MUKAMANA NUNDI V NDAHIMANA N'UNDI

# MUKAMANA NUNDI V NDAHIMANA N'UNDI

- Source: Amategeko - Section: Decisions (Judgements) - Date: 2024-03-22 - Case/document no.: RCA 00001/2023/CA–RCA 00009/2023/CA - Collection: Court of Appeal

## Text

## Page 1

MUKAMANA N’UNDI V NDAHIMANA N’UNDI [Rwanda URUKIKO RW’UBUJURIRE – RCA 00001/2023/CA–RCA 00009/2023/CA (Ngagi, P.J.) 22 Werurwe 2024] Amategeko agenga imiburanishirize y’imanza mbonezamubano – gutanga ikirego – gutanga ikirego mu izina ry’umuryango – Umuburanyi utanze ikirego mu izina rye akanishyura amagarama mu izina rye ariko mu myanzuro no mu miburanire akavuga ko aburana umutungo w’umuryango, agomba kugaragaza icyerekana ko uwo muryango wamuhaye ububasha bwo kuwuhagararira, atakibona ikirego cye nticyakirwe. Amategeko agenga imiburanishirize y’imanza mbonezamubano – Ikiburanwa – Ikiburanwa gisangiwe n’abantu benshi – Iyo ikiburanwa gisangiwe n’abantu benshi, urega afite inshingano zo kubagobokesha, Itegeko No 22/2018 ryo ku wa 29/04/2018 ryerekeye imiburanishirize y’imanza mbonezamubano, iz’ubucuruzi, iz’umurimo n’ubutegetsi, Ingingo ya 33. Incamake y’ikibazo : Uru rubanza rwatangiye Ndahimana arega Mukamana mu Rukiko Rwisumbuye rwa Muhanga, asaba gusubizwa imitungo ye yamuhuguje igizwe n'ubutaka, amazu, amashyamba, urutoki n'inka. Nyuma yaho babaniye nk’umugabo n’umugore batarasezeranye mu buryo bwemewe n’Amategeko yaba we cyangwa umuvandimwe we witwa Mukaremera wapfuye nawe badasezeranye, ariko nyuma aza gusezerana mu mategeko na Mukabadege. Mukamana nawe yareze muri urwo Rukiko arusaba ko rutegeka Ndahimana ko bagabana imitungo bashakanye ubwo babanaga nk’umugabo n’umugore. Mukabadege washyingiranywe mu buryo bwemewe n’amategeko na Ndahimana yagobotse muri urwo rubanza avuga ko imitungo iburanwa ayifiteho uruhare rwa mirongo itanu ku ijana (50%) kuko basezeranye ivangamutungo rusange. Rugeyo na we yagobotse muri urwo rubaza, avuga ko mu mitungo iburanwa harimo ikibanza yaguze na Ndahimana na Mukamana, asaba ko cyakurwa mu mitungo iburanwa kikamwandikwaho. Urukiko mu rubanza RC00058/2018/TGI/MHG-RC 00077/2018/TGI/MHG rwemeje ko: Ndahimana na Mukamana bagabana ku buryo bungana imitungo ibanditseho itandukanye, ko umutungo Rugeyo yaguze ari kuregera awandikwaho. ko ukugoboka kwa Mukabadege nta shingiro gufite. Mukamana yajuririye Urukiko Rukuru, Urugereko rwa Nyanza, Mukabadege na we atanga ubujurire bwuririye ku bwe, avuga ko Urukiko Rwisumbuye rwa Muhanga rwamurenganyije ruvuga ko nta nyungu afite zo kugoboka mu rubanza. Urukiko mu rubanza RCA00013/2019/HC/NYZ rwemeje ko: Ikirego cy’ubujurire cya Mukamana gifite ishingiro kuri bimwe; ko ubujurire bwa Ndahimana bwuririye ku bundi, nta shingiro bufite; ko ubujurire bwa Mukabadege bwuririye ku bundi, bufite ishingiro kuri bimwe;

## Page 2

Ko Mukabadege Liliane afite uburenganzira n’inyungu ku mitungo iburanwa hagati ya Ndahimana na Mukamana, ariko ku ruhande rw’umugabo we Ndahimana gusa. Mukamana Béatrice mu izina ry’umuryango wa Seburimbwa yatambamiye imikirize y’urubanza RCA00013/2019/HC/NYZ, avuga ko mu mitungo Urukiko rwategetse ko Ndahimana na Mukamana Annonciata bagabana, harimo n’imitungo y’abazungura ba Seburimbwa , igizwe n’inzu yubatse mu isambu yabo ifite UPI: 2/08/12/02/3962 n’isambu yabo ibaruye kuri UPI: 2/08/10/04/3714 iherereye mu Murenge wa Rugarika, Bityo ko asaba ko urubanza RCA00013/2019/HC/NYZ rwahinduka, imitungo y’abazungura ba Seburimbwa ikavanwa mu yo bagomba kugabana. Habumugisha na we yatambamiye urubanza RCA00013/2019/HC/NYZ, avuga ko mu mitungo Ndahimana na Mukamana bagabana, harimo inzu yubakanye na Ndahimana, ariko ko yasubije Ndahimana uruhare rwe, maze akegukana iyo nzu. Bityo ko asaba ko urubanza atambamira rwahinduka, umutungo we ugakurwa mu mitungo Ndahimana na Mukamana bagomba kugabana. Mukamana Annonciata yabanje gutanga inzitizi yo kutakira ikirego cya Mukamana Béatrice kubera ngo kutubahiriza ibihe byo kurega, kuko urubanza rutambamirwa ari urwabazungura ba Seburimbwa , kandi ko ngo ubwo baburanaga mu Rukiko Rwisumbuye , Ndahimana yavuze ko ahagarariye abo bazugura,ngo bisobanuye ko barumumenyeshejwe, ko ikirego cya Mukamana Béatrice kidakwiye kwakirwa kuko ngo nta nyungu, ko ububasha n’ubushobozi byo gutambamira urubanza kuko yatanze ikirego ku giti cye bivuze ko atambamira ibitari ibye, avuga kandi ko ikirego cya Habumugisha kitakwakirwa kubera kurenza ibihe byo gutambamira urubanza RCA00013/2019/HC/NYZ, kuko urubanza rutangira mu Rukiko Rwisumbuye rwa Muhanga yarufashemo ijambo. Mukamana Béatrice yireguye kuri izo nzitizi avuga ko nta shingiro zifite, kubera ko urubanza atambamira yarumenye aruko, Umuhesha w’Inkiko aje kururangiza. Avuga Kandi ko na we ari mu bagize umuryango wa Seburimbwa, ibiburanwa aramutse abigaruje byagaruka mu muryango, akaba atari ngombwa ko ahabwa procuration. Habumugisha we yireguye ku nzitizi avuga ko yamenye atambamira, ari uko Umuhesha w’inkiko aje kurangiza urubanza Mukabadege nawe yireguye avuga ko inzitizi zatanzwe na Mukamana zitahabwa ishingiro, kuko kuba mu rubanza RCA00013/2019/HC/NYZ haburanwemo imitungo afitiye uburenganzira, nta cyamubuza kuyiregera. Ndahimana yireguye kuri izo nzitizi avuga ko abatambamiye urubanza ari bamwe mu bazungura ba Seburimbwa, ko Urukiko rushobora kubahamagaza cyangwa bakaza mu rubanza ku bushake, kandi ko Mukamana Béatrice ahagarariye abazungura nk’umwe muri bo, kuko atatanze ikirego ku giti cye. Urukiko mu rubanza RC 00005/2022/HC/NYZ- RC 00004/2021/HC/NYZ, rwemeje ko: izo nzitizi zifite ishingiro kuri bimwe; ko ikirego cyo gutambamira urubanza cyatazwe na Mukamana Béatrice kitakiriwe ngo gisuzumwe; ko inzitizi zisaba kutakira ikirego cya Habumugisha nta shingiro zifite;

## Page 3

Mu rubanza mu mizi, Mukamana Annonciata yireguye ku kirego cya Habumugisha avuga ko mu rubanza atambamira, Habumugisha atigeze yamburwa uruhare rwe rwa 50% ku mutungo aburana, Ko ibyo avuga ko yasubije Ndahimana uruhare rwe kuri uwo mutungo akawegukana wose nta shingiro bifite. Urukiko mu rubanza RC00005/2022/HC/NYZ-RC00004/HC/NYZ rwemeje ko, ikirego cyo gutambamira urubanza RCA00013/2019/HC/NYZ, cyatanzwe na Habumugisha nta shingiro gifite; Mukamana Béatrice na Habumugisha bajuririye Urukiko rw’Ubujurire. Mukamana Béatrice avuga ko Urukiko Rukuru, Urugereko rwa Nyanza, rwanze kwakira ikirego cye cyo gutambamira urubanza RCA00013/2019/HC/NYZ, avuga ko cyaragombaga kwakirwa, hakagobokeshwa abandi bene Seburimbwa. Habumugisha avuga ko mu rubanza rujuririrwa Urukiko rwirengagije ibimenyetso, bigaragaza ko mu mitungo Urukiko rwemeje ko Ndahimana agomba kugabana na Mukamana harimo umutungo we, asaba ko wavanwa mu mitungo bazagabana. Ndahimana we avuga ko ikirego cya Mukamana Béatrice cyagombaga kwakirwa, kandi ko imitungo aregera ikurwa muyo agomba kugabna na Mukamana Annonciata kuko ari iya Seburimbwa. Avuga kandi ko inzu Habumugisha aregera ari iye kuko yamusubije uruhare rwe. Mukamana Annonciata we avuga ko ko ubujurire bwa Mukamana Béatrice nta shingiro bufite, kuko yatanze ikirego cyo gutambamira urubanza RCA00013/2019/HC/NYZ mu izina rye bwite, kandi mu myanzuro ye avuga ko ahagarariye abazungura ba Seburimbwa ariko ngo ntagaragaze ko bamuhaye uburenganzira bwo kubahagararira, Avuga kandi ko inzu Habumugisha aregera ayifiteho uruhare rwe rwa 50% indi 50% ikaba iye na Ndahimana. Urukiko mu rubanza RCA 00001/2023/CA–RCA 00009/2023/CA, rwemeje ko ubujurire bwa Mukamana Beatrice nta shingiro bufite, ko ubujurire bwa Habumugisha nta shingiro bufite, ko urubanza rujuririrwa rudahindutse. Incamake y’icyemezo: 1. Iyo ikiburanwa gisangiwe n’abantu benshi, urega afite inshingano zo kubagobokesha. Umuburanyi utanze ikirego mu izina rye akanishyura amagarama mu izina rye ariko mu myanzuro no mu miburanire akavuga ko aburana umutungo w’umuryango, agomba kugaragaza icyerekana ko uwo muryango wamuhaye ububasha bwo kuwuhagararira, atakibona ikirego cye nticyakirwe. Bityo, umuburanyi uvuga ko abandi bazungura bagobokeshwa muri icyo kirego, bishoboka gusa iyo aza kurega atavuga ko ahagarariye umuryango kandi akaba ariwe usaba Urukiko kubagobokesha. 2.Umutungo wemejwe n’Urukiko ko ari uwumugabo asangiye n’umugore babanaga batarasezeranye bawufiteho uruhare rungana kandi n’amasezerano y’ubugure yawukozweho n’umwe muribo undi atabizi nta gaciro yahabwa. Ubujurire nta shingiro bufite.

## Page 4

Amategeko yashingiyeho: Itegeko No 22/2018 ryo ku wa 29/04/2018 ryerekeye imiburanishirize y’imanza mbonezamubano, iz’ubucuruzi, iz’umurimo n’ubutegetsi, Ingingo ya 3,12, 33, 111, 150, agace 5 n’aka 6, Itegeko N° 15/2004 ryo ku wa 12/6/2004 ryerekeye ibimenyetso mu manza n’itangwa ryabyo, Ingingo ya 2, 3 Imanza zifashishijwe: Urubanza RADAA00011/2022/CA, Nzabarimana Abdallahaman v Umujyi wa Kigali rwaciwe n’Urukiko rw’Ubujurire ku wa 12/06/2023, igika cya 45 RS/INJUST/RC00007/2021/CA, Karumuhinzi Baudoux Claire v Nyirakaziga Kabeja Anne Marie rwaciwe n’Urukiko rw’Ubujurire ku wa 30/10/2023, Urubanza I. IMITERERE Y’URUBANZA [1] Ndahimana Jean Bosco yabanye na Mukaremera Alexia (murumuna wa Mukamana Annonciata) mu mwaka wa 1994, batarashyingiranywe mu buryo bwemewe n’amategeko, bamaranye amezi atandatu (6) ararwara, mukuru we Mukamana Annonciata ajya kumurwaza, ariko nyuma y’amezi ane arapfa, Mukamana Annonciata aguma muri urwo rugo abana na Ndahimana Jean Bosco nk’umugabo n’umugore ariko badashyingiranywe mu buryo bwemewe n’amategeko. Nyuma y’igihe kitarenze ukwezi kumwe babana, Ndahimana Jean Bosco yarafunzwe amara imyaka cumi n’ibiri n’ukwezi kumwe muri Gereza, Mukamana Annociata asigara mu rugo acunga umutungo w’urugo. Ndahimana Jean Bosco yafunguwe mu mwaka wa 2007, akomeza kubana na Mukamana Annonciata, ariko bigeze mu mwaka wa 2017 ashaka undi mugore witwa Mukabadege Liliane basezerana mu mategeko ku wa 11/11/2017. [2] Ndahimana Jean Bosco yareze Mukamana Annonciata mu Rukiko Rwisumbuye rwa Muhanga, asaba gusubizwa imitungo ye yamuhuguje igizwe n'ubutaka, amazu, amashyamba, urutoki n'inka, ikirego cye cyandikwa kuri RC00058/2018/TGI/MHG. Mukamana Annonciata nawe yareze Ndahimana Jean Bosco muri urwo Rukiko Rukiko arusaba gutegeka ko bagabana imitungo yose bashakanye mu gihe cy’imyaka igera kuri 24 bamaranye babana nk'umugabo n'umugore, igizwe n’amazu n’amasambu, ikirego cye cyadikwa kuri RC00077/2018/TGI/MHG, izo manza zombi zarahujwe ziburanishirizwa mu rubanza rumwe RC00058/2018/TGI/MHG RC00077/2018/TGI/MHG. [3] Mukabadege Liliane washyingiranywe mu buryo bwemewe n’amategeko na Ndahimana Jean Bosco yagobotse muri urwo rubanza avuga ko imitungo Ndahimana Jean Bosco aburana ayifiteho uruhare rwa mirongo itanu ku ijana (50%) kuko basezeranye ivangamutungo rusange. Rugeyo Jean Claude na we yagobotse muri urwo rubaza, avuga ko mu mitungo iburanwa harimo ikibanza yaguze na Ndahimana Jean Bosco na Mukamana Annonciata, asaba ko cyakurwa mu mitungo iburanwa kikamwandikwaho.

## Page 5

[4] Mu rubanza RC00058/2018/TGI/MHG-RC 00077/2018/TGI/MHG rwaciwe ku wa 16/01/2019, Urukiko Rwisumbuye rwa Muhanga rwemeje ko: Ndahimana Jean Bosco na Mukamana Annonciata bagabana ku buryo bungana imitungo ibanditseho bombi igizwe n’imitungo yanditse kuri: UPI: 2/08/12/02/2197; UPI: 2/08/12/02/2149; UPI: 2/08/12/02/3938; UPI: 2/08/12/02/2252; UPI: 2/08/12/02/3847; UPI: 2/08/12/02/2226; UPI: 2/08/12/02/3967; UPI: 2/08/12/02/5041; UPI: 2/08/12/02/2466 uherereye i Kabagesera – Runda UPI: 2/08/10/03/60 na UPI: 2/08/10/03/56 uherereye i Rugarika – Masaka na UPI: 2/08/10/05/5147 uherereye i Rugarika – Sheri. Umutungo wanditse kuri UPI: 2/08/12/02/7037 wari wanditse kuri Ndahimana Jean Bosco na Mukamana Annonciata ubandukurwaho ukandikwa kuri Rugeyo Jean Claude wawuguze. Nta ndishyi zitangwa muri urwo rubanza Ingwate z’amagarama zatanzwe zihwanye n’ibyakozwe mu rubanza. [5] Mukamana Annonciata yajuririye Urukiko Rukuru, Urugereko rwa Nyanza, Mukabadege Liliane na we atanga ubujurire bwuririye ku bwa Mukamana Annonciata, avuga ko Urukiko Rwisumbuye rwa Muhanga rwamurenganyije ruvuga ko nta nyungu afite zo kugoboka mu rubanza. [6] Mu rubanza RCA00013/2019/HC/NYZ rwaciwe ku wa 15/05/2020, Urukiko Rukuru, Urugereko rwa Nyanza rwemeje ko: Ikirego cy’ubujurire rwashyikirijwe na Mukamana Annonciata gifite ishingiro kuri bimwe ; Ubujurire bwa Ndahimana Jean Bosco bwuririye ku bundi, nta shingiro bufite ; Ubujurire bwa Mukabadege Liliane bwuririye ku bundi, bufite ishingiro kuri bimwe ; Urubanza RC00058/2018/TGI/MHG, RC00077/2018/TGI/MHG rwaciwe n’Urukiko Rwisumbuye rwa Muhanga ku wa 16/01/2019, ruhindutse ku bijyanye n’imitungo igizwe n’inzu yubatse mu isambu ifite UPI: 2/08/12/02/3962 ya Succession Seburimbwa Joseph, ivugwa mu gika cya 33 cy’uru rubanza igomba kwiyongera ku mitungo ivugwa mu bika bya 19 na 44 by’urubanza rujuririrwa, igomba kugabanywa hagati ya Ndahimana Jean Bosco na Mukamana Annonciatha, ku ndishyi zitatanzwe ku rwego rwa mbere kandi zaragombaga gutangwa, no ku burenganzira Mukabadege Liliane afite ku mutungo wa Ndahimana Jean Bosco; Inzu ifite UPI: 2/08/01/03/7738, iri mu Murenge wa Gacurabwenge, Akagari ka Kigembe; inzu ifite UPI: 2/08/10/05/5629, iherereye mu Murenge wa Rugarika, Akagari ka Sheli; inzu ifite UPI 2/08/10/04/3714, iri mu Murenge wa Rugarika, Akagari ka Nyarubuye, n‘isambu irimo ishyamba ifite UPI:2/08/01/03/7825, iri mu Murenge wa Gacurabwenge, Akagari ka Kigembe, zose zanditse kuri Ndahimana Jean Bosco wenyine gusa, ari imitungo Ndahimana Jean Bosco yahahanye na Mukamana Annonciata, bakaba bagomba kuyigabana ku buryo bungana, batabasha kumvikana uburyo bayigabanamo, ikagurishwa, bakagabana amafaranga avuyemo, buri wese agatwara ½ cyayo;

## Page 6

Inzu yonyine itari kumwe n’isambu yubatse mu sambu ya Succession Seburimbwa Joseph ifite UPI: 2/08/12/02/3962, iherereye mu Mudugudu wa Rugogwe, Akagari ka Kabagesera, Umurenge wa Runda, Akarere ka Kamonyi, ari umutungo Ndahimana Jean Bosco yahahanye na Mukamana Annonciata, bakaba bagomba kuyigabana ku buryo bungana, batabasha kumvikana uburyo bayigabanamo, ikagurishwa, bakagabana amafaranga avuyemo, buri wese agatwara kimwe cya kabiri (½) cyayo; Inzu ifite UPI 2/08/10/05/5184, iherereye mu Murenge wa Rugarika, Akagari ka Sheli yanditse kuri Ndahimana Jean Bosco na Ntigurirwa Daniel; inzu ifite UPI 2/08/01/04/3835, iherereye mu Murenge wa Gacurabwenge, Akagari ka Nkingo yanditse kuri Ndahimana Jean Bosco na Kanakuze Marie Louise n‘inzu ifite UPI 2/08/12/02/3681, iherereye mu Murenge wa Runda, Akagari ka Kabagesera yanditse kuri Ndahimana Jean Bosco na Habumugisha Célestin , aho Ndahimana Jean Bosco agiye afite 50% kuri buri mutungo, urwo ruhare afite kuri buri mutungo ari umutungo yahahanye na Mukamana Annonciata, bakaba bagomba kugabana urwo ruhare rwa 50% kuri iyo mitungo, buri wese agatwara 25% bya 50% afite kuri buri mutungo, batashobora kumvikana uburyo bagabana, uruhare Ndahimana Jean Bosco yari afite kuri buri mutungo rukagurishwa bakagabana amafaranga avuyemo ku buryo bungana; Ndahimana Jean Bosco aha Mukamana Annonciata indishyi atahawe ku rwego rwa mbere zingana n’amafaranga y’u Rwanda ibihumbi magana atanu (500.000Frw) y’igihembo cya Avoka n’amafaranga y’u Rwanda ibihumbi ijana (100.000Frw) y’ikurikiranarubanza ; Mukabadege Liliane afite uburenganzira n’inyungu ku mitungo iburanwa hagati ya Ndahimana Jean Bosco na Mukamana Annonciata, ariko ku ruhande rw’umugabo we Ndahimana Jean Bosco gusa ; Ndahimana Jean Bosco asubiza Mukamana Annonciata amafaranga y’u Rwanda ibihumbi mirongo ine (40.000Frw) y’ingwate y’amagarama yatanze ajurira. [7] Ku wa 24/06/2021, Mukamana Béatrice mu izina ry’umuryango wa Seburimbwa Joseph yatambamiye imikirize y’urubanza RCA00013/2019/HC/NYZ rwaciwe n’Urukiko Rukuru, Urugereko rwa Nyanza, ku wa 15/5/2020, ikirego cye cyandikwa kuri RC00004/2021/HC/NYZ avuga ko mu mitungo Urukiko rwategetse ko Ndahimana Jean Bosco na Mukamana Annonciata bagabana, harimo n’imitungo y’abazungura ba Seburimbwa Joseph, igizwe n’inzu yubatse mu isambu yabo ifite UPI: 2/08/12/02/3962 n’isambu yabo ibaruye kuri UPI: 2/08/10/04/3714 iherereye mu Murenge wa Rugarika, Akagari ka Nyarubuye. Bityo ko asaba ko urubanza RCA00013/2019/HC/NYZ rwahinduka, imitungo y’abazungura ba Seburimbwa Joseph ikavanwa mu yo bagomba kugabana. [8] Ku wa 10/07/2021, Habumugisha Célestin na we yatambamiye imikirize y’urubanza RCA00013/2019/HC/NYZ rwaciwe ku wa 15/5/2020 n’Urukiko Rukuru, Urugereko rwa Nyanza, ikirego cye cyandikwa kuri RC00005/2021/HC/NYZ, avuga ko yamenye imikirize yarwo ku wa 08/06/2021, ko mu mitungo Ndahimana Jean Bosco na Mukamana Annonciata bagabana, harimo inzu ye yubatse mu kibanza cye gifite UPI :2/08/12/02/3681, yubakanye na Ndahimana Jean Bosco, ariko ko yasubije Ndahimana Jean Bosco uruhare rwe, rungana n’amafaranga y’u Rwanda miliyoni

## Page 7

imwe n’ibihumbi magana atanu (1.500.000Frw), maze akegukana iyo nzu ikaba iye n’umuryango we. Bityo ko asaba ko urubanza RCA00013/2019/HC/NYZ atambamira rwahinduka, umutungo we ugakurwa mu mitungo Ndahimana Jean Bosco na Mukamana Annonciata bagomba kugabana. Izo manza zombi zarahujwe ziburanishirizwa hamwe mu rubanza rumwe RC00005/2022/HC/NYZ- RC00004/2021/HC/NYZ. [9] Mu gihe cy’iburanisha Mukamana Annonciata yatanze inzitizi zikurikira : Iyo kutakira ikirego cyatanzwe na Mukamana Béatrice kubera kutubahiriza ibihe byo kurega, kuko urubanza RCA00013/2019/HC/NYZ rutambamirwa rureba abazungura ba Seburimbwa Joseph akaba na we ababarirwamo, kandi ko ubwo baburanaga mu Rukiko Rwisumbuye rwa Muhanga, Ndahimana Jean Bosco yavuze ko ahagarariye abo bazugura, ibyo bikaba bivuze ko yarumumenyeshejwe, bityo kuvuga ko yarumenye ku wa 07/06/2021 nta shingiro byahabwa kuko atagaragaza uwarumumenyesheje. Iyo kutakira ikirego cyatanzwe na Mukamana Béatrice kubera kutagira inyungu, ububasha n’ubushobozi byo gutambamira urubanza yatambamiye kuko yatanze ikirego ku giti cye bivuze ko atambamira ibitari ibye, kuko ntakigaragaza ko ari abazungura ba Seburimbwa Joseph bamutumye, kandi akaba atagaragara mu cyemezo cyatazwe kigaragaza abazungura ba Seburimbwa Joseph, bityo ikirego cye kikaba kidakwiye kwakirwa. Iyo kutakira ikirego cya Habumugisha Célestin kubera kurenza ibihe byo gutambamira urubanza RCA00013/2019/HC/NYZ, kuko mu rubanza rwaciwe n’Urukiko Rwisumbuye rwa Muhanga yarufashemo ijambo. [10] Mukamana Béatrice yireguye kuri izo nzitizi avuga ko nta shingiro zifite, kubera ko urubanza RCA00013/2019/HC/NYZ atambamira yarumenye ku wa 07/06/2021, Umuhesha w’Inkiko aje kururangiza, akaba ari nabwo yamenye ko n’umutungo w’umuryango we uri mu byaburanywe. Kandi ko na we ari mu bagize umuryango wa Seburimbwa Joseph, ibiburanwa aramutse abigaruje byagaruka mu muryango, akaba atari ngombwa ko ahabwa procuration. [11] Habumugisha Célestin we yireguye ku nzitizi zatanzwe avuga ko yamenye urubanza RCA00013/2019/HC/NYZ atambamira ku wa 08/06/2021, ari uko ahamagawe n’abantu bakamubwira ko hari Umuhesha w’inkiko waje kurangiza urubanza, kandi ko afite ububasha n’ubushobozi kuko ari mwene Seburimbwa Joseph. [12] Mukabadege Liliane yireguye avuga ko inzitizi zatanzwe na Mukamana Annonciata zitahabwa ishingiro, kuko kuba mu rubanza RCA00013/2019/HC/NYZ haburanwemo imitungo afitiye uburenganzira, nta cyamubuza kuyiregera. [13] Ndahimana Jean Bosco yireguye kuri izo nzitizi avuga ko abatambamiye urubanza ari bamwe mu bazungura ba Seburimbwa Joseph, ko Urukiko rushobora kubahamagaza cyangwa bakaza mu rubanza ku bushake, kandi ko Mukamana Béatrice ahagarariye abazungura nk’umwe muri bo, kuko atatanze ikirego ku giti cye.

## Page 8

[14] Ku wa 04/01/2023, Urukiko Rukuru, Urugereko rwa Nyanza, nyuma yo gusuzuma inzitizi zatanzwe na Mukamana Annonciata rwemeje ko : Izo nzitizi zifite ishingiro kuri bimwe ; Ikirego cyo gutambamira imikirize y’urubanza RCA00013/2019/HC/NYZ cyatazwe na Mukamana Béatrice kitakiriwe ngo gisuzumwe ; Inzitizi zisaba kutakira ikirego cyatanzwe na Habumugisha Célestin nta shingiro zifite; Ikirego cya Habumugisha Célestin cyo gutambamira urubanza RCA00013/2019/HC/NYZ gikomeza kuburanishwa ku bindi, iburanisha rikazasubukurwa ku wa 12/04/2023 saa tatu za mu gitondo ; Mukamana Béatrice yishyura Mukamana Annonciata amafaranga y’u Rwanda ibihumbi magana atanu (500.000Frw) y’igihembo cya Avoka ; Amafaranga y’igarama yatanzwe na Mukamana Béatrice ahwaye n’ibyakozwe mu rubanza ; Amagarama abaye asubitswe ku birebana n’ikirego cya Habumugisha Célestin. [15] Ku bijyaye n’urubanza mu mizi, Mukamana Annonciata yireguye ku kirego cya Habumugisha Célestin avuga ko muri urwo rubanza, Habumugisha Célestin atigeze yamburwa uruhare rwe rwa 50% ku mutungo aburana w’inzu ifite UPI :2/08/12/02/3681, iherereye mu Murenge wa Runda, Akagari ka Kabagesera yanditse kuri Ndahimana Jean Bosco na Habumugisha Célestin. Ko ibivugwa na Habumugisha Célestin yasubije Ndahimana Jean Bosco uruhare rwe kuri uwo mutungo akawegukana wose nta shingiro bifite, kuko mu manza zose baburanye yabaga ahari ariko atigeze agoboka mu rubanza ngo agaragaze ko uwo mutungo ari uwe 100%. Ndahimana Jean Bosco we yireguye avuga ko ibivugwa na Habumugisha Célestin bifite ishingiro, kuko amafaranga yayamuhaye koko, nk’uko bigaragazwa n’amasezerano bagiranye yikuraho uruhare rwe. [16] Mu rubanza RC00005/2022/HC/NYZ-RC00004/HC/NYZ rwaciwe ku wa 31/05/2023, Urukiko Rukuru, Urugereko rwa Nyanza, rwemeje ko : Ikirego cyo gutambamira imikirize y’urubanza RCA00013/2019/HC/NYZ rwaciwe ku wa 15/05/2020 n’Urukiko Rukuru, Urugereko rwa Nyanza, cyatanzwe na Habumugisha Célestin nta shingiro gifite ; Habumugisha Célestin yishyura Mukamana Annonciata indishyi zingana n’amafaranga ibihumbi magana atanu (500.000 Frw) y’ igihembo cya Avoka, kuva uru rubanza rubaye ndakuka, bitaba ibyo agakurwa mu bye ku ngufu za Leta Amagarama yatanzwe na Habumugisha Célestin ahwanye n’ibyakozwe muri uru rubanza, akaba aheze mu isanduku ya Leta. [17] Mukamana Béatrice na Habumugisha Célestin bajuririye uru Rukiko, ubujurire bwabo bwandikwa kuri RCA00001/2023/CA–RCA00009/2023/CA, ruburanishwa mu ruhame ku wa 04/03/2024, Mukamana Béatrice na Habumugisha Célestin bahagarariwe na Me Nyakubandwa

## Page 9

Appolinarie, Ndahimana Jean Bosco yunganiwe na Me Sharangabo Jean de Dieu akanahagararira Mukabadege Liliane, Mukamana Annonciata yunganiwe na Me Nkundiye Jean. [18] Mu myanzuro no mumiburanire ye, Mukamana Béatrice avuga ko Urukiko Rukuru, Urugereko rwa Nyanza, rwanze kwakira ikirego cye cyo gutambamira urubanza RCA00013/2019/HC/NYZ kandi na we ari umwe mu bazungura ba Seburimbwa Joseph, akaba asanga cyaragombaga kwakirwa, hakagobokeshwa abandi bene Seburimbwa Joseph bafite uburenganzira kuri uwo mutungo bagaragajwe ku rutonde rwashyikirijwe urwo Rukiko, hashingiwe ku biteganywa n’ingingo ya 33, agace ka 4, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi iz’umurimo n’iz’ubutegetsi. Habumugisha Célestin avuga ko mu rubanza rujuririrwa Urukiko rwirengagije ibimenyetso, bigaragaza ko mu mitungo Urukiko rwemeje ko Ndahimana Jean Bosco agomba kugabana na Mukamana Annonciata harimo umutungo we ufite UPI: 2/08/12/02/3681, asaba ko wavanwa mu mitungo bazagabana. Ndahimana Jean Bosco yiregura avuga ko ikirego cya Mukamana Béatrice cyagombaga kwakirwa, kandi iyo nzu igahabwa abazungura ba Seburimbwa Joseph kuko ari iyabo, hamwe n’isambu iri ku Rugarika, bikavanwa mu mitungo ye na Mukamana Annonciata. Avuga kandi iyo nzu iri mu kibanza gifite UPI: 2/08/12/02/3681 ari iya Habumugisha Célestin, kuko yamusubije uruhare rwe, amuha 1.500.000Frw, akaba yarayakoresheje amasuku ku mazu yo kuri kaburimbo mu Nkoto. [19] Mukamana Annonciata we yiregura avuga ko ubujurire bwa Mukamana Béatrice nta shingiro bufite, kuko yatanze ikirego cyo gutambamira urubanza RCA00013/2019/HC/NYZ mu izina rye bwite, kandi mu myanzuro ye avuga ko ahagarariye abazungura ba Seburimbwa Joseph, ariko ntagaragaze ko bamuhaye uburenganzira bwo kubahagararira, ko kandi ibyo avuga ko abo bazungura bagombaga kugobokesha muri urwo rubanza bitari gukosora amakosa yakoze arega ku giti cye, ahubwo ko niba abo bazungura barumvaga bafite uburenganzira ku mutungo waburanywe mu rubanza RCA00013/2019/HC/NYZ, ari bo ubwabo bari gutanga ikirego, byaba ngombwa bagasaba ko abahagararira. Avuga kandi nta mutungo wa Hamugisha Célestin, Ndahimana Jean Bosco na Mukamana Annonciata bigeze baburana, ko inzu Habumugisha Célestin aregera ayifiteho uruhare rwe rwa 50%, kandi ko nta wigeze arukoraho, ko ariko indi 50 %, Urukiko rwemeje ari umutungo Ndahimana Jean Bosco yashakanye na Mukamana Annonciata mu gihe babanaga nk’umugabo n’umugore. Bityo ko ibyo Habumugisha Célestin avuga ko iyo 50% na yo yayegukanye ubwo yasubizaga Ndahimana Jean Bosco agaciro kayo kangana na 1.500.000Frw, Urukiko rwavuze ko ibyo bitashoboka kuko Ndahimana Jean Bosco nta burenganzira yari afite bwo kugurisha ubutaka yari asangiye na Mukamana Annonciata atabimuhereye uburenganzira. Ibindi byasabwe mu rubanza ni indishyi zo gushorwa mu manza, amafaranga y’ikurikiranarubanza n’igihembo cya Avoka. [20] Urukiko rushingiye kuri izo mpaka, rurasanga hakwiye gusuzumwa ibibazo bikurikira : Kumenya niba hari ikosa Urukiko Rukuru, Urugereko rwa Nyanza, rwakoze ryo kutakira ikirego cya Mukamana Béatrice cyo gutambamira urubanza RCA00013/2019/HC/NYZ ; Kumenya niba hari ibimenyetso byirengagijwe bigaragaza ko mu mitungo Urukiko rwategetse ko Ndahimana Jean Bosco agabana na Mukamana Annonciata harimo n’umutungo wa Habumugisha Célestin ;

## Page 10

Kumenya niba indishyi zo gushorwa mu manza, amafaranga y’ikurikiranarubanza n’igihembo cya Avoka bisabwa muri uru rubanza bifite ishingiro. II. ISESENGURA RY’IBIBAZO BIGIZE URUBANZA 1.Kumenya niba hari ikosa Urukiko Rukuru, Urugereko rwa Nyanza, rwakoze ryo kutakira ikirego cya Mukamana Béatrice cyo gutambamira urubanza RCA00013/2019/HC/NYZ [21] Uhagarariye Mukamana Béatrice avuga ko Urukiko Rukuru, Urugereko rwa Nyanza rwanze kwakira ikirego cya Mukamana Béatrice cyo gutambamira urubanza RCA00013/2019/HC/NYZ kandi na we ari umwe mu bazungura ba Seburimbwa Joseph, akaba asanga ikirego cye cyaragombaga kwakirwa, hakagobokeshwa abandi bene Seburimbwa Joseph bafite uburenganzira kuri uwo mutungo bagaragajwe ku rutonde rwashyikirijwe urwo Rukiko, hashingiwe ku biteganywa n’ingingo ya 33, agace ka 4, y’Itegeko No22/2018 ryo ku wa 29/04/2018 ryavuzwe haruguru; cyane ko mu mitungo Urukiko rwategetse ko Ndahimana Jean Bosco agomba kugabana na Mukamana Annonciata harimo iy’umuryango wa Seburimbwa Joseph, bityo ko ikirego cye cyagombaga kwakirwa kuko afite uruhare kuri uwo mutungo w’umuryango. [22] Avuga kandi ko kuba Ndahimana Jean Bosco na Habumugisha Célestin ari bene Seburimbwa Joseph bitari kubuza abandi bazungura be kugobokeshwa mu rubanza. Asobanura ko inzu iri mu kibanza gifite UPI: 2/08/12/02/3962 ari iya Seburimbwa Joseph atari iya Ndahimana Jean Bosco na Mukamana Annonciata, ko ari we wayubatse, ko aba bombi bagombaga kugabana imitungo bashakanye gusa nk’uko biteganywa n’ingingo ya 39 y’Itegeko ryerekeye ihohoterwa rishingiye ku gitsinda (GBV), akaba asanga nta mitungo ya Seburimbwa Joseph yagombaga gushyirwa mu mitungo bagomba kugabana, bityo ko Urukiko Rukuru, Urugereko rwa Nyanza, rwakoze ikosa ryo kwemeza ko bagabana iyo nzu uretse ubutaka yari iteretseho. Asoza asaba ko mu gihe Urukiko rwakwemeza ko ikirego cye cyagombaga kwakirwa, rwategeka ko urubanza rusubira mu Rukiko Rukuru, Urugereko rwa Nyanza. [23] Mukamana Annonciata n’umwunganira biregura kuri iyi ngingo y’ubujurire ya Mukamana Béatrice bavuga ko nta shingiro ifite, kuko yatanze ikirego cyo gutambamira urubanza RCA00013/2019/HC/NYZ mu izina rye bwite, kandi mu myanzuro ye avuga ko ahagarariye abazungura ba Seburimbwa Joseph, ariko atagaragaza niba abo bazungura baramuhaye uburenganzira bwo kubahagararira, bityo ko kuba yaratanze icyo kirego avuga ko ahagarariye abo bazungura, Urukiko rushingiye ku ngingo ya 129 y’Itegeko No 22/2018 ryavuzwe haruguru rwasanze nta bubasha n’ubushobozi yari afite bwo guhagararira abazungura ba Seburimbwa Joseph, ko rero basanga nta kosa rwakoze. [24] Bavuga kandi ko ibyo Mukamana Béatrice avuga ko abo bazungura bagombaga kugobokeshwa muri urwo rubanza bitari gukosora amakosa yakoze arega ku giti cye, ahubwo ko niba abo bazungura barumvaga bafite uburenganzira ku mutungo waburanywe mu rubanza RCA00013/2019/HC/NYZ, ari bo ubwabo bari gutanga ikirego, byaba ngombwa bagasaba ko abahagararira, kandi ko iyo basanga bafite inyungu zo gutambamira urwo rubanza, bari kumuha uburenganzira bwo kubatangira ikirego mbere yuko agitanga mu izina rye. Bityo ko nta mpamvu yo

## Page 11

kubagobokesha nk’uko n’Urukiko rwabibonye mu bika bya 16 na 17 by’urubanza rwajuririwe, kutakira ikirego cye bikaba bifite ishingiro, ko bigaragara ko abavandimwe be nta nyungu bari bafite muri urwo rubanza rwo kuregera inzu Ndahimana Jean Bosco na Mukamana Annonciata basangiye, kuko Urukiko rwategetse ko bayigabana kubera ko bayishakanye ; bityo ubujurire bwa Mukamana Béatrice nta shingiro bufite. [25] Bakomeza bavuga ko mu rubanza rwatambamiwe, haburana Mukamana Annonciata na Ndahimana Jean Bosco, Urukiko rwagaragaje ko inzu iburanwa Ndahimana Jean Bosco yayishakiyemo Mukamana Annonciata bagenda bayivugurura nk’uko bigaragazwa na raporo y’Ubuyobozi bw’Inzego z’Ibanze yakorewe Rugogwe ku wa 30/07/2019; kandi ko abazungura ba Seburimbwa Joseph bari bahagarariwe na Ndahimana Jean Bosco nk’uko yabivugaga aburana, ko muri icyo gihe urwo rubanza ruburanwa ari bwo abo bazungura bagombaga kurugobokamo, bityo ko nta kosa urwo Rukiko rwakoze kwemeza ko nubwo inzu yubatse ku butaka bw’abazungura ba Seburimbwa Joseph, ariko iyo nzu yonyine ari iya Ndahimana Jean Bosco na Mukamana Annonciata. [26] Bavuga na none ko Urukiko rw’Ubujurire rubibonye ukundi rukakira ikirego cyo kugobokesha abazungura ba Seburimbwa Joseph rwazategeka ko cyoherezwa mu Rukiko Rukuru, Urugereko rwa Nyanza, kugira ngo uwaba atsinzwe urubanza azagire amahirwe yo kujurira. [27] Ndahimana Jean Bosco n’umwunganira akanahagararira Mukabadege Liliane bavuga ko ikirego cya Mukamana Béatrice cyagombaga kwakirwa, kuko nawe ari mwene Seburimbwa Joseph, kandi iyo nzu ikaba yanditse ku abazungura ba Seburimbwa Joseph, ko kuba Urukiko rwaremeje ko ikibanza iyo nzu yubatseho ari icy’abazungura ba Seburimbwa Joseph, basanga n’inzu ari iyabo kuko iyo nzu yubatswe muri icyo kibanza mbere y’uko uwo mutungo ubarurwa muri 2012, bityo ko iyo nzu hamwe n’isambu iri ku Rugarika bikwiye kuvanwa mu mitungo ye na Mukamana Annonciata, bigahabwa abazungura ba Seburimbwa Joseph kuko ari ibyabo. UKO URUKIKO RUBIBONA [28] Impaka kuri iyi ngingo zishingiye ku kumenya niba ikirego cya Mukamana Béatrice cyo gutambamira urubanza RCA00013/2019/HC/NYZ cyaragombaga kwakirwa. [29] Ingingo ya 150, agace 5 n’aka 6, y’Itegeko No 22/2018 ryo ku wa 29/04/2018 ryibukijwe haruguru, iteganya ibikurikira : “Ubujurire bukorwa mu buryo bw’umwanzuro utanga ikirego, ugaragaza 5° urutonde rw’inenge z’urubanza zisabirwa gukosorwa n’ibindi bibazo bigomba gusuzumwa ; 6° ibisobanuro kuri buri nenge cyangwa kuri buri kibazo bigaragaza amakosa yakozwe n’uburyo agomba gukosorwa hashingiwe ku mategeko n’ibimenyetso n’igisabwa urukiko”. Ingingo ya 3 y’Itegeko N° 15/2004 ryo ku wa 12/6/2004 ryerekeye ibimenyetso mu manza n’itangwa ryabyo iteganya ko buri muburanyi agomba kugaragaza ukuri kw’ibyo aburana. [30] Mu rubanza RADAA00011/2022/CA rwaciwe ku wa 12/06/2023, haburana Nzabarimana Abdallahaman n’Umujyi wa Kigali, uru Rukiko rwasobanuye ko rusomeye hamwe izi ngingo zombi rusanga zumvikanisha ko ujurira afite inshingano yo kugaragaza ko hari inenge ziri mu rubanza rujuririrwa n’ibimenyetso bishimangira ko ibyo Urukiko rwemeje atari byo. Mu yandi

## Page 12

magambo ujurira agomba kugaragaza ikosa ryakozwe mu rubanza rujuririrwa, akagaragaza amategeko ashingiraho n’ibimenyetso bihamya ko ibyo avuga ari ukuri1. [31] Ku birebana n’uru rubanza, dosiye igaragaza ko mu rubanza RC00004/HC/NYZ hareze Mukamana Béatrice mu izina rye, atambamira urubanza RCA00013/2019/HC/NYZ, kandi ni nawe wishyuye ingwate y’amagarama mu izina rye nk’uko bigaragara mu gice cy’urwo rubanza cyiswe “Court fees”, aho kigaragaza ko yishyuye amafaranga ibihumbi mirongo ine (40,000Frw). [32] Dosiye y’urubanza igaragaza kandi ko mu gihe Mukamana Béatrice yatangaga ikirego cyo gutambamira urubanza RCA00013/2019/HC/NYZ, mu mwanzuro we yasobanuye ko Ndahimana Jean Bosco na Mukamana Annonciata baburanye imitungo mu rubanza RCA00013/2019/HC/NYZ, mu mitungo Urukiko Rukuru, Urugereko rwa Nyanza, rwategetse ko bagomba kugabana, harimo n’imitungo y’umuryango igizwe: 1) n’inzu yubatse mu isambu ya Succession Seburimbwa Joseph ifite UPI :2/08/12/02/3962, n’isambu y’Abazungura ba Seburimbwa Joseph ibaruye kuri UPI 2/08/10/04/3714 iherereye mu Murenge wa Rugarika, Akagari ka Nyarubuye; akaba ariyo mpamvu umuryango wa Seburimbwa Joseph, uhagarariwe na Mukamana Béatrice, utambamiye urwo rubanza usaba ko uru rubanza rwahinduka imitungo yawo ikavanwa mu yo bagomba kugabana. Yasobanuye kandi urwo Rukiko rwakoze amakosa yo gutegeka ko Mukamana Annonciata na Ndahimana Jean Bosco bagabana imitungo y’Abazungura ba Seburimbwa, ifite UPI :2/08/12/02/3962 na UPI 2/08/10/04/3714, kandi iyi mitungo atari iyabo nk’uko bigaragazwa n’amakuru ava mu Biro by’Ubutaka, akaba ariyo mpamvu uyu muryango utambamiye uru rubanza usaba ko rwavanwaho, rugasuzumwa bundi bushya, bagasubizwa imitungo yabo. [33] Imikirize y’urubanza rujuririrwa RC00005/2022/HC/NYZ-RC00004/HC/NYZ igaragaza ko ikirego cya Mukamana Béatrice kitakiriwe kuko yagitanze mu izina rye, ariko mu myanzuro ye akavuga ko ahagarariye umuryango wa Seburimbwa Joseph kandi atagaragaza procuration ya bene Seburimbwa Joseph. [34] Urukiko rurasanga, kuba Mukamana Béatrice yaratanze ikirego gitambamira urubanza RCA00013/2019/HC/NYZ mu izina rye, akaba ari nawe wishyura ingwate y’amagarama, ariko mu myanzuro ye akavuga ko urubanza rutambamiwe n’umuryango wa Seburimbwa Joseph, kandi nta kimenyetso na kimwe agaragaza cyerekana ko uwo muryango wamuhaye ububasha bwo kuwuhagararira, no kuwutangira ikirego, ndetse uwo muryango ukaba utarigeze utambamira urwo rubanza; ntaho Urukiko Rukuru, Urugereko rwa Nyanza, rwari guhera rwakira ikirego cye, kuko nta bubasha yari afite bwo guhagararira umuryango utamutumye, cyane ko ingingo ya 3 y’Itegeko No 22/2018 ryo ku wa 29/04/2018 ryavuzwe haruguru iteganya ko ikirego cyakirwa mu rukiko iyo urega afite ububasha, inyungu n’ubushobozi byo kurega2. [35] Ku byo uhagarariye Mukamana Béatrice avuga ko ari umwe mu bazungura ba Seburimbwa Joseph, akaba asanga ikirego cye cyaragombaga kwakirwa, hakagobokeshwa abandi bene Seburimbwa Joseph hashingiwe ku biteganywa n’ingingo ya 33, agace ka 4, y’Itegeko No 22/2018 ryo ku wa 29/04/2018 ryavuzwe haruguru, Urukiko rurasanga nta shingiro bifite, kuko nk’uko 1 Reba igika cya 45. 2 Ikirego cyakirwa mu rukiko iyo urega afite ububasha, inyungu n’ubushobozi byo kurega, keretse igihe itegeko ribiteganya ukundi.

## Page 13

byagaragajwe haruguru, Mukamana Béatrice yatanze ikirego avuga ko ahagarariye umuryango wa Seburimbwa Joseph, ariko ntiyabasha kugaragaza ikimenyetso na kimwe cyerekana ko uwo muryango wamuhaye ububasha bwo kuwuhagararira; kuba rero nta bubasha uwo muryango wamuhaye birumvikana ko ikirego cye kitagombaga kwakirwa. [36] Naho ibyo avuga ko abandi bazungura ba Seburimbwa Joseph bagombaga kugobokeshwa, Urukiko rurasanga ibyo byari gushoboka mu gihe atari kurega avuga ko ahagarariye umuryango wa Seburimbwa Joseph, nyamara nk’uko byagaragajwe haruguru, we yareze avuga ko ahagarariye umuryango wa Seburimbwa Joseph, hanyuma Urukiko rusuzuma niba hari ububasha uwo muryango wamuhaye, rusanga ntabwo. Uretse n’ibyo ingingo ya 33, igika cya 4, y’Itegeko No 22/2018 ryo ku wa 29/04/2018 ryavuzwe haruguru ashingiraho iteganya ko urega ari we ufite inshingano zo kugobokesha abandi basangiye ikiburanwa3, nyamara haba mu myanzuro y’urubanza rujuririrwa, haba mu nama ntegurarubanza y’urwo rubanza, nta nahamwe Mukamana Béatrice yigeze asaba ko bene Seburimbwa Joseph bagobokeshwa, bikaba rero bitumvikana uburyo bari kugobokeshwa kandi atabisabye. [37] Hashingiwe ku ngingo z’amategeko zagaragajwe haruguru, no kubisobanuro byatanzwe, Urukiko rurasanga nta kosa Urukiko Rukuru, Urugereko rwa Nyanza, rwakoze ryo kutakira ikirego cya Mukamana Béatrice gitambamira urubanza RCA00013/2019/HC/NYZ ; bityo ubujurire bwe nta shingiro bufite. 2.Kumenya niba hari ibimenyetso byirengagijwe bigaragaza ko mu mitungo Urukiko rwategetse ko Ndahimana Jean Bosco agabana na Mukamana Annonciata harimo n’umutungo wa Habumugisha Célestin [38] Uhagarariye Habumugisha Célestin avuga ko mu rubanza RC00005/2022/HC/NYZ- RC00004/HC/NYZ rujuririrwa, Urukiko rwirengagije ibimenyetso, bigaragaza ko mu mitungo Urukiko rwemeje ko Mukamana Annonciata agomba kugabana na Ndahimana Jean Bosco harimo umutungo wa Habumugisha Célestin, asaba ko wavanwa mu mitungo bazagabana. [39] Asobanura ko umutungo ufite UPI : 2/08/12/02/3681 ubaruye kuri Habumugisha Célestin na Ndahimana Jean Bosco bonyine, ko uyu yasubijwe uruhare rwe kuri uwo mutungo, akaba anabyemera, kandi ko bawibarujeho mu mwaka wa 2012, mu gihe yabanaga na Mukamana Annonciata. Akomeza avuga ko amasezerano y’ubugure atari yo arimo kuburanwa, kandi ko afite agaciro hagati yabo kuko bayemeranya, kandi ko yakorewe mu muryango nk’uko no kubaha ikibanza byabereye mu muryango. Avuga na none ko bagurishije uwo muryango ari uko Ubuyobozi bubategetse kuvugurura amazu yabo yari kuri kaburimbo, maze asubiza Ndahimana Jean Bosco uruhare rwe kugira ngo rumufashe kuvugurura ayo mazu, bityo ko uwo mutungo ugomba kuvanwa mu mitungo Ndahimana Jean Bosco agomba kugabana na Mukamana Annonciata. [40] Mukamana Annonciata n’umwunganira bavuga ko nta mutungo wa Habumugisha Célestin, Ndahimana Jean Bosco na Mukamana Annonciata bigeze baburana, ko mu bika bya 14-20 by’urubanza RCA00013/2019/HC/NYZA, Urukiko rwasobanuye ko inzu Habumugisha Célestin aregera ayifiteho uruhare rwe rwa 50% ko nta wigeze arukoraho, ko ariko indi 50% Urukiko rwemeje ari umutungo Ndahimana Jean Bosco yashakanye na Mukamana Annonciata mu gihe 3 Iyo ikiburanwa gisangiwe n’abantu benshi, urega afite inshingano zo kubagobokesha

## Page 14

babanaga nk’umugabo n’umugore. Ko kuba Habumugisha Célestin avuga ko iyo 50 % na yo yayegukanye ubwo yasubizaga Ndahimana Jean Bosco agaciro kayo kangana na miliyoni imwe n’ibihumbi magana atanu (1.500.000Frw), Urukiko rwavuze ko ibyo bitashoboka kuko Ndahimana Jean Bosco nta burenganzira yari afite bwo kugurisha ubutaka yari asangiye na Mukamana Annonciata atabimuhereye uburenganzira. [41] Bavuga kandi ko mu gika cya 17 cy’urubanza RC00005/2022/HC/NYZ-RC00004/HC/NYZ, Urukiko rushingiye ku ngingo ya 23, igika cya mbere cy’Itegeko No 27/2021 ryo ku wa 10/06/2021 rigenga ubutaka, iteganya ko amasezerano y’ihererekanya ry’uburenganzira ku butaka akorwa mu nyandiko ishyirwaho umukono n’abahererekanya uburenganzira ku butaka, akemezwa kandi agahamywa n’umukono wa Noteri w’ubutaka cyangwa undi munoteri ubihererwa uburenganzira n’Umubitsi Mukuru w’inyandikompamo z’ubutaka, rwasobanuye ko amasezerano yakozwe na Ndahimana Jean Bosco ku mutungo asangiye na Mukamana Annonciata atashingirwaho. Bityo bakaba basanga Ndahimana Jean Bosco atari kugurisha uruhare rwa 50% kandi arufatanyije na Mukamana Annonciata. Bavuga ko ibyo Ndahimana Jean Bosco avuga bitagomba guhabwa ishingiro, kuko Butorana ari umukozi wa Ndahimana Jean Bosco, Uwiragiye Gaspard akaba umwana wa Habumugisha Célestin. [42] Bavuga na none ko Habumugisha Célestin yivugiye ko mu ikorwa ry’ayo masezerano y’ubugure yabanaga na Mukamana Annonciata, ariko ko nta burenganzira yigeze amuha bwo kugurisha iyo nzu, ko rero ayo masezerano nta gaciro afite. Byongeye kandi, ko kuba ayo masezerano atarakorewe imbere ya notaire ari indi mpamvu igomba gutuma ata agaciro. [43] Ndahimana Jean Bosco n’umwunganira bavuga ko iyo nzu ari iya Habumugisha Célestin, kuko yamusubize uruhare rwe, amuha amafaranga angana na miliyoni imwe n’ibihumbi magana atanu (1.500.000Frw), akaba yarayakoresheje amasuku ku mazu yo kuri kaburimbo mu Nkoto, ko ikimenyetso cy’uko ayo mafaranga ari yo yavuguruye ayo mazu atatu (3) ari Habumugisha Célestin ubyemeza, Buturano Willy, Uwiragiye Gaspard na Mukamana Annonciata. UKO URUKIKO RUBIBONA [44] Ingingo ya 12, igika cya 1, y’Itegeko No 22/2018 ryo ku wa 29/04/2018 ryibukijwe haruguru, iteganya ibikurikira : “Urega agomba kugaragaza ibimenyetso by’ibyo aregera. Iyo abibuze, uwarezwe aratsinda.” [45] Ingingo ya 2 y’Itegeko N° 15/2004 ryo ku wa 12/06/2004 naryo ryibukijwe haruguru, iteganya ibikurikira : “Ikimenyetso cyo mu rubanza ni icyo ari cyo cyose kigaragaza ukuri ku byabaye”. Ingingo ya 3, igika cya 1, ikagira iti: “Buri muburanyi agomba kugaragaza ukuri kw’ibyo aburana”. [46] Izi ngingo zisanzwe zikoreshwa mu manza zitandukanye zumvikanisha ko umuburanyi utanze ikirego mu Rukiko aba afite inshingano ikomeye yo kugaragaza ibimenyetso bihamya nta shiti ko ibyo aregera ari ukuri, iyo atabashije kubigaragaza, ikirego cye nta shingiro gihabwa. Mu

## Page 15

yandi magambo, uwatangije urubanza agomba kuba afite ibimenyetso bidashidikanywaho bihamya neza ko ibyo avuga ari ukuri.4 [47] Ku birebana n’uru rubanza, dosiye igaragaza ko inzu iri mu kibanza gifite UPI: 2/08/12/02/3681, iherereye mu Mudugudu wa Rugogwe, Akagari ka Kabagesera, Umurenge wa Runda, Akarere ka Kamonyi, Intara y’Amajyepfo, ibaruye kuri Habumugisha Célestin na Ndahimana Jean Bosco, buri wese akaba ayifiteho uruhare rungana na 50%. Igaragaza kandi ko mu rubanza RCA00013/2019/HC/NYZA, Urukiko Rukuru, Urugereko rwa Nyanza, rwemeje ko urwo ruhare Ndahimana Jean Bosco afite ku nzu ifite UPI: 2/08/12/02/3681 ari umutungo yahahanye na Mukamana Annonciata, bakaba bagomba kugabana urwo ruhare rwa 50% kuri iyo nzu, buri wese agatwara 25% muri 50% bafite kuri uwo mutungo. [48] Nk’uko byagaragajwe harurugu, kuba inzu iri mu kibanza UPI: 2/08/12/02/3681 ibaruye kuri Ndahimana Jean Bosco na Habumugisha Célestin, kuba iyo nzu yarubatswe mu gihe Ndahimana Jean Bosco yabanaga na Mukamana Annonciata nk’uko nawe abyiyemerera, kuba kandi Urukiko Rukuru, Urugereko rwa Nyanza, rwaremeje ko Ndahimana Jean Bosco na Mukamana Annonciata bagomba kugabana uruhare Ndahimana Jean Bosco afite kuri iyo nzu ruhwanye na 50% kuko bayihahanye, buri wese agatwara 25%, Urukiko rurasanga nta kimenyetso Habumugisha Célestin atanga kivuguruza ibyashingiweho n’Urukiko Rukuru, Urugereko rwa Nyanza. [49] Ku byo Habumugisha Célestin avuga ko uruhare Ndahimana Jean Bosco yari afite kuri iyo nzu ruhwanye na 50% yarumusubije, ko uwo mutungo ari uwe, ukaba ugomba kuvanwa mu mitungo Ndahimana Jean Bosco agomba kugabana na Mukamana Annonciata, Urukiko rurasanga usibye kuba amasezerano avuga ashingiraho ntayo agaragara muri dosiye, nta nubwo Ndahimana Jean Bosco yemerewe kugurisha uruhare afite ku nzu iri mu kibanza gifite UPI: 2/08/12/02/3681 atabyumvikanyeho na Mukamana Annonciata, kuko uwo mutungo uri mu mitungo bahahanye nk’uko byemejwe n’Urukiko Rukuru, Urugereko rwa Nyanza, bikaba rero byumvikana ko uruhare ruhwanye na 50% Ndahimana Jean Bosco afite kuri iyo nzu, rugomba kuguma mu mitungo agomba kugabana na Mukamana Annonciata, bityo ubujurire bwa Habumugisha Célestin nta shingiro bufite. 3.Kumenya niba indishyi zo gushorwa mu manza, amafaranga y’ikurikiranarubanza n’igihembo cya Avoka bisabwa muri uru rubanza bifite ishingiro [50] Mukamana Annonciata n’umwunganira bashingiye ku biteganywa n’ingingo ya 111 y'Itegeko N°22/2018 ryo ku wa 29/04/2018 ryibukijwe haruguru, basaba Urukiko rw’Ubujurire gutegeka Habumugisha Célestin na Mukamana Béatrice kumuha miliyoni imwe (1.000.000Frw) y’indishyi kubera kumushora mu manza zidafite ishingiro, kumuha amafaranga miliyoni eshatu (3.000.000Frw) y’igihembo cya Avoka kuko ari imanza ebyiri zahurijwe mu rubanza rumwe, ndetse n’amafaranga ibihumbi magana atatu (300.000Frw) y’ikurikiranarubanza. 4 Reba urubanza RADAA 00011/2022/CA, rwaciwe n’Urukiko rw’Ubujurire ku wa 12/06/2023, hagati ya Nzabarimana Abdallahaman n’Umujyi wa Kigali, n’urubanza RS/INJUST/RC 00007/2021/CA rwaciwe ku wa 30/10/2023, haburana Karumuhinzi Baudoux Claire na Nyirakaziga Kabeja Anne Marie.

## Page 16

[51] Uhagarariye Mukamana Béatrice na Habumugisha Célestin yiregura ku ndishyi zisabwa na Mukamana Annonciata avuga ko nta shingiro zifite kuko ari we washoye imanza ashyira mu mitungo agomba kugabana na Ndahimana Jean Bosco imitungo itari iyabo. [52] Avuga kandi asaba Urukiko rw’Ubujuirre gutegeka Mukamana Annonciata guha Habumugisha Célestin na Mukamana Béatrice indishyi zingana na miliyoni ebyiri (2.000.000Frw) zikubiyemo amafaranga angana na miliyoni imwe (1.000.000Frw) y’igihembo cya Avoka na miliyoni imwe (1.000.000Frw) yo gushyorwa mu manza, kuri buri umwe, zose hamwe zikaba miliyoni enye (4.000.000Frw). [53] Ndahimana Jean Bosco n’umwunganira basaba Urukiko rw’Ubujurire gutegeka Mukamana Annonciata kumuha indishyi zingana namiliyoni eshatu (3.000.000Frw) kubera ko yanga ko batanga iby’andi, n’amafaranga y’igihembo cya Avoka n’ay’ikurikiranarubanza angana na miliyoni imwe (1.000.000Frw). [54] Mukamana Annonciata n’umwunganira biregura ku ndishyi Mukamana Béatrice na Habumugisha Célestin basaba bavuga ko ntazo bakwiye guhabwa kuko ari bo bishoye mu manza bajya gutambamira urubanza RCA00013/2019/HC/NYZA, ku birebana n’imitungo badafitiye uburenganzira. Bavuga kandi indishyi zisabwa na Ndahimana Jean Bosco ntacyo bazivugaho kuko Mukamana Annonciata atari we wareze, ko ahubwo aregwa, bityo ko akwiye kuzisaba abamureze. UKO URUKIKO RUBIBONA [55] Ingingo ya 111 y’Itegeko N° 22/2018 ryo ku wa 29/04/2018 ryibukijwe haruguru, iteganya ibikurikira : “Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. [56] Urukiko rurasanga amafaranga y’igihembo cya Avoka n’ikurikiranarubanza Mukamana Annonciata asaba afite ishingiro, kuko hari ibyo yatakaje akurikirana anabura uru rubanza, ariko ayo asaba nta bimenyetso ayatangira, ariyo mpamvu agomba kugenwa mu bushishozi bw’Urukiko; bityo rumugeneye amafaranga ibihumbi magana atanu (500.000Frw) y’igihembo cya Avoka n’amafaranga ibihumbi magana abiri (200.000Frw) y’ikurikiranarubanza kuri uru rwego, akaba agomba kwishyurwa na Mukamana Béatrice na Habumugisha Célestin, buri wese akishyura 350,000Frw yiyongera k’uyo bategetswe mu rubanza rujuririrwa, ahwanye n’ibihumbi magana atanu (500,000Frw) kuri buri wese. Ni ukuvuga ko buri wese agomba guha Mukamana Annonciata, ibihumbi magana inani mirongo itanu (850,000Frw). Naho miliyoni imwe (1.000.000Frw) y’indishyi zo gushorwa mu manza Mukamana Annonciata asaba nta shingiro zifite, kuko usibye kubivuga gusa, nta kimenyetso na kimwe atanga cyerekana uburyo abajuriye bamushoye mu manza ; uretse n’ibyo kujurira ni uburenganzira umuburanyi ahabwa n’Itegeko. III. ICYEMEZO CY’URUKIKO [57] Rwemeje ko ubujurire bwatanzwe na Mukamana Béatrice nta shingiro bufite.

## Page 17

[58] Rwemeje ko ubujurire bwatanzwe na Habumugisha Célestin nta shingiro bufite. [59] Rwemeje ko imikirize y’urubanza RC00005/2022/HC/NYZ- RC00004/HC/NYZ rwaciwe n’Urukiko Rukuru, Urugereko rwa Nyanza ku wa 31/05/2023, igumyeho. [60] Rutegetse Mukamana Béatrice na Habumugisha Célestin, buri wese, kwishyura Mukamana Annonciata, amafaranga ibihumbi magana atatu na mirongo itanu (350.000Frw) y’ikurikiranarubanza n’igihembo cya Avoka kuri uru rwego, yiyongera ku mafaranga ibihumbi magana atanu (500,000Frw) buri wese yaciwe mu rubanza rujuririrwa, ni ukuvuga buri wese akamwishyura ibihumbi magana inani na mirongo itanu (850,000Frw) nk’uko yasobanuwe haruguru. [61] Ruvuze ko amagarama yatanzwe ahwanye n’ibyakozwe mu rubanza.