MUGABO v LABELLE Ellen N’UNDI

# MUGABO v LABELLE Ellen N’UNDI

- Source: Amategeko - Section: Decisions (Judgements) - Date: 2021-03-12 - Case/document no.: RCAA 00009/2020/CA - Collection: Court of Appeal

## Text

## Page 1

MUGABO v LABELLE Ellen n’undi [Rwanda URUKIKO RW’UBUJURIRE – RCAA 00009/2020/CA (Kamere P.J.,) 12Werurwe 2021] Amategeko agenga imiburanishirize y’imanza – imanza mbonezamubano – inyungu mu rubanza – Ikirego cyakirwa mu rukiko iyo urega afite ububasha, inyungu n’ubushobozi byo kurega, keretse igihe itegeko ribiteganya ukundi Incamake y’ikibazo : Uru rubanza rwatangiriye mu Rukiko Rwisumbuye rwa Nyarugenge, Mugabo arega umugore we Labelle Ellen asaba Urukiko kwemeza ko Labelle Christelle umwana w’umugore we, kutandikwa ku mutungo we asangiye na Labelle Ellen, kubera ko yasezeranye na Labelle Ellen ivangamutungo risesuye. Labelle Ellen we avuga ko uwo mutungo wari umwanditseho mbere y’uko asezerana na Mugabo, akaba yari awutungiye umwana we Labelle Christelle yabyaranye n’uwitwa Tahir Hanif, ko kandi mbere yo gusezerana yeretse Mugabo uwo mwana we. Labelle Christelle yagobotse mu rubanza avuga ko mbere y’uko mama we Labelle Ellen asezerana na Mugabo, inzu iburanwa ikomoka ku mafaranga papa we Tahir Hanif yahaye Labelle Ellen. Urukiko rwemeje ko ikirego cya Mugabo gifite ishingiro, ko ikirego cyo kugoboka cya Labelle Christelle nta shingiro gifite, rutegeka ko Labelle Christelle atagomba kwandikwa ku mutungo wa Mugabo na Labelle Ellen. Labelle Christelle na Labelle Ellen ntibishimiye imikirize y’urubanza bajurira mu Rukiko Rukuruibirego byaho bihurizwa hamwe, bose bahuriza ku mpamvu zimwe z’ubujurire aho bavuze ko ikirego cyatanzwe na MUGABO Victor kitagombaga kwakirwa ku rwego rwa mbere kubera ko nta nyungu afite ndetse no kuba Urukiko rwabanje rwarirengagije ibimenyetso. Mugabo yireguye avuga ko ubujurire bwa Labelle Christelle n’ubwa Labelle Ellen nta shingiro bufite, kuko umutungo uburanwa ari uwe n’umugore we Labelle Ellen.Urukiko Rukuru rwaciye urubanza rwemeza ko ikirego cyatanzwe na Mugabo kitagombaga kwakirwa ku rwego rwa mbere kuko nta nyungu yari agifitemo. Mugabo ntiyishimiye imikirize y’urubanza maze arujuririra mu Rukiko rw’Ubujurire, avuga ko impamvu zatumye ajurira ari uko Urukiko Rukuru rwitiranyije ababuranyi rwemeza kutakira ikirego ruvuga ko cyatanzwe na Mugabo ngo kuko nta nyungu yari afite rwirengagije ko Labelle Ellen na Labelle Christelle ari bo bari bajuriye. Labelle Ellen, yasobanuye ko mu gihe umutungo uburanwa wanditse kuri Mugabo na Labelle Ellen nta wundi muntu ushobora kuwandikwaho bose batabyemeye kandi ko kuba umutungo uburanwa wanditse kuri Mugabo n’umugore we atari inyungu zimubera impamvu yo kurega, ko ahubwo ari uburenganzira bwe afite ku mutungo.

## Page 2

Labelle Christelle, yasobanuye ko ikirego Mugabo yatanze asaba ko Labelle Christelle atakwandikwa ku cyangombwa cy’ubutaka buburanwa nta shingiro gifite kuko atagaragaza ko icyo gikorwa cyatangiye gushyirwa mu bikorwa ku buryo yabiregera. Urukiko rwemeje ko, uretse gusa ubwoba bushingiye ku bidashoboka mu mategeko, nta kimenyetso cy’inyungu Mugabo yabashije kugaragaza cyari gutuma ikirego cye cyo kubuza iyandikwa rya Christelle Labelle ku mutungo afatanyije na Labelle Ellen cyakirwa n’Urukiko Rwisumbuye rwa Nyarugenge, bityo ikirego cy’ubujurire bwa Mugabo kikaba nta shingiro gifite. Incamake y’icyemezo: 1. Ikirego cyakirwa mu rukiko iyo urega afite ububasha, inyungu n’ubushobozi byo kurega, keretse igihe itegeko ribiteganya ukundi, bityo kutagaragaza ikimenyetso cy’igikorwa icyo ari cyose cyashingirwaho impungenge zatumye urega atanga ikirego bifatwa ko yagitanze nta nyungu afite. Ikirego cy’ubujurire nta shingiro gifite. Amategeko yashingiweho: Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi ingino ya 3,12 na111 Itegeko Nº 27/2016 ryo ku wa 08/07/2016 rigenga imicungire y’umutungo w’abashyingiranywe, impano n’izungura iningo ya 47 Nta manza zifashishijwe. IMITERERE Y’URUBANZA [1] Uru rubanza rwatangiriye mu Rukiko Rwisumbuye rwa Nyarugenge, Mugabo Victor arega umugore we Labelle Ellen asaba Urukiko kwemeza ko Labelle Christelle atandikwa ku mutungo we asangiye na Labelle Ellen, ubaruye kuri UPI:1/02/13/01/372, uherereye mu Mudugudu wa Gihogere, Akagari ka Nyabisindu, Umurenge wa Remera, Akarere Gasabo, Umujyi wa Kigali, kubera ko yasezeranye na Labelle Ellen ivangamutungo risesuye, ko Labelle Christelle ntaho ahuriye n’uwo mutungo wabo. [2] Labelle Ellen we avuga ko uwo mutungo wari umwanditseho mbere y’uko asezerana na Mugabo Victor, akaba yari awutungiye umwana we Labelle Christelle yabyaranye n’uwitwa Tahir Hanif, ko kandi mbere yo gusezerana yeretse Mugabo Victor uwo mwana we, akanamubwira ko afite inzu yubatswe ku mafaranga ya se w’umwana, bityo ko uwo mwana namara gukura azayimwandikaho kuko bagombaga gusezerana ivangamutungo, maze ngo Mugabo Victor arabyemera, ariko ko ubwo yari yaragiye muri Canada yatunguwe n’uburyo yaje agasanga Mugabo Victor yaramaze kwiyandikisha kuri iyo nzu mu buryo bw’uburiganya nta ruhare Labelle Ellen abigizemo. [3] Labelle Christelle yagobotse mu rubanza avuga ko mbere y’uko mama we Labelle Ellen asezerana na Mugabo Victor, umutungo uvugwa muri uru rubanza ugizwe n'inzu ikomoka ku madolari

## Page 3

y’amanya Canada ibihumbi mirongo itanu (50.000$ Canadien), papa we tahir Hanif yahaye Labelle Ellen, akayakoresha ashaka ikizamutunga, kuko yari yayaherewe kumushakira ibimutunga mu buzima bwe bwa buri munsi no ku bijyanye n'uburezi bwe nk’uko inyandiko ise yanditse ibigaragaza, ko ari muri urwo rwego Labelle Ellen yubatsemo iyo nzu. [4] Ku wa 13/06/2019, mu rubanza RC 00495/2018/TGI/NYGE, Urukiko Rwisumbuye rwa Nyarugenge rwemeje ko ikirego cya Mugabo Victor gifite ishingiro, ko ikirego cyo kugoboka cya Labelle Christelle nta shingiro gifite, rutegeka ko Labelle Christelle atagomba kwandikwa ku mutungo wa Mugabo Victor na Labelle Ellen, ubaruye kuri UPI:1/02/13/01/372 uherereye mu Mudugudu wa Gihogere, Akagari ka Nyabisindu,Umurenge wa Remera, Akarere ka Gasabo, Umujyi wa Kigali, ko kandi ingwate y’amagarama yatanzwe mu rubanza ihwanye n’ibyarukozwemo. [5] Labelle Christelle na Labelle Ellen ntibishimiye imikirize y’urubanza bajurira mu Rukiko Rukuru, ibirego byaho bihurizwa hamwe bihabwa Nº RCA 00323 - 00324/2019/HC/KIG, bose bahuriza ku mpamvu zimwe z’ubujurire aho bavuze ko ikirego cyatanzwe na Mugabo Victor kitagombaga kwakirwa ku rwego rwa mbere kubera ko nta nyungu afite, kuba Urukiko rwarirengagije ko nta kigaragaza ko Mugabo Victor na Labelle Ellen basezeranye ivangamutungo risesuye no kuba Mugabo Victor yariyandikishijeho umutungo uburanwa mu buryo bw’uburiganya urukiko ntirubyiteho. Buri wese kandi yasabye urukiko kugenerwa indishyi z’ikurikiranarubanza n’igihembo cya Avoka. [6] Mugabo Victor yireguye avuga ko ubujurire bwa Labelle Christelle n’ubwa Labelle Ellen nta shingiro bufite, kuko umutungo uburanwa ari uwe n’umugore we Labelle Ellen nk’uko ubanditseho bombi, buri wese akaba awufiteho 50%, ko Labelle Ellen n’umukobwa we Labelle Christelle bashaka kumwambura uwo mutungo, ko kandi indishyi basaba ntaho zishingiye, ko ahubwo ari we ukwiye kuzihabwa. [7] Mu rubanza RCA00323 - 00324/2019/HC/KIG rwaciwe ku wa 18/06/2020, Urukiko Rukuru rwemeje ko ikirego cyatanzwe na MUGABO Victor kitagombaga kwakirwa ku rwego rwa mbere kuko nta nyungu yari agifitemo. Rutegeka ko urubanza RC00495/TGI/NYGE rwajuririwe rwaciwe n’Urukiko Rwisumbuye rwa Nyarugenge ku wa 13/06/2019 ruteshwa agaciro mu ngingo zarwo zose, rutegeka Mugabo Victor guha Labelle Ellen na Labelle Christelle buri wese amafaranga 750.000Frw yose hamwe akaba 1.500.000Frw, no kubasubiza amagarama batanze bajurira. [8] Mugabo Victor ntiyishimiye imikirize y’urubanza maze arujuririra mu Rukiko rw’Ubujurire, ubujurire bwandikwa kuri RCAA00009/2020/CA, avuga ko impamvu zatumye ajurira ari uko Urukiko Rukuru rwitiranyije ababuranyi rwemeza kutakira ikirego [9] ruvuga ko cyatanzwe na Mugabo Victor ngo kuko nta nyungu yari afite rwirengagije ko Labelle Ellen na Labelle Christelle ari bo bari bajuriye; kuba rwarategetse ko urubanza RC00495/TGI/NYGE rwaciwe ku wa 13/06/2019 ruteshwa agaciro mu ngingo zarwo zose rwirengagije ko Mugabo Victor afite uburenganzira bwo kwanga ko Labelle Christelle yandikwa ku mutungo asangiye na Labelle Ellen; kuba Urukiko Rukuru mu bujurire rwaramurenganyije rukamutegeka guha Labelle Ellen na Labelle Christelle buri wese amafaranga 750.000Frw; no kuba Mugabo Victor ataragenewe indishyi yari yasabye ku rwego rwa mbere n’urwa kabiri.

## Page 4

[10] Iburanisha ry’urubanza mu ruhame ryabaye ku wa 24/02/2021, ababuranyi bose bitabye, Mugabo Victor ahagarariwe na Me Katushabe Mary, labelle Ellen yunganiwe na Me Munyemana Gatsimbanyi Pascal, naho Labelle Christelle ahagarariwe na Me Biraro Fischer; urukiko rubanza kubaza amazina nyayo ya Mwiza Ellen ubu witwa Labelle Ellen, asobanura ko yahinduye amazina akitwa Labelle Ellen kandi ko azashyikiriza urukiko icyemezo kibigaragaza, Urukiko rukaba rwaranyuzwe n’ibyo bisobanuro maze rwemera kumuburanisha muri ayo mazina ye mashya. Isomwa ry’urubanza ryashyizwe ku wa 12/03/2021, ari nawo munsi rusomeweho. IBIBAZO BIGIZE URU RUBANZA N’ISESENGURA RYABYO: Ikibazo cyo kumenya niba Urukiko Rukuru rwaritiranyije MUGABO Victor n’ababuranyi bajuriye mu kwemeza kutakira ikirego [11] Nyuma yo gusomera neza mu iburanisha icyemezo cy’Urukiko mu rubanza rwajuririwe, Me Katushabe Mary, uhagarariye Mugabo Victor, yahise avuga ko aretse impamvu y’ubujurire irebana no kwitiranya ababuranyi byakozwe n’Urukiko Rukuru, abaregwa nabo bakabimwemerera, Urukiko narwo rwemeje ko iyo mpamvu y’ubujurire ihita ivanwa mu byo rugomba kuzasuzuma. Kumenya niba Urukiko Rukuru rwarirengagije ko MUGABO Victor yari afite inyungu zatuma atanga ikirego asaba ko LABELLE Christelle atandikwa ku mutungo MUGABO Victor asangiye na LABELLE Ellen. [12] Mugabo Victor avuga ko yashakanye na Labelle Ellen bakavanga umutungo harimo n’inzu iburanwa ibaruye kuri UPI:1/02/13/01/372, ikaba ibabaruyeho bombi nk’abawusangiye nk’uko bigaragazwa n’icyemezo cy’ibaruwa yo ku wa 10/05/2019 ihamya uwanditswe ku butaka buburanwa yanditswe n’Umubitsi w’impapurompamo z’ubutaka. Akomeza avuga ko mu gace ka 6 k’urubanza RCA00323 - 00324/2019/HC/KIG rujuririrwa, urukiko rwanze kwakira ikirego cye gisaba kutandika ku mutungo we Labelle Christelle ngo kuko umwanditseho kandi ngo nta cyemezo cy’ubuyobozi cyangwa urukiko cyatesheje agaciro uburenganzira bwe bushingiye ku kuba yanditse kuri uwo mutungo we na Labelle Ellen, ko rwirengagije inyandiko y’Ikigo Gishinzwe Imicungire n’imikoreshereze y’ubutaka mu Rwanda yo ku wa 5/4/2018 cyamwandikiye kimumenyesha ko nadatanga ikirego mu rukiko mu gihe kingana n’ukwezi kumwe itambama ryanditswe ku mutungo uburanwa rizavanwaho. Akomeza avuga ko ibyo byerekana ko mu gihe itambama ryari kuba rivuyeho Labelle Christelle yari kwandikwa ku mutungo kandi Mugabo Victor atabishaka, kuko iyo umwandikwaho byari kubangamira uburenganzira bwe. Asoza asaba ko ikirego cye cyakirwa kigasuzumwa, ngo kuko bitagenze bityo itambamira mutungo ryavaho hanyuma Labelle Christelle akandikwa ku mutungo w’abashakanye kandi atari umwe muri bo. [13] Me Munyemana Gatsimbanyi Pascal, wunganira Labelle Ellen, yasobanuye ko mu gihe umutungo uburanwa wanditse kuri Mugabo Victor na Labelle Ellen nta wundi muntu ushobora kuwandikwaho bose batabyemeye kandi ko kuba umutungo uburanwa wanditse kuri Mugabo Victor n’umugore we atari inyungu zimubera impamvu yo kurega, ko ahubwo ari uburenganzira bwe afite ku mutungo. Akomeza avuga ko kuba yaragize impungenge z’uko Labelle Christelle azandikwa ku mutungo nta shingiro bifite kuko impungenge zitaregerwa, ndetse akaba atanagaragaza ikimenyetso

## Page 5

cy’uko we n’umugore we baba barigeze bandikira Ikigo Gishinzwe Imicungire n’imikoreshereze y’ubutaka mu Rwanda basaba ko Labelle Christelle yandikwa ku mutungo basangiye. [14] Ku bijyanye n’ikimenyetso cy’ibaruwa yo ku wa 05/04/2018 yandikiwe n’Ikigo Gishinzwe Imicungire n’imikoreshereze y’ubutaka mu Rwanda, Me Munyemana Gatsimbanyi Pascal avuga ko yayandikiwe hashingiwe ku busabe yashyikirije Ikigo Gishinzwe Imicungire n’imikoreshereze y’ubutaka mu Rwanda asaba gushyira itambama ku mutungo uburanwa, asobanura ko yari yarumvikanye n’umugore we Labelle Ellen ko Labelle Christelle yandikwa ku cyangombwa cy’uwo mutungo, ariko ko asaba ko atandikwaho kubera amakimbirane yagiranye n’umugore we; bityo ko kuba ibyo yari yarumvikanye n’umugore we bitarakozwe cyangwa se ngo agaragaze ko byatangiye gukorwa hakaba nta mpamvu ihari igaragaza inyungu yari gutuma atanga ikirego. [15] Me Biraro Fischer, uhagarariye Labelle Christelle, yasobanuye ko ikirego Mugabo Victor yatanze asaba ko Labelle Christelle atakwandikwa ku cyangombwa cy’ubutaka buburanwa nta shingiro gifite kuko atagaragaza ko icyo gikorwa cyatangiye gushyirwa mu bikorwa ku buryo yabiregera, kandi ko Mugabo Victor na Labelle Ellen batigeze bandikira Ikigo Gishinzwe Imicungire n’imikoreshereze y’ubutaka mu Rwanda basaba ko Labelle Christelle yandikwa ku mutungo uburanwa. UKO URUKIKO RUBIBONA [16] Ingingo ya 12 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira: “Urega agomba kugaragaza ibimenyetso by’ibyo aregera, kandi iyo abibuze uwarezwe aratsinda”. [17] Ingingo ya 3 igika cya 1 y’Itegeko Nº 22/2018 ryo ku wa 29/04/2018 ryavuzwe haruguru iteganya ibikurikira: ‘’Ikirego cyakirwa mu rukiko iyo urega afite ububasha, inyungu n’ubushobozi byo kurega, keretse igihe itegeko ribiteganya ukundi: [18] Ingingo ya 47 y’Itegeko Nº 27/2016 ryo ku wa 08/07/2016 rigenga imicungire y’umutungo w’abashyingiranywe, impano n’izungura iteganya ibikurikira: “Mu gihe cy’ivangamutungo rusange cyangwa ivangamutungo w’umuhahano, impano yose y’ikintu kivuye mu mutungo w’umuryago itanzwe n’umwe mu bashyingiranywe igomba kubanza kwemezwa n’uwo bashyingiranywe. Ni nako bigenda mu gihe cyo kwemera impano”. [19] Dosiye y’urubanza igaragaramo icyemezo cy’inkondabutaka (certificate of freehold title), ibaruwa yo ku wa 10/05/2019 n’ibaruwa yo ku wa 10/04/2019, byose bigaragaza ko umutungo ubaruye kuri UPI:1/02/13/01/372 wanditse kuri Mugabo Victor na Labelle Ellen. [20] Imikirize y’urubanza RCA00323- 00324/2019/HC/KIG rujuririrwa igaragaza ko Urukiko Rukuru rwemeje ko Mugabo Victor nta nyungu yari afite zo gutanga ikirego kigamije kwanga ko Labelle Christelle yandikwa ku mutungo uburanwa hashingiwe ku mpamvu y’uko Mugabo Victor yanditswe ku mutungo aregera nka nyir’umutungo asangiye n’umugore we, akaba atagaragaza icyemezo cy’ubuyobozi cyangwa cy’urukiko cyatesheje agaciro uburenganzira bwe afite ku mutungo.

## Page 6

[21] Uru Rukiko rurasanga nk’uko Urukiko Rukuru rwabibonye, Mugabo Victor nta nyungu yari afite zo gutanga ikirego asaba ko Labelle Christelle atandikwa ku mutungo ibimenyetso biri muri dosiye byavuzwe haruguru bigaragaza ko asangiye n’umugore we, kuko atagaragaza ikimenyetso cy’igikorwa icyo ari cyose cyashingirwaho impungenge zatumye arega, cyane cyane ko igikorwa cy’undi muntu cyo kwiyandikisha ku butaka busanzwe bwanditsweho abashakanye bombi kidashoboka mu gihe abashakanye bombi batabanje kubyemeranwaho nk’uko biteganywa n’ingingo ya 47 y’Itegeko Nº 27/2016 ryo ku wa 08/07/2016 rigenga imicungire y’umutungo w’abashyingiranywe, impano n’izungura yibukijwe haruguru, cyangwa se bishingiye ku cyemezo cy’urukiko [22] Urukiko rurasanga ibivugwa na Me Katushabe Mary uhagarariye Mugabo Victor ko bagize impungenge zishingiye ku ibaruwa yo ku wa 05/04/2018 yandikiwe n’Umuyobozi w’Ikigo Gishinzwe imicungire n’imikoreshereze y’ubutaka mu Rwanda, bituma bihutira gutanga ikirego mu Rukiko byaratewe no kuba Mugabo Victor ubwe yari yarandikiye icyo Kigo ku wa 26/02/2018 asaba gutambamira ihererekanya ry’umutungo ubaruye kuri UPI: 1/02/13/01/372 aho yasobanuraga ko Labelle Christelle atandikwa ku mutungo nk’uko yari yabyumvikanyeho na Labelle Ellen mbere. Iki Kigo rero kikaba cyaramusubije mu buryo gisanzwe gisubiza uwo ari we wese ucyandikiye atambamira ihererekanya ry’umutungo utimukanwa, ariko ntabwo ari iki Kigo cyafatwa nk’icyateye Mugabo Victor impungenge ashingiraho inyungu zo kurega, kuko izo mpungenge ahubwo yazigize mbere ajya gutambamira ihererekanya ry’umutungo kandi nta gikorwa na kimwe abasha kugaragaza cy’uko iryo herererekanya rishoboka atarabanje kuryumvikanaho n’uwo bashakanye kandi bombi banditse kuri uwo mutungo nk’abawusangiye. [23] Urukiko rushingiye ku bimaze gusobanurwa haruguru no ku ngingo z’amategeko cyane cyane iya 12 n’iya 3 z’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi zibukijwe haruguru rukaba narwo rusanga, uretse gusa ubwoba bushingiye ku bidashoboka mu mategeko, nta kimenyetso cy’inyungu Mugabo Victor yabashije kugaragaza cyari gutuma ikirego cye cyo kubuza iyandikwa rya Christelle Labelle cyakirwa n’Urukiko Rwisumbuye rwa Nyarugenge, bityo ikirego cy’ubujurire bwa Mugabo Victor kikaba nta shingiro gifite. Ikibazo cy’amafaranga y’ibihembo bya Avoka, ay’ikurikiranarubanza n’indishyi asabwa n’ababuranyi [24] Me Katushabe Mary asaba urukiko ko Labelle Christelle akwiye guha Mugabo Victor 1.000.000Frw y’indishyi z’akababaro nk’uko bazisabye mu Rukiko Rukuru kubera ko yagobotse mu rubanza rutamurebaga, na 1.500.000Frw y’ikurikiranarubanza kuri uru rwego;naho Labelle Ellen agatanga 1.500.000Frw y’ikurikiranarubanza na 1.500.000Frw y’igihembo cya Avoka n’amagarama y’urubanza batahawe mu Rukiko Rukuru. [25] Me Munyemana Gatsimbanyi Pascal asaba Urukiko ko nirusanga Mugabo Victor nta nyungu yari afite yo gutanga ikirego azategekwa guha Labelle Ellen 2.000.000Frw y’igihembo cya Avoka na 300.000 Frw y’ikurikiranarubanza. [26] Me Biraro Fischer yavuze ko indishyi zasabwe na Me Munyemana Gatsimbanyi Pascal, Labelle Ellen azisangiye na Labelle Christelle nk’uko bari bazisabye mu Rukiko Rukuru bashingiye ku ngingo

## Page 7

ya 152 y'Itegeko N° 22/2018 ryo ku wa 29/04/2018 ryerekeye imiburanishirize y’imanza z’imbonezamubano iz’ubucuruzi, iz’umurimo n’iz’ubutegetsi. [27] Me Katushabe Mary yiregura avuga ko Labelle Christelle nta ndishyi akwiye kuko Mugabo Victor atigeze amurega mu rubanza ndetse nawe ubwe akaba yasobanuye ko atigeze asaba kwandikwaho umutungo, ko kuba yaragobotse mu rubanza yabikoze ku mpamvu ze bwite. UKO RUKIKO RUBIBONA [28] Ingingo ya 111 y’Itegeko Nº 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira: “Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. [29] Dosiye y’urubanza igaragaza ko Urukiko Rukuru rutageneye indishyi Mugabo Victor kubera ko rwasanze ikirego cye kitaragombaga kwakirwa ku rwego rwa mbere, bikaba byaratumye ashora abandi baburanyi mu manza zitari ngombwa, ahubwo indishyi zigenerwa Labelle Ellen wari warezwe na Labelle Christelle wari warinjiye mu rubanza agobotse; Ibi uru Rukiko rukaba rusanga ari ko bikomeje kumera no muri iki kirego cy’ubujurire bwa kabiri kubera ko Mugabo Victor akomeje gutsindwa ku kiburanwa cy’iremezo mu gihe ubujurire bwe bwatumye Labelle Ellen na Labelle Christelle bakomeza gutakariza amafaranga mu guhemba aba Avoka no gukurikirana urubanza. [30] Urukiko rurasanga amafaranga y’igihembo cya Avoka, ay’ikurikiranarubanza n’indishyi Mugabo Victor asaba ntayo akwiye guhabwa kuko ikirego cye cy’iremezo nta shingiro gifite nk’uko byasobanuwe haruguru. Urukiko rurasanga ahubwo amafaranga y’ikurikiranarubanza n’igihembo cya Avoka labelle Ellen na Labelle Christelle basaba afite ishingiro, kuko bashowe mu rubanza, ariko akagenwa mu bushishozi bw’Urukiko kuko ayo basaba ari menshi; bityo Mugabo Victor akaba akwiye kubaha amafaranga ibihumbi magana abiri (200.000Frw) y’ikurikiranarubanza n’amafaranga 1.000.000Frw y’igihembo cya Avoka kuri uru rwego. ICYEMEZO CY’URUKIKO [31] Rwemeje ko ikirego cy’ubujurire cyatanzwe na Mugabo Victor nta shingiro gifite; [32] Rwemeje ko urubanza RCA00323-00324/2019/HC/KIG rwaciwe n’Urukiko Rukuru ku wa 18/06/2020 rudahindutse mu ngingo zarwo zose; [33] Rutegetse Mugabo Victor guha Labelle Ellen na Labelle Christelle bafatanyije amafaranga 200.000Frw y’ikurikiranarubanza na 1.000.000Frw y’igihembo cy’aba Avoka kuri uru rwego; [34] Ruvuze ko amagarama y’urubanza ahwanye n’ibyakozwe muri uru rubanza.