MAZIMPAKA v RWIGEMA

# MAZIMPAKA v RWIGEMA

- Source: Amategeko - Section: Decisions (Judgements) - Date: 2022-10-28 - Case/document no.: RCAA 00001/2022/HC/KIG - Collection: High Court

## Text

## Page 1

MAZIMPAKA v RWIGEMA [Rwanda URUKIKO RUKURU - RCAA 00001/2022/HC/KIG (Hitimana, P.J.) 28 Ukwakira 2022] Amategeko y’imananza mbonezamubano – Imiburanishirize y’imanza – Ubujurire bwa kabiri - Iyo ububasha busabirwa guteshwa agaciro ari ubwo gucunga imitungo ariko kandi iyo mitungo ikaba ntaho yigeze iburanwa ngo hamenyekane cyangwa habe harafashwe icyemezo kuri iyo mitungo ngo harebwe agaciro kayo, kandi icyemejwe n’inkiko ari ububasha bwo gucunga imitungo, akaba muri izo manza zijuririrwa ntaho urukiko rwagennye indishyi zingana nibura na miliyoni mirongo itanu z’amafaranga y’u Rwanda (50.000.000Frw) cyangwa zifite agaciro kagenwe n’umucamanza mu gihe habaye impaka kangana na miliyoni mirongo itanu z’amafaranga y’u Rwanda (50.000.000Frw), ubwo bujurire bwa kabiri ntibwakirwa. Amategeko y’imananza mbonezamubano – Imiburanishirize y’imanza – Urubanza rwihutirwaho – Guta agaciro k’urubanza rwihutirwa - Icibwa rya burundu ry’urubanza rw’iremezo bivanaho ibyari byategetswe mu rubanza rwihutirwa bitabaye ngombwa ko byongera kuregerwa. Incamake y’ikibazo: Uru rubanza rwatangiriye mu Rukiko rwibanze rwa Kacyiru Mzimpaka arega Rwigema asaba ko urukiko rwatesha agaciro icyemezo No RC 1048/11/TB/KCY giha Rwigema Mukambire Josephine ububasha bwo gucunga imitungo ya Ndwaniye Mazimpaka Deogratias. Mbere y’uko iburanisha rirangira, Urega yatanze ikirego kihutirwa asaba ko yaba ahawe inzu yo kuba atuyemo mu mitungo yasizwe na Ndwaniye hanyuma mu cyemezo cy’agateganyo urukiko rwemeza ko yaba ahawe iyo nzu. Mu iburanisha mu mizi ku kirego cy’ibanze, Urukiko Rwemeje ko ikirego cya Mazimpaka gifite ishingiro kuri bimwe, rutegeka ko icyemezo RC 1048/11/TB/KCY giha Rwigema ububasha bwo gucunga imitungo ya Ndwaniye giteshejwe agaciro kuko kibangamiye Mazimpaka, runemeza ko ibyo Mazimpaka yasabaga by’uko umutungo wagabanwa bidasuzumwe kuko ataricyo cyaregewe mu rubanza rutambamirwa. Rwigema ntiyishimiye imikirize y’urwo rubanza ajurira mu Rukiko Rwisumbuye rwa Gasabo avuga ko hari inzitizi yatanze yo kutakira ikirego cyari cyatanzwe na Mazimpaka Christian ntiyahabwa ishingiro no kuba baratesheje agaciro icyemezo cyo gucunga imitungo ntibashyireho undi wo kuyicunga. Urukiko rwisumbuye rwasanze inziztizi yo kutakira ikirego idafite ishingiro ahubwo rwemeza ko Rwigema agumana ububasha bwo gucunga imitungo ya Ndwaniye. Urega ntiyishimiye imiye imikirize y’urubanza ajurira mu Rukiko Rukuru avuga ko Urukiko rubanza rwarategetse ko Rwigema agumana uburenganzira bwo gucunga umutungo wa nyakwigendera Mazimpaka kandi ubwo burenganzira yahawe bwarabangamiye inyungu ze. Urukiko rukuru rwasuzumye ibibazo birmo kumenya niba rufite ububasha bwo gusuzuma iki kirego ndetse n’icyo gusuzuma ko icyemezo cy’agateganyo cyafashwe mu rubanza RC 00996/2020/TB/GSBO giha Mazimpaka inzu yo kubamo cyakurwaho. Urega avuga ko imitungo iri muri iki kirego ifite agaciro karengeje miriyoni mirongo itanu nkuko bigaragzwa n’igenzagciro yakoresheje agasanga Urukiko Rukuru rufite ububasha bwo kuburanisha uru rubanza. Uregwa we avuga ko icyaregewe ari ugutesha agaciro Urubanza rwaburanwe hataregewe imitungo. Akaomeza anasaba ko Mazimpaka yava mu nzu yahawe by’agateganyo

## Page 2

kugirango haboneka ibitunga umuryango wa Nyakwigendera. Mazimpaka we avuga ko iyi nzu atari wo mutungo wonyine wasizwe na Nyakwigendera, ko kandi ari yo atuyemo kandi nawe akaba ari umuzungura. Incamake y’icyemezo: 1. Iyo ububasha busabirwa guteshwa agaciro ari ubwo gucunga imitungo ariko kandi iyo mitungo ikaba ntaho yigeze iburanwa ngo hamenyekane cyangwa habe harafashwe icyemezo kuri iyo mitungo ngo harebwe agaciro kayo, kandi icyemejwe n’inkiko ari ububasha (qualite) bwo gucunga imitungo, akaba muri izo manza zijuririrwa ntaho urukiko rwagennye indishyi zingana nibura na miliyoni mirongo itanu z’amafaranga y’u Rwanda (50.000.000Frw) cyangwa zifite agaciro kagenwe n’umucamanza mu gihe habaye impaka kangana na miliyoni mirongo itanu z’amafaranga y’u Rwanda (50.000.000Frw), ubwo bujurire bwa kabiri ntibwakirwa. Bityo ubujurire bwa Mazimpaka ntibwakiriwe. 2. Icibwa rya burundu ry’urubanza rw’iremezo bivanaho ibyari byategetswe mu rubanza rwihutirwa bitabaye ngombwa ko byongera kuregerwa bityo ubusabe bwa Rwigema bwo gusubizwa inzu yari yahawe Mazimpaka si ngombwa ko busuzumwa muri uru rubanza. Ubujurire bwatanzwe na Mazimpaka ntibwakiriwe kuko kitari mu bubasha bw’uru Rukiko; Imikirize y’urubanza RCA 00067/2021/TGI/GSBO igumyeho mu ngingo zayo zose. Amategeko yashingiweho: Itegeko N° 30/2018 ryo ku wa 02/06/2018 rigena ububasha bw’inkiko, ingingo ya 46; Itegeko Nº 22/2018 ryo kuwa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 185; Nta manza zifashishijwe Urubanza I. IMITERERE Y’URUBANZA [1] Urubanza rwatangiriye mu Rukiko rwibanze rwa Gasabo aho Mazimpaka Christian yaregaga Rwigema Mukambire Josephine asaba gutesha agaciro icyemezo no RC 1048/11/TB/KCY giha Rwigema Mukambire Josephine ububasha bwo gucunga imitungo ya Ndwaniye Mazimpaka Deogratias, Urukiko Rwemeza ko ikirego cya Mazimpaka Christian gifite ishingiro kuri bimwe, rutegeka ko icyemezo RC 1048/11/TB/KCY giha Rwigema Mukambire Josephine ububasha bwo gucunga imitungo ya Ndwaniye Mazimpaka Deogratias giteshejwe agaciro kuko kibangamiye Mazimpaka Christian, rwemeza ko ibyo Mazimpaka Christian asaba by’uko umutungo wagabanwa bidasuzumwe kuko ataricyo cyaregewe mu rubanza RC 1048/11/TB/KCY rutambamirwa rwemeza ko indishyi zisabwa na Rwigema Mukambire Josephine mu kirego kiregera kwiregura nta shingiro zifite.

## Page 3

[2] Rwigema Mukambire Josephine ntiyishimiye imikirize y’urwo rubanza ajurira mu Rukiko Rwisumbuye rwa Gasabo avuga ko hari inzitizi yatanze yo kutakira ikirego cyari cyatanzwe na Mazimpaka Christian ntizahabwa ishingiro no kuba baratesheje agaciro icyemezo cyo gucunga umutungo ntibashyireho uwundi wo kuyicunga. [3] Mazimpaka Christian mu kwiregura asobanura ko inzitizi zatanzwe nta shingiro zifite kuko atabaye umuburanyi mu rubanza RC 1048/11/TB/KCY asaba ko rwateshwa agaciro kandi ko arirwo rwahaye Rwigema Mukambire Josephine ububasha bwo gucunga imitungo ya nyakwigendera bigatuma habangamirwa inyungu ze kuko atigeze agaragazwa nk’umwana wa Nyakwigendera kandi nta yindi nzira yari kunyuramo kugirango hateshwe agaciro icyemezo kimubangamira usibye mu buryo bwo gutambamira urwo rubanza, ko naho impamvu z’ubujurire nta shigiro zifite kubera ko ububasha yahawe yabukoresheje nabi ko kandi muri icyo cyemezo yabeshye kandi ahisha umwana w’imfura uzwi n’umuryango n’abavandimwe be mbere y’uko nyakwigendera ashakana na Rwigema Mukambire Josephine. [4] Kuwa 17/03/2022 Urukiko Rwisumbuye rwa Gasabo rwaciye urubanza rwemeza ko ikirego cy’Ubujurire cyatanzwe na Rwigema Mukambire Josephine gihawe ishingiro uretse ku nzitizi, rwemeza ko inzitizi zari zatanzwe zo kutakira ikirego nta shingiro zihawe, rwemeza ko imikirize y’urubanza RC 00797/2020/TGI/GSBO rwaciwe kuwa 09/06/2021 ihindutse, rutegeka ko Rwigema Mukambire Josephine agumana uburenganzira bwo gucunga umutungo uzabona atuzuza inshingano ahabwa nabwo akazajya kuregera ko abwamburwa, rwemeza ko Mazimpaka Christian aha Rwigema Mukambire Josephine Amafaranga angana na 500,000Frw y’igihembo cy’avoka, na 20,000Frw y’ingwate y’amagarama yatanze arega atabikora ku neza urubanza rubaye ndakuka akazavanwa mu bye ku ngufu za Leta. [5] Mazimpaka Christian ntiyishimiye imikirize y’urubanza ajurira mu Rukiko Rukuru avuga ko kuba urukiko rwarategetse ko Rwigema Mukambire Josephine agumana uburenganzira bwo gucunga umutungo wa nyakwigendera Mazimpaka Ndwaniye Déogratias kandi ubwo burenganzira yahawe bwarabangamiye inyungu ze, akanasaba ko hasuzumwa ibijyanye n'indishyi. [6] Rwigema Mukambire Josephine mu kwiregura yatanze inzitizi yo kutakira ubujurire bwa kabiri kuko urukiko rukuru nta bubasha uwajuriye agaragaza bwatuma ubujurire bwe bwa kabiri bwakirwa, mu bujurire bwuririye ku bundi asaba gusuzuma niba inzu ifite UPI: 01/02/08/03/357 yasubizwa Rwigema Mukambire Josephine, kandi niba yahabwa indishyi n'amafaranga y'ikurikiranarubanza n’igihembo cya avocet. [7] Mazimpaka Christian yiregura ku nzitizi y’iburabubasha bw’urukiko rukuru avuga ko nta shingiro yahabwa kubera ko ubujurire bwa kabiri bushingiye ko umutungo uburanwa urengeje agaciro ka miliyoni mirongo itanu (50.000.000Frw), bityo ko urukiko rukuru rufite ububasha; [8] Muri uru rubanza harasuzumwa ibyerekeye kumenya niba inzitizi ijyanye n’ububasha bw’urukiko rukuru yaba ifite ishingiro, kumenya niba ubujurire bwuririye ku bundi bwahabwa ishingiro. II. GUSESENGURA IKIBAZO KIGIZE URUBANZA;

## Page 4

Ku byerekeye inzitizi ijyanye n’ububasha bw’urukiko rukuru rwaregewe ubujurire bwa kabiri. [9] Mu gusobanura inzitizi y’iburabubasha, Me Fatikaramu Jean Pierre uhagarariye Rwigema Mukambire Josephine avuga ko Urukiko rukuru nta bubasha rufite bwo kuburanisha ururubanza kuko, icyaburanwe cyari ugutesha agaciro urubanza numero RC 1048/11/TB/KCY, ntabwo icyaburanwe ari agaciro kikintu cyangwa imitungo ngo habe harebwa agaciro k’umutungo kugirango urukiko rube rwakwakira iki kirego, bityo rero ko basaba urukiko rukuru kutakira ubujurire bwa kabiri ngo buburanishwe mu mizi. [10] Me Sadi Jashi wunganira Mazimaka Christian yiregura kuri iyo nzitizi y’iburabubasha avuga ko batanze ubujurire bwa kabiri bashingiye ku biteganywa n’ingingo ya 46 y’itegeko Nº 30/2018 ryo kuwa 02/06/2018 rigena ububasha bw’inkiko, kuko imitungo iburanwa muri uru rubanza ifite agaciro karenze miliyoni mirongo itanu (50,000,000Frw) nkuko expertise ibigaragaza bashyikirije urukiko n’ubwo nabo baburana batabihakana. Uko uru rukiko rubibona [11] Urukiko rushingiye ku biteganywa n’ingingo ya 46 y’itegeko N° 30/2018 ryo ku wa 02/06/2018 rigena ububasha bw’inkiko, ivuga ko “Urukiko Rukuru ruburanisha kandi imanza z’imbonezamubano zajuririwe, zaciwe mu rwego rwa kabiri n’Urukiko Rwisumbuye, mu gihe izo manza: 1° zishingiye ku itegeko ritariho cyangwa zaciwe n’Urukiko rutabifitiye ububasha; 2° zaciwe hashingiwe ku kimenyetso, inyandiko cyangwa imyanzuro byatanzwe nyuma yo gupfundikira iburanisha kandi hatabayeho gusubukura iburanisha; 3° zaciwe n’inteko itujuje umubare ugenwe; 4° zasomwe n’umucamanza utaraziburanishije ; 5° zitaburanishijwe mu ruhame kandi nta muhezo wategetswe; 6° zagenwemo n’urukiko indishyi zingana nibura na miliyoni mirongo itanu z’amafaranga y’u Rwanda (50.000.000Frw) cyangwa zifite agaciro kagenwe n’umucamanza mu gihe habaye impaka kangana na miliyoni mirongo itanu z’amafaranga y’u Rwanda (50.000.000Frw). Icyakora, ubujurire bwa kabiri ntibushobora kwakirwa ku manza z’ababuranye bemera ibyo baregwa, cyangwa ku muburanyi watsinzwe mu nkiko zombi hashingiwe ku mpamvu zimwe. Iyo icyaburanwe kitagenewe agaciro mu mafaranga mu manza zabanje, kigomba kuba gifite agaciro nibura kangana na miliyoni mirongo itanu z’amafaranga y’u Rwanda (50.000.000Frw) kagenwe n’umuhanga iyo bibaye ngombwa. Kugira ngo ikirego cyakirwe mu bujurire bwa kabiri kigomba kubanza kwemezwa n’umwanditsi Mukuru w’Urukiko Rukuru. Uwajuriye utishimiye icyemezo yafatiwe ashobora gutakambira Perezida w’Urukiko Rukuru mu nyandiko mu gihe kitarenze iminsi itanu (5) ibarwa kuva akimenyeshejwe. Icyemezo cya Perezida w’Urukiko ntikijuririrwa”. [12] Urukiko rukuru rusanga kuba Mazimpaka Christian ashingira ku gace ka 6 k’ingingo imaze kuvugwa mu gika kibanziriza iki, ajuririra urubanza rwaciwe ku rwego rwa kabiri n’urukiko rwisumbuye akarujuririra mu rukiko rukuru avuga ko imitungo iburanwa irengeje agaciro ka 50,000,000Frw ariko uru rukiko rusanga urubanza yatambamiraga mu rukiko rwibanze rwari rwaregewe ibyerekeye guhabwa uburenganzira bwo gucunga umutungo wasizwe na nyakwigendera Mazimpaka Ndwandiye Déogratias, uyu akaba yari yarashakanye na Rwigema Mukambire Josephine byemewe n’amategeko, rukaba rusanga Rwigema Mukambire Josephine yari yaregeye urukiko rw’ibanze mu rubanza RC 1048/11/TB/Kcy asaba ko yacunga

## Page 5

imitungo yasizwe n’umugabo we, uru rubanza akaba ari narwo Mazimpaka Christian yatambamiye ruhabwa RC 00797/2020/TB/Gsbo mu kirego cye yatanze yanditse ati “Gutesha agaciro icyemezo RC 1048/11/TB/KCY giha Rwigema Mukambire Josephine ububasha bwo gucunga imitungo ya Ndwaniye Mazimpaka Deogratias”. [13] Uru rukiko rusanga muri icyo kirego cya Mazimpaka Christian ndetse no mu bujurire ntaho yigeze aregera imitungo cyangwa ngo muri urwo rubanza RC 00797/2020/TB/Gsbo habe harafashwe icyemezo kuri iyo mitungo, ahubwo icyateshwaga agaciro n’ububasha bwahawe Rwigema Mukambire Josephine bwo gucunga imitungo itarigeze iburanwaho mu manza zijuririrwa, bityo ingingo ya 46 y’itegeko N° 30/2018 ryo ku wa 02/06/2018 rigena ububasha bw’inkiko, cyane agace ka 6 ashingiraho ntaho ihuriye n’ibyaburanwe mu manza zijurirwa cyane ko icyaburanwe cy’ingenzi ari ububasha (qualité) bwari bwahawe Rwigema Mukambire Josephine bwo gucunga umutungo wa Mazimpaka Ndwaniye Déogratias, bityo ubujurire bwe bukaba budakwiye kwakirwa n’uru rukiko kuko nta bubasha rufite hashingiwe ku ngingo yavuzwe haruguru. [14] Ko nubwo ububasha busabirwa guteshwa agaciro ari ubwo gucunga imitungo ariko kandi iyo mitungo akaba ntaho yigeze iburanwa ngo hamenyekane cyangwa habe harafashwe icyemezo kuri iyo mitungo harebwe agaciro kayo, ko icyemejwe n’inkiko ari ububasha (qualite) bwo gucunga imitungo yasigiwe n’umugabo we, akaba muri izo manza zijuririrwa ntaho rusanga hari rukiko rwagennye indishyi zingana nibura na miliyoni mirongo itanu z’amafaranga y’u Rwanda (50.000.000Frw) cyangwa zifite agaciro kagenwe n’umucamanza mu gihe habaye impaka kangana na miliyoni mirongo itanu z’amafaranga y’u Rwanda (50.000.000Frw), bityo ibivugwa na Mazimpaka Christian ko ubujurire bwa kabiri bushingiye ko imitungo iburanwa irengeje agaciro ka 50.000.000Frw nyamara iyo mitungo itaraburanweho, ahubwo haburanwe ububasha ko bituma ubujurire bwe bwa kabiri butakirwa ngo busuzumwe n’uru rukiko. Ku byerekeye ishingiro ry’ubujurire bwuririye ku bundi [15] Me Fatikaramu Jean Pierre uburanira Rwigema Mukambire Josephine avuga ko asaba urukiko ko rwategeka Mazimpaka Christian kuva mu nzu y'abandi kuko ariyo yaritunze Rwigema Mukambire Josephine n'umuryango we wose, kubera ko n'icyemezo cyari cyayitanze m'uburyo bwagateganyo cyarangiye, agasaba ko yahabwa amafaranga y'ikurikiranarubanza nay'igihembo cy'Avoka ku rwego rw'ubujurire angana na 700.000Frw, n'indishyi zingana na 700.000Frw. [16] Mazimpaka Christian avuga ko usibye ko iyo nzu atariyo nzu yonyine yasigaranye mu mitungo yasizwe na nyakwigendera Rwigema Ndwaniye Deogratias ko iyi nzu ariyo Mazimpaka Christian atuyemo kandi nawe ari umuzungura wa nyakwigendera, naho ku byerekeye indishyi zisabwa na Rwigema Mukambire Josephine avuga ko asanga nta shingiro zifite. Uko uru rukiko rubibona [17] Uru rukiko rusanga mu iburana ry’izi manza haratanzwemo ikirego cyihutirwa cyanditse kuri RC 00996/2020/TB/GSBO aho Mazimpaka Christian yaregaga Rwigema Mukambire Josephine asaba urukiko kugena aho yaba abaye mu nzu imwe by’agateganyo, agasaba ko yaba

## Page 6

abaye mu nzu zibaruye ku butaka UPI:1/02/11/03/1993, na UPI: 1/02/11/03/2641, mu ica ry’urwo rubanza rwaciwe kuwa 20/11/2020 rwemeje mu gika cya 11 ibi bikurikira “Rutegetse inzu ibaruye kuri UPI: 1/02/08/03/691 iherereye mu mudugudu wa Gasave, Akagali ka Rugando, umurenge wa Kimihurura, akarere ka Gasabo, ihawe Mazimpaka Christian mu gihe urubanza RC 01048/11/TB/KCY yareze asaba ko icyemezo cyarufashwemo gikurwaho rutaracibwa, Mazimpaka Christian akaba adafite uburenganzira bwo kuyigurisha, cyangwa kuyitangwaho ingwate ahariho hose akaba ayihawe kugirango abe ayibayemo gusa, mu gihe hategerejwe icyemezo kizafatwa mu rubanza RC 00797/2020/TB/GSBO”. [18] Uru rukiko rusanga icyemezo cyafashwe mu rubanza rwihutirwaga rwari rweregewe na Mazimpaka Christian mu cyemezo cyarwo rwaremeje ko ari icyemezo cy’agateganyo gitegerejwe icyemezo kizafatwa mu rubanza RC 00797/2020/TB/Gsbo, kandi uru rubanza rwarajuririwe mu rukiko rwisumbuye rwa Gasabo rwandikwa kuri RC 00067/2021/TGI/GSBO, uru rubanza akaba ari narwo rurikujuririrwa muri uru rukiko ariko ubujurire bwarwo bukaba butakiriwe muri uru rukiko kuko rutari mu bubasha bwarwo nkuko byasobanuwe haruguru, bityo ko rushingiye ku biteganywa n’ingingo ya 185 y’itegeko Nº 22/2018 ryo kuwa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ivuga ko “Iyo hari ikirego cy’iremezo, ariko hagomba kugira icyemezwa by’agateganyo mu buryo bwihuta ku rubanza rwaregewe urukiko rutaraburanishwa, ikirego cyihutirwa gishyikirizwa umucamanza ushinzwe kurangiza impaka zihutirwa w`aho zigomba”. [19] Uru rukiko rusanga amategeko ateganya ko ikirego cyihutirwa gita agaciro aruko urubanza rw’iremezo ruciwe, nyamara muri izi manza nubwo Rwigema Mukambire Josephine asaba gusubizwa inzu yari yarahawe Mazimpaka Christian mu rubanza rwihutirwa ko bitari ngombwa ko uru rukiko rusuzuma ubwo busabe bwe muri ubu bujurire bwa kabiri kuko icibwa rya burundu ry’urubanza rw’iremezo bivanaho ibyari byategetswe mu rubanza rwihutirwa bitabaye ngombwa ko byongera kuregerwa. [20] Ku byerekeye indishyi zisabwa uru rukiko rushingiye ko ibiburanwa muri izi manza ari ibyerekeye ububasha bwo gucunga imitungo yasizwe na Mazimpaka Ndwaniye Déogratias bwahawe Rwigema Mukambire Josephine kandi uyu akaba ari umugore w’isezerano w’uwasize iyo mitungo nyamara uregera ko ubwo bubasha bwamburwa uwabuhawe n’icyemezo RC 1048/11/TB/Kcy ariwe Mazimpaka Christian akaba agaragaza ko ari umwe mu bana basizwe na nyakwigendera Mazimpaka Ndwaniye Déogratias, rusanga indishyi zisabwa na Rwigema Mukambire Josephine atazigenerwa mu gihe ibiburanwa bishingiye ku mitungo y’umuryango umwe wasizwe na nyakwigendera ndetse bikaba bicungwa n’uregera izo ndishyi, ko mu gihe hatangwa ikirego kuri iyo mitungo inkiko zikazasanga Mazimpaka Christian adakwiye kuyigiraho uruhare ko aribwo hagenerwa indishyi Rwigema Mukambire Josephine uzisabwa muri uru rukiko, ariko kuko nta cyemeza ko uyu Mazimpaka Christian nta ruhare yaba afite ku mitungo ivugwa Rwigema Mukambire Josephine yahawe gucunga kandi uyu mwana aciwe indishyi ntahandi yagakwiye kuba avana izo ndishyi Atari muri iyo mitungo yasizwe nuwo yita ko ari ise (nubwo uru rukiko ataricyo rwaregewe ngo rubyemeze) ko nta mpamvu uwo arega ko ari mukase yagenerwa indishyi zishobora kuzavanwa mu mitungo we aregwa gucunga ya se, akaba atazigenerwa, bityo ubujurire bwuririye ku bundi bukaba nta shingiro buhawe. III. ICYEMEZO CY’URUKIKO RUKURU

## Page 7

[21] Rwemeje kutakira ubujurire bwatanzwe na Mazimpaka Christian urega Rwigema Mukambire Josephine kuko kitari mu bubasha bwarwo. [22] Rwemeje ko imikirize y’urubanza RCA 00067/2021/TGI/GSBO rwaciye n’urukiko rwisumbuye rwa Gasabo kuwa 17/03/2022 idahindutse mu ngingo zayo zose. [23] Rutegetse ko ingwate y’amagarama yatanzwe na Mazimpaka Christian ajurira angana n’ibihumbi mirongo ine (40.000Frw) ahwanye n’amagarama y’ibyakoreshejwe muri uru rubanza.