UBUSHINJACYAHA v MUHAYIMANA

# UBUSHINJACYAHA v MUHAYIMANA

- Source: Amategeko - Section: Decisions (Judgements) - Date: 2025-01-29 - Case/document no.: RPAA 00309/2024/CA - Collection: Court of Appeal

## Text

## Page 1

UBUSHINJACYAHA v MUHAYIMANA [Rwanda URUKIKO RW’UBUJURIRE - RPAA 00309/2024/CA (Rutazana, P.J.) 29 Mutarama 2025] Amategeko agenga imanza z’inshinjabyaha – Ibyaha n’ibihano – Umugambi wo kwica - Kugira ngo hamenyekane niba uwakubise undi ku bushake yari afite umugambi wo kumwica bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico). Amategeko agenga imanza z’inshinjabyaha – Ibyaha n’ibihano – Igabanyagihano - Urukiko ntirutegetswe kwemeza impamvu nyoroshyacyaha igihe cyose zigaragajwe, ngo rugabanyirize uregwa igihano, ahubwo ruzemeza mu bushishozi bwarwo kandi rushobora no kwanga kuzemeza nk’impamvu ngabanya gihano, rushingiye ku mikorere y’icyaha uregwa akurikiranweho cyangwa uburyo yagikozemo. Incamake y’ikibazo: Uru rubanza rukomoka ku bwicanyi bwakozwe na Muhayimana ubwo yarari aho yacururizaga inzoga hanyuma aza gutongana na Twagirayesu amwishyuza amafaranga yari yanywereye, aza kujya gushaka icyuma arakizana agikubita Twagirayesu mu mutima ahita apfa. Nyuma y’Iperereza, ubushinjacyaha bwatanze ikirego mu Rukiko Rwisumbuye rwa Karongi rumurega icyaha cy’ubwicanyi bukozwe ku bushake rusaba ko cyamuhama agahanishwa igihano cy’igifungo cya burundu. Muhayimana yaburanye yemera icyaha ariko akavuga ko nta mugambi wo kwica yari afite. Urukiko rushingiye ku buremere bw’icyaha yakoze ndetse no kwemera k’uregwa n’ibindi bimenyetso, rwamuhamije icyaha cyo kwica ku bushake rumuhanisha igihano cy’igifungo cya burundu. Uregwa yajuririye icyo cyemezo mu Rukiko Rukuru asaba ko inyito y’icyaha yahinduka kuko atishe nyakwigendera ku bushake ndetse akanasaba kugabanyirizwa igihano kuko yemeye icyaha. Urukiko rwasanze inyito y’icyaha itahinduka ariko rumugabanyiriza igihano rumuhanisha igifungo cy’imyaka 25. Muhayimana yajuririye mu Rukiko rw’Ubujurire asaba guhindura inyito y’icyaha akanagabanyirizwa igihano, uru rukiko rusuzuma ikibazo cyo kumenya niba inyito y’icyaha Muhayimana ashinjwa ikwiriye guhinduka kikaba ubwicanyi budaturutse ku bushake ndetse no kuba yakongera kugabanyirizwa igihano. Uregwa asobanura ko yishe nyakwigendera k’ubwo ubuteganye buke ko nta mugambi wo kumwica yigeze ategura dore ko n’icyuma yakoresheje cyari aho hafi bityo ko inyito y’icyaha ikwiye guhinduka agahanirwa ubwicyanyi budaturutse ku bushake. Akomeza avuga ko yaburanye yemera icyaha ariko ntiyagabanyirizwa igihano ku buryo buhagije agasaba ko yakongera kugabanyirizwa kuko ari ubwa mbere akurikiranywe n’inkiko. Ubushinjacyaha busobanura ko Muhayimana yagiye gushaka icyuma arakizana agitera Twagirayesu mu gituza azi neza ko ari mu cyico bityo inyito y’icyaha yahamijwe ikaba idakwiriye guhinduka. Bunasobanura ko kandi uregwa adakwiriye kongera kugabanyirizwa ibihano kuko yagabanyirijwe ku buryo buhagije.

## Page 2

Incamake y’icyemezo: 1. Kugira ngo hamenyekane niba uwakubise undi ku bushake yari afite umugambi wo kumwica bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico). 2. Urukiko ntirutegetswe kwemeza impamvu nyoroshyacyaha igihe cyose zigaragajwe, ngo rugabanyirize uregwa igihano, ahubwo ruzemeza mu bushishozi bwarwo kandi rushobora no kwanga kuzemeza nk’impamvu ngabanya gihano, rushingiye ku mikorere y’icyaha uregwa akurikiranweho cyangwa uburyo yagikozemo. Ubujurire nta shingiro bufite. Amategeko yashingiweho: Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, ingingo ya 49, 107. Imanza zifashishijwe: RPAA 0021/14/CS - Nº RPAA 0022/14/CS, Ubushinjacyaha na Uzabakiriho rwaciwe n’Urukiko rw’Ikirenga ku wa 13/10/2017; RPAA 0110/10/CS, Ubushinjacyaha na Uwamurengeye, rwaciwe n’Urukiko rw’Ikirenga ku wa 31/01/2014; RPAA 00332/2023/CA, Ubushinjacyaha na Kabarere Pascasie rwaciwe n’Urukiko rw'Ubujurire ku wa 20/12/2024; RPAA 00258/202/CA, Ubushinjacyaha na Ntirandekura Josué alias Kaduruvayo, rwaciwe n’Urukiko rw'Ubujurire ku wa 20/12/2024. Urubanza I. IMITERERE Y’URUBANZA [1] Ku wa 28/06/2022, mu gihe cya saa sita z'amanywa, ubwo Muhayimana Annonciata yari, mu Mudugudu wa Nyabiranga, mu Kagari ka Muhororo, mu Murenge wa Murambi, mu Karere ka Karongi, Intara y’Iburengerazuba, aho yacururizaga, yashyamiranye n’uwitwa Twagirayesu Jean Jafar bapfa amafaranga y’inzoga yari yanyoye Muhayimana Annonciata yamwishyuzaga, hanyuma amutera icyuma mu gatuza Twagirayesu Jean Jafar yitaba Imana, Muhayimana Annonciata arafatwa arafungwa. [2] Nyuma y’iperereza Ubushinjacyaha bwareze Muhayimana Annonciata mu Rukiko Rwisumbuye rwa Karongi bumukurikiranyeho icyaha cyo kwica Twagirayesu Jean Jafar ku bushake, busaba ko kimuhama agahanishwa igifungo cya burundu. Muhayimana Annonciata yaburanye yemera icyaha aregwa, ariko akavuga ko atigeze ategura umugambi wo kwica Twagirayesu Jean Jafar, ahubwo byamugwiririye kuko bari banyoye inzoga. [3] Mu rubanza Nº RP 00337/2022/TGI/KNG rwaciwe ku wa 11/08/2022, Urukiko Rwisumbuye rwa Karongi rwemeje ko Muhayimana Annonciata ahamwa n’icyaha cyo kwica Twagirayesu Jean Jafar, rushingiye ku buremere bw’icyaha rusanga rutamugabanyiriza igihano,

## Page 3

rumuhanisha igifungo cya burundu. Ibyo Urukiko rwabishingiye ku kuba yiyemerera ko ariwe wateye nyakwigendera icyuma mu gatuza agahita yitura hasi agapfa, imvugo z’abatangabuhamya bamushinja, raporo yakozwe n’Ubugenzacyaha bwageze aho icyaha cyakorewe igaragaza ko aho nyakwigendera yiciwe atari hamwe n’aho Muhayimana Annonciata yakuye icyuma yamuteye, na raporo ya muganga yemeza ko Twagirayesu Jean Jafar yishwe n’icyuma yatewe. [4] Muhayimana Annonciata yajuririye Urukiko Rukuru, Urugereko rwa Rusizi, arusaba guhindura inyito y’icyaha rushingiye ku mpamvu y’uko yagikoze atabigambiriye ahubwo yitabaraga kuko nyakwigendera ari we wari umusembuye, anasaba kugabanyirizwa igihano kuko ku rwego rubanza kitagabanyijwe kandi yaremeye icyaha akanasobanura uburyo yagikozemo. [5] Ubushinjacyaha bwasabye ko ubujurire bwa Muhayimana Annonciata butahabwa ishingiro kuko yishe nyakwigendera ku bushake, bityo inyito y’icyaha ikaba itagomba guhinduka kandi n’igabanyagihano asaba akaba adakwiriye kurihabwa kubera uburemere bw’icyaha yakoze. [6] Mu rubanza Nº RPA 00325/2022/HC/RSZ rwaciwe n’Urukiko Rukuru, Urugereko rwa Rusizi kuwa 11/04/2024 rwasanze kuba Muhayimana Annonciata abizi kandi abishaka, ari muzima, nta kibazo cyo mu mutwe afite, yarafashe icyuma gikoreshwa mu kwica akagitera umuntu arombereje mu kico, kandi akabikora azi neza ko ibyo akora ari igikorwa gihanwa n’amategeko bigaragaza ubushake bwo gukora icyaha budashindikanywaho, ko rero nta kwitabara n’ubusembure byabayeho; maze rwanzura ko inyito y’icyaha itagomba guhinduka. Urukiko kandi rushingiye ku ihame ryo gutanga ibihano bimwe ku bakoze ibyaha bisa mu buryo bumwe, rwahanishije Muhayimana Annonciata igihano cy’igifungo cy’imyaka 25 rushingiye ku byemejwe mu rubanza Nº RPAA 00170/2022/CA rwaciwe n’Urukiko rw’Ubujurire ku wa 21/09/2023 haburana Ubushinjacyaha na Ushizimpumu Jean Marie Vianney, aho uregwa yahamijwe icyaha cy’ubwicanyi agahanishwa igihano cy’igifungo cy’imyaka 25. [7] Muhayimana Annonciata yongeye kujuririra Urukiko rw’Ubujurire, urubanza ruhabwa Nº RPAA 00309/2024/CA, ruburanishwa mu ruhame ku wa 13/01/2025, Muhayimana Annonciata yunganiwe na Me Niyonsenga Vincent, naho Ubushinjacyaha buhagarariwe na Mbaragijimana Désiré, Umushinjacyaha ku rwego rw’Igihugu. [8] Mu bujurire bwe Muhayimana Annonciata akomeza gusaba uru Rukiko guhindura inyito y’icyaha aregwa agahanirwa icyaha cy’ubwicanyi budaturutse ku bushake kuko atigeze agambirira kwica nyakwigendera, akanasaba kugabanyirizwa igihano ku nzego zose yemeye icyaha akanasobanura uko yagikoze n’icyabimuteye. [9] Urukiko rurasuzuma ibibazo bikurikira bigize urubanza: - Kumenya niba inyito y’icyaha Muhayimana Annonciata ashinjwa ikwiriye guhinduka kikaba ubwicanyi budaturutse ku bushake. - Kumenya niba Muhayimana Annonciata ashobora kugabanyirizwa igihano. II. ISESENGURA RY’IBIBAZO BIGIZE URUBANZA Kumenya niba inyito y’icyaha Muhayimana Annonciata ashinjwa ikwiriye guhinduka kikaba ubwicanyi budaturutse ku bushake.

## Page 4

[10] Muhayimana Annonciata n’umwunganira bavuga ko icyaha ashinjwa cyahawe inyito itariyo kuko ibikorwa yakoze byaturutse ku mujinya yatewe n’uko yari yarwanye na nyakwigendera wari wanze kumwishyura amafaranga y’inzoga yari yanyoye, ndeste n’ubuzima bugoye yabagamo hamwe n’umwana we kuko uwamuteye inda kimwe n’ababyeyi be bamutereranye, bigatuma ananirwa kwihangana. Basobanura ko atigeze ategura umugambi wo kwica nyakwigendera kuko ntacyo bapfaga, kuko n’icyuma yamuteye ari icyo yarimo guhatisha ibirayi akaba atarigeze ava aho bari bari ngo ajye kugishaka, ahubwo akaba yarakimuteye ku bw’ubuteganye buke. Basoza basaba ko yahanirwa icyaha cy’ubwicanyi budaturutse ku bushake hashingiwe ku biteganywa n’ingingo ya 111 y’ Itegeko Nº 68/2018 ryo ku wa 30/08/2018 riteganya ibyaha n’ibihano muri rusange kuko yagikoze bimugwiririye. [11] Uhagarariye Ubushinjacyaha avuga ko iyi mpamvu y’ubujurire nta shingiro ifite, agasaba ko inyito y’icyaha idahinduka. Asobanura ko icyaha Muhayimana Annonciata yakoze ari ubwicanyi kuko yateye umuntu icyuma mu gatuza abishaka kandi abona ko ari bupfe, bityo rero ibisabwa kugira ngo icyaha cy’ubwicanyi kibeho bikaba byuzuye. Ibi uhagarariye Ubusinjacyaha abishingira ku murongo watanzwe n’Urukiko rw’ikirenga mu rubanza Nº RPA 0142/10/CS rwaciwe kuwa 19/09/2014 haburana Ubushinjacyaha na Cyuma Miruho Alexandre, aho mu gika cya 7 rwasobanuye ko harebwe intwaro (umuhoro) uregwa yakoresheje n’uburyo yakozemo icyaha burimo kuwutemesha nyakwigendera inshuro nyinshi, bigaragaza ko yari afite umugambi wo gukora icyaha, rwanzura ko icyaha yakoze ari ubwicanyi. Uhagarariye Uushinjacyaha avuga kandi ko icyo ari nacyo gitekerezo kigaragara mu zindi manza zirimo urubanza Nº RPAA 00441/2021/CA rwaciwe n’Urukiko rw’ubujurire ku wa 21/10/2022 (igika cya 11). UKO URUKIKO RUBIBONA [12] Impaka kuri iyi ngingo zishingiye ku kumenya niba Urukiko rukwiriye guhindura inyito y’icyaha cy’ubwicanyi Muhayimana Annonciata ashinjwa kikaba ubwicanyi budaturutse kubushake. [13] Ingingo ya 107 y’Itegeko Nº 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu iteganya ko umuntu wica undi abishaka aba akoze icyaha. [14] Mu rubanza Nº RPAA 0110/10/CS rwaciwe n’Urukiko rw’Ikirenga kuwa 31/01/2014 haburana Ubushinjacyaha na Uwamurengeye, rwasobanuye ko kugira ngo hamenyekane niba uwakubise undi ku bushake yari afite umugambi wo kumwica bisuzumirwa mu cyakoreshejwe (intwaro ishobora kwica) mu kumukubita no ku gice cy’umubiri cyakubiswe (mu cyico). Uyu murongo ni nawo wakomeje gukurikizwa mu zindi manza zaciwe n’uru Rukiko, mu ziheruka gucibwa hakaba harimo urubanza Nº RPAA 00332/2023/CA haburana Ubushinjacyaha na Kabarere Pascasie (igika cya 17) n’urubanza Nº RPAA 00258/202/CA haburana Ubushinjacyaha na Ntirandekura Josué alias Kaduruvayo (igika cya 12), zombi zaciwe n’Urukiko rw'Ubujurire ku wa 20/12/2024. [15] Nk’uko bigaragarira mu gika cya 14 cy’urubanza rwajuririwe, ibimenyetso Urukiko Rukuru, Urugereko rwa Rusizi rwashingiyeho ruhamya Muhayimana Annonciata icyaha cy’ubwicanyi buturutse ku bushake, harimo kuba rwarasanze abizi kandi abishaka ari muzima, nta kibazo cyo mu mutwe afite, yarafashe icyuma gikoreshwa mu kwica akagitera umuntu arombereje

## Page 5

mu kico, kandi akabikora azi neza ko ibyo akora ari igikorwa gihanwa n’amategeko, rusanga rero ubushake bwo gukora icyaha budashidikanywaho. Mu bujurire bwe Muhayimana Annonciat ntahakana ko yateye nyakwigendera icyuma mu gatuza bikamuviramo gupfa, ahubwo icyo avuga ni uko ngo atabikoze ku bushake kuko atari yabigambiriye bakaba nta n’icyo bapfaga. [16] Urukiko rw’Ubujurire rushingiye ku murongo watanzwe mu manza zavuzwe haruguru (igika cya 13), rurasanga kuba igikoresho Muhayimana Annociata yakoresheje ari icyuma (gishobora kwica) kandi akaba yaragiteye Twagirayesu Jean Jafar mu gatuza (mu cyico) agahita yitaba Imana, bihagije kugira ngo hemezwe ko yamwishe abishaka kuko ari umuntu mukuru kandi akaba atagaragaza ko hari ikindi kibazo afite cy’uburwayi bwo mu mutwe ku buryo yaba adafite ubwenge buhagije, akaba atanagaragaza ko nyakwigendera yituye kuri icyo cyuma ku bw’impanuka, ahubwo yiyemerera ko yakimuteye. [17] Urukiko rurasanga kandi impamvu Muhayimana Annonciata yireguza z’umujinya avuga ko yagize kimwe n’ubuzima bubi avuga ko yari abayemo zidakuraho ku kuba yarateye nyakwigendera icyuma abizi neza ko ari igikoresho gishobora kwica kandi azi neza ko akimuteye mu cyico (mu gatuza). [18] Hashingiwe ku byasobanuwe byose, Urukiko rw’Ubujurire rurasanga icyaha Muhayimana Annonciata ashinjwa ari ubwicanyi, bityo impamvu ye y’ubujurire ishingiye ku gusaba ko gihindurirwa inyito ikaba nta shingiro ifite. 1. Kumenya niba Muhayimana Annonciata ashobora kugabanyirizwa igihano [19] Muhayimana Annonciata n’umwunganira bavuga ko Urukiko Rukuru, Urugereko rwa Rusizi rwamuhanishije igifungo cy’imyaka 25 rwiregagije ko yaburanye yemera icyaha ku buryo budashidikanywaho akanasobanura uburyo yagikoze kandi akaba ari ubwa mbere akurikiranyweho icyaha, bagasaba uru Rukiko gushingira kuri izo mpamvu nyoroshyacyaha rukamugabanyiriza igihano hashingiwe ku ngingo ya 2 (a) y’Itegeko Nº 059/2023 ryo ku wa 04/12/2023 rihindura Itegeko Nº 68/2018 ryo ku wa 30/08/2018 riteganya ibyaha n’ibihano muri rusange, agahanishwa igifungo cy’imyaka cumi n’itanu (15). [20] Uhagarariye Ubushinjacyaha avuga ko iyi mpamvu y’ubujurire nta shingiro ifite kuko Muhayimana Annonciata yagabanyirijwe igihano ku buryo buhagije. Asobanura ko igihano cy’igifungo cya burundu yari yahanishijwe ku rwego rwa mbere Urukiko Rukuru, Urugereko rwa Rusizi rwakigabanyije rukamuhanisha igifungo cy’imyaka makumyabiri n’itanu (25), bityo kikaba kidakwiriye kongera kugabanywa. [21] Uhagarariye Ubushinjacyaha avuga kandi ko n’ingingo ya 2 (a) y’Itegeko Nº 059/2023 ryo ku wa 04/12/2023 ryavuzwe haruguru itashingirwaho Muhayimana Annonciata yongera kugabanyirizwa igihano, hagendewe ku murongo watanzwe mu rubanza Nº RPA 0249/13/SC rwaciwe n’Urukiko rw’Ikirenga kuwa 25/11/2016 haburana Ubushinjacyaha na Nteziryayo Emmanuel, aho rwasobanuye ko iyo Urukiko rusanze uregwa yaragabanyirijwe igihano mu nkiko zibanza, rudategetswe kongera kumugabanyiriza keretse rusanze bitarakozwe mu buryo buhagije. UKO URUKIKO RUBIBONA

## Page 6

[22] Impaka kuri iyi ngingo zishingiye ku kumenya niba igihano cy’igifungo cy’imyaka 25 Muhayimana Annonciata yahanishijwe gishobora kugabanywa hashingiwe ku mpamvu yo kwemera icyaha n’iy’uko ari ubwa mbere akurikiranyweho icyaha. [23] Ingingo ya 49, igika cya mbere y’Itegeko N° 68/2018 ryo ku wa 30/08/2018 riteganya ibyaha n’ibihano muri rusange nk’uko ryahinduwe kugeza ubu, iteganya ko «Umucamanza atanga igihano akurikije uburemere bw'icyaha, ingaruka icyaha cyateye, impamvu zatumye agikora, uko uwagikoze yari asanzwe yitwara, imibereho ye bwite n’uburyo icyaha cyakozwemo ». [24] Ikibazo cyo kumenya niba igihe cyose hari impamvu nyoroshyacyaha Urukiko rutegetswe kuyishingiraho rugabanyiriza uregwa igihano cyatanzweho umurongo mu rubanza Nº RPAA 0021/14/CS - Nº RPAA 0022/14/CS rwaciwe n’Urukiko rw’Ikirenga ku wa 13/10/2017, haburana Ubushinjacyaha na UZABAKIRIHO1 , aho rwasobanuye ko Urukiko rudategetswe kwemeza impamvu nyoroshyacyaha igihe cyose zigaragajwe, ngo rugabanyirize uregwa igihano, ahubwo ruzemeza mu bushishozi bwarwo, kandi rukaba rushobora no kwanga kuzemeza nk’impamvu ngabanya gihano, rushingiye ku mikorere y’icyaha uregwa akurikiranweho cyangwa uburyo yagikozemo. Uyu murongo ni nawo wakomeje gukurikizwa mu zindi manza zaciwe n’uru Rukiko, mu ziheruka gucibwa hakaba harimo urubanza Nº RPAA 00512/2023/CA Ubushinjacyaha buburana na Uwihoreye Pierre Céléstin (igika cya 16) n’urubanza Nº RPAA 00100/2024/CA Ubushinjacyaha na Nzabandora Pascal (igika cya 17), zombi zaciwe n’Urukiko rw’Ubujurire ku wa 20/12/2024. [25] Nk’uko kandi byemejwe mu rubanza Nº RPA 00060/2021/CA rwaciwe n’Urukiko rw’Ubujurire ku wa 04/04/2022, haburana Ubushinjacyaha na Nsabimana Callixte alias Sankara na bagenzi be2 , iyo uregwa nta kindi anenga urubanza yajuririye, uretse kuvuga gusa ko atagabanyirijwe igihano bihagije, buri mucamanza ku rwego urwo arirwo rwose, yemerewe gutanga igihano mu bushishozi bwe kijyanye n’uburemere bw’icyaha n’ingaruka zacyo (……), cyakora mu bujurire Umucamanza akaba agomba kuzirikana ko yemerewe gusa guhindura igihano cyatanzwe n’Umucamanza wo mu Rukiko rubanza ari uko amaze kugaragaza ko urwo Rukiko rwaba rwarakoresheje nabi Itegeko cyangwa ubushishozi bwarwo mu gutanga igihano. [26] Nk’uko bigaragara mu gika cya 32 cy’urubanza rwajuririwe, mu Rukiko Rukuru, Urugereko rwa Rusizi Muhayimana Annonciata yasabye kugabanyirizwa igihano ashingiye ku mpamvu y’uko yaburanye yemera icyaha, ariko urwo Rukiko rushingiye ku buremere bw’icyaha yakoze cyo kwambura ubuzima mugenzi we ntacyo amuhoye, akamwica amuteye icyuma, rugendeye kandi ku ihame ryo gutanga ibihano bimwe kubakoze ibyaha bimwe mu buryo bumwe, rwemeje ko Muhayimana Annonciata adakwiriye kugabanyirizwa igihano ahubwo igihano cy’igifungo cy’imyaka 25 yahanishijwe kikagumaho, rushingiye ku rubanza RPAA 00170/2022/CA rwaciwe ku wa 21/09/2023 haburana Ubushinjacyaha na Ushizimpumu Jean Marie Vianney aho uyu nawe yari akurikiranyweho icyaha cy’ubwicanyi agahanishwa igihano cy’igifungo cy’imyaka 25. [27] Urukiko rw’Ubujurire rurasanga nk’uko Urukiko Rukuru, Urugereko rwa Rusizi rwabibonye, ubwicanyi ari icyaha gifite uburemere kuko kivutsa umuntu ubuzima bityo

1 Uru rubanza rwatangajwe mu Cyegeranyo cy’ibyemezo by’Inkiko {2018} 4 RLR. 2 Reba urubanza Nº RPA 00060/2021/CA rwaciwe n’Urukiko rw’Ubujurire ku wa 4/4/2022, Ubushinjacyaha buburana na Nsabimana Callixte na bagenzi be, igika cya 252 n’icya 254.

## Page 7

kikabangamira uburenganzira bw’ibanze bwa kubaho, bityo rero uru Rukiko narwo rukaba rusanga hashingiwe ku mirongo yatanzwe mu manza zagaragajwe haruguru, harebwe uburemere bw’icyaha Muhayimana Annonciata yakoze cyo kuvutsa ubuzima Twagirayesu Jean Jafar, adakwiriye kugabanyirizwa igihano ahubwo igifungo cy’imyaka 25 yahanishijwe kikaba guhuye n’icyaha yakoze ; iki gihano kandi kikaba gihura n’icyatanzwe mu zindi manza zaciwe n’uru Rukiko, aho abaregwa bahamijwe icyaha cy’ubwicanyi bagahanishwa igifungo cy’imyaka 25 n’ubwo ari nta kindi cyaha bari barakurikiranyweho mu buryo buzwi, harimo nk’urubanza Nº RPAA 00334/2021/CA-CMB RPAA 00336/2021/CA, rwaciwe n’Urukiko rw’Ubujurire ku wa 30/05/2024 haburana Ubushinjacyaha na Mutesayire Virginie, n’urubanza Nº RPAA 00532/2023/CA narwo rwaciwe n’Urukiko rw’Ubujrire ku wa 25/09/2024 haburana Ubushinjacyaha na Hakizimana Vincent. [28] Urukiko rw’Ubujurire rushingiye ku byasobanuwe byose, rurasanga ubujurire bwa Muhayimana Annonciata nta shingiro bufite. III. ICYEMEZO CY’URUKIKO [29] Rwemeje ko ubujurire bwa Muhayimana Annonciata nta shingiro bufite ishingiro. [30] Rwemeje ko urubanza Nº RPA 00325/2022/HC/RSZ rwaciwe n’Urukiko Rukuru, Urugereko rwa Rusizi kuwa 11/04/2024 rudahindutse mu ngingo zarwo zose. [31] Rutegetse ko Muhayimana Annonciata asonewe amagarama y’urubanza kuko aburana afunze.