MAMBO KALISA v. RUTAGENGWA N’UNDI

# MAMBO KALISA v. RUTAGENGWA N’UNDI

- Source: Amategeko - Section: Decisions (Judgements) - Date: 2023-02-28 - Case/document no.: RCAA00021/2022/CA - Collection: Court of Appeal

## Text

## Page 1

MAMBO KALISA v. RUTAGENGWA N’UNDI [Rwanda URUKIKO RW’UBUJURIRE – RCAA00021/2022/CA (Munyangeri, P.J.) 28 Gashyantare 2023] Itegeko rigenga amasezerano – Amasezerano y’ubugure bw’umutungo utimukanwa – Amasezerano y’ubugure bw’umutungo utimukanwa yakozwe mu buryo bw’inyandikompamo (yakorewe imbere ya Noteri) niyo afite agaciro, kuko ari na yo yonyine yemerwa igihe cy’ihererekanya ry’ubutaka rishingiye ku masezerano yo kubwegurira undi. Incamake y’Ikibazo: Urubanza rwatangiye Mambo Kalisa arega mu Rukiko Rwisumbuye rwa Nyarugenge Rutagengwa kuko ariwe baguze umutungo uburanwa na Sibomana kuko ariwe umutungo wanditseho asaba Urukiko gutesha agaciro amasezerano y’ihererekanyamutungo yakozwe hagati ya Rutagengwa na Sibomana, anasaba ko umutungo ubaruye kuri UPI: 1/03/07/01/1559 wamwandikwaho hashingiwe ku masezerano y’ubugure yagiranye na Rutagengwa kuko ariwe waguze mbere. Rutagengwa n’umugore we Matter Rutagengwa bemera ko Mambo Kalisa yakwegukana umutungo we kuko bemera ubugure bagiranye, bagahakana ubwabaye hagati yabo na Sibomana, kuko ngo ubwa kabiri bwakozwe harimo uburiganya, babukora bidaturutse ko bushake bwabo. Sibomana yiregura avuga ko mu gihe habayeho amasezerano abiri y’ubugure bw’umutungo utimukanwa, ikirebwa ari amasezerano akurikije amategeko, bityo ngo amasezerano y’ubugure hagati ye na Rutagengwa ari yo afite agaciro, kuko yakorewe imbere ya Noteri. Urukiko mu rubanza RC00562/2019/TGI/NYGE, rwemeje ko ikirego cyatanzwe na Mambo Kalisa gifite ishingiro, ko ikirego cyuririye ku cyindi cyatanzwe na Sibomana nta shingiro gifite, rutegeka ko amasezerano y’ihererekanya ry’ubutaka hagati ya Sibomana na Rutagengwa na Matter Rutagengwa nta gaciro afite, kandi ko Rutagengwa na Matter Rutagengwa bagomba gusubiza Sibomana amafaranga yabishyuye. Rutegeka ko Mambo Kalisa yandikwaho umutumgo uburanwa. Sibomana yajuririye icyo cyemezo mu Rukiko Rukuru, avuga ko Urukiko rubanza rwirengagije nkana amategeko, rushingira ku mategeko rusange aho gushingira ku mategeko yihariye, ko kuba amasezerano yagiranye na Rutagengwa ari yo yakorewe imbere ya Noteri w’ubutaka, bakanakorana ihererekanya, bisobanuye ko ari yo masezerano yubahirije ibiteganywa n’Amategeko. Urukiko Rukuru mu rubanza RCA00053/2021/HC/KIG rwemeje ko ubujurire bwa Sibomana bufite ishingiro, rwemeza ko amasezerano y’ubugure bw’umutungo uburanwa Sibomana yagiranye na Rutagengwa ari yo afite agaciro, ko ayo yagiranye na Mambo Kalisa ateshwa agaciro. Mambo Kalisa yajuririye icyo cyemezo mu Rukiko rw’Ubujurire, avuga ko Urukiko Rukuru rwemeje ko amasezerano y’ihererekanya Rutagengwa yagiranye na Sibomana ari yo afite agaciro, nyamara Rutagengwa wari nyir’umutungo yariyemereye ko ubugure bwakozwe hagati ye na Sibomana ari igurizanya ryo mu bwoko bwa banki lambert, asaba ko amasezerano yakozwe mbere ari yo ahabwa agaciro, anasaba kugenerwa indishyi zitandukanye. Urukiko rwabanje gusuzuma inzitizi y’iburabubasha bw’Urukiko ishingiye ku gaciro k’ikiburanwa, rushyiraho umugenagaciro waje

## Page 2

kugaragaza ko agaciro k’umutungo uburanwa karenze kure agaciro agateganirijwe ikiburanwa mu Rukiko rw’Ubujurire. Bityo rwemeza ko rufite ububasha. Urukiko rw’Ubujurire, mu rubanza mu mizi RCAA00021/2022/CA, rwemeje ko amasezerano y’ubugure yabaye hagati ya Rutagengwa na Sibomana ari yo afite agaciro, kubera ko ari yo yakozwe mu buryo buteganywa n’amategeko, agakorerwa imbere ya Noteri na ho amasezerano y’ubugure yabaye hagati ya Rutagengwa na Mambo Kalisa mu buryo bw’inyandiko bwite, akaba nta gaciro afite nk’uko byatanzweho umurongo n’Urukiko rw’Ikirenga. Incamake y’icyemezo: Amasezerano y’ubugure bw’umutungo utimukanwa yakozwe mu buryo bw’inyandikompamo (yakorewe imbere ya Noteri) niyo afite agaciro, kuko ari na yo yonyine yemerwa igihe cy’ihererekanya ry’ubutaka rishingiye ku masezerano yo kubwegurira undi. Bityo, uwaguze hakozwe amasezerano mu buryo bw’inyandiko bwite, nubwo yaba yaguze mbere yuwaguze mu buryo bw’inyandiko mpamo cyangwa uwabagurishije bose yemera amasezerano yakozwe mu buryo bw’inyandiko bwite, ubugure bwe aba ari imfabusa. Ubujurire nta shingiro bufite Amategeko yashingiweho: Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, Ingingo ya 111 Imanza zifashishijwe: Urubanza RS/INJUST/RC 00010/2019/SC rwa Twizerimana na Manizabayo na Hafashimana rwaciwe n’Urukiko rw’Ikirenga ku wa 25/09/2020. Urubanza I. IMITERERE Y’URUBANZA [1] Rutagengwa Georges na Matter Rutagengwa Elisabeth bari bafite umutungo itimukanwa wari ufite n° 10049 kuri plan cadastral, uherereye mu Mudugudu wa Nyenyeri, Akagari ka Bwerankoli, Umurenge wa Kigarama, Akarere ka Kicukiro, Umujyi wa Kigali, waje guhabwa n° UPI: 1/03/07/01/1559. Ku wa 17/05/2010, Rutagengwa Georges yagiranye na Mambo Kalisa Charles amasezerano y’ubugure bw’ubwo butaka bugifite n° y’ikibanza 10049 kuri plan cadastral, bugurishwa ku giciro cya 12.000.000 Frw, ariko ntihahita hakorwa ihererekanyamutungo. Mambo Kalisa Charles yaje kumenya amakuru ko uwo mutungo wagurishijwe undi muntu, agiye kubaza mu Kigo cy’Igihugu Gishinzwe Ubutaka, asanga ubwo butaka bwanditse kuri Sibomana Jean Claude, ihererekanya ryabwo ryarakozwe ku wa 20/07/2018. [2] Mambo Kalisa Charles yareze Rutagengwa Georges na Sibomana Jean Claude mu Rukiko Rwisumbuye rwa Nyarugenge, arusaba gutesha agaciro amasezerano y’ihererekanyamutungo yo ku

## Page 3

wa 20/07/2018, ko umutungo ubaruye kuri UPI: 1/03/07/01/1559 wamwandikwaho hashingiwe ku masezerano y’ubugure yo ku wa 17/05/2010. [3] Rutagengwa Georges n’umugore we Matter Rutagengwa Elisabeth bemera ko Mambo Kalisa Charles yakwegukana umutungo we kuko bemera ubugure bagiranye, bagahakana ubwabaye hagati yabo na Sibomana Jean Claude, bakaba bavuga ko ubwo bugure bwa kabiri bwakozwe harimo uburiganya bwinshi, bidaturutse ko bushake bwabo. [4] Sibomana Jean Claude avuga ko mu gihe habayeho amasezerano abiri, ikirebwa ari amasezerano akurikije amategeko, bikaba bisobanura ko amasezerano y’ubugure hagati ye na Rutagengwa Georges n’umugore we ari yo afite agaciro, ko andi bavuga atayazi. [5] Mu rubanza RC00562/2019/TGI/NYGE rwaciwe ku wa 29/01/2021, Urukiko Rwisumbuye rwa Nyarugenge rwemeje ko ikirego cyatanzwe na Mambo Kalisa Charles gifite ishingiro, ko ikirego cyuririye ku cyindi cyatanzwe na Sibomana Jean Claude nta shingiro gifite, rutegeka ko amasezerano yabaye ku itariki ya 20/07/2018 y’ihererekanya ry’ubutaka hagati ya Sibomana Jean Claude na Rutagengwa Georges na Matter Rutagengwa Elisabeth nta gaciro afite, kandi ko Rutagengwa Georges na Matter Rutagengwa Elisabeth bagomba gusubiza Sibomana Jean Claude 16.500.000Frw, rutegeka ko Mambo Kalisa Charles yandikwaho umutumgo utimukanwa ugizwe n’ikibanza gifite UPI: 1/03/07/01/1559. [6] Sibomana Jean Claude yajuririye icyo cyemezo mu Rukiko Rukuru, avuga ko Urukiko rubanza rwirengagije nkana amategeko, rushingira ku mategeko rusange aho gushingira ku mategeko yihariye hitabwa ku bwoko bw’amasezerano, ko kuba amasezerano yagiranye na Rutagengwa Georges ari yo yakorewe imbere ya Noteri w’ubutaka, bakanakorana ihererekanya, bisobanuye ko ari we yashatse kugurisha by’ukuri, kuko ari yo masezerano yubahirije ibiteganywa n’ingingo ya 34 y’Iteka rya Minisitiri N°002/2008 ryo ku wa 01/04/2008 ryagenaga uburyo iyandikishwa ry’ubutaka rikorwa. [7] Mu rubanza RCA00053/2021/HC/KIG rwaciwe ku wa 31/05/2022, Urukiko Rukuru rwemeje ko ubujurire bwa Sibomana Jean Claude bufite ishingiro, rwemeza ko amasezerano y’ubugure bw’ikibanza UPI: 1/03/07/01/1559 Sibomana Jean Claude yagiranye na Rutagengwa Georges ari yo afite agaciro, ko ayo yagiranye na Mambo Kalisa Charles ateshwa agaciro, ko imikirize y’urubanza n˚ RC00562/2019/TGI/NYGE rwaciwe n’Urukiko Rwisumbuye rwa Nyarugenge, ihindutse mu ngingo zayo zose, rutegeka Mambo Kalisa Charles guha Sibomana Jean Claude 1.500.000Frw akubiyemo indishyi z’ibyo yatanze ku rubanza n’igihembo cya Avoka, no kumusubiza amafaranga y’ingwate y’amagarama yatanze ajurira. [8] Ku wa 29/06/2022, Mambo Kalisa Charles yajuririye icyo cyemezo mu Rukiko rw’Ubujurire, ubujurire bwe bwandikwa kuri RCAA00021/2022/CA, avuga ko Urukiko Rukuru rwemeje ko amasezerano y’ihererekanya ry’ubutaka yo ku wa 20/07/2018 ari yo afite agaciro, nyamara Rutagengwa Georges wari nyir’umutungo yariyemereye ko ubugure bwakozwe hagati ye na Sibomana Jean Claude ari igurizanya ryo mu bwoko bwa banki lambert, asaba ko amasezerano yakozwe mbere ari yo ahabwa agaciro, anasaba kugenerwa indishyi z’akababaro zo gusiragizwa mu manza.

## Page 4

[9] Urubanza rwaburanishijwe mu ruhame ku wa 06/02/2023, Mambo Kalisa Charles ahagarariwe na Me Rukangira Emmanuel, afatanyije na Me Bizimana Shoshi na Me Nsengumuremyi Senglo Louis, Rutagengwa Georges na Matter Rutagengwa Elisabeth bahagarariwe na Me Ngilinshuti Jean Bosco, Sibomana Jean Claude ahagarariwe na Me Bangamwabo Octave afatanyije na Me Rukundo Emile, uwo munsi hagibwa impaka ku nzitizi y’iburabubasha bw’Urukiko ishingiye ku gaciro k’ikiburanwa, hafatwa umwanzuro wo gushyiraho umugenagaciro w’umutungo utimukanwa, ababuranyi bumvikana ko umugenagaciro witwa Havugimana Justin, ari we uhabwa izo nshingano, iburanisha ry’urubanza ryimurirwa ku wa 14/02/2023. [10] Ku wa 14/02/2023, urubanza rwongeye kuburanishwa mu ruhame, Mambo Kalisa Charles ahagarariwe na Me Rukangira Emmanuel afatanyije na Me Bizimana Shoshi, Me Rwambari Shankuru na Me Nsengumuremyi Senglo Louis, Rutagengwa Georges na Matter Rutagengwa Elisabeth bahagarariwe na Me Ngilinshuti Jean Bosco, Sibomana Jean Claude ahagarariwe na Me Bangamwabo Octave afatanyije na Me Rukundo Emile, nyuma yo kubona ko raporo y’umugenagaciro yagaragaje ko agaciro k’umutungo amasezerano aburanwa ashingiyeho karengeje 75.000.000Frw ateganywa n’itegeko kugira ngo ubujurire bwa kabiri bube mu bubasha bw’Urukiko rw’Ubujurire (raporo igaragaza ko uwo mutungo ufite agaciro kangana na104.925.000Frw ), ababuranyi bemeranyije kuri iyo raporo y’igenagaciro, basaba ko iburanisha ry’urubanza rikomeza mu mizi. II. IBIBAZO BIGIZE URUBANZA N’ISESENGURA RYABYO 1.Kumenya amasezerano y’ubugure bw’umutungo ufite UPI: 1/03/07/01/1559 akwiye guhabwa agaciro hagati y’ayakozwe na MAMBO Kalisa Charles na Rutagengwa Georges ku wa 17/05/2010 n’ayakozwe hagati ya SIBOMANA Jean Claude na Rutagengwa Georges na Matter Rutagengwa Elisabeth ku wa 20/07/2018 [11] Me Rugemintwaza Jean Marie Vianney wari uhagarariye Mambo Kalisa Charles mu nama ntegurarubanza yabaye ku wa 14/11/2022, avuga ko mu gusuzuma amasezerano agomba kugira agaciro, Urukiko Rukuru rwirengagije ibiteganywa n’ingingo ya 35 y’itegeko N° 08/2005 ryo ku wa 14/07/2005 rigenga ubutaka, iteganya ko“Gutanga burundu uburenganzira ku butaka, nko kubugurisha, kubutangira ubuntu cyangwa kubugurana, bikozwe n’uhagarariye umuryango bigomba kubanza kwemezwa n’abagize umuryango bose basangiye ubwo burenganzira”, kandi ko Rutagengwa Georges yubahirije ibiteganywa n’iyi ngingo y’itegeko, kuko nyuma yo kugurisha ubutaka yabimeshejeshe umugore we Matter Rutagengwa Elisabeth arabyemera. [12] Avuga kandi ko kuba Urukiko Rukuru rwaremeje ko Rutangengwa Georges yakoze uburiganya bwo kugurisha abantu babiri ubutaka bumwe, ariko rukemeza ko uburiganya bwakozwe ku masezerano ya mbere, aho bwakabaye bwarakozwe ku masezerano ya nyuma, kuba rwarashingiye ku Iteka rigenga iyandikishwa ry’ubutaka kandi nta ho bihuriye, asanga harabaye kwitiranya ibintu, kubera ko agaciro k’amasezerano kadafite aho gahuriye n’imihango y’iyandikishwa ry’ubutaka, kandi ko amasezerano y’ubugure ubwayo agira agaciro mu gihe abayagiranye bemeranywa ku cyo bagiye kugura, bafite ububasha bwo kuyakora kandi afite impamvu yemewe n’amategeko, bityo ko ibyo kwandikisha ubutaka biza nyuma. [13] Mu iburanisha ryo ku wa 14/02/2023, Me Rukangira Emmanuel uhagarariye Mambo Kalisa Charles avuga ko amasezerano agomba gushyirwaho umukono n’abayagiranye nta buriganya, ko

## Page 5

amasezerano y’ubugure yabaye hagati ya Mambo Kalisa Charles na Rutagengwa Georges n’umugore we, n’ayabaye hagati ya Sibomana Jean Claude na Rutagengwa Georges, asanga amasezerano yakozwe mbere ari yo yakozwe nta buriganya, kuri we, umukono wa Noteri akaba atari wo utuma hafatwa ko amasezerano yakozwe nta buriganya. Asobanura ko ingingo ya 191, igika cya 2 y’itegeko rigenga ubutaka ryo muri 2021, ivuga ko uburiganya bugaragazwa ku munsi amasezerano yashyiriweho umukono, no ku munsi amafaranga yishyuriweho, ko kuba Rutagengwa Georges yaragurishije umutungo ku nshuro ya kabiri, icyo gikorwa ubwacyo kigaragaza uburiganya, ibyo bigatuma amasezerano yakozwe mbere afatwa ko ari yo y’ukuri. [14] Akomeza avuga ko n’ubwo nta hererekanyamutungo ryari ryagakozwe hagati ya Mambo Kalisa Charles na Rutagengwa Georges, asanga ibyo bitavanaho agaciro k’amasezerano bagiranye nta buriganya, na ho ko amasezerano ya kabiri yabaye hagati ya Sibomana Jean Claude na Rutagengwa Georges yakoranywe uburiganya, kuko Rutagengwa Georges yayakoze ashyizweho igitutu (contrainte), akaba asobanura ko Sibomana Jean Claude yagurije Rutagengwa Georges amafaranga, undi amuha umutungo we, kandi ko hari umurongo watanzwe n’Urukiko rw’Ikirenga mu rubanza rwa “succession Ndamage”, aho rwatesheje agaciro” titre de propriété” yari yatanzwe mu buriganya, kuva icyo gihe akaba nta rundi rubanza rwaciwe nyuma rwaba rwarahinduye uwo murongo. [15] Me Bizimana Shoshi uhagarariye Mambo Kalisa Charles avuga ko hagati ya Sibomana Jean Claude na Rutagengwa Georges hari amasezerano ahishe arebana na banki lambert, akaba ari yo mpamvu Rutagengwa Georges yemera ubwe amasezerano yagiranye na Mambo Kalisa Charles, agahakana ayo yagiranye na Sibomana Jean Claude. [16] Akomeza avuga ko hari umuntu wari kumwe na Sibomana Jean Claude na Rutagengwa Georges mu gihe bakoraga amasezerano, watanze ubuhamya ku wa 30/08/2019 asobanura uko ibintu byagenze, n’inyandiko Rutagengwa Georges yakoreye imbere y’uhagarariye u Rwanda mu gihugu cy’Ubusuwisi, asaba ko Mambo Kalisa Charles akorerwa ihererekanyamutungo, akaba asanga Ambasaderi ari Noteri muri byose, ko atumva impamvu urukiko rutemeye ibyo yakoze. [17] Me Nsengumuremyi Senglo Louis na we uhagarariye Mambo Kalisa Charles, avuga ko bitumvikana ukuntu Sibomana Jean Claude yaba yarakorewe ihererekanyamutungo kandi icyangombwa cy’umwimerere cy’uwo mutungo gifitwe na Mambo Kalisa Charles. [18] Me Ngilinshuti Jean Bosco uhagarariye Rutagengwa Georges na Matter Rutagengwa Elisabeth, avuga ko Sibomana Jean Claude na Rutagengwa Georges mu mitima yabo bazi neza ko bataguze umutungo uburanwa. [19] Akomeza avuga ko abo ahagarariye bemera ko amasezerano y’ubugure akurikije amategeko, ari ayo Rutagengwa Georges yagiranye na Mambo Kalisa Charles, akanamuha icyangombwa cy’umwimerere (Original) nº 1559/KIC/KIG, kandi ko yemera ko ari we wagombaga gukorerwa ihererekanya ry’ubutaka yamugurishije (mutation), ntibyaza gukunda bitewe n’uko atakunze kuboneka mu Rwanda, kubera ko atuye mu gihugu cy’Ubusuwisi, ndetse ko umugore we n’abana na bo bayemera nk`uko bigararagazwa n’inyandiko zanyujijwe muri Ambassade. Bityo ko asanga 1 Ingingo ya 19, igika cya kabiri y’itegeko n˚ 27/2021 ryo ku wa 10/06/2021 rigenga ubutaka iteganya ko” Icyakora, ibivugwa mu gika cya mbere cy’iyi ngingo bitakaza agaciro iyo bigaragaye ko bidashingiye ku kuri”.

## Page 6

amasezerano Sibomana Jean Claude yagiranye na Rutagengwa Georges nta gaciro akwiye guhabwa, kuko yakorewe ku mutungo utakiri uwe. [20] Me Rukundo Emile uhagarariye Sibomana Jean Claude avuga ko kuba Urukiko Rukuru rwaragaragaje ko Rutagengwa Georges yakoreye Mambo Kalisa Charles ubuhemu rutibeshye, kuko atamubwije ukuri ko atunze ikindi cyangombwa cy’ubutaka ndetse cy'umwimerere, gishobora guteza ingaruka, hakaba ihererekanya rishingiye ku bugure, uwo ubutaka bwanditsweho akitwa nyirabwo, uwo butabaruyeho agahura n'ingorane zo kubuvutswa, cyane ko hagaragajwe imanza zitandukanye zasobanuye ko nyir’ubutaka ari uwo bubaruyeho. [21] Avuga kandi ko mu bushishozi bwarwo, Urukiko Rukuru rwakoze iperereza mu Kigo cy'Igihugu Gishinzwe Ubutaka, icyo kigo cyemeza ko nyirabwo ari uwo bwanditseho. Na ho ko kuba Urukiko rutarategetse ko Mambo Kalisa Charles asubizwa amafaranga cyangwa ngo ahabwe indishyi, ahubwo rukavuga ko yatanga ikirego cyo gusaba indishyi zikomoka ku kwica amasezerano, avuga ko rutari rwasabwe gusuzuma ibyo gusubizwa amafaranga cyangwa indishyi. Avuga ko amasezerano y’ubugure Rutagengwa Georges yagiranye na Mambo Kalisa Charles atari yujuje ubuziranenge, kubera ko bayakoze mu mwaka wa 2010 imiryango yabo itabizi, ndetse ko hatubahirijwe ibisabwa ngo hakorwe ihererekanya ry’umutungo imbere ya Noteri w’ubutaka, ariko ko Sibomana Jean Claude we yabyubahirije, ubutaka buburanwa akaba ari ubwe. [22] Me Rukundo Emile anavuga ko kuba abanyamategeko bo ku ruhande rwa Mambo Kalisa Charles n’urwa Rutagengwa Georges na Matter Rutagengwa Elisabeth bavuga ko amasezerano y’ubugure hagati ya Rutagengwa Georges na Sibomana Jean Claude yakozwe mu buriganya nta kuri kurimo, kubera ko uburiganya bureberwa mu gihe cyo gushyira mu bikorwa amasezerano, butareberwa mu gihe cyo kuyakora, kandi ko niba amasezerano hagati ya Rutagengwa Georges na Mambo Kalisa Charles atarashyizwe mu bikorwa, yakwiyambaza ibiteganywa n’ingingo ya 80 n’iya 812 z’itegeko rigenga amasezerano, akamenya icyo gukora mu gihe habayeho kwica amasezerano. [23] Me Rukundo Emile akomeza yibaza impamvu Rutagengwa Georges atagejeje ku rwego bireba ibaruwa yari yanditse asaba ko Mambo Kalisa Charles akorerwa ihererekanyamutungo niba koko yari afite ubushake bwo guhererekanya uwo mutungo. Avuga ko kuba Rutagengwa Georges yaragize uburiganya mu masezerano yagiranye na Mambo Kalisa Charles, bidakwiye kugira ingaruka ku masezerano yabaye hagati ye na Sibomana Jean Claude, kandi ko nta buriganya bwabaye mu gihe cyo kwegurira icyangombwa cy’ubutaka uwo ahagarariye, ndetse ko nta n’ibimenyetso bigaragazwa byemeza ko habaye banki lambert. [24] Me Bangamwabo Octave avuga ko Mambo Kalisa Charles, Rutagengwa Georges na Matter Rutagengwa Elisabeth batagaragaza icyo banenga icyemezo cyafashwe n’Urukiko Rukuru, ko amasezerano ya mbere yakozwe hagati ya Rutagengwa Georges na Mambo Kalisa Charles bonyine mu mwaka wa 2010, nyamara itegeko ryarateganyaga ko mu kugurisha umutungo bigomba kubanza kwemezwa n’umuryango, ko ibiteganywa n’itegeko bitubahirijwe, muri 2013 aba ari bwo umuryango wemeza ko umutungo ugurishwa kandi waramaze kugurishwa. 2 Ingingo ya 80 n’iya 81 z’itegeko n˚ 45/2011 ryo ku wa 25/11/2011 rigenga amasezerano iteganya ko” Gukora ibisabwa byose mu masezerano bikuraho inshingano zo kubikora. Iyo igihe cyo gukora ibisabwa mu masezerano kigeze, kutabikora bifatwa nko kwica amasezerano. Kwica amasezerano yose bitanga uburenganzira ku ndishyi z’akababaro zishingiye ku nshingano zo gukora igisabwa zitararangira”.

## Page 7

[25] Akomeza avuga ko Ikigo cy’Igihugu Gishinzwe Ubutaka atari cyo gitegeka ko habaho ihererekanya ry’ubutaka, ahubwo ko hari inyandiko abo bireba babanza kuzuza, kandi ko itegeko rigenga ubutaka ryo muri 2008, ryateganyaga ko habanza amasezerano y’ubugure, hagakurizaho gusaba ihererekanyamutungo, ko hari urubanza rwaciwe n’Urukiko rw’Ikirenga muri 2020 rwatanze umurongo, rusobanura ko uwahawe icyangombwa cy’ubutaka n’amasezerano yarakorewe imbere ya Noteri, ari we nyir’ubutaka, kandi ko kuba Rutagengwa Georges yarakoreye Sibomana Jean Claude ihererekanyamutungo, byumvikanisha ko habaye kugurisha nta buriganya. Uko Urukiko rubibona [26] Ikibazo gisa n’iki cyasuzumwe mu rubanza rwaciwe n’Urukiko rw’Ikirenga mu rubanza RS/INJUST/RC 00010/2019/SC3, aho muri uru rubanza, uwitwa Twizerimana Théoneste na Manizabayo Kennedy bagiranye amakimbirane ashingiye ku masezerano y’ubugure bw’inzu buri wese yaguze na Hafashimana Elias, hasuzumwa ikibazo cyo kumenya amasezerano y’ubugure ku mutungo utimukanwa w’ubutaka afite agaciro hagati y’ayakozwe mu buryo bw’inyandiko bwite (acte sous seing privé) n’ayakozwe mu buryo bw’inyandikompamo (acte authentique), Urukiko rw’Ikirenga rushingiye ku biteganywa n’amategeko, rusanga amasezerano yakozwe mu buryo bw’inyandikompamo ari yo afite agaciro, kubera ko ari na yo yonyine yemerwa igihe cy’ihererekanya ry’ubutaka rishingiye ku masezerano yo kubwegurira undi, ko rero uwaguze hakozwe amasezerano mu buryo bw’inyandiko bwite, ubugure bwe aba ari imfabusa. [27] Muri uru rubanza, Mambo Kalisa Charles na Sibomana Jean Claude bemeranya ko bose baguze ubutaka bumwe babugurishijwe na Rutagengwa Georges, Mambo Kalisa Charles akaba yarabuguze ku wa 17/05/2010, hakorwa amasezerano y’ubugure mu buryo bw’inyandiko bwite (acte sous seing privé) n’aho amasezerano y’ubugure yakozwe hagati ya Rutagengwa Georges na Matter Rutagengwa Elisabeth na Sibomana Jean Claude, aba ku wa 20/07/2018, aya masezerano yo akorerwa imbere ya Noteri, ariko akorerwa ku mutungo Rutagengwa Georges yari yaragurishije Mambo Kalisa Charles. [28] Ikigaragara muri uru rubanza ni uko yaba Mambo Kalisa Charles, yaba Sibomana Jean Claude buri wese avuga ko amasezerano ye y’ubugure ari yo afite agaciro, Mambo Kalisa Charles agasobanura ko kuba ari we waguze mbere, byumvikanisha ko amasezerano ye ari yo yakozwe nta buriganya, kandi ko Sibomana Jean Claude yahawe uwo mutungo nta bugure bubayeho, ahubwo habayeho kuguriza amafaranga ba nyir’umutungo na bo barawumuha, ibikorwa bikunze kwitwa banki lambert, na ho Sibomana Jean Claude akavuga ko amasezerano y’ubugure yo ku wa 20/07/2018 ari yo afite agaciro kubera ko ari yo yakorewe imbere ya Noteri, kandi ajya kugura akaba atari azi ko uwo mutungo wagurishijwe kubera ko Rutagengwa Georges na Matter Rutagengwa Elisabeth bamweretse icyangombwa cy’ubutaka cy’umwimerere. Uruhande rwa Rutagengwa Georges n’umugore we Matter Rutagengwa Elisabeth rwo ruvuga ko amasezerano y’ubugure yabaye hagati ya Rutagengwa Georges na Mambo Kalisa Charles, ari yo rwemera. [29] Ku birebana no kuba abahagarariye Mambo Kalisa Charles bavuga ko nta masezerano y’ubugure bw’ukuri yabaye hagati ya Sibomana Jean Claude na Rutagengwa Georges n’umugore we 3 Reba urubanza n˚ RS/INJUST/RC 00010/2019/SC rwaciwe n’Urukiko rw’Ikirenga ku wa 25/09/2020, haburana TWIZERIMANA Théoneste na MANIZABAYO Kennedy, hagobokeshwa Hafashimana Elias, igika cya 27.

## Page 8

Matter Rutagengwa Elisabeth, ko ahubwo habayeho kugurizanya amafaranga, aho Sibomana Jean Claude yabagurije amafaranga mu buryo bwitwa banki lambert, bakamwegurira umutungo bari baragurishije Mambo Kalisa Charles, Urukiko rurasanga nta shingiro byahabwa, kuko uretse kubivuga gusa, nta kimenyetso babitangira, ubuhamya bavuga bwatanzwe n’uwari uhari amasezerano y’ubugure akorwa, bukaba budasimbura ibikubiye muri ayo masezerano, cyane ko abagurishije Sibomana Jean Claude uwo mutungo, batagaragaza ibimenyetso by’igitutu bashyizweho haba mu gushyira umukono kuri ayo masezerano y’ubugure, no gukora iherereka ry’ubutaka bari bamaze kumugurisha. [30] Mu gika cya 17 cy’urubanza rujuririrwa, Urukiko Rukuru rushingiye murongo watanzwe n’Urukiko rw’Ikirenga mu rubanza RS/INJUST/RC 00010/2019/SC, rwanzuye ko amasezerano y’ubugure yabaye hagati ya Rutagengwa Georges n’umugore we na Sibomana Jean Claude, ari yo afite agaciro. [31] Urukiko rw’Ubujurire rurasanga, nk’uko byasobanuwe mu rubanza rwatanze umurongo rwaciwe n’Urukiko rw’Ikirenga rwavuzwe haruguru kandi rwarimo impaka zisa neza n’iziri muri uru rubanza, amasezerano y’ubugure yabaye hagati ya Rutagengwa Georges na Matter Rutagengwa Elisabeth na Sibomana Jean Claude ku wa 20/07/2018, ari yo afite agaciro, kubera ko ari yo yakozwe mu buryo buteganywa n’amategeko, agakorerwa imbere ya Noteri ndetse agaherwaho hakorwa ihererekanya ry’umutungo, na ho amasezerano y’ubugure yabaye hagati ya Rutagengwa Georges na Mambo Kalisa Charles ku wa 17/05/2010 mu buryo bw’inyandiko bwite, akaba nta gaciro afite nk’uko byatanzweho umurongo, rukaba rero rwemeranya n’icyemezo cyafashwe n’Urukiko Rukuru kuri iyi ngingo. 2. Kumenya ishingiro ry’indishyi zinyuranye zisabwa n’ababuranyi [32] Me Bizimana Shoshi uhagarariye Mambo Kalisa Charles asaba Urukiko rw’Ubujurire gutegeka abaregwa gufatanya guha uwo ahagarariye indishyi z'akababaro zingana na 15.000.000Frw, kubera kumuvutsa uburenganzira ku mutungo yaguze, no kumusubiza 70.000Frw y’ingwate y’amagarama amaze gutanga. [33] Me Bangamwabo Octave uhagarariye Sibomana Jean Claude avuga ko indishyi Mambo Kalisa Charles asaba nta shingiro zahabwa, kuko ari we wishoye mu manza amurega kandi umutungo atunze yarawuguze na nyirawo, ndetse ukanamwandikwaho mu buryo bukurikije amategeko. Avuga ahubwo ko ibyo yifuza byose akwiye kubisaba Rutagengwa Georges. Asaba ko Mambo Kalisa Charles, Rutagengwa Georges na Matter Rutagengwa Elisabeth, bafatanya guha Sibomana Jean Claude 6.000.000Frw y’igihembo cy’Abavoka babiri bamuburanira kuri uru rwego. [34] Me Rukundo Emile uhagarariye Sibomana Jean Claude asaba ko uwo ahagarariye yagenerwa indishyi z'akababaro zingana na 50.000.000Frw, zishingiye ku kuba yari afite gahunda yo kubaka amazu (appartements) ahaburanwa ku buryo yagombaga kujya yunguka amafaranga atari munsi ya 2.000.000Frw ku kwezi, akaba yari yaratangiye imirimo y'ubwubatsi, aho yari yarazanye imashini n’amakamyo asiza, ndetse yaranakoze inyigo akanishyura umuhanga (engineer), akaba asobanura ko zigomba gutangwa na Mambo Kalisa Charles afatanyije na Rutagengwa Georges na Matter Rutagengwa Elisabeth.

## Page 9

[35] Me Ngilinshuti Jean Bosco uhagarariye Rutagengwa Georges na Matter Rutagengwa Elisabeth avuga ko indishyi z’akababaro ndetse n’amagarama y’urubanza Mambo Kalisa Charles asaba, zikwiye gutangwa na Sibomana Jean Claude watumye habaho imanza. [36] Avuga kandi ko indishyi Sibomana Jean Claude asaba nta shingiro zifite, kubera ko ari we wateje ibibazo akurura imanza, asaba ahubwo ko Sibomana Jean Claude aha buri wese mu bo ahagarariye 2.000.000Frw y’ikurikiranarubanza na 3.000.000Frw y’igihembo cya Avoka, kubera kubashora mu manza z’amaherere. [37] Me Bangamwabo Octave uhagarariye Sibomana Jean Claude avuga ko indishyi zisabwa na Rutagengwa Georges na Matter Rutagengwa Elisabeth batagomba kuzihabwa, kubera ko ari bo bateje ibibazo bagurisha ubutaka bumwe ku bantu babiri. Uko Urukiko rubibona [38] Ingingo ya 111 y’itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ko “Ikirego cy’amafaranga y’ikurikiranarubanza ni ikirego gishamikiye ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishwa rimwe n’ikirego cy’iremezo. Gishobora kandi kwakirwa kikaburanishwa n’iyo ikirego cy’iremezo cyaba kitakiriwe.” [39] Urukiko rurasanga, amafaranga asabwa na Mambo Kalisa Charles atagomba kuyahabwa, kubera ko ubujurire bwe nta shingiro bwahawe. Rusanga kandi amafaranga Rutagengwa Georges na Matter Rutagengwa Elisabeth bifuza guhabwa na Sibomana Jean Claude na bo batagomba kuyahabwa, kubera ko batagaragaza uruhare rwe rutaziguye rwabateye kuba bari mu manza. [40] Urukiko rurasanga, amafaranga y’indishyi z’akababaro asabwa na Sibomana Jean Claude avuga ko ashingiye ku kuba yarahagaritse imirimo y’ubwubatsi yashakaga gutangira atagomba kuyahabwa, kubera ko nta kigaragaza ko amafaranga avuga yari kujya yinjiza yagombaga kuyinjiza koko, mu gihe ataranatangira kugira umusaruro abyaza ubwo butaka. Rurasanga ariko kuba Sibomana Jean Claude yarashatse Avoka wo gukurikirana urubanza no kumuburanira, agomba kugenerwa amafaranga y’ikurikiranarubanza n’igihembo cya Avoka agenwe mu bushishozi bw’Urukiko kubera ko ayo asaba ari menshi, mu bushishozi bwarwo rero, rukaba rumugeneye 1.000.000Frw y’ikurikiranarubanza n’igihembo cya Avoka, Mambo Kalisa Charles na Rutagengwa Georges na Matter Rutagengwa Elisabeth, bakaba bagomba gufatanya kuyatanga. III. ICYEMEZO CY’URUKIKO [41] Rwemeje ko ubujurire bwatanzwe na MAMBO Kalisa Charles, nta shingiro bufite. [42] Rwemeje ko urubanza RCAA00053/2021/HC/KIG rwaciwe n’Urukiko Rukuru ku wa 31/05/2022, rudahindutse.

## Page 10

[43] Rutegetse Mambo Kalisa Charles, Rutagengwa Georges na Matter Rutagengwa Elisabeth, gufatanya guha Sibomana Jean Claude 1.000.000Frw akubiyemo amafaranga y’ikurikiranarubanza n’igihembo cya Avoka kuri uru rwego. [44] Ruvuze ko amafaranga y’ingwate y’amagarama yatanzwe na Mambo Kalisa Charles ajurira, ahwanye n’ibyakozwe mu rubanza.