UBUSHINJACYAHA v. MUGENZI

# UBUSHINJACYAHA v. MUGENZI

- Source: Amategeko - Section: Decisions (Judgements) - Date: 2022-09-16 - Case/document no.: RPAA 00009/2021/CA - Collection: Court of Appeal

## Text

## Page 1

UBUSHINJACYAHA v. MUGENZI [Rwanda URUKIKO RW’UBUJURIRE - RPAA 00009/2021/CA (Kanyange, P.J.) 16 Nzeri 2022] Amategeko agenga imiburanishirize y’imanza z’inshinjabyaha – Kwemera icyaha bikorewe munzego z’iperereza cyangwa mu rukiko – Umucamanza uburanisha urubanza ari we uha agaciro ukuri k’ukwemera icyaha kwakozwe n’uregwa igihe cy’iperereza nubwo yagera mu rukiko akisubiraho. Amategeko agenga imanza nshinjabyaha – Icyaha cya gusambanya umwana – Bishoboka ko akarangabusugi kaba kazima ariko ntibikureho kuba hari ibikorwa umwana yakorewe hagamijwe kwishimisha. Incamake y’icyibazo: Mugenzi Samuel yarezwe n’Ubushinjacyaha mu Rukiko Rwisumbuye rwa Ngoma, kuba ku wa 03/10/2017 yarasambanyije umwana w’umukobwa w’imyaka icumi (10) y’amavuko bikaba byaramenyekanye ubwo babonaga uwo mwana agenda nabi, bamubajije avuga ko ari Mugenzi Samuel wamusambanyije ndetse ko atari ubwa mbere yari amusambanyije. Mu ibazwa rye mu Bugenzacyaha, yemeye ko yasambanyije uwo mwana anasobanura ko yamusambanyije ubwo iwabo bari bagiye ku isoko, ariko mu Bushinjacyaha ahakana icyaha ndetse no mu Rukiko Rwisumbuye rwa Ngoma aburana ahakana icyaha, avuga ko byapanzwe na muka se akaba nyina w’uwo mwana kuko bapfa ko yashatse kugurisha imitungo akamwangira. Urukiko rwemeje ko Mugenzi Samuel ahamwa n’icyaha cyo gusambanya umwana, rumuhanisha igifungo cy’imyaka 20. Mugenzi ntiyishimiye icyo cyemezo yacyijuririye mu Rukiko Rukuru, Urugereko rwa Rwamagana, avuga ko yahamijwe icyaha atakoze, ko ahubwo ari akagambane ka muka se, ko kandi ibyo yemeye mu Bugenzacyaha yabitewe n’inkoni yakubitwaga ariko Urukiko Rukuru rwanzura ko imikirize y’urubanza rwajuririwe idahindutse. Mugenzi yajuririye Urukiko rw’Ubujurire avuga ko asaba kurenganurwa kuko yahamijwe icyaha hashingiwe ku bimenyetso bishidikanywaho, cyane cyane ko igihe bivugwa ko icyaha cyakorewe atabaga. Anavuga ko inkiko zabanje zitahaye agaciro ibyo yazisobanuriye ko mu Bugenzacyaha yemeye icyaha kubera inkoni yakubiswe, ko yabanje gukubitwa n’umusirikare wari ku irondo (patrouille), nyuma bamujyana muri polisi bamuzanira ibintu byo gusinya, yanze bamubaza niba ashaka kongera gukubitwa, aremera arasinya, ko n’ibyo umwana yavuze ari ukubeshya. Ku birebana no kwemera icyaha mu rwego rw’Ubugenzacyaha, Uregwa avuga ko hashingiwe ku ngingo ya 110 y’Itegeko ryerekeye ibimenyetso mu manza n’itangwa ryabyo, uko kwemera kutahabwa agaciro kuko ukwemera ari ugukorewe mu Rukiko. Ubushinjacyaha buvuga ko hashingiwe ku ngingo ya 183 y’Itegeko ryerekeye imiburanishirize y’imanza z’inshinjabyaha, Mugenzi Samuel yagombye kugaragaza inenge ziri mu rubanza yajuririye kuko atajuririye urubanza rwaciwe n’Urukiko Rwisumbuye rwa Ngoma. Naho ku birebana no kwemera kwa Mugenzi Samuel mu Bugenzacyaha, uhagarariye Ubushinjacyaha avuga ko nta kimenyetso yagaragaje cy’uko yemeye bitewe n’inkoni yakubiswe, usibye ko imbere y’uru Rukiko avuga noneho ko yakubiswe n’abasirikare, hakibazwa aho abasirikare bahuriye n’urwego rw’Ubugenzacyaha. Incamake y’icyemezo: Ibivugwa mu ngingo ya 110 y’Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ni ibisobanuro byo kwemera gukorewe mu rukiko n’ingaruka zabyo, ntabwo ivuga ko ukwemera icyaha kudakorewe mu Rukiko kudahabwa agaciro. Bityo ntacyari kubuza Urukiko gusuzuma ukwemera icyaha Mugenzi Samuel yakoreye mu Bugenzacyaha. Ubujurire bwa nta shingiro bufite.

## Page 2

Amategeko yakoreshejwe: Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha, ingingo ya 107, igika cya 3. Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, ingingo ya 3, igika cya mbere. Imanza zashingiweho: Urubanza nº RS/INJUST/RP 00003/2019/SC; Ubushinjacyaha v Niyonsaba rwaciwe n’Urukiko rw’Ikirenga ku wa 28/01/2022 Urubanza I. IMITERERE Y’URUBANZA [1] Mugenzi Samuel yarezwe n’Ubushinjacyaha mu Rukiko Rwisumbuye rwa Ngoma, kuba ku wa 03/10/2017 yarasambanyije umwana w’umukobwa w’imyaka icumi (10) y’amavuko wahawe izina rya I.P, bikaba byaramenyekanye ubwo babonaga uwo mwana agenda nabi, bamubajije avuga ko ari Mugenzi Samuel wamusambanyije ndetse ko atari ubwa mbere yari amusambanyije. [2] Mu ibazwa rya Mugenzi Samuel mu Bugenzacyaha, yemeye ko yasambanyije uwo mwana anasobanura ko yamusambanyije ubwo iwabo bari bagiye ku isoko, ariko mu Bushinjacyaha ahakana icyaha ndetse no mu Rukiko Rwisumbuye rwa Ngoma aburana ahakana icyaha, avuga ko byapanzwe na muka se akaba nyina w’uwo mwana kuko bapfa ko yashatse kugurisha imitungo akamwangira. [3] Urukiko rwaciye urubanza nº RP 00556/2018/TGI/NGOMA ku wa 28/09/2018, rwemeza ko Mugenzi Samuel ahamwa n’icyaha cyo gusambanya umwana, rumuhanisha igifungo cy’imyaka 20. Icyo cyemezo rwaragishingiye ku kwemera icyaha yakoreye mu Bugenzacyaha nubwo yageze mu rukiko agahakana, kuko nta bimenyetso yatanze by’uko yacyemejwe n’inkoni, ibyo rubishingira ku nyandiko z’abahanga mu mategeko no ku rubanza rwaciwe n’Urukiko rw’Ikirenga. Rwasanze kandi ibyo Mugenzi Samuel yemeye mu Bugenzacyaha bihura n’imvugo y’umwana ifatwa nk’ikimenyetso gishinja, hakaba n’imvugo y’umutangabuhamya witwa Ndateba Faustin, na raporo ya muganga ikaba ivuga ko igitsina cy’umwana gifite ibimenyetso byo kuba yarasambanyijwe. Rwasanze kuba ari ubwa mbere akora icyaha atahanishwa igifungo cya burundu y’umwihariko, rumuhanisha igifungo cy’imyaka 20. [4] Mugenzi Samuel yajuririye urwo rubanza mu Rukiko Rukuru, Urugereko rwa Rwamagana, avuga ko yahamijwe icyaha atakoze, ko ahubwo ari akagambane ka muka se, ko kandi ibyo yemeye mu Bugenzacyaha yabitewe n’inkoni yakubitwaga, anavuga ko Urukiko rwahaye agaciro imvugo ya Ndateba Faustin (umukuru w’umudugudu) kandi bafite ibyo bapfa. [5] Mu rubanza nº RPA 00643/2018/HC/RWG rwaciwe ku wa 25/06/2020, Urukiko rwasanze amakimbirane Mugenzi Samuel avuga ko afitanye na muka se ari nawe nyina w’umwana wasambanyijwe atayatangira ibimenyetso, kuko icyaha cyabaye aba iwabo, bimenyeshwa inzego z’ibanze ariko ntiyazigaragariza ayo makimbirane, ko n’ibyo avuga ko yemeye icyaha kubere inkoni atari byo, kuko ibyo yemeye bihura n’ibindi bimenyetso bimushinja birimo imvugo y’umwana n’iya nyina, raporo y’inzego z’ibanze hamwe na raporo ya muganga, maze rwanzura ko imikirize y’urubanza rwajuririwe idahindutse. [6] Mugenzi Samuel yajuririye Urukiko rw’Ubujurire avuga ko asaba kurenganurwa kuko yahamijwe icyaha hashingiwe ku bimenyetso bishidikanywaho, cyane cyane ko igihe bivugwa ko

## Page 3

icyaha cyakorewe atabaga iwabo kuko yahavuye mu mwaka wa 2015, ko kandi yasabye ko nawe yasuzumwa kugira ngo hamenyekane niba koko ari we wasambanyije I.P ariko ntibyakorwa. [7] Urubanza rwaburanishijwe mu ruhame ku wa 05/07/2022, Mugenzi Samuel yunganirwa na Me Rugeyo Jean, Ubushinjacyaha buhagarariwe na Habimana Jean Cabin, Umushinjacyaha ku rwego rw’igihugu. Muri iryo buranisha Urukiko rwasanze ari ngombwa kumva Busizori Cyprien (se wa Mugenzi) Mukantwari Vestine (muka se wa Mugenzi) hamwe na Ndateba Faustin, maze iburanisha ryimurirwa ku wa 25/07/2022. [8] Kuri uwo munsi Mugenzi Samuel yitabye Urukiko yunganiwe nka mbare, Ubushinjacyaha nabwo buhagarariwe nka mbere, hanitaba Busizori na Mukantwari Vestine bonyine aba ari bo Urukiko rwumva kuko Ndateba Faustin atabashije kuboneka. II. IKIBAZO KIRI MU RUBANZA N’ISESENGURWA RYACYO  Kumenya niba Mugenzi Samuel yarahamijwe icyaha hashingiwe ku bimenyetso bishidikanywaho [9] Mugenzi Samuel avuga ibimenyetso byashingiweho mu kumuhamya icyaha bishidikanywaho, kuko nta muntu wamufashe asambanya I.P, ko n’uwo mwana ntaho bari guhurira kuko babanaga mbere akiri umunyeshuri mu myaka ya 2010-2015, igihe bivugwa ko icyaha cyakorewe akaba atarabaga iwabo kuko yari yaragiye gukodesha k’umugabo witwa Foyi amukorera uturimo two mu rugo, ko nubwo uwo mwana ntacyo bari basanzwe bapfa, ashobora kuba yarabishyizwemo na nyina kuko yari yaravuze ko ntacyo avuze, ko yanamukuraho, ari bwo yahise afata icyemezo cyo kuhava; ko ikibazo cy’amakimbirane yari afitanye na muka se yakigejeje ku mukuru w’Umudugudu ariko amubwira ko atagomba kugira icyo amubwira atamuhaye amafaranga, ko kandi nta handi yajya atamunyuzeho. Avuga kandi ko uwo mukuru w’Umudugdu bari basanzwe bafite ibyo bapfa bishingiye ku kuba yaramuciye amafaranga kubera kutajya mu muganda, ntiyayamuha, naho umujyanama w’ubuzima bakaba barapfaga ko yamusabye ko baryamana akabyanga. [10] Avuga kandi ko yasabye ko yapimwa kugira ngo hamenyekane niba koko ari we wasambanyije uwo mwana ariko ntibyakorwa, ko anashidikanya kuri muganga wasuzumye umwana kuko muka se ashobora kuba yaramugezeho. Anavuga ko inkiko zitahaye agaciro ibyo yazisobanuriye ko mu Bugenzacyaha yemeye icyaha kubera inkoni yakubiswe, ko yabanje gukubitwa n’umusirikare wari ku irondo (patrouille), nyuma bamujyana muri polisi bamuzanira ibintu byo gusinya, yanze bamubaza niba ashaka kongera gukubitwa, aremera arasinya, ko n’ibyo umwana yavuze ari ukubeshya. [11] Me Rugeyo Jean avuga ko ubuhamya bw’umwana bivugwa ko yasambanyijwe bushidikanywaho, kuko yavuze ko yasambanyijwe inshuro 2, ko inshuro ya mbere iwabo bari baryamye naho iya kabiri bagiye guhinga, ariko bikaba bitumvikana uburyo umwana wo mu kigero cye yasambanywa n’umuntu mukuru ntatake kandi ababyeyi baryamye. Na none kandi umwana yavuze ko ku nshuro ya kabiri ababyeyi be bari bagiye guhinga mu gihe Mugenzi Samuel yavugiye mu Bugenzacyaha ko bari bagiye ku isoko. [12] Ku birebana no kwemera icyaha mu rwego rw’Ubugenzacyaha, Me Rugeyo Jean avuga ko hashingiwe ku ngingo ya 110 y’Itegeko ryerekeye ibimenyetso mu manza n’itangwa ryabyo, uko kwemera kutahabwa agaciro kuko ukwemera ari ugukorewe mu Rukiko. [13] Avuga kandi ko na raporo ya muganga ishidikanywaho, kuko itagaragaza ko akarangabusugi kangiritse mu gihe umwana avuga ko Mugenzi Samuel yamusambanyije amuri hejuru.

## Page 4

[14] Na none kandi, ngo imvugo ya nyina w’umwana ishidikanywaho kuko mu Bugenzacyaha yavuze ko atamenye igihe umwana yasambanyirijwe, ko yamubonye ku wa 08/10/2018 agenda nabi nyamara yarasambanyijwe ku wa 03/10/2018, hakibazwa uburyo nyuma y’iminsi itanu ari bwo ikibazo cyari kugaragara kandi ahubwo yari kuba arimo gukira. [15] Ku birebana na Ndateba Faustin washingiweho nk’umutangabuhamya, Me Rugeyo Jean avuga ko mu Bugenzacyaha uwo mutangabuhamya yavuze ko yamenye ikibazo ku wa 09/10/2018 akibwiwe na nyina w’umwana, bivuze rero ko nawe ari ibyo yabwiwe, naho ibikubiye muri raporo y’Akagari bikaba bigaragara ko ari ibyavuzwe na Nyirabahire. [16] Uhagarariye Ubushinjacyaha avuga ko hashingiwe ku ngingo ya 183 y’Itegeko ryerekeye imiburanishirize y’imanza z’inshinjabyaha, Mugenzi Samuel yagombye kugaragaza inenge ziri mu rubanza yajuririye kuko atajuririye urubanza rwaciwe n’Urukiko Rwisumbuye rwa Ngoma. [17] Ku birebana no kwemera kwa Mugenzi Samuel mu Bugenzacyaha, uhagarariye Ubushinjacyaha avuga ko nta kimenyetso yagaragaje cy’uko yemeye bitewe n’inkoni yakubiswe, usibye ko imbere y’uru Rukiko avuga noneho ko yakubiswe n’abasirikare, hakibazwa aho abasirikare bahuriye n’urwego rw’Ubugenzacyaha. Avuga kandi ko n’amakimbirane Mugenzi Samuel avuga ko afitanye na muka se, nta kimenyetso ayagaragariza, kimwe nuko atagaragaza ikimenyetso cy’amakimbirane yari afitanye n’umuyobozi w’Umudugudu, Ndateba Faustin, ko kandi nubwo banenga raporo y’Akagari, bigaragara ko Umuyobozi wako yabajije Mugenzi Samuel niba ibyo umwana amushinja ari byo, undi arabyemera. [18] Ku birebana n’igihe icyaha cyakorewe, uhagarariye Ubushinjacyaha avuga ko umwana yasambanyijwe bwa nyuma ku wa 08/10/2018, ajyanwa kwa muganga ku wa 09/10/2018, ko iby’itariki ya 03/10/2018 bivugwa n’uwunganira Mugenzi Samuel, batabizi, naho raporo ya muganga ikaba isobanutse, kuko kuba akarangabusugi katarashwanyaguritse (déchiqueté), bitavuze ko umwana atasambanyijwe, kuko hari ibindi bimenyetso muganga yabonye ku gitsina cy’umwana bigaragaza ko yasambanyijwe. [19] Ku kibazo cyo kumenya igihe Mugenzi Samuel yaviriye mu rugo, Mukantwari Vestine yavuze ko hari hashize nk’icyumweru ahavuye ajya kuba kwa Juri, naho Busizori avuga ko hari hashize nk’amezi ane. Bombi bahuriza ku kuba nta makimbirane Mugenzi Samuel yari afitanye na Mukantwari Samuel, uyu kandi akaba yaranabanje kubwira Urukiko ko yabajije umwana niba Mugenzi Samuel yaramuhohoteye aramuhakanira, ariko nyuma avuga ko umwana yamubwiye ko yamuhohoteye bari mu rugo. UKO URUKIKO RUBIBONA [20] Ingingo ya 3, igika cya mbre, y’Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, iteganya ko ‘’ Buri muburanyi agomba kugaragaza ukuri kw’ibyo aburana’’, naho iya 107, igika cya 3, y’Itegeko nº 027/2019 ryo ku wa 19/09/2019 ryerekeye imiburanishirize y’imanza z’inshinjabyaha igateganya ko “ Iyo icyaha cyabonewe ibimenyetso bikigaragaza, ugikurikiranyweho cyangwa umwunganira ashobora kwerekana impamvu zose yireguza, zerekana ko ikirego kitakwemerwa, zihamya ko icyo aregwa atari icyaha cyangwa se ko ari umwere n’izindi mpamvu zose zivuguruza izimuhamya icyo cyaha’’. [21] Nk’uko byibukijwe mu miterere y’uru rubanza, Urukiko Rukuru, urugereko rwa Nyanza, rwagumishijeho imikirize y’urubanza rwaciwe ku rwego rwa mbere kuko narwo rwasanze amakimbirane Mugenzi Samuel avuga ko afitanye na muka se (akaba nyina w’umwana wasambanyijwe) atayatangira ibimenyetso, ko icyaha cyabaye aba iwabo, bimenyeshwa inzego z’ibanze ariko ntiyazigaragariza ayo makimbirane, ko n’ibyo avuga ko yemeye icyaha kubera inkoni atari byo,

## Page 5

kuko ibyo yemeye bihura n’ibindi bimenyetso bimushinja birimo imvugo y’umwana n’iya nyina, raporo y’inzego z’ibanze hamwe na raporo ya muganga. Mu bujurire bwa kabiri n’ubundi Mugenzi Samuel akomeza kunenga ibimemyetso byashingiweho avuga ko bishidikanywaho. [22] Ku kibazo cy’uko Urukiko rutahaye agaciro ibyo Mugenzi Samuel yarusobanuriye by’uko yemeye icyaha kubera inkoni yakubiswe, Urukiko rurasanga icyo kibazo yarakiburanishije mu Rukiko Rukuru, rusanga nta bimenyetso yagaragaje by’uko yakubiswe, ko ahubwo ibyo yemeye mu Bugenzacyaha bihura n’ibindi bimenyetso Ubushinjacyaha bwatanze birimo imvugo y’umwana n’iya nyiina, raporo ya muganga wasuzumye umwana hamwe na raporo y’inzego z’ibanze. Urukiko rukaba rusanga rero Urukiko Rukuru rutarirengagije icyo kibazo nk’uko Mugenzi Samuel abivuga ahubwo rwaragisuzumye rutanga ibisobanuro kandi usibye kongera kukigarura muri ubu bujurire, ntacyo anenga ibyo bisobanuro. Usibye kandi ibyo bisobanuro, binagaragara ko ubwo Mugenzi Samuel yaburanaga iby’ifungwa by’agateganyo, yabajijwe impamvu yemeye icyaha mu Bugenzacyaha avuga ko byatewe n’umuntu bari bafunganywe wamuteye ubwoba amubwira ko bazamwica, bivuze rero ko ibyo kuba yarakubitiwe mu Bugenzacyaha ari uburyo bwo guhunga ibyo yemeye. [23] Ku bivugwa na Me Rugeyo Jean ko ukwemera Mugenzi Samuel yakoreye mu Bugenzacyaha kutahabwa agaciro kuko hemerwa gusa ukwemera kwakorewe mu Rukiko hashingiwe ku ngingo ya 110 y’Itegeko nº 15/2004 ryo ku wa 12/06/2004 ryerekeye ibimenyetso mu manza n’itangwa ryabyo, Urukiko rurasanga nta shigiro bifite, kuko icyo iyo ngingo ivuga ari igisobanuro cyo kwemera gukorewe mu rukiko n’ingaruka zabyo, ikaba itavuga ko ukwemera kudakorewe mu Rukiko kudahabwa agaciro, cyane cyane ko ingingo ya 109 y’iryo tegeko ivuga ukwemera kudakorewe mu Rukiko. [24] Urukiko rurasanga rero nk’uko byasobanuwe mu rubanza rujuririrwa ndetse n’urwarubanjirije hifashishijwe ibyemejwe n’Urukiko rw’Ikirenga mu rubanza RPAA 0042/2007/CS narwo rwashingiye ku nyandiko z’abahanga mu mategeko bavuga ko umucamanza uburanisha urubanza ari we uha agaciro ukuri k’ukwemera icyaha kwakozwe n’uregwa igihe cy’iperereza nubwo yagera mu rukiko akisubiraho,1 bityo ntacyari kubuza Urukiko gusuzuma ukwemera icyaha Mugenzi Samuel yakoreye mu Bugenzacyaha, rukaba rwarasanze gukwiye gushingirwaho nk’ikimenyetso kimushinja kuko gihura n’ibindi bimenyetso byatanzwe n’Ubushinjacyaha nk’uko byibukjwe haruguru. [25] Ku bivugwa na Mugenzi Samuel ko Urukiko rwirengagije amakimbirane yari afitanye na muka se, Urukiko rurasanga nta shingiro bifite, kuko Urukiko rwasuzumye icyo kibazo rusanga nta kimenyetso abitangira, cyane ko ikibazo cyo gusambanya umwana cyagejejwe ku nzego z’ibanze ariko ntazigaragarize ayo makimbirane. Usibye ibyo bisobanuro Urukiko Rukuru rwatanze, uru Rukiko rwashatse kumenya iby’ayo makimbirane, Mukantwari Vestine (muka se) avuga ko nta makimbirane bigeze bagirana, binashimangirwa na Busizori (se wa Mugenzi) kuko yavuze ko bari babanye neza, ko Mugenzi Samuel yavuye mu rugo agiye kwishakishiriza, Mugenzi Samuel akaba atarigeze avuguruza izo mvugo, ngo agaragaze imbere yabo icyo ayo makimbirane yari ashingiyeho, bivuze rero ko ibyo avuga ko yahimbiwe icyaha kubera ayo makimbirane nta shingiro bifite. [26] Urukiko rurasanga na none ibivugwa na Mugenzi Samuel ko igihe bivugwa ko icyaha cyakorewe atari akiba mu rugo, nta shingiro bifite, kuko usibye kuba mu nyandikomvugo yakorewe mu Bugenzacyaha yemeye ko yasambanyije I.P ubwo bari mu rugo amusambanyiriza ku buriri bwe, bikanahura neza n’ibyo umwana yasobanuye ko yamusambanyirije ku buriri bwe, no mu nyandikomvugo Mugenzi Samuel yakorewe mu Bushinjacyaha, n’ubwo yahakanye icyaha, yabajijwe niba abana n’uwo mwana mu nzu imwe avuga ko babana, bivuze ko icyaha gikorwa yabaga iwabo, bikanashimangirwa n’uko ubwo yaburanaga iby’ifungwa by’agatenganyo, yabajijwe niba mushiki we (umwana wasambanyijwe) bari kumwe mu nzu, asubiza ko batari kumwe ngo kuko yari yagiye kwiga,

1 Urubanza rwashingiweho mu manza za mbere ruri mu cyegeranyi cy’ibyemezo by’inkiko, imanza nshinjabyaha, Kigali, 2008, p.310

## Page 6

ko we ajya ku kazi saa moya agataha saa tanu, ni ukuvuga ko yatahaga iwabo nubwo nyuma yaba yaragiye kuba ahandi nk’uko abivuga, cyane cyane ko n’igihe avuga ko yaviriye mu rugo (mu mwaka wa 2015) gitandukanye cyane n’icyo se yavuze cy’amezi ane ndetse n’icyo muka se yavuze cy’icyumweru kimwe, ibi byose bikaba ahubwo bigaragaza ko ari uburyo bwo guhunga ibyo yemeye binahura n’ibyo umwana yamushinje bikanashimangirwa na raporo ya muganga wasuzumye uwo mwana. [27] Ku birebana na raporo ya muganga uwunganira Mugenzi Samuel avuga ko nayo ishidikanywaho, Urukiko rurasanga iyo raporo igaragaza ko ku myanya ndangagitsina cy’umwana hatukura kandi habyimbye kandi havamo ibintu binuka, ko akarangabusugi katashwanyaguritse,2 ibyo bimemyetso ubwabyo bikaba bigaragaza ko umwana yasambanyijwe nk’uko yabisobanuye kandi nk’uko Mugenzi Samuel yabyemeye agifatwa; kuba iyo raporo ivuga ko akarangabusugi katashwanyaguritse bikaba bitavuze ko umwana atasambanyijwe kuko hari ibindi bimenyetso byagaragaye ku gitsina cy’umwana kandi muganga ntiyavuze ko hari ikindi cyabiteye. Nk’uko kandi byasobanuwe n’Urukiko rw’Ikirenga mu rubanza nº RS/INJUST/RP 00003/2019/SC rwaciwe ku wa 28/01/2022, kuba umwana yasanganwa akarangabusugi kazima, ntibivanaho ko hari ibikorwa yakorerwa hagamijwe kwishimisha. [28] Ku bivugwa na none n’uwunganira Mugenzi Samuel ko imvugo ya nyina w’umwana ishidikanywaho kuko mu mu Bugenzacyaha yavuze ko atamenye igihe umwana yasambanyirijwe, Urukiko rurasanga nta gushidikanya kuri mu mvugo ye, kuko kuba yaravuze ko atamenye igihe umwana yasambanyirijwe, byatewe n’uko umwana atari yabimubwiye bitewe n’uko Mugenzi Samuel yari yaramubujije kubivuga nk’uko uwo mwana yabisobanuye. [29] Urukiko rurasanga kandi kuba Ndateba Faustin yaravuze ibyo yabwiwe, bitambura agaciro ibyo yavuze kuko atari kuvuga ko yabonye icyaha gikorwa mu gihe cyakozwe adahari, akaba yarabibwiwe nk’umuyobozi w’Umudugudu, abibwiwe n’umujyanama w’ubuzima kuko ari we umwana yabibwiye nk’uko n’ababyeyi be bemera ko yari yagiyeyo agiye kumwaka umuti, uwo mukuru w’Umudugudu akaba yanavuze ko babajije Mugenzi Samuel akemera ko yasambanyije koko uwo mwana. Ibimaze kuvugwa binareba raporo y’Akagari, kuko ivuga ibyabaye ishingiye ku mvugo y’umujyanama w’ubuzima bitewe n’uko ari we umwana yabibwiye nk’uko bimaze gusobanurwa. [30] Hashingiwe rero ku byasobanuwe haruguru, Urukiko rurasanga impamvu y’ubujurire ya Mugenzi Samuel igamije kugaragaza ko ibimenyetso byashingiweho bishidikanwaho nta shingiro ifite, ahubwo ikigaragara akaba ari uko atashoboye kuvuguruza ibyo bimenyetso cyangwa ngo agaragaze ukuri kw’ibyo avuga nk’uko biteganywa n’ingingo z’amategeko zavuzwe haruguru, bityo hakaba hagomba kugumaho imikirize y’urubanza rwajuririwe. III. ICYEMEZO CY’URUKIKO [31] Rwemeje ko ubujurire bwa Mugenzi Samuel nta shingiro bufite; [32] Rwemeje ko hagumyeho imikirize y’urubanza nº RPA 00643/2018/HC/RWG rwaciwe ku wa 25/06/2020 n’Urukiko Rukuru, Urugereko rwa Rwamagana, rwamuhamije icyaha cyo gusambanya umwana rukamuhanisha igifungo cy’imyaka 20; [33] Rwemeje ko amagarama y’urubanza aherera ku Isanduku ya Leta kubera ko Mugenzi Samuel afunze, akaba asonewe kuyatanga.

2 …Les petites et grandes lèvres rouges et tuméfiées et des sérosités malodorantes, hymen non déchiqueté admettant un doigt