MUNYESHURI v. LETSHEGO RWANDA Plc N’ABANDI

# MUNYESHURI v. LETSHEGO RWANDA Plc N’ABANDI

- Source: Amategeko - Section: Decisions (Judgements) - Date: 2022-09-23 - Case/document no.: RCOMAA 00002/2022/CA - Collection: Court of Appeal

## Text

## Page 1

MUNYESHURI v. LETSHEGO RWANDA Plc N’ABANDI [Rwanda URUKIKO RW’UBUJURIRE – RCOMAA 00002/2022/CA (Ngagi, P.J.) 23 Nzeli 2022 Amategeko agenga imiburanishirize y’imanza z’ubucuruzi – Ibirego byihutirwa – Ibarwa ry’ibihe by’ukujuririra icyemezo ku kirego cyihutirwa – Icyemezo ku kirego cyihutirwa kijuririrwa mu minsi itarenze itatu (3) y’akazi ibarwa kuva ku munsi icyemezo cyasomeweho cyangwa kuva ku munsi ababuranyi bakimenyeyeho. – Iyi minsi itatu ibarwa kuva ku munsi icyemezo cyasomeweho ku baburanyi bari bahari mu iburanisha ry’urubanza cyangwa ikabarwa kuva ku munsi ababuranyi bamenyeshejwe icyemezo ku muburanyi utari uhari urubanza ruburanishwa – Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 188. Incamake y’ikibazo: Munyeshuri yatije ingwate iri mu kibanza gifite UPI 1/02/14/06/3875 Nezehose Elias ndetse yishingira inguzanyo GOSHEN FINANCE Plc yamuhaye nyuma Nezehose aza kunanirwa kuyishyura bituma hatangizwa imihango yo guteza cyamunara iyo ingwate nyuma yaho Umwanditsi Mukuru abitangiye icyemezo. Munyeshuri yatanze ikirego mu Rukiko rw’Ubucuruzi arusaba gutesha agaciro icyemezo cy’umwanditsi Mukuru no guhagarika cyamunara kuri iyo ngwate isanzwe ari umutungo we asangiye na Mukabahizi Speciose ukaba waratanzweho ingwate muri GOSHEN FINANCE Plc ariko ukaba warongeye kwandikwa nk’ingwate ya LETSHEGO RWANDA Plc yishingira inguzanyo yahawe ELIAS CONSTRUCTION Ltd akaba atiyumvisha ukuntu icyangombwa cy’uwo mutungo we asangiye n’umugore we Mukabahizi Speciose cyaje kugera mu maboko ya LETSHEGO RWANDA Plc ndetse ntaniyumvishe ukuntu RDB isanzwe yandika ingwate yanditse iyo ngwate kuri GOSHEN FINANCE Plc nyuma igahindukira ikanayandika kuri LETSHEGO RWANDA Plc banyirayo batabizi ndetse n’amasezerano yo gutiza ingwate LETSHEGO RWANDA Plc akaba yarasanye aziko LETSHEGO RWANDA Ltd igiye kugura umwenda wa Nezehose afite muri GOSHEN FINANCE Plc, agasaba urwo Rukiko ko rwatesha agaciro ayo masezerano y’ingwate ndetse n’icyemezo cy’Umwanditsi Mukuru cyo kugurisha iyo ngwate ndetse akanasaba ko iyo cyamura ihagarara. Urukiko rw’Ubucuruzi rwemeje ko ikirego rwashyikirijwe na Munyeshuri nta shingiro gifite, rwemeza ko nta mpamvu ifatika yarugaragarije yatuma Cyamunara ku mutungo utimukanwa ufite UPI 1/02/14/06/3875 wa Munyeshuri Edouard na Mukabahizi Speciose ihagarikwa. Munyeshuri yajuririye Urukiko Rukuru rw’ubucuruzi avugako Urukiko rw’Ubucuruzi rwirengagije ko nta cyangombwa cy’ingwate y’umutungo uri muri UPI 1/02/14/06/3875 yahaye LETSHEGO RWANDA Plc bigasobanura ko nta ngwate ifite ari nazo mpamvu Cyamura ihagarikwa. Urukiko Rukuru rw’ubucuruzi rwemeye kwakira zimwe mu ngingo z’ubujurire bwa Munyeshuri ariko rwemeza ko nta shingiro zifite bityo rwemeza ko hagumyeho imikirize y’urubanza rwaciwe n’Urukiko rw’ubucuruzi. Munyeshuri yajuririye mu Rukiko rw’Ubujurire avugako Urukiko Rukuru rw’Ubucuruzi rwirengagije ko nta cyangombwa cy’ubutaka LETSHEGO RWANDA Plc yigeze ihabwa, bivuze

## Page 2

ko nta ngwate yahawe, ko rero amasezerano y’ingwate y’umutungo wo mu kibanza gifite UPI: 1/02/14/06/3875 yanditse kuri LETSHEGO RWANDA Plc hamwe n’icyemezo cy’Umwanditsi Mukuru cyo kugurisha iyo ngwate byagombaga guteshwa agaciro na cyamunara igahagarikwa. LETSHEGO RWANDA Plc mu kwiregura kwayo ivugako isaba Urukiko rw’Ubujurire kutakira ubujurire bwa Munyeshuri Edouard kuko bwatanzwe impitagihe (hors délai). Kuko urubanza rwajuririwe rwasomwe ku wa 13/10/2021 ubujurire butangwa ku wa 18/10/2021, ikavuga ko hatubahirijwe igihe cy’iminsi itatu (3) y’akazi ibarwa uhereye igihe urubanza rwasomeweho ko rero umunsi wa nyuma wo kujurira hari tariki ya 15/10/2021. Kuri iyo nzitizi, Munyeshuri we ntacyo yayivuzeho. Incamake y’icyemezo: Icyemezo ku kirego cyihutirwa kijuririrwa mu minsi itatu (3) y’akazi ibarwa kuva ku munsi icyemezo cyasomeweho cyangwa kuva ku munsi ababuranyi bakimenyeyeho. Kandi iyo minsi itatu ibarwa kuva ku munsi icyemezo cyasomeweho ku baburanyi bari bahari mu iburanisha ry’urubanza cyangwa ikabarwa kuva ku munsi ababuranyi bamenyesherejwe icyemezo ku muburanyi utari uhari urubanza ruburanishwa. Ubujurire ntibwakiriwe. Amagarama ahwanye n’ibyakozwe mu rubanza. Amategeko yifashishijwe: Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi, ingingo ya 188. Imanza zifashishijwe: Urubanza RCOMAA 00031/2020/CA; SOTRAPROMETAL Ltd v BANQUE POPULAIRE DU RWANDA Ltd hamwe n’Umwanditsi Mukuru muri RDB rwaciwe n’Urukiko rw’Ubujurire kuwa 25/08/2020. Urubanza RCOMAA 00034/2022/CA; Kigali Citizens Polyclinic Ltd (KCP Ltd) v MUKANDORI Kankwanzi Alphonsine rwaciwe n’Urukiko rw’Ubujurire kuwa 29/06/2022. Urubanza I. IMITERERE Y’URUBANZA [1] Uru rubanza rukomoka ku kirego Munyeshuri Edouard yatanze mu Rukiko rw’Ubucuruzi asaba urwo Rukiko gutesha agaciro icyemezo cy’Umwanditsi Mukuru no guhagarika cyamunara ku ngwate yatanze iri mu kibanza gifite UPI :1/02/14/06/3875 iteganijwe gutangira ku wa 15/09/2021 ikarangira ku wa 14/11/2021. Munyeshuri Edouard yasobanuye ko impamvu asaba ko iyo cyamunara ihagarara ari uko iyo ngwate ishaka kugurishwa isanzwe ari umutungo we na Mukabahizi Spéciose, ikaba yanditse kuri GOSHEN FINANCE Plc nk’ingwate yayo hashingiwe ku nguzanyo yahaye uwitwa Nezehose Elias ikongera ikandikwa kuri LETSHEGO RWANDA Plc nayo nk’ingwate yayo ku nguzanyo yahaye ELIAS CONSTRUCTION Ltd. Avuga ko GOSHEN

## Page 3

FINANCE Plc yagombye gusobanura ukuntu icyangombwa cy’umutungo we na Mukabahizi Spéciose cyaje kugera mu maboko ya LETSHEGO RWANDA Plc itaguze umwenda Nezehose Elias yari afitiye GOSHEN FINANCE Plc kandi ari wo yari yemeye kwishingira no gutiza ingwate. [2] Avuga kandi ko ikindi kitumvikana ari ukuntu RDB yari isanzwe yaranditse ingwate yavuzwe ko ari iya GOSHEN FINANCE Plc hanyuma igahindukira ikanayandika no kuri LETSHEGO RWANDA Plc ba nyirayo batabizi kuko n’amasezerano yo gutiza ingwate LETSHEGO RWANDA Plc igaragaza yayasinyishijwe mu buriganya atamenye ko ari ingwate ye atanze, ahubwo we yari azi ko LETSHEGO iri kugura umwenda Nezehose Elias yarafitiye GOSHEN FINANCE Plc. Asaba ko amasezerano y’ingwate yavuzwe haruguru yanditse kuri LETSHEGO RWANDA Plc n’icyemezo cy’Umwanditsi Mukuru cyo kugurisha iyo ngwate bigomba guteshwa agaciro, cyamunara kuri iyo ngwate igahagarikwa kandi abaregwa bose bafatanyije bagategekwa kumwishyura 500.000 Frw y’ikurikiranarubanza, 1.500.000 Frw y’igihembo cya Avoka na 20.000 Frw y’amagarama. [3] LETSHEGO RWANDA Plc na Munyaneza Valerien bireguye ku kirego cyatanzwe na Munyeshuri Edouard bavuga ko nta shingiro gifite ; urubanza rwaburanishijwe RDB, ELIAS CONSTRUCTION Ltd na LETSHEGO RWANDA Plc badahari, kuko bari barahamagawe mu buryo bukurikije amategeko ariko ntibitaba. [4] Mu rubanza RCOM 01078/2021/TC rwaciwe n’Urukiko rw’Ubucuruzi ku wa 20/09/2021, urwo Rukiko rwemeje ko ikirego rwashyikirijwe na Munyeshuri Edouard nta shingiro gifite, rwemeza ko nta mpamvu ifatika yarugaragarije yatuma cyamunara ku mutungo utimukanwa ufite UPI :1/02/14/06/3875 wa Munyeshuri Edouard na Mukabahizi Spéciose iteganijwe gutangira ku wa 15/09/2021 ikarangira ku wa 14/11/2021 ihagarikwa, rutegeka Munyeshuri Edouard kwishyura GOSHEN FINANCE Plc 100.000 Frw y’ikurikiranarubanza na 500.000 Frw y’igihembo cya Avoka no kwishyura Munyaneza Valerien ushinzwe kugurisha ingwate 50.000 Frw y’ikurikiranarubanza, runategeka ko amafaranga y’ingwate y’amagarama yatanzwe na Munyeshuri Edouard aguma mu Isanduku ya Leta. [5] Munyeshuri Edouard ntiyishimiye imikirize y’urubanza ajuririra mu Rukiko Rukuru rw’Ubucuruzi avuga ko Urukiko rw’Ubucuruzi rwirengagije ko nta cyangombwa cy’ingwate y’umutungo wo mu kibanza gifite UPI:1/02/14/06/3875 yahaye LETSHEGO RWANDA Plc, bisobanuye ko nta ngwate LETSHEGO RWANDA Plc ifite ari nazo mpamvu cyamunara ikwiye guhagarikwa, ko kuba ibyo yabwiwe ko LETSHEGO RWANDA Plc yaguze umwenda ukimukana n’ingwate bitarabayeho, byumvikana ko LETSHEGO RWANDA Plc nta ngwate ifite, cyane cyane ko nta cyangombwa cy’umutungo ifite, ko permit to sell na cyamunara ku mutungo wo mu kibanza gifite UPI:1/02/14/06/3875 bigamije irangiza ry’urubanza RCOM 01455/2020/TC, akaba ari we urimo kwishyuzwa kandi atari we watsinzwe, ko icyemezo n°Ref 021/064381 cyo ku wa 18/08/2021 kirangiza urubanza RCOM 01455/2020/TC hadakurikijwe inzira zo kurangiza imanza, ko mu kurangiza urubanza RCOM 01455/2020/TC amategeko agenga ifatira atubahirijwe, ko kandi umutungo urangirizwaho urwo rubanza ari uwa Munyeshuri Edouard aho kuba uwa Nezehose Elias wategetswe kwishyura, ariko ibyo byose Urukiko rw’Ubucuruzi rukaba rwarabyirengagije.

## Page 4

[6] Ku wa 13/10/2021, Urukiko Rukuru rw’Ubucuruzi rwaciye urubanza RCOMA 00617/2021/HCC rwemeza kwakira zimwe mu ngingo z’ubujurire bwa Munyeshuri Edouard, kuko zatanzwe bikurikije amategeko, ko ariko nta shingiro zifite, rwemeza ko nta gihindutse ku mikirize y’urubanza RCOM 01078/2021/TC, rutegeka Munyeshuri Edouard kwishyura GOSHEN FINANCE Plc na LETSHEGO RWANDA Plc, buri wese, 600.000 Frw y’ikurikiranarubanza n’igihembo cya Avoka mu bujurire, no kwishyura Munyaneza Valerien 200.000 Frw y’ikurikiranarubanza mu bujurire, runategeka ko 40.000 Frw y’amagarama Munyeshuri Edouard yishyuye ajurira aherera ku Isanduku ya Leta. [7] Munyeshuri Edouard ntiyishimiye imikizi y’urubanza ayijuririra na none muri uru Rukiko avuga ko Urukiko Rukuru rw’Ubucuruzi rwirengagije ko nta cyangombwa cy’ubutaka LETSHEGO RWANDA Plc yigeze ihabwa, bivuze ko nta ngwate yahawe, ko rero amasezerano y’ingwate y’umutungo wo mu kibanza gifite UPI: 1/02/14/06/3875 yanditse kuri LETSHEGO RWANDA Plc hamwe n’icyemezo cy’Umwanditsi Mukuru cyo kugurisha iyo ngwate byagombaga guteshwa agaciro na cyamunara igahagarikwa, asaba ko indishyi z’ibyagiye ku rubanza yaciwe zikurwaho kuko nta shingiro zifite, ahubwo ari we ugomba kugenerwa ibyo yataje akurikirana uru rubanza, maze ubujurire bwe bwandikwa kuri RCOMAA 00002/2022/CA. [8] Urubanza rwahamagajwe ku wa 13/09/2022, uwo munsi ntirwaburanishwa kubera ko bamwe mu baregwa batari bamenyeshejwe itariki y’urubanza, rwimurirwa ku wa 20/09/2022. Uwo munsi ruburanishwa Munyeshuri Edouard atitabye, LETSHEGO RWANDA Plc ihagarariwe na Me Abasa Fazili, RDB ihagarariwe na Me Kayigi Kajuga Léon, GOSHEN FINANCE Plc ihagarariwe na Me Umugwaneza Diane, ELIAS CONSTRUCTION Ltd, Nezehose Elias na Munyaneza Valerien batitabye. [9] Urukiko rushingiye ku ngingo ya 54 y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi rufata icyemezo ko urubanza ruburanishwa Munyeshuri Edouard wajuriye adahari kuko atagaragaje impamvu yatumye atitaba, urubanza ruciwe rukazafatwa nk’urwaburanishijwe ahari, runashingiye ku ngingo ya 56 y’iryo Tegeko rwemeza ko urubanza ruburanishwa ELIAS CONSTRUCTION Ltd, Nezehose Elias na Munyaneza Valerien badahari kuko bamenyeshejwe itariki y’ibiranisha, ariko ntibitaba kandi bakaba batagaragaje impamvu yatumye batitaba, haburanishwa inzitizi yatanzwe na LETSHEGO RWANDA Plc hamwe na RDB yo kutakira ubujurire bwa Munyeshuri Edouard kuko yajuriye atinze. II. IBIBAZO BIGIZE URUBANZA N’ISESENGURA RYABYO 1. Kumenya niba ubujurire bwa Munyeshuri Edouard butaratanzwe mu bihe bikurikije amategeko [10] Uhagarariye LETSHEGO RWANDA Plc avuga ko basaba Urukiko rw’Ubujurire kutakira ubujurire bwa Munyeshuri Edouard kuko bwatanzwe impitagihe (hors délai). Asobanura ko urubanza rujuririrwa rwasomwe ku wa 13/10/2021 (hari ku wa gatatu/ Wednesday) ubujurire butangwa ku wa 18/10/2021, ko rero hashingiwe ku ngingo ya 260, igika cya 5, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi hamwe n’iya 188, igika cya 2, y’iryo Tegeko, iminsi yo kujurira ari itatu (3) y’akazi ibarwa uhereye igihe urubanza rwasomeweho; ko ibi bisobanura neza

## Page 5

ko tariki ya 13/10/2021 nayo ibarwa, hamwe n’iya 14/10/2021, n’iya 15/10/2021, ko rero umunsi wa nyuma wo kujurira hari ku wa gatanu (Friday) tariki ya 15/10/2021. [11] Uhagarariye RDB avuga ko yemeranywa n’ibivugwa n’uhagarariye LETSHEGO RWANDA Plc, akaba asaba ko iyi nzitizi yahabwa ishingiro. Uhagarariye GOSHEN FINANCE Plc asaba Urukiko kuyisuzuma. Mu myanzuro y’ubujurire ya Munyeshuri Edouard ntacyo yavuze kuri iyi nzitizi. ELIAS CONSTRUCTION Ltd, Nezehose Elias na Munyaneza Valerien nabo ntacyo bayivuzeho, kuko batitabye Urukiko kandi nta n’imyanzuro yo kwiregura batanze. UKO URUKIKO RUBIBONA [12] Ingingo ya 188, igika cya 2, y’Itegeko No 22/2018 ryo ku wa 29/04/2018 ryerekeye imiburanishirize y’imanza z’imbonezamubano, iz’ubucuruzi, iz’umurimo n’iz’ubutegetsi iteganya ibikurikira : Igihe cyo kujuririra icyemezo ni iminsi itarenze itatu (3) y’akazi uhereye ku munsi icyemezo cyasomeweho cyangwa ababuranyi bakimenyeyeho. Urubanza narwo rucibwa mu gihe kitarenze iminsi itatu (3) y’akazi. [13] Ingingo ya 260, igika cya 5, y’Itegeko No 22/2018 ryo ku wa 29/04/2018 ryavuzwe haruguru, iteganya ko ibirego byo guhagarika no gutesha agaciro cyamunara bitangwa kandi bikaburanishwa mu bihe by'ibirego byihutirwa. [14] Ingingo ya 274 y’Itegeko No 22/2018 ryo ku wa 29/04/2018 ryavuzwe haruguru iteganya ibikurikira : “Usibye mu gihe itegeko ryaba ribiteganya ukundi, ibihe byagenwe mu manza z’imbonezamubano, iz’ubucuruzi, iz’umurimo n’iz’ubutegetsi bikurikiza amategeko avugwa muri uyu mutwe”. Ingingo ya 275 y’iryo Tegeko iteganya ibikurikira : “Ku bihe bibarwa mu minsi cyangwa mu masaha, bibarwa umunsi ku munsi, n’isaha ku isaha hakurikijwe igihe bimara kandi umunsi igikorwa cyakoreweho ntubarwamo, ahubwo habarwa umunsi wa nyuma kigomba kurangiriraho”. [15] Urukiko rusomeye hamwe ingingo ya 274 n’iya 275 z’Itegeko No 22/2018 ryo ku wa 29/04/2018 ryavuzwe haruguru rusanga izo ngingo zumvikanisha ko iyo nta bundi buryo Umushingamategeko yateganyije bwerekana uko ibihe bivugwa mu Itegeko ryerekeye imiburanishirize y’imanza z’imbonezamubano iz’ubucuruzi, iz’umurimo n’iz’ubutegetsi bigomba kubarwa, ibyo bihe bigomba kubarwa nk’uko ingingo ya 275 y’Itegeko No 22/2018 ryo ku wa 29/04/2018 ibiteganya. Mu yandi magambo ingingo ya 275 ikoreshwa mu kubara ibihe bivugwa muri iryo Tegeko iyo nta bundi buryo Umushingamategeko yateganyije bwo kubara ibihe bivugwa mu ngingo runaka y’iryo Tegeko. [16] Nk’uko byibukijwe haruguru, ibirego byo guhagarika no gutesha agaciro cyamunara bitangwa kandi bikaburanishwa mu bihe biteganywa n’amategeko ku birebana n’ibirego byihutirwa. [17] Urukiko rusesenguye ingingo ya 188 y’Itegeko No 22/2018 ryo ku wa 29/04/2018 ryavuzwe haruguru rusanga iyi ngingo yumvikanisha ko icyemezo ku kirego cyihutirwa kijuririrwa mu minsi itarenze itatu (3) y’akazi ibarwa kuva ku munsi icyemezo cyasomeweho cyangwa kuva ku munsi ababuranyi bakimenyeyeho. Mu yandi magambo iyi minsi itatu ibarwa kuva ku munsi icyemezo cyasomeweho ku baburanyi bari bahari mu iburanisha ry’urubanza

## Page 6

cyangwa ikabarwa kuva ku munsi ababuranyi bamenyeshejwe icyemezo ku muburanyi utari uhari urubanza ruburanishwa. [18] Urukiko rurasanga ibiteganywa mu ngingo ya 188 y’Itegeko No 22/2018 ryo ku wa 29/04/2018 ryavuzwe haruguru, ari irengayobora ku biteganywa mu ngingo ya 275 y’iryo Tegeko, kuko mu ngingo 188 y’Itegeko No 22/2018 ryo ku wa 29/04/2018 Umushingamategeko yashyizeho uburyo iminsi itatu igomba kubarwa butandukanye n’ubuteganywa mu ngingo ya 275 y’iryo Tegeko, bikaba rero byumvikana ko mu kubara ibihe byo kujuririra icyemezo cyihutirwa hatarebwa uburyo bwo kubara ibihe buteganywa mu ngingo ya 275 y’Itegeko No 22/2018 ryo ku wa 29/04/2018 yavuzwe haruguru, ahubwo umunsi igikorwa cyakoreweho nawo urabarwa nk’uko biteganywa mu ngingo ya 188 y’iryo Tegeko. Ibi ni nako uru Rukiko rwabibonye mu manza zitandukanye zirimo urubanza RCOMAA 00031/2020/CA, haburana SOTRAPROMETAL Ltd na BANQUE POPULAIRE DU RWANDA Ltd hamwe n’Umwanditsi Mukuru muri RDB1, ndetse n’urubanza RCOMAA 00034/2022/CA, haburana Kigali Citizens Polyclinic Ltd (KCP Ltd) na MUKANDORI Kankwanzi Alphonsine.2 [19] Urukiko rurasanga urubanza RCOMA 00617/2021/HCC rujuririrwa rwaraciwe ku wa gatatu tariki 13/10/2021, Munyeshuri Edouard ajuririra uru Rukiko ku wa mbere tariki ya 18/10/2021. Rurasanga iminsi itatu y’akazi iteganywa mu ngingo ya 188, igika cya 2, y’Itegeko n° 22/2018 ryo ku wa 29/4/2018 ryavuzwe haruguru, igomba kubarwa kuva ku wa 13/10/2021, umunsi icyemezo kijuririrwa cyasomeweho, bityo kuba tariki ya 13/10/2021 hari ku wa gatatu (Wednesday), iminsi itatu y’akazi yuzuye ku wa gatanu (Friday) tariki ya 15/10/2021, akaba ari yo tariki Munyeshuri Edouard atagombaga kurenza kugira ngo abe yubahirije ibihe byo kujurira. Kuba rero Munyeshuri Edouard yarajuriye ku wa 18/10/2021, biragaragara ko atubahirije ibihe byo kujurira biteganywa n’Itegeko nk’uko byibukijwe haruguru, bityo ubujurire bwe ntabwo bwakiriwe. 2. Kumenya niba LETSHEGO RWANDA Plc igomba guhabwa amafaranga y’ikurikiranarubanza n’igihembo cya Avoka isaba [20] Uhagarariye LETSHEGO RWANDA Plc avuga ko basaba Urukiko gutegeka Munyeshuri Edouard guha LETSHEGO RWANDA Plc 1.000.000 Frw y’igihembo cya Avoka na 500.000 Frw y'ikurikiranarubanza. Uhagarariye GOSHEN FINANCE Plc avuga ko ntacyo basaba Munyeshuri Edouard kuko no mu bujurire bwe ntacyo abasaba, ndetse n’uhagarariye RDB avuga ko ntacyo bamusaba. [21] Mu myanzuro y’ubujurire ya Munyeshuri Edouard ntacyo yavuze ku mafaranga y’ibyagiye ku rubanza yasabwe na LETSHEGO RWANDA Plc, nta nubwo yitabiriye iburanisha ry’urubanza ngo ayiregureho.

1 Reba igika cya 19 n’icya 20 by’urubanza N° RCOMAA 00031/2020/CA rwaciwe n’Urukiko rw’Ubujurire ku wa 25/8/2020, haburana SOTRAPROMETAL Ltd na BANQUE POPULAIRE DU RWANDA Ltd hamwe n’Umwanditsi Mukuru muri RDB. 2 Reba igika cya 30 n’icya 34 by’urubanza No RCOMAA 00034/2022/CA rwaciwe n’Urukiko rw’Ubujurire ku wa 29/06/2022, haburana Kigali Citizens Polyclinic Ltd (KCP Ltd) na MUKANDORI Kankwanzi Alphonsine.

## Page 7

UKO URUKIKO RUBIBONA [22] Ingingo ya 111 y’Itegeko No 22/2018 ryo ku wa 29/04/2018 ryavuzwe haruguru, iteganya ibikurikira : “Ikirego cy’amafaranga y’ikurikiranarubanza ni ikirego gishamikira ku kirego cy’iremezo kigamije kwishyuza ibyakoreshejwe mu rubanza. Ikirego cy’amafaranga y’ikurikiranarubanza kiburanishirizwa rimwe n’ikirego cy’iremezo. Gishobora kandi kwakirwa kikanaburanishwa n’iyo ikirego cy’iremezo cyaba kitakiriwe”. [23] Urukiko rurasanga amafaranga y’igihembo cya Avoka n’ay’ikurikiranarubanza LETSHEGO RWANDA Plc isaba ikwiye kuyahabwa, kuko byabaye ngombwa ko ishaka Avoka wo kuyiburanira, ariko rukaba rusanga ayo isaba ari menshi harebwe ko urubanza rugarukiye ku nzitizi ; bityo mu bushishozi bwarwo rukaba ruyigeneye 500.000 Frw y’igihembo cya Avoka na 200.000 Frw y’ikurikiranarubanza, kuri uru rwego. III. ICYEMEZO CY’URUKIKO [24] Rwemeje ko inzitizi yo kutakira ubujurire bwa Munyeshuri Edouard yatanzwe na LETSHEGO RWANDA Plc hamwe na RDB ifite ishingiro. [25] Rwemeje ko ubujurire bwatanzwe na Munyeshuri Edouard butakiriwe. [26] Rutegetse Munyeshuri Edouard kwishyura LETSHEGO RWANDA Plc 500.000 Frw y’igihembo cya Avoka na 200.000 Frw y’ikurikiranarubanza, kuri uru rwego. [27] Ruvuze ko amafaranga y’amagarama yatanzwe ahwanye n’ibyakozwe mu rubanza.