranga ariho kandi zitavugisha ukuri ndetse ikaba itaragaragarije Urukiko inyandiko yakozwe n’uwo muhesha w’inkiko ; Rwarashingiye kuri raporo ya RICA yemeza ko amatiyo yagurishijwe atujuje ubuziranenge ; Rwaremeje ko amatiyo yagurishijwe atujuje ibipimo ; Urukiko rwaremeje kugobokesha Niyonsaba Edouard kandi atari we munyamigabane wenyine ; Bashoje basaba indishyi zo kugobokeshwa ku rubanza zingana n’amafaranga miliyoni imwe (1.000.000Frw);

## Page 4

Gutegeka Life Goal Company Ltd kwishyura Niyonsaba Edouard igihembo cya Avoka ku rwego rwa mbere kingana n’amafaranga ibihumbi magana arindwi (700.000Frw) n’amafaranga ibihumbi magana atanu (500.000Frw) ku rwego rw’ubujurire ; Gutegeka Life Goal Company Ltd gusubiza Niyonsaba Edouard na Eck Strong Ltd amafaranga ibihumbi mirongo ine (40.000Frw) batanze bajurira ; Kwemeza ko Eck Strong Ltd idakwiye kwishyura amafaranga y’ubwikorezi n’ayo gupimisha amatiyo kuko nya nyugu yari ibifitemo. [7] Mu gihe urubanza RCOMA00258/2023/HCC rwari rutaraburanishwa, Life Goal Company Ltd yatanze ikirego cyihutirwa, isaba gushinganisha umutungo ubaruye kuri UPI: 1/03/10/02/1476 na UPI: 1/02/04/01/1523 wa Niyonsaba Edouard na Uwera Claudine kubera ko Niyonsaba Edouard yimukiye mu mahanga ndetse n’ibikorwa by’ubucuruzi yakoraga akaba ariho yabyimuriye. [8] Uhagarariye Niyonsaba Edouard yireguye avuga ko uwo ahagarariye atigeze ahunga igihugu, ndetse ko Eck Strong Ltd igikora ibikorwa byayo by’ubucuruzi aho yabikoreraga mbere hose, ikaba inafite amafaranga ahagije yakuramo ubwishyu. [9] u rubanza RCOM00035/2023/HCC rwaciwe n’Urukiko Rukuru rw’Ubucuruzi ku wa 24/11/2023, urwo Rukiko rushingiye ku ngingo ya 12 n’iya 212 z’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, rwemeje ko : Ikirego cya Life Goal Company Ltd nta shingiro gifite ; Imitungo ya Niyonsaba Edouard na Uwera Claudine ibaruye kuri UPI : 1/03/10/02/1476 na UPI: 1/02/04/01/1523 idashinganishijwe; Amafaranga y’igihembo cya Avoka, ay’ikurikiranarubanza n’ingwate y’amagarama Life Goal Company Ltd isaba, itayahawe ; Amafaranga y’ingwate y’amagarama Life Goal Company Ltd yatanze irega ahwanye n’ibyakozwe mu rubanza. [10] Ku wa 28/11/2023, Life Goal Company Ltd yajuririye urwo rubanza mu Rukiko rw’Ubujurire, ubujurire bwayo bwandikwa kuri RCOMA00004/2023/CA, iburanisha ryarwo rishyirwa ku wa 07/02/2024, uwo munsi Me Musabyimana Aphrodis watanze ubujurire bwa Life Goal Company Ltd unayihagarariye mu rubanza ntiyitabira iburanisha avuga ko atari yaramenye ko riri kuri uwo munsi, Niyonsaba Edouard ahagarariwe na Me Sibomana Théophile. Hashingiwe ku ngingo ya 541 y’Itegeko N˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, hafashwe umwanzuro wo kuburanisha urubanza Life Goal Company Ltd idahari ariko bigafatwa nk’aho ihari. [11] Urukiko rubyibwirije, rwazamuye inzitizi irebana no kumenya niba Life Goal Company Ltd yari ifite ububasha bwo gutanga ikirego cyihutirwa mu Rukiko Rukuru rw’Ubucuruzi kandi atariyo yaregaga mu rubanza rw’iremezo. Uhagarariye Niyonsaba Edouard yavuze ko asanga kitaragombaga kwakirwa kubera ko yareze uwo ahagarariye nyamara atari we munyamigabane wenyine wa Life Goal Company Ltd ndetse sosiyete ahagarariye ikaba itarabuze ubwishyu. [12] Mu myanzuro yayo, Life Goal Company Ltd yajuriye isaba uru Rukiko kwemeza ko imitungo ibaruye kuri UPI: 1/03/10/02/1476 na UPI: 1/02/04/01/1523 ishinganishwa, no gutegeka Niyonsaba

1 Ingingo ya 54, igika cya mbere y’Itegeko n˚ 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko” Iyo urega atitabye urukiko nta mpamvu, uregwa ashobora gusaba ko urubanza rusibwa cyangwa agasaba ko ruburanishwa mu mizi yarwo, urubanza ruciwe rukazafatwa nk’aho rwaburanishijwe ababuranyi bahari […]”.

## Page 5

Edouard gutanga amafaranga y’igihembo cya Avoka, ikurikiranarubanza, amafaranga y’umuhesha w’inkiko no gusubiza igarama ryatanzwe mu nkiko zombi. [13] Uhagarariye Niyonsaba Edouard yireguye avuga ko nta bwihutirwe buhari bwatuma imitungo y’uwo ahagarariye ishinganishwa na cyane ko sosiyete abereye umunyamigabane ifite ubushobozi bwo kuba yakwishyura amafaranga Life Goal Company Ltd iregera kandi ko urubanza rw’iremezo rwamaze kuburanishwa, rukaba rutegereje gusomwa. Asoza asaba urukiko gutegeka urega gusubiza Niyonsaba Edouard amafaranga y’ikurikiranarubanza n’igihembo cya Avoka. [14] Nyuma y’izo mpaka, Urukiko rushingiye ku ngingo ya 1292, igika cya kabiri y’Itegeko ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ryavuzwe haruguru, rubyibwirije rwabyukije inzitizi irebana no kumenya niba ikirego cyihutirwa cyatanzwe na Life Goal Company Ltd cyaragombaga kwakirwa mu Rukiko Rukuru rw’Ubucuruzi kandi yararegwaga, rusuzuma n’ikibazo cyerekeye amafaranga ababuranyi basaba

II. ISESENGURA RY’IBIBAZO BIGIZE URUBANZA Kumenya niba ikirego cyihutirwa cyatanzwe na LIFE GOAL COMPANY Ltd cyaragombaga kwakirwa [15] Uhagarariye Niyonsaba Edouard avuga ko n’ubwo atari azi ko hari imanza zatanze umurongo uvuga k’uwemerewe gutanga ikirego cyihutirwa, ariko ikirego cya Life Goal Company Ltd kitagombaga kwakirwa mu Rukiko Rukuru rw’Ubucuruzi kandi ko yagombye kuba yararetse uru rubanza kubera ko urubanza rw’iremezo ruri mu Rukiko Rukuru rw’Ubucuruzi rwamaze kuburanishwa, rukaba rutegereje gusomwa. Uko Urukiko rubibona [16] Impaka kuri iyi ngingo zishingiye ku kumenya niba Urukiko Rukuru rw’Ubucuruzi rwaragombaga kwakira ikirego cyihutirwa cyatanzwe na Life Goal Company Ltd. [17] Impaka ku kibazo nk’iki zakemuwe mu rubanza RCOM00004/2023/CA, haburana Entreprise Muhamyankaka Venuste na Wild Urban International Development Ltd, rwaciwe n’Urukiko rw’Ubujurire ku wa 14/07/2023. Muri urwo rubanza, Entreprise Muhamyankaka Venuste yari yatanze ikirego cyihutirwa, ariko uregwa atanga inzitizi yo kutakira icyo kirego kubera ko atari yo irega mu rubanza rw’iremezo, Urukiko rw’Ubujurire rwanzura ko kuba Entreprise Muhamyankaka Venuste atari yo yatangije urubanza rw’iremezo itemerewe gutanga ikirego cyihutirwa, bityo ikirego cyihutirwa yatanze nticyakirwa3. [18] Hari kandi urubanza RCOMA00006/2022/CA, haburana Nzirorera Cyprien na Muhimpundu Rosine, rwaciwe n’Urukiko rw’Ubujurire ku wa 23/05/2022. Muri urwo rubanza uregwa yasobanuye ko uwatanze ikirego cyihutirwa mu Rukiko Rukuru rw’Ubucuruzi atari abyemerewe kuko atari we wajuriye mu rubanza rw’iremezo, Urukiko rubirengaho rwakira ikirego cye, Urukiko rw’Ubujurire rwanzura ko

2 Iyi ngingo y’Itegeko ivuga ko iyo inzitizi yo kutakira ikirego ari indemyagihugu nko kurenza igihe cyo kujurira kutagira ububasha, ubushobozi cyangwa inyungu byo kurega, ishobora kubyutswa n’umuburanyi cyangwa urukiko rubyibwirije igihe icyo ari cyo cyose. 3 Reba urubanza n˚ RCOM 00004/2023/CA rwaciwe n’Urukiko rw’Ubujurire ku wa 14/07/2023, haburana Entreprise MUHAMYANKAKA Vanuste na Wild Urban International Development Ltd, igika cya 15 n’icya 16.

## Page 6

ikirego cyihutirwa cyatanzwe na Nzirorera Cyprien mu Rukiko Rukuru rw’Ubucuruzi kitagombaga kwakirwa4. [19] Kimwe no muri izo manza, muri uru rubanza naho, Niyonsaba Edouard na Eck Strong Ltd ni bo bajuriye mu Rukiko Rukuru rw’Ubucuruzi, ariko Life Goal Company Ltd aba ari yo itanga ikirego cyihutirwa kirakirwa gisuzumwa mu mizi nyamara atari we watanze ikirego cy’iremezo muri urwo Rukiko. [20] Hashingiwe ku bisobanuro byatanzwe mu murongo wafashwe mu manza zasuzumye ikibazo gisa n’iki, uru Rukiko rurasanga ikirego cyihutirwa Life Goal Company Ltd yatanze mu Rukiko Rukuru rw’Ubucuruzi, kitaragombaga kwakirwa. [21] Ibyerekeranye n’inkurikizi zo kuba ikirego cyihutirwa cyatanzwe na Life Goal Company Ltd kitaragombaga kwakirwa, ikibazo nk’iki na cyo cyafashweho umurongo mu rubanza RCOMA00006/2022/CA, haburana Nzirorera Cyprien na Muhimpundu Rosine, rwaciwe n’Urukiko rw’Ubujurire ku wa 23/05/2022 rwavuzwe haruguru, aho mu gika cya 22 cy’urwo rubanza, Urukiko rw’Ubujurire rwasobanuye ko kuba Urukiko Rukuru rw’Ubucuruzi rwarakiriye ikirego nyamara rutaragombaga kucyakira, urubanza rwajuririwe rugomba guteshwa agaciro. [22] Kimwe rero no muri uru rubanza, Urukiko Rukuru rw’Ubucuruzi rwakiriye ikirego cyihutirwa cyatanzwe na Life Goal Company Ltd rutaragombaga kucyakira nk’uko byasobanuwe haruguru, kubera izo mpamvu, urubanza RCOM00035/2023/HCC rwaciwe n’Urukiko Rukuru rw’Ubucuruzi ku wa 24/11/2023 rugomba guteshwa agaciro. Urukiko rurasanga kandi bitakiri ngombwa gusuzuma ingingo z’ubujurire zatanzwe na Life Goal Company Ltd. Ibyerekeye amafaranga ababuranyi basaba [23] Mu myanzuro yayo, uhagarariye Life Goal Company Ltd asaba ko Niyonsaba Edouard ayiha amafaranga miliyoni imwe (1.000.000Frw) y’igihembo cya Avoka mu nkiko zombi, amafaranga ibihumbi magana atatu (300.000Frw) x 2 mu nkiko zombi, amafaranga ibihumbi mirongo inani (80.000Frw) y’igihembo cy’umuhesha w’inkiko n’amafaranga ibihumbi mirongo icyenda (90.000Frw) y’amagarama y’urubanza mu nkiko zombi. [24] Uhagarariye Niyonsaba Edouard avuga ko amafaranga Life Goal Company Ltd isaba nta shingiro afite kubera ko ayo mafaranga adasabirwa mu kirego cyihutirwa ahubwo asabwa mu rubanza rw’iremezo kandi ko kuba urubanza rw’iremezo rwaramaze kuburanishwa, yagombye kureka ikirego cyihutirwa. Asaba ahubwo Urukiko gutegeka Life Goal Company Ltd guha uwo ahagarariye amafaranga miliyoni imwe (1.000.000Frw) y’igihembo cya Avoka kuri uru rwego, amafaranga miliyoni imwe (1.000.000Frw) y’igihembo cya Avoka yakoresheje mu rubanza rw’ikirego cyihutirwa ku rwego rwa mbere n’amafaranga ibihumbi magana atatu (300.000Frw) y’ikurikiranarubanza. Uko Urukiko rubibona [25] Impaka kuri iyi ngingo zishingiye ku kumenya niba amafaranga y’ibyagiye ku rubanza ashobora gutangwa mu manza z’ibirego byihutirwa. [26] Ibyerekeye amafaranga y’ikurikiranarubanza n’igihembo cya Avoka mu manza z’ibirego byihutirwa byafashweho umurongo mu manza zitandukanye zaciwe n’uru Rukiko harimo urubanza RCA00011/2023/CA rwaciwe n’Urukiko rw’Ubujurire ku wa 18/10/2023 haburana Mutimura Benjamin

4 Reba urubanza RCOMA 00006/2023/CA rwaciwe n’Urukiko rw’Ubujurire ku wa 23/05/2022, haburana NZIRORERA Cyprien na MUHIMPUNDU Rosine, igika cya 23.

## Page 7

& Kazuba Tass na Eya Nchama Blondine Uwimana, urubanza RCA00007/2023/CA rwaciwe n’Urukiko rw’Ubujurire ku wa 22/09/2023 haburana Bonane Jean Claude na Mukansanga Verena n’abandi ndetse n’urubanza RCOM00004/2023/CA rwaciwe n’Urukiko rw’Ubujurire ku wa 14/07/2023 haburana Entreprise Muhamyankaka Venuste na Wild Urban International Development Ltd, rwaciwe n’Urukiko rw’Ubujurire ku wa 14/07/2023. [27] Muri izo manza Urukiko rw’Ubujurire rwasobanuye ko ikirego cyihutirwa kiba kigamije ko hafatwa ibyemezo by’agateganyo mu gihe ababuranyi bategereje kuburana urubanza rw’iremezo, ko rero mu gihe barimo kuburana urubanza rw’iremezo, ari bwo bakwiye gusaba n’amafaranga y’ikurikiranarubanza n’igihembo cya Avoka, ku buryo n’uwatsinze urubanza rw’ikirego cyihutirwa ayasabira muri urwo rubanza. [28] Urukiko rw’Ubujurire rurasanga ariko, n’ubwo rwatanze uwo murongo muri izo manza, uru rubanza rw’ikirego cyihutirwa rutandukanye n’izindi zasuzumwe zafashwemo umurongo wavuzwe haruguru, kubera ko urubanza rw’iremezo RCOMA00258/2023/HCC Niyonsaba Edouard na Eck Strong Ltd bafite mu Rukiko Rukuru rw’Ubucuruzi, rwarangije kuburanishwa nkuko system ya IECMS igaragaza ko ruzasomwa ku wa 19/02/2024), bikaba byumvikanisha ko ababuranyi batagishoboye kuba basabira amafaranga y’ibyagiye ku rubanza rw’ikirego cyihutirwa mu rubanza rw’iremezo. Kubera izo mpamvu, ayo mafaranga akaba agomba gutangirwa muri uru rubanza. [29] Urukiko rurasanga amafaranga Life Goal Company Ltd isaba itagomba kuyahabwa kubera ko hagaragajwe ko itari yemerewe gutanga ikirego cyihutirwa, naho ayo Niyonsaba Edouard asaba agomba kuyagenerwa mu bushishozi bw’Urukiko kubera ko ayo asaba ari menshi. Bityo, Life Goal Company Ltd ikaba igomba guha Niyonsaba Edouard amafaranga ibihumbi magana abiri (200.000Frw) y’ikurikiranarubanza n’amafaranga ibihumbi magana atanu (500.000Frw) y’igihembo cya Avoka mu nzego zombi, yose hamwe akaba amafaranga ibihumbi magana arindwi (700.000Frw). III. ICYEMEZO CY’URUKIKO [30] Rwemeje ko ikirego cyihutirwa cyatanzwe na Life Goal Company Ltd kitagombaga kwakirwa. [31] Rwemeje ko urubanza RCOM00035/2023/HCC rwaciwe n’Urukiko Rukuru rw’Ubucuruzi ku wa 24/11/2023 ruteshejwe agaciro. [32] Rutegetse Life Goal Company Ltd guha Niyonsaba Edouard amafaranga ibihumbi magana abiri (200.000Frw) y’ikurikiranarubanza n’amafaranga ibihumbi magana atanu (500.000Frw) y’igihembo cya Avoka arebana n’ikirego cyihutirwa mu nzego zose, yose hamwe akaba amafaranga ibihumbi magana arindwi (700.000Frw). [33] Ruvuze ko amafaranga y’ingwate y’amagarama Life Goal Company Ltd yatanze ijurira, ahwanye n’ibyakozwe mu rubanza.