UBUSHINJACYAHA v. MBARUSHIMANA

# UBUSHINJACYAHA v. MBARUSHIMANA

- Source: Amategeko - Section: Decisions (Judgements) - Date: 2025-01-30 - Case/document no.: RPAA 00349/2023/CA 01 - Collection: Court of Appeal

## Text

## Page 1

UBUSHINJACYAHA v. MBARUSHIMANA [Rwanda URUKIKO RW’UBUJURIRE – RPAA 00349/2023/CA (Rugabirwa, P.J.) 30 Mutarama 2025] Amategeko agenga ibyaha n’ibihano – Icyaha cyo kubika no gucuruza ibiyobyabwenge byo mu bwoko bw’urumogi – Iyo uregwa yafatanwe ingano nini y’ibiyobyabwenge by’urumogi, bigaragaza ko yari agamije kurucuruza cyangwa kurukwirakwiza, aho kurukoresha ku giti cye. Amategeko agenga ibyaha n’ibihano – Kwemera icyaha – Umucamanza uburanisha urubanza mu mizi niwe ureba agaciro aha imvugo y’uwiyemerera icyaha mu rwego rw’iperereza ifite, kabone n’iyo yageze imbere y’Urukiko akayihindura. Incamak y’ikibazo: Uwitwa Mbarushimana yafatanwe urumogi rungana n’udupfunyika mirongo inani (80 boules) yaruhishe mu masogisi avuye kururangura mu Karere ka Rubavu arujyanye kurucuruza mu Mujyi wa Kigali n’ahantu hatandukanye. Iperereza rirangiye, Ubushinjacyaha bwamureze mu Rukiko Rwisumbuye rwa Karongi rumukurikiranyeho icyaha cyo kubika no gucuruza ibiyobyabwenge byo mu bwoko bw’urumogi, busaba ko yahamwa n’icyo cyaha, agahanishwa igifungo cya burundu n’ihazabu ingana na 21.000.000Frw. Mbarushimana Jackson yaburanye yemera icyaha aregwa, ariko ahakana ko atari agiye kurucuruza i Kigali n’ahandi, ko ahubwo wari umuti yari agiye kuvuza itungo rye. Urwo Rukiko rushingiye ku kwemera icyaha kw’uwarezwe, rwemeza ko ahamwa n’icyaha cyo kubika no gucuruza ibiyobyabwenge byo mu bwoko bw’urumogi, rumuhanisha igifungo cya burundu n’ihazabu ya 21.000.000 Frw. Mbarushimana Jackson yajuririye urwo rubanza mu Rukiko Rukuru, Urugereko rwa Rusizi, avuga ko inyito y’icyaha yahinduka kikaba icyaha cyo gufatanwa urumogi, aho kuba icyaha cyo kubika no gucuruza urumogi yahamijwe, asaba kugabanyirizwa igihano kuko yemera cyaha yakoze cyo gufatanwa ibiyobyabwenge by’urumogi akanagisabira imbabazi. Ubushinjacyaha buvuga ko inyito y’icyaha itahinduka kuko yakoze icyaha cyo kubika no gucuruza urumogi yahamijwe hashingiwe ku bimenyetso bitandukanye, birimo imvugo yavugiye mu Nzego z’iperereza, aho yemereye icyaha agasobanura ko urumogi yafatanwe rwari urwo gucuruza. Urukiko Rukuru rwasanze n’ubwo Mbarushimana Jackson atemeye icyaha aregwa mu buryo budashindikanywaho, kuko yagiye yivuguruza mu mvugo ze, agomba kugabanyirizwa ibihano, agahabwa igihano kingana n’icyo abakoze icyaha gisa n’icyo yakoze bahanwe mu rwego rwo gutanga ubutabera buboneye kandi bureshya ku bantu bose nk’uko byatanzweho umurongo mu manza zitandukanye, maze rumuhanisha igifungo cy’imyaka cumi n’itanu (15) n’ihazabu ya 21.000.000 Frw, aho kuba igifungo cya burundu yari yahawe mbere, rumugabanyirije ibihano kugira ngo ahabwe ubutabera buboneye nk’ubwa bagenzi be. Mbarushimana Jackson yajuririye nanone urwo rubanza mu Rukiko rw’Ubujurire avuga ko inyito y’icyaha yahinduka kikitwa icyaha cyo gufatanwa no kunywa ibiyobyabwenge byo mu bwoko

## Page 2

bw’urumogi, kuko urumogi yafatanwe rungana n’udupfunyika mirongo inani (80 boules) rwari urwo kunywa no guha amatungo ye, kubera ko nta kigaragaza ko yari agiye kurucuruza. Ubushinjacyaha buvuga ko inyito y’icyaha cyo kubika no gucuruza urumogi uregwa yahamijwe itahinduka kubera ko mu Bugenzacyaha yiyemereye ko yafatanwe udupfunyika 80 tw’urumogi yari agiye guha umuntu kugira ngo ajye kurucuruza i Kigali, ndetse ko ingano nini y’urumogi yafatanwe igaragaza ko rwari urwo gucuruza, aho kuba urwo kunywa nk’uko abivuga. Incamake y’icyemezo: 1. Iyo uregwa yafatanwe ingano nini y’ibiyobyabwenge by’urumogi, bigaragaza ko yari agamije kurucuruza cyangwa kurukwirakwiza, aho kurukoresha ku giti cye. 2.Umucamanza uburanisha urubanza mu mizi niwe ureba agaciro aha imvugo y’uwiyemerera icyaha mu rwego rw’iperereza ifite, kabone n’iyo yageze imbere y’Urukiko akayihindura. Ubujurire bufite ishingiro kuri bimwe.

Amategeko yashingiweho. Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, ingingo ya 2; Itegeko Nº 68/2018ryo ku wa 30/08/2018 riteganya ibyaha n’ibihano muri rusange, ingingo ya 60. Imanza zifashishijwe: Urubanza RPA 0010/ 06/CS - RPA 0011/06/CS - RPA 0012/06/CS, rw’Ubushinjacyaha na Sgt Ntaganira na bagenzi be, rwaciwe n’Urukiko rw’Ikirenga ku wa 18/07/2008; Urubanza RPAA 00392/2023/CA rw’ Ubushinjacyaha na Musanganyimpuhwe Félicien rwaciwe n’Urukiko rw’Ubujurire ku wa 28/06/2024; Urubanza I.IMITERERE Y’URUBANZA [1] Ku wa 06/10/2019, mu gihe cya saa tanu n’igice z’amanywa (11h30’), Mbarushimana Jackson yafatanwe urumogi rungana n’udupfunyika mirongo inani (80 boules) yaruhishe mu masogisi avuye kururangura mu Karere ka Rubavu arujyanye kurucuruza mu Mujyi wa Kigali n’ahantu hatandukanye. Iperereza rirangiye, Ubushinjacyaha bwamureze mu Rukiko Rwisumbuye rwa Karongi rumukurikiranyeho icyaha cyo kubika no gucuruza ibiyobyabwenge byo mu bwoko bw’urumogi, busaba ko yahamwa n’icyo cyaha, agahanishwa igifungo cya burundu n’ihazabu ingana na 21.000.000Frw. [2] Mbarushimana Jackson yaburanye yemera ko yafatanwe udupfunyika (boules) 80 tw’urumogi, ariko ahakana ko atari agiye kurucuruza i Kigali n’ahandi, ko ahubwo wari umuti yari agiye kuvuza itungo rye.

## Page 3

[3] Urwo Rukiko rushingiye ku kwemera icyaha kwa Mbarushimana Jackson kuva mu nzego z’Iperereza, aho yemeye ko yafatanywe udupfunyika 80 tw’urumogi arubitse mu masogisi nk’uko anabishinjwa n’abatangabuhamya barimo Habimana, Nzakira Emmanuel, Ndagijimana Gasore, Twizerimana, bose bemeje ko aribo bafashe Mbarushimana Jackson afite urwo rumogi, ndetse n’inyandiko zigaragaza ko yarufatanwe zirimo raporo y’Inzego z’Ibanze yemeza ko Mbarushimana Jackson yafashwe n’abaturage afite udupfunyika 80 tw’urumogi arubitse arujyanye kurucuruza i Kigali, rwaciye urubanza RP 00491/2019/TGI/KNG ku wa 26/11/2020, rwemeza ko Mbarushimana Jackson ahamwa n’icyaha cyo kubika no gucuruza ibiyobyabwenge byo mu bwoko bw’urumogi, rumuhanisha igifungo cya burundu n’ihazabu ya 21.000.000 Frw, rutegeka ko anyagwa urwo rumogi rugatwikwa n’inzego zibifite ububasha. [4] Mbarushimana Jackson yajuririye urwo rubanza mu Rukiko Rukuru, Urugereko rwa Rusizi, avuga ko inyito y’icyaha yahinduka kikaba icyaha cyo gufatanwa urumogi yari agiye guha amatungo ye nk’umuti, aho kuba icyaha cyo kubika no gucuruza urumogi yahamijwe, asaba kugabanyirizwa igihano kuko yemera cyaha yakoze cyo gufatanwa ibiyobyabwenge by’urumogi akanagisabira imbabazi. [5] Naho uhagarariye Ubushinjacyaha avuga ko inyito y’icyaha itahinduka kuko yakoze icyaha cyo kubika no gucuruza urumogi yahamijwe hashingiwe ku bimenyetso byavuzwe haruguru, birimo imvugo yavugiye mu Nzego z’iperereza, aho yemereye icyaha agasobanura ko urumogi yafatanwe rwari urwo gucuruza yari ajyanye i Kigali. [6] Urukiko Rukuru rwasanze n’ubwo Mbarushimana Jackson atemeye icyaha aregwa mu buryo budashindikanywaho, kuko yagiye yivuguruza mu mvugo ze, agomba kugabanyirizwa ibihano, agahabwa igihano kingana n’icyo abakoze icyaha gisa n’icyo yakoze bahanwe mu rwego rwo gutanga ubutabera buboneye kandi bureshya ku bantu bose nk’uko byatanzweho umurongo mu rubanza RPAA 00097/2021/CA rwaciwe n’uru Rukiko ku wa 18/11/2022, rwaciye urubanza RPA 00027/2021/HC/RSZ ku wa 28/07/2023, rwemeza ko Mbarushimana Jackson ahamwa n’icyaha cyo kubika no gucuruza urumogi, rumuhanisha igifungo cy’imyaka cumi n’itanu (15) n’ihazabu ya 21.000.000 Frw, aho kuba igifungo cya burundu yari yahawe mbere, rumugabanyirije ibihano kugira ngo ahabwe ubutabera buboneye nk’ubwa bagenzi be. [7] Mbarushimana Jackson yajuririye nanone urwo rubanza mu Rukiko rw’Ubujurire, ubujurire bwe bwandikwa kuri RPAA 00349/2023/CA, urubanza rwaburanishijwe mu ruhame ku wa 10/01/2025, Mbarushimana Jackson yunganiwe na Me Rwimo Clotilde, naho Ubushinjacyaha buhagarariwe na Ntawangundi Béatrice, Umushinjacyaha ku rwego rw’Igihugu. [8] Mu mwanzuro w’ubujurire no mu miburanire, Mbarushimana Jackson n’umwunganira, bavuga ko inyito y’icyaha yahinduka agakurikiranwaho icyaha cyo gufatanwa no kunywa ibiyobyabwenge byo mu bwoko bw’urumogi, akanaruha amatungo ye, agahanishwa igifungo cy’umwaka umwe (1) giteganyirijwe icyo cyaha, aho kuba icyaha cyo kubika no gucuruza urumogi yahamijwe. [9] Naho uhagarariye Ubushinjacyaha avuga ko inyito y’icyaha itahinduka, ko agomba guhamwa n’icyaha cyo kubika no gucuruza urumogi, aho kuba icyaha cyo kurufatanwa no kurunywa nk’uko abivuga, kuko atavuguruza ibimenyetso rwashingiyeho rumuhamya icyo cyaha, bityo ko ibihano yahawe bitahinduka.

## Page 4

[10] Urukiko ruhereye kuri izo mpaka, rurasanga ibibazo bikwiye gusuzumwa muri uru rubanza ari ibyo kumenya niba Urukiko Rukuru rwarakoze ikosa mu guhamya Mbarushimana Jackson icyaha cyo kubika no gucuruza urumogi no kumenya niba Mbarushimana Jackson yagabanyirizwa ibihano. II. IBIBAZO BIRI MU RUBANZA N’ISESENGURWA RYABYO: 1.Kumenya niba Urukiko Rukuru rwarakoze ikosa ryo guhamya Mbarushimana Jackson icyaha cyo kubika no gucuruza urumogi [11] Mbarushimana Jackson n’umwunganira bavuga ko inyito y’icyaha yahinduka kikitwa icyaha cyo gufatanwa no kunywa ibiyobyabwenge byo mu bwoko bw’urumogi, kuko urumogi yafatanwe rungana n’udupfunyika mirongo inani (80 boules) rwari urwo kunywa no guha amatungo ye, ariko ko atahamwa n’icyaha cyo kubika no gucuruza urumogi kubera ko nta kigaragaza ko yari agiye kurucuruza. [12] Bavuga kandi ko Urukiko Rukuru rwahamije Mbarushimana Jackson icyaha cyo kubika no gucuruza urumogi hashingiwe ku mvugo yavugiye mu Bugenzacyaha, aho yemeye ko yari agiye kuruha umuntu wagombaga kurucuruza i Kigali, rwirengagije ko byatewe n’uko yashyizweho iterabwoba agakubitwa na Polisi, bituma yemera icyaha cyo gucuruza urumogi atakoze kugira ngo yikure mu maboko yayo, ariko ko yageze imbere y’Urukiko Rwisumbuye rwa Karongi avugisha ukuri ko urumogi yafatanzwe atari urwo gucuruza, ko ahubwo ari urwo kunywa no kwihera amatungo ye. [13] Uhagarariye Ubushinjacyaha avuga ko inyito y’icyaha cyo kubika no gucuruza urumogi Mbarushimana Jackson yahamijwe itahinduka kubera ko mu Bugenzacyaha yiyemereye ko yafatanwe udupfunyika 80 tw’urumogi yari agiye guha umuntu kugira ngo ajye kurucuruza i Kigali, ndetse ko ingano nini y’urumogi yafatanwe ingana n’udupfunyika mirongo inani (80 boules) igaragaza ko rwari urwo gucuruza, aho kuba urwo kunywa nk’uko abivuga. UKO URUKIKO RUBIBONA [14] Nk’uko byatanzweho umurongo n’Urukiko rw’Ubujurire mu rubanza RPAA 00408/2020/CA rwaciwe ku wa 27/06/2022 haburana Ubushinjacyaha na Niyitegeka Augustin, iyo uregwa yafatanwe ingano nini y’ibiyobyabwenge by’urumogi, bigaragaza ko yari agamije kurucuruza cyangwa kurukwirakwiza, aho kurukoresha ku giti cye1. Uwo murongo ninawo wagiye ushingirwaho mu manza zaciwe n’uru Rukiko nk’urubanza RPAA 00392/2023/CA rwaciwe ku wa 28/06/2024 haburana Ubushinjacyaha na Musanganyimpuhwe Félicien (igika cya 16).

1 Amagambo arebana no gufatanwa (avugwa mu gika cya mbere cy’ingingo ya 263), gukora, guhinga, guhindura, gutunda, kubika (avugwa mu gika cya 3 cy’iyo ngingo) agomba kumvikana hakurikijwe ingano y’ibiyobyabwenge n’ikigiye gukoreshwa ibiyobyabwenge uregwa yarafatanwe, yakoze, yahinze, yahinduye, yatunze, yabitse maze byagaragara ko kuri buri gikorwa muri ibyo ikigamijwe ari ukubikoresha ku giti cye (simple drug possession) uregwa agahabwa ibihano bito ariko byagaragara ko ingano y’ibiyobyabwenge yafatanwe ari nini bikaba byashingirwaho hemezwa ko ataribyo gukoresha ku giti cye ahubwo ikigamijwe ari ugucuruza cyangwa gukwirakwiza (drugs trafficking/drug distribution) ibiyobyabwenge uregwa agahabwa igihano kiremereye

## Page 5

[15] Naho Ikibazo cy’uregwa wemereye icyaha mu rwego rw’iperereza, ariko yagera mu Rukiko, akagihakana cyatanzweho umurongo n’Urukiko rw’Ikirenga mu rubanza RPA 0010/ 06/CS - RPA 0011/06/CS - RPA 0012/06/CS, rwaciwe n’Urukiko rw’Ikirenga ku wa 18/07/2008, haburana Ubushinjacyaha na Sgt Ntaganira na bagenzi be, aho rwasobanuye ko umucamanza uburanisha urubanza mu mizi ariwe ureba agaciro aha imvugo y’uwiyemerera icyaha mu rwego rw’iperereza ifite, kabone n’iyo yageze imbere y’Urukiko akayihindura. Uwo murongo ninawo washingiweho mu manza nyinshi zaciwe n’uru Rukiko nk’urubanza RPAA 00085/2023/CA, rwaciwe ku wa 29/05/2024 haburana Ubushinjacyaha na Uwumuremyi Josiane (igika cya 17). [16] Nk’uko bigaragarira mu gika cya 11 cy’urubanza rwajuririwe muri uru Rukiko, mu Bugenzacyaha, Mbarushimana Jackson yemeye icyaha cyo gufatanwa no gucuruza ibiyobyabwenge byo mu bwoko bw’urumogi bingana n’udupfunyika mirongo inani (80 boules) tw’urumogi yaguze n’uwitwa Nshimiyimana Honoré kuri 11.200 Frw yari agiye kurugurisha i Kigali ku bantu batandukanye, ariko abaturange bamufatira mu nzira ku wa 60/10/2019 nk’uko byanashimangiwe n’abatangabuhamya barimo Habimana, Nzakira Emmanuel, Ndagijimana Gasore na Twizerimana, bose bemeje ko aribo bamufatanye urwo rumogi nk’uko byashimangije na raporo y’Inzego z’Ibanze yo ku wa 06/10/2019, ndetse n’inyandikomvugo y’ifatira ry’urwo rumogo yashyizweho umukono na Mbarushimana Jackson yemera ko yafatanwe udupfunyika 80 tw’urumogi. [17] Hashingiwe ku murongo watanzwe n’Urukiko rw’Ikirenga mu rubanza RPA 0010/ 06/CS - RPA 0011/06/CS - RPA 0012/06/CS rwaciwe ku wa 18/07/2008, rw’Ubushinjacyaha na Sgt Ntaganira na bagenzi be no ku bisobanuro byavuzwe mu gika kibanziriza iki, Urukiko rw’Ubujurire rusanga imvugo Mbarushimana Jackson yavugiye mu Bugenzacyaha, aho yemeye ko urumogi yafatanwe rungana n’udupfunyika 80 rwari urwo gucuruza, ikwiye gufatwa nk’ikimenyetso kigaragaza ko yakoze icyaha cyo kubika no gucuruza urumogi nk’uko byanemejwe n’uru Rukiko, kubera ko yayivuze yisanzuye nta gahato ko gukubitwa ashyizweho, kuko uretse no kuba nta n’ikimenyetso abitangira, iyo mvugo ihuje n’ibindi bimenyetso biri muri dosiye birimo imvugo z’abatangabuhamya bamufatanye urwo rumogi nk’uko byavuzwe mu gika kibanziriza iki. [18] Byongeye kandi, hashingiwe ku murongo watanzwe mu rubanza RPAA 00408/2020/CA rwaciwe ku wa 27/06/2022 rwavuzwe haruguru, Urukiko rw’Ubujurire rurasanga ingano y’urumogi rungana n’udupfunyika mirongo inani (80 boules) Mbarushimana Jackson yafatanwe, igaragaza ko yari agamije kurukwirakwiza arucuruza nk’uko yabyiyemereye mu Bugenzacyaha nk’uko byasobanuwe haruguru. [19] Hashingiwe ku bisobanuwe haruguru, Urukiko rw’Ubujurire rurasanga nta kosa Urukiko Rukuru rwakoze mu guhamya Mbarushimana Jackson icyaha cyo kubika no gucuruza urumogi.

2.Kumenya niba Mbarushimana Jackson yakongera kugabanyirizwa ibihano [20] Mbarushimana Jackson n’umwunganira bavuga ko akwiye kongera kugabanyirizwa ibihano kubera yemeye icyaha cyo gufatanwa no kunywa urumogi, agahanishwa igifungo cy’umwaka umwe (1) nk’uko biteganywa n’ingingo ya 263, agika cya 2, y’Itegeko no 68/2018 ryo ku wa 30/08/2018 ritegnya ibyaha n’ibihano muri rusange nk’uko ryahinduwe kugeza ubu.

## Page 6

[21] Uhagarariye Ubushinjacyaha avuga ko Mbarushimana Jackson atakongera kugabanyirizwa ibihano kubera yemeye ko yahanishijwe ibihano bito biteganywa n’amategeko. UKO URUKIKO RUBIBONA [22] ingingo ya 2 y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, iteganya ko Ingingo ya 60 y’Itegeko Nº 68/2018ryo ku wa 30/08/2018 riteganya ibyaha n’ibihano muri rusange, ihinduwe ku buryo bukurikira: “Iyo umucamanza yemeje impamvu nyoroshyacyaha, ashobora kugabanya igihano ku buryo bukurikira: (a) igifungo cya burundu gishobora kugabanywa ariko ntikijye munsi y’igihano cy’igifungo cy’imyaka 15“; “(d) igihano cy’ihazabu gishobora kugabanywa kugeza kuri kimwe cya kane cy’igihano cy’ihazabu gito giteganyirijwe icyaha cyakozwe”. [23] Nk’uko bigaragarira mu gika cya 23 by’urubanza rwajuririwe muri uru Rukiko, n’ubwo Mbarushimana Jackson atemeraga icyaha cyo kubika no gucuruza ibiyobyabwenge byo mu bwoko bw’urumogi (udupfunyika 80), Urukiko Rukuru rwamugabanyirije ibihano kugira ngo ahabwe ubutabera buboneye nk’ubwa bagenzi be, rumuhanisha igifungo cy’imyaka 15 n’ihazabu ingana na 21.000.000Frw, aho kuba igifungo cya burundu n’ihazabu ya 21.000.000Frw yari yahawe ku rwego rwa mbere. [24] Ku birebana n’igihano cy’igifungo, Urukiko rw’Ubujurire rurasanga, mu rubanza rujuririrwa, Urukiko Rukuru rwaragabanyirije Mbarushimana Jackson igihano, rumuhanisha igifungo cy’imyaka 15 nk’uko biteganywa n’ingingo ya 2 y’Itegeko N° 059/2023 ryo ku wa 04/12/2023 ryavuzwe haruguru, bityo akaba atakongera kugabanya igihano mu gihe yabigabanyirijwe bihagije, agahanishwa igihano cy’igifungo gito (minimum) giteganyirijwe icyaha cyo kubika no gucuruza urumogi yahamijwe. [25] Ku birebana n’igihano cy’ihazabu, Urukiko rw’Ubujurire rurasanga, mu rubanza rujuririrwa, Urukiko Rukuru rutaragabanyirije Mbarushimana Jackson igihano cy’ihazabu kandi rwari rwemeje ko akwiye kukigabanyirizwa kugira ngo ahabwe ubutabera buboneye, kuko rwamuhanishije igihano cy’ihazabu kingana na 21.000.000Frw, nyamara ingingo ya 2 agace ka (d) y’Itegeko N° 059/2023 ryo ku wa 04/12/2023 ryavuzwe haruguru, iteganya ko iyo hari impamvu nyoroshyacyaha umucamanza ashobora kugabanyiriza uregwa igihano cy’ihazabu akakigeza kuri kimwe cya kane cy’igihano cy’ihazabu gito giteganyirijwe icyaha cyakozwe. [26] Hashingiwe ku ngingo ya 2 agace ka (d) y’Itegeko N° 059/2023 ryo ku wa 04/12/2023 ryavuzwe haruguru, Urukiko rw’Ubujurire rurasanga Mbarushimana Jackson akwiye kugabanyirizwa igihano cy’ihazabu, agahanishwa ihazabu ingana na miliyoni eshanu (5.000.000 Frw) nk’uko biteganywa n’iyo ngingo kugira ngo ahabwe ubutabera buboneye nk’uko byasobanuwe n’Urukiko Rukuru. [27] Urukiko rw’Ubujurire rurasanga rero igifungo cy’imyaka 15 Mbarushimana Jackson yahanishijwe n’Urukiko Rukuru gikwiye kugumaho hiyongereho n’igihano cy’ihazabu ingana na miliyoni eshanu (5.000.000Frw), aho kuba 21.000.000Frw yaciwe mbere, bityo urubanza rujuririrwa rukaba rugomba guhinduka gusa ku bijyanye n’igihano cy’ihazabu.

## Page 7

III. ICYEMEZO CY’URUKIKO [28] Rwemeje ko ubujurire bwa Mbarushimana Jackson bufite ishingiro kuri bimwe. [29] Ruvuze ko imikirize y’urubanza RPA 00027/2021/HC/RSZ rwaciwe n’Urukiko Rukuru, Urugereko rwa Rusizi, ku wa 28/07/2023, ihindutse gusa ku bijyanye n’igihano cy’ihazabu Mbarushimana Jackson ahanishijwe. [30] Rwemeje ko Mbarushimana Jackson ahanishijwe igifungo cy’imyaka cumi n’itanu (15) n’ihazabu ingana na miliyoni eshanu (5.000.000Frw). [31] Rutegetse ko amagarama y’urubanza aherera ku Isanduku ya Leta.